睾丸扭曲
睾丸扭曲或稱睾丸扭轉（英文：Testicular torsion）係一種急症，指男性嘅精索扭轉從而切斷向睾丸同埋附睾供血。
成因
[編輯]位於陰囊裏面嘅每粒睾丸正常時緊貼於陰囊，各由一抽精索連繫住，精索入面有動脈、靜脈同淋巴管。當抽精索扭轉咗，睾丸靜脈啲血冇辦法流出嚟、睾丸動脈啲血又流唔到入粒睾丸，睾丸嘅淋巴同血液循環就受阻。
睾丸扭曲可以分為鞘膜外型同埋鞘膜內型。鞘膜外型多數發生喺男仔，而鞘膜內型較常見於後生仔同成年人；25歲以下嘅男人發生率大約1/4000，而12到18歲發育期嘅𡃁仔最容易發生，因為睾丸發育得太快導致位置改變，又或者粒睾丸喺睾丸鞘膜裏頭仲未固定而扭轉。[1]睾丸扭曲甚至會發生喺未出世嘅BB仔身上，但好鬼罕見，每十萬名男嬰約有六個案例。[2]
風險因素
[編輯]約40%嘅睾丸扭曲發生喺瞓覺當中或者啱啱瞓醒，可能係瞓覺時迷走神經興奮，令精索嘅提睾肌收縮增加；有啲係睡姿不當令兩條腿經常擠壓睾丸，導致粒睾丸被逼改變位置，另外劇烈體力勞動、寒冷、頻繁性交都可能誘發睾丸扭曲。[1]
九成睾丸扭曲個案都屬於精索過長；睾丸橫置、睾丸癌同埋睾丸未降都會增加發病機會，但由睾丸受傷或受撞擊導致扭轉嘅機會則只有4%至8%。睾丸扭曲多數只係扭一邊睾丸，兩抽精索同時扭轉嘅個案只佔一至兩成。[3]
症狀
[編輯]睾丸扭曲並冇先兆，當精索扭轉就會扯高粒睾丸，唔再處於正常位置，又正常為垂直嘅睾丸扭曲後多會變打橫，輕輕掂下就劇痛；同時睾丸會腫同出血，引起陰囊突發極痛，或者由隱痛加劇並轉為持續疼痛，有啲人更會有噁心或嘔吐感覺。
診斷及治療
[編輯]當粒睾丸升高或者扭橫，有經驗嘅醫生靠觸診就知道，但亦有機會係同發睾丸炎相似。要有效區分係睾丸扭曲定發炎，可以經超聲波檢查嘅彩色多普勒掃描，顯示血流情况。睾丸扭曲血液供應大幅減少；睾丸發炎就會血流增加。
當睾丸扭曲後，睾丸同附睾突然缺血，短時間內就會壞死並須切除睾丸，所以要喺病發後六個鐘頭內做手術復原、回復血液供應，就約有八至九成機率救返粒睾丸；一旦超過咗十個鐘，救返機率唔夠一成，而超過一日，睾丸壞死，必須切除。[4]
手術除咗為扭曲嘅睾丸復位，另外無事嗰粒都會做埋睾丸固定術，為兩粒睾丸一齊增加穩定性，降低日後復發扭曲機率。
睇埋
[編輯]參攷
[編輯]- ↑ 1.0 1.1 連峻 (2016年6月8號)。〈扭扭蛋〉。am730。原著喺2021年7月14號歸檔。喺2020年11月17號搵到。
- ↑ 〈英婦產檢 揭胎兒睾丸扭曲〉。東方日報。2018年2月12號。喺2020年11月17號搵到。
- ↑ 〈精索扭轉可致睾丸壞死〉。東方日報。2015年5月22號。喺2020年11月17號搵到。
- ↑ 陳雅君 (2015年9月21號)。〈搶救扭蛋黃金6小時睾丸扭轉快速缺血壞死〉。明報。喺2020年11月11號搵到。
拎
[編輯]- 美國American Urological Association協會Youtube影片：Intraoperative evaluation of Testicular Torsion