United Church in Zambia

Die United Church in Zambia is die grootste kerkgenootskap in Zambië naas die Rooms-Katolieke Kerk. Die kerk maak aanspraak op sowat 3 miljoen lidmate en het meer as 1050 gemeentes.

Ontstaan

Die United Church in Zambia het ontstaan as die United Church of Central Africa in Rhodesia danksy baanbrekerswerk deur die Londense Sendinggenootskap, die sendingtak van die Church of Scotland, die Union Church of the Copperbelt en die Copperbelt Free Churches. Toe die ontginning van koper vroeg in die dekade na 1920 in die Koperstreek begin het, het Christene uit alle uithoeke van die destydse Noord-Rhodesië en ook uit die buiteland op die kopermyne gaan werk. Interkerklike aanbidding het in die blanke sowel as die swart woongebiede begin. In daardie stadium het die Londense Sendinggenootskap, die Church of Scotland en die Sendinggenootskap van die Metodistekerk reeds saamgewerk op onderwys- en welsynsgebied en daarom was die volgende logiese stap om die Union Church of the Copperbelt te stig. Kort hierna het die blanke gemeentes byeengekom en die Copperbelt Free Church Council gestig.

Vereniging

Teen 1945 is die weg gebaan vir die vereniging van die Londense Sendinggenootskap en die Church of Scotland Mission, wat saam die Church of Central Africa in Rhodesia gevorm het. Die twee genootskappe het amptelik in 1958 verenig. In 1965 het dié kerk met die Metodistekerk en die Church of Barotseland as die United Church in Zambia verenig. Dit is verreweg die grootste Protestantse kerkverband in Zambië en sy lidmate neem steeds vinnig toe.