Suid-Afrikaanse militêre dekorasies: 2003-

Die Suid-Afrikaanse Nasionale Weermag, wat in 1994 gestig is, het tot 2003 die dekorasies en medaljes van sy voorganger, die Suid-Afrikaanse Weermag, gebruik. 'n Heeltemal nuwe, en heelwat kleiner, reeks toekennings is toe in 2003 vir die SANW ingestel. Dit bestaan uit dekorasies vir dapperheid, uitnemende leierskap, en voortreflike diens; 'n veldtogmedalje; 'n medalje vir troue diens; en twee embleme. Die burgerlike Orde van Mendi vir Dapperheid is ook aan SANW-lede beskikbaar.

Dekorasies

Nkwe ya Gauta (NG) (2003- ), die "Goue Luiperd", vir buitengewone dapperheid gedurende militêre operasies. 'n Goue vyfarmige kruis met 'n ligblou skyf wat 'n goue luiperdkop uitbeeld. Dit hang aan 'n ligblou lint met goudkleurige randstrepe.

Nkwe ya Selefera (NS) (2003- ), die "Silwer Luiperd", vir uitnemende dapperheid gedurende militêre operasies. Dieselfde ontwerp as die NG, maar in silwer. Dit hang aan 'n ligblou lint met wit randstrepe.

Nkwe ya Boronse (NB) (2003- ), die "Brons Luiperd", vir dapperheid gedurende militêre operasies. Dieselfde ontwerp as die NG maar in brons. Dit hang aan 'n ligblou lint met bronskleurige randstrepe.

iPhrothiya yeGolide (PG) (2003- ), die "Goue Protea", vir buitengewone leierskap of buitengewone voortreflike diens en uiterste pligsgetrouheid. 'n Goue sespuntige ster met 'n blou seshoek waarop 'n goue proteablom uitgebeeld word. Die lint is blou, met 'n goudkleurige middelbaan verdeel deur 'n swart streep.

iPhrothiya yeSiliva (PS) (2003- ), die "Silwer Protea", vir uitnemende leierskap of uitnemende voortreflike diens en pligsgetrouheid. Dieselfde ontwerp as die PG, maar in silwer. Die lint is blou, met 'n wit- swart- goud- swart- wit middelbaan.

iPhrothiya yeBhronzi (PB) (2003- ), die "Brons Protea", vir leierskap of voortreflike diens en pligsgetrouheid. Dieselfde ontwerp as die PG en PS, maar in brons. Die lint is blou, met 'n wit middelbaan verdeel deur drie swart strepe.

Veldtogmedalje

Tshumelo Ikatelaho (2003- ), die "Algemene Diensmedalje" vir deelname aan militêre operasies waarvoor spesifieke veldtogmedaljes nie uitgereik word nie, bv vredesmagoperasies. 'n Agthoekige nikkel medalje wat 'n negepuntige ster binne 'n lourierkrans vertoon. Dit hang aan 'n rooi lint met blou en wit randstrepe en 'n goud-omlynde swart middelstreep.

Medalje vir troue diens

Medalje vir Troue Diens (2003- ), vir 10 jaar diens. Gespes word vir bykomende 10-jaar diensperiodes toegeken. 'n Silwer medalje met 'n uitgeskulpte rand wat die huidige landswapen vertoon. Die lint is groen met rooi en wit randstrepe aan die linkerkant en blou en wit aan die regterkant.

Embleme

Okhankanyiweyo (2003- ), die "Eervolle Vermelding in Berigte"-embleem wat toegeken kan word vir dapperheid, leierskap, pligsgetrouheid of prysenswaardige diens gedurende militêre operasies. 'n Miniatuur brons landswapen wat aan die lint van die relevante veldtogmedalje vasgemaak is.

Emblem for Reserve Force Service (RD) (2003- ), die "Embleem vir Diens in die Reserwemag" wat aan RM-lede toegeken kan word nadat hulle 20 jaar diens voltooi het, minstens 5 jaar waarvan in die RM verrig is. Die embleem bestaan uit die letters RD ("Reserve Force Distinction") in silwer en word aan die lint van die Medalje vir Troue Diens vasgemaak.

Verwysings

Republiek van Suid-Afrika Staatskoerant Nr 25213 (25 Julie 2003) (beskikbaar op die regeringswebwerf Geargiveer 6 Junie 2005 op Wayback Machine)

Sien ook