Bawm haw-rawp Aw-pak (Vowel) leh Aw-bawb (Consonant) tla mangdan simhfiangnak

- Vannunsiam Bawm
General Secretary, YBA

Thumasa: Kan pi-le-pu sim danhen leh lasui dang dangah rin mi simhfiang danhen
kum 1918 ah Pu Edwin Rolands (Pu Zo Sapthar) chu, Chittagong Hill Tracts ah Lalpa
Thawngthang Tha sim ding hen khual a hawng tlawng le, kum 1919 ah chun Bawm
khua, “Vairelh” ti mi ah a hawng tleng rawh. A nehnun kum 2 nak kum 1920 ah Pu
Patlaia, Pu Lian Thawnga leh Pu Saikunga chu North East International General
(NEIG) Mission nih Chittagong Hill Tracts ah a hawng fial na nawlh. An nih tla nih
chun Pathian thu cho an hawng sim lo le, rin leh rel kho ding hen Mizo lei hen haw-
rawp tla kan Bawm mipi tla rangah sintirnak an pek vima rawh asi. Mizo haw-rawp
hen sintirnak an pek vima mi khawm chu, Roman script thawk hen laksuak mi nget
asi. Lasui tla rel leh rin kho vima hen kum 1927 ah Bawmfa chu, Kristian Sakhua
lung a dawmh rawh le, kum 1928 ah Baptisma chang an a dawmh asi rawh.

Chu mi hun tla hawng kal vima nunah chun, Pu L. Dolian nih Bawm Bu-Bulbu ti hen
Churachandpur NEIG Mission ah kum 1951 pawl VII leh pawl VIII a sinliaua a
timhtuah mi chu kum 1952 muh asi rawh. Chu mi Bawm Bu-Bulbu a timhtuah mi
lakah chun tusun ni tiangri thawn vima asi le, haw-rawp 25 mang asi. Hi haw-rawp
25 lakah, “Aw-bawb (Consonant) leh Aw-pak (vowel)” ti hen chi zat nih (2) hen
thliar asi. Kan chalung aw-pak leh aw-bawb lakah chalung bawb khawm kan nei le, a
zeimawmi chalung chu kan mang lo mi khawm a um. A biktak hen aw, ch leh ng chu
chalung bawp asikhawmsele, chalung pakhat ah ngaih asi. Chun, “G” leh “J” chu kan
mangnak hi a tawm, manglo khawm ah kan lasui rin lakah a pawipi lo mi hawi hen a
lang asi.

Hinah, Aw-bawb (Consonant) leh Aw-pak (Vowel) tla meltheihnak hawng siam mi
asi le, chu mi rual rual hen a timhtuah leh mangnak duandan tla tlunah hawng
simhfiang dauh asi.
Vowels and Consonants:

Aw-pak a aw e i o u
Aw-bawb b ch d f g ng h j k l m n p r s t t v z

Aw-pak (Vowel): Haw-rawp amah a pak hen lam ri kho mi vial tla chu, aw-pak
(Vowel) ti asi. Aw-pak haw-rawp tla hi haw-rawp dang bawbpi an ngai lo le, an mah
lawngte hen lam ri kho ver mi an si. Bawm haw-rawp kul panga (25) lakah, aw-pak
(Vowel) panga ruk (6) kan nei asi. Chu tla chu –

a, aw, e, i, o leh u tla an si.

Hi haw-rawp tla hi an mah lawngte hen lam ri kho an si ver. Chun, lam ri kho mi
lakah khitnak (meaning) khawm nei ver an si. Aw-pak (Vowel) haw-rawp lakah cho
thluk nem tuah kho a si.
Simhfiangnak leh mangnak: Hi haw-rawp tla nih an mah lawngte hen lam ri an nei
kho ver mi tlunah mangnak leh zauhtawnhnak hawng siam asi.
1. “A” hi haw-rawp pakhat asi. “A” lam ri kho ding hen haw-rawp dang bawbpi a
ngai lo le, rel hen lam chawlh kho asi. Chun, “A” nih khitnak (meaning) khawm
a lakah a pai sih asi. Bawm hawlh lakah 3 rd Person Singular Number leh
Interjection mawh Exclamation lakah “A” hi amah pak hen mang tawn chem
hen a lang asi.

a. 3rd Person Singular Number asi chun, “A” mang ding asi. Hi hawi hen (A
tangah mi thutluan lakah a bold mi tla) –
 A min au?
 Zei Sikul ah a sin?
 Pastor riantuan a dawmh rawh.
 Arpinu a tap, sangarpa a ni.

b. Interjection mawh Exclamation chu, thinlung purh dauh hen thusim asi. Hi
hawi mi thula tla lakah khawm “A” hi mang ding asi. Hi hawi hen (A tangah
mi thutluan lakah a bold mi tla) –
 A che a!
 Chu a!
 A pawi ual a!

c. Mi au mawh minung sinak a tlingziar lo mi khitnak rangah; “A” thluk niam

pek hen mang asi. Hi hawi hen –
 Mi â sinah thu tha sim a lawk loh.

2. “AW” hi haw-rawrawp pakhat ngaih asi. Hi haw-rawp khawm, a dang haw-

rawp bawbpi ngai lo hen, rel hen lam ri chawlh kho mi asi. “AW” a dan tlangpi
hen kan mang mi kangnung tla chu, mi aumawh thusim zawmpinak leh a dik lai
ti lungumnak lakah mang asi. Hi hawi hen –
 Aw, hawi ma?
 Aw, ka theih rawh
 Aw, mah ta a

3. “E” hi haw-rawp pakhat asi. Hi haw-rawp khawm a dang haw-rawp bawbpi

ngai lo, a mah lawngte hen lam ri kho asi. “E” a dan tlangpi hen kan mang mi
kangnung tla chu –

a. Mi au rangah mawh ngiarnak thuthluan lakah “E” hi mang asi. Hi hawi hen
- Hawng kal e, Hawng simh mang bak e (request)
b. Lungdi riam leh lawmhnak thuthluan tla lakah khawm “E” mang asi. Hi
hawi hen - Ka lawm e
c. Interjection mawh Exclamation chu, thinlung purh dauh hen thusim asi. Hi
hawi mi thula tla lakah khawm “E” hi mang ding asi. A biktak hen, thinlung
zur leh a fak liauah aw-ka suak asi. Hi hawi hen (A tangah mi thutluan
lakah a bold mi tla) – Eee....e, kei e!
 4. “I” khawm haw-rawp pakhat asi le, haw-rawp dang bawbpi a ngai lo, a mah
lawngte hen lam ri kho mi haw-rawp asi. “I” a dan tlangpi hen kan mang mi
kangnung tla chu –

a. Mi aumawh thusim mailei thuah awi-nak mawh ti ding hen khainak thu
lakah “I” hi mang asi. (A tangah mi thutluan lakah a bold mi tla) Hi hawi hen
–
 I, ka hawng lai.
 I, ka simh lai.
 I, a ti ka lai rawh.

b. Mi aumawh thu zawtnak mawh thu deih sangnak lakah “I” mang asi. Hi
hawi hen (A tangah mi thutluan lakah a bold mi tla) –
 Lalpar buh a ei lo mu? I, a ei loh
 Thahai a ei mu? I, a ei ta a

5. “O” khawm haw-rawp pakhat asi. Haw-rawp dang bawbpi ngai lo hen a mah
karo lam ri kho mi haw-rawp asi. Hi haw-rawp hi amah lawng lam ri kho
khawmsele, khit (meaning) a mah lawng hen chun; a nei lem lo asi.

6. “U” khawm haw-rawp pakhat asi. Haw-rawp dang bawbpi ngai lo hen a mah
lawng lam ri kho mi asi. “U” a dan tlangpi kan mangnak chu –

a. Kan mah ngak upa dauh zahnak rangah “U” ti hen mang asi. Hi hawi hen –
 U, na dam ma?
 Na u a hawng ma?
b. Interjection mawh Exclamation chu, thinlung purh dauh hen thusim asi. Hi
hawi mi thula tla lakah khawm “U” hi mang ding asi. A biktak hen, thinlung
zur leh a fak liauah aw-ka suak asi. Hi hawi hen (A tangah mi thutluan lakah
a bold mi tla) – U! a vawi lai loh, U! a pawi ual

Aw-bawb (Consonant): Haw-rawp amah a pak hen lam ri kholo mi vial tla chu,
Aw-bawb (Consonant) ti asi. Aw-bawb haw-rawp tla hi haw-rawp dang bawbpi an
ngai le, an mah lawngte hen lam ri kho an si lo. Bawm haw-rawp kul panga (25)
lakah, aw-bawp (Consonant) lei kua (19) kan nei asi. Chu tla chu –

b, ch, d, f, g, ng, h, j, k, l, m,
n, p, r, s, t, t, v leh z tla an si.

Hi haw-rawp tla hi an mah lawngte hen lam ri kholo mi ver asi. Hi haw-rawp lam ri
kho ding hen, aw-pak (vowel) haw-rawp bawbpi an ngai tlat asi. Hi aw-bawb
(consonant) tla hen thumal tuah ding khawm ah aw-pak (vowel) haw-rawp bawbpi
an ngai.

An mah haw-rawp lam ri kho ding hen aw-pak (vowel) haw-rawp bawbpi an ngai, hi
hawi hen (bold mi tla) -
  B + I = B (bi)
 Ch + AW = CH (chaw)
 D + I = D (di)
 E + F + I = F (efi)
 J + I = G (ji)
 E + N + G + I = NG (engi)
 E + I + H + S + I = H (eihsi)
 J + E = J (je)
 K + E = K (ke)
 E + L = L (el)
 E + M = M (em)
 E + N = N (en)
 P + I = P (pi)
 A + R = R (ar)
 E + S + I = S (esi)
 T + I = T (ti)
 Ţ+ I = Ţ (ţi)
 V + I = V (vi)
 Z + E + T = Z (zet)

Aw-bawb (Consonant) haw-rawp tla hi a pâ k hen an um chun, lam ri kho an si lo

ruangah; lam ri kho kangnung tla chu hi a tangah hawng tarlangh nawlh asi.

1. Aw-pak (Vowel) dungah hi aw-bawb (consonant) haw-rawp a hawng um chun,

lam ri kho asi le, khit (meaning) a nei le, thumal a tuah rawh asi. Hi hawi hen –

 A + R = Ar (Lam ri kho asi le, khit, meaning nei leh thumal a tuah rawh)
 AW + R = Awr (Lam ri kho asi le, khit, meaning nei leh thumal a tuah rawh)
 E + P = Ep (Lam ri kho asi le, khit, meaning nei leh thumal a tuah rawh)
 I + T = It (Lam ri kho asi le, khit, meaning nei leh thumal a tuah rawh)
 U + P = Up (Lam ri kho asi le, khit, meaning nei leh thumal a tuah rawh)

A tlunah a simhfiang mi zawzawng tla Aw-bawb (consonant) maiah aw-pak (vowel)

mangnak ruangah; lamri kho a hawng si le, khit (meaning) khawm a nei asi.

2. Aw-pak (Vowel) maiah hi aw-bawb (consonant) haw-rawp a hawng um chun,

lam ri kho asi le, khit (meaning) nei thumal a tuah rawh asi. Hi hawi hen –

 F + A = Fa (Lam ri kho asi le, khit, meaning nei leh thumal a tuah rawh)
 K + E = Ke (Lam ri kho asi le, khit, meaning nei leh thumal a tuah rawh)
 CH + AW = Chaw (Lam ri kho asi le, khit, meaning nei leh thumal a tuah
rawh)
 T + I = Ti (Lam ri kho asi le, khit, meaning nei leh thumal a tuah rawh)
 L + O = Lo (Lam ri kho asi le, khit, meaning nei leh thumal a tuah rawh)
 L + U = Lu (Lam ri kho asi le, khit, meaning nei leh thumal a tuah rawh)
A tlunah a simhfiang mi zawzawng tla Aw-bawb (consonant) dungah aw-pak
(vowel) mangnak ruangah; lamri kho a hawng si le, khit (meaning) khawm nei asi.

3. Aw-bawb (consonant) panih karah mawh aw-pak (vowel) a hawng um chun,

lam ri kho a hawng si le, khit (meaning) a nei rawh asi. Hi hawi hen –

a. Aw-bawb panih karah “A” aw-pak (vowel) toh hen –

 Bang, Bah, Bak leh Ban tla
 Chang, Chah, Chak, Chal, Cham, Chan leh Char tla
 Dang, Dal, Dam, Dan leh Dar tla
 Fang, Fah, Fak leh Fam tla
 Ngak, Ngal leh Ngam tla

b. Aw-bawb panih karah “AW” aw-pak (vowel) toh hen –

 Bawb, Bawk, Bawl, Bawm leh Bawr tla
 Chawng, Chawh, Chawk, Chawm leh Chawm tla
 Dawng, Dawk, Dawm, Dawn, Dawp leh Dawr tla
 Fawng, Fawh, Fawn, Fawp tla Fawr tla
 Ngawng leh Ngawl tla
 Hawng, Hawk, Hawl leh Hawr tla

c. Aw-bawb panih karah “E” aw-pak (vowel) toh hen –

 Fel leh Fem tla
 Kek, Kel leh Ker tla
 Leng, Lek, Lem, Len, Lep leh Ler tla
 Meng, Mel leh Mer tla
 Neh, Nek leh Nem tla
 Peng, Pek, Pem leh Per tla

d. Aw-bawb panih karah “I” aw-pak (vowel) toh hen –

 Ning, Nik, Nim leh Nit tla
 Ping, Pil, Pir leh Pit tla
 Rik, Ril, Rim leh Rit tla
 Sing, Sih, Sim leh Sir tla
 Ting, Tih, Tik, Tim, Tin leh Tir tla
 Ving, Vir leh Vit
 Zing, Zik, Zil, Zir leh Zit tla

e. Aw-bawb panih karah “O” aw-pak (vowel) toh hen –

 Choh, Loh leh Toh tla

f. Aw-bawb panih karah “U” aw-pak (vowel) toh hen –

 Pung, Puh, Puk, Pul, Pum leh Put tla
 Rung, Ruk, Rul leh Rut tla
 Sung, Suh, Suk, Sul, Sum, Sun, Sur leh Sut tla
 Tung, Tuh, Tuk, Tul, Tum leh Tur tla
 Vung leh Vur tla
  Zung, Zuh, Zuk, Zum, Zun, Zur leh Zut tla

A tlunah simhfiangnak hawng langh mi zawzawng aw-pak (vowel) tel lo, an mah
karo hen chun lam ri kho mawh khit (meaning) a nei lo asi. Aw-bawb (consonant)
haw-rawp panih karah aw-pak (vowel) mangnak ruangah lam ri kho a hawng si le,
khit (meaning) khawm a nei asi.

Aw-pak leh Aw-bawb haw-rawp zawzawng tlunah zauhtawnhnak siam mi nih chun,
aw-pak leh aw-bawb danglamnak simhfiang asi. Aw-pak (Vowel) haw-rawp chu,
lamri kho mi asi le, aw-bawb (Consonent) chu, a mah lawng hen lamri kholo mi haw-
rawp tla an si.

Thu laksuaknak:
1. Bawm Bu-Bulbu – Rev. L. Dolian
2. Articles of Rev. Lal Zuam, Upa Lalrosawm, Pu Tawnthang and Upa Lunglawm Loncheu
from Chinlung 2008 Magazine published by Bawm Social Council – Bangladesh (BSCB)
3. Articles of Rev. L. Dolian and Pu Zuamlian Amlai from VAPUAL Magazine 2014
published by The Bawm Students Association, Bandarban Area