Kiel
- Hierdie artikel handel oor 'n onderdeel van 'n skip of boot. Vir die artikel oor die Duitse stad, sien asb. Kiel, Duitsland.
Die kiel is 'n belangrike onderdeel in die konstruksie van 'n skip of boot. Die kiel vorm as't ware die ruggraat van die skip met die ribbe (spante) wat dwars daaroor vasgemaak word. Seilskepe se kiel steek dikwels diep in die water in. Die dwarskragte van die wind word dan sodoende deur die kiel omgesit in voorwaartse kragte en voorkom dat die boot verlyer (omkantel). 'n Kiel wat ingetrek kan word, staan ook as 'n swaard bekend. 'n Kiel kan ook swaarder gemaak word om die swaartepunt van die skip of boot te verlaag. Sodoende word die stabiliteit van die skip/boot verbeter en kantel die vaartuig nie so maklik om nie.
'n Kiel kan verskillende vorme aanneem en uit verskillende materiale bestaan. By die meeste bote bestaan die kiel uit 'n baie dik plank wat onder aan die skip vasgemaak is. Baie seiljagte het 'n vinkiel met 'n swaar ronding onderaan wat met lood of gietyster gevul is. By die groot tradisionele seilskepe was daar egter slegs sprake van 'n groot kielbalk deur die lengte van die skip. Die nuwe generasie seiljagte soos wat deelneem aan die Volvo Ocean Race het 'n pendelkiel wat aan 'n skarnier aan die skeepsromp se bodem geheg is. Die soort kiel kan dan die teengewig se effek versterk. Tydens die bou van houtskepe word die kiel eerste gevorm waarna die ander elemente daaraan vasgemaak word.
