PTT
Phi-thek-thek Si̍t-gia̍p-hong (批踢踢實業坊), he̍k-chiá PTT, sī chi̍t ê BBS, í ha̍k-su̍t sèng-chit ûi bo̍k-tek, tī bāng-lō͘ téng thê-kiong giân-lūn khong-kan. PTT bo̍k-chiân sī iû Kok-li̍p Tâi-oân Tāi-ha̍k ê Tiān-chú Pò͘-kò-lân Hē-thóng Gián-kiù-siā (電子佈告欄系統研究社) koán-lí, toā-pō͘-hūn ê hē-thóng goân-tāi-bé bo̍k-chiân sī iû Chu-sìn Kang-têng Ha̍k-hē ê ha̍k-seng kap hāu-iú chìn-hêng î-hō͘, pēng iau-chhiáⁿ hoat-lu̍t choan-gia̍p jîn-sū tam-jīm hoat-lu̍t kò͘-būn. I ū nn̄g ê hun-chām, Phi-thek-thek Thò͘ (批踢踢兔) kap Phi-thek-thek Som (批踢踢參). Bo̍k-chiân tī Phi-thek-thek Si̍t-gia̍p-hong kap Phi-thek-thek Thò͘ téng ê chù-chheh jîn-sò͘ lóng-chóng tāi-iok ū 150-bān lâng; tī chiam-hong sî-toāⁿ nn̄g chām ū chhiau-kòe 15-bān ūi sú-iōng-chiá kāng sî-kan chiūⁿ-soàⁿ, ióng-iú chhiau-kòe 2-bān ê bô-kāng chú-tê ê khan-páng, ta̍k-kang chhiau-kòe 2-bān phiⁿ sin bûn-chiuⁿ kap 50-bān chek thui-bûn pī hoat-piáu.