葵青劇院

葵青劇院（Kwai Tsing Theatre）係香港一劇院，喺葵芳中部，就近港鐵葵芳站。佢係區域市政局決定起嘅，喺葵青區，所以就叫葵青劇院。戲院一九九六年動工，一九九九年啟用。家下係香港中型表演場地之一。

地理

葵青劇院周圍，四面平坦，三面環路，一面接樓。佢東北係新都會廣場，西北有興芳路，西南有葵福路，東南有興寧路。而佢正門門牌，就係興寧路十二號。東面見葵芳地鐵站，西北見葵涌運動場。

葵青劇院，塊地原本係葵涌對出嘅垃圾灣，卽係海來嘅，有水上人聚居。二十世紀六十年代，垃圾灣填海，是爲葵涌新區。而葵青劇院笪地，連同家下新都會廣場、葵涌廣場兩笪地，曾經係葵泰臨時房屋區所在地。葵泰拆咗之後，先後落成葵涌廣場、新都會廣場，而葵青劇院笪地，就一直丟空。

喺新界人口眾多嘅行政區之中，都有大會堂、民娛中心等，唯獨葵青區無文藝表演場地。最尾區域市政局決定起葵青劇院。劇院於一九九六年動工，耗資約莫四億七千萬港元。到咗一九九九年十一月十八號，由臨時區域市政局主席劉皇發主持開幕。

後尾香港政府廢區域市政局，場地就交畀政府部門，康樂及文化事務署管。

葵青劇院家下係康樂及文化事務署之下，新界五個主要演藝場地之一。劇院外表，由幾個弧形組成，牆有曲有直，以圓滑夾埋一個建築。咁嘅外觀，標誌本土藝術多元。劇院主要表演場地，有演藝廳，是爲中型表演場地。此外有展覽場地、排演同埋演講室，種種設施，迎合藝術工作者嘅需要。