3rd June 2011, 10:30 AM

MAQSAD E ZIBHE AZEEM

AHLEBAIT ASWS ne qurbaniyan tu is liye de the ke hamaray nafs ghaflat o la shaori ki nijasat se
pak hojain- yeh tu Injeel main bhi bayan kia gaya hay" phir ma ne pahaar per aik esi jamat ko
dekha jin ke jamay sufaid thay- yeh wo log hain jinhon ne apnay jammay BAR'REY ke khoon se
dhoh ker sufaid kiye hain - wo BARRA jo binaey alam ke waqt zibha howa- phir chand satoor
baad SUFAID JAMAY ki sharah bayan kerde he k " SUFAID JAMAY SE RASTBAZI KE KAAM
MURAD HAIN."
injeel bhi shahadat de rahe he ke BAR'REY ka khon nafs ka jama e batini ka mail dhohnay ke liye
hey( mukashifat e yuhanna).

ab yeh amr tu ashkar hogya ke zibhe azeem ka maqsad tazia e nafoos e khalq ha yani hamaray
nafoos ko ghaflat o la shaoori ki nijasat se pak kerna hay ta ke ham shirk e hawa parasti se nikal
sakain aur wajood e bari ka yaqeen e qalbi hasil ker sakain-magar afsoos ha hamari badnaseebi
ha ke ham ne HUSSAIN ASWS mazloom ke zikr ko hasool e dard ka zaya banany ke bajaey
HAZZ O SARWAR ke husool ka zarya bana lia.

Yeh majalis jo marifat e hussool ka zarya thain ham ne inko besood bana lia - jo karamaat o
mojzaat doran e azadari zahir hotay rehtay thay in se hamaray zehno ma yeh khiyal rasikh hogya
ke ham haq per hain- hamara mazhab hi haq hay aur yeh AHLEBAIT ASWS ka mazhab aur onka
taleem kerda hay- halan ke zahoor e mojzaat tu HUSSAIN ASWS ki haqqaniyat o azmat o jalalat
ka saboot hay ne ke hamari haqqaniyat ka- is liye ghiar shia afraad maslan sikh hindow hanafi
shafaee waghera ma se jo bhi AZAEEY HUSSAIN ASWS barpa kerte hain inke liye bhi mojzaat o
kirammat ka zahoor hota ha bal ke hamari nisbat in ke yhan kuch zaida hi hota ha - pas agar
haqqaniyat e mazhab ki yehi dallel ho tu inka mazhab ziada sacha howa jata ha - hamaray zehno
ma yeh takhayyul qaim hogya ha ke HUSSAIN ASWS hamara ha- AHLEBAIT ASWS hamaray
hain ghairon ka in se kia taluq halan ke wo tu noor e aizdi hain- jo RABUL AALAMEEN HAy- inka
faiz tu aam hay- inko jo bhi khuloos se pukary wo osi ke hian ham rehmat e aizdi ke thekedar ban
gaey- ham ne darwaza e rehmat ko gher lia- na is noor se khud faizyaad howay aur na dosron ko
is se mustafeez honay dia- afsoos ke ham ne apni nafs parasti aur shetan parasti se majalis e
muqadisa hussainia main shetan shareek kerlia-

aik raaz e fitrat tu yeh hay ke nafs ki aur takhayyul ki islah tu dard se hoti ha - hamaray quloob ko
dard denay ke liye hi AAL E RASOOL ASWS ne mazloomiyat ki zindagi akhtiyar ki aur isi liye
qurbaniyan detay rahay - magar ham ne in qurbaniyon ke asraat ko zael ker dia aur ham is main
masroof rehtay hain...
IQBAL MEMON
3rd June 2011, 02:31 PM
Yeh majalis jo marifat e hussool ka zarya thain ham ne inko besood bana lia

VERY RIGHT BHAI JAN.........

ALAJAL ALAJAL YA KAREEM MALIK ALAJAL ALAJAL

ALISHEHENSHAH
7th September 2011, 11:51 PM
BOHAT KHOOb bhai jeee
Maddah Hussain
11th September 2011, 06:35 PM
MAQSAD E ZIBHE AZEEM

...

Bahi jaaan Bahut khoobsoorat bat ke hy ap ny

lakin yeh nahee bataya keh ab hamain keya karna chay ???
koey mashwara ...?
Imam Rab
21st September 2011, 02:51 AM
Madha bahi tazkia e nafs karain yeh maqsad e beesa't rasool saw ka tha aur yehi maqsad mola
karim asws ka tha aur os haqeeqi qatil ko pehchnay jo asal muharik hai...
Maddah Hussain
21st September 2011, 12:01 PM
G Bhai ap sahee farma rahy hain .... mainy kaheen perha tha keh .... Janab e Adam jo jab
gundhe hooee mati sy tayar keya geya to us py 40 rooz tak hawain chalaee gaeen aur un main
39 din dard o alam ke hawain chalaee gaeen aur 1 din khushion ke ............shayed ap ke bat k
mutabiq us ke nafs ke sarkashi ko kam karny k ley ho ga yeh sab ya ......... Malik bahtar janta
hy....:f
Babar
21st September 2011, 12:15 PM
bHT Khooob bahi..jeoo..Baja Kaha app ne...Moula Salamat Rakhain...Alajal Ya Imam(ajlf)
Imam Rab
1st October 2011, 02:59 AM
madha bahi WAQEA E KARBALA ke mutaliq sab se pehlay tu yeh tey hojana chiaye ke IMAM
AALI MUQAM ASWS APNAY aur apnay AZIZ o ANSAAR ke liye halakat o tabahi ke is raste ka
intikhab kernay main azad thay ya majboor? - yani ap asws ne shahadat barraza o raghbat
qabool ki ya aik SAFFAK hukumuran ke samnay unon ne khud ko hallat se majbor hoker halakat
o tabahi ke hawalay kerdia- agar ham farz ker lain ke wo majboor thay aur aik zalim hukmaran ke
hathon mout se bach nahi sakte thay tu yeh hamara mafrooza tu deen ki bunyad hi hila de ga is
liye ke ALLAH keh raha hai ALLAH SABR KERNAY WALON KE SAATH HAI ALLAH
MUTTAQIYON ke saath hai phir ALLAH osi kitab mai farmata ha ke TUM HI GHALIB RAHO GE
AGAR TUM MOMIN HO-
tu ab yeh sawal peda hota hai ke IMAM ASWS muqam e sabireen, mutaqeen aur momineen ma
se thay ya nahi? agar nahi thay tu phir NABI SAW ka onke mutaliq yeh elaan ke HASSAN asws
HUSSAIN asws jannat ke jawano ke sardar hain naozbillah lagho hojaey ga-yeh khiyal tu tasawur
e risalat ko malya mait kerde ga aur koe ahle baseerat aur ahle musalman is khiyal se ittifaq nahi
kare ga-
lihaza ye man'na paray ga ke IMAM asws sabireen, mutaqeen aur momineen ma se thay agar
they tu ALLAH onke saath tha- agar saath tha tu phir ose QURAN mai kia howa apna wada e
wafa kerna chaiye tha-lekin hamay is wada e wafaee ki KARBALA main koe jhalak nazar naih
aaey-tu kia phir hamay yh man'na hoga naozbillah ke allah ne apna wada pora nahi kiaaur wo
IMAM ASWS KO beyaro madad garo zibha hota howa dekhta raha-yeh bhi aik aisi sorat he jisay
koe bhi musalman nahi manay ga-is se tu khuda ki khudae ke tasawur ka hi lamdam hoajey ga-
bhla aisay khuda ko kon manay ga jo wada kerta hai aur nibhata nahi-jo apnay sabir , muttaqi uar
momin bandon ko zaalim jabir aur be imanadaron ke hathon marwa deta hai-ya phir yeh ke wo
sara waqeia aik bebas khamosh tamashahi ki tarah dekhta rahta hai aur onki kisi tarah koe
madad nahi kerta jinki maddad ka osne wada kia ha- NAHI- yeh baat bhi dil nahi manta- aqle
saleem ise tasleem nahi kerti- aql kehti hai allah bhi haq ha aur oska rasool bhi haq hai- is sorat e
haaal main ham agar allah ki ALWAHIYAT aur RASOOL saw ki risalat ko bacha sakte hain tu bas
aik hi rasta hai ke ham tasleeem karain ke IMAM asws ne shahadat bar raza o raghbat qaboll ki-
jesey hi ham yeh kahain ge wesay hi hamaray is bayan se boaht se dosray shakook o shohbaat
sar uthain ge aur kaee dosri pecheedgiyan peda hongi-maslan bhaala yeh baat samjh mai kese
aey ge ke allah ki poori taid aur himayat hasil hai magar ham museebatain jhelain gay aur mar
mitain gey- yeh fesla naozbillah khud kushi ke mutaradif hoga- is se bhar ke bhi yeh ke khud tu
khud , apnay tmam sahabiyon aur rishtedaron aur karyal jawano aur masoom nonehhalon ko bhi
katwa dain ge-aur yeh sab kon karay ga? NAWASA E RASOOL ? MASOOM IMAM asws? janant
ke jawano ka sardar? aghoosh e rasool ka parwarrda? NAHI- NAHI- aisa nahi hosakta koe ahle
haq kisi sorat ma yeh nahi maan sakta- is se tu IMAMAT ki bunyad hi hil jaay ge- tu phir kia
karain >? haqeeqat kese maloom ho?
pehlay tu dkehay ke be'esat e RASOOL saw ka maqsad kia tha? ap ham gunahggaron ke
darmiyan kis maqsad e hasool ke liye bhejey gaey thay- quran ki bohat se ayaat batati hain ke
apki RISALAAT ka aham maqsad NAFOOS E INSAANI ka tazkia kerna tha- sorahe jumma ayat
no 2- " WOHI HAI JIS NE UMMMEYYEN mai unhe mai se RASOOL BHEJA jo in per hamari
ayaton ki tilawat kerta hai aur inka tazkia kerta hai"-
ham 2 batain samjh lain - awal ke NAFS kia hai aur 2nd yeh ke yeh behosh main hai ya hosh mai
hai?
dekhiye agar main kisi se pochon ke ap ka naam kia hay? wo wo kahay ga mera naam yeh hay
phir pochon ap gram ya thanda pena pasand karain ge? tu wo kahay ga GARMI hay dil chah
raha hai ke sharbat piyon- magar jab yehi shkhs marjata hai tu meray swal ka jawab nahi deta
halan ke wo wohi hai aur oska jism aur dil bhi wohi hay- agar oska jism aur dil hi dare haqeeat
oski " MAIN " hota tu ab bhi jawab deta magaroski " MAIN" ose chohr ke ja chuki hay- wo mar
chuka hai yehi " MAIN" nafs hai aur NAFS rooh nahi hay - NAFS KE LIYE MOUT HAI ROOH KE
LIYE MOUT NAHI HA-
INSAAN ke maddi jism ke ander NAFS , GAIS ka aik jism hai jo madi jism main is tarah sirayat
kiye howay hai jis trah paani mai bheegay howay kisi kapray ka her resha main paani sirayat kiye
howay hota hai- NAFS MAADI al-nihaad , past , haqeer aur zaleel hai jab ke ROOH QUDSI AL
ASAL , RAFI UL DARJAAT aur pakeeza hai- NAFS hamesha past aur maadi khawahishaat ko
janam deta hai jab ke ROOH hamesha alam quds main buland se buland tar hona chahti hai- wo
sab kuch jo hamay jismani aur zheni tour per pasti ki traf khenchta hai osi NAFS ki waja se hai
jiski jarain MADDAY aur MAADI ashiya main pewast hain- NAFS main in maadi ashiya ke hasool
ki tahreek do trah ke muharikaat se hoti hai- aik dakhli muharikaat hotay hain aur dosray khariji-
dakhli muharikat se bhook , piyas, aur neend ka ahsaas hota hai- is ahsaas se khanay peenay
aur sonay ki shadeed khawahish peda hoti hai- DAKHILI MUHARRIKAAT se peda honay wali in
khawahishaat ko quran main" SHEHWAAT" kaha gya hai-
KHARIJI MUHHARIKAAT maslan koe khush numa mehal, chand sa chhera, chamkte aur
damaktey howay zewarat aur jawahiraat etc- KHARIJI MUHARIKAT se peda honay wali in
khawahishaat ko quran mai" HAWA" kaha gya hai-
yeh SHEWAAT O HAWA isi tarah shumar se bahar hian jis tarah iske DAKHILI AUR KHARIJI
muhharikaat shumar se bahar hian- inko na gina ja sakta hai na inki koe had muqarar ki ja sakti
hai-inki lehrain her lamha nafs per mundla rahe hain aur osko apni girfat mai rakhti hain- almiya
yeh hai ke yahi NAFS jo past uar maadi khawahishaat ki girfat mai hai ham per hukum chala raha
hai aur ham bebas mehkoomon ki trah oske her hukm ko be cho'n chara'n be sochay samjhay
pora kertey hain- halan ke yeh tu sirf zaat baree ka haq hai ke oske her hukm ko bey cho'n
charan be scohay samjhay pora kia jaeyi isliye ke wo aql kul ka khaliq hai aur hamara hafiz o
negehban hai-ham oske haton mehfooz hain- wo HAYYO QAYOOM hai-os per na ongh aur
neend tari hoti hai- na hi wo shewaat o hawa ki girfat mai aa ker maghloob hota hai- wo hamara
muhafiz o nasir o negehban hai-magar ham ne oska martab o muqam nafs ko de dia hai- aur
osko apna hakim bana lia hai - yehi shirk aur nafs ki nijasat hai jesa ke quran mai ha
" A NABI KIA AP OSE DEKHEY HAIN JIS NE APNAY HAWAEY NAFS (haqeer khawahishat) hi
ko apna ILLAH banaya howa hai AP saw oski wakalat kese ker sakte hain" MOLA AMEER asws
ka farman hai " WO SAB SE BARA MABOOD JISKI DUNYA MA PARISHTISH KI JATI HAI
HAWAEY NAFS HAI-"
QURAN main soara e bani isreal ayat 33 main ALLAH farmata hai" aur wo jo mazloom qatl kia
gya oske wali ko beshak (intiqam ka ) akhtiyat dia haiaur oski (allah ki ) nusrat bhi hasil hai phir
bhi(umeed hai ke) wo qattal mai narmi kare ga".-
SHAHAZADI E KONAIN S.A AUR JANAB E AMEER asws aalam e insaniyat ke wo wahid
walidain hain jin ke 10 MASOOM ASWS betay pusht dar pusht insaan ko bedar kernay ki tadbeer
kernay howay dushmanan e insaniyat darindon ke hathon ya tu qatl howay ya zehar se shaheed
howay ya nazre zindaan hogaey- jan de ker makhloq ko khaliq ki bandagi ke adaab sekhana
WILAYAT E MUTALIQA ka khaasa hai- yehi waja hai ke nabuwat WILAYAT ki dae'e hai-
HUBB E HUSSAIN asws HUBBE NABI SAW se peda hoti hai- donon mohabaton ka aik mehwar
hai- dono ki shiddat lazim o malzoom hai- aik ki muhabbat dosray ki muhabbat ko mehmeez kerti
hai- NABI SAW ka mission nafse insaani ko shirk aur ghaflat ki nijasat se pak kerna tha -
HUSSAIN PAK asws ne gham mohayya ker ke ose mumkin kia- NAFS gham se maghloob
hogya- shewaat o hawa se nijaat mili yani ose mout se pehlay mout agaee aur yehi janab e
RASOOL SAW ka hukum tha ke " MOUT SE PEHLY MAR JAO" ab bargah e risalat ka wo farman
wazeh howa ke" HUSSAIN asws mujh se hai aur main HUSSAIN pak asws se hon"- zahoor se
karbla tak HUSSAIN asws RASOOL saw se hain aur karbla se qayamat tak RASOOL saw
HUSSAIN pak asws se hain-
apnay NAFS ke batain main shewaat o hawa ki paspaee ke halay se GHAM E HUSSAIN asws ki
asar angezi ka muwazna mazhab ke marwajja degar arkan se karain tu pata chalay ga ASAL
DEEN AUR IBADAT KIA HAI- jesa ke kis ne khoob kaha "HER IK AMAL SE HAY AFZAL GHARZ
HUSSAIN pak KA ZIKR" haqeqat yeh hai ke SALAAT E HAQEEQI ki adaeegi karbala ke hawalay
ke baghiar mumkin nahi-
KARBALA main noo' e insaani ko shewaat o hawa se pak ker ke namaz e ishq ki adaeegi ke
adaab os saleeqay se sekhaey gaey ke her SIN O SAAL AUR HER JINS ki numaidagi peshe
nazar rahe-
HUSSAIN asws MAZLOOM ke on azadaron ke tasawur main jin ke aanso os MOHSIN E
INSANIYAT ka khiyal atay ho ubal parte hain KARBALA ka bayan aaj bhi piyasy bachon ke jigar
doz sawalon se gonj raha hai- on main sab se chohta bacha 6 maheenay ka tha- wo bezuban tha
- ose bolna nahi ata tha- os ne apni sokhi zuban dekha ker pani manga tha magar jawab yeh aya
ke
HATH PER QAFILA SALAAR KE IK TILFE SAGHEER
FADIYA RAHE KHUDA, TASHNA DAHAAN O BESHEER
MORID E JOR O JAFA, BEGUNAH O BEKHTA O TAQSEER
NAZNEE'N HALQ PE KHAEY HOWAY IK ZUL KA TEER
TEER WO KE JIS NE FITRAT KA KALEJA CHEHDA
SEENA E KHATM E RUSL AUR DIL E ELIYA CHEHDA
kia pak aal asws ke masaeb sun ker girya taari hogya hai? kia ham ro rahay hain ? agar aisa hai
tu in lamhaat ko janay na dijiye - inke doraniye ko bharaye yeh zikr baar baar kijiye - NAFS
GHAM E HUSSAIN ASWS SE MAGHLOOB HOCHUKA HAI- ab is mai koe khawahish koe jazba
nahi hai- yeh shehwaat o hawa se pak hai- is main ab sirf GHAM E HUSSAIN PAK haiaur kuch
nahi- WO HUSSAIN ASWS JO SIRF MUSALMANO KA MOHSIN AUR NIJAAT E DAHINDA NAHI
BAL KE WO HER OS SHAKHS KA NIJAAT DAHINADA HAI JO OSE APNAEY AUR OSKE
ANDOHNAAK MASAEB KI YAAD E PEEHAM SE APNAY NAFS KO SHEWAAT O HAWA SE
PAK KAREY-
Yeh gham os waqt shadeed hoajata hai jab ham yeh sochtay hain ke ham aisay khabees un nafs
logn ki TATHEER le liye ALLAH ke kese naik aur pak bandon ne apni janay de daeein- aur yeh
gham os waqt aur shadeed hojata ha jab hamay os REHMATULLIL AALAMEEN ki yaad ati haijis
ne apnay tmam mardon , mastorraton , bhoron jawano aur bachon ko sirf iss umeed main aalam
o masaeeb ke hawalay kerdia ke ham kam az kam oske aur oske AHLEBAIT asws ke gham tu tu
nazar andaza nahi karain gey onke gham main doob ker mout se pehlay shehwaat o hawa se
paak hojain ge- MOLA KARAY AISA HO! ELAHI AMEEN YA RABUL AALAMEEN
ALISHEHENSHAH
1st October 2011, 11:22 AM
BOHAT khoob bhai je nafs py bohat umdah haqqaiq pesh kiye hain
Ghulam
1st October 2011, 11:38 AM
Aray janab itna bara article Roman main likh deya bahut mushkil hoti hy itna perhny main . Urdu
font main likhty to ziada mzaz ata ,
Khair Khoob Nuqta beyan keya hy ap ny.
Maddah Hussain
1st October 2011, 11:42 AM
Bhai Imam Rab (http://www.jamanshah.com/forums/member.php?u=1315) Bahut khoobsoorat
alfaz main ap ny bahut sy mamlat suljhaa deya hain,,,,,,,,,,,,,,,, Bahut Bahut Shukria
Lakin aik bat main arz kar doon keh waqa e Karbala ke maqsadiat ko kamahaqa ho (poori tarha
sy) samajhna bahut mahal hy haan jo kuch ap ny beyan farmaya hy who us ke aik dimension hy
lakin is aik waqaee k pechy ketny maqasid thay us pak zaat k yeh to wahee he bahtar janty hain.
Bahut Bahut Shukria..... Is Nice sharing k ley .