Pang-chān:官方語言

官方語言指一个政治單位透過法律、政令，抑是其他个政治力制定佮推廣佇官方領域使用个語言。政治單位會使是國家、國家聯盟（歐洲聯盟）、國際組織（親像聯合國）、無國家地位个政治體（親像依賴地），抑是國家下跤設个任何一層行政單位（省、縣、鄉鎮等等），教育政策指定使用个教學語言定定包括在內。

官方語言和國語、民族語言未必相𫝛 (siâng)，一个政治單位無一定干焦一个官方語言若定。官方語言嘛未必是指定範圍內上通行个語言；佇一寡仔國家（親像愛爾蘭（Éire）），官方語言个象徵意義較大實際上个使用。

官方語言个制定嘛有可能包括文字。可比講中華民國官方佮教育界並無鼓勵𪜶 (in)个國民用簡體漢字和國家機關（包括學校）接接，佇私人領域就無管制。