HOLY BIBLE in ZULU

OLD TESTAMENT
 GENESIS
1
1
Ekuqaleni uNkulunkulu wadala izulu nomhlaba. 2 Umhlaba wawuyihlane elingenalutho;
kwakungubumnyama phezu kotwa, kepha uMoya kaNkulunkulu wehla wenyuka phezu
kwamanzi.
3
UNkulunkulu wathi: "Makube khona ukukhanya," kwaba khona ukukhanya. 4 UNkulunkulu
wabona ukukhanya ukuthi kuhle; uNkulunkulu wahlukanisa ukukhanya nobumnyama. 5
UNkulunkulu wabiza ukukhanya ngokuthi imini; ubumnyama wabubiza ngokuthi ubusuku.
Kwaba ngukuhlwa, kwaba ngukusa, usuku lokuqala.
6
UNkulunkulu wathi: "Makube khona umkhathi phakathi kwamanzi, kwahlukaniswe amanzi
namanzi." 7 UNkulunkulu wenza umkhathi, wahlukanisa amanzi aphansi komkhathi namanzi
aphezu komkhathi; kwaba njalo. 8 UNkulunkulu wabiza umkhathi ngokuthi izulu. Kwaba
ngukuhlwa, kwaba ngukusa, usuku lwesibili.
9
UNkulunkulu wathi: "Amanzi aphansi kwezulu mawaqoqekele ndawonye, kubonakale
umhlabathi owomileyo," kwaba njalo. 10 Okomileyo uNkulunkulu wakubiza ngokuthi umhlaba,
nokuqoqeka kwamanzi wakubiza ngokuthi ulwandle; uNkulunkulu wabona ukuthi kuhle. 11
UNkulunkulu wathi: "Umhlaba mawuveze utshani, nemifino ethela imbewu, nemithi yezithelo
ethela izithelo ngezinhlobo zayo, ekuyo imbewu yayo, emhlabeni," kwaba njalo. 12 Umhlaba
wawusuveza utshani nemifino ethela imbewu ngezinhlobo zayo, nemithi ethela izithelo
ngezinhlobo zayo, ekuyo imbewu yayo; uNkulunkulu wabona ukuthi kuhle. 13 Kwaba
ngukuhlwa, kwaba ngukusa, usuku lwesithathu.
14
UNkulunkulu wathi: "Makube khona emkhathini wezulu izinkanyiso ezahlukanisa imini
nobusuku, zibe yizibonakaliso zezinkathi, nezezinsuku, nezeminyaka, 15 zibe yizinkanyiso
emkhathini wezulu zokukhanyisa emhlabeni," kwaba njalo. 16 UNkulunkulu wazenza izinkanyiso
ezimbili ezinkulu, inkanyiso enkulu ukuba ibuse imini, nenkanyiso encane ukuba ibuse ubusuku,
kanye nezinkanyezi. 17 UNkulunkulu wazifaka emkhathini wezulu ukuba zikhanyise emhlabeni,
18
zibuse imini nobusuku, zahlukanise ukukhanya nobumnyama. UNkulunkulu wabona ukuthi
kuhle. 19 Kwaba ngukuhlwa, kwaba ngukusa, usuku lwesine.
20
UNkulunkulu wathi: "Amanzi mawagcwale uswebezane lwezilwane eziphilayo, kundize
izinyoni phezu komhlaba emkhathini wezulu." 21 UNkulunkulu wadala imikhomo emikhulu
nezilwane zonke eziphilayo ezihambayo, amanzi agcwala zona ngezinhlobo zazo, nezinyoni
zonke ezinamaphiko ngezinhlobo zazo. UNkulunkulu wabona ukuthi kuhle. 22 UNkulunkulu
wazibusisa, wathi: "Zalani, nande, nigcwalise amanzi aselwandle, nezinyoni zande emhlabeni." 23
Kwaba ngukuhlwa, kwaba ngukusa, usuku lwesihlanu.
24
UNkulunkulu wathi: "Umhlaba mawuveze izilwane eziphilayo ngezinhlobo zazo, izinkomo,
nezilwanyana ezinwabuzelayo, nezilo zomhlaba ngezinhlobo zazo," kwaba njalo. 25
UNkulunkulu wazenza izilo zomhlaba ngezinhlobo zazo, nezinkomo ngezinhlobo zazo,
nezilwanyana zonke ezinwabuzelayo emhlabeni ngezinhlobo zazo. UNkulunkulu wabona ukuthi
kuhle.
26
UNkulunkulu wathi: "Masenze abantu ngomfanekiso wethu, basifuze, babuse phezu
kwezinhlanzi zolwandle, nezinyoni zezulu, nezinkomo, nomhlaba wonke, nezilwanyana zonke
ezinwabuzelayo emhlabeni." 27 UNkulunkulu wamdala umuntu ngomfanekiso wakhe; wamdala
ngomfanekiso kaNkulunkulu; wabadala owesilisa nowesifazane. 28 UNkulunkulu wababusisa;
uNkulunkulu wathi kubo: "Zalani, nande, nigcwalise umhlaba, niwunqobe, nibuse phezu
kwezinhlanzi zolwandle, nezinyoni zezulu, nezilwanyana ezinwabuzelayo emhlabeni."
29
UNkulunkulu wathi: "Bhekani, ngiyaninika yonke imifino ethela imbewu, esemhlabeni wonke,
nemithi yonke okukuyo izithelo zomuthi oveza imbewu, kube ngukudla kwenu. 30 Kepha zonke
izilwane zomhlaba, nezinyoni zonke zezulu, nezilwanyana ezinwabuzelayo emhlabeni,
eziphefumulayo, zona nginike yonke imifino eluhlaza ibe ngukudla," kwaba njalo.
31
UNkulunkulu wabona konke akwenzileyo; bheka, kwakukuhle kakhulu. Kwaba ngukuhlwa,
kwaba ngukusa, usuku lwesithupha.

2
1
Kwase kupheleliswa izulu nomhlaba kanye nombuthano wakho wonke. 2 UNkulunkulu waqeda
ngosuku lwesikhombisa imisebenzi yakhe abeyenzile; waphumula ngosuku lwesikhombisa
emisebenzini yakhe yonke abeyenzile. 3 UNkulunkulu wabusisa usuku lwesikhombisa,
walungcwelisa, ngokuba ngalolo suku waphumula emisebenzini yonke abeyidalile uNkulunkulu,
wayenza.
4
Lokhu kungumlando wokudalwa kwezulu nomhlaba ekudalweni kwakho mhla uJehova
uNkulunkulu ewenza umhlaba nezulu. 5 Kwakungakabikho sihlahla endle, namifino
yayingakamili emhlabathini, ngokuba uJehova uNkulunkulu wayengakanisi imvula emhlabeni,
kungakabikho muntu wokulima umhlabathi. 6 Kepha kwenyuka inkungu ivela emhlabathini,
yanisela ubuso bonke bomhlaba. 7 UJehova uNkulunkulu wambumba umuntu ngomhlabathi,
waphefumulela emakhaleni akhe umoya wokuphila; kanjalo umuntu waba umphefumulo
ophilayo.
8
UJehova uNkulunkulu watshala insimu e-Edene ngasempumalanga; wambeka khona umuntu
amenzileyo. 9 UJehova uNkulunkulu wahlumisa emhlabathini imithi yonke ebukekayo, emihle,
edliwayo, nomuthi wokuphila phakathi nensimu, nomuthi wokwazi okuhle nokubi. 10 E-Edene
kwavela umfula owamanzisa insimu; wahlukana khona, waba yizimbaxa ezine. 11 Eyokuqala
inegama lokuthi iPishoni; yiyo ezungeza izwe lonke laseHavila, lapho kukhona igolide. 12 Lihle
igolide lalelo zwe. Kukhona nenhlaka yebedola netshe leshohamu lapho. 13 Igama leyesibili
linguGihoni; yiyo ezungeza lonke izwe laseKushe. 14 Igama leyesithathu linguHidekeli; yiyo
egobhoza ngasempumalanga kwase-Asiriya. Eyesine ingu-Ewufrathe. 15 UJehova uNkulunkulu
wayesemthatha umuntu, wambeka ensimini yase-Edene ukuba ayilime, ayigcine.
16
UJehova uNkulunkulu wamyala umuntu, wathi: "Ungadla kuyo yonke imithi yensimu
ngokuthanda kwakho, 17 kepha ungadli kuwo umuthi wokwazi okuhle nokubi, ngokuba mhla
udla kuwo uyakufa nokufa."
18
UJehova uNkulunkulu wathi: "Akukuhle ukuba umuntu ahlale yedwa. Ngizakumenzela umsizi
onjengaye." 19 UJehova uNkulunkulu wabumba ngomhlabathi zonke izilwane zasendle nezinyoni
zonke zezulu, waziyisa kumuntu ukuba abone ukuthi umuntu angaziqamba ngokuthini, ukuze
kuthi, njengalokhu umuntu eziqamba zonke izilwane eziphilayo, lokhu kube ngamagama azo. 20
Umuntu waziqamba amagama zonke izinkomo, nezinyoni zezulu, nezilwane zasendle. Kepha
umuntu akatholelwanga umsizi onjengaye.
21
UJehova uNkulunkulu wamehlisela umuntu ubuthongo obunzima, walala; wayesethatha olunye
lwezimbambo zakhe, wavala indawo ngenyama. 22 UJehova uNkulunkulu wakha owesifazane
ngobambo abeluthathile kumuntu, wamyisa kumuntu. 23 Wayesethi umuntu: "Lo useyithambo
lamathambo ami nenyama yenyama yami; uyakubizwa ngokuthi indodakazi, ngokuba uthathwe
endodeni." 24 Ngalokho indoda iyakushiya uyise nonina, inamathele kumkayo; bayakuba
nyamanye. 25 Babehamba ze bobabili, u-Adamu nomkakhe, bengenamahloni.

3
1
Inyoka yayinobuqili kunazo zonke izilwane zasendle abezenzile uJehova uNkulunkulu. Yathi
kowesifazane: "Ngempela uNkulunkulu ushilo yini ukuthi: ‘Ningadli emithini yasensimini,’ na?"
2
Owesifazane wathi enyokeni: "Singadla izithelo zemithi yasensimini, 3 kepha ngezithelo
zomuthi ophakathi nensimu uNkulunkulu ushilo ukuthi: ‘Ningazidli, ningazithinti ukuba
ningafi.’" 4 Inyoka yathi kowesifazane: "Aniyikufa nokufa; 5 kepha uNkulunkulu uyazi ukuthi
mhla nizidla, kuyakuvuleka amehlo enu, nibe njengoNkulunkulu, nikwazi okuhle nokubi."
6
Owesifazane ebona ukuthi umuthi ulungele ukudliwa, nokuthi uyabukeka emehlweni, nokuthi
umuthi unxanelekile ekuhlakaniphiseni, wathatha izithelo zawo, wadla, wanika nendoda yakhe
kanye naye, nayo yadla. 7 Ayesevuleka amehlo abo bobabili, babona ukuthi bahamba ze;
bathunga amaqabunga omkhiwane, bazenzela izibhinco. 8 Base bezwa izwi likaJehova
uNkulunkulu ehamba ensimini kusihlwa ngokuphola kwelanga; u-Adamu nomkakhe bacasha
ebusweni bukaJehova uNkulunkulu phakathi kwemithi yensimu.
9
Kepha uJehova uNkulunkulu wambiza u-Adamu, wathi kuye: "Uphi na?" 10 Wathi: "Ngizwe
izwi lakho ensimini, ngesaba ngokuba ngihamba ze; ngalokho ngacasha."
11
Khona wathi: "Ngubani owakutshela ukuthi uhamba ze na? Udlile kulowo muthi engakuyala
ngawo ukuthi ungadli kuwo na?" 12 U-Adamu wathi: "Owesifazane, owangipha yena ukuba abe
nami, unginikile kuwo umuthi, ngadla." 13 UJehova uNkulunkulu wathi kowesifazane: "Yini
lokhu okwenzileyo na?" Owesifazane wathi: "Inyoka ingikhohlisile, ngadla."
14
UJehova uNkulunkulu wathi enyokeni: "Njengokuba usukwenzile lokho, uqalekisiwe phakathi
kwezilwane zonke naphakathi kwazo zonke izilwane zasendle; uzakuhamba ngesisu sakho, udle
uthuli izinsuku zonke zokuhamba kwakho. 15 Ngizakubeka ubutha phakathi kwakho
nowesifazane, naphakathi kwenzalo yakho nenzalo yakhe. Yona iyakuchoboza ikhanda lakho,
wena uyakulimaza isithende sayo."
16
Wathi kowesifazane: "Ngizakukubangela ubuhlungu obukhulu ekukhulelweni kwakho;
uyakubeletha abantwana ngobuhlungu. Ukunxanela kwakho kuyakuba sendodeni yakho; yona
iyakukubusa."
17
Wayesethi ku-Adamu: "Njengokuba ulalele izwi lomkakho, wadla kulowo muthi engakuyala
ngawo ukuthi ungadli kuwo, ngalokho umhlabathi uqalekisiwe ngenxa yakho. Uyakudla kuwo
ngokukhathazeka zonke izinsuku zokuhamba kwakho. 18 Uyakukuvezela ameva namakhakhasi,
wena udle imifino yasendle. 19 Ngesithukuthuku sobuso bakho uyakudla isinkwa sakho, uze
ubuyele emhlabathini, lokhu wathathwa kuwo; ngokuba ungumhlabathi, uyakuphenduka
umhlabathi."
20
U-Adamu wamqamba umkakhe igama lokuthi u-Eva, ngokuba waba ngunina wabo bonke
abaphilayo.
21
UJehova uNkulunkulu wabenzela u-Adamu nomkakhe iziphuku, wabembathisa.
22
UJehova uNkulunkulu wathi: "Bheka, u-Adamu usenjengomunye wethu, uyakwazi okuhle
nokubi; kepha manje makangeluli isandla sakhe, athathe nakuwo umuthi wokuphila, adle, aphile
kuze kube phakade." 23 UJehova uNkulunkulu wammukisa ensimini yase-Edene ukuba alime
umhlabathi athathwe kuwo. 24 Wamxosha u-Adamu, wabeka ngasempumalanga kwensimu yase-
Edene amakherubi kanye nenkemba yelangabi ephenduphendukayo, ilinde indlela eya emthini
wokuphila.

4
1
U-Adamu wamazi umkakhe u-Eva; wakhulelwa, wazala uKayini; wathi: "Ngitholile indoda
kuJehova." 2 Waphinda wazala u-Abela umfowabo. U-Abela waba ngumalusi, uKayini waba
ngumlimi.
3
Kwathi emva kwezinsuku ezithile uKayini waletha kuJehova umnikelo wezithelo zomhlabathi. 4
Naye u-Abela waletha umnikelo kuwo amazibulo ezimvu zakhe ezinonileyo. UJehova wanaka u-
Abela nomnikelo wakhe. 5 Kepha uKayini nomnikelo wakhe akawunakanga. Wayesethukuthela
kakhulu uKayini, ubuso bakhe banyukumala.
6
UJehova wathi kuKayini: "Uthukuthelelani na? Ubuso bakho bunyukumeleleni na? 7 Angithi
uma wenza kahle, uyamukeleka na? Uma ungenzi kahle, isono sihlezi ngasemnyango;
ukunxanela kwaso kukuwe, kepha wena umelwe ukusibusa."
8
UKayini wakhuluma ku-Abela umfowabo, wathi: "Masiye endle." Kwathi besendle, uKayini
wasukela umfowabo u-Abela, wambulala.
9
Wayesethi uJehova kuKayini: "Uphi umfowenu u-Abela na?" Wathi: "Angazi; ngingumlindi
womfowethu na?" 10 Khona wathi: "Wenzeni na? Izwi legazi lomfowenu liyakhala kimi
lisemhlabathini. 11 Usuqalekisiwe emhlabathini ovulile umlomo wawo ukwamukela igazi
lomfowenu esandleni sakho. 12 Uma ulima umhlabathi, awusayikukunika isithelo sawo; wena
uyakuba ngumhambuma nozulane emhlabeni."
13
Khona wathi uKayini kuJehova: "Isono sami sikhulu kunokuba ngisithwale. 14 Bheka,
uyangixosha namuhla ebusweni bomhlaba, ngicashe ebusweni bakho; ngiyakuba ngumhambuma
nozulane emhlabeni, ongifumanayo angibulale." 15 Kepha uJehova wathi kuye: "Ngalokho
obulala uKayini uyakuphindiselwa kasikhombisa." UJehova wabeka uphawu kuKayini, funa
omfumanayo ambulale.
16
Wayesesuka uKayini ebusweni bukaJehova, wahlala ezweni laseNodi ngasempumalanga
kwase-Edene. 17 UKayini wamazi umkakhe; wakhulelwa, wazala u-Enoke. Wakha umuzi,
wawuqamba igama lokuthi u-Enoke ngegama lendodana yakhe. 18 U-Enoke wazala u-Irade; u-
Irade wazala uMehujayele; uMehujayele wazala uMetushayele; uMetushayele wazala uLameka.
19
ULameka wazithathela abafazi ababili; igama lomunye lalingu-Ada, igama lomunye
lalinguSila. 20 U-Ada wazala uJabale; yena waba nguyise wabahlala ematendeni, befuya
izinkomo. 21 Igama lomfowabo lalinguJubale; yena waba nguyise wabo bonke ababetha ihabhu
nomtshingo. 22 USila wazala uThubali Kayini; wayengumkhandi wazo zonke izinto zethusi
nezensimbi ezisikayo. Udadewabo kaThubali Kayini wayenguNahama.
23
ULameka wathi kubo abafazi bakhe: "Ada noSila, yizwani izwi lami; nina bafazi bakaLameka,
lalelani ukusho kwami: Bhekani, ngibulala umuntu ngenxeba engilitholayo, nensizwa
ngomvimbo engiwuzwiswayo. 24 Yebo, uKayini uyakuphindiselwa kasikhombisa, kepha
uLameka kamashumi ayisikhombisa, aphindwe kasikhombisa."
25
U-Adamu wabuye wamazi umkakhe; wazala indodana, wamqamba igama lokuthi uSeti, ethi:
"UNkulunkulu ungibekele enye inzalo esikhundleni sika-Abela, njengokuba uKayini umbulele."
26
Naye uSeti wazala indodana, wayiqamba igama layo ngokuthi u-Enoshe. Ngaleso sikhathi
abantu baqala ukukhuleka egameni likaJehova.

5
1
Lokhu kuyincwadi yezizukulwane zika-Adamu. Msukwana uNkulunkulu edala umuntu
wamenza ngomfanekiso kaNkulunkulu. 2 Wabadala owesilisa nowesifazane, wababusisa,
waqamba igama labo ngokuthi abantu mhla bedalwa. 3 U-Adamu wahamba iminyaka eyikhulu
namashumi amathathu, wazala indodana ngomfanekiso wakhe efana naye, wayiqamba igama
lokuthi uSeti. 4 Izinsuku zika-Adamu emva kokuzalwa kukaSeti zaziyiminyaka engamakhulu
ayisishiyagalombili; wazala amadodana namadodakazi. 5 Zonke izinsuku zokuhamba kuka-
Adamu zaziyiminyaka engamakhulu ayisishiyagalolunye namashumi amathathu; wayesefa.
6
USeti wahamba iminyaka eyikhulu nanhlanu, wazala u-Enoshe. 7 Emva kokuzalwa kuka-
Enoshe uSeti wahamba iminyaka engamakhulu ayisishiyagalombili nesikhombisa, wazala
amadodana namadodakazi. 8 Zonke izinsuku zikaSeti zaziyiminyaka engamakhulu
ayisishiyagalolunye neshumi nambili; wayesefa. 9 U-Enoshe wahamba iminyaka engamashumi
ayisishiyagalolunye, wazala uKhenani. 10 Emva kokuzalwa kukaKhenani u-Enoshe wahamba
iminyaka engamakhulu ayisishiyagalombili neshumi nanhlanu, wazala amadodana
namadodakazi. 11 Zonke izinsuku zika-Enoshe zaziyiminyaka engamakhulu ayisishiyagalolunye
nanhlanu; wayesefa. 12 UKhenani wahamba iminyaka engamashumi ayisikhombisa, wazala
uMahalalele. 13 Emva kokuzalwa kukaMahalalele uKhenani wahamba iminyaka engamakhulu
ayisishiyagalombili namashumi amane, wazala amadodana namadodakazi. 14 Zonke izinsuku
zikaKhenani zaziyiminyaka engamakhulu ayisishiyagalolunye neshumi; wayesefa. 15
UMahalalele wahamba iminyaka engamashumi ayisithupha nanhlanu, wazala uJarede. 16 Emva
kokuzalwa kukaJarede uMahalalele wahamba iminyaka engamakhulu ayisishiyagalombili
namashumi amathathu, wazala amadodana namadodakazi. 17 Zonke izinsuku zikaMahalele
zaziyiminyaka engamakhulu ayisishiyagalombili namashumi ayisishiyagalolunye nanhlanu;
wayesefa. 18 UJarede wahamba iminyaka eyikhulu namashumi ayisithupha namabili, wazala u-
Enoke. 19 Emva kokuzalwa kuka-Enoke uJarede wahamba iminyaka engamakhulu
ayisishiyagalombili, wazala amadodana namadodakazi. 20 Zonke izinsuku zikaJarede
zaziyiminyaka engamakhulu ayisishiyagalolunye namashumi ayisithupha nambili; wayesefa.
21
U-Enoke wahamba iminyaka engamashumi ayisithupha nanhlanu, wazala uMetushela. 22 Emva
kokuzalwa kukaMetushela u-Enoke wahamba noNkulunkulu iminyaka engamakhulu amathathu,
wazala amadodana namadodakazi. 23 Zonke izinsuku zika-Enoke zaziyiminyaka engamakhulu
amathathu namashumi ayisithupha nanhlanu. 24 U-Enoke wayehamba noNkulunkulu; kepha
wayesengasekho nje, ngokuba uNkulunkulu wamthabatha.
25
UMetushela wahamba iminyaka eyikhulu namashumi ayisishiyagalombili nesikhombisa,
wazala uLameka. 26 Emva kokuzalwa kukaLameka uMetushela wahamba iminyaka engamakhulu
ayisikhombisa namashumi ayisishiyagalombili nambili, wazala amadodana namadodakazi. 27
Zonke izinsuku zikaMetushela zaziyiminyaka engamakhulu ayisishiyagalolunye namashumi
ayisithupha nesishiyagalolunye; wayesefa.
28
ULameka wahamba iminyaka eyikhulu namashumi ayisishiyagalombili nambili, wazala
indodana. 29 Waqamba igama layo ngokuthi uNowa, ethi: "Lo uyakusiduduza emsebenzini wethu
nasenkathazweni yezandla zethu emhlabathini awuqalekisa uJehova." 30 Emva kokuzalwa
kukaNowa uLameka wahamba iminyaka engamakhulu ayisihlanu namashumi
ayisishiyagalolunye nanhlanu, wazala amadodana namadodakazi. 31 Zonke izinsuku zikaLameka
zaziyiminyaka engamakhulu ayisikhombisa namashumi ayisikhombisa nesikhombisa; wayesefa.
32
UNowa wahamba iminyaka engamakhulu ayisihlanu; uNowa wazala oShemi, noHamu,
noJafete.

6
1
Kwathi abantu beqala ukwanda ebusweni bomhlaba, bezala amadodakazi, 2 amadodana
kaNkulunkulu abona amadodakazi abantu ukuthi mahle, azithathela abafazi kuwo awathandayo.
3
Wayesethi uJehova: "UMoya wami awuyikubusa njalo kumuntu, njengokuba eyinyama nje;
izinsuku zakhe ziyakuba yiminyaka eyikhulu namashumi amabili."
4
Ngalezo zinsuku kwakukhona iziqhwaga emhlabeni, nangasemuva futhi, lapho amadodana
kaNkulunkulu engena kuwo amadodakazi abantu, awazalela abantwana. Lana ayengamadodana
asendulo anamandla, anegama lodumo. 5 Kepha uJehova wabona ukuthi ububi bomuntu bukhulu
emhlabeni nokuthi zonke izizindlo zemicabango yenhliziyo yakhe zimbi njalo.
6
Wayesezisola uJehova ukuthi wayebenzile abantu emhlabeni, wadabuka enhliziyweni yakhe. 7
UJehova wathi: "Abantu engibadalileyo ngizakubachitha ebusweni bomhlaba, yebo, abantu,
nezinkomo, nezilwanyana ezinwabuzelayo, nezinyoni zezulu, ngokuba ngiyazisola ukuthi
ngibenzile."
8
Kepha uNowa wayetholile umusa emehlweni kaJehova. 9 Lokhu kuyizizukulwane zikaNowa.
UNowa wayeyindoda eqotho, engenacala esizukulwaneni sakhe; uNowa wayehamba
noNkulunkulu. 10 UNowa wazala amadodana amathathu: ngoShemi, noHamu, noJafete.
11
Umhlaba wawonakele ebusweni bukaJehova; umhlaba wagcwala ubudlwangudlwangu. 12
UNkulunkulu wabona ukuthi umhlaba wonakele, ngokuba inyama yonke yayonakalisile indlela
yayo emhlabeni.
13
UNkulunkulu wathi kuNowa: "Ukuphela kwenyama yonke kufikile phambi kwami, ngokuba
umhlaba ugcwele ubudlwangudlwangu ngenxa yabantu; bheka, ngiyakubachitha kanye
nomhlaba. 14 Yakha umkhumbi ngemithi yegofere, wenze amakamelo emkhunjini, uwuhuqe
ngaphakathi nangaphandle ngekolitayi. 15 Yikho lokhu ozakukwenza: ubude bomkhumbi
buyakuba yizingalo ezingamakhulu amathathu, ububanzi bawo bube yizingalo ezingamashumi
ayisihlanu, nokuphakama kwawo kube yizingalo ezingamashumi amathathu. 16 Yenza ifasitele
emkhunjini, uligcine ngaphezulu libe yingalo inye, ufake umnyango womkhumbi ohlangothini
lwawo, uwenze ube nendlu engaphansi nengaphakathi nengaphezulu. 17 Mina, bheka, mina
ngizakuzisa uzamcolo wamanzi emhlabeni ukuba achithe yonke inyama okukuyo umoya
wokuphila phansi kwezulu; konke okusemhlabeni kuzakufa. 18 Kepha ngiyakumisa
isivumelwano sami nawe, uze ungene emkhunjini, wena namadodana akho, nomkakho, nabafazi
bamadodana akho bekanye nawe. 19 Nakuzo zonke izilwane uzakungenisa ezimbili kuzo zonke
izinhlobo zenyama ukuba ziphile nawe, kube ngeyeduna neyensikazi. 20 Kuzo izinyoni
ngezinhlobo zazo, nakuzo izinkomo ngezinhlobo zazo, nakuzo izilwanyana ezinwabuzelayo
emhlabeni ngezinhlobo zazo kuzakufika kuwe ezimbili zezinhlobo zonke, ziphile. 21 Zithathele
kukho konke ukudla okudliwayo, ukubuthele kuwe; kuyakuba ngukudla kwakho nokwabo."
22
UNowa wenze njalo; njengalokho uNkulunkulu emyalile wakwenza.

7
1
UJehova wathi kuNowa: "Ngena emkhunjini, wena nendlu yakho yonke, ngokuba ngikubonile
wena ukuthi uqotho phambi kwami kulesi sizukulwane. 2 Kuzo zonke izilwane
ezihlambulukileyo uzakuthatha ngasikhombisa, iduna nensikazi yalo, nakuzo izilwane
ezingahlambulukile uthathe ngambili, iduna nensikazi yalo, 3 nakuzo izinyoni zezulu
ngasikhombisa, iduna nensikazi, ukuba kulondolozwe inzalo emhlabeni wonke. 4 Ngokuba emva
kwezinsuku eziyisikhombisa ngiyakunisa imvula emhlabeni izinsuku ezingamashumi amane
nobusuku obungamashumi amane, ngichithe ebusweni bomhlaba konke okuphilayo
engikwenzileyo."
5
UNowa wakwenza konke njengalokho emyalile uJehova. 6 UNowa wayeneminyaka
engamakhulu ayisithupha mhla uzamcolo wamanzi efika emhlabeni. 7 UNowa wangena
emkhunjini namadodana akhe, nomkakhe, nabafazi bamadodana akhe bekanye naye ngenxa
yamanzi kazamcolo. 8 Kuzo izilwane ezihlambulukileyo nezingahlambulukile, nezinyoni,
nezilwanyana ezinwabuzelayo emhlabeni 9 kwangena ngambili emkhunjini kuNowa, iduna
nensikazi, njengalokho uNkulunkulu emyalile uNowa. 10 Kwathi emva kwezinsuku
eziyisikhombisa amanzi kazamcolo afika emhlabeni;
11
ngomnyaka wamakhulu ayisithupha wokuhamba kukaNowa ngenyanga yesibili ngosuku
lweshumi nesikhombisa lwenyanga, ngalona lolo suku imithombo yonke yotwa yabhoboka,
namafasitele asezulwini avuleka. 12 Lana emhlabeni izinsuku ezingamashumi amane nobusuku
obungamashumi amane.
13
Ngalolo suku uNowa wangena emkhunjini noShemi, noHamu, noJafete, amadodana kaNowa,
nomkaNowa, nabafazi bobathathu bamadodana akhe bekanye nabo, 14 bona nazo zonke izilwane
ngezinhlobo zazo, nezinkomo zonke ngezinhlobo zazo, nezilwanyana zonke ezinwabuzelayo
emhlabeni ngezinhlobo zazo, nezinyoni zonke ngezinhlobo zazo, konke okunamaphiko. 15
Zangena kuNowa emkhunjini zimbili ngazimbili enyameni yonke okukuyo umoya wokuphila. 16
Ezangenayo zangena ziyiduna nensikazi zenyama yonke, njengalokho uNkulunkulu emyalile;
uJehova wavala emva kwakhe.
17
Kwaba nguzamcolo emhlabeni izinsuku ezingamashumi amane; amanzi anda, aphakamisa
umkhumbi; waphakama phezu komhlaba. 18 Amanzi akhula, anda kakhulu emhlabeni; umkhumbi
wahamba ebusweni bamanzi. 19 Amanzi andisisa impela emhlabeni; zasitshekelwa zonke izintaba
eziphakemeyo eziphansi kwezulu lonke. 20 Amanzi azidlula ngezingalo eziyishumi nanhlanu,
zaze zasitshekelwa izintaba.
21
Inyama yonke eyayihamba emhlabeni yafa, izinyoni, nezinkomo, nezilo, nezilwanyana
ezinwabuzelayo emhlabeni, nabantu bonke; 22 konke okunomphefumulo womoya wokuphila
emakhaleni akho, konke okusemhlabathini owomileyo, kwafa. 23 Wachitha kanjalo konke
okuphilayo ebusweni bomhlaba, abantu, nezinkomo, nezilwanyana ezinwabuzelayo, nezinyoni
zezulu; wakuchitha emhlabeni; kwasala uNowa yedwa kanye nakho okwakukhona naye
emkhunjini. 24 Amanzi ayenamandla emhlabeni izinsuku eziyikhulu namashumi ayisihlanu.

8
1
UNkulunkulu wayesemkhumbula uNowa, nezilwane zonke, nezinkomo zonke ezinaye
emkhunjini. UNkulunkulu wadlulisa umoya phezu komhlaba, amanzi abohla. 2 Imithombo yotwa
namafasitele asezulwini kwavinjwa, imvula yasezulwini yaphela. 3 Amanzi ayesemuka njalo
emhlabeni; emva kwezinsuku eziyikhulu namashumi ayisihlanu amanzi ancipha.
4
Ngenyanga yesikhombisa ngosuku lweshumi nesikhombisa enyangeni umkhumbi wema
ezintabeni zase-Ararati. 5 Amanzi ancipha njalonjalo, kwaze kwaba senyangeni yeshumi.
Ngeyeshumi ngolokuqala lwenyanga iziqongo zezintaba zabonakala.
6
Kwathi emva kwezinsuku ezingamashumi amane uNowa wavula ifasitele lomkhumbi
abelenzile. 7 Wathuma igwababa, lazulazula njalo, aze asha amanzi emhlabeni. 8 Wayesethuma
ijuba ukubona ukuba amanzi asenciphile yini ebusweni bomhlaba. 9 Kepha ijuba lalingafumani
ukuphumula kwamathe onyawo lwalo, labuyela kuye emkhunjini, ngokuba amanzi
ayesesebusweni bomhlaba wonke; waselula isandla sakhe, walithatha, walingenisa kuye
emkhunjini. 10 Wabuye wahlala izinsuku eziyisikhombisa; waphinda walithuma ujuba
emkhunjini. 11 Ijuba lafika kuye ngakusihlwa; bheka, kusemlonyeni walo iqabunga lomnqumo
elikhiweyo. Wase azi uNowa ukuthi amanzi anciphile emhlabeni. 12 Wabuye wahlala izinsuku
eziyisikhombisa; walithuma ijuba; alabe lisabuyela kuye.
13
Kwathi ngomnyaka wamakhulu ayisithupha nanye ngenyanga yokuqala ngolokuqala
lwenyanga amanzi abeseshile emhlabeni; uNowa wasusa uphahla lomkhumbi, wabona, bheka,
ubuso bomhlaba base bomile. 14 Ngenyanga yesibili ngosuku lwamashumi amabili nesikhombisa
lwenyanga umhlaba wawusomile.
15
UNkulunkulu wakhuluma kuNowa, wathi: 16 "Phuma emkhunjini, wena nomkakho,
namadodana akho, nabafazi bamadodana akho bekanye nawe. 17 Phuma kanye nezilwane zonke
eziphilayo zenyama yonke, izinyoni, nezinkomo, nezilwanyana zonke ezinwabuzelayo
emhlabeni, zichume emhlabeni, zizale, zande emhlabeni." 18 Wayesephuma uNowa namadodana
akhe, nomkakhe, nabafazi bamadodana akhe bekanye naye. 19 Zonke izilwane, nazo zonke
izilwanyana ezinwabuzelayo, nazo zonke izinyoni, konke okuhamba emhlabeni ngezinhlobo
zakho kwaphuma emkhunjini.
20
UNowa wamakhela uJehova i-altare, wathatha kuzo zonke izilwane ezihlambulukileyo nakuzo
zonke izinyoni ezihlambulukileyo, wanikela umnikelo wokushiswa e-altare. 21 UJehova wezwa
iphunga elimnandi; uJehova wathi enhliziyweni yakhe: "Angisayikuphinda ngiqalekise umhlaba
ngenxa yabantu, ngokuba imicabango yomuntu mibi kwasebusheni bakhe; angisayikuphinda
ngibhubhise konke okuphilayo, njengalokho ngenzile. 22 Umhlaba usekhona, ukutshala
nokuvuna, amakhaza nokufudumala, ihlobo nobusika, imini nobusuku akuyikunqamuka."

9
1
UNkulunkulu wabusisa uNowa namadodana akhe, wathi kubo: "Zalani nande, nigcwalise
umhlaba. 2 Uvalo nokwesabeka kwenu akube phezu kwezilwane zonke zomhlaba, naphezu
kwazo zonke izinyoni zezulu, naphezu kwakho konke okunwabuzelayo emhlabeni, naphezu
kwazo zonke izinhlanzi, kunikezelwe ezandleni zenu. 3 Zonke izilwane eziphilayo ziyakuba
ngukudla kwenu; ngiyaninika konke kube njengemifino eluhlaza. 4 "Kepha inyama okukuyo
umphefumulo wayo, okungukuthi igazi layo, aniyikuyidla. 5 Kodwa elenu igazi okukulo
umphefumulo wenu ngiyakulibiza; kuzo zonke izilwane ngiyakulibiza; nakubo bonke abantu
ngiyakubiza umphefumulo wabo, owomunye esandleni somunye. 6 Ochitha igazi lomuntu, igazi
lakhe liyakuchithwa ngabantu, ngokuba uNkulunkulu wamenza umuntu ngomfanekiso wakhe. 7
Kepha zalani nina, nande, nichume emhlabeni, nivame kuwo."
8
UNkulunkulu wakhuluma kuNowa nakumadodana akhe enaye, wathi: 9 "Bhekani, mina
ngiyamisa isivumelwano sami nani nenzalo yenu emva kwenu, 10 nezilwane zonke eziphilayo
ezinani, izinyoni, nezinkomo, nezilo zomhlaba ezinani, zonke eziphume emkhunjini, yebo, zonke
izilwane zasemhlabeni. 11 Ngizakumisa isivumelwano sami nawe; akusayikubhujiswa nyama
ngamanzi kazamcolo; akasayikuza uzamcolo ukuba achithe umhlaba."
12
UNkulunkulu wathi: "Lokhu kuluphawu lwesivumelwano engisenza phakathi kwami nani nazo
zonke izilwane eziphilayo ezinani kuze kube sezizukulwaneni zaphakade: 13 ngizakumisa uthingo
lwami emafwini, lube luphawu lwesivumelwano phakathi kwami nomhlaba. 14 Kuyakuthi lapho
ngiqoqa amafu phezu komhlaba, uthingo lubonakale emafwini. 15 Khona ngiyakukhumbula
isivumelwano esiphakathi kwami nani nazo zonke izilwane eziphilayo zenyama yonke; amanzi
awasayikuba nguzamcolo wokuchitha inyama yonke. 16 Uthingo luyakuba semafwini;
ngizakulubheka, ngikhumbule isivumelwano esiphakade phakathi kukaNkulunkulu nazo zonke
izilwane eziphilayo zenyama yonke emhlabeni." 17 UNkulunkulu wathi kuNowa: "Lokhu
kuluphawu lwesivumelwano engisenzile phakathi kwami nayo yonke inyama esemhlabeni."
18
Amadodana kaNowa aphuma emkhunjini ayengoShemi, noHamu, noJafete; uHamu
wayenguyise kaKhanani. 19 Yilawo amadodana amathathu kaNowa; umhlaba wonke
wagcwaliswa ngabavela kuwo. 20 UNowa waqala waba ngumlimi, watshala isivini. 21 Waphuza
iwayini, wadakwa, walala nqunu etendeni lakhe. 22 UHamu uyise kaKhanani wabona ubunqunu
bukayise, watshela abafowabo bobabili bengaphandle. 23 OShemi noJafete bathatha ingubo,
bayifaka emahlombe abo bobabili, bahamba nyovane, basibekela ubunqunu bukayise; ubuso babo
babubheka emuva, abaze babona ubunqunu bukayise.
24
UNowa waphaphama ekudakweni, wezwa lokho ebikwenzile kuye indodana yakhe encane. 25
Wathi: "Makaqalekiswe uKhanani, abe yisigqila sezigqila kubafowabo." 26 Wathi futhi:
"Ubusisiwe uJehova, uNkulunkulu kaShemi, uKhanani abe yisigqila sabo. 27 UNkulunkulu
amandise uJafete, ahlale ematendeni kaShemi, uKhanani abe yisigqila sabo."
28
Emva kukazamcolo uNowa wahamba iminyaka engamakhulu amathathu namashumi
ayisihlanu. 29 Izinsuku zonke zikaNowa zaziyiminyaka engamakhulu ayisishiyagalolunye
namashumi ayisihlanu.

10
1
Lezi ziyizizukulwane zamadodana kaNowa: ngoShemi, noHamu, noJafete; bazalelwa
amadodana emva kukazamcolo. 2 Amadodana kaJafete: ngoGomere, noMagoge, noMadayi,
noJavani, noThubali, noMesheke, noTirase. 3 Amadodana kaGomere: ngo-Ashikenaze, noRifate,
noThogarma. 4 Amadodana kaJavani: ngo-Elisha, noTharishishi, noKitimi, noDodanimi. 5
Kuvela kulabo iziqhingi zabezizwe zahlukaniselwa amazwe abo, kwaba yilelo nalelo ngolimi
lwalo, nangemindeni yalo, nangezizwe zalo.
6
Amadodana kaHamu: ngoKushe, noMisirayimi, noPhuthi, noKhanani. 7 Amadodana kaKushe:
ngoSeba, noHavila, noSabita, noRama, noSabitheka. Amadodana kaRama: ngoSheba noDedani. 8
UKushe wazala uNimrode; yena waqala ukuba ngonamandla emhlabeni. 9 Wayeyiphisi
elinamandla ebusweni bukaJehova; ngalokho kuthiwa: "Iphisi elinamandla njengoNimrode
ebusweni bukaJehova." 10 Ukubusa kwakhe kwaqala eBabele, nase-Ereke, nase-Akade,
naseKaline, ezweni laseShineyari. 11 Waphuma kulelo zwe, waya e-Asiriya, wakha iNineve,
neRehoboti-Ire, neKhala, 12 neResene phakathi kweNineve neKhala; lo ungumuzi omkhulu. 13
UMisirayimi wazala amaLudi, nama-Anami, namaLehabi, namaNafetuhi, 14 namaPatrusi,
namaKasuluhi, lapho kwavela khona amaFilisti namaKafitori.
15
UKhanani wazala uSidoni, izibulo lakhe, noHeti, 16 namaJebusi, nama-Amori, namaGirigashi,
17
namaHivi, nama-Arki, namaSini, 18 nama-Arvadi, namaSemari, namaHamati; ngasemuva
imindeni yamaKhanani yahlakazeka. 19 Umkhawulo wamaKhanani wawususukela eSidoni, waya
ngaseGerari waze wafika eGaza; waya ngaseSodoma naseGomora nase-Adima naseSeboyimi
waze wafika eLasha. 20 Labo babe ngamadodana kaHamu ngemindeni yawo nangezilimi zawo
emazweni awo nasezizweni zawo.
21
NoShemi uyise wabantwana bonke baka-Ebere, umnewabo omkhulu kaJafete, wazala
abantwana. 22 Amadodana kaShemi: ngo-Elamu, no-Ashuri, no-Arapakishade, noLude, no-
Aramu. 23 Amadodana ka-Aramu: ngo-Use, noHule, noGeteri, noMashe. 24 U-Arpakishade
wazala uShela; uShela wazala u-Ebere. 25 U-Ebere wazala amadodana amabili; igama lomunye
lalinguPhelege, ngokuba emihleni yakhe izwe ladatshulwa. Igama lomfowabo lalinguJokothane.
26
UJokothane wazala o-Alimodade, noShelefe, noHasaramavete, noJere, 27 noHadoramu, no-
Uzali, noDikila, 28 no-Obale, no-Abimayele, noSheba, 29 no-Ofiri, noHavila, noJababi; bonke
laba babengamadodana kaJokothane. 30 Ukwakha kwabo kwasukela eMesha kwaze kwafika
ngaseSefare, intaba yasempumalanga. 31 Laba babe ngamadodana kaShemi ngemindeni yawo
nangezilimi zawo, emazweni awo nasezizweni zawo. 32 Lezi ziyimindeni yamadodana kaNowa
ngezizukulwane zawo ezizweni zawo; ngalawo izizwe zahlakazeka emhlabeni emva
kukazamcolo.

11
1
Umhlaba wonke wawunolimi lunye nokukhuluma kunye. 2 Kwathi ekusukeni kwabo
empumalanga bafumana ithafa ezweni laseShineyari; bakha khona. 3 Base bethi omunye
komunye: "Wozani, ake senze izitini, sizishisise." Izitini zaba ngamatshe abo, nebitume laba
ludaka lwabo. 4 Bathi: "Wozani, asakhe umuzi nombhoshongo osiqongo sawo sisezulwini,
sizenzele igama, funa sihlakazeke ebusweni bomhlaba wonke."
5
UJehova wehla ukuba abone umuzi nombhoshongo okwakhiwa ngabantwana babantu. 6
UJehova wathi: "Bheka, bonke basizwe sinye nolimi lunye; yikho abaqala ngakho; manje
abayikunqanyulelwa lutho abahlosa ukulwenza. 7 Wozani sehle, siye ukusanganisa ulimi lwabo
ukuba bangezwani, kube yilowo nalowo ulimi lomunye." 8 Kanjalo uJehova wabahlakazela
emhlabeni wonke, bephuma lapho; bayeka ukwakha umuzi. 9 Ngalokho igama lawo lathiwa
iBabele, ngokuba uJehova wasanganisa khona ulimi lomhlaba wonke; wabahlakazela emhlabeni
wonke.
10
Lezi ziyizizukulwane zikaShemi; uShemi wayeneminyaka eyikhulu, wazala u-Arpakishade
iminyaka emibili emva kukazamcolo. 11 Emva kokuzalwa kuka-Arpakishade uShemi wahamba
iminyaka engamakhulu ayisihlanu, wazala amadodana namadodakazi. 12 U-Arpakishade
wahamba iminyaka engamashumi amathathu nanhlanu, wazala uShela. 13 Emva kokuzalwa
kukaShela u-Arpakishade wahamba iminyaka engamakhulu amane nantathu, wazala amadodana
namadodakazi. 14 UShela wahamba iminyaka engamashumi amathathu, wazala u-Ebere. 15 Emva
kokuzalwa kuka-Ebere uShela wahamba iminyaka engamakhulu amane nantathu, wazala
amadodana namadodakazi. 16 U-Ebere wahamba iminyaka engamashumi amathathu nane, wazala
uPhelege. 17 Emva kokuzalwa kukaPhelege u-Ebere wahamba iminyaka engamakhulu amane
namashumi amathathu, wazala amadodana namadodakazi. 18 UPhelege wahamba iminyaka
engamashumi amathathu, wazala uRehu. 19 Emva kokuzalwa kukaRehu uPhelege wahamba
iminyaka engamakhulu amabili nesishiyagalolunye, wazala amadodana namadodakazi. 20 URehu
wahamba iminyaka engamashumi amathathu nambili, wazala uSerugi. 21 Emva kokuzalwa
kukaSerugi uRehu wahamba iminyaka engamakhulu amabili nesikhombisa, wazala amadodana
namadodakazi. 22 USerugi wahamba iminyaka engamashumi amathathu, wazala uNahori. 23
Emva kokuzalwa kukaNahori uSerugi wahamba iminyaka engamakhulu amabili, wazala
amadodana namadodakazi. 24 UNahori wahamba iminyaka engamashumi amabili
nesishiyagalolunye, wazala uThera. 25 Emva kokuzalwa kukaThera uNahori wahamba iminyaka
eyikhulu neshumi nesishiyagalolunye, wazala amadodana namadodakazi. 26 UThera wahamba
iminyaka engamashumi ayisikhombisa, wazala o-Abrama, noNahori, noHarana.
27
Lezi ziyizizukulwane zikaThera. UThera wazala o-Abrama, noNahori, noHarana; uHarana
wazala uLoti. 28 UHarana wafa phambi kukayise uThera ezweni lokuzalwa kwakhe, i-Uri
lamaKaledi. 29 O-Abrama noNahori bazithathela abafazi; igama lomka-Abrama lalinguSarayi;
igama lomkaNahori lalinguMilka, indodakazi kaHarana, uyise kaMilka noyise kaJiska. 30
USarayi wayeyinyumba, engenamntwana. 31 UThera wathatha u-Abrama indodana yakhe, noLoti
indodana kaHarana, indodana yendodana yakhe, noSarayi umalokazana wakhe, umka-Abrama
indodana yakhe, waphuma nabo e-Uri lamaKaledi ukuya ezweni laseKhanani; bafika eHarana,
bakha khona. 32 Izinsuku zikaThera zaziyiminyaka engamakhulu amabili nanhlanu; uThera
wafela eHarana.

12
1
UJehova wathi ku-Abrama: "Phuma ezweni lakini, nasezihlotsheni zakho, nasendlini kayihlo,
uye ezweni engiyakukukhombisa lona. 2 Ngiyakukwenza isizwe esikhulu, ngikubusise, ngenze
igama lakho libe likhulu, wena ube yisibusiso. 3 Ngiyakubabusisa abakubusisayo,
nokuqalekisayo ngiyakumqalekisa; imindeni yonke yomhlaba iyakubusiswa kuwe."
4
Wayesesuka u-Abrama, njengalokho uJehova emtshelile; uLoti wahamba naye; u-Abrama
wayeneminyaka engamashumi ayisikhombisa nanhlanu mhla ephuma eHarana. 5 U-Abrama
wathatha uSarayi umkakhe, noLoti indodana yomfowabo, nempahla yonke ababeyibuthile,
nezinceku ababezitholile eHarana; basuka ukuya ezweni laseKhanani; bafika-ke ezweni
laseKhanani.
6
U-Abrama wadabula izwe, waze wafika endaweni yaseShekemi nase-okini laseMore;
amaKhanani ayesekhona ezweni. 7 UJehova wabonakala ku-Abrama, wathi: "Leli zwe
ngiyakulinika inzalo yakho." Wamakhela khona i-altare uJehova owayebonakele kuye. 8
Wayesesuka lapho, waya entabeni ngasempumalanga kwaseBethele, wamisa itende lakhe,
iBethele lingasentshonalanga ne-Ayi lingasempumalanga; wamakhela khona uJehova i-altare,
wakhuleka egameni likaJehova. 9 Ngasemuva u-Abrama wahamba waqonda njalo
ngaseningizimu.
10
Kwakukhona indlala ezweni; u-Abrama wehlela eGibithe ukuba agogobale khona, ngokuba
indlala yayinzima ezweni. 11 Kwathi esasondela ukungena eGibithe, wathi kuSarayi umkakhe:
"Bheka-ke, ngiyazi ukuthi ungowesifazane omuhle, obukekayo. 12 Kuyakuthi ukuba abaseGibithe
bakubone, bathi: ‘Ngumkakhe lowo,’ bazakungibulala mina, bakulonde wena. 13 Mawuthi
ungudadewethu, ukuze kube kuhle kimi ngenxa yakho, umphefumulo wami uphile ngenxa
yakho."
14
Kwathi u-Abrama efika eGibithe, abaseGibithe babona owesifazane ukuthi muhle kakhulu. 15
Izinduna zikaFaro zambona, zambabaza phambi kukaFaro; owesifazane wangeniswa endlini
kaFaro. 16 U-Abrama waphathwa kahle ngenxa yakhe; waba nezimvu, nezinkabi, nezimbongolo,
nezinceku, nezincekukazi, nezimbongolokazi, namakamela. 17 Kepha uJehova wamshaya uFaro
nendlu yakhe ngezinhlupho ezinkulu ngenxa kaSarayi umka-Abrama. 18 UFaro wayesembiza u-
Abrama, wathi: "Kuyini lokho okwenze kimi na? Awungitshelanga ngani ukuthi ungumkakho na?
19
Usholoni ukuthi: ‘Ungudadewethu,’ ngize ngimthathe abe ngumkami, na? Bheka manje, nangu
umkakho; mthathe, uhambe." 20 UFaro wayala amadoda ngaye; ammukisa kanye nomkakhe
nakho konke anakho.

13
1
U-Abrama wakhuphuka eGibithe kanye nomkakhe nakho konke anakho, uLoti enaye, waya
ngaseningizimu. 2 U-Abrama wayefuyile kakhulu izinkomo, nesiliva, negolide. 3 Kuzo
izinkambo zakhe wasuka eningizimu, wafika eBethele, leyo ndawo lapho lalikhona itende lakhe
kuqala, phakathi kweBethele ne-Ayi, 4 indawo ye-altare abelenzile khona kuqala; u-Abrama
wakhuleka lapho egameni likaJehova.
5
Naye uLoti owahamba no-Abrama wayenezimvu, nezinkomo, namatende. 6 Izwe
lalingenakubanela ukuba bahlale ndawonye, ngokuba impahla yabo yayiningi kunokuba bahlale
ndawonye. 7 Kwavela ukuxabana phakathi kwabelusi bezinkomo zika-Abrama nabelusi
bezinkomo zikaLoti; amaKhanani namaPherizi ayehlala khona ezweni. 8 U-Abrama wathi
kuLoti: "Akungabikho ukuxabana phakathi kwami nawe naphakathi kwabelusi bami nabelusi
bakho, ngokuba singabazalwane. 9 Izwe lonke alisobala ebusweni bakho na? Mawuhlukane nami;
uma uya ngakwesokhohlo, ngiyakuya ngakwesokunene; uma uya ngakwesokunene, ngiyakuya
ngakwesokhohlo."
10
ULoti waphakamisa amehlo akhe, wabona ukuthi ithafa lonke laseJordani lalinamanzi lonke;
uJehova engakachithi iSodoma neGomora, lalinjengensimu kaJehova nanjengezwe laseGibithe
kwaze kwaba seSowari. 11 ULoti wakhetha ithafa lonke laseJordani; uLoti wasuka waya
ngasempumalanga; bahlukana omunye nomunye. 12 U-Abrama wahlala ezweni laseKhanani;
uLoti wahlala emizini yasethafeni, wamisa itende lakhe ngaseSodoma. 13 Kepha abantu
baseSodoma babebabi, bengabonayo kakhulu phambi kukaJehova.
14
UJehova wathi ku-Abrama, uLoti esehlukene naye: "Phakamisa manje amehlo akho ubuke,
usendaweni lapho umi khona, ngasenyakatho, naseningizimu, nasempumalanga,
nasentshonalanga, 15 ngokuba izwe lonke olibonayo ngiyakulinika wena nenzalo yakho kuze
kube phakade. 16 Ngiyakwenza inzalo yakho ibe njengothuli lomhlaba, kuze kuthi, uma umuntu
engabala uthuli lomhlaba, iyakubalwa nenzalo yakho. 17 Suka udabule izwe, ubude balo
nobubanzi balo, ngokuba ngiyakukunika lona." 18 Wayesesuka u-Abrama, weza wakha ngasema-
okini aseMamre laseHebroni, wamakhela khona uJehova i-altare.

14
1
Kwathi emihleni ka-Amrafeli inkosi yaseShineyari, no-Ariyoki inkosi yase-Elasare,
noKedorlawomere inkosi yase-Elamu, noTidali inkosi yezizwe, 2 baphaka impi noBera inkosi
yaseSodoma, noBirisha inkosi yaseGomora, noShinabe inkosi yase-Adima, noShemebere inkosi
yaseSeboyimi, nenkosi yaseBela eliyiSowari. 3 Bonke laba bahlangana esiGodini saseSidimi
esiluLwandle Lukasawoti. 4 Iminyaka eyishumi nambili bamkhonza uKedorlawomere, kepha
ngomnyaka weshumi nantathu bahlubuka. 5 Ngomnyaka weshumi nane kweza uKedorlawomere
kanye namakhosi anaye, banqoba amaRefa e-Ashiteroti Karinayimi, namaZuzi eHamu, nama-
Emi eShave Kiriyatayimi, 6 namaHori entabeni yawo iSeyiri, kwaze kwaba se-Eli Pharanu
ngasehlane. 7 Base bebuyela emuva, beza e-Eni Mishipati eliyiKadeshi, bachitha izwe lonke
lama-Amaleki nelama-Amori ayehlala eHasasoni Tamari. 8 Yaphuma inkosi yaseSodoma,
nenkosi yaseGomora, nenkosi yase-Adima, nenkosi yaseSeboyimi, nenkosi yaseBela eliyiSowari;
bahloma, balwa nabo esiGodini saseSidimi. 9 Balwa noKedorlawomere inkosi yase-Elamu,
noTidali inkosi yezizwe, no-Amrafeli inkosi yaseShineyari, no-Ariyoki inkosi yase-Elasare;
amakhosi amane alwa nayisihlanu. 10 IsiGodi saseSidimi sasigcwele imigodi yebitume; inkosi
yaseSodoma neyaseGomora abaleka, awela kuyo; abaseleyo babalekela entabeni. 11 Bathatha
yonke impahla yaseSodoma neyaseGomora kanye nakho konke ukudla, bamuka. 12 Bamthatha
uLoti indodana yomfowabo ka-Abrama owayehlala eSodoma kanye nempahla yakhe, bamuka.
13
Kepha kweza ophunyukileyo, wamtshela u-Abrama umHeberu, ngokuba wayehlala ngasema-
okini kaMamre umAmori, umfowabo ka-Eshikoli nomfowabo ka-Anere; labo babehlangene no-
Abrama. 14 Nxa u-Abrama esezwile ukuthi umzalwane wakhe uLoti uthunjiwe, wabutha izinceku
zakhe ezifundisiweyo ebezizelwe endlini yakhe, ezingamakhulu amathathu neshumi
nesishiyagalombili, wabaxosha kwaze kwaba kwaDani. 15 Wazahlukanisa ebusuku izinceku
zakhe, wabahlasela, wabanqoba, wabaxosha, waze wafika eHoba elingasenyakatho
kwaseDamaseku. 16 Wabuyisa yonke impahla, wambuyisa noLoti umzalwane wakhe, nempahla
yakhe, nabesifazane, nabantu.
17
Emva kokubuya kwakhe ekunqobeni uKedorlawomere namakhosi anaye yaphuma inkosi
yaseSodoma, yaya ukumhlangabeza esiGodini saseShave esiyisiGodi seNkosi. 18 UMelkisedeki
inkosi yaseSalema waletha isinkwa newayini; wayengumpristi kaNkulunkulu oPhezukonke. 19
Wambusisa wathi: "U-Abrama makabusiswe nguNkulunkulu oPhezukonke, umdali wezulu
nomhlaba. 20 Makabongwe uNkulunkulu oPhezukonke onike izitha zakho esandleni sakho." U-
Abrama wamnika okweshumi kwakho konke.
21
Inkosi yaseSodoma yathi ku-Abrama: "Ngiphe abantu, uzithathele impahla." 22 Kepha u-
Abrama wathi enkosini yaseSodoma: "Ngiyaphakamisela isandla sami kuJehova, uNkulunkulu
oPhezukonke, umdali wezulu nomhlaba, 23 ngithi angiyikuthatha umucwana nomchilo
wezicathulo nokunye okwakho ukuba ungasho ukuthi: ‘Ngimcebisile u-Abrama.’ 24 Kuphela
lokho ezikudlile izinceku, nesabelo samadoda ayehamba nami; o-Anere, no-Eshikoli, noMamre
mabathathe isabelo sabo."

15
1
Emva kwalokho kwafika izwi likaJehova ku-Abrama ngombono, lithi: "Ungesabi, Abrama,
ngiyisihlangu sakho; umvuzo wakho uyakuba mkhulu kakhulu."
2
Kepha u-Abrama wathi: "Nkosi Jehova, uyakungiphani na? Ngihamba ngingenamntwana;
indlalifa yendlu yami ingu-Eliyezeri waseDamaseku." 3 U-Abrama wathi futhi: "Bheka,
awunginikanga nzalo; bheka, inceku yendlu yami iyakuba yindlalifa yami." 4 Bheka, izwi
likaJehova leza kuye, lathi: "Lona akayikudla ifa lakho, kepha oyakuphuma ezibilinini zakho
uyakudla ifa lakho." 5 Wamphumisela ngaphandle, wathi: "Bheka ngasezulwini, ubale
izinkanyezi, uma ungazibala." Wathi kuye: "Kuyakuba njalo inzalo yakho." 6 Wakholwa
nguJehova; wambalela lokho kwaba ngukulunga.
7
Wayesethi kuye: "NginguJehova owakuphumisa e-Uri lamaKaledi ukuba ngikunike leli zwe
libe yifa lakho." 8 Wathi: "Nkosi Jehova, ngiyokwazi ngani ukuthi ngiyakulidla na?" 9 Wathi
kuye: "Ngithabathele isithokazi esineminyaka emithathu, nembuzi eyinsikazi eneminyaka
emithathu, nenqama eneminyaka emithathu, nehobhe, nephuphu lejuba." 10 Wamthathela zonke
lezo, wazinquma phakathi, wabeka kwaba yileyo naleyo nxenye ukuba ibhekane nenye; kepha
izinyoni akazinqumanga. 11 Amanqe ehlela phezu kwezidumbu; u-Abrama wawaxosha.
12
Kwathi ngokushona kwelanga ubuthongo obunzima bamehlela u-Abrama; bheka, washaywa
luvalo lobumnyama obukhulu. 13 Wathi ku-Abrama: "Yazisisa ukuthi inzalo yakho izakuba
ngumfokazi ezweni elingesilo elayo, ibe yizigqila, icindezelwe iminyaka engamakhulu amane. 14
Kepha leso sizwe eyakuba yizigqila zaso ngiyakusahlulela mina; ngasemuva iyakuphuma
inempahla eningi. 15 Kepha wena uyakuya koyihlo ngokuthula, umbelwe usumdala. 16
Esizukulwaneni sesine iyakubuyela lapha, ngokuba ububi bama-Amori abukapheleli."
17
Kwathi ngokushona kwelanga kwaba mnyama, bheka, nanto iziko elithunqayo, nelangabi
lomlilo ladabula phakathi kwalezo zinxenye. 18 Ngalolo suku uJehova wasenza isivumelwano no-
Abrama, wathi: "Ngiyakunika inzalo yakho leli zwe, kusukela emfuleni waseGibithe kuze kube
semfuleni omkhulu, umfula u-Ewufrathe: 19 amaKheni, namaKhenizi, namaKadimoni, 20
namaHeti, namaPherizi, namaRefa, 21 nama-Amori, namaKhanani, namaGirigashi, namaJebusi."

16
1
USarayi umka-Abrama wayengamzaleli mntwana; kepha wayenencekukazi yaseGibithe, igama
layo linguHagari. 2 USarayi wathi ku-Abrama: "Bheka-ke, uJehova ungivalile ekuzaleni;
mawungene kuyo incekukazi yami; mhlawumbe ngizakwakhelwa ngayo." U-Abrama walalela
izwi likaSarayi. 3 USarayi, umka-Abrama, wathatha uHagari waseGibithe, incekukazi yakhe,
wamnika u-Abrama indoda yakhe abe ngumkakhe, u-Abrama esehlalile iminyaka eyishumi
ezweni laseKhanani.
4
Wangena kuHagari; wakhulelwa. Esebonile ukuthi ukhulelwe, inkosikazi yakhe yadeleleka
emehlweni akhe. 5 USarayi wathi ku-Abrama: "Okubi okwenziwe kimi akube phezu kwakho.
Mina nganikela incekukazi yami esifubeni sakho; kepha nxa isibonile ukuthi ikhulelwe, ngase
ngideleleka emehlweni ayo; uJehova makahlulele icala phakathi kwami nawe." 6 U-Abrama
wathi kuSarayi: "Bheka, incekukazi yakho isesandleni sakho; yenza kuyo okufanele emehlweni
akho." USarayi wayilaya, yabaleka ebusweni bakhe.
7
Ingelosi kaJehova yamfumana ngasemthonjeni wamanzi ehlane, umthombo osendleleni eya
eShuri. 8 Yathi: "Hagari, ncekukazi kaSarayi, uvelaphi na? Uyangaphi na?" Wathi: "Ngibaleka
ebusweni bukaSarayi inkosikazi yami." 9 Ingelosi kaJehova yathi kuye: "Buyela kuyo inkosikazi
yakho, uzithobise phansi kwesandla sayo."
10
Ingelosi kaJehova yathi futhi kuye: "Ngiyakwandisa kakhulu inzalo yakho, ingabe isabalwa
ngobuningi bayo." 11 Ingelosi kaJehova yathi kuye: "Bheka, usukhulelwe; uyakuzala indodana,
uyiqambe igama lokuthi u-Ishmayeli, ngokuba uJehova uzwile ukuhlupheka kwakho. 12 Uyakuba
ngumuntu onjengembongolo engathanjisiwe, isandla sakhe simelane nabo bonke, nesandla sabo
bonke simelane naye, ahlale ngasempumalanga kwabafowabo bonke." 13 Wamqamba uJehova
owayekhulume kuye igama lokuthi: "Wena unguNkulunkulu Obonayo," ngokuba wathi: "Imbala
ngimbonile ongibonayo na?" 14 Ngalokho umthombo wabizwa ngokuthi iBeri Lahayi Royi;
bheka, uphakathi kweKadeshi neBeredi.
15
UHagari wamzalela u-Abrama indodana; u-Abrama waqamba igama lendodana yakhe
ayizalayo uHagari ngokuthi u-Ishmayeli. 16 U-Abrama wayeneminyaka engamashumi
ayisishiyagalombili nesithupha mhla uHagari emzalela u-Abrama u-Ishmayeli.

17
1
U-Abrama eneminyaka engamashumi ayisishiyagalolunye nesishiyagalolunye uJehova
wabonakala ku-Abrama, wathi kuye: "NginguNkulunkulu uSomandla; hamba phambi kwami
ungenacala. 2 Ngiyakwenza isivumelwano sami phakathi kwami nawe, ngikwandise kakhulu." 3
U-Abrama wayesewa ngobuso bakhe; uNkulunkulu wakhuluma naye, wathi:
4
"Bheka, ngokwami isivumelwano sami sikuwe; uyakuba nguyise wezizwe eziningi. 5 Igama
lakho alisayikuthiwa u-Abrama, kepha igama lakho lizakuba ngu-Abrahama, ngokuba
ngikwenzile uyise wezizwe eziningi. 6 Ngiyakwandisa kakhulu inzalo yakho, ngikwenze isizwe,
kuvele namakhosi kuwe.
7
Ngiyakumisa isivumelwano sami phakathi kwami nawe, nenzalo yakho emva kwakho
ezizukulwaneni zayo, sibe yisivumelwano esiphakade, ngibe nguNkulunkulu wakho nowenzalo
yakho emva kwakho. 8 Ngiyakunika wena nenzalo yakho emva kwakho izwe ohlala kulo
ungumfokazi, izwe lonke laseKhanani, libe yifa laphakade, ngibe nguNkulunkulu wabo." 9
Wayesethi uNkulunkulu ku-Abrahama: "Wena-ke usuyakusigcina isivumelwano sami kanye
nenzalo yakho emva kwakho ezizukulwaneni zayo. 10 Yilesi isivumelwano sami phakathi kwami
nawe nenzalo yakho emva kwakho eniyakusigcina ukuthi bayakusokwa bonke abesilisa bakini. 11
Niyakusoka inyama yejwabu lenu, kube luphawu lwesivumelwano phakathi kwami nani. 12
Onezinsuku eziyisishiyagalombili phakathi kwenu uyakusokwa, bonke abesilisa ezizukulwaneni
zenu, lowo ozelwe endlini nalowo othengwe ngemali kowezizwe, ongesiye owenzalo yakho. 13
Makasokwe ozelwe endlini yakho nothengwe ngemali yakho; isivumelwano sami siyakuba
senyameni yenu, sibe yisivumelwano esiphakade. 14 Owesilisa ongasokiwe, engasokwanga
enyameni yejwabu lakhe, lowo muntu uyakunqunywa kubantu bakubo, ngokuba waphulile
isivumelwano sami."
15
UNkulunkulu wathi ku-Abrahama: "USarayi umkakho awusayikumbiza ngegama lokuthi
uSarayi, kepha igama lakhe alibe nguSara. 16 Ngiyakumbusisa, ngikunike indodana ngaye; yebo,
ngiyakumbusisa abe yizizwe, kuvele kuye amakhosi abantu." 17 U-Abrahama wayesewa ngobuso
bakhe, wahleka, wathi enhliziyweni yakhe: "Oneminyaka eyikhulu uyakuzalelwa na? USara
oneminyaka engamashumi ayisishiyagalolunye uyakuzala na?" 18 Wathi u-Abrahama
kuNkulunkulu: "Sengathi u-Ishmayeli angaphila phambi kwakho." 19 UNkulunkulu wathi: "Qha,
uSara umkakho uyakukuzalela indodana; uyakubiza igama layo ngokuthi u-Isaka; ngiyakusimisa
isivumelwano sami naye, sibe yisivumelwano esiphakade nenzalo yakhe emva kwakhe. 20 Ngo-
Ishmayeli lo ngikuzwile; bheka, ngiyakumbusisa, ngimuphe inzalo, ngimandise kakhulu impela,
azale izikhulu eziyishumi nambili, ngimenze isizwe esikhulu. 21 Kepha ngiyakumisa
isivumelwano sami no-Isaka azakukuzalela yena uSara ngalesi sikhathi ngomnyaka ozayo." 22
UNkulunkulu wayeseqeda ukukhuluma naye, wenyuka emshiya u-Abrahama.
23
U-Abrahama wathatha u-Ishmayeli indodana yakhe, nabo bonke ababezelwe endlini yakhe,
nabo bonke ababethengwe ngemali yakhe, bonke abesilisa phakathi kwabantu bendlu ka-
Abrahama, wasoka inyama yejwabu labo ngalona lolo suku, njengalokho uNkulunkulu
emtshelile. 24 U-Abrahama wayeneminyaka engamashumi ayisishiyagalolunye
nesishiyagalolunye mhla esokwa enyameni yejwabu lakhe. 25 U-Ishmayeli indodana yakhe
wayeneminyaka eyishumi nantathu mhla esokwa enyameni yejwabu lakhe. 26 U-Abrahama
nendodana yakhe u-Ishmayeli basokwa ngalusuku lunye. 27 Onke amadoda emzini wakhe
ayezelwe endlini nayethengwe ngemali kowezizwe asokwa kanye naye.

18
1
UJehova wabonakala kuye ngasema-okini aseMamre, ehlezi emnyango wetende ngesikhathi
sokushisa kwemini. 2 Waphakamisa amehlo akhe, wabuka; bheka, amadoda amathathu ayemi
phambi kwakhe; wathi ukuba awabone, wasuka emnyango wetende, wagijima ukuwahlangabeza,
wakhothama, 3 wathi: "Nkosi, uma ngifumene umusa emehlweni akho, mawungadluli encekwini
yakho. 4 Makulethwe ingcosana yamanzi, nigeze izinyawo zenu, niphumule phansi komuthi. 5
Ngizakulanda ucezu lwesikwa, nithokozise izinhliziyo zenu, andukuba nidlule, njengokuba
senifikile encekwini yenu." Athi: "Yenza njengokusho kwakho." 6 U-Abrahama waphuthuma
etendeni kuSara, wathi: "Sheshisa, uthathe amaseya amathathu empuphu ecolekileyo, uyixove,
wenze amaqebelengwane." 7 U-Abrahama wagijima, waya ezinkomeni, walanda ithole elihle
nelinonileyo, walinika encekwini; yashesha ukulilungisa. 8 Wathatha amangqanga, nobisi,
nethole abelilungisile, wakubeka phambi kwawo; wema ngakuwo phansi komuthi; adla.
9
Athi kuye: "Uphi uSara umkakho na?" Wathi: "Nangu etendeni." 10 Wayesethi: "Impela
ngiyakubuyela kuwe emva komnyaka ngalesi sikhathi; bheka, khona umkakho uSara uyakuba
nendodana." USara wakuzwa lokhu esemnyango wetende ongasemva kwakhe. 11 Kepha o-
Abrahama noSara base begugile, beneminyaka eminingi; kwase kuphelile kuSara
okwabesifazane. 12 USara wahleka phakathi kwakhe, wathi: "Lapho sengimdala, nenkosi yami
igugile, ngiyakuba nalenjabulo na?" 13 UJehova wathi ku-Abrahama: "Uhlekeleni uSara, ethi:
‘Imbala ngizakuzala ngimdala na?’ 14 Kukhona into emahlula uJehova na? Ngalesi sikhathi emva
komnyaka ngiyakubuyela kuwe, uSara abe nendodana." 15 USara waphika wathi:
"Angihlekanga," ngokuba wesaba. Kepha wathi: "Qha, uhlekile."
16
Amadoda asuka lapho, abheka ngaseSodoma; u-Abrahama wahamba nawo ewaphelekezela. 17
UJehova wathi: "Ngingamfihlela u-Abrahama lokho engizakukwenza na? 18 U-Abrahama
uyakuba yisizwe esikhulu, esinamandla; ziyakubusiswa kuyena izizwe zonke zomhlaba. 19
Ngokuba ngimkhethele ukuba ayale abantwana bakhe nendlu yakhe emva kwakhe ukugcina
indlela kaJehova nokusebenza ukulunga nokwahlulela, ukuze uJehova amenzele u-Abrahama
lokho amthembise khona." 20 UJehova wathi: "Isikhalo saseSodoma nesaseGomora sikhulu,
nezono zabo zinzima impela. 21 Ngalokho ngiyakwehla, ngibone ukuba benzile impela konke
njengokwesikhalo esesifikile kimi; uma kungenjalo, ngiyakukwazi." 22 Ayesefulathela lapho
amadoda, aya ngaseSodoma, kepha u-Abrahama wayesemi ebusweni bukaJehova.
23
U-Abrahama wasondela, wathi: "Uyakubhubhisa olungileyo kanye nomubi na? 24 Mhlawumbe
kukhona abalungileyo abangamashumi ayisihlanu phakathi komuzi; imbala uyakuyibhubhisa,
ungayiyeki indawo ngenxa yabalungileyo abangamashumi ayisihlanu abakuyo na? 25 Makube
kude nawe ukwenza ngale ndlela, ukubulala olungileyo kanye nomubi, olungileyo abe
njengomubi; lokhu makube kude nawe; umahluleli womhlaba wonke ubengayikwenza ukulunga
na?" 26 UJehova wathi: "Uma ngifumana eSodoma abalungileyo abangamashumi ayisihlanu
phakathi komuzi, ngiyakuyekela indawo yonke ngenxa yabo." 27 Kepha u-Abrahama waphendula
wathi: "Bheka, sengiqalile ukukhuluma eNkosini, mina engiluthuli nomlotha. 28 Mhlawumbe
kuyakusweleka abayisihlanu kubo abalungileyo abangamashumi ayisihlanu; ubuyakubhubhisa
wonke umuzi ngenxa yalabo abayisihlanu na?" Wathi: "Angiyikuwubhubhisa, uma ngifumana
khona abangamashumi amane nanhlanu." 29 Kepha wabuye wakhuluma kuye, wathi:
"Mhlawumbe kungafunyaniswa khona abangamashumi amane." Wathi: "Angiyikukwenza ngenxa
yabangamashumi amane." 30 Wayesethi: "Mayingathukutheli iNkosi ukuthi ngisakhuluma.
Mhlawumbe kungafunyaniswa khona abangamashumi amathathu." Wathi: "Angiyikukwenza,
uma ngifumana abangamashumi amathathu lapho." 31 Kepha wathi: "Bheka, ngiqalile
ukukhuluma neNkosi. Mhlawumbe kungatholakala abangamashumi amabili khona." Wathi:
"Angiyikuwubhubhisa ngenxa yabangamashumi amabili." 32 Wayesethi: "Mayingathukutheli
iNkosi ukuthi ngisakhuluma kanye nje. Mhlawumbe kungafunyanwa abayishumi khona." Wathi:
"Angiyikuwubhubhisa ngenxa yalabo abayishumi." 33 UJehova wasuka, nxa eseqedile
ukukhuluma no-Abrahama; u-Abrahama wabuyela endaweni yakhe.

19
1
Izingelosi zombili zafika eSodoma sekuhlwile; uLoti wayehlezi esangweni laseSodoma; uLoti
ezibona wasukuma wazihlangabeza; wakhothamela emhlabathini ngobuso, 2 wathi: "Bhekani,
makhosi, ake niphambuke, ningene endlini yenceku yenu, nihlale ubusuku, nigeze izinyawo zenu
andukuba nivuke ekuseni kusasa, nihambe indlela yenu." Zathi: "Qha, siyakuhlala phandle." 3
Kepha wazincenga kakhulu, zaze zaphambukela kuye, zangena endlini yakhe; wazilungisela idili,
wenza isinkwa esingenamvubelo, zadla.
4
Zingakalali, amadoda omuzi, amadoda aseSodoma, azungeza indlu, amasha namadala, abantu
bonke bephelele. 5 Bambiza uLoti, bathi kuye: "Aphi lawa madoda angenise kuwe ebusuku na?
Sikhiphele wona ukuba siwazi." 6 ULoti waphumela kubo ngasemnyango, wavala umnyango
emva kwakhe. 7 Wathi: "Bafowethu, ningoni. 8 Bhekani, nginamadodakazi amabili angayazi
ndoda; ake nginiphumisele wona, nenze kuwo njengokufanele emehlweni enu; kepha kulawa
madoda ningenzi lutho, ngokuba angene emthunzini wophahla lwami." 9 Bathi: "Suka lapha!"
Bathi futhi: "Lo muntu oyedwa wafika ukuba agogobale; usefuna ukwahlulela; manje
siyakukuhlupha wena kunabo." Bamcindezela kakhulu lo muntu uLoti, basondela ukuba
bafohloze umnyango. 10 Khona amadoda azelula izandla, ambuyisela uLoti endlini, avala
umnyango. 11 Amadoda ayephandle kwendlu awashaya ngobumpumputhe, amancane namakhulu,
aze akhathala ukufuna umnyango.
12
Ayesethi amadoda kuLoti: "Unobani futhi lapha na? Umkhwenyana, namadodana akho,
namadodakazi akho, nabo bonke onabo emzini baphumise kule ndawo, 13 ngokuba
siyakuyichitha le ndawo, lokhu isikhalo sabo sesisikhulu ebusweni bukaJehova; uJehova
usithumile ukuba siyichithe." 14 Wayesephuma uLoti, wakhuluma nabakhwenyana bakhe
ababeyakuthatha amadodakazi akhe, wathi: "Sukani niphume kule ndawo, ngokuba uJehova
uyakuchitha umuzi." Kepha wayenjengontelayo emehlweni abakhwenyana bakhe.
15
Kusantwela izingelosi zamsheshisa uLoti, zathi: "Vuka uthathe umkakho, namadodakazi akho
omabili onawo, funa ubhujiswe ngenxa yobubi bomuzi." 16 Esalibala, amadoda abamba isandla
sakhe, nesandla somkakhe, nesandla samadodakazi akhe omabili, uJehova enomusa kuye;
amphumisa, ambeka ngaphandle komuzi. 17 Kwathi esebaphumisile ngaphandle, wathi: "Baleka,
usinde; ungabheki emva kwakho, ungemi ndawo ethafeni lonke; balekela entabeni, funa
ubhujiswe." 18 Kepha uLoti wathi kuwo: "Nkosi, makungabi njalo. 19 Bheka, inceku yakho
ifumene umusa emehlweni akho, ungenzele ububele obukhulu ngokusindisa ukuphila kwami;
kepha mina angikwazi ukubalekela entabeni, funa ububi bungifice, ngife. 20 Bheka-ke, lowo muzi
useduze ukuba ngibalekele kuwo, futhi mncane; ake ngibalekele khona angithi mncane ukuba
umphefumulo wami uphile." 21 Wathi kuye: "Bheka, nakule nto ngiyakukuvumela;
angiyikuwuchitha lo muzi okhuluma ngawo. 22 Kepha shesha ubalekele khona, ngokuba
ngingenze lutho, ungakafiki khona." Ngalokho umuzi wabizwa ngokuthi iSowari. 23 Ilanga
laphumela emhlabeni, uLoti esangena eSowari.
24
Khona uJehova wanisa phezu kweSodoma naphezu kweGomora isibabule nomlilo, kuvela
kuJehova ezulwini. 25 Wachitha leyo mizi nethafa lonke, nabo bonke abakhe emizini, nalokho
okuhlumayo emhlabathini.
26
Kepha umkakhe wabheka emva kwakhe, waba yinsika kasawoti.
27
U-Abrahama wavuka ekuseni, waya endaweni lapho akade emi khona ebusweni bukaJehova. 28
Wabheka ngaseSodoma naseGomora nasezweni lonke lethafa, wabona, bheka, isisi sezwe
senyuka njengomusi weziko. 29 Kwathi lapho uNkulunkulu ebhubhisa imizi yasethafeni,
uNkulunkulu wakhumbula u-Abrahama, waphumisa uLoti ekuchithekeni mhla ebhubhisa imizi
ayehlezi kuyo uLoti.
30
ULoti wakhuphuka eSowari, waya wahlala entabeni kanye namadodakazi akhe omabili,
ngokuba wesaba ukuhlala eSowari; wahlala emhumeni namadodakazi akhe amabili. 31 Enkulu
yayisithi kwencane: "Ubaba usemdala; akukho ndoda ezweni engangena kithi njengokwenza
komhlaba wonke. 32 Woza simphuzise ubaba iwayini, silale naye ukuba sizizuzele inzalo
kubaba." 33 Ngalobo busuku ayesemphuzisa uyise iwayini; enkulu yangena yalala noyise, engazi
ukulala kwayo nokuvuka kwayo. 34 Kwathi ngangomuso enkulu yathi kwencane: "Bheka,
bengilele nobaba izolo; asimphuzise iwayini nangalobu busuku, ungene wena, ulale naye ukuba
sizizuzele inzalo kubaba." 35 Ayesemphuzisa uyise iwayini nangalobo busuku; encane yasuka
yalala naye, engazi ukulala kwayo nokuvuka kwayo. 36 Kanjalo amadodakazi kaLoti omabili
akhuleliswa nguyise. 37 Enkulu yazala indodana, yaqamba igama layo ngokuthi uMowabi; lowo
unguyise wabakwaMowabi kuze kube namuhla. 38 Encane yazala indodana nayo, yaqamba igama
layo ngokuthi uBenami; lowo unguyise wabantwana bakwa-Amoni kuze kube namuhla.

20
1
U-Abrahama wayesesuka lapho, waya ngasezweni laseningizimu, wakha phakathi kweKadeshi
neShuri; wagogobala eGerari. 2 U-Abrahama wathi ngoSara umkakhe: "Ungudadewethu." Khona
u-Abimeleki inkosi yaseGerari wathuma wamthatha uSara.
3
Kepha uNkulunkulu weza ku-Abimeleki ngephupho ebusuku, wathi kuye: "Bheka, uyafa
ngenxa yowesifazane omthathileyo; uganile endodeni." 4 Kepha u-Abimeleki wayengakasondeli
kuye; wathi: "Nkosi, uyakubhubhisa nesizwe esilungileyo na? 5 Akashongo kimi ukuthi:
‘Ungudadewethu,’ na? Naye uqobo wathi: ‘Ungumnewethu.’ Ngobuqotho benhliziyo yami
nangobumhlophe bezandla zami ngikwenzile lokhu." 6 Wayesethi uNkulunkulu kuye ephusheni:
"Nami ngiyazi ukuthi ukwenze lokhu ngobuqotho benhliziyo yakho; futhi ngakuvimba ukuba
ungoni kimi; ngalokho angikuvumelanga ukuba umthinte. 7 Kepha manje wena, buyisa umfazi
wendoda, ngokuba ingumprofethi; iyakukukhulekela ukuba uphile; uma ungambuyiseli, yazi
ukuthi uyakufa nokufa, wena nabo bonke abakho."
8
U-Abimeleki wavuka ekuseni, wabiza izinceku zakhe zonke, wakhuluma onke lawa mazwi
ezindlebeni zazo; amadoda esaba kakhulu. 9 U-Abimeleki wayesembiza u-Abrahama, wathi
kuye: "Wenzeni kithi na? Ngoneni kuwe ukuba ungilethele mina nombuso wami icala elingaka
na? Wenze kimi okungafanele ukwenziwa." 10 U-Abimeleki wathi ku-Abrahama: "Wabonani
ukuba wenze lokhu na?" 11 U-Abrahama wathi: "Ngokuba bengithi: Impela ukumesaba
uNkulunkulu akukho kule ndawo; bayakungibulala ngenxa yomkami. 12 Futhi impela
ungudadewethu, indodakazi kababa, kepha akasiyo indodakazi kamame, waba ngumkami. 13
Kwathi mhla uNkulunkulu engiphumisa endlini kababa, ngathi kuye: ‘Yilo umusa ozakungenzela
wona: ezindaweni zonke esiyakufika kuzo, yisho ngami ukuthi: "Ungumnewethu."‘"
14
U-Abimeleki wayesethatha izimvu, nezinkabi, nezinceku, nezincekukazi, wazipha u-
Abrahama, wambuyisela uSara umkakhe. 15 Wathi u-Abimeleki: "Bheka, izwe lami lisebusweni
bakho; yakha lapho uthanda khona." 16 Wathi kuSara: "Bheka, ngimnikile umnewenu amashekeli
ayinkulungwane esiliva; bheka, lokhu kuyisisibekelo secala phambi kwamehlo abo bonke
abanawe; kukho konke usulungisiwe." 17 U-Abrahama wakhuleka kuNkulunkulu. UNkulunkulu
wamphulukisa u-Abimeleki nomkakhe nezincekukazi zakhe, baze bazala. 18 Ngokuba uJehova
wayevalile nokuvala zonke izizalo zabendlu ka-Abimeleki ngenxa kaSara umka-Abrahama.

21
1
UJehova wamhambela uSara njengokusho kwakhe; UJehova wenza kuSara njengalokho
ekhulumile. 2 USara wakhulelwa, wamzalela u-Abrahama indodana esemdala kuleyo nkathi
uNkulunkulu abeyishilo kuye. 3 U-Abrahama waqamba igama lendodana yakhe azalelwe yona,
ayizalelwe nguSara, ngokuthi u-Isaka. 4 U-Abrahama wayisoka indodana yakhe u-Isaka
isinezinsuku eziyisishiyagalombili, njengalokho uNkulunkulu emyalile. 5 U-Abrahama
wayeneminyaka eyikhulu, lapho ezalelwa u-Isaka indodana yakhe. 6 USara wathi: "UNkulunkulu
ungenzile ukuba ngihlekeke; bonke abakuzwayo bayakungihleka." 7 Wathi futhi: "Ngubani
obengasho ku-Abrahama ukuthi uSara ubeyakuncelisa abantwana na? Ngokuba sengimzalele
indodana esemdala." 8 Umntwana wakhula, walunyulwa; u-Abrahama wenza idili elikhulu mhla
u-Isaka elunyulwa.
9
USara wabona indodana kaHagari owaseGibithe ayizalele u-Abrahama idlalisa. 10 Wathi ku-
Abrahama: "Sixoshe lesi sigqilakazi nendodana yaso, ngokuba indodana yalesi sigqilakazi
ayiyikudla ifa kanye nendodana yami u-Isaka." 11 Leli zwi lalilibi kakhulu emehlweni ka-
Abrahama ngenxa yendodana yakhe. 12 UNkulunkulu wathi ku-Abrahama: "Akungabi lukhuni
emehlweni akho ngenxa yomfana nangenxa yesigqilakazi sakho; kukho konke uSara akusho
kuwe, lalela izwi lakhe, ngokuba inzalo yakho iyakubizwa ngo-Isaka. 13 Nayo indodana
yesigqilakazi ngiyakuyenza isizwe, ngokuba iyinzalo yakho."
14
U-Abrahama wavuka ekuseni, wathatha isinkwa nemvaba yamanzi, wakunika uHagari ekubeka
ehlombe lakhe kanye nomntwana, wammukisa; wahamba, wazulazula ehlane laseBeri Sheba. 15
Amanzi esephelile emvabeni, waphonsa umntwana phansi kwesihlahla. 16 Waya wahlala phansi
kukhashana phambi kwakhe, kungathi ibanga lokuphonsa umcibisholo, ngokuba wathi:
"Ngingebone ukufa komntwana." Wahlala phambi kwakhe, waphakamisa izwi lakhe, wakhala. 17
UNkulunkulu wezwa izwi lomfana. Ingelosi kaNkulunkulu yamemeza kuHagari isezulwini, yathi
kuye: "Kuyini, Hagari? Ungesabi, ngokuba uNkulunkulu ulizwile izwi lomntwana, lapho ekhona.
18
Vuka uphakamise umfana, umbambe ngesandla sakho, ngokuba ngiyakumenza isizwe
esikhulu." 19 UNkulunkulu wavula amehlo akhe, wabona umthombo wamanzi, waya, wagcwalisa
imvaba ngamanzi, wamphuzisa umfana. 20 UNkulunkulu wayenaye umfana; wakhula, wahlala
ehlane, waba ngophethe umnsalo. 21 Wahlala ehlane lasePharanu; unina wamthathela umfazi
ezweni laseGibithe.
22
Kwathi ngaleso sikhathi u-Abimeleki noPikoli, induna yempi yakhe, bakhuluma ku-Abrahama,
bathi: "UNkulunkulu unawe kukho konke okwenzayo. 23 Ngalokho ngithembise lapha
ngokufunga uNkulunkulu ukuthi awuyikungikhohlisa mina nendodana yami nomzukulwana
wami; kepha ngokomusa engiwenzile kuwe, mawuwenze nakimi nakulo izwe osugogobele kulo."
24
U-Abrahama wathi: "Ngizakufunga." 25 Kepha u-Abrahama wamsola u-Abimeleki
ngomthombo wamanzi ebeziwuqhwagile izinceku zika-Abimeleki. 26 Kepha u-Abimeleki wathi:
"Angazi ukuthi kwenziwe ngubani lokhu; nawe awungitshelanga, nami angikuzwanga kuze kube
namuhla." 27 U-Abrahama wayesethatha izimvu nezinkabi, wazipha u-Abimeleki; labo bobabili
benza isivumelwano. 28 U-Abrahama wabeka izimvukazana eziyisikhombisa zomhlambi
ngokwazo. 29 U-Abimeleki wathi ku-Abrahama: "Lezi zimvukazana eziyisikhombisa ozibeke
zodwa ziyini na?" 30 Wathi: "Lezi zimvukazana eziyisikhombisa uyakuzithatha esandleni sami,
zibe ngubufakazi bokuthi ngiwumbile lomthombo." 31 Ngalokho waqamba leyo ndawo ngokuthi
iBeri Sheba, ngokuba bafunga khona bobabili. 32 Base benza isivumelwano eBeri Sheba; u-
Abimeleki wasukuma noPikoli induna yempi yakhe, babuyela ezweni lamaFilisti.
33
U-Abrahama watshala umtamariske ngaseBeri Sheba, wakhuleka khona egameni likaJehova
uNkulunkulu Ongunaphakade. 34 U-Abrahama wagogobala ezweni lamaFilisti izinsuku eziningi.

22
1
Kwathi emva kwalezo zinto uNkulunkulu wamvinvinya u-Abrahama, wathi kuye: "Abrahama!"
Yena wathi: "Ngilapha." 2 Wayesethi: "Thatha manje indodana yakho eyodwa oyithandayo, u-
Isaka, uye ezweni laseMoriya, unikele khona ngaye abe ngumnikelo wokushiswa entabeni ethile
engazakukutshela yona."
3
U-Abrahama wavuka ekuseni, wabophela imbongolo yakhe, wathatha ezimbili ezincekwini
zakhe, no-Isaka indodana yakhe; wacanda izinkuni zomnikelo obuzakushiswa, wasuka waya
endaweni uNkulunkulu abemtshele yona. 4 Ngosuku lwesithathu u-Abrahama waphakamisa
amehlo akhe, wayibona indawo isekude. 5 U-Abrahama wathi ezincekwini zakhe: "Hlalani lapha
nembongolo; mina nomfana sisaya laphaya, sikhuleke, sibuye size kini." 6 U-Abrahama wathatha
izinkuni zomnikelo obuzakushiswa, wazibeka phezu kuka-Isaka indodana yakhe, waphatha
esandleni sakhe umlilo nomese; bahamba bobabili kanyekanye. 7 U-Isaka wathi ku-Abrahama
uyise: "Baba." Wathi yena: "Ngilapha, ndodana yami." Wayesethi: "Bheka, nanku umlilo
nezinkuni, kepha iphi imvu yomnikelo ezakushiswa na?" 8 U-Abrahama wathi: "UNkulunkulu
uzakuzibonela imvu yomnikelo ezakushiswa, ndodana yami;" bahamba bobabili kanyekanye. 9
Bafika endaweni uNkulunkulu abemtshele yona; u-Abrahama wakha khona i-altare, walungisa
izinkuni, wambopha u-Isaka indodana yakhe, wambeka e-altare phezu kwezinkuni. 10 U-
Abrahama waselula isandla sakhe, wathatha umese ukuba ahlabe indodana yakhe.
11
Kwase kumemeza kuye ingelosi kaJehova isezulwini, ithi: "Abrahama, Abrahama!" Yena
wathi: "Ngilapha." 12 Yayisithi: "Ungabeki isandla sakho kumfana, ungenzi lutho kuye, ngokuba
ngiyazi manje ukuthi uyamesaba uNkulunkulu, lokhu ungagodlanga kimi nandodana eyodwa
yakho." 13 U-Abrahama waphakamisa amehlo akhe, wabona; bheka, ngemuva yinqama, ibhajiwe
esihlahleni ngezimpondo zayo; u-Abrahama waya wayithatha inqama, wanikela ngayo umnikelo
wokushiswa esikhundleni sendodana yakhe. 14 U-Abrahama waqamba igama laleyo ndawo
ngokuthi uJehova uyabonelela, njengalokhu kuthiwa nanamuhla: Entabeni kaJehova
kuyakubonelelwa.
15
Ingelosi kaJehova yayisimemeza ku-Abrahama ngokwesibili isezulwini, 16 ithi: "Ngizifungile,
usho uJehova, ukuthi njengokuba ukwenzile lokhu, ungagodlanga indodana yakho eyodwa, 17
ngiyakukubusisa nokukubusisa, ngandise nokwandisa inzalo yakho, ibe ngangezinkanyezi zezulu
nangangesihlabathi sasogwini lolwandle, inzalo yakho inqobe isango lezitha zayo, 18 nangenzalo
yakho ziyakubusiswa izizwe zonke zomhlaba, ngokuba ulalele izwi lami." 19 U-Abrahama
wayesebuyela ezincekwini zakhe; basuka, baya eBeri Sheba; u-Abrahama wakha eBeri Sheba.
20
Kwathi emva kwalokho kwabikwa ku-Abrahama ukuthi: "Bheka, naye uMilka umzalele
uNahori umfowenu abantwana: 21 Ngu-Use izibulo lakhe, noBusi umfowabo, noKemuweli uyise
ka-Aramu, 22 noKesede, noHazo, noPilidashe, noJidilafe, noBetuweli;" 23 uBetuweli wazala
uRebeka; laba abayisishiyagalombili uMilka wabazalela uNahori umfowabo ka-Abrahama. 24
Nesancinza sakhe esigama laso lalinguRewuma sazala oTheba, noGahamu, noTahashi,
noMahakha.

23
1
Ukuhamba kukaSara kwaba yiminyaka eyikhulu namashumi amabili nesikhombisa; yileyo
iminyaka yokuhamba kukaSara. 2 USara wafela eKiriyati Araba okuyiHebroni ezweni
laseKhanani; u-Abrahama wafika ukumlilela uSara nokumkhalela.
3
U-Abrahama wasuka kofileyo wakhe, wakhuluma nabantwana bakwaHeti, wathi: 4
"Ngingumfokazi nozulane phakathi kwenu; ngipheni indawo yethuna phakathi kwenu ukuba
ngimmbele ofileyo wami, angabikho ebusweni bami." 5 Abantwana bakwaHeti baphendula u-
Abrahama, bathi kuye: 6 "Sizwe, nkosi; wena uyisikhulu sikaNkulunkulu phakathi kwethu;
mmbele ofileyo wakho kwelihle kuwo onke amathuna ethu; akakho phakathi kwethu
ozakugodlela wena ithuna lakhe ukuba ummbele ofileyo wakho." 7 U-Abrahama wayesesukuma,
wakhothamela abantu balelo zwe, abantwana bakwaHeti, 8 wakhuluma nabo, wathi: "Uma
kuyintando yenu ukuba ngimmbele ofileyo wami, angabikho ebusweni bami, ngizweni,
ninginxusele ku-Efroni indodana kaSowari 9 ukuba angiphe umhume waseMakaphela anawo
emkhawulweni wensimu yakhe, awunike kimi ngemali efanele wona, ube yindawo yokumbela
phakathi kwenu." 10 U-Efroni wayehlezi phakathi kwabantwana bakwaHeti: u-Efroni umHeti
wamphendula u-Abrahama ezindlebeni zabantwana bakwaHeti phambi kwabo bonke abangena
esangweni lomuzi wakhe, wathi: 11 "Cha, nkosi; ngilalele: ngiyakunika le nsimu, nomhume
okuyo ngikunika wona; ebusweni bamadodana abantu bami ngikunika wona; mmbele lapho
ofileyo wakho." 12 U-Abrahama wakhothamela ebusweni babantu balelo zwe. 13 Wakhuluma ku-
Efroni ezindlebeni zabantu balelo zwe, wathi: "Ake ungilalele: ngizakukunika imali yensimu;
yamukele kimi, ngimmbele khona ofileyo wami." 14 U-Efroni wamphendula u-Abrahama, wathi
kuye: 15 "Nkosi yami, ngilalele: izwe elilingene namashekeli angamakhulu amane esiliva liyini
phakathi kwami nawe na? Mmbele ofileyo wakho."
16
U-Abrahama wamuzwa u-Efroni; u-Abrahama wamlinganisela u-Efroni isiliva abelishilo
ezindlebeni zabantwana bakwaHeti, amashekeli angamakhulu amane esiliva, avunywa
ngabathengisi. 17 Kanjalo insimu ka-Efroni yaseMakaphela elingaphambi kweMamre, insimu
nomhume okuyo, nemithi yonke esensimini nxazonke kuze kube semikhawulweni yonke 18
kwaba yinzuzo ka-Abrahama emehlweni abantwana bakwaHeti phambi kwabo bonke abangena
esangweni lomuzi wakhe. 19 Emva kwalokho u-Abrahama wammbela uSara umkakhe emhumeni
wasensimini yaseMakaphela phambi kweMamre okuyiHebroni ezweni laseKhanani. 20 Insimu
nomhume okuyo kwase kunqunyelwa u-Abrahama ngabantwana bakwaHeti, kube yindawo
yethuna.

24
1
U-Abrahama wayesemdala, eseneminyaka eminingi; uJehova wayembusisile u-Abrahama
kukho konke. 2 Wayesethi u-Abrahama encekwini enkulu yendlu yakhe eyayibusa konke anakho:
"Beka isandla sakho phansi kwethanga lami. 3 Ngizakukufungisa uJehova, uNkulunkulu wezulu
noNkulunkulu womhlaba, ukuthi awuyikuthathela indodana yami umfazi emadodakazini
amaKhanani engihlezi phakathi kwawo, 4 kepha uye ezweni lakithi nasezihlotsheni zami,
uyithathele khona indodana yami u-Isaka umfazi." 5 Inceku yathi kuyo: "Mhlawumbe
owesifazane akayikuvuma ukungilandela, eze kuleli zwe; imbala ngiyakuyibuyisela indodana
yakho ezweni, lapho wavela khona na?" 6 U-Abrahama wathi kuye: "Qaphela ukuba
ungayibuyiseli khona indodana yami. 7 UJehova uNkulunkulu wezulu owangikhipha endlini
kababa nasezweni lokuzalwa kwami wakhuluma kimi, wafunga kimi, wathi: ‘Ngiyakulinika
inzalo yakho leli zwe;’ uzakuthuma ingelosi yakhe phambi kwakho, ukuze ungitholele khona
indodana yami umfazi. 8 Kepha uma owesifazane engathandi ukukulandela, uyobe ukhululekile
kulesi sifungo sami; kodwa ungabuyiseli khona indodana yami." 9 Inceku yayisibeka isandla sayo
phansi kwethanga lika-Abrahama inkosi yayo, yafunga kuye ngale ndaba.
10
Inceku yayisithatha amakamela ayishumi emakameleni enkosi yayo, yahamba, izinto zonke
ezinhle zenkosi yayo zisesandleni sayo; yasuka, yaya eMesopotamiya emzini kaNahori. 11
Yaguqisa amakamela ayo ngaphandle komuzi ngasemthonjeni wamanzi kusihlwa, ngesikhathi
abaphuma ngaso abesifazane ukuyokukha amanzi. 12 Yathi: "Jehova, Nkulunkulu wenkosi yami
u-Abrahama, ngiphumelelise kahle namuhla, uyenzele inkosi yami u-Abrahama umusa. 13 Bheka,
sengimi ngasemthonjeni wamanzi, amadodakazi abantu bomuzi eza ukukha amanzi. 14 Makuthi
intombazana engizakusho kuyo ukuthi: ‘Mawubeke phansi imbiza yakho, ngiphuze,’ ithi: ‘Phuza,
ngizakuphuzisa namakamela akho,’ ibe yileyo-ke oyimisele inceku yakho u-Isaka; ngalokho
ngizakwazi ukuthi wenzele inkosi yami umusa." 15 Kwathi ingakaqedi ukukhuluma, bheka,
kweza uRebeka owazalelwa uBetuweli indodana kaMilka, umkaNahori, umfowabo ka-
Abrahama, enembiza yakhe ehlombe. 16 Intombazana yayibukeka kahle, iyintombi, engaziwa
yindoda; yehlela ngasemthonjeni, yagcwalisa imbiza yayo, ibisenyuka. 17 Inceku yayisigijima
ukuyihlangabeza, yathi: "Ake ungiphuzise ingcosana yamanzi embizeni yakho." 18 Yathi: "Phuza,
nkosi;" yashesha yehlisa imbiza yayo esandleni sayo, yayiphuzisa. 19 Kwathi isiqedile
ukuyiphuzisa, yathi: "Ngiyakukhelela namakamela akho, aze aphuze onke." 20 Yashesha
yathululela imbiza yayo emqengqeni, yabuye yaphuthuma emthonjeni ukuyokukha, yakhelela
onke amakamela ayo. 21 Indoda yayibhekisisa ithule ukuba yazi, uma uJehova ebephumelelisile
indlela yayo noma qha. 22 Kwathi amakamela eseqedile ukuphuza, indoda yathatha icici legolide,
isisindo salo siyinxenye yeshekeli, namasongo amabili ezandla zayo, isisindo sawo
singamashekeli ayishumi egolide, yathi: 23 "Wena uyindodakazi kabani na? Ake ungitshele.
Kukhona indawo endlini kayihlo ukuba silale na?" 24 Yathi kuyo: "Indodakazi kaBetuweli
indodana kaMilka, amzalela yona uNahori." 25 Yaqhubeka yathi kuyo: "Sinotshani nefoliji
eliningi, nendawo yokulala." 26 Indoda yayisikhothama, yakhuleka kuJehova, 27 yathi:
"Makabongwe uJehova, uNkulunkulu wenkosi yami u-Abrahama, ongayekile ukwenzela inkosi
yami umusa neqiniso; uJehova ungiholile mina endleleni kuze kube sendlini yabafowabo benkosi
yami." 28 Kepha intombazana yagijima, yatshela abendlu kanina lezo zinto.
29
URebeka wayenomnewabo ogama lakhe linguLabani; uLabani wagijimela endle kulowo
muntu ngasemthonjeni. 30 Kwathi esebone icici namasongo ezandleni zikadadewabo, wezwa
amazwi kaRebeka udadewabo, ethi: "Washo njalo lo muntu kimi," waya kulowo muntu; bheka,
wayemi ngakuwo amakamela ngasemthonjeni. 31 Wathi: "Ngena wena obusisekileyo kaJehova;
umelani ngaphandle na? Mina sengilungisile indlu nendawo yamakamela." 32 Wayesengena
endlini lowo muntu, wakhumula amakamela, wapha amakamela utshani nefoliji, waletha namanzi
okugeza izinyawo zakhe nezinyawo zamadoda anaye. 33 Kwabekwa phambi kwakhe ukudla
ukuba adle, kepha wathi: "Angiyikudla ngingakakhulumi indaba yami." Wathi: "Khuluma." 34
Wayesethi: "Ngiyinceku ka-Abrahama. 35 UJehova ubusisile kakhulu inkosi yami, yaze yaba
nkulu; uyinike izimvu, nezinkomo, nesiliva, negolide, nezinceku, nezincekukazi, namakamela,
nezimbongolo. 36 USara umkankosi yami wayizalela inkosi yami indodana esemdala; kuyona
inikele konke enakho. 37 Inkosi yami yangifungisa yathi: ‘Ungathatheli indodana yami umfazi
emadodakazini amaKhanani engihlezi ezweni lawo, 38 kepha uye endlini kababa nasezihlotsheni
zami, uyithathele khona indodana yami umfazi.’ 39 "Ngase ngithi enkosini yami: ‘Mhlawumbe
owesifazane akayikungilandela.’ 40 "Wathi kimi: ‘UJehova, engihambe ebusweni bakhe,
uzakuthuma ingelosi yakhe nawe, aphumelelise indlela yakho; uyakuyithathela indodana yami
umfazi ezihlotsheni zami nasendlini kababa. 41 Lapho uyobe ukhululekile esifungweni sami, nxa
ufika ezihlotsheni zami; noma bengamniki kuwe, uyobe usukhululekile esifungweni sami.’ 42
"Ngase ngifika emthonjeni namuhla, ngithi: ‘Jehova Nkulunkulu wenkosi yami u-Abrahama, uma
uphumelelisa indlela yami engiyihambayo, 43 bheka, sengimi ngasemthonjeni wamanzi;
kuyakuthi intombazana eza ukuyokukha, engisho kuyo ukuthi: "Ake ungiphuzise ingocosana
yamanzi embizeni yakho," 44 ithi kimi: "Phuza wena, futhi ngizakuwakhelela namakamela akho,"
kube yiyo engumfazi uJehova ammiseleyo indodana yenkosi yami.’ 45 "Ngingakaqedi
ukukhuluma enhliziyweni yami, bheka, kweza uRebeka enembiza yakhe ehlombe; wehlela
emthonjeni, wakha; ngathi kuye: ‘Ake ungiphuzise.’ 46 "Washesha wehlisa imbiza yakhe
ehlombe, wathi: ‘Phuza; ngizakuwaphuzisa namakamela akho;’ ngaphuza-ke; namakamela
wawaphuzisa. 47 "Ngambuza ngathi: ‘Wena uyindodakazi kabani na?’ "Wathi: ‘Indodakazi
kaBetuweli indodana kaNahori, amzalela yona uMilka;’ ngase ngifaka icici emakhaleni akhe
namasongo ezandleni zakhe. 48 Ngakhothama, ngakhuleka kuJehova, ngabonga uJehova,
uNkulunkulu wenkosi yami u-Abrahama, obengihole endleleni elungileyo ukuba ngithathele
indodana yayo indodakazi yomfowabo wenkosi yami. 49 Manje-ke uma nithanda ukuyenzela
inkosi yami umusa neqiniso, ngitsheleni; uma kungenjalo, ngitsheleni, ukuze ngiphendukele
ngakwesokunene noma ngakwesokhohlo." 50 Base bephendula oLabani noBetuweli, bethi: "Le
ndaba ivela kuJehova; asinakusho lutho kuwe, noma okubi noma okuhle. 51 Bheka, uRebeka
usebusweni bakho; mthathe, uhambe, abe ngumkandodana yenkosi yakho, njengalokho
wakhuluma uJehova." 52 Yathi ukuzwa amazwi abo, inceku ka-Abrahama yakhothama
emhlabathini phambi kukaJehova. 53 Inceku yakhipha izinto zesiliva nezinto zegolide kanye
nezingubo, yazipha uRebeka; yabanika nomnewabo nonina amagugu.
54
Base bedla bephuza, yona nabantu eyayinabo, balala; sebevuke ekuseni, yathi: "Ngithumeni
enkosini yami." 55 Umnewabo nonina bathi: "Ake ihlale kithina intombazana izinsukwana,
mhlawumbe eziyishumi, andukuba ihambe." 56 Yathi kubo: "Ningangilibazisi, njengokuba
uJehova eyiphumelelisile indlela yami; ngimukiseni ukuba ngiye enkosini yami." 57 Base bethi:
"Sizakuyibiza intombazana, sizwe emlonyeni wayo." 58 Bambiza uRebeka, bathi kuye:
"Uzakuhamba nale ndoda na?" Wathi: "Ngizakuhamba." 59 Base bemukisa udadewabo uRebeka,
nomzanyana wakhe, nenceku ka-Abrahama, namadoda ayo. 60 Bambusisa uRebeka, bathi kuye:
"Dadewethu, yiba wena izinkulungwane zezigidi, inzalo yakho inqobe amasango ezitha zayo." 61
URebeka wasuka namantombazana akhe; bagibela amakamela, balandela indoda; inceku
yamthatha uRebeka, yamuka.
62
Kepha u-Isaka wabuya ngaseBeri Lahayi Royi, ngokuba wayehlala ezweni laseningizimu. 63
U-Isaka waphuma ntambama ukuyozindla endle; waphakamisa amehlo akhe, wabona; bheka,
kweza amakamela. 64 NoRebeka waphakamisa amehlo akhe; esembonile u-Isaka wehla
ekameleni. 65 Wathi encekwini: "Ngubani le ndoda ehamba endle ukuzosihlangabeza na?" Yathi
inceku: "Yinkosi yami;" wayesethatha imvakazi yakhe, wagubuzela. 66 Inceku yayisimtshela u-
Isaka konke ebikwenzile. 67 U-Isaka wamngenisa etendeni likanina uSara, wamthatha uRebeka,
wabangumkakhe; wamthanda; u-Isaka wayeseduduzeka emva kokufa kukanina.

25
1
U-Abrahama waphinda wathatha umfazi ogama lakhe linguKetura. 2 Wamzalela oZimrani,
noJokishani, noMedani, noMidiyani, no-Ishibaki, noShuwa. 3 UJokishani wazala oSheba
noDedani. Amadodana kaDedani ayengama-Ashuri, namaLetushi, namaLewumi. 4 Amadodana
kaMidiyani ayengo-Efa, no-Eferi, noHanoki, no-Abida, no-Elidaha. Bonke labo
babengamadodana kaKetura. 5 U-Abrahama wamnika u-Isaka konke anakho. 6 Kepha
amadodana ezancinza zika-Abrahama u-Abrahama wawanika izipho nje, wawamukisa ku-Isaka
indodana yakhe esekhona, aye ngasempumalanga ezweni lasempumalanga. 7 Lezi ziyizinsuku
zeminyaka yokuhamba kuka-Abrahama azihambayo: iminyaka eyikhulu namashumi
ayisikhombisa nanhlanu. 8 U-Abrahama wagqibuka wafa, esemdala egugile, esanelisiwe
yizinsuku, wabuthelwa kubantu bakhe. 9 O-Isaka no-Ishmayeli amadodana akhe bammbela
emhumeni waseMakaphela, ensimini ka-Efroni indodana kaSowari umHeti engaphambi
kweMamre, 10 insimu ayithenga u-Abrahama kubo abantwana bakwaHeti; khona wembelwa u-
Abrahama noSara umkakhe.
11
Kwathi emva kokufa kuka-Abrahama uNkulunkulu wambusisa u-Isaka indodana yakhe; u-
Isaka wahlala eBeri Lahayi Royi. 12 Lezi ziyizizukulwane zika-Ishmayeli indodana ka-
Abrahama, uHagari waseGibithe incekukazi kaSara amzalela zona u-Abrahama. 13 Lawa
angamagama amadodana ka-Ishmayeli ngamagama awo nangokuzalwa kwawo: izibulo lika-
Ishmayeli nguNebayoti, kanye noKedari, no-Adibeli, noMibisamu, 14 noMishima, noDuma,
noMasa, 15 noHadadi, noThema, noJeturu, noNafishi, noKhedema; 16 yilawo angamadodana ka-
Ishmayeli, yilawo angamagama awo ngemizi yawo nangezikaniso zawo, izikhulu eziyishumi
nambili ngezizwe zawo. 17 Le iyiminyaka yokuhamba kuka-Ishmayeli: iminyaka eyikhulu
namashumi amathathu nesikhombisa; wagqibuka wafa, wabuthelwa kubantu bakhe. 18 Bahlala-ke
kwasukela eHavila kwaze kwaba seShuri elingaphambi kwaseGibithe ekuhambeni ukuya e-
Asiriya; wakha ngasempumalanga kwabafowabo.
19
Lezi ziyizizukulwane zika-Isaka indodana ka-Abrahama: u-Abrahama wazala u-Isaka; 20 u-
Isaka wayeneminyaka engamashumi amane mhla emthatha uRebeka indodakazi kaBetuweli,
umAramu wasePhadani Aramu, udadewabo kaLabani umAramu, abe ngumkakhe. 21 U-Isaka
wamkhulekela umkakhe kuJehova, ngokuba wayeyinyumba; uJehova wamzwela; uRebeka
umkakhe wakhulelwa. 22 Abantwana baqhubukushana phakathi kwakhe; wathi: "Uma kunje,
ngisekhona ngani na?" Waya wabuza kuJehova. 23 UJehova wathi kuye: "Esiswini sakho kukhona
izizwe ezimbili; izinhlobo ezimbili zabantu ziyakwahlukana ezibilinini zakho; esinye isizwe
siyakwahlula esinye, omkhulu akhonze omncane." 24 Kwathi seziphelele izinsuku zakhe
zokubeletha, bheka, kwakukhona amawele esiswini sakhe. 25 Waphuma owokuqala, ebomvana
wonke umzimba, enjengengubo yoboya; baqamba igama lakhe ngokuthi u-Esawu. 26 Emva
kwalokho kwaphuma umfowabo, isandla sakhe sibambelele esithendeni sika-Esawu; igama lakhe
labizwa ngokuthi uJakobe; u-Isaka wayeneminyaka engamashumi ayisithupha ekuzalweni
kwabo. 27 Abafana bakhula; u-Esawu waba yiphisi, umuntu wasendle; uJakobe waba yibeka,
ehlala ematendeni. 28 U-Isaka wamthanda u-Esawu, ngokuba wayedla inyama yenyamazane
yakhe; uRebeka wamthanda uJakobe.
29
Kwathi uJakobe wapheka ukudla, kwafika u-Esawu evela endle, ediniwe. 30 U-Esawu wathi
kuJakobe: "Ake ungiphe ukuba ngidle kokubomvu, kulokho okubomvu, ngokuba sengidiniwe;"
ngalokho igama lakhe lathiwa u-Edomi. 31 Wayesethi uJakobe: "Thengisa kimi namuhla ngefa
lobuzibulo bakho." 32 Wathi u-Esawu: "Bheka, sengizakufa; linosizo luni kimi ifa lobuzibulo
bami na?" 33 UJakobe wathi: "Funga kimi namuhla." Wayesefunga kuye, wathengisa ngefa
lobuzibulo bakhe kuJakobe. 34 UJakobe wamupha u-Esawu isinkwa nokudla kwembumba;
wadla, waphuza, wavuka, wahamba; wadelela kanjalo u-Esawu ubuzibulo bakhe.

26
1
Kwaba khona indlala ezweni ngaphandle kwendlala yokuqala eyayikhona emihleni ka-
Abrahama; u-Isaka waya eGerari ku-Abimeleki inkosi yamaFilisti. 2 UJehova wabonakala kuye,
wathi: "Ungehleli eGibithe; hlala ezweni engizakukutshela lona, 3 ugogobale kuleli zwe;
ngizakuba nawe, ngikubusise, ngokuba ngiyakunika wena nenzalo yakho onke lawa mazwe,
ngigcwalise isifungo engasifunga ku-Abrahama uyihlo. 4 Ngiyakwandisa inzalo yakho, ibe
ngangezinkanyezi zezulu, ngiyiphe inzalo yakho onke lawa mazwe; ngenzalo yakho
ziyakubusiswa izizwe zonke zomhlaba, 5 ngokuba u-Abrahama walalela izwi lami, wagcina
ukusho kwami, nemiyalo yami, nezimiso zami, nemithetho yami."
6
U-Isaka wahlala-ke eGarari. 7 Amadoda aleyo ndawo ambuza ngomkakhe; wathi:
"Ungudadewethu," ngokuba wesaba ukusho ukuthi: "Ungumkami," ethi: "Funa amadoda aleyo
ndawo angibulale ngenxa kaRebeka, lokhu ebukeka kahle." 8 Kwathi esehlale khona isikhathi
eside, u-Abimeleki inkosi yamaFilisti walunguza efasiteleni, wabona; bheka, u-Isaka wayetekula
noRebeka umkakhe. 9 U-Abimeleki wambiza u-Isaka, wathi: "Bheka, impela yena ungumkakho;
usholoni ukuthi: ‘Ungudadewethu,’ na?" U-Isaka wathi: "Ngokuba ngathi: Funa ngife ngenxa
yakhe." 10 U-Abimeleki wayesethi: "Kuyini okwenzile kithina na? Bekulula ukuba kufike
omunye wabantu, alale nomkakho; ubususibangele icala." 11 U-Abimeleki wayala bonke abantu,
wathi: "Othinta lo muntu nomkakhe uzakubulawa nokubulawa."
12
U-Isaka watshala kulelo zwe, wathola ngawona lowo mnyaka okuphindwe kayikhulu, ngokuba
uJehova wambusisa. 13 Lowo muntu waba mkhulu; kwayilokhu eqhubeka ukukhula njalo, waze
waba mkhulu kakhulu. 14 Wayenemfuyo yezimvu, nemfuyo yezinkomo, nezinceku eziningi;
amaFilisti ayenomhawu ngaye. 15 Yonke imithombo ezaziyimbile izinceku zikayise ezinsukwini
zika-Abrahama uyise, amaFilisti ayeyivalile, ayigcwalisa ngomhlabathi. 16 U-Abimeleki wathi
ku-Isaka: "Suka kithina, ngokuba unamandla kakhulu kunathi." 17 U-Isaka wayesesuka khona,
wakha esigodini saseGerari, wahlala lapho. 18 U-Isaka wabuye wemba imithombo yamanzi
ababeyimbile ezinsukwini zika-Abrahama uyise, ngokuba amaFilisti ayeyivalile emva kokufa
kuka-Abrahama; wayibiza ngamagama ayiqamba ngawo uyise. 19 Izinceku zika-Isaka zemba
esigodini, zafumana umthombo wamanzi aphethuzayo. 20 Abelusi baseGerari baphikisana
nabelusi baka-Isaka, bathi: "Amanzi angawethu." Wabiza igama lomthombo ngokuthi i-Eseke,
ngokuba baphikisana naye. 21 Bemba omunye umthombo, baphikisana nangawo. Waqamba
igama lawo ngokuthi iSitina. 22 Wasuka lapho, wemba omunye umthombo; abaphikisananga
ngawo; wabiza igama lawo ngokuthi iRehoboti, wathi: "Ngokuba uJehova usenzele indawo;
siyakwanda ezweni." 23 Wasuka lapho, wakhuphuka waya eBeri Sheba. 24 UJehova wabonakala
kuye ngabona lobo busuku, wathi: "NginguNkulunkulu kayihlo u-Abrahama; ungesabi, ngokuba
nginawe; ngizakukubusisa, ngiyandise inzalo yakho ngenxa yenceku yami u-Abrahama." 25
Wakha khona i-altare, wakhuleka egameni likaJehova, wamisa lapho itende lakhe; izinceku zika-
Isaka zemba umthombo khona.
26
U-Abimeleki wayeseya kuye evela eGerari, eno-Ahuzati umngane wakhe noPikoli induna
yempi yakhe. 27 U-Isaka wathi kubo: "Nizeleni kimi, lokhu niyangizonda, ningixoshile kini, na?"
28
Bathi: "Sesibone nokubona ukuthi uJehova unawe. Sathi: ‘Akube khona manje phakathi
kwethu isifungo,’ phakathi kwethu nawe, senze isivumelwano nawe 29 sokuthi awuyikusenzela
okubi, njengokuba singakuthintanga, sikwenzele okuhle kodwa, sakumukisa ngokuthula; wena
usubusiswe nguJehova." 30 Wabenzela idili, badla, baphuza. 31 Bavuka ekuseni, bafungisana
omunye nomunye; u-Isaka wayesebamukisa, basuka kuye ngokuthula. 32 Kwathi ngalolo suku
zafika izinceku zika-Isaka, zamtshela ngomthombo ezaziwumbile, zathi kuye: "Sitholile amanzi."
33
Wayesewubiza ngokuthi iSheba; ngalokho igama lomuzi lithi iBeri Sheba kuze kube namuhla.
34
Kwathi u-Esawu eseneminyaka engamashumi amane, wathatha umfazi uJuditi indodakazi
kaBeri umHeti noBasemati indodakazi ka-Eloni umHeti. 35 Baba lusizi enhliziyweni ka-Isaka
noRebeka.

27
1
Kwathi u-Isaka esemdala namehlo akhe efiphele engasaboni, wabiza u-Esawu indodana yakhe
enkulu, wathi kuye: "Ndodana yami!" Wathi kuye: "Ngilapha." 2 Wayesethi: "Bheka, sengimdala,
angilwazi usuku lokufa kwami. 3 Ngalokho awuthathe manje izikhali zakho, umgodla wakho
nomnsalo wakho, uye endle, ungizingelele inyamazane, 4 ungilungisele isilovela engisithandayo,
usilethe kimi ukuba ngidle, umphefumulo wami ukubusise ngingakafi." 5 URebeka wezwa u-
Isaka ekhuluma no-Esawu indodana yakhe. U-Esawu waya endle ukuyozingela inyamazane,
abuye nayo.
6
URebeka wakhuluma kuJakobe indodana yakhe, wathi: "Bheka, ngizwe uyihlo ekhuluma no-
Esawu umnewenu, ethi: 7 ‘Ngilethele inyamazane, ungilungisele isilovela, ukuze ngidle,
ngikubusise ebusweni bukaJehova ngingakafi.’ 8 Ngalokho, ndodana yami, lalela izwi lami
kulokhu engikuyala ngakho. 9 Yana emhlambini, ungithathele khona amazinyane amabili amahle
ezimbuzi, ngilungisele uyihlo isilovela njengalokho akuthandayo, 10 wena usiyise kuyihlo, aze
adle, akubusise engakafi." 11 UJakobe wathi kuRebeka unina: "Bheka, umnewethu ungumuntu
oyinundu, mina ngiluqwatha. 12 Mhlawumbe ubaba uyakungiphatha, ngibe ngokhohlisayo
emehlweni akhe, ngizilethele isiqalekiso, kungabi yisibusiso." 13 Unina wayesethi kuye:
"Isiqalekiso sakho, ndodana yami, masibe phezu kwami; lalela izwi lami, uhambe ukungithathela
wona." 14 Wayesehamba-ke, wawathatha, wawayisa kunina; unina walungisa isilovela
njengalokho akuthandayo uyise. 15 URebeka wayesethatha izingubo ezinhle zika-Esawu
indodana yakhe enkulu ezazikuye endlini, wamembathisa zona uJakobe indodana yakhe encane.
16
Wamnqwambisa izikhumba zamazinyane ezimbuzi ezandleni zakhe nasocwatheni lwentamo. 17
Wanikela esandleni sikaJakobe indodana yakhe isilovela nesinkwa akulungisileyo.
18
Yena waya kuyise, wathi: "Baba!" Wathi yena: "Ngilapha; ungubani wena ndodana yami na?"
19
UJakobe wathi kuyise: "Ngingu-Esawu izibulo lakho; ngenze njengalokho ungitshelile;
mawuvuke, uhlale, udle ukuba umphefumulo wakho ungibusise." 20 U-Isaka wathi kuyo
indodana yakhe: "Kwenzeke kanjani ukuba usheshe kangaka ukuyithola, ndodana yami, na?"
Wathi: "Ngokuba uJehova uNkulunkulu wakho uyenze ukuba ize phambi kwami." 21 U-Isaka
wayesethi kuJakobe: "Ake usondele, ngikuphathe, ndodana yami, uma uyindodana yami u-Esawu
uqobo noma ungesiyo na?" 22 UJakobe wasondela ku-Isaka uyise; wamphatha, wathi: "Izwi
liyizwi likaJakobe, kepha izandla ziyizandla zika-Esawu." 23 Akamazanga, ngokuba izandla
zakhe zazinoboya njengezandla zomnewabo u-Esawu; wayeseyakumbusisa. 24 Kepha wayesethi:
"Uyindodana yami u-Esawu uqobo na?" Wathi: "Nginguye." 25 Wayesethi: "Sondeza kimi, ngidle
inyamazane yendodana yami ukuba umphefumulo wami ukubusise." Wayeseyisondeza kuye,
wadla; wayisa kuye iwayini, waphuza. 26 Uyise u-Isaka wathi kuye: "Ake usondele ungange,
ndodana yami." 27 Wasondela wamanga, wahogela iphunga lezingubo zakhe, wambusisa wathi:
"Bheka, iphunga lendodana yami linjengephunga lensimu ebusisiwe nguJehova. 28 UNkulunkulu
makakuphe amazolo ezulu, namanoni omhlaba, nenala yamabele neyewayini. 29 Abantu
mabakukhonze, izizwe zikukhothamele; yiba yinkosi yabafowenu, amadodana kanyoko
akukhothamele; makaqalekiswe okuqalekisayo, abusiswe okubusisayo."
30
Kwathi u-Isaka eseqede ukumbusisa uJakobe, uJakobe esand’ ukuphuma ebusweni buka-Isaka
uyise, wafika u-Esawu umnewabo evela ekuzingeleni kwakhe. 31 Naye wenza isilovela, wasiyisa
kuyise; wathi kuyise: "Ubaba makavuke, adle inyamazane yendodana yakhe ukuba umphefumulo
wakho ungibusise." 32 U-Isaka uyise wathi kuye: "Ungubani wena na?" Wathi: "Ngiyindodana
yakho, izibulo lakho, u-Esawu." 33 U-Isaka wayesethuthumela nokuthuthumela kakhulu impela,
wathi: "Ngubani, pho, othathe inyamazane, wayiletha kimi, ngayidla yonke ungakafiki,
ngambusisa, na? Yena uyakuba ngobusisiweyo." 34 U-Esawu esezwa amazwi kayise wakhala
nokukhala kamunyu impela, wathi kuyise: "Ngibusise nami, baba!" 35 Wayesethi: "Umfowenu
ufike ngenkohliso, wathatha isibusiso sakho." 36 Wathi: "Aliqanjwanga kahle igama lakhe
ngokuthi uJakobe na? Ngokuba sekukabili engiqinela; wathatha ubuzibulo bami; bheka, manje
usethathe isibusiso sami." Wathi: "Mina, awungigodlelanga sibusiso na?" 37 U-Isaka waphendula,
wathi ku-Esawu: "Bheka, ngimmisile abe yinkosi yakho, nabafowabo bonke ngimnike bona babe
yizinceku zakhe; ngimphasile ngamabele nangewayini; ngingase ngikwenzeleni wena ndodana
yami na?" 38 Wayesethi u-Esawu kuyise: "Baba, sinye nje isibusiso sakho na? Ngibusise nami,
baba!" U-Esawu wadazuluka, wakhala. 39 U-Isaka uyise waphendula, wathi kuye: "Bheka, umuzi
wakho uyakuba kude namanoni omhlaba namazolo ezulu avela phezulu. 40 Uyakuphila
ngenkemba yakho, umkhonze umfowenu; kuyakuthi lapho udlubulunda, uhluzule ijoka lakhe
entanyeni yakho."
41
U-Esawu wayesemzonda uJakobe ngenxa yesibusiso uyise ambusise ngaso; u-Esawu wathi
enhliziyweni yakhe: "Izinsuku zokulilela ubaba sezisondele; khona ngiyakumbulala umfowethu
uJakobe." 42 URebeka watshelwa amazwi ka-Esawu indodana yakhe enkulu; wathuma wambiza
uJakobe indodana yakhe encane, wathi kuye: "Bheka, umnewenu u-Esawu uyaziduduza ngawe
ngokuthi uyakukubulala. 43 Ngalokho, ndodana yami, lalela izwi lami: vuka ubalekele kuLabani
umfowethu eHarana, 44 uhlale kuye izinsukwana ezithile, kuze kubohle ukufutheka komfowenu,
45
kusuke kuwe ukuthukuthela komnewenu, akhohlwe lokho okwenze kuye, bese ngithuma
ngikulande khona; ngizakwaphucwa ngani nina nobabili ngalusuku lunye na?" 46 URebeka
wayesethi ku-Isaka: "Ngidiniwe ukuphila ngenxa yamadodakazi kaHeti; uma uJakobe ethatha
umfazi kuwo amadodakazi kaHeti onjengalawa, kuwo amadodakazi aleli zwe, kuyakungisiza
ngani ukuphila na?"

28
1
U-Isaka wambiza uJakobe, wambusisa, wamyala, wathi kuye: "Awuyikuthatha umfazi kuwo
amadodakazi aseKhanani. 2 Vuka uye ePhadani Aramu endlini kaBetuweli uyise kanyoko,
uzithathele khona umfazi kuwo amadodakazi kaLabani unyokolume. 3 UNkulunkulu uSomandla
makakubusise, akuchumise, akwandise, ube yizizwe eziningi, 4 akuphe isibusiso sika-Abrahama,
wena nenzalo yakho kanye nawe, udle ifa lezwe lokugogobala kwakho uNkulunkulu amnika lona
u-Abrahama." 5 U-Isaka wayesemmukisa uJakobe, waya ePhadani Aramu kuye uLabani
indodana kaBetuweli umAramu, umfowabo kaRebeka unina kaJakobe no-Esawu.
6
U-Esawu ebona ukuthi u-Isaka umbusisile uJakobe, wamthuma ePhadani Aramu ukuyothatha
khona umfazi, nokuthi lapho embusisa wamyala wathi: "Awuyikuthatha umfazi kuwo
amadodakazi aseKhanani," 7 nokuthi uJakobe walalela uyise nonina, waya ePhadani Aramu, 8
khona u-Esawu wabona ukuthi amadodakazi aseKhanani mabi emehlweni ka-Isaka uyise, 9 waya
ku-Ishmayeli, wathatha uMahalati indodakazi ka-Ishmayeli indodana ka-Abrahama, udadewabo
kaNebayoti, abe ngumkakhe kanye nabafazi ayesenabo.
10
UJakobe wayesemuka eBeri Sheba, waya eHarana. 11 Wafika endaweni ethile, wahlala khona
ubusuku bonke, ngokuba ilanga lase lishonile; wathatha elinye lamatshe aleyondawo, walibeka
phansi kwekhanda lakhe, walala kuleyo ndawo. 12 Waphupha, bheka, nanko umkhwelo umiswe
emhlabathini, isihloko sawo sifinyelela ezulwini; nezingelosi zikaNkulunkulu zenyuka, zehla
kuwo. 13 Bheka, uJehova wayemi ngaphezu kwawo, wathi: "NginguJehova uNkulunkulu ka-
Abrahama uyihlo, noNkulunkulu ka-Isaka; leli zwe olele kulo ngizakulinika wena nenzalo yakho.
14
Inzalo yakho iyakuba ngangothuli lomhlabathi, wena usabalalele ngasentshonalanga,
nasempumalanga, nasenyakatho, naseningizimu; ngawe nangenzalo yakho iyakubusiswa
imindeni yonke yomhlaba. 15 Bheka, nginawe; ngiyakukulondoloza nakuphi lapho uya khona,
ngikubuyisele kuleli zwe, ngokuba angiyikukushiya, ngingakakwenzi lokho engikushilo kuwe."
16
Wayesephaphama uJakobe ebuthongweni bakhe, wathi: "Imbala uJehova ukule ndawo, mina-
ke bengingakwazi." 17 Washaywa luvalo, wathi: "Yeka ukwesabeka kwale ndawo! Akusikho
okunye, yindlu kaNkulunkulu kuphela, yisango lezulu." 18 UJakobe wavuka ekuseni, walithatha
itshe abelibeke phansi kwekhanda lakhe, walimisa laba yinsika, wathela amafutha esihlokweni
salo. 19 Waqamba igama laleyo ndawo ngokuthi iBethele; kuqala igama lomuzi laliyiLuze. 20
UJakobe wenza isithembiso, wathi: "Uma uNkulunkulu eyakuba nami, angilondoloze kule ndlela
engihamba ngayo, angiphe isinkwa sokudliwa nezingubo zokwembatha, 21 ukuze ngibuyele
endlini kababa ngokuthula, khona uJehova uyakuba nguNkulunkulu wami, 22 naleli tshe
engilimise libe yinsika liyakuba yindlu kaNkulunkulu, nakukho konke oyakungipha khona
ngiyakukunika okweshumi."

29
1
Wayesesuka uJakobe, waya ezweni labantu basempumalanga. 2 Wabheka, nanko umthombo
endle, nemihlambi emithathu yezimvu ilele ngakuwo, ngokuba kulowo mthombo babephuzisa
imihlambi; itshe elalisemlonyeni womthombo lalilikhulu kakhulu. 3 Kwabuthelwa khona
imihlambi yonke, balisusa itshe emlonyeni womthombo, baphuzisa izimvu, balibuyisela itshe
emlonyeni womthombo endaweni yalo. 4 UJakobe wathi kubo: "Bazalwane, nivelaphi na?"
Bathi: "SingabakwaHarana." 5 Wayesethi kubo: "Niyamazi uLabani indodana kaNahori na?"
Bathi: "Siyamazi." 6 Wathi kubo: "Usahlezi kahle na?" Bathi: "Uhlezi kahle. Nangu uRaheli
indodakazi yakhe; uyeza nezimvu." 7 Wathi: "Bheka, kusesemini kakhulu, akusiso isikhathi
sokuba zibuthwe izinkomo; phuzisani izimvu, nihambe niziklabise." 8 Base bethi: "Singekwenze
lokho ingakabuthani imihlambi yonke, balisuse itshe emlonyeni womthombo; yikhona
siyakuphuzisa izimvu."
9
Esakhuluma nabo, uRaheli wafika nezimvu zikayise, ngokuba wayezalusa. 10 Kwathi uJakobe
ebona uRaheli indodakazi kaLabani uninalume nezimvu zikaLabani uninalume, uJakobe
wasondela, wasusa itshe emlonyeni womthombo, waziphuzisa izimvu zikaLabani uninalume. 11
UJakobe wamanga uRaheli, waphakamisa izwi lakhe, wakhala. 12 UJakobe wayesemtshela
uRaheli ukuthi ungumfowabo kayise nokuthi uyindodana kaRebeka; wagijima, watshela uyise. 13
Kwathi uLabani esezwe indaba kaJakobe indodana kadadewabo, wagijima ukuyomhlangabeza,
wamgona, wamanga, wamngenisa endlini yakhe; wayesetshela uLabani zonke lezi zinto. 14
ULabani wathi kuye: "Impela uyithambo lami nenyama yami." Wahlala kuye inyanga yonke.
15
ULabani wayesethi kuJakobe: "Lokhu ungumfowethu, ubuzakungisebenzela ngeze na?
Ngitshele ukuthi umvuzo wakho uyakuba yini na?" 16 ULabani wayenamadodakazi amabili;
igama lenkulu lalinguLeya, igama lencane lalinguRaheli. 17 Amehlo kaLeya ayebuthakathaka,
kepha uRaheli wayemuhle ngesimo, ebukeka kahle. 18 UJakobe wamthanda uRaheli; wathi:
"Ngizakukusebenzela iminyaka eyisikhombisa ngoRaheli indodakazi yakho encane." 19
Wayesethi uLabani: "Kuhle ukuba ngimnike wena kunokuba ngimnike enye indoda; hlala kimi."
20
UJakobe wayesesebenzela uRaheli iminyaka eyisikhombisa; yayisemehlweni akhe
njengezinsuku eziyingcosana nje ngenxa yokumthanda kwakhe. 21 UJakobe wathi kuLabani:
"Nginike umkami, ngokuba izinsuku zami seziphelile, ngize ngingene kuye." 22 ULabani
wabutha abantu bonke bakuleyo ndawo, wenza idili. 23 Kepha kwathi kusihlwa wathatha uLeya
indodakazi yakhe, wamyisa kuye; wangena kuye. 24 ULabani wanika indodakazi yakhe uLeya
incekukazi yakhe uZilipa, abe yincekukazi yakhe. 25 Kwathi ekuseni, bheka, kunguLeya;
wayesethi kuLabani: "Kuyini lokhu okwenzile kimi na? Angikusebenzelanga ngoRaheli na?
Ungikhohliseleni na?" 26 Wathi uLabani: "Akwenziwa njalo endaweni yakithi ukuba kuganiswe
omncane ngaphambi komkhulu. 27 Qeda isonto lalona, sikuphe nomunye ngomsebenzi
osezakuwusebenza kimi eminye iminyaka eyisikhombisa." 28 UJakobe wenze njalo, waqeda
isonto lakhe; wamupha uRaheli indodakazi yakhe, abe ngumkakhe. 29 ULabani wanika
indodakazi yakhe uRaheli incekukazi yakhe uBiliha, abe yincekukazi yakhe. 30 Wangena nakuye
uRaheli, wathanda uRaheli kakhulu kunoLeya; wayesesebenza kuye eminye iminyaka
eyisikhombisa.
31
UJehova ebona ukuthi uLeya uyazondwa, wavula isizalo sakhe; kepha uRaheli wayeyinyumba.
32
ULeya wakhulelwa, wazala indodana, waqamba igama layo ngokuthi uRubeni, ngokuba wathi:
"UJehoba ubonile ukuhlupheka kwami; manje umyeni wami uyakungithanda." 33 Wabuye
wakhulelwa, wazala indodana, wathi: "Lokhu uJehova ezwe ukuthi ngiyazondwa, ungiphile
nalena futhi;" waqamba igama layo ngokuthi uSimeyoni. 34 Wabuye wakhulelwa, wazala
indodana, wathi: "Manje ngalesi sikhathi umyeni wami uyakunamathela kimi, ngokuba
ngimzalele amadodana amathathu;" ngalokho waqamba igama layo ngokuthi uLevi. 35
Wakhulelwa futhi, wazala indodana, wathi: "Sengiyakumdumisa uJehova;" ngalokho waqamba
igama layo ngokuthi uJuda; wayesekhawula ukuzala.

30
1
URaheli esebonile ukuthi wayengamzaleli uJakobe abantwana, uRaheli waba nomhawu
ngodadewabo, wathi kuJakobe: "Ngiphe abantwana, funa ngife." 2 Intukuthelo kaJakobe
yayisivuthela uRaheli, wathi: "Ngisesikhundleni sikaNkulunkulu okwenqabele isithelo sesizalo
na?" 3 Wathi: "Nansi incekukazi yami uBiliha; ngena kuye, ukuze azalele emathangeni ami,
ngakheke nami ngaye." 4 Wayesemupha uBiliha incekukazi yakhe, abe ngumkakhe; uJakobe
wangena kuye. 5 UBiliha wakhulelwa, wamzalela uJakobe indodana. 6 Wayesethi uRaheli:
"UNkulunkulu ungahlulele, futhi wezwa izwi lami: wangipha indodana;" ngalokho waqamba
igama layo ngokuthi uDani. 7 UBiliha incekukazi kaRaheli wabuye wakhulelwa, wamzalela
uJakobe indodana yesibili. 8 URaheli wathi: "Ngokubambana ngibambene nodadewethu
ngamandla kaNkulunkulu, ngamahlula;" waqamba igama layo ngokuthi uNafetali. 9 ULeya
esebonile ukuthi ukhawulile ukuzala, wamthatha uZilipa incekukazi yakhe, wamupha uJakobe,
abe ngumkakhe. 10 UZilipa incekukazi kaLeya wamzalela uJakobe indodana. 11 ULeya
wayesethi: "Kwenziwe inhlanhla;" waqamba igama layo ngokuthi uGadi. 12 UZilipa incekukazi
kaLeya wamzalela indodana yesibili. 13 Wayesethi uLeya: "Yisibusiso sami! Ngokuba izintombi
ziyakungibiza ngokuthi ngingobusisiweyo;" waqamba igama layo ngokuthi u-Asheri.
14
Ngesikhathi sokuvuna ukolweni uRubeni waya wafumana amamandragora endle, wawayisa
kunina uLeya. URaheli wayesethi kuLeya: "Ake ungiphe amamandragora endodana yakho." 15
Wathi kuye: "Kuncane yini ukuba uthathile umyeni wami na? Usuyakuthatha namamandragora
endodana yami na?" URaheli wathi: "Ngalokho uzakulala nawe ngalobu busuku
ngamamandragora endodana yakho." 16 Kusihlwa uJakobe esebuya endle, uLeya waya
ukumhlangabeza, wathi: "Ngena kimi, ngokuba impela ngikuqashile ngamamandragora endodana
yami." Wayeselala naye ngalobo busuku. 17 Unkulunkulu wamuzwa uLeya; wakhulelwa,
wamzalela uJakobe indodana yesihlanu. 18 Wayesethi uLeya: "UNkulunkulu unginikile umvuzo,
lokhu ngamnika umyeni wami incekukazi yami;" waqamba igama lakhe ngokuthi u-Isakare. 19
ULeya wabuye wakhulelwa, wamzalela uJakobe indodana yesithupha. 20 Wayesethi uLeya:
"UNkulunkulu ungiphe isipho esihle; manje umyeni wami useyakuhlala kimi, ngokuba
ngimzalele amadodana ayisithupha;" waqamba igama layo ngokuthi uZebuloni. 21 Ngasemuva
wazala indodakazi, waqamba igama layo ngokuthi uDina. 22 UNkulunkulu wamkhumbula
uRaheli, uNkulunkulu wamuzwa, wavula isizalo sakhe. 23 Wakhulelwa, wazala indodana, wathi:
"UNkulunkulu ususile ihlazo lami." 24 Waqamba igama layo ngokuthi uJosefa, ethi: "UJehova
makangenezelele nenye indodana futhi."
25
Kwathi uRaheli esemzalile uJosefa, uJakobe wathi kuLabani: "Ngimukise ukuba ngiye
endaweni yami ezweni lakithi. 26 Ngiphe omkami nabantwana bami engikusebenzele ngabo,
ngihambe, ngokuba uyawazi umsebenzi engikwenzele wona." 27 ULabani wayesethi kuye: "Ake
ngifumane umusa emehlweni akho. Sengibonile ukuthi uJehova ungibusisile ngenxa yakho." 28
Wathi futhi: "Nquma umvuzo wakho, ngikuphe wona." 29 Wathi kuye: "Uyazi wena ukuthi
ngikukhonze kanjani nokuthi izinkomo zakho zazinjani kimi. 30 Ngokuba kwakukuncane
okwakho ngingakafiki; kepha kwandile, sekukuningi; uJehova ukubusisile ezinyathelweni zami;
manje ngiyakuyisebenzela nini eyami indlu na?" 31 Wathi: "Ngiyakukuphani na?" Wathi uJakobe:
"Awuyikunginika lutho; uma ungenzela lokhu, ngiyakubuye ngaluse umhlambi wakho,
ngiwulinde. 32 Namuhla ngiyakudabula emhlambini wakho wonke, ngikhiphe khona zonke
ezimanakanaka nezimagqabhagqabha, nazo zonke ezimnyama ezimvini, nezimagqabhagqabha
nezimanakanaka ezimbuzini, kube ngumvuzo wami. 33 Ukulunga kwami kuyakungifakazela
ngesikhathi esizayo, lapho ufika ngomvuzo wami osebusweni bakho, ukuthi zonke
ezingemanakanaka nezingemagqabhagqabha ezimbuzini, nezingemnyama ezimvini ezikimi,
mazithiwe zebiwe." 34 Wayesethi uLabani: "Bheka, makube njengezwi lakho." 35 Ngalowo muhla
wakhipha izimpongo ezinemishwe nezimagqabhagqabha, nezimbuzikazi zonke ezimanakanaka
nezimagqabhagqabha, zonke ezinokumhlophe, nezimnyama zonke ezimvini, wazinikela
esandleni samadodana akhe. 36 Wamisa ibanga lezinsuku ezintathu phakathi kwakhe noJakobe;
uJakobe walusa imihlambi eseleyo kaLabani.
37
UJakobe wathatha izinti ezimanzi zompopula nezomalimondi nezompelatani, wazebula
imishwe emhlophe, wambula okumhlophe okusezintini. 38 Wazifaka izinti abezebulile
emikhombeni nasemiqengqeni yamanzi phambi kwemihlambi, lapho imihlambi iza khona
ukuphuza; yamitha eku fikeni kwayo ukuphuza. 39 Imihlambi yamitha phambi kwezinti,
imihlambi yazala ezinemishwe, nezimanakanaka, nezimagqabhagqabha. 40 UJakobe
wayesahlukanisa amawundlu, wabhekisa ubuso bemihlambi kwezinemishwe nakwezimnyama
emhlambini kaLabani; wabeka amaqembu akhe abe wodwa engawafaki emhlambini kaLabani. 41
Kwathi lapho ibiyakumitha imihlambi eqinileyo, uJakobe wabeka izinti phambi kwamehlo
emihlambi emiqengqeni ukuba imithe phakathi kwezinti. 42 Kepha lapho umhlambi
wawubuthakathaka, akazifakanga; yathi-ke ebuthakathaka yaba ngekaLabani neqinileyo yaba
ngekaJakobe. 43 Yayisikhula kakhulu impela le ndoda, yaba nemihlambi emikhulu,
nezincekukazi, nezinceku, namakamela, nezimbongolo.

31
1
Wayesezwa amazwi amadodana kaLabani, ethi: "UJakobe uthathile konke
okwakungokukababa; ngokwakungokukababa uzizuzele lonke lolu dumo." 2 UJakobe wabona
ubuso bukaLabani; bheka, babungasenjengayizolo nakuthangi kuye. 3 UJehova wayesethi
kuJakobe: "Buyela ezweni lawoyihlo nasezihlotsheni zakho; ngiyakuba nawe." 4 UJakobe
wathuma wabiza oRaheli noLeya, beze endle emhlambini wakhe. 5 Wathi kubo: "Ngiyabubona
ubuso bukayihlo ukuthi abusenjengayizolo nakuthangi kimi, kepha uNkulunkulu kababa unami. 6
Niyazi nina ukuthi ngimkhonzile uyihlo ngamandla ami onke. 7 Kepha uyihlo ungikhohlisile,
waguqula umvuzo wami kayishumi; kodwa uNkulunkulu akamvumelanga ukwenza okubi kimi. 8
Uma ebesho ukuthi: ‘Ezimanakanaka ziyakuba ngumvuzo wakho,’ umhlambi wonke wazala
ezimanakanaka; uma ebesho ukuthi: ‘Ezinemishwe ziyakuba ngumvuzo wakho,’ umhlambi
wonke wazala ezinemishwe. 9 Kanjalo uNkulunkulu uthathile imfuyo kayihlo, wayinika mina. 10
"Kwathi ngokumitha kwemihlambi ngaphakamisa amehlo ami, ngabona ephusheni; bheka,
izimpongo ezikhwela umhlambi zazingezinemishwe, nezimanakanaka, nezinala. 11 Ingelosi
kaNkulunkulu yathi kimi ephusheni: ‘Jakobe!’ Ngathi: ‘Ngilapha.’ 12 Yayisithi: ‘Awuphakamise
amehlo akho, ubone ukuthi zonke izimpongo ezikhwela umhlambi zingezinemishwe,
nezimanakanaka, nezinala, ngokuba ngibone konke uLabani akwenza kuwe. 13
NginguNkulunkulu waseBethele, lapho wagcoba khona insika nalapho wenza isithembiso kimi;
manje vuka, usuke kuleli zwe, ubuyele ezweni lokuzalwa kwakho.’" 14 ORaheli noLeya
baphendula, bathi kuye: "Sisenesabelo nefa endlini kababa na? 15 Asibalwanga njengabofakazi
na? Ngokuba wathengisa ngathi, waqeda intengo yethu. 16 Ngokuba yonke ingcebo uNkulunkulu
amamuke yona ubaba ingeyethu neyabantwana bethu; manje konke uNkulunkulu akutshele
khona, kwenze."
17
UJakobe wayesesuka, wakhwelisa amadodana akhe nawomkakhe emakameleni. 18 Wathatha
yonke imfuyo yakhe ayizuzileyo, imfuyo yokufuya kwakhe ayizuze ePhadani Aramu ukuba aye
ku-Isaka uyise ezweni laseKhanani. 19 ULabani esehambile ukuyogunda izimvu zakhe, uRaheli
weba izithixo zikayise. 20 UJakobe wamnyenyela uLabani umAramu engamtshelanga ukuthi
uyabaleka. 21 Wayesebaleka nakho konke anakho; wasuka, wawela umfula, waqonda
ngasentabeni yakwaGileyadi. 22 Ngosuku lwesithathu uLabani watshelwa ukuthi uJakobe
ubalekile. 23 Wayesethatha abafowabo, wamlandela ibanga lezinsuku eziyisikhombisa, wamfica
entabeni yakwaGileyadi. 24 UNkulunkulu weza kuLabani umAramu ephusheni ebusuku, wathi
kuye: "Qaphela ukuba ungakhulumi kuJakobe okuhle noma okubi."
25
ULabani wayesemfica uJakobe. UJakobe wayemisile itende lakhe entabeni; uLabani
nabafowabo bamisa entabeni yakwaGileyadi. 26 ULabani wathi kuJakobe: "Wenzeni, lokhu
unginyenyele, wathatha amadodakazi njengabathunjwa benkemba, na? 27 Ubalekeleni ngasese
na? Wanginyenyelelani ungangitshelanga ukuba ngabe ngikuvalelise ngokwenama
nangezihlabelelo, ngesigubhu nangehabhu, na? 28 Awungivumelanga ukuba ngange amadodana
ami namadodakazi ami. Untumazele ngalokho. 29 Kusemandleni esandla sami ukwenza okubi
kuwe, kepha uNkulunkulu kayihlo ukhulumile kimi ebusuku obudlule, wathi: ‘Qaphela ukuba
ungakhulumi kuJakobe okubi noma okuhle.’ 30 Manje njengokuba usumuka impela, lokhu
ulangazelela nokulangazelela indlu kayihlo, webeleni izithixo zami na?" 31 UJakobe waphendula,
wathi kuLabani: "Ngokuba ngesaba ngithi: Funa ungiqhwage amadodakazi akho. 32 Kepha lowo
ozakuthola kuye izithixo zakho akayikusinda; qaza phambi kwabafowethu okwakho okukimi,
ukuthathe." Ngokuba uJakobe wayengazi ukuthi uRaheli wayezebile. 33 ULabani wayesengena
etendeni likaJakobe, nasetendeni likaLeya, nasetendeni lezincekukazi zombili; akazitholanga.
Waphuma etendeni likaLeya, wangena etendeni likaRaheli. 34 URaheli wayezithathe izithixo,
wazifaka esihlalweni sekamela, wahlala phezu kwazo. ULabani waphumputha etendeni lonke,
kepha akazitholanga. 35 Wathi kuyise: "Mayingathukutheli inkosi yami ukuthi anginakusukuma
phambi kwakho, ngokuba indlela yabesifazane ikimi." Wanyalula, kepha akazitholanga izithixo.
36
UJakobe wathukuthela, wamsola uLabani; uJakobe waphendula, wathi kuLabani: "Yisiphi
isiphambeko sami na? Yisiphi isono sami, lokhu ungizingele kangaka, na? 37 Njengalokho
usufunisisile kuyo yonke impahla yami, uthole ntoni yezinto zonke zendlu yakho na? Yibeke
lapha phambi kwabafowethu nabafowenu ukuba banqume phakathi kwethu sobabili. 38 "Le
minyaka engamashumi amabili bengihlezi kuwe; izimvukazi zakho nezimbuzikazi zakho
aziphunzanga; izinqama zomhlambi wakho angizidlanga. 39 Ezidweshulwe yizilo ngangingaziyisi
kuwe; kwalahlekelwa mina; wazibiza esandleni sami, noma zebiwe emini noma zebiwe ebusuku.
40
Nganginjalo; emini ngaqedwa ngukushisa, ebusuku ngamakhaza; ubuthongo bami babalekela
amehlo ami. 41 Le minyaka engamashumi amabili bengisendlini yakho; ngakusebenzela iminyaka
eyishumi nane ngamadodakazi akho omabili, neminyaka eyisithupha ngomhlambi wakho,
uguqule umvuzo wami kayishumi. 42 Uma ebengenami uNkulunkulu kababa, uNkulunkulu ka-
Abrahama, ukwesaba kuka-Isaka, ngempela ubuyakungimukisa ze. UNkulunkulu ubone
ukuhlupheka kwami nokukhathala kwezandla zami, wakusola ubusuku obudlule."
43
ULabani waphendula, wathi kuJakobe: "Amadodakazi angamadodakazi ami, abantwana
bangabantwana bami, imihlambi iyimihlambi yami; konke okubonayo kungokwami; lawa
madodakazi ami ngingawenzela ntoni namuhla, nabantwana bawo abazalileyo, na? 44 Woza
manje, senze isivumelwano mina nawe, sibe ngufakazi phakathi kwami nawe." 45 UJakobe
wayesethatha itshe, walimisa laba yinsika. 46 Wathi uJakobe kubafowabo: "Buthani amatshe;"
bathatha amatshe, benza inqwaba; base bedla khona phezu kwenqwaba. 47 ULabani wayiqamba
ngokuthi iJegari Sahadutha, kepha uJakobe wayibiza ngokuthi iGaledi. 48 Wathi uLabani: "Le
nqwaba ingufakazi phakathi kwami nawe namuhla." Ngalokho igama layo laqanjwa ngokuthi
iGaledi, 49 neMispa futhi, ngokuba wathi: "UJehova makalinde phakathi kwami nawe, lapho
sesingasabonani. 50 Uma uyakuhlupha amadodakazi ami, noma uthatha abafazi ngaphandle
kwamadodakazi ami, akukho muntu onathi; bheka, uNkulunkulu ungufakazi phakathi kwami
nawe." 51 Wathi uLabani kuJakobe: "Bheka, le nqwaba nensika engikumise phakathi kwami
nawe, 52 le nqwaba ayibe ngufakazi, nensika ibe ngufakazi ukuthi angiyikudlula kule nqwaba,
ngiye kuwe, nokuthi wena awuyikudlula kule nqwaba nakule nsika, uze kimi, ngokubi. 53
UNkulunkulu ka-Abrahama noNkulunkulu kaNahori, uNkulunkulu wawoyise, makahlulele
phakathi kwethu." UJakobe wafunga ukwesaba kukayise u-Isaka. 54 UJakobe wanikela
ngomhlatshelo entabeni, wabiza abafowabo ukuba badle isinkwa; badla isinkwa, bahlala ubusuku
bonke entabeni. 55 ULabani wavuka ekuseni, wawanga amadodana akhe namadodakazi akhe,
wawabusisa; wayesehamba uLabani, wabuyela endaweni yakhe.

32
1
UJakobe wahamba indlela yakhe; izingelosi zikaNkulunkulu zamhlangabeza. 2 UJakobe
ezibona wathi: "Lokhu kuyibandla likaNkulunkulu." Waqamba igama laleyo ndawo ngokuthi
iMahanayimi.
3
UJakobe wathuma izithunywa phambi kwakhe ku-Esawu umfowabo ezweni laseSeyiri, izwe
lakwa-Edomi. 4 Waziyala ngokuthi: "Niyakukhuluma kanje enkosini yami u-Esawu, nithi:
‘Inceku yakho uJakobe ithi: Ngigogobele kuLabani, ngilibele kuze kube manje; 5 nginezinkabi,
nezimbongolo, nezimvu, nezinceku, nezincekukazi; sengithumele ukubika enkosini yami ukuba
ngithole umusa emehlweni akho.’" 6 Izithunywa zabuyela kuJakobe, zathi: "Safika kumfowenu
u-Esawu, naye uyeza ukukuhlangabeza enamadoda angamakhulu amane." 7 UJakobe
wayeseshaywa luvalo kakhulu, ekhathazeka; wahlukanisa abantu ababenaye, nezimvu,
nezinkomo, namakamela, kwaba ngamaqembu amabili, 8 wathi: "Uma u-Esawu efika kwelinye
iqembu, alichithe, iqembu eliseleyo liyakubaleka."
9
Wathi uJakobe: "Nkulunkulu kababa u-Abrahama, Nkulunkulu kababa u-Isaka, Jehova, wena
owathi kimi: ‘Buyela ezweni lakho nasezihlotsheni zakho,’ ngikwenzele okuhle, 10 angifanele
neze wonke umusa nalo lonke iqiniso okwenzele inceku yakho, ngokuba ngawela leli Jordani
ngodondolo lwami kuphela, manje sengingamaqembu amabili. 11 Ake ungophule esandleni
somfowethu, esandleni sika-Esawu, ngokuba mina ngiyamesaba, funa eze angichithe kanye
nawonina nabantwana. 12 Wathi wena: ‘Impela ngiyakukwenzela okuhle, ngenze inzalo yakho ibe
ngangesihlabathi solwandle esingebalwe ngobuningi.’"
13
Walala khona lobo busuku; kulokho okwakusesandleni sakhe wathathela u-Esawu umfowabo
isipho: 14 izimbuzikazi ezingamakhulu amabili, nezimpongo ezingamashumi amabili,
nezimvukazi ezingamakhulu amabili, nezinqama ezingamashumi amabili, 15 namakamela
asengwayo angamashumi amathathu namathole awo, nezinkomazi ezingamashumi amane,
nezinkunzi eziyishumi, nezimbongolokazi ezingamashumi amabili, namathole ayishumi. 16
Wazinikela esandleni sezinceku amaqambi ngamaqambi, wathi ezincekwini zakhe: "Dlulani
ngaphambi kwami, nenze ibanga phakathi kweqambi neqambi." 17 Wamyala ophambili, wathi:
"Nxa u-Esawu umfowethu ehlangana nawe, ekubuza ethi: ‘Ungokabani wena? Uyangaphi na?
Ngezikabani lezi eziphambi kwakho na?’ 18 wothi: ‘Ngezenceku yakho uJakobe; kuyisipho
esithunywa enkosini yami u-Esawu; bheka, naye uyeza, ungasemuva kwethu.’" 19 Wayala
nowesibili, nowesithathu, nabo bonke ababelandela amaqembu, wathi: "Niyakusho njalo ku-
Esawu, lapho nimfumana. 20 Niyakukhuluma nithi: ‘Futhi bheka, inceku yakho uJakobe iyeza,
isemva kwethu.’"Ngokuba wathi: "Ngizakumthoba ngalesi sipho esihamba phambi kwami,
andukuba ngibone ubuso bakhe; mhlawumbe angangamukela." 21 Sase sihamba isipho phambi
kwakhe, kepha yena wahlala ekamu lobo busuku. 22 Wavuka ebusuku, wathatha omkakhe ababili,
nezincekukazi zakhe ezimbili, nabantwana bakhe abayishumi nanye, wawela ezibukweni elithiwa
iJaboki. 23 Wabathatha, wabawelisa emfuleni, wakuwelisa nalokho anakho.
24
Wasala yedwa uJakobe; kwabambana naye umuntu, kwaze kwasa. 25 Esebona ukuthi
akamahluli, wathinta esikhoxeni senyonga yakhe, waphinyazeka uJakobe esikhoxeni senyonga
esebambene naye. 26 Wayesethi: "Angihambe, ngokuba sekuyasa." Kepha wathi:
"Anginakukuyeka ukuba uhambe ungangibusisanga." 27 Wathi kuye: "Ungubani igama lakho
na?" Wathi: "NginguJakobe." 28 Wathi: "Igama lakho alisayikuthiwa uJakobe, kepha u-Israyeli,
ngokuba ulwile noNkulunkulu nabantu, wanqoba." 29 UJakobe wayesembuza ethi: "Ake
ungitshele igama lakho." Wathi: "Ubuzelani igama lami na?" Wayesembusisa khona. 30 UJakobe
waqamba igama laleyo ndawo ngokuthi iPheniyeli, ngokuba wathi: "Sibonene noNkulunkulu
ubuso nobuso, nokho umphefumulo wami wophulwa." 31 Ilanga lamphumela esadlula iPheniyeli,
waqhuga enyongeni yakhe. 32 Ngalokho abantwana bakwa-Israyeli abawudli umsipha wenqulu
osesikhoxeni senyonga kuze kube namuhla, ngokuba wathinta isikhoxo senyonga kaJakobe
emsipheni wenqulu.

33
1
UJakobe waphakamisa amehlo akhe, wabheka, nango u-Esawu eza enamadoda angamakhulu
amane. Abantwana wabahlukanisela oLeya, noRaheli, nezincekukazi zombili. 2 Wabeka
izincekukazi nabantwana bazo ngaphambili, uLeya nabantwana bakhe ngasemuva, oRaheli
noJosefa ngasekugcineni. 3 Yena uqobo wadlulela phambi kwabo, wakhothamela emhlabathini
kasikhombisa, waze wafika kumfowabo. 4 U-Esawu wagijima ukumhlangabeza, wamgona, wawa
ngasentanyeni yakhe, wamanga; bakhala.
5
Waphakamisa amehlo akhe, wabona abesifazane nabantwana, wathi: "Bangobani laba onabo
na?" Wathi: "Bangabantwana uNkulunkulu ayiphe bona inceku yakho ngomusa." 6 Zase
zisondela izincekukazi, zona nabantwana bazo, bakhothama. 7 Wasondela noLeya nabantwana
bakhe, bakhothama; ngasemuva wafika uJosefa enoRaheli, bakhothama. 8 Wayesethi: "Uqondeni
ngawo wonke lombonda engihlangana nawo na?" Wathi: "Ukuba ngifumane umusa emehlweni
enkosi yami." 9 Kepha u-Esawu wathi: "Nginokuningi, mfowethu; okwakho makube
ngokwakho." 10 UJakobe wathi: "Hhayi bo; uma ngifumene umusa emehlweni akho, samukele
isipho sami esandleni sami, ngokuba ngibone ubuso bakho esengathi ngibona ubuso
bukaNkulunkulu, wathokoza ngami. 11 Mawusamukele isibusiso sami esilethwa kuwe, ngokuba
uNkulunkulu ungenzele umusa nangokuba nginakho konke." Wamcindezela; wasamukela-ke. 12
Wayesethi: "Asisuke sihambe, ngihambe phambi kwakho." 13 Wathi kuye: "Inkosi yami iyazi
ukuthi abantwana bancane nokuthi izimvu nezinkomazi ezinami ziyizindlezane; uma
bezishishinga usuku olulodwa, umhlambi wonke uyakufa. 14 Ake idlule inkosi phambi kwenceku
yayo, mina ngiseseze njengokuhamba kwempahla ephambi kwami nanjengokuhamba
kwabantwana, ngize ngifike enkosini yami eSeyiri." 15 U-Esawu wathi: "Ake ngishiye kuwe
abanye abantu bami." Wathi: "Ngani na? Mangifumane umusa emehlweni enkosi."
16
U-Esawu wayesebuyela endleleni yakhe ngalolo suku, waya eSeyiri. 17 UJakobe wasuka waya
eSukoti, wazakhela indlu, wenzela izinkomo zakhe amathanga; ngalokho igama laleyo ndawo
lathiwa iSukoti. 18 UJakobe wafika kahle emzini waseShekemi osezweni laseKhanani, evela
ePhadani Aramu; wamisa itende lakhe phambi komuzi. 19 Wathenga isiqephu sezwe, lapho
ebemise khona itende lakhe, esandleni samadodana kaHamori uyise kaShekemi ngamakesita
ayikhulu. 20 Wakha khona i-altare, walibiza ngokuthi i-Eli Elohe Israyeli.

34
1
UDina, indodakazi kaLeya amzalela yona uJakobe, waphuma ukuyobona amadodakazi alelo
zwe. 2 UShekemi indodana kaHamori umHivi, inkosi yezwe, wambona, wamthatha, walala naye,
wamona. 3 Inhliziyo yakhe yabambelela kuDina indodakazi kaJakobe, wayithanda intombi,
wakhuluma kuyo inhliziyo yentombi. 4 UShekemi wakhuluma kuyise uHamori, wathi:
"Ngithathele le ntombazana, ibe ngumkami." 5 UJakobe wezwa ukuthi ungcolisile indodakazi
yakhe uDina; amadodana akhe ayesezinkomeni endle; uJakobe wathula, aze afika.
6
UHamori uyise kaShekemi waphumela kuJakobe ukuyokhuluma naye. 7 Amadodana kaJakobe
abuya endle esezwile lokho; abantu badabuka, bathukuthela kakhulu, ngokuba ubenze ubuwula
kwa-Israyeli ngokulala nendodakazi kaJakobe, okungenakwenziwa. 8 UHamori wakhuluma nabo,
wathi: "Inhliziyo yendodana yami uShekemi iyabambelela endodakazini yenu; ake nimuphe
yona, ibe ngumkakhe. 9 Ganiselanani nathi, nisiphe amadodakazi enu, nizithathele amadodakazi
ethu. 10 Niyakuhlala kithi; izwe liyakuba sebusweni benu; yakhani, nithengiselane, nifuye kulo."
11
UShekemi wayesethi kuyise nakubanewabo: "Ake ngifumane umusa emehlweni enu; lokho
eniyakukusho kimi, ngiyakuninika khona. 12 Bizani kimi ilobolo noma lingakanani kanye
nesipho, ngiyakuninika njengokusho kwenu kimi; kodwa ngipheni intombi ibe ngumkami." 13
Amadodana kaJakobe abaphendula oShekemi noHamori uyise ngobuqili, akhuluma, njengokuba
ebemngcolisile uDina udadewabo, 14 athi kubo: "Asinakwenza lokhu, ukunika udadewethu
kumuntu ongasokwanga, ngokuba lokho kuyihlazo kithina. 15 Kepha ngalokho singanivumela:
uma nizakuba njengathi, kusokwe bonke abesilisa bakini, 16 siyakuninika amadodakazi ethu,
sizithathele amadodakazi enu, sihlale nani, sibe yisizwe sinye. 17 Kepha uma ningasilaleli,
nisokwe, siyakuthatha indodakazi yethu, sihambe."
18
Amazwi abo aba mahle koHamori noShekemi indodana kaHamori. 19 Le nsizwa ayilibalanga
ukwenza lokho, ngokuba yayethabela indodakazi kaJakobe; yayinodumo kunabo bonke abendlu
kayise. 20 OHamori noShekemi indodana yakhe beza ngasesangweni lomuzi, bakhuluma
namadoda omuzi wabo, bathi: 21 "Labo bantu bahlezi ngokuthula nathi; ngalokho mabahlale
ezweni, balihambe, ngokuba bheka, izwe libanzi inxa zombili phambi kwabo; asizithathele
amadodakazi abo abe ngomkethu, sibaphe amadodakazi ethu. 22 Kuphela ngalokho bayasivumela
laba bantu ukuhlala nathi, sibe yisizwe sinye, ukuthi bonke abesilisa bakithi basokwe,
njengalokho bona besokiwe. 23 Imihlambi yabo, nempahla yabo, nezinkomo zabo akuyikuba
ngokwethu na? Masibavumele kuphela, bakhe kithi." 24 Bonke abaphuma ngesango lomuzi
wakhe balalela oHamori noShekemi indodana yakhe; bonke abesilisa basokwa, bonke abaphuma
ngesango lomuzi wakhe.
25
Kwathi ngosuku lwesithathu bese nobuhlungu, amadodana amabili kaJakobe, oSimeyoni
noLevi, abanewabo bakaDina, bathatha, kwaba yilowo nalowo inkemba yakhe, bahlasela umuzi
ngesibindi, babulala bonke abesilisa. 26 Babulala oHamori noShekemi indodana yakhe ngosiko
lwenkemba, bakhipha uDina endlini kaShekemi, bahamba. 27 Amadodana kaJakobe ayesefica
ababuleweyo, aphanga umuzi, ngokuba babengcolisile udadewabo. 28 Athatha izimvu zabo,
nezinkomo zabo, nezimbongolo zabo, okwakusemzini nokwakusendle, 29 nemfuyo yonke yabo;
athumba abantwana babo nawomkabo, abaphanga kanye nakho konke okusendlini. 30 UJakobe
wayesethi koSimeyoni noLevi: "Ningihluphile, ningenzile ukuba nginukele kabi abantu bezwe,
amaKhanani namaPherizi, lokhu ngiyingcosana, bayakungihlanganyela, bangibulale, ngichithwe
mina nendlu yami." 31 Base bethi: "Ngabe bemenza udadewethu isifebe na?"

35
1
UNkulunkulu wathi kuJakobe: "Suka ukhuphukele eBethele, uhlale khona, umenzele lapho
uNkulunkulu i-altare, yena owabonakala kuwe mhla ubalekela u-Esawu umfowenu." 2 Wayesethi
uJakobe kwabendlu yakhe nakubo bonke ababe naye: "Lahlani izithixo zabezizwe eziphakathi
kwenu, nizihlambulule nina, niziphendulele izingubo zenu, 3 sisuke, sikhuphukele eBethele;
ngiyakumenzela khona uNkulunkulu i-altare, yena owangiphendula ngosuku lokuhlupheka
kwami, waba nami endleleni engangiyihamba." 4 Bamnika-ke uJakobe izithixo zonke zabezizwe
ezazisezandleni zabo, namacici ayesezindlebeni zabo; uJakobe wakuthukusa phansi kwe-oki
elalingaseShekemi. 5 Base bemuka; ukumesaba uNkulunkulu kwakuphezu kwemizi eyayikhona
nxazonke; abawaxoshanga amadodana kaJakobe.
6
UJakobe wafika eLuze elisezweni laseKhanani eliyiBethele, yena kanye nabantu bonke ababe
naye. 7 Wakha khona i-altare, wayibiza indawo ngokuthi i-Eli Bethele, ngokuba uNkulunkulu
wabonakala kuye khona mhla ebaleka ebusweni bomfowabo. 8 UDebora umzanyana kaRebeka
wafa, wembelwa ngenzansi neBethele phansi kwe-oki; igama lalo labizwa ngokuthi i-
Alonibakuti. 9 UNkulunkulu wabuye wabonakala kuJakobe, lapho evela ePhadani Aramu,
wambusisa. 10 UNkulunkulu wathi kuye: "Igama lakho linguJakobe, igama lakho alisayikuthiwa
uJakobe; igama lakho lizakuba ngu-Israyeli;" wayeseqamba igama lakhe ngokuthi u-Israyeli. 11
UNkulunkulu wathi kuye: "NginguNkulunkulu uSomandla; mawuzale, wande; isizwe, yebo,
ibandla lezizwe liyakuvela kuwe; amakhosi ayakuphuma okhalweni lwakho; 12 izwe engabapha
lona o-Abrahama no-Isaka, ngiyakulinika wena; nenzalo yakho emva kwakho ngiyakuyinika
lona." 13 UNkulunkulu wenyuka esuka kuye endaweni lapho ebekhulume naye khona. 14
UJakobe wayesemisa insika endaweni lapho abekhulume naye khona, insika yetshe; wathela
phezu kwayo umnikelo wokuphuzwa, wathela namafutha phezu kwayo. 15 UJakobe wayiqamba
indawo lapho uNkulunkulu akhuluma naye khona ngokuthi iBethele.
16
Base besuka eBethele; kwakuse yibangana ukuya e-Efrati; uRaheli wayesebeletha, wabeletha
enemihelo enzima. 17 Kwathi esenemihelo enzima, umbelethisi wathi kuye: "Ungesabi, ngokuba
uzakuba nenye indodana futhi." 18 Usuzakuphuma umphefumulo wakhe, ngokuba wafa,
waqamba igama lakhe ngokuthi uBenoni; kepha uyise wamqamba ngokuthi uBenjamini. 19 Wafa
uRaheli, wembelwa ngasendleleni eya e-Efrati eliyiBetlehema. 20 UJakobe wamisa insika
ethuneni lakhe, eyinsika yethuna likaRaheli kuze kube namuhla.
21
U-Israyeli wasuka, wamisa itende lakhe ngaphambi kombhoshongo wase-Edere. 22 Kwathi u-
Israyeli esehlala kulelo zwe, uRubeni waya walala noBiliha isancinza sikayise; u-Israyeli
wakuzwa lokho. Amadodana kaJakobe ayeyishumi nambili. 23 Amadodana kaLeya
ayenguRubeni, izibulo likaJakobe, noSimeyoni, noLevi, noJuda, no-Isakare, noZebuloni. 24
Amadodana kaRaheli ayengoJosefa noBenjamini. 25 Amadodana kaBiliha incekukazi kaRaheli
ayengoDani noNafetali. 26 Amadodana kaZilipa incekukazi kaLeya ayengoGadi no-Asheri; lawo
angamadodana kaJakobe awazalelwa ePhadani Aramu. 27 UJakobe wafika ku-Isaka uyise
eMamre ngaseKiriyati Araba, okuyiHebroni, lapho o-Abrahama no-Isaka kade bebegogobele
khona. 28 Izinsuku zika-Isaka zaziyiminyaka eyikhulu namashumi ayisishiyagalombili. 29 U-
Isaka wagqibuka wafa, wabuthelwa kubantu bakhe, emdala esanelisiwe yizinsuku. O-Esawu
noJakobe amadodana akhe bammbela.

36
1
Lezi ziyizizukulwane zika-Esawu ongu-Edomi. 2 U-Esawu wazithathela abafazi kuwo
amadodakazi aseKhanani: u-Ada indodakazi ka-Eloni umHeti, no-Oholibama indodakazi ka-Ana,
indodakazi kaSibeyoni umHivi, 3 noBasemati indodakazi ka-Ishmayeli, udadewabo kaNebayoti. 4
U-Ada wamzalela u-Esawu u-Elifazi; uBasemati wazala uRehuweli; 5 u-Oholibama wazala
oJewushe, noJalamu, noKora; lawo angamadodana ka-Esawu azalelwa wona ezweni
laseKhanani. 6 U-Esawu wathatha omkakhe, namadodana akhe, namadodakazi akhe, nabantu
bonke bendlu yakhe, nemfuyo yakhe, nezinkomo zakhe, nempahla yonke yakhe owayeyizuze
ezweni laseKhanani, waya ezweni elikude nomfowabo uJakobe. 7 Ngokuba imfuyo yabo
yayiyinkulu kunokuba bahlale ndawonye, nezwe lokugogobala kwabo lalingenakubathwala
ngenxa yemfuyo yabo. 8 U-Esawu wahlala entabeni yaseSeyiri; u-Esawu ungu-Edomi.
9
Lezi ziyizizukulwane zika-Esawu uyise wabakwa-Edomi entabeni yaseSeyiri. 10 Nanka
amagama amadodana ka-Esawu: Ngu-Elifazi indodana ka-Ada umka-Esawu, noRehuweli
indodana kaBasemati umka-Esawu. 11 Amadodana ka-Elifazi ayengoThemani, no-Omari, noSefo,
noGathamu, noKenazi. 12 UThimna wayeyisancinza sika-Elifazi indodana ka-Esawu; wamzalela
u-Elifazi u-Amaleki; yilawo angamadodana ka-Ada umka-Esawu. 13 Lawa angamadodana
kaRehuweli: ngoNahati, noZera, noShama, noMiza; yilawo angamadodana kaBasemati umka-
Esawu. 14 Lawa angamadodana ka-Oholibama indodakazi ka-Ana, indodakazi kaSibeyoni, umka-
Esawu: wamzalela u-Esawu oJewushe, noJalamu, noKora. 15 Laba bangabanumzane bamadodana
ka-Elifazi izibulo lika-Esawu: Ngumnumzane uThemani, nomnumzane u-Omari, nomnumzane
uSefo, nomnumzane uKenazi, 16 nomnumzane uKora, nomnumzane uGathamu, nomnumzane u-
Amaleki; yilabo abangabanumzane abavela ku-Elifazi ezweni lakwa-Edomi; yilawo
angamadodana ka-Ada. 17 Lawa angamadodana kaRehuweli indodana ka-Esawu: ngumnumzane
uNahati, nomnumzane uZera, nomnumzane uShama, nomnumzane uMiza; yilabo
abangabanumzane abavela kuRehuweli ezweni lakwa-Edomi; yilawo angamadodana kaBasemati
umka-Esawu. 18 Lawa angamadodana ka-Oholibama umka-Esawu: ngumnumzane uJewushe,
nomnumzane uJalamu, nomnumzane uKora; yilabo abangabanumzane abavela ku-Oholibama
indodakazi ka-Ana umka-Esawu. 19 Yilawo angamadodana ka-Esawu; labo bangabanumzane
bawo; yena ungu-Edomi.
20
Lawa angamadodana kaSeyiri umHori ayakhe kulelo zwe: ngoLothani, noShobali, noSibeyoni,
no-Ana, 21 noDishoni, no-Eseri, noDishani; labo bangabanumzane abavela kuwo amaHori,
abantwana bakaSeyiri ezweni lakwa-Edomi. 22 Amadodana kaLothani ayengoHori noHemamu;
udadewabo kaLothani wayenguThimna. 23 Lawa angamadodana kaShobali: ngo-Alevani,
noManahati, no-Ebali, noShefo, no-Onamu. 24 Lawa angamadodana kaSibeyoni: ngo-Aya, no-
Ana; nguyena lowo Ana owafumana imithombo eshisayo ehlane, ezalusa izimbongolo
zikaSibeyoni uyise. 25 Laba bangabantwana baka-Ana: ngoDishoni no-Oholibama indodakazi ka-
Ana. 26 Lawa angamadodana kaDishoni: ngoHemdani, no-Eshibani, noJitrani, noKerani. 27 Lawa
angamadodana ka-Eseri: ngoBilihani, noZahawana, no-Akani. 28 Lawa angamadodana
kaDishani: ngo-Use no-Arana. 29 Laba bangabanumzane abavela kuwo amaHori: ngumnumzane
uLothani, nomnumzane uShobali, nomnumzane uSibeyoni, nomnumzane u-Ana, 30 nomnumzane
uDishoni, nomnumzane u-Eseri, nomnumzane uDishani; yilabo abangabanumzane abavela kuwo
amaHori, abanumzane ngabanumzane ezweni laseSeyiri.
31
Lawa angamakhosi ayebusa ezweni lakwa-Edomi, kungakabusi nkosi kwabakwa-Israyeli. 32
UBela indodana kaBeyori wabusa kwabakwa-Edomi; igama lomuzi wakhe laliyiDinihaba. 33
Wafa uBela; uJobabi indodana kaZera waseBosira waba yinkosi esikhundleni sakhe. 34 Wafa
uJobabi; uHushamu wasezweni labakwaThemani waba yinkosi esikhundleni sakhe. 35 Wafa
uHushamu; uHadadi indodana kaBedadi owanqoba abakwaMidiyani ethafeni lakwaMowabi
waba yinkosi esikhundleni sakhe; igama lomuzi wakhe laliyi-Aviti. 36 Wafa uHadadi; uSamla
waseMasireka waba yinkosi esikhundleni sakhe. 37 Wafa uSamla; uShawule waseRehoboti
ngasemfuleni waba yinkosi esikhundleni sakhe. 38 Wafa uShawule; uBali Hanani indodana ka-
Akibori waba yinkosi esikhundleni sakhe. 39 Wafa uBali Hanani indodana ka-Akibori; uHadari
waba yinkosi esikhundleni sakhe; igama lomuzi wakhe laliyiPhawu; igama lomkakhe
lalinguMehetabeli indodakazi kaMatiredi, indodakazi kaMezahabi. 40 Lawa angamagama
abanumzane abavela ku-Esawu ngemindeni yabo, nangezindawo zabo, nangamagama abo:
ngumnumzane uThimna, nomnumzane u-Aliva, nomnumzane uJeteti, 41 nomnumzane u-
Oholibama, nomnumzane u-Ela, nomnumzane uPhinoni, 42 nomnumzane uKenazi, nomnumzane
uThemani, nomnumzane uMibisari, 43 nomnumzane uMagidiyeli, nomnumzane u-Iramu; yilabo
abangabanumzane bakwa-Edomi ngokwakha kwabo ezweni elaliyifa labo; nguyena u-Esawu
uyise wabakwa-Edomi.

37
1
UJakobe wakha ezweni lokugogobala kukayise, ezweni laseKhanani. 2 Lokhu kuyindaba
kaJakobe. UJosefa eseneminyaka eyishumi nesikhombisa wawalusa umhlambi kayise
enabafowabo; engumfana nje wayekuwo amadodana kaBiliha nakuwo amadodana kaZilipa
omkayise; uJosefa waletha kuyise imibiko emibi ngabo. 3 Kepha u-Israyeli wathanda uJosefa
kakhulu kunabantwana bakhe bonke, ngokuba wayeyindodana yobuxhegu bakhe; wamenzela
ingubo enemikhono emide. 4 Abafowabo babona ukuthi uyise umthanda kunabafowabo bonke;
khona bamzonda, bengenakukhuluma kuye ngokuthula.
5
UJosefa waphupha iphupho, wabalandisa lona abafowabo; babelokhu bemzonda kakhulu. 6
Wathi kubo: "Ake nizwe leli phupho engiliphuphileyo. 7 Bhekani, besibopha izithungu ensimini;
naso-ke isithungu sami sivuka sima; nazo-ke izithungu zenu zisiphahla, zisikhothamela isithungu
sami." 8 Base bethi kuye abafowabo: "Impela uyakuba yinkosi yethu, usibuse na?" Bamzonda
kakhulu kunakuqala ngenxa yamaphupho akhe namazwi akhe. 9 Waphupha nelinye iphupho,
wabalandisa lona abafowabo, wathi: "Bhekani, ngiphuphe nelinye iphupho; bhekani-ke ilanga
nenyanga nezinkanyezi eziyishumi nanye kwangikhothamela." 10 Wabalandisa uyise
nabafowabo; uyise wamsola, wathi kuye: "Yiphupho lini leli oliphuphileyo na? Impela mina
nonyoko nabafowenu siyakuza, sikukhothamele emhlabathini na?" 11 Abafowabo baba nomhawu
ngaye, kepha uyise wawalonda lawa mazwi.
12
Abafowabo baya ukwalusa umhlambi kayise eShekemi. 13 U-Israyeli wathi kuJosefa:
"Abafowenu abawalusi umhlambi eShekemi na? Woza, ngiyakukuthuma kubo." Wathi kuye:
"Ngilapha." 14 Wayesethi kuye: "Hamba-ke, ubone ukuthi basahlezi kahle yini abafowenu
nomhlambi, uze ungibuyisele izwi." Wamthuma esuka esigodini saseHebroni, waze wafika
eShekemi. 15 Umuntu othile wamfumana ezulazula endle; lo muntu wambuza wathi: "Ufunani
na?" 16 Wathi: "Ngifuna abafowethu; ake ungitshele ukuthi baluselaphi." 17 Wathi lowo muntu:
"Basukile lapha, ngokuba ngabezwa bethi: ‘Asiye eDotayini.’"UJosefa walandela abafowabo,
wabafumana eDotayini. 18 Bambona esekude; engakasondeli kubo, bamenzela ugobe
lokumbulala. 19 Bakhulumisana omunye nomunye, bathi: "Bhekani, inyanga yamaphupho iyeza.
20
Ngalokho wozani, siyibulale, siyiphonse komunye wemigodi, bese sithi: ‘Isilwane esibi
siyidlile,’ sibone ukuthi azakuba yini amaphupho ayo." 21 URubeni wakuzwa, wamophula
esandleni sabo ngokuthi: "Asingambulali." 22 URubeni wathi kubo: "Ningachithi gazi; mphonseni
kulo mgodi osehlane, ningabeki isandla kuye," ukuba amophule esandleni sabo, ambuyisele
kuyise.
23
Kwathi uJosefa esefike kubafowabo, bamkhumula ingubo yakhe, leyo ngubo enemikhono
emide ayeyigqokile. 24 Bamthatha, bamphonsa emgodini; umgodi wawungenalutho, kungekho
manzi kuwo. 25 Bahlala phansi ukuba badle isinkwa; baphakamisa amehlo abo, babona; bheka,
kwafika ihele labakwa-Ishmayeli livela kwaGileyadi, linamakamela alo ethwele inhlaka
nebhalisamu nemure, likwewusela eGibithe. 26 Wayesethi uJuda kubafowabo: "Kuyakusizani,
uma simbulala umfowethu, sifihle igazi lakhe, na? 27 Wozani sithengise ngaye kwabakwa-
Ishmayeli, isandla senu singabi phezu kwakhe, ngokuba ungumfowethu, uyinyama yethu."
Abafowabo bamlalela. 28 Kwase kudlula abathengi bakwaMidiyani; bamdonsa uJosefa,
bamkhuphula emgodini, bathengisa ngoJosefa kwabakwa-Ishmayeli ngezinhlamvu
ezingamashumi amabili zesiliva. Labo-ke bamusa uJosefa eGibithe. 29 URubeni wabuyela
emgodini; bheka, uJosefa wayengasekho emgodini; waklebhula izingubo zakhe. 30 Wayesebuyela
kubafowabo, ethi: "Akasekho umntwana; mina-ke ngizakushonaphi na?"
31
Base bethatha ingubo kaJosefa, bahlaba impongo, bacwilisa ingubo egazini. 32 Bathumela leyo
ngubo enemikhono emide, bayiyisa kuyise, bathi: "Siyitholile lena; ake ubone, uma le ngubo
ingeyendodana yakho yini, noma akusiyo na?" 33 Wayibona, wathi: "Yiyo ingubo yendodana
yami; isilwane esibi simdlile; yebo, uJosefa udatshuliwe nokudatshulwa." 34 UJakobe
wayeseklebhula izingubo zakhe, wafaka indwangu yamasaka okhalweni lwakhe, walilela
indodana yakhe izinsuku eziningi. 35 Onke amadodana akhe nawo onke amadodakazi akhe asuka
ukuyomduduza, kepha wala ukududuzwa, wathi: "Ngiyakwehla, ngiye endodaneni yami
endaweni yabafileyo ngilila." Uyise wamlilela-ke. 36 AbakwaMidiyani bathengisa ngaye eGibithe
kuPotifari, inceku kaFaro, induna yabalindi bakhe.

38
1
Kwathi ngaleso sikhathi uJuda wasuka kubafowabo, wehla, waya kumuntu wase-Adulamu
ogama lakhe linguHira. 2 UJuda wabona lapho indodakazi yomuntu waseKhanani ogama lakhe
linguShuwa; wayithatha, wangena kuyo. 3 Yakhulelwa, yazala indodana, yaqamba igama layo
ngokuthi u-Eri. 4 Yabuye yakhulelwa, yazala indodana, yaqamba igama layo ngokuthi u-Onani. 5
Yabuye yazala futhi indodana, yaqamba igama layo ngokuthi uShela; uJuda wayeseKesibi
ekuyizaleni kwayo. 6 UJuda wamthathela u-Eri izibulo lakhe umfazi ogama lakhe linguTamari. 7
U-Eri izibulo likaJuda wayemubi emehlweni kaJehova; uJehova wambulala. 8 UJuda wathi ku-
Onani: "Yiya kumkamfowenu, umngene, umvusele umfowenu inzalo." 9 U-Onani wayekwazi
ukuthi inzalo ayiyikuba ngeyakhe; kwathi nxa engena kumkamfowabo, wachitha emhlabathini
ukuba angamniki umfowabo inzalo. 10 Kwaba kubi emehlweni kaJehova lokho akwenzileyo;
wambulala naye futhi. 11 UJuda wayesethi kuTamari umalokazana wakhe: "Hlala ungumfelokazi
endlini kayihlo, aze akhule uShela indodana yami," ngokuba wathi: "Ukuba angafi
njengabafowabo." UTamari waya wahlala kwabo.
12
Emva kwezinsuku eziningi yafa indodakazi kaShuwa umkaJuda; eseduduzekile uJuda
wakhuphuka, waya kubo abagundi bezimvu zakhe eThimna, yena kanye nomhlobo wakhe uHira
wase-Adulamu. 13 Kwatshelwa uTamari ukuthi: "Bheka, uyihlozala uyakhuphukela eThimna
ukuyogunda izimvu zakhe." 14 Wayesekhumula izingubo zakhe zobufelokazi, wagubuzela,
wazimboza, wahlala esangweni lase-Enayimi ngasendleleni eya eThimna, ngokuba wabona
ukuthi uShela usekhulile, engamnikwa nokho abe ngumkakhe. 15 UJuda esembona wacabanga
ukuthi uyisifebe, ngokuba wayegubuzele ubuso. 16 Waphambukela kuye endleleni, wathi: "Woza,
ake ngingene kuwe," ngokuba wayengazi ukuthi ungumalokazana wakhe. Wathi: "Uyakungiphani
ukuba ungene kimi na?" 17 Wayesethi: "Mina ngizakukuthumela izinyane lembuzi
elisemhlambini." Wathi: "Uzakunginika isibambiso, uze ulithume, na?" 18 Wathi: "Ngikuphe
sibambiso sini na?" Wathi: "Indandatho yakho, nentambo yakho, nodondolo lwakho
olusesandleni sakho." Wamupha, wangena kuye; wakhuliselwa nguye. 19 Wasuka, wahamba,
wakhumula iveli lakhe, wembatha izingubo zakhe zobufelokazi. 20 UJuda wathuma izinyane
lembuzi ngesandla somhlobo wakhe wase-Adulamu ukuba athathe isibambiso esandleni
sowesifazane, kepha akamfumananga. 21 Wayesebuza abantu bendawo yakhe, wathi: "Siphi
isifebe esasise-Enayimi ngasendleleni na?" Bathi: "Akuzange kube khona isifebe lapha." 22
Wayesebuyela kuJuda, ethi: "Angisifumananga; nabantu bendawo bathi: ‘Akuzange kube khona
isifebe lapha.’" 23 Wathi uJuda: "Masizithathele sona, funa sibe nehlazo; bheka, ngithume leli
zinyane, kepha awusifumananga."
24
Kwathi emva kwezinyanga ezintathu uJuda watshelwa ukuthi: "UTamari umalokazana wakho
ufebile; bheka, futhi ukhulelwe ngokufeba kwakhe." UJuda wathi: "Mletheni, ashiswe." 25
Eselethiwe wathumela kuyisezala, wathi: "Ngikhuleliswe yile ndoda engumnini walezi zinto."
Wathi futhi: "Ake ubone ukuthi ngokukabani le ndandatho, nale ntambo, nalolu dondolo na?" 26
Wakuvuma uJuda, wathi: "Ulungile kunami, njengokuba ngingamnikanga uShela indodana
yami." Akabange esamazi futhi. 27 Kwathi ngesikhathi sokubeletha kwakhe, bheka, ngamawele
asesiswini sakhe. 28 Kwathi esabeletha, omunye wakhipha isandla; umbelethisi wathatha,
wabopha esandleni sakhe ngentambo ebomvu, wathi: "Lo uphume kuqala." 29 Kwathi ukuba
afinyeze isandla sakhe, nangu umfowabo ephuma; wathi: "Ufuzuleleni na?" Ngalokho igama
lakhe laqanjwa ngokuthi uPheresi. 30 Ngasemuva waphuma umfowabo owayenentambo ebomvu
esandleni sakhe; igama lakhe lathiwa uZera.

39
1
UJosefa wehliselwa eGibithe; uPotifari inceku kaFaro, induna yemilindankosi, owaseGibithe,
wamthenga esandleni sabakwa-Ishmayeli ababemehlisele khona. 2 UJehova wayenaye uJosefa,
waba ngumuntu onenhlanhla; wayesendlini yenkosi yakhe yaseGibithe. 3 Inkosi yakhe yabona
ukuthi uJehova unaye nokuthi konke akwenzayo uJehova wakuphumelelisa esandleni sakhe. 4
UJosefa wafumana umusa emehlweni ayo, wayikhonza; yambeka abe yinduna phezu kwendlu
yayo, nakho konke okwayo yakunikela esandleni sakhe. 5 Kusukela kuleso sikhathi embeke
ngaso ukuba abe yinduna phezu kwendlu yayo naphezu kwakho konke okwayo, uJehova
wabusisa indlu yowaseGibithe ngenxa kaJosefa; isibusiso sikaJehova sasikukho konke okwayo
endlini nasensimini. 6 Yashiya konke okwayo esandleni sikaJosefa; yayingazi lutho olwayo,
ukudla eyakudlayo kuphela. UJosefa wayengumgembeleza, eyigeza.
7
Kwathi emva kwalezo zinto umkankosi yakhe waphonsa amehlo kuJosefa, wathi: "Lala nami." 8
Kepha wala, wathi kumkankosi yakhe: "Bheka, inkosi yami ayikwazi enginakho endlini, inikele
konke okwayo esandleni sami; 9 ayinkulu kunami kule ndlu; futhi ayingigodlelanga lutho
ngaphandle kwakho kuphela, ngokuba ungumkayo; pho, ngingenza kanjani lobo bubi obungaka,
ngone kuNkulunkulu na?" 10 Kwathi esakhuluma kuJosefa izinsuku ngezinsuku, akamlalelanga
ukuba alale naye, nokuba abe naye. 11 Kwathi ngosuku lumbe engena endlini ukuyokwenza
imisebenzi yakhe, kungekho lapho phakathi noyedwa owendlu, 12 wambamba ngengubo yakhe,
wathi: "Lala nami;" kepha washiya ingubo yakhe esandleni sakhe, wabaleka, wagijimela phandle.
13
Kwathi esebone ukuthi ushiyile ingubo esandleni sakhe, wabaleka, 14 wabiza abantu bendlu,
wakhuluma kubo, wathi: "Bonani usilethele umHeberu ukuba adlale ngathi; uze kimina ukuba
alale nami; ngamemeza ngezwi elikhulu; 15 wathi ezwa ukuthi ngiphakamisa izwi lami
ngimemeza, washiya ingubo yakhe kimi, wabaleka, wagijimela phandle." 16 Wayesebeka le
ngubo kuye, yaze yafika ekhaya inkosi yakhe. 17 Wakhuluma kuyo wona lawa mazwi, wathi: "Le
nceku engumHeberu, osilethele yona, ize kimi ukuba idlale ngami; 18 kwathi ukuba
ngiphakamise izwi lami ngimemeza, yashiya ingubo yayo kimi, yabalekela phandle."
19
Yathi inkosi yakhe isizwe amazwi omkayo ayewakhulume kuyo, ethi: "Yenze njalo kimi inceku
yakho," lwavutha ulaka lwayo. 20 Inkosi kaJosefa yamthatha, yamfaka etilongweni, indawo lapho
iziboshwa zenkosi zaziboshwa khona; waba khona etilongweni. 21 Kepha uJehova wayenaye
uJosefa, wamupha umusa, wamenzela ububele emehlweni omlindi wetilongo. 22 Umlindi
wetilongo wanikela esandleni sikaJosefa zonke iziboshwa ezazisetilongweni; konke ezazikwenza
khona nguyena owayekwenza. 23 Umlindi wetilongo akabanga esabheka lutho olusesandleni
sakhe, ngokuba uJehova wayenaye, nalokho akwenzayo uJehova wakuphumelelisa.

40
1
Kwathi emva kwalezo zinto umphathizitsha wenkosi yaseGibithe nomphekizinkwa wayo bona
enkosini yabo, inkosi yaseGibithe. 2 UFaro wazithukuthelela lezo zinceku zakhe zombili, induna
yabaphathizitsha nenduna yabaphekizinkwa. 3 Wazibeka ukuba zilindwe endlini yenduna
yemilindankosi etilongweni, indawo lapho wayeboshwe khona uJosefa. 4 Induna yemilindankosi
yamyala ngazo uJosefa ukuba azibheke; wazikhonza; zazisekulindweni izinsukwana.
5
Baphupha iphupho bobabili, kwaba yilowo nalowo iphupho lakhe ngabusuku bunye, yilowo
nalowo ngokokuchazwa kwephupho lakhe, umphathizitsha nomphekizinkwa wenkosi
yaseGibithe, ababeboshwe etilongweni. 6 UJosefa wangena kubo ekuseni, wabona ukuthi
badabukile. 7 Wayesebuza izinceku zikaFaro ezazinaye zilindwe endlini yenkosi yakhe, ethi:
"Ubuso benu budabukeleni namuhla na?" 8 Bathi kuye: "Siphuphe iphupho, akakho ongalichaza."
UJosefa wathi kubo: "Ukuchaza akusikho okukaNkulunkulu na? Ake ningilandise lona." 9 Induna
yabaphathizitsha yayisimlandisa uJosefa iphupho layo, yathi kuye: "Ephusheni lami kwakukhona
umvini phambi kwami; 10 emvinini kwakukhona amagatsha amathathu; wahluma qede
wakhahlela, amahlukuzo awo athela izithelo. 11 Indebe kaFaro yayisesandleni sami; ngathatha
izithelo zomvini, ngazikhamela endebeni kaFaro, indebe ngayinikela esandleni sikaFaro." 12
Wathi uJosefa kuye: "Nakho ukuchazwa kwalo: lawo magatsha amathathu ayizinsuku ezintathu;
13
zingakadluli izinsuku ezintathu, uFaro uzakuphakamisa ikhanda lakho, akubuyisele
esikhundleni sakho; uzakunikela indebe esandleni sikaFaro njengokwenza kwakho kwakuqala,
lapho wawungumphathizitsha wakhe. 14 Kepha ngikhumbule, nxa usuhlezi kahle, ungenzele
umusa, ungibike kuFaro, ungikhiphe kule ndlu. 15 Ngokuba ngebiwa nokwebiwa ezweni
lamaHeberu, nalapha futhi angenzanga lutho ukuba bangifake emgodini." 16 Kwathi induna
yabaphekizinkwa ibona ukuthi lokho kuchazwa kwakukuhle, yathi kuJosefa: "Nakimi ephusheni
lami kwakungathi kukhona amaqoma amathathu esinkwa esimhlophe ekhanda lami. 17 Eqomeni
elingaphezulu kwakukhona izinhlobo zonke zokudla kukaFaro; izinyoni zazikudla eqomeni
eliphezu kwekhanda lami." 18 UJosefa waphendula wathi: "Lokhu kungukuchazwa kwalo: lawo
maqoma amathathu ayizinsuku ezintathu; 19 zingakadluli izinsuku ezintathu, uFaro
uzakuphakamisa ikhanda lakho, alisuse kuwe, akuphanyeke emthini; izinyoni ziyakudla inyama
yakho, ziyisuse kuwe."
20
Kwathi ngosuku lwesithathu, usuku lokuzalwa kukaFaro, wazenzela izinceku zakhe zonke
idili, waphakamisa ikhanda lenduna yabaphathizitsha nelenduna yabaphekizinkwa phakathi
kwezinceku zakhe. 21 Wayibuyisela induna yabaphathizitsha esikhundleni sayo, waze wanikela
indebe esandleni sikaFaro; 22 kepha wayiphanyeka induna yabaphekizinkwa, njengalokho
ebebachazele uJosefa. 23 Nokho induna yabaphathizitsha ayamkhumbula uJosefa, yamkhohlwa.

41
1
Kwathi ngasekupheleni kweminyaka emibili waphupha uFaro; bheka, wayemi ngasemfuleni. 2
Bheka, kwakhuphuka emfuleni izithole eziyisikhombisa ezibukeka kahle, zikhuluphele, zadla
emhlangeni. 3 Nazo ezinye izithole eziyisikhombisa zenyuka emfuleni emva kwazo, zibukeka
kabi, zondile; zema kwezinye izithole ogwini lomfula. 4 Izithole ezibukeka kabi ezondileyo zadla
izithole ezibukeka kahle ezikhulupheleyo. Wayesephaphama uFaro. 5 Walala ubuthongo,
waphupha ngokwesibili; bheka, kwahluma izikhwebu eziyisikhombisa ezeleni linye, zibhoxile,
zizinhle. 6 Bheka, nezikhwebu eziyisikhombisa ezincane, ezihamukile ngumoya
wasempumalanga, zahluma emva kwazo. 7 Izikhwebu ezincane zagwinya izikhwebu
ezibhoxileyo ezipheleleyo. Wayesephaphama uFaro; bheka, kwakuyiphupho. 8 Kwathi ekuseni
umoya wakhe wakhathazeka; wathuma wabiza izanusi zonke zaseGibithe nezihlakaniphi zonke
zalo; uFaro wazilandisa iphupho lakhe; kepha akubangakho ongachazela wona uFaro.
9
Yayisikhuluma induna yabaphathizitsha kuFaro, ithi: "Ngiyakhumbula namuhla amacala ami. 10
UFaro wathukuthelela izinceku zakhe, wangifaka ukuba ngilindwe endlini yenduna
yemilindankosi, mina kanye nenduna yabaphekizinkwa. 11 Saphupha iphupho ngabona lobo
busuku mina naye. Saphupha, kwaba yilowo nalowo ngokokuchazwa kwephupho lakhe. 12
Kwakukhona nathi lapho insizwa, umHeberu, inceku yenduna yemilindankosi; sayilandisa yona,
yasichazela amaphupho ethu, yachazela, kwaba yilowo nalowo ngokwephupho lakhe. 13 Kwathi
njengalokho yasichazela, kwaba njalo; mina inkosi yangibuyisela esikhundleni sami, yena
yamphanyeka." 14 UFaro wayesethuma wambiza uJosefa; bashesha bamkhipha emgodini;
waphucula, waphendulela ezinye izingubo, wangena kuFaro. 15 Wayesethi uFaro kuJosefa:
"Ngiphuphe iphupho, kakho ongalichaza; sengizwe kuthiwa ngawe, lapho ulizwa iphupho,
ungalichaza." 16 UJosefa wamphendula uFaro, wathi: "Akukimi lokho; uNkulunkulu
uzakumphendula kahle uFaro."
17
UFaro wakhuluma kuJosefa, wathi: "Ephusheni lami, bheka, ngangimi ogwini lomfula; 18
bheka, kwase kukhuphuka emfuleni izithole eziyisikhombisa ezikhulupheleyo ezibukeka kahle;
zadla emhlangeni. 19 Nazo ezinye izithole eziyisikhombisa zenyuka emva kwazo, zizacile,
zibukeka kabi kakhulu, zondile, engingazange ngibone ezimbi njengalezo ezweni lonke
laseGibithe. 20 Izithole ezondileyo ezimbi zadla eziyisikhombisa zokuqala ezikhulupheleyo. 21
Lapho sezingene eziswini zazo, akwabonakala ukuthi zingene eziswini zazo; zazisabukeka
zizimbi njengakuqala. Ngase ngiphaphama. 22 "Futhi ngabona ephusheni lami, bheka, kwahluma
izikhwebu eziyisikhombisa ezeleni linye, ziphelele, zizinhle. 23 Bheka, nezikhwebu
eziyizintshwamu ezincane, ezihamukile ngumoya wasempumalanga, zahluma emva kwazo. 24
Izikhwebu ezincane zagwinya izikhwebu eziyisikhombisa ezinhle; ngakulandisa izanusi, kepha
sasingekho esingangazisa khona." 25 UJosefa wayesethi kuFaro: "Iphupho likaFaro linye; lokho
uNkulunkulu azakukwenza umazise uFaro khona. 26 Izithole eziyisikhombisa ezinhle
ziyiminyaka eyisikhombisa; izikhwebu eziyisikhombisa ezinhle ziyiminyaka eyisikhombisa;
iphupho linye. 27 Izithole ezondileyo ezimbi ezakhuphuka emva kwazo ziyiminyaka
eyisikhombisa kanye nezikhwebu ezincane, ezihamukile ngumoya wasempumalanga;
ziyiminyaka eyisikhombisa yendlala. 28 "Yikho lokhu engikushilo kuFaro: lokho uNkulunkulu
asezakukwenza ukubonakalisile kuFaro. 29 Bheka, kuyeza iminyaka eyisikhombisa yenala enkulu
ezweni lonke laseGibithe. 30 Emva kwayo iyakuvela iminyaka eyisikhombisa yendlala;
iyakukhohlakala inala yonke ezweni laseGibithe; indlala iyakuliqeda izwe. 31 Inala ayiyukwaziwa
ezweni ngenxa yendlala elandelayo, ngokuba iyakuba nzima kakhulu. 32 Lokhu ukuthi iphupho
liphindwe kabili kuFaro, kungokuba le nto inqunywe nguNkulunkulu, futhi uNkulunkulu
uyakushesha ayenze.
33
"Manje uFaro makakhethe umuntu oqaphelayo ohlakaniphileyo, ambeke phezu kwezwe
laseGibithe. 34 Makenze njalo uFaro, abeke ababonisi phezu kwezwe, bahlukanise okwesihlanu
kwezwe laseGibithe ngeminyaka eyisikhombisa yenala. 35 Mababuthe konke ukudla kwale
minyaka emihle ezayo, banqwabele phansi kwesandla sikaFaro amabele emizini, abe ngukudla,
bawalonde. 36 Lokhu kudla kuyakubekelelwa izwe ngenxa yeminyaka eyisikhombisa yendlala
eyakuba khona ezweni laseGibithe ukuba izwe lingabhubhi ngendlala." 37 Leli zwi laba lihle
emehlweni kaFaro nasemehlweni ezinceku zakhe zonke. 38 Wayesethi uFaro ezincekwini zakhe:
"Singamthola yini umuntu onjalo, onoMoya kaNkulunkulu, na?" 39 Wathi uFaro kuJosefa:
"Njengokuba uNkulunkulu ekwazise wena konke lokhu, akakho oqaphelayo ohlakaniphileyo
njengawe. 40 Wena uzakuba phezu kwendlu yami; ngezwi lakho bayakuhlelwa bonke abantu
bami; esihlalweni sobukhosi kuphela ngiyakuba mkhulu kunawe." 41 Wathi uFaro kuJosefa:
"Bheka, sengikubeke phezu kwezwe lonke laseGibithe." 42 UFaro wayesekhumula indandatho
yakhe esandleni sakhe, wayifaka esandleni sikaJosefa, wamembathisa izingubo zelineni
elicolekileyo, wafaka umnaka wegolide entanyeni yakhe. 43 Wamkhwelisa enqoleni yesibili emva
kwakhe; bamemeza phambi kwakhe, bathi: "Guqani!" Wambeka phezu kwezwe lonke
laseGibithe. 44 UFaro wathi kuJosefa: "NginguFaro; ngaphandle kwakho akuyikuphakamisa
muntu isandla sakhe nonyawo lwakhe ezweni lonke laseGibithe." 45 UFaro waqamba igama
likaJosefa ngokuthi uSafenati Phaneya; wamnika u-Asenati indodakazi kaPotifera umpristi wase-
Oni abe ngumkakhe. UJosefa waphuma, wahamba izwe lonke laseGibithe.
46
UJosefa wayeneminyaka engamashumi amathathu mhla emi phambi kukaFaro inkosi
yaseGibithe. UJosefa waphuma ebusweni bukaFaro, wahamba izwe lonke laseGibithe. 47
Ngeminyaka eyisikhombisa yenala umhlaba wathela kakhulu. 48 Waqoqa konke ukudla kwale
minyaka eyisikhombisa eyayisezweni laseGibithe, wabekelela ukudla emizini; ukudla
kwamasimu azungeza yilowo nalowo muzi wakubekelela kuwo. 49 UJosefa waqongelela amabele
angangesihlabathi solwandle, okuningi kakhulu, waze wayeka ukubala, ngokuba
kwakungenakubalwa. 50 UJosefa wazalelwa amadodana amabili, kungakafiki mnyaka wendlala,
amzalela wona u-Asenati indodakazi kaPotifera umpristi wase-Oni. 51 UJosefa waqamba igama
lezibulo ngokuthi uManase, wathi: "Ngokuba uNkulunkulu ungenze ngikhohlwe konke
ukuhlupheka kwami nendlu yonke kababa." 52 Igama lowesibili waliqamba ngokuthi u-Efrayimi,
wathi: "Ngokuba uNkulunkulu ungenze ngizale ezweni lokuhlupheka kwami." 53 Iminyaka
eyisikhombisa yenala eyayisezweni laseGibithe yaphela. 54 Iminyaka eyisikhombisa yendlala
yayisiqala ukufika, njengalokho eshilo uJosefa; kwakuyindlala emazweni onke; kepha ezweni
lonke laseGibithe ukudla kwakukhona. 55 Kwathi selilambile izwe lonke laseGibithe, abantu
bakhala kuFaro ngokudla; uFaro wathi kubo bonke abaseGibithe: "Yanini kuJosefa; lokho
anitshela khona, nikwenze." 56 Indlala yayisebusweni bezwe lonke; uJosefa wavula zonke
izinqolobane, wathengisela abaseGibithe; indlala yayinzima ezweni laseGibithe. 57 Amazwe onke
afika kuJosefa eGibithe ukuyothenga amabele, ngokuba indlala yayinzima emhlabeni wonke.

42
1
UJakobe esezwile ukuthi kukhona amabele eGibithe, uJakobe wathi emadodaneni akhe:
"Nibukanelani na?" 2 Wathi: "Bhekani, ngizwile ukuthi kukhona amabele eGibithe; yehlani, niye
lapho, nisithengele khona, ukuze siphile, singafi." 3 Base behla abafowabo bakaJosefa
abayishumi, baya kuthenga amabele eGibithe. 4 Kepha uBenjamini umfowabo kaJosefa uJakobe
akamthumanga nabafowabo, ngokuba wathi: "Angahle ehlelwe ngokubi." 5 Ayesefika amadodana
ka-Israyeli ukuthenga phakathi kwalabo ababefika, ngokuba kwakukhona indlala ezweni
laseKhanani. 6 UJosefa wayengumbusi ezweni; nguyena owathengisela abantu bonke bezwe;
bafika-ke abafowabo bakaJosefa, bamkhothamela ngobuso phansi.
7
UJosefa wabona abafowabo, wabazi, kepha wazishaya ongabaziyo kubo, wakhuluma kalukhuni
kubo, wathi kubo: "Nivelaphi na?" Bathi: "Sivela ezweni laseKhanani, size ukuthenga ukudla." 8
UJosefa wabazi abafowabo, kepha bona abamazanga. 9 UJosefa wayesekhumbula amaphupho
awaphupha ngabo, wathi kubo: "Niyizinhloli; nize ukubona ubuze bezwe." 10 Bathi kuye: "Qha,
nkosi, izinceku zakho zize ukuba zithenge ukudla. 11 Sonke singamadodana andodanye;
singabantu abaqotho; izinceku zakho aziyizo izinhloli." 12 Wathi kubo: "Qhabo, nize ukubona
ubuze bezwe." 13 Base bethi kuye: "Thina zinceku zakho ziyizelamani eziyishumi nambili,
amadodana andodanye ezweni laseKhanani; bheka, encane ikubaba manje, enye ayisekho." 14
UJosefa wathi kubo: "Yikho lokhu engikushilo kini ukuthi niyizinhloli. 15 Niyakuvivinywa
ngalokhu, kuphila kukaFaro, aniyikumuka lapha, kuphela uma umfowenu omncane efika lapha. 16
Thumani omunye wenu, amlande umfowenu; nizakuboshwa, ukuze kuvivinywe amazwi enu
ukuba iqiniso likini yini; uma kungenjalo, kuphila kukaFaro, niyizinhloli." 17 Wababutha bonke
ukuba balindwe izinsuku ezintathu. 18 Wayesethi kubo uJosefa ngosuku lwesithathu: "Yenzani
lokhu, niphile, ngokuba ngiyamesaba uNkulunkulu. 19 Uma ningabaqotho, makuboshwe omunye
wabafowenu endlini yokulindwa kwenu, kepha hambani nina, nibuyele namabele endlala
yezindlu zenu, 20 nilethe umfowenu omncane kimi, kuqiniswe amazwi enu, nize ningafi." Benze
njalo.
21
Base bethi omunye komunye: "Impela sitholile icala ngomfowethu, njengokuba sabona usizi
lwenhliziyo yakhe, esincenga, kasamlalela; ngalokho lolu sizi selufike phezu kwethu." 22
URubeni wabaphendula wathi: "Angikhulumanga yini kini ukuthi: ‘Ningamoni umfana,’
kanangilalela, na? Bhekani, ngalokho seliyabizwa igazi lakhe." 23 Babengazi ukuthi uJosefa
uyabezwa, ngokuba kwakukhona ihumusha phakathi kwabo. 24 Wabafulathela, wakhala; wabuye
waphendukela kubo, wakhuluma nabo; wayesemsusa uSimeyoni phakathi kwabo, wambopha
phambi kwamehlo abo. 25 UJosefa wayeseyala ukuba amasaka abo agcwaliswe ngamabele,
kubuyiselwe imali yalowo nalowo esakeni lakhe, baphiwe umphako endleleni; kwenziwa njalo
kubo. 26 Base bethwesa izimbongolo zabo ngamabele abo, bamuka khona. 27 Kwathi omunye
evula isaka lakhe ukuba ayinike imbongolo yakhe ukudla endlini yezihambi, wabona imali yakhe;
bheka, yayisemlonyeni wesaka lakhe. 28 Wayesethi kubafowabo: "Imali yami ibuyiselwe;
bhekani, isesakeni lami." Baphela amandla, babhekana omunye nomunye bethuthumela, bethi:
"Kuyini lokhu uNkulunkulu asenzele khona na?"
29
Bafika-ke kuJakobe uyise ezweni laseKhanani, bamtshela konke okubehleleyo, bathi: 30 "Lowo
muntu, inkosi yezwe, ukhulume kalukhuni kithina, wasishaya izinhloli zezwe. 31 Sase sithi kuye:
‘Singabaqotho; asiyizo izinhloli; 32 siyizelamani eziyishumi nambili, amadodana kababa; enye
ayisekho, encane ikubaba ezweni laseKhanani manje.’ 33 "Lowo muntu, inkosi yezwe, wayesethi
kithi: ‘Ngalokhu ngiyokwazi ukuthi ningabaqotho: shiyani kimi omunye wabafowenu, niphathele
indlala yezindlu zenu ukudla, nimuke, 34 nilethe kimi umfowenu omncane; yikhona ngiyokwazi
ukuthi aniyizo izinhloli kepha ningabaqotho, ngininike umfowenu, nihambe izwe.’" 35 Kwathi
sebethulula amasaka abo, bheka, isikhwama semali salowo nalowo sasisesakeni lakhe; lapho
bona noyise bebona izikhwama zabo zemali, bashaywa luvalo. 36 UJakobe uyise wayesethi kubo:
"Niyangaphuca abantwana bami; uJosefa akasekho, noSimeyoni kasekho; senizakuthatha
noBenjamini; kuphezu kwami konke lokhu." 37 Wayesekhuluma uRubeni kuyise, ethi: "Bulala
amadodana ami omabili, uma ngingambuyiseli kuwe; mnikele esandleni sami, ngizakumbuyisela
kuwe." 38 Wathi: "Indodana yami ayiyikwehla nani, ngokuba umfowabo ufile, kusele yona
yodwa; uma yehlelwa yingozi endleleni eniyihambayo, niyakwehlisela endaweni yabafileyo
izimvi zami ngosizi."

43
1
Indlala yayinzima ezweni. 2 Kwathi sebeqedile amabele ababewathengile eGibithe, uyise wathi
kubo: "Buyelani, nisithengele ukudlana." 3 UJuda wakhuluma kuye, wathi: "Lowo muntu
wagoma nokugoma kithina, wathi: ‘Aniyikubona ubuso bami, kuphela uma umfowenu enani.’ 4
Uma umthuma nathi umfowethu, sizakwehla, sithenge ukudla; 5 kepha uma ungamthumi,
asizukwehla, ngokuba lowo muntu wathi kithina: ‘Aniyikubona ubuso bami, kuphela uma
umfowenu enani.’" 6 Wayesethi u-Israyeli: "Ningenzeleni okubi ngokumtshela lowo muntu
ukuthi ukhona omunye umfowenu na?" 7 Bathi: "Wabuza nokubuza lowo muntu ngathi
nangezihlobo zethu, wathi: ‘Usekhona uyihlo na? Ninomunye umfowenu na?’ Samlandisa
njengalawa mazwi; sasingakwazi kanjani ukuba uyakuthi: ‘Yehlisani umfowenu,’ na?" 8 UJuda
wathi ku-Israyeli uyise: "Thuma umfana nami, size sisuke, sihambe ukuba siphile, singafi, thina
nawe kanye nezingane zethu. 9 Mina ngiyakuba yisibambiso sakhe; uzakumbiza esandleni sami;
uma ngingambuyiseli kuwe, ngimbeke ebusweni bakho, ngiyakuba necala kuze kube phakade, 10
ngokuba uma sasingalibalanga, impela nga sesibuyile manje ngokwesibili."
11
Uyise u-Israyeli wayesethi kubo: "Uma kunjalo, yenzani lokhu; phathani izithelo
ezikhethiweyo zezwe emasakeni enu, nimehlisele lowo muntu isipho, ibhalisamu eliyingcosana,
nezinyosi eziyingcosana, namakha, nemure, namapisitakiyo, nama-alimondi, 12 niphathe
esandleni senu imali iphindwe kabili; naleyo mali eyabuyiselwa emilonyeni yamasaka enu,
niyihambise ngesandla senu; mhlawumbe kwenzeka iphutha. 13 Nithathe futhi umfowenu, nisuke
nibuyele kulowo muntu. 14 UNkulunkulu uSomandla aniphe umusa ebusweni balowo muntu,
ukuze anikhululele umfowenu lowo omunye kanye noBenjamini; kepha mina, uma ngaphucwa
abantwana, ngiyaphucwa."
15
Amadoda ayesethatha leso sipho nemali ephindwe kabili esandleni sawo kanye noBenjamini,
asuka ehlela eGibithe, ema ebusweni bukaJosefa. 16 UJosefa esembona uBenjamini enabo, wathi
kophezu kwendlu yakhe: "Ngenisa lawa madoda endlini, uhlabe, ulungise, ngokuba lawa madoda
ayakudla nami emini." 17 Lowo muntu wenza njengalokho eshilo uJosefa; inceku yawangenisa
amadoda endlini kaJosefa. 18 Amadoda esaba, ngokuba angeniswa endlini kaJosefa, athi:
"Singeniswe lapha ngenxa yemali eyabuyiselwa emasakeni ethu kuqala ukuba asizume, asehlele,
asenze izigqila kanye nezimbongolo zethu." 19 Asondela-ke encekwini yendlu kaJosefa,
akhuluma kuyo ngasemnyango wendlu, 20 athi: "O nkosi, ngempela safika kuqala ukuthenga
ukudla. 21 Kwathi sesifike endlini yezihambi, savula amasaka ethu; bheka, imali yalowo nalowo
yayisemlonyeni wesaka lakhe, imali yethu ngokulinganiswa kwayo; sesiyibuyisile ngesandla
sethu. 22 Sehle nenye imali esandleni sethu ukuba sithenge ukudla; asazi ukuthi ngubani
owayifaka imali yethu emasakeni ethu." 23 Yayisithi kubo: "Ukuthula makube kinina; ningesabi;
uNkulunkulu wenu noNkulunkulu kayihlo uniphe igugu emasakeni enu; imali yenu ngayithola."
Yaphumisa uSimeyoni, yamletha kubo. 24 Inceku yayisingenisa amadoda endlini kaJosefa,
yawanika amanzi; ageza izinyawo zawo; yazipha izimbongolo zawo ukudla. 25 Alungisela
uJosefa isipho, ezofika emini, ngokuba ayezwile ukuthi ayakudla khona.
26
UJosefa esefike ekhaya, ayisa kuye endlini isipho esasisesandleni sawo, akhothamela phansi
kuye. 27 Wabuza impilo yabo, wathi: "Usaphila uyihlo, ixhegu enanikhuluma ngalo, na?
Usekhona na?" 28 Bathi-ke: "Inceku yakho ubaba isaphila, isekhona." Bamkhothamela,
bamkhonza. 29 Wayesephakamisa amehlo akhe, wambona uBenjamini umfowabo, indodana
kanina, wathi: "Nguye lo ongumfowenu omncane enakhuluma ngaye kimi na?" Wathi:
"UNkulunkulu makabe nomusa kuwe ndodana yami." 30 Wakhawuleza uJosefa, ngokuba
ngaphakathi kwakhe kwavutha isihe ngomfowabo; wafuna lapho angakhala khona, wangena
ekamelweni lakhe, wakhala khona. 31 Wageza ubuso bakhe, waphuma; wazibamba, wathi:
"Lethani ukudla." 32 Bambekela ukudla ngokwakhe, nalabo ngokwabo, nabaseGibithe abadla
naye ngokwabo, lokhu abaseGibithe bangedle namaHeberu, ngokuba kuyanengeka kubo
abaseGibithe. 33 Bahlala phambi kwakhe, izibulo njengobuzibulo balo nomncane njengobuncane
bakhe; abantu bamangala omunye nomunye. 34 Wabathathela izabelo kulokho okwakuphambi
kwakhe, kepha isabelo sikaBenjamini saphindwa kahlanu silinganiswa nesabo. Baphuza,
bathokoza naye.

44
1
Wayala inceku yendlu yakhe, wathi: "Gcwalisa amasaka alawa madoda ngokudla okulingene
namandla abo okuthwala, ufake imali yalowo nalowo emlonyeni wesaka lakhe. 2 Ufake indebe
yami, indebe yesiliva, emlonyeni wesaka lomncane kanye nemali yamabele akhe." Yenza-ke
njengezwi likaJosefa alishilo. 3 Ngakusasa nxa sekusile, amadoda amukiswa, wona
nezimbongolo zawo. 4 Esephumile emzini, engakabi kude, uJosefa wathi encekwini yakhe: "Suka
ulandele lawo madoda; nxa uwafica, yisho kuwo ukuthi: ‘Niphindiseleni okuhle ngokubi na? 5
Lena akusiyo indebe inkosi yami ephuza ngayo, ebhula ngayo, na? Nenze kabi ngokwenze
njalo.’" 6 Yawafica, yakhuluma kuwo lawa mazwi. 7 Ayesethi kuyo: "Inkosi yami ikhulumelani
amazwi anjengalawa? Akube kude nezinceku zakho ukwenze njalo. 8 Bheka, imali esayifumana
emilonyeni yamasaka ethu sayibuyisa ezweni laseKhanani, sayiletha kuwe; pho, besingeba
kanjani endlini yenkosi yakho isiliva noma igolide na? 9 Lowo wasezincekwini zakho
eyakutholwa kuye, makafe yena, thina sibe yizigqila zenkosi yami." 10 Yathi: "Kalokhu makube
njengamazwi enu; lowo ezakutholakala kuye makabe yisigqila sami, nina ningabi nacala." 11
Ayeseshesha ukwehlisela phansi, kwaba yileyo naleyo isaka layo, yileyo naleyo yavula isaka
layo. 12 Yanyalula, yaqala ngenkulu yagcina ngencane; indebe yatholwa esakeni likaBenjamini. 13
Ayeseklebhula izingubo zawo, yileyo naleyo yethwesa imbongolo yayo, abuyela emzini. 14
UJuda nabafowabo bafika endlini kaJosefa; wayesekhona lapho; bawa phansi phambi kwakhe. 15
UJosefa wayesethi kubo: "Isenzo sini lesi enisenzileyo na? Beningazi yini ukuthi umuntu
onjengami angabhula nokubhula na?" 16 Wathi uJuda: "Sizakuthini enkosini yami na?
Sizakukhulumani? Sizakuzihlanguza kanjani? UNkulunkulu ufumene ububi bezinceku zakho;
bheka, siyizigqila zenkosi yami thina naye etholakele esandleni sakhe indebe." 17 Wathi:
"Makube kude kimi ukwenze njalo; umuntu etholakele esandleni sakhe indebe uyakuba yisigqila
sami, kepha nina manihambe kahle, nenyuke, niye kuyihlo."
18
UJuda wayesesondela kuye, ethi: "O nkosi yami, inceku yakho mayikhulume izwi ezindlebeni
zenkosi yami, ungavuthi ulaka ngenceku yakho, ngokuba ungangoFaro wena. 19 Inkosi yami
yabuza izinceku zayo, yathi: ‘Ninoyihlo, ninomfowenu, na?’ 20 Sase sithi enkosini yami:
‘Sinobaba, ixhegu, nomntwana wobuxhegu bakhe omncane; umnewabo ufile, usesele yedwa
kwabakanina; uyise uyamthanda.’ 21 "Wawusuthi ezincekwini: ‘Mehliseni kimi ukuba ngimbone
ngamehlo ami.’ 22 Sathi enkosini: ‘Umfana akanakumshiya uyise; uma emshiya, uyise uzakufa.’
23
Wathi wena ezincekwini zakho: ‘Uma umfowenu omncane engehli nani, anisayikubuye nibone
ubuso bami.’ 24 Kwathi sesikhuphukele encekwini yakho ubaba, samlandisa amazwi enkosi. 25
"Wathi ubaba: ‘Buyelani, nisithengele ukudlana.’ 26 Sathi thina: ‘Asinakwehla. Uma umfowethu
omncane enathi, siyakwehla, ngokuba asinakubona ubuso balowo muntu, uma umfowethu
omncane engenathi.’ 27 "Yayisithi kithi inceku yakho ubaba: ‘Niyazi ukuthi umkami wangizalela
amadodana amabili. 28 Enye yaphuma kimi; ngathi: Impela idatshuliwe nokudatshulwa;
angiyiboni kuze kube manje. 29 Nanxa nithatha nalena, niyisuse kimi, yehlelwa yingozi,
niyakwehlisela izimvi zami endaweni yabafileyo ngosizi.’ 30 "Kalokhu nxa ngifika encekwini
yakho ubaba, umfana engenathi, lokhu inhliziyo yakhe ibambelele enhliziyweni yomfana, 31
kuzakuthi lapho ebona ukuthi umfana akakho, afe, izinceku zakho zibe zehlisela endaweni
yabafileyo izimvi zenceku yakho ubaba ngosizi. 32 Ngokuba inceku yakho yaba yisibambiso
somfana kubaba, yathi: ‘Uma ngingambuyiseli kuwe, ngiyakuba necala kubaba kuze kube
phakade.’ 33 "Ngalokho inceku yakho ake ihlale esikhundleni somfana, ibe yisigqila senkosi,
umfana akhuphuke nabafowabo. 34 Ngokuba ngingakhuphukela kanjani kubaba, umfana
engenami, funa ngibone okubi okuzakumehlela ubaba, na?"

45
1
Khona uJosefa wayengasenakuzibamba phambi kwabo bonke ababemi naye, wakhala wathi:
"Phumisani kimi abantu bonke." Kwakungemi muntu naye, uJosefa esazazisa kubafowabo. 2
Wayesephakamisa izwi ngokukhala, abaseGibithe bakuzwa, nendlu kaFaro yakuzwa. 3 Wathi
uJosefa kubafowabo: "NginguJosefa; ubaba usekhona na?" Abafowabo babengenakumphendula,
ngokuba bashaqeka ebusweni bakhe. 4 UJosefa wayesethi kubafowabo: "Ake nisondele kimi."
Basondela-ke. Wayesethi: "NginguJosefa umfowenu enathengisa ngaye eGibithe. 5 Manje
ningabi buhlungu, ningazithukutheleli ukuthi nathengisa ngami lapha, ngokuba uNkulunkulu
wangithuma phambi kwenu ukulondoloza impilo. 6 Ngokuba isimibili iminyaka indlala ikhona
ezweni; kusasele iminyaka eyisihlanu okungayikulinywa, kuvunwe ngayo. 7 UNkulunkulu
wangithuma ngaphambi kwenu ukunilondoloza, nibe yinsali emhlabeni, nisindiswe kube
ngukukhululwa okukhulu. 8 "Kalokhu akuyinina enangithuma lapha, kepha uNkulunkulu;
ungibeke uyise kaFaro, nenkosi yendlu yakhe yonke, nombusi wezwe lonke laseGibithe. 9
Sheshani nikhuphuke, niye kubaba, nithi kuye: ‘Uthe uJosefa indodana yakho: UNkulunkulu
ungibeke inkosi yalo lonke iGibithe; yehla, uze kimi, ungalibali. 10 Uyakuhlala ezweni
laseGosheni, ube seduze nami, wena nabantabakho, nabantwana babantabakho, nezimvu zakho,
nezinkomo zakho, nakho konke onakho, 11 ngikondlele khona, ngokuba kuseyiminyaka
eyisihlanu yendlala, funa uswele, wena nomuzi wakho, nakho konke onakho.’ 12 "Bhekani,
amehlo enu ayabona kanye namehlo omfowethu uBenjamini ukuthi yiwo umlomo wami
okhuluma kinina. 13 Niyakumlandisa ubaba yonke inkazimulo yami eGibithe, nakho konke
enikubonileyo, nisheshe nehlise ubaba, nimlethe lapha." 14 Wayesewa entanyeni yomfowabo
uBenjamini, wakhala; noBenjamini wakhala ngasentanyeni yakhe. 15 Wabanga bonke abafowabo,
wakhalela kubo; emva kwalokho abafowabo bakhuluma naye.
16
Leli zwi lezwakala endlini kaFaro, lithi: "Abafowabo bakaJosefa bafikile." Kwaba kuhle
emehlweni kaFaro nasemehlweni ezinceku zakhe. 17 UFaro wayesethi kuJosefa: "Yisho
kubafowenu ukuthi: ‘Yenzani lokhu: thwesani izimbongolo zenu, nihambe niye ezweni
laseKhanani, 18 nithathe uyihlo nemizi yenu, nize kimi, nginiphe okuhle kwezwe laseGibithe,
nize nidle amanoni ezwe.’ 19 "Usuyaliwe: ‘Yenzani lokhu: Nithathele izingane zenu nawomkenu
izinqola ezweni laseGibithe, nilethe uyihlo, bese niza. 20 Futhi ningakhathaleli impahla yenu,
ngokuba okuhle kwezwe lonke laseGibithe kungokwenu.’" 21 Enze njalo amadodana ka-Israyeli.
UJosefa wabapha izinqola njengesiyalo sikaFaro, wabanika nomphako wendlela. 22 Kubo bonke,
kwaba yilowo nalowo, wanika izingubo zokuphendulela; kepha uBenjamini wamupha izinhlamvu
ezingamakhulu amathathu zesiliva nezingubo eziyisihlanu zokuphendulela. 23 Kuyise wathuma
kanje: izimbongolo eziyishumi, zithwesiwe izinto ezinhle zaseGibithe, nezimbongolokazi
eziyishumi, zithwesiwe amabele, nesinkwa, nomphako kayise endleleni. 24 Wayesebamukisa
abafowabo, bahamba; wathi kubo: "Ningaxabani endleleni."
25
Bakhuphuka eGibithe, bafika ezweni laseKhanani kuJakobe uyise. 26 Bamtshela bathi:
"UJosefa usekhona, ungumbusi ezweni lonke laseGibithe." Inhliziyo yakhe yayisiphela amandla,
ngokuba akakholwanga yibo. 27 Bamlandisa onke amazwi kaJosefa abewashilo kubo; lapho
esebona izinqola abezithumile uJosefa zokumthwala, umoya kaJakobe uyise wavuselelwa. 28
Wathi u-Israyeli: "Kwanele; uJosefa indodana yami usekhona; ngizakuhamba ngimbone
ngingakafi."

46
1
U-Israyeli wasuka nakho konke okwakhe, wafika eBeri Sheba, wanikela iminikelo
kuNkulunkulu kayise u-Isaka. 2 UNkulunkulu wakhuluma ku-Israyeli ngemibono yasebusuku,
wathi: "Jakobe, Jakobe!" Wathi: "Ngilapha." 3 Wayesethi: "NginguNkulunkulu, uNkulunkulu
kayihlo; ungesabi ukwehlela eGibithe, ngokuba ngiyakukwenza khona isizwe esikhulu. 4 Mina
ngiyakwehla, ngiye nawe eGibithe; impela ngizakubuye ngikukhuphule futhi. UJosefa uyakubeka
isandla sakhe phezu kwamehlo akho."
5
UJakobe wayesesuka eBeri Sheba; amadodana ka-Israyeli amthwala uJakobe uyise, nezingane
zawo, nawomkawo ezinqoleni abezithumile uFaro zokumthwala. 6 Bathatha imfuyo yabo
nempahla yabo ababeyizuze ezweni laseKhanani, bafika eGibithe, uJakobe nayo yonke inzalo
yakhe kanye naye. 7 Amadodana akhe, namadodana amadodana akhe, namadodakazi akhe,
namadodakazi amadodana akhe, nayo yonke inzalo yakhe wayiletha kanye naye eGibithe. 8 Lawa
angamagama abantwana bakwa-Israyeli abafika eGibithe, uJakobe namadodana akhe: nguRubeni
izibulo likaJakobe. 9 Amadodana kaRubeni: ngoHanoki, noPhalu, noHesironi, noKarmi. 10
Amadodana kaSimeyoni: ngoJemuweli, noJamini, no-Ohade, noJakini, noSohari, noShawule,
indodana yowesifazane waseKhanani. 11 Amadodana kaLevi: ngoGereshoni, noKohati, noMerari.
12
Amadodana kaJuda: ngo-Eri, no-Onani, noShela, noPheresi, noZera; kepha o-Eri no-Onani
bafela ezweni laseKhanani. Amadodana kaPeresi ayengoHesironi noHamule. 13 Amadodana ka-
Isakare: ngoThola, noPhuva, noJobe noShimroni. 14 Amadodana kaZebuloni: ngoSeredi, no-
Eloni, noJaleli. 15 Yilawo angamadodana kaLeya amzalela wona uJakobe ePhadani Aramu kanye
noDina indodakazi yakhe; yonke imiphefumulo yamadodana akhe namadodakazi akhe
yayingamashumi amathathu nantathu. 16 Amadodana kaGadi: ngoSifijoni, noHagi, noShuni, no-
Esiboni, no-Eri, no-Arodi, no-Areli. 17 Amadodana ka-Asheri: ngoJimna, no-Ishiva, no-Ishivi,
noBeriya, kanye noSera udadewabo; amadodana kaBeriya: ngoHebere noMalikiyeli. 18 Yilawo
angamadodana kaZilipa uLabani amnika yena uLeya indodakazi yakhe; wamzalela wona
uJakobe, abantu abayishumi nesithupha. 19 Amadodana kaRaheli umkaJakobe: ngoJosefa
noBenjamini. 20 KuJosefa kwazalelwa ezweni laseGibithe oManase no-Efrayimi, amzalela bona
u-Asenati indodakazi kaPotifera umpristi wase-Oni. 21 Amadodana kaBenjamini: ngoBela,
noBekeri, no-Ashibeli, noGera, noNahamani, no-Ehi, noRoshe, noMupimi, noHupimi, no-Arida.
22
Yilawo angamadodana kaRaheli azalelwa wona uJakobe; bonke abantu babe yishumi nane. 23
Amadodana kaDani: nguHushimi. 24 Amadodana kaNafetali: ngoJaseli, noGuni, noJeseri,
noShilemi. 25 Yilawo angamadodana kaBiliha uLabani amnika uRaheli indodakazi yakhe;
wamzalela wona uJakobe; bonke abantu babe yisikhombisa. 26 Bonke abantu abeza noJakobe
eGibithe abaphuma okhalweni lwakhe, ngaphandle kwabafazi bamadodana kaJakobe, bonke
abantu babe ngamashumi ayisithupha nesithupha. 27 Amadodana kaJosefa azalelwa wona
eGibithe ayengabantu ababili; bonke abantu bendlu kaJakobe abeza eGibithe babe ngamashumi
ayisikhombisa.
28
Wathuma uJuda ngaphambi kwakhe kuJosefa ukuyokhomba phambi kwakhe indlela eya
eGosheni. 29 UJosefa wayesebophela inqola yakhe, wakhuphuka ukumhlangabeza u-Israyeli
uyise eGosheni; wazibonakalisa kuye, wawa entanyeni yakhe, wakhala ngasentanyeni yakhe
isikhathi eside. 30 U-Israyeli wayesethi kuJosefa: "Sengingafa, lokhu ngibone ubuso bakho ukuthi
usekhona." 31 UJosefa wathi kubafowabo nakuyo indlu kayise: "Ngizakukhuphuka, ngimtshele
uFaro, ngithi kuye: ‘Abafowethu nendlu kababa ababesezweni laseKhanani sebefike kimi. 32
Lawa madoda angabelusi bezimvu, ngokuba ayengamadoda emfuyo; aselethile izimvu zawo,
nezinkomo zawo, nakho konke anakho.’ 33 Kuyakuthi lapho uFaro enibiza athi: ‘Uyini umsebenzi
wenu,’ 34 anothi: ‘Izinceku zakho zingabantu bemfuyo kwasebusheni bethu kuze kube manje,
thina nawobaba,’ ukuze nihlale ezweni laseGosheni, ngokuba wonke umalusi wezimvu
uyanengeka kwabaseGibithe."

47
1
UJosefa wayesengena, wamtshela uFaro, wathi: "Ufikile ubaba nabafowethu, nezimvu zabo,
nezinkomo zabo, nakho konke abanakho, bephuma ezweni laseKhanani; bheka, sebesezweni
laseGosheni." 2 Phakathi kwabafowabo wathatha amadoda ayisihlanu, wawabeka phambi
kukaFaro. 3 UFaro wayesethi kubafowabo: "Uyini umsebenzi wenu na?" Bathi kuFaro: "Izinceku
zakho zingabelusi, thina nawobaba." 4 Bathi kuFaro: "Size ukugogobala ezweni, ngokuba akukho
dlelo lemihlambi yezinceku zakho, lokhu indlala inzima ezweni laseKhanani; ngalokho izinceku
zakho mazakhe ezweni laseGosheni." 5 Wayesekhuluma uFaro kuJosefa, ethi: "Uyihlo
nabafowenu beze kuwe; 6 izwe laseGibithe lisebusweni bakho; mhlalise uyihlo nabafowenu
ezweni elihle kunalo lonke, ubahlalise ezweni laseGosheni; uma uwazi phakathi kwabo amadoda
anamandla, wabeke abe yizinduna zezinkomo zami." 7 UJosefa wayesemngenisa uJakobe uyise,
wambeka phambi kukaFaro; uJakobe wambusisa uFaro. 8 Wathi uFaro kuJakobe: "Zingaki
izinsuku zeminyaka yokuhamba kwakho na?" 9 UJakobe wathi kuFaro: "Izinsuku zeminyaka
yokugogobala kwami ziyiminyaka eyikhulu namashumi amathathu; ziyingcosana, zimbi izinsuku
zeminyaka yokuhamba kwami, azifinyelelanga ezinsukwini zeminyaka yokuhamba kwawobaba
emihleni yokugogobala kwabo." 10 UJakobe wayesembusisa uFaro, wasuka ebusweni bukaFaro.
11
UJosefa wabahlalisa uyise nabafowabo, wabapha indawo ezweni laseGibithe, izwe elihle
kunalo lonke, izwe likaRamsese, njengalokho uFaro ebayalile. 12 UJosefa wamondla uyise,
nabafowabo, nendlu yonke kayise ngokudla ngokwemilomo yezingane zabo.
13
Ukudla kwakungekho ezweni lonke, ngokuba indlala yayinzima kakhulu; izwe laseGibithe
nezwe laseKhanani afa indlala. 14 UJosefa waqoqa yonke imali eyatholakala ezweni laseGibithe
nasezweni laseKhanani ngamabele ababewathengile; uJosefa wayiyisa imali endlini kaFaro. 15
Isiphelile imali ezweni laseGibithe nasezweni laseKhanani, bonke abaseGibithe beza kuJosefa,
bathi: "Siphe ukudla; siyakufelani phambi kwakho na? Ngokuba isiphelile imali." 16 Wayesethi
uJosefa: "Lethani izinkomo zenu; ngizakuninika ngezinkomo zenu, uma imali ingekho." 17
Baletha-ke izinkomo zabo kuJosefa; uJosefa wabenanela ukudla ngamahhashi, nangezimvu,
nangezinkomo, nagezimbongolo; wabapha ukudla ngezinkomo zabo zonke ngalowo mnyaka. 18
Usuphelile lowo mnyaka, beza kuye ngomnyaka wesibili, bathi kuye: "Asiyikufihlela inkosi
ukuthi imali yethu yonke isiphelile; imihlambi yezinkomo isingeyenkosi; akukho okuseleyo
emehlweni enkosi ngaphandle kwemizimba yethu namazwe ethu. 19 Siyakufelani phambi kwakho
thina namazwe ethu na? Sithenge thina namazwe ethu ngokudla, sibe yizinceku zikaFaro thina
namazwe ethu; siphe imbewu ukuba siphile, singafi, izwe lingachitheki." 20 UJosefa
wamthengela uFaro izwe lonke laseGibithe, ngokuba bonke abaseGibithe bathengisa ngamasimu
abo, lokhu indlala yayinzima phezu kwabo; izwe lase liba ngelikaFaro. 21 Abantu wabayisa
emizini, ebasusa komunye umncele wezwe laseGibithe kwaze kwaba komunye umncele walo. 22
Yizwe labapristi kuphela angalithenganga, ngokuba abapristi babethole isabelo kuFaro, badla
isabelo sabo abapha sona uFaro; ngalokho abathengisanga ngezwe labo. 23 UJosefa wayesethi
kubantu: "Bhekani, namuhla nginithengile nibe ngabakaFaro nina nezwe lenu; nansi imbewu
yenu, nize nihlwanyele emhlabathini. 24 Kuyakuthi ezithelweni nimnike uFaro okwesihlanu,
izinxenye ezine zibe ngezenu, kube yimbewu yamasimu, nokudla kwenu nokwabendlu yenu,
nokudla kwezingane zenu." 25 Base bethi: "Usisindisile; masifumane umusa emehlweni enkosi,
sibe yizinceku zikaFaro." 26 UJosefa washaya umthetho ngezwe laseGibithe kuze kube namuhla
wokuthi uFaro uzakuba nokwesihlanu; kuphela izwe labapristi bodwa alibanga yilo elikaFaro.
27
U-Israyeli wahlala ezweni laseGibithe ezweni laseGosheni; bafuya khona, bazala, banda
kakhulu. 28 UJakobe wahlala ezweni laseGibithe iminyaka eyishumi nesikhombisa; izinsuku
zikaJakobe, iminyaka yokuhamba kwakhe, zaziyiminyaka eyikhulu namashumi amane
nesikhombisa. 29 Kwase kusondela isikhathi ayesezakufa ngaso u-Israyeli; wayesebiza indodana
yakhe uJosefa, wathi kuye: "Uma ngifumene umusa emehlweni akho, ake ubeke isandla sakho
phansi kwethanga lami, ungenzele umusa neqiniso: ake ungangimbeli eGibithe. 30 Kepha lapho
sengilele kobaba, uze ungikhiphe eGibithe, ungimbele ethuneni labo." Wathi: "Ngizakwenza
njengezwi lakho." 31 Wayesethi kuye: "Funga kimi." Wayesefunga kuye. U-Israyeli wakhothama
esihlokweni sombhede.
48
1
Kwathi emva kwalezo zinto kwathiwa kuJosefa: "Bheka, uyihlo uyagula." Wayesethatha
amadodana akhe omabili, oManase no-Efrayimi. 2 Kwase kushiwo kuJakobe ukuthi: "Bheka,
indodana yakho uJosefa iyeza kuwe." Wayeseziqinisa u-Israyeli, wahlala embhedeni. 3 UJakobe
wathi kuJosefa: "UNkulunkulu uSomandla wabonakala kimi eLuze ezweni laseKhanani,
wangibusisa, 4 wathi kimi: ‘Bheka, ngizakukuchumisa, ngikwandise, ngikwenze izizwe eziningi,
ngiyiphe inzalo yakho leli zwe emva kwakho libe yifa elingunaphakade.’ 5 "Manje amadodana
akho amabili owazalelwa wona ezweni laseGibithe, ngingakafiki kuwe eGibithe, angawami; o-
Efrayimi noManase njengoRubeni noSimeyoni bazakuba ngabami. 6 Kepha inzalo yakho oyizala
emva kwabo izakuba ngeyakho; iyakubizwa ngegama labafowabo efeni lalabo. 7 Kepha mina
ekusukeni kwami ePhadani Aramu ngafelwa nguRaheli endleleni ezweni laseKhanani, kuse
yibangana ukuya e-Efrati; ngammbela khona endleleni eya e-Efrati" (eliyiBetlehema).
8
U-Israyeli wabona amadodana kaJosefa, wathi: "Ngobani laba na?" 9 UJosefa wathi kuye:
"Ngamadodana ami angiphe wona lapha uNkulunkulu." Wayesethi: "Ake uwalethe kimi,
ngiwabusise." 10 Kepha amehlo ka-Israyeli ayefiphele ngobudala, engasenakubona; wawasondeza
kuye; wawanga, wawagona. 11 Wayesethi u-Israyeli kuJosefa: "Ngangingacabanganga ukuthi
ngizakubona ubuso bakho; bheka, uNkulunkulu ungibonise nenzalo yakho." 12 UJosefa
wawakhipha emathangeni akhe; wakhothama, ubuso bakhe bubheke phansi. 13 UJosefa
wayesebathatha bobabili, u-Efrayimi ngesokunene, engakwesokhohlo sika-Israyeli, noManase
ngesokhohlo, engakwesokunene sika-Israyeli, wabasondeza kuye. 14 U-Israyeli wayeselula
isandla sakhe sokunene, wasibeka ekhanda lika-Efrayimi, kanti ungomncane, nesokhohlo
ekhanda likaManase, ephambanisa izandla zakhe, ngokuba uManase wayeyizibulo. 15 Wambusisa
uJosefa, wathi: "UNkulunkulu abahamba ebusweni bakhe obaba o-Abrahama no-Isaka,
uNkulunkulu ongondlile konke ukuhamba kwami kuze kube namuhla, 16 ingelosi engisindise
ebubini bonke mayibusise abafana; mababizwe ngegama lami nangegama lawobaba o-Abrahama
no-Isaka; mabande, babe baningi phakathi kwezwe." 17 Wabona uJosefa ukuthi uyise wabeka
isandla sakhe sokunene ekhanda lika-Efrayimi, kwaba kubi emehlweni akhe; wasibamba isandla
sikayise ukuba asisuse ekhanda lika-Efrayimi, asibeke ekhanda likaManase. 18 Wayesethi uJosefa
kuyise: "Kungabi njalo, ngokuba lo uyizibulo; beka esokunene sakho ekhanda lakhe." 19 Kepha
uyise wala, wathi: "Ngiyazi, ndodana yami, ngiyazi; naye uyakuba yisizwe, abe mkhulu naye;
kodwa umfowabo uyakuba mkhulu kunaye, inzalo yakhe ibe yizizwe eziningi." 20
Wayesebabusisa ngalolo suku ngokuthi: "Ngawe u-Israyeli uyakubusisa ethi: ‘UNkulunkulu
makakwenze ube njengo-Efrayimi nanjengoManase.’"Wayesembeka-ke u-Efrayimi ngaphambi
kukaManase. 21 Wayesethi u-Israyeli kuJosefa: "Bheka, mina ngiyafa, kepha uNkulunkulu
uyakuba nani, anibuyisele ezweni lawoyihlo. 22 Wena ngikunike olunye ukhalo ngaphezu
kwabafowenu engaluthatha esandleni sama-Amori ngenkemba yami nangomnsalo wami."

49
1
UJakobe wabiza amadodana akhe, wathi: "Buthanani, nginitshele okuzakunehlela ezinsukwini
ezizayo. 2 "Qoqanani, nizwe, nina madodana kaJakobe, nimlalele u-Israyeli uyihlo. 3 "Rubeni,
uyizibulo lami wena, amandla ami, ukuqala kwezikhwepha zami, ingqongqo ngesithunzi,
ingqongqo ngamandla. 4 Uyachichima njengamanzi, awuyikuba nabungqongqo, ngokuba
wakhwela embhedeni kayihlo, wawona; wakhwela okhukhweni lwami.
5
"OSimeyoni noLevi bayizelamani; izinkemba zabo ziyizikhali zobudlwangudlwangu. 6
Ungangeni emkhandlwini wabo, mphefumulo wami; ungahlangani nebandla labo, nhliziyo yami,
ngokuba ngolaka lwabo babulala abantu; ngobudlova babo basika izinkabi umsipha. 7
Makuqalekiswe ulaka lwabo, ngokuba lwalunamandla, nentukuthelo yabo, ngokuba yayinonya;
ngizakubahlukanisa kwaJakobe, ngibasakaze kwa-Israyeli.
8
"Juda, abafowenu bazakukudumisa wena; isandla sakho siyakuba sesijingweni sezitha zakho;
amadodana kayihlo ayakukukhothamela. 9 UJuda uyibhongo lengonyama. Wenyuke
empangweni, ndodana yami. Uguqile, ulele njengengonyama nanjengengonyamakazi; ngubani
oyakumvusa na? 10 Intonga yobukhosi ayiyikusuka kuJuda, nozime lokubusa phakathi
kwezinyawo zakhe, aze afike yena olufanele lona; nezizwe ziyakumlalela. 11 Ubopha ithole
lembongolo yakhe emvinini, ithole lembongolokazi yakhe emvinini omuhle; uhlanza izingubo
zakhe ewayinini, nezambatho zakhe egazini lezithelo zomvini. 12 Amehlo akhe ayaklwela
iwayini, amazinyo akhe amhlophe ubisi.
13
"UZebuloni uyakwakha ngasogwini lolwandle, abe sosebeni lwemikhumbi; umkhawulo wakhe
uzakuba ngaseSidoni. 14 "U-Isakare uyimbongolo enamandla, elala phakathi kwezibaya. 15
Wabona indawo yakuphumula ukuthi inhle, nezwe ukuthi limnandi; wafolisa ihlombe ukuba
athwale, waba yinceku yempoqo. 16 "UDani uyakuthetha amacala abantu bakhe, njengesinye
sezizwe zakwa-Israyeli. 17 UDani uyakuba yinyoka endleleni, inhlangwana emkhondweni eluma
izithende zehhashi, awe nyovane olikhweleyo. 18 "Ngiyihalele insindiso yakho, Jehova. 19
"UGadi, iviyo liyakumcindezela, kepha yena uyakucindezela isithende salo. 20 "Ku-Asheri kuvela
amanoni abe ngukudla kwakhe; uyakuveza isilovela samakhosi. 21 UNafetali uyindluzelekazi
ethukululekileyo; uveza amazwi amnandi.
22
"UJosefa uyingatsha entsha ethelayo, ingatsha ethela ngasemthonjeni; amagatsha akhe akhwela
odongeni. 23 Abacibishelayo bayamkhathaza, bayamdubula, bayamzingela; 24 kepha umnsalo
wakhe uhlala uqinile; amandla ezandla zakhe aqiniswa ngezandla zoMninimandla kaJakobe,
okuvela kuye uMalusi netshe lika-Israyeli, 25 ngoNkulunkulu kayihlo ozakukusiza, ngoSomandla
ozakukubusisa ngezibusiso zasezulwini phezulu, nangezibusiso zasotweni olukhona phansi,
nangezibusiso zamabele nezesizalo. 26 Izibusiso zikayihlo zinamandla kunezibusiso zawokhokho
bami, kuze kube semkhawulweni wokugcina wezintaba ezimiyo; ziyakuba phezu kwekhanda
likaJosefa phakade, nasokhakhayini lwakhe owahlukaniswa nabafowabo. 27 "UBenjamini
uyimpisi ehomfuzayo; ekuseni uyadla impango, kusihlwa uyahlukanisa akuphangileyo."
28
Bonke labo bayizizwe eziyishumi nambili zakwa-Israyeli; yilokhu uyise akukhuluma kubo,
wababusisa; wababusisa, kwaba yilowo ngokwesibusiso sakhe. 29 Wabayala, wathi kubo: "Mina
sengiyakubuthelwa kubantu bami; ngimbeleni kobaba emhumeni osensimini ka-Efroni umHeti, 30
umhume osensimini yaseMakaphela eliphambi kweMamre ezweni laseKhanani, awuthenga u-
Abrahama kanye nensimu ku-Efroni umHeti, ube yindawo yakhe yokumbela; 31 lapho bembela
o-Abrahama noSara umkakhe; lapho bembela o-Isaka noRebeka umkakhe; lapho ngembela
uLeya; 32 insimu nomhume okuyo okwathengwa kubantwana bakwaHeti." 33 UJakobe eseqedile
ukuyala amadodana akhe waqoqela izinyawo zakhe embhedeni, wagqibuka, wabuthelwa kubantu
bakhe.

50
1
UJosefa wawa ebusweni bukayise, wakhala phezu kwakhe, wamanga. 2 UJosefa wayala
izinceku zakhe izinyanga ukuba zimgqumise uyise ngemithi; izinyanga zamgqumisa-ke u-Israyeli
ngemithi. 3 Zaphelela izinsuku zakhe ezingamashumi amane, ngokuba ziphelela kanjalo izinsuku
zokugqumisa ngemithi; abaseGibithe bamkhalela izinsuku ezingamashumi ayisikhombisa. 4
Sezidlulile izinsuku zokumkhalela, uJosefa wakhuluma kuyo indlu kaFaro, wathi: "Uma
ngifumene umusa emehlweni enu, ake nikhulume ezindlebeni zikaFaro ngokuthi 5 ubaba
wangifungisa wathi: ‘Bheka, ngiyafa; ethuneni engizimbele lona ezweni laseKhanani
uzakungingcwaba kulo.’ Ngalokho ake ngikhuphuke, ngimmbele ubaba, bese ngibuya." 6
Wayesethi uFaro: "Khuphuka, ummbele uyihlo njengokukufungisa kwakhe."
7
Khona uJosefa wakhuphuka ukuyommbela uyise; zakhuphuka naye zonke izinceku zikaFaro,
nezikhulu zendlu yakhe, nezikhulu zonke zezwe laseGibithe, 8 nendlu yonke kaJosefa,
nabafowabo, nendlu kayise; bashiya ezweni laseGosheni izingane zabo, nezimvu zabo,
nezinkomo zabo kuphela. 9 Kwakhuphuka nabo nezinqola, nabamahhashi; kwaba yibandla
elikhulu impela. 10 Baya, bafika eGoreni Hathadi elingaphesheya kweJordani; lapho bakhala
nokukhala impela, okunzima kakhulu; wamenzela uyise isililo izinsuku eziyisikhombisa. 11
Abakhileyo ezweni, amaKhanani, sebebone isililo eGoreni Hathadi bathi: "Lokhu kuyisililo
esinzima sabaseGibithe." Ngalokho igama laleyo ndawo laqanjwa ngokuthi i-Abela Misirayimi
elingaphesheya kweJordani. 12 Amadodana akhe amenzela njengalokho ewayalile; 13 ngokuba
amadodana akhe amyisa ezweni laseKhanani, ammbela emhumeni wasensimini yaseMakaphela,
u-Abrahama awuthenga kanye nensimu ku-Efroni umHeti, ube yindawo yokumbela, ngaphambi
kweMamre. 14 UJosefa wayesebuyela eGibithe, yena nabafowabo, nabo bonke ababekhuphuke
naye ukummbela uyise, emva kokungcwaba kwakhe uyise.
15
Sebebonile abafowabo bakaJosefa ukuthi uyise ufile, bathi: "Mhlawumbe uJosefa
uzakusizonda, asiphindisele nokusiphindisela konke okubi esakwenza kuyena." 16 Base
bethumela kuJosefa, bethi: "Uyihlo wayala engakafi, wathi: 17 ‘Niyakusho kuJosefa ukuthi: Ake
uthethelele abafowenu isiphambeko sabo nesono sabo, ngokuba bakwenzela okubi.’ Manje
siyakucela ukuthi: Ake uthethelele isiphambeko sezinceku zikaNkulunkulu kayihlo." UJosefa
wakhala, besakhuluma kuye. 18 Base befika nabafowabo, bawa phansi ebusweni bakhe, bathi:
"Bheka, siyizinceku zakho." 19 UJosefa wayesethi kubo: "Ningesabi; kanti ngisesikhundleni
sikaNkulunkulu na? 20 Yebo, nina nangisongozela okubi, kepha uNkulunkulu wakuceba kwaba
kuhle ukuba akwenze kube njenganamuhla, asindise abantu abaningi. 21 Ngalokho ningesabi;
mina ngiyakunondla, nina nezingane zenu." Wabaduduza, wakhuluma kuzo izinhliziyo zabo.
22
UJosefa wahlala eGibithe, yena nendlu kayise; uJosefa wahamba iminyaka eyikhulu neshumi.
23
UJosefa wabona abantwana bakwa-Efrayimi besizukulwane sesithathu; nabantwana
bakwaMakiri indodana kaManase bazalelwa emathangeni kaJosefa. 24 Wayesethi uJosefa
kubafowabo: "Mina sengiyafa, kepha uNkulunkulu uzakunihambela nokunihambela, anikhuphule
kuleli zwe, aniyise ezweni alifungela o-Abrahama, no-Isaka, noJakobe." 25 UJosefa
wayesefungisa amadodana ka-Israyeli, ethi: "UNkulunkulu uzakunihambela nokunihambela, nina
nikhuphule amathambo ami lapha." 26 Wayesefa uJosefa eneminyaka eyikhulu neshumi;
bamgqumisa ngemithi, wafakwa ebhokisini eGibithe.
 EXODUS
1
1
Lawa angamagama amadodana ka-Israyeli afika eGibithe noJakobe; yileyo naleyo yafika
nomuzi wayo: 2 ngoRubeni, noSimeyoni, noLevi, noJuda, 3 no-Isakare, noZebuloni,
noBenjamini, 4 noDani, noNafetali, noGadi, no-Asheri. 5 Bonke abantu abaphuma okhalweni
lukaJakobe babe ngabantu abangamashumi ayisikhombisa; uJosefa wayeseGibithe. 6 UJosefa
wafa, nabo bonke abafowabo, naso sonke leso sizukulwane. 7 Abantwana bakwa-Israyeli bazala,
bachuma, banda, baba baningi; izwe lagcwala bona.
8
Kwavela inkosi entsha eGibithe eyayingamazi uJosefa. 9 Yathi kubantu bayo: "Bhekani, abantu
babantwana bakwa-Israyeli baningi, futhi banamandla kunathi; 10 masizihlakaniphele maqondana
nabo, funa bande, kuze kuthi lapho kuphuma impi, bahlangane nezitha zethu, balwe nathi,
bamuke ezweni." 11 Kwase kubekwa phezu kwabo izinduna zokubasebenzisa ezabahlupha
ngemithwalo yazo. Bamakhela uFaro imizi yokubekelela, iPitomu neRamsesi. 12 Kepha
ngokubahlupha kwazo kwaba yikhona banda, basabalala; baba novalo ngabantwana bakwa-
Israyeli. 13 AbaseGibithe babakhonzisa abantwana bakwa-Israyeli ngamandla. 14 Benza ukuphila
kwabo kwaba munyu ngemisebenzi esindayo odakeni nasezitinini, nangemisebenzi yonke
yasendle, yebo, yonke imisebenzi yabo ababebakhonzisa ngayo.
15
Inkosi yaseGibithe yakhuluma kubabelethisi bamaHeberukazi, igama lomunye wabo
linguShifira, elomunye linguPhuwa, 16 yathi: "Nxa nibelethisa amaHeberukazi, niwabona
esesihlalweni sokubeletha, uma kuyindodana, anoyibulala, kepha uma kuyindodakazi,
izakuphila." 17 Kodwa ababelethisi babemesaba uNkulunkulu, abenzanga njengalokho yasho
kubo inkosi yaseGibithe, babasindisa abafana. 18 Inkosi yaseGibithe yayisibiza ababelethisi, yathi
kubo: "Nenzeleni lokhu, nasindisa abafana, na?" 19 Ababelethisi bathi kuFaro: "Kungokuba
amaHeberukazi engenjengabaseGibithe; anamandla, abeletha, engakafiki umbelethisi kuwo." 20
UNkulunkulu wabenzela ababelethisi okuhle; abantu banda, baba baningi kakhulu. 21 Kwathi
ngokuba ababelethisi bamesaba uNkulunkulu, wabavusela imizi. 22 UFaro wayesebayala abantu
bakhe bonke, ethi: "Bonke abafana abazalwayo anobaphonsa emfuleni, kepha amantombazana
niwasindise onke."

2
1
Kwasuka umuntu wendlu kaLevi, wathatha indodakazi kaLevi. 2 Wakhulelwa lowo mfazi,
wazala indodana; esebonile ukuthi inhle, wayithukusa izinyanga ezintathu. 3
Engasenakuyithukusa wayithathela ibhokisi lebungu, walihuqa ngebitume nangekolitayi,
wamfaka umfana kulo, walibeka emhlangeni ngasogwini lomfula. 4 Udadewabo wayemi kudana,
ukuze azi ukuthi kuyakwenziwani kuye.
5
Kwase kwehla indodakazi kaFaro ukuyogeza emfuleni; amantombazana ayo ahamba eceleni
komfula; ibona ibhokisi emhlangeni yathuma intombazana ukulilanda. 6 Yalivula, yabona
umntwana; bheka, kwakungumfana; wakhala. Yamhawukela, yathi: "Lona ungowabantwana
bamaHeberu." 7 Udadewabo wayesethi kuyo indodakazi kaFaro: "Ngihambe ngikubizele
umzanyana kuwo amaHeberu ukuba akuncelisele ingane na?" 8 Indodakazi kaFaro yathi kuye:
"Hamba." Yasuka intombazana, yabiza unina wengane. 9 Indodakazi kaFaro yathi kuye: "Hamba
nalo mntwana, ungincelisele yena; ngizakukukhokhela." Owesifazane wamthatha-ke umntwana,
wamncelisa. 10 Umfana wakhula, wayiswa kuyo indodakazi kaFaro, waba yindodana yayo.
Yamqamba igama lokuthi uMose, ithi: "Ngokuba ngamkhipha emanzini."
11
Kwathi ngalezo zinsuku uMose esekhulile, waphuma, waya kubafowabo, wabuka imithwalo
yabo; wabona owaseGibithe eshaya umHeberu, omunye wabafowabo. 12 Waphendukela ngalapha
nangalapha; esebonile ukuthi akukho muntu, wambulala owaseGibithe, wamthukusa
esihlabathini. 13 Waphuma nangosuku olulandelayo; bheka, nanko amadoda amabili amaHeberu
exabene; wathi kowonileyo: "Umshayelani owakini na?" 14 Wathi yena: "Ngubani okumise
induna nomahluleli phezu kwethu na? Ufuna ukungibulala mina, njengalokho ubulele
owaseGibithe, na?" UMose wayesesaba, ethi: "Impela le ndaba iyazeka." 15 UFaro esekuzwile
lokho wafuna ukumbulala uMose. Kepha uMose wabaleka ebusweni bukaFaro, wahlala ezweni
lakwaMidiyani; wahlala phansi ngasemthonjeni.
16
UMpristi wakwaMidiyani wayenamadodakazi ayisikhombisa; afika ukukha amanzi, agcwalisa
imiqengqe eyophuzisa izimvu zikayise. 17 Kwafika abelusi, bawaxosha. Kepha wayesesukuma
uMose, wawasiza, waphuzisa izimvu zawo. 18 Lapho esefika kuRehuweli uyise, wathi yena:
"Yini ukuba nisheshe nibuye namuhla na?" 19 Athi: "OwaseGibithe usophulile esandleni sabelusi,
futhi wasikhelela amanzi, waphuzisa izimvu." 20 Wathi kuwo amadodakazi akhe: "Uphi yena?
Nimshiyeleni na? Mbizeni, eze ukuzokudla." 21 UMose wazimisela ukuhlala kulowo muntu;
wamupha uMose uSipora indodakazi yakhe. 22 Wazala indodana, wayiqamba igama lokuthi
uGereshomu, ngokuba wathi: "Ngangingumfokazi ezweni elingesilo elami."
23
Kwathi sekudlulile izinsuku eziningi, inkosi yaseGibithe yafa; abakwa-Israyeli babubula
ngenxa yobugqila, bakhala; ukukhala kwabo kwenyukela kuNkulunkulu ngobugqila babo. 24
UNkulunkulu wezwa ukububula kwabo; uNkulunkulu wakhumbula isivumelwano sakhe no-
Abrahama, no-Isaka, noJakobe. 25 UNkulunkulu wabona abantwana bakwa-Israyeli,
wabanakekela.

3
1
UMose wayalusa izimvu zikaJetiro umukhwe wakhe, umpristi wakwaMidiyani; waziqhuba
izimvu, waya ngaphambili kwehlane, waze wafika entabeni kaNkulunkulu iHorebe. 2
Kwabonakala kuye ingelosi kaJehova elangabini lomlilo livela phakathi kwesihlahla; wabuka,
bheka, isihlahla savutha umlilo, kepha isihlahla asiphelanga nokho. 3 Wayesethi uMose:
"Mangiphambuke, ngiye ngibone lesi sibonakaliso esikhulu ukuba isihlahla asishi ngani." 4
UNkulunkulu esebona ukuthi uyaphambuka ukuyobuka, uNkulunkulu wambiza ephakathi
kwesihlahla, wathi: "Mose, Mose!" 5 Wathi: "Ngilapha." Wayesethi: "Ungasondeli lapha;
khumula izicathulo zakho ezinyaweni zakho, ngokuba indawo omi kuyo ingumhlabathi
ongcwele." 6 Wathi: "NginguNkulunkulu kayihlo, uNkulunkulu ka-Abrahama, noNkulunkulu ka-
Isaka, noNkulunkulu kaJakobe; uMose wasitha ubuso bakhe, ngokuba wesaba ukumbheka
uNkulunkulu."
7
Wayesethi uJehova: "Ngibonile nokubona ukuhlupheka kwabantu bami abaseGibithe; ngizwile
ukukhala kwabo ngenxa yabacindezeli babo, ngokuba ngiyazazi izinsizi zabo; 8 ngehle ukuba
ngibophule esandleni sabaseGibithe, ngibakhuphule kulelo zwe, ngibayise ezweni elihle elibanzi,
izwe elichichima ubisi nezinyosi, indawo yamaKhanani, neyamaHeti, neyama-Amori,
neyamaPherizi, neyamaHivi, neyamaJebusi. 9 Bheka, manje ukukhala kwabantwana bakwa-
Israyeli sekufike kimi; futhi ngikubonile ukucindezela abaseGibithe ababacindezela ngakho. 10
Ngakho hamba, ngiyakukuthuma kuFaro ukuba ukhiphe eGibithe abantu bami, abantwana
bakwa-Israyeli."
11
UMose wayesethi kuNkulunkulu: "Ngingubani mina ukuba ngiye kuFaro, ngikhiphe eGibithe
abantwana bakwa-Israyeli na?" 12 Wathi: "Ngizakuba nawe ngempela; lokhu kuyakuba luphawu
kuwe ukuthi ngikuthumile; nxa ukhiphile isizwe eGibithe, niyakumkhonza uNkulunkulu kule
ntaba." 13 UMose wayesethi kuNkulunkulu: "Bheka lapho ngifika kubantwana bakwa-Israyeli,
ngithi kubo: ‘UNkulunkulu wawoyihlo ungithumile kini,’ bese bethi kimi: ‘Ngubani igama
lakhe?’ ngizakuthini kubo na?" 14 UNkulunkulu wathi kuMose: "Nginguye enginguye." Wathi:
"Uzakusho njalo kubantwana bakwa-Israyeli, uthi: ‘UNgikhona ungithumile.’" 15 UNkulunkulu
wathi futhi kuMose: "Uzakusho njalo kubo abantwana bakwa-Israyeli, uthi: ‘UJehova,
uNkulunkulu wawoyihlo, uNkulunkulu ka-Abrahama, noNkulunkulu ka-Isaka, noNkulunkulu
kaJakobe, ungithumile kini.’ Yileli eliyigama lami kuze kube phakade, lesi siyisikhumbuzo sami
ezizukulwaneni ngezizukulwane.
16
"Hamba ubuthe amalunga akwa-Israyeli, uthi kuwo: ‘UJehova, uNkulunkulu wawoyihlo,
uNkulunkulu ka-Abrahama noka-Isaka nokaJakobe, ubonakele kimi, wathi: Nginihambele
nokunihambela, ngibonile okwenziwa kini eGibithe. 17 Ngishilo ngathi: Ngiyakunikhuphula
ekuhluphekeni kwaseGibithe, nginiyise ezweni lamaKhanani, nelamaHeti, nelama-Amori,
nelamaPherizi, nelamaHivi, nelamaJebusi, izwe elichichima ubisi nezinyosi.’ 18 "Bayakulalela
izwi lakho; uyakufika wena kanye namalunga akwa-Israyeli enkosini yaseGibithe, nithi kuyo:
‘UJehova, uNkulunkulu wamaHeberu, uhlangene nathi; ake sihambe manje ibanga lezinsuku
ezintathu, siye ehlane, sihlabele uJehova uNkulunkulu wethu.’ 19 Kepha ngiyazi mina ukuthi
inkosi yaseGibithe ayiyikuvuma ukuba nihambe, ngisho nangesandla esinamandla. 20 Kodwa
ngiyakwelula isandla sami, ngilishaye iGibithe ngezimangaliso engiyakuzenza phakathi kwalo,
andukuba iniyeke. 21 "Ngiyakunika lesi sizwe umusa emehlweni abaseGibithe, kuze kuthi lapho
nisuka, aniyikuhamba ningaphethe lutho, 22 kepha yilowo nalowo wesifazane uyakucela
kumakhelwane wakhe nakuye ogogobeleyo endlini yakhe izinto zesiliva nezinto zegolide,
nezingubo; niyakuzifaka kumadodana enu nakumadodakazi enu, niphange abaseGibithe."

4
1
UMose waphendula wathi: "Kepha bheka, abayikukholwa yimi, bangalaleli izwi lami, ngokuba
bayakusho ukuthi: ‘UJehova akabonakalanga kuwe.’" 2 Wayesethi kuye uJehova: "Kuyini lokhu
okusesandleni sakho na?" Wathi: "Yinduku." 3 Khona wathi: "Yiphonse phansi." Wayeseyiphonsa
phansi. Yaphenduka inyoka; uMose wayibalekela. 4 Wayesethi uJehova kuMose: "Yelula isandla
sakho, uyibambe ngomsila." Wayeselula isandla sakhe, wayibamba; yaphenduka induku
esandleni sakhe— 5 ukuba bakholwe ukuthi uJehova, uNkulunkulu wawoyise, uNkulunkulu ka-
Abrahama, noNkulunkulu ka-Isaka, noNkulunkulu kaJakobe, ubonakele kuwe. 6 UJehova wathi
futhi kuye: "Faka isandla sakho esifubeni sakho." Wayesefaka isandla sakhe esifubeni sakhe;
lapho esesikhipha, bheka, isandla sakhe sasinochoko, sinjengeqhwa. 7 Wayesethi kuye: "Buyisela
isandla sakho esifubeni sakho." Wayesesibuyisela isandla sakhe esifubeni sakhe; kuthe esikhipha
esifubeni sakhe, bheka, sase siphendukile, sinjengenyama yakhe. 8 "Kuyakuthi uma
bengayikukholwa nguwe, bengalaleli izwi lesibonakaliso sokuqala, bayakukholwa yizwi
lesibonakaliso sasemuva. 9 Kuzakuthi-ke uma bengayikukholwa nayilezi zibonakaliso ezimbili,
bengalaleli izwi lakho, uyakukha amanzi omfula, uwathele emhlabathini owomileyo; amanzi
owakha emfuleni ayakuphenduka igazi emhlabathini owomileyo."
10
UMose wayesethi kuJehova: "Nkosi, angizange ngibe ngumuntu oyiqaphuqaphu, nakuqala
namanje lapho usukhulumile encekwini yakho, ngokuba umlomo wami unzima, unamalimi." 11
UJehova wayesethi kuye: "Ngubani owenzile umlomo womuntu na? Ngubani owenza
isimungulu, nesithulu, nobonayo, nempumputhe na? Akusimina, uJehova, na? 12 Ngalokho
hamba; ngizakuba nomlomo wakho, ngikufundise lokho ozakukukhuluma." 13 Kepha wathi: "O
Nkosi, ake uthume ngesandla salowo ozakumthuma." 14 Intukuthelo kaJehova yamvuthela
uMose; wathi: "Akakho umfowenu u-Aroni, umLevi, na? Ngiyazi ukuthi ukhuluma kahle yena.
Futhi bheka, uyaphuma ukukuhlangabeza; nalapho ekubona, uyakuthokoza enhliziyweni yakhe.
15
Uyakukhuluma kuye, ufake amazwi emlonyeni wakhe; ngizakuba nomlomo wakho nomlomo
wakhe, nginifundise lokho eniyakukwenza. 16 Uyakukukhulumela kubantu, abe ngumlomo kuwe,
wena ube njengoNkulunkulu kuye. 17 Uzakuphatha le nduku ngesandla sakho, oyakwenza
izibonakaliso ngayo."
18
Wayesehamba uMose, wabuyela kuJetiro umukhwe wakhe, wathi kuye: "Ake ngihambe,
ngibuyele kubafowethu abaseGibithe, ngize ngibone ukuthi basekhona yini." UJetiro wathi
kuMose: "Hamba nokuthula." 19 UJehova wathi kuMose kwaMidiyani: "Hamba ubuyele
eGibithe, ngokuba sebafa abantu bonke abafuna ukukubulala." 20 UMose wayesethatha umkakhe
namadodana akhe, wabakhwelisa embongolweni, wabuyela ezweni laseGibithe; uMose waphatha
induku kaNkulunkulu ngesandla sakhe. 21 UJehova wathi kuMose: "Ekuhambeni kwakho
usubuyela eGibithe bhekisisa ukuba wenze ebusweni bukaFaro zonke izimangaliso engizibeke
esandleni sakho; kepha mina ngiyakuyenza lukhuni inhliziyo yakhe; akayikubayeka abantu ukuba
bahambe. 22 Uyakuthi kuFaro: ‘Usho kanje uJehova, uthi: U-Israyeli uyindodana yami, uyizibulo
lami. 23 Ngiyakutshela: "Yiyeke indodana yami ukuba ihambe ingikhonze," kepha awuyiyekanga;
bheka, sengiyakubulala indodana yakho, izibulo lakho.’"
24
Kwathi endleleni endlini yezihambi uJehova wahlangana naye, wafuna ukumbulala. 25 USipora
wayesethatha insengetsha, wanquma ijwabu lendodana yakhe, waliphonsa ngasezinyaweni zakhe,
wathi: "Impela ungumyeni wegazi kimi." 26 Wamdedela-ke. Khona wathi: "Ngumyeni wegazi
ngenxa yokusoka." 27 UJehova wayesethi ku-Aroni: "Hamba umhlangabeze uMose ehlane."
Wahamba, wahlangana naye entabeni kaNkulunkulu, wamanga. 28 UMose wamtshela u-Aroni
onke amazwi kaJehova amthume nawo, nezibonakaliso zonke amyale ngazo. 29 OMose no-Aroni
baya, babutha onke amalunga abantwana bakwa-Israyeli; 30 u-Aroni wakhuluma onke amazwi
uJehova awakhulume kuMose, wazenza izibonakaliso emehlweni abantu. 31 Abantu bakholwa-
ke. Sebezwile ukuthi uJehova ubahambele abantwana bakwa-Israyeli, nokuthi ukubonile
ukuhlupheka kwabo, base bekhothama, bakhuleka.

5
1
Ngasemuva oMose no-Aroni bafika, bathi kuFaro: "Usho kanje uJehova uNkulunkulu ka-
Israyeli, uthi: ‘Bavumele abantu bami ukuba bahambe, bangenzele umkhosi ehlane.’" 2 Wathi
uFaro: "Ngubani uJehova ukuba ngilalele izwi lakhe, ngimyeke u-Israyeli ukuba ahambe na?
Angimazi uJehova, futhi angiyikumvumela u-Israyeli ukuba ahambe."
3
Base bethi: "UNkulunkulu wamaHeberu uhlangene nathi; ake sihambe ibanga lezinsuku
ezintathu, siye ehlane, sihlabele uJehova uNkulunkulu wethu, funa asehlele ngesifo
nangenkemba." 4 Inkosi yaseGibithe yathi kubo: "Nibakhumulelani abantu emithwalweni yabo
nina Mose no-Aroni na? Hambani, niye emisebenzini yenu." 5 UFaro wathi: "Bheka, abantu
sebebaningi ezweni, nokho niyabaphumuza emithwalweni yabo." 6 Ngalona lolo suku uFaro
wayala abaphathi babantu nezinduna zabo, wathi: 7 "Anisayikubanika abantu utshani bokwenza
izitini njengaphambili; mabahambe bazibuthele utshani. 8 Kepha isilinganiso sezitini ekade
besenza, bamiseleni sona, ningasinciphisi, ngokuba bayenqena; ngalokho bayakhala bathi:
‘Masihambe sihlabele uNkulunkulu wethu.’ 9 Mayenziwe ibe nzima imisebenzi phezu kwabantu,
bayisebenze, banganakekeli amazwi okukhohlisa."
10
Baphuma-ke abaphathi babantu nezinduna zabo, bakhuluma kubantu, bathi: "UFaro usho uthi:
‘Angisayikuninika utshani.’ 11 Hambani nina, nizifunele utshani, lapho ningabuthola khona,
ngokuba imisebenzi yenu ayiyikuncishiswa ngalutho." 12 Base behlakazeka abantu ezweni lonke
laseGibithe ukuyobutha izinhlanga zibe yibona tshani babo. 13 Abaphathi babaqhuba, bathi:
"Qedani imisebenzi yenu, imisebenzi yemihla ngemihla, njengasezinsukwini kusekhona utshani."
14
Izinduna zabantwana bakwa-Israyeli abazibeke phezu kwabo abaphathi bakaFaro zashaywa,
zabuzwa ukuthi: "Aniqedanga ngani umsebenzi wenu izolo nanamuhla ukubumba izitini
njengaphambili na?"
15
Zase zifika izinduna zabantwana bakwa-Israyeli, zakhala kuFaro, zathi: "Uziphathelani
izinceku zakho kanje na? 16 Izinceku zakho aziphiwanga tshani; nokho bathi kithi: ‘Bumbani
izitini.’ Futhi bheka, izinceku zakho ziyashaywa, kepha icala likubantu bakho." 17 Kepha wathi:
"Yinina enenqena, yebo, niyenqena; ngalokho nithi: ‘Ake sihambe sihlabele uJehova.’ 18
Ngalokho hambani nisebenze, ngokuba aniyikuphiwa tshani, kepha isilinganiso sezitini
niyakusiqeda." 19 Izinduna zabantwana bakwa-Israyeli zabona ukuthi basekuhluphekeni, lapho
kuthiwa: "Aniyikunciphisa izitini zenu esilinganisweni semihla ngemihla." 20 Zahlangana
noMose no-Aroni ababemi khona ukuzihlangabeza zisaphuma kuFaro. 21 Zathi kubo: "UJehova
makanibheke, ahlulele, ngokuba nilenzile iphunga lethu linuke kabi emehlweni kaFaro
nasemehlweni ezinceku zakhe, nibeke inkemba esandleni sabo ukuba basibulale." 22 UMose
wayesebuyela kuJehova, wathi: "Nkosi, wenzeleni okubi kulaba bantu na? Ungithumeleni mina
na? 23 Selokhu ngafika kuFaro ukukhuluma egameni lakho, ubaphathe kabi laba bantu, nawe
awubophulanga nakanci abantu bakho."

6
1
UJehova wathi kuMose: "Manje usuzakubona lokho engiyakukwenza kuFaro, ngokuba ngenxa
yesandla esiqinileyo uyakubayeka ukuba bahambe, nangenxa yesandla esinamandla
uyakubaxosha ezweni lakhe." 2 UNkulunkulu wakhuluma kuMose, wathi kuye: "NginguJehova; 3
ngabonakala ku-Abrahama, naku-Isaka, nakuJakobe njengoSomandla, kepha ngegama lami
lokuthi uJehova ngangingaziwa kubo. 4 Futhi ngamisa isivumelwano sami nabo ukuyobanika
izwe laseKhanani, izwe lokugogobala kwabo, lapho bebegogobala khona. 5 Yebo, futhi ngizwile
ukububula kwabantwana bakwa-Israyeli abenziwe izigqila ngabaseGibithe; ngiyakhumbula
isivumelwano sami. 6 "Ngalokho yisho kubantwana bakwa-Israyeli ukuthi: ‘NginguJehova;
ngizakunikhipha emithwalweni yabaseGibithe, nginikhulule ebugqileni benu, nginihlenge
ngengalo eyeluliweyo nangezahlulelo ezinkulu. 7 Ngiyakunithatha nibe yisizwe sami, mina ngibe
nguNkulunkulu wenu; niyokwazi ukuthi nginguJehova uNkulunkulu wenu onikhipha
emithwalweni yabaseGibithe. 8 Ngiyakuningenisa ezweni engaphakamisa isandla sami ngalo
ukulinika u-Abrahama, no-Isaka, noJakobe; ngiyakunipha lona libe yifa; nginguJehova.’" 9
UMose wakhuluma-ke kanjalo kubo abantwana bakwa-Israyeli; kepha abamlalelanga uMose
ngenxa yenhliziyo encane nemisebenzi esindayo.
10
UJehova wakhuluma kuMose, wathi: 11 "Ngena ukhulume kuFaro inkosi yaseGibithe ukuba
ivumele abantwana bakwa-Israyeli ukuphuma ezweni lakhe." 12 UMose wakhuluma ebusweni
bukaJehova, wathi: "Bheka, abantwana bakwa-Israyeli abangilalelanga; uFaro angangilalela
kanjani, nginezindebe zomlomo ezingasokwanga, na?" 13 UJehova wakhuluma kuMose naku-
Aroni ukuba bayale abakwa-Israyeli noFaro inkosi yaseGibithe ukukhipha abantwana bakwa-
Israyeli ezweni laseGibithe.
14
Laba bayizinhloko zezindlu zawoyise: amadodana kaRubeni izibulo lika-Israyeli: ngoHanoki,
noPhalu, noHesironi, noKarmi; yile imindeni kaRubeni. 15 Amadodana kaSimeyoni:
ngoJemuweli, noJamini, no-Ohade, noJakini, noSohari, noShawule indodana yowesifazane
waseKhanani; yile imindeni kaSimeyoni. 16 Lawa angamagama amadodana kaLevi
ngezizukulwane zawo: ngoGereshoni, noKohati, noMerari; iminyaka yokuhamba kukaLevi
yayiyiminyaka eyikhulu namashumi amathathu nesikhombisa. 17 Amadodana kaGereshoni:
ngoLibini noShimeyi ngemindeni yawo. 18 Amadodana kaKohati: ngo-Amramu, noJisihari,
noHebroni, no-Uziyeli; iminyaka yokuhamba kukaKohati yayiyiminyaka eyikhulu namashumi
amathathu nantathu. 19 Amadodana kaMerari: ngoMaheli noMushi; yile imindeni yamaLevi
ngezizukulwane zayo. 20 U-Amramu wazithathela uJokebedi udadewabo kayise, abe ngumkakhe;
wamzalela o-Aroni noMose; iminyaka yokuhamba kuka-Amramu yayiyikhulu namashumi
amathathu nesikhombisa. 21 Amadodana kaJisihari: ngoKora, noNefegi, noZikiri. 22 Amadodana
ka-Uziyeli: ngoMishayeli, no-Elisafani, noSitri. 23 U-Aroni wazithathela u-Elisheba indodakazi
ka-Aminadaba, udadewabo kaNaheshoni, abe ngumkakhe; wamzalela oNadabi, no-Abihu, no-
Eleyazare, no-Itamari. 24 Amadodana kaKora: ngo-Asiri, no-Elkana, no-Abiyasafa; yile imindeni
kaKora. 25 U-Eleyazare indodana ka-Aroni wazithathela enye yamadodakazi kaPhuthiyeli, ibe
ngumkakhe; yamzalela uFinehasi. Yilezi izinhloko zawoyise bamaLevi ngemindeni yawo. 26
Yibo labo o-Aroni noMose uJehova athi kubo: "Khiphani ezweni laseGibithe abantwana bakwa-
Israyeli ngamabandla abo." 27 Yibo labo ababekhuluma kuFaro inkosi yaseGibithe ukuba akhiphe
abantwana bakwa-Israyeli eGibithe; yibo oMose no-Aroni. 28 Kwathi mhla uJehova ekhuluma
kuMose ezweni laseGibithe, 29 uJehova washo kuMose, wathi: "NginguJehova; khuluma kuFaro
inkosi yaseGibithe konke engikukhuluma kuwe." 30 Wayesethi uMose ebusweni bukaJehova:
"Bheka, ngingowezindebe zomlomo ezingasokiwe; uFaro angangilalela kanjani na?"

7
1
UJehova wathi kuMose: "Bheka, ngikwenze ube njengonkulunkulu kuFaro; u-Aroni umfowenu
uyakuba ngumprofethi wakho. 2 Wena uyakukhuluma konke engikuyala ngakho; u-Aroni
umfowenu uyakukhuluma kuFaro ukuba abavumele abantwana bakwa-Israyeli ukuphuma ezweni
lakhe. 3 Mina ngiyakuyenza inhliziyo kaFaro ibe lukhuni, ngandise izibonakaliso zami
nezimangaliso zami ezweni laseGibithe. 4 Kepha uFaro akayikunilalela; ngiyakubeka isandla
sami phezu kweGibithe, ngikhiphe amabandla ami, isizwe sami, abantwana bakwa-Israyeli,
ezweni laseGibithe ngezahlulelo ezinkulu. 5 AbaseGibithe bayokwazi ukuthi nginguJehova, nxa
ngelula isandla sami phezu kweGibithe, ngikhiphe abantwana bakwa-Israyeli phakathi kwabo." 6
OMose no-Aroni benze njalo; njengalokho uJehova ebayalile, benze njalo-ke. 7 UMose
wayeneminyaka engamashumi ayisishiyagalombili, u-Aroni eneminyaka engamashumi
ayisishiyagalombili nantathu, mhla bekhuluma kuFaro.
8
UJehova wakhuluma koMose no-Aroni, wathi: 9 "Nxa uFaro ekhuluma kini, ethi: ‘Zifakazeleni
ngesimangaliso,’ uyakusho ku-Aroni ukuthi: ‘Thatha induku yakho, uyiphonse phansi phambi
kukaFaro,’ ukuze iphenduke inyoka." 10 OMose no-Aroni bangena kuFaro, benza njengalokho
uJehova ebayalile; u-Aroni waphonsa phansi induku yakhe phambi kukaFaro naphambi
kwezinceku zakhe, yaphenduka inyoka. 11 Khona uFaro wabiza izihlakaniphi nabalumbi; izanusi
zaseGibithe nazo zenze njalo ngemilingo yazo. 12 Ngokuba yilowo nalowo waphonsa phansi
induku yakhe, zaphenduka izinyoka; kepha induku ka-Aroni yagwinya izinduku zabo. 13
Inhliziyo kaFaro yaba lukhuni, kabalalelanga, njengalokho eshilo uJehova.
14
UJehova wayesethi kuMose: "Inhliziyo kaFaro ilukhuni: uyenqaba ukuba abantu bahambe. 15
Yana kuFaro kusasa ekuseni; bheka, uyaphuma ukuya emanzini; yima ogwini lomfula
ukumhlangabeza; induku eyaphenduka inyoka woyiphatha ngesandla sakho. 16 Wothi kuye:
‘UJehova, uNkulunkulu wamaHeberu, ungithume kuwe, uthi: Bavumele abantu bami ukuba
bahambe bangikhonze ehlane; bheka, kuze kube manje awulalelanga. 17 UJehova usho kanje,
uthi: Ngalokhu uyokwazi ukuthi nginguJehova: bheka, ngenduku esesandleni sami ngiyakushaya
phezu kwamanzi asemfuleni, aphenduke igazi. 18 Izinhlanzi ezisemfuleni ziyakufa, umfula
unuke; abaseGibithe bayakunengwa ngukuphuza amanzi emfuleni.’" 19 UJehova wathi kuMose:
"Yisho ku-Aroni, uthi: ‘Thatha induku yakho, welule isandla sakho phezu kwamanzi aseGibithe,
naphezu kwemifula, naphezu kweminonjana yabo, naphezu kweziziba, naphezu kwamachibi
amanzi abo onke ukuba aphenduke igazi,’ kube khona igazi ezweni lonke laseGibithe ezitsheni
zemithi nasezitsheni zamatshe." 20 OMose no-Aroni base bekwenza-ke njengalokho uJehova
ebayalile; waphakamisa induku, washaya amanzi asemfuleni emehlweni kaFaro nasemehlweni
ezinceku zakhe; onke amanzi asemfuleni aphenduka igazi. 21 Izinhlanzi zasemfuleni zafa; umfula
wanuka; abaseGibithe babengenakuphuza amanzi asemfuleni; igazi lalikhona ezweni lonke
laseGibithe. 22 Izanusi zaseGibithe zenze njalo ngemilingo yazo, yaze yaba lukhuni inhliziyo
kaFaro; kabalalelanga, njengalokho eshilo uJehova. 23 UFaro waphenduka wangena endlini
yakhe, kayibekanga inhliziyo yakhe nakulokho. 24 AbaseGibithe bemba nxazonke zomfula
ukuthola amanzi okuphuza, ngokuba babengenakuphuza amanzi asemfuleni. 25 Zaphelela
izinsuku eziyisikhombisa, selokhu uJehova eshayile umfula.

8
1
UJehova wayesethi kuMose: "Ngena kuFaro, uthi kuye: ‘Usho kanje uJehova, uthi: Bavumele
abantu bami ukuba bahambe, bangikhonze. 2 Uma wenqaba ukuba basuke, bheka, mina
ngiyakushaya izwe lakho lonke ngamasele; 3 umfula uyakuvama amasele; ayakukhuphuka,
angene endlini yakho, nasekamelweni lakho lokulala, naphezu kombhede wakho, nasendlini
yezinceku zakho, naphezu kwabantu bakho, nasemaziko akho, nasezingqwembeni zakho
zokuxova izinkwa. 4 Yebo, kuwena, nakubantu bakho, nasezincekwini zakho zonke
ayakwenyukela amasele.’" 5 UJehova wathi kuMose: "Yisho ku-Aroni, uthi: ‘Yelula isandla
sakho nenduku yakho phezu kwemifula, naphezu kweminonjana, naphezu kweziziba, wenyusele
ezweni laseGibithe.’" 6 U-Aroni wayeselula isandla sakhe phezu kwamanzi aseGibithe; amasele
akhuphuka-ke, asibekela izwe laseGibithe. 7 Izanusi zenze njalo ngemilingo yazo, zenyusela
amasele ezweni laseGibithe. 8 Khona uFaro wababiza oMose no-Aroni, wathi: "Ncengani
uJehova ukuba asuse amasele kimi nakubantu bami; ngizakuvumela abantu ukuba bahambe,
bahlabele uJehova." 9 UMose wathi kuFaro: "Ziphakamise phezu kwami, usho ukuthi
ngizakukuncengela ngasiphi isikhathi wena nezinceku zakho, nabantu bakho ukuba achithwe
amasele kuwe nasezindlini zakho, asale emfuleni kuphela." 10 Wayesethi: "Ngomuso." Wathi:
"Makube njengezwi lakho ukuba wazi ukuthi akakho onjengaye uJehova uNkulunkulu wethu. 11
Amasele ayakusuka kuwe, nasezindlini zakho, nasezincekwini zakho, nakubantu bakho, asale
emfuleni kuphela." 12 OMose no-Aroni baphuma kuFaro; uMose wakhala kuJehova ngamasele
ayewalethile kuFaro. 13 UJehova wenza njengezwi likaMose; amasele afa ezindlini,
nasemagcekeni, nasemasimini. 14 Bawabuthela izinqwaba ngezinqwaba, izwe lanuka. 15 Esebona
uFaro ukuthi kuyiphefu, wayenza lukhuni inhliziyo yakhe, kabalalelanga, njengalokho eshilo
uJehova.
16
UJehova wayesethi kuMose: "Yisho ku-Aroni, uthi: ‘Yelula induku yakho, ushaye uthuli
lomhlabathi, lube ngomiyane ezweni lonke laseGibithe.’" 17 Benze njalo-ke; u-Aroni welula
isandla sakhe nenduku yakhe, washaya uthuli lomhlabathi, lwaba ngominyane kubantu
nasezinkomeni; uthuli lonke lomhlabathi lwaba ngominyane ezweni lonke laseGibithe. 18
Nezanusi zenze njalo ngemilingo yazo ukuba ziveze omiyane, kepha zahluleka. Omiyane babe
khona kubantu nasezinkomeni. 19 Zase zithi izanusi kuFaro: "Lokhu kungumunwe
kaNkulunkulu." Kepha inhliziyo kaFaro yaba lukhuni, kabalalelanga, njengalokho eshilo
uJehova.
20
UJehova wayesethi kuMose: "Vuka ekuseni kusasa, ume phambi kukaFaro; bheka, uyaphuma
ukuya emanzini; thana kuye: ‘UJehova usho kanje, uthi: Bavumele abantu bami ukuba bahambe
bangikhonze. 21 Ngokuba uma wenqaba ukuba basuke, bheka, ngizakuthumela kuwe izibawu,
nakuzo izinceku zakho, nakubantu bakho, nasezindlini zakho; izindlu zabaseGibithe
ziyakugcwala izibawu kanye nomhlabathi ezikuwo. 22 "‘Ngalolo suku ngiyakwahlukanisa izwe
laseGosheni abakhe kulo abantu bami ukuba kungabikho izibawu khona, ukuze wazi ukuthi
nginguJehova phakathi kwezwe. 23 Ngizakwahlukanisa abantu bami nabantu bakho; ngomuso
siyakuvela lesi sibonakaliso.’" 24 Wenze njalo uJehova; kwangena uswebezane olwesabekayo
lwezibawu endlini kaFaro, nasezindlini zezinceku zakhe, nasezweni lonke laseGibithe; izwe
lachithwa ngenxa yezibawu. 25 Khona uFaro wababiza oMose no-Aroni, wathi: "Hambani
nihlabele uNkulunkulu wenu kuleli zwe." 26 Wayesethi uMose: "Akufanele ukwenze njalo,
ngokuba siyakuhlabela uJehova uNkulunkulu wethu lokhu okunengeka kwabaseGibithe; bheka,
singahlaba okunengeka kwabaseGibithe emehlweni abo, bangasikhandi ngamatshe, na? 27
Siyakuhamba ibanga lezinsuku ezintathu, siye ehlane, sihlabele uJehova uNkulunkulu wethu,
njengalokho ezakusiyala." 28 Wayesethi uFaro: "Ngizakunivumela ukuba nihambe nihlabele
uJehova uNkulunkulu wenu ehlane, kepha ningayi kude kakhulu nokho; ngikhulekeleni." 29
Wathi uMose: "Bheka, ngiyaphuma kuwe; ngiyakuncenga uJehova ukuba izibawu zimuke, zisuke
kuFaro, nakuzo izinceku zakhe, nakubantu bakhe ngomuso; kodwa uFaro angabuyi akhohlise
ngokungavumeli abantu ukuba bahambe bahlabele uJehova." 30 UMose wayesephuma kuFaro,
wamncenga uJehova. 31 UJehova wayesenza njengezwi likaMose; wasusa izibawu kuFaro,
nakuzo izinceku zakhe, nakubantu bakhe; akwasala nesisodwa. 32 UFaro wayenza lukhuni
inhliziyo yakhe nangaleso sikhathi futhi, kabavumelanga abantu ukuba bahambe.

9
1
UJehova wayesethi kuMose: "Ngena kuFaro, umtshele ukuthi: ‘Usho kanje uJehova,
uNkulunkulu wamaHeberu, uthi: Bavumele abantu bami ukuba bahambe, bangikhonze. 2
Ngokuba uma wenqaba ukuba bahambe usababambile, 3 bheka, isandla sikaJehova siyakuba
phezu kwemfuyo yakho esendle, naphezu kwamahhashi, naphezu kwezimbongolo, naphezu
kwamakamela, naphezu kwezinkomo, naphezu kwezimvu, silethe isifo esinzima kakhulu. 4
UJehova uyakwahlukanisa imfuyo yakwa-Israyeli nemfuyo yaseGibithe, kungafi lutho kukho
konke okwabantwana bakwa-Israyeli.’" 5 UJehova wanquma isikhathi, wathi: "Kusasa uJehova
uzakwenza lokhu ezweni." 6 Wakwenza-ke lokho uJehova ngangomuso; yafa yonke imfuyo
yaseGibithe, kepha emfuyweni yabantwana bakwa-Israyeli akwafa neyodwa. 7 UFaro
wathumela; bheka, emfuyweni yakwa-Israyeli akufanga neyodwa; kepha inhliziyo kaFaro
yayilukhuni, kabavumelanga abantu ukuba bahambe.
8
UJehova wayesethi kuMose naku-Aroni: "Caphunani izinkweshe zomlotha waseziko uMose
awusakazele ngasezulwini phambi kukaFaro. 9 Uyakuba yibhuqu ezweni lonke laseGibithe,
uphenduke amathumba ayakuqhamuka nezilonda kubantu nasezinkomeni ezweni lonke
laseGibithe." 10 Base bethatha umlotha waseziko, bema phambi kukaFaro; uMose wawusakazela
ngasezulwini, waphenduka amathumba aqhamuka nezilonda kubantu nasezinkomeni. 11 Izanusi
zazingenakuma phambi kukaMose ngenxa yamathumba, ngokuba amathumba ayekhona kuzo
izanusi nakubo bonke abaseGibithe. 12 UJehova wayenza lukhuni inhliziyo kaFaro,
kabalalelanga, njengalokho uJehova eshilo kuMose.
13
UJehova wayesethi kuMose: "Vuka ekuseni kusasa, ume phambi kukaFaro, uthi kuye:
‘UJehova, uNkulunkulu wamaHeberu, usho kanje, uthi: Bavumele abantu bami ukuba bahambe,
bangikhonze. 14 Ngokuba kulesi sikhathi ngizakuthuma zonke izinhlupho zami enhliziyweni
yakho, nasezincekwini zakho, nakubantu bakho, ukuze wazi ukuthi akakho onjengami emhlabeni
wonke. 15 Ngokuba ngase ngiselule isandla sami, ngakushaya wena nabantu bakho ngesifo, uze
uchitheke emhlabeni, 16 kepha ngikumise ngalokhu ukuba ngikubonise amandla ami, igama lami
lishunyayelwe emhlabeni wonke. 17 Usabavimbela abantu bami, ungabavumeli ukuba bahambe,
na? 18 Bheka, kusasa ngalesi sikhathi ngiyakuwisa isichotho esinzima kakhulu, esingazange sibe
khona esingaka eGibithe, selokhu lakhiwa kuze kube manje. 19 Ngalokho thuma, ubuyise imfuyo
yakho nakho konke onakho endle; bonke abantu nazo zonke izinkomo okuyakufunyanwa endle
kungagoduswanga kuyakuwelelwa yisichotho, kufe.’" 20 Yena owalesaba izwi likaJehova
phakathi kwezinceku zikaFaro wazenza izinceku zakhe nezinkomo zakhe ukuba zibalekele
ezindlini. 21 Kepha onganakanga izwi likaJehova washiya izinceku zakhe nemfuyo yakhe endle.
22
Wayesethi uJehova kuMose: "Yelula isandla sakho ngasezulwini ukuba kuwe isichotho ezweni
lonke laseGibithe, phezu kwabantu, naphezu kwazinkomo naphezu kwayo yonke imifino ezweni
lonke laseGibithe." 23 UMose wayeselula induku yakhe ngasezulwini; uJehova wathuma
ukuduma nesichotho; nomlilo wehlela emhlabeni; uJehova wawisa isichotho phezu kwezwe
laseGibithe. 24 Kwase kuwa isichotho nomlilo owanyazima njalo phakathi kwesichotho;
kwakunzima kakhulu, okwakungazange kube khona ezweni laseGibithe okungangako, selokhu
laba yisizwe. 25 Isichotho sashaya konke okwakusendle, abantu nezinkomo, ezweni lonke
laseGibithe; isichotho sashaya yonke imifino yasendle, saphula yonke imithi yasendle. 26 Ezweni
laseGosheni kuphela, lapho babe khona abantwana bakwa-Israyeli, kwakungawi sichotho. 27
UFaro wathuma wababiza oMose no-Aroni, wathi kubo: "Ngonile lesi sikhathi; uJehova ulungile,
kepha mina nabantu bami sibabi. 28 Ncengani kuJehova, ngokuba sekwanele lokhu kuduma
okungaka nesichotho; ngizakunivumela ukuba nihambe, ningabe nisahlala." 29 Wayesethi uMose
kuye: "Nxa sengiphumile emzini, ngizakwelula izandla zami kuJehova; kuyakunqamuka
ukuduma, nesichotho asisayikuba khona, ukuze wazi ukuthi umhlaba ungokaJehova. 30 Kepha
wena nezinceku zakho ngiyazi ukuthi anikamesabi uJehova uNkulunkulu." 31 Kwashaywa
ifilakisi nebhali, ngokuba ibhali lalikhahlele, nefilakisi laliqhakazile. 32 Kepha ukolweni nespelite
akushaywanga, ngokuba kwakungakakhuli. 33 UMose waphuma emzini kaFaro, welula izandla
zakhe kuJehova; kwanqamuka-ke ukuduma nesichotho, alabe lisana emhlabeni. 34 UFaro
esebonile ukuthi imvula nesichotho nokuduma sekunqamukile, wabuye wona, wayenza lukhuni
inhliziyo yakhe, yena nezinceku zakhe. 35 Inhliziyo kaFaro yayilukhuni, kabavumelanga
abantwana bakwa-Israyeli ukuba bahambe, njengalokho uJehova eshilo ngoMose.

10
1
UJehova wayesethi kuMose: "Ngena kuFaro, ngokuba ngenze lukhuni inhliziyo yakhe
nenhliziyo yezinceku zakhe ukuba ngizenze lezi zibonakaliso zami phakathi kwabo, 2 ukuze
utshele indodana yakho ezindlebeni nendodana yendodana yakho lokho engikwenzele iGibithe,
nezibonakaliso zami engizenzile phakathi kwabo, nize nazi ukuthi nginguJehova." 3 OMose no-
Aroni bangena-ke kuFaro, bathi kuye: "Usho kanje uJehova, uNkulunkulu wamaHeberu, uthi:
‘Koze kube nini wenqaba ukuzithoba phambi kwami na? Bavumele abantu bami ukuba bahambe,
bangikhonze. 4 Ngokuba uma wenqaba ukuba abantu bami bahambe, bheka, ngomuso
ngizakuletha isikhonyane ezweni lakho. 5 Siyakusibekela ubuso bomhlaba, ukuze kungabe
kusabonwa mhlabathi; siyakudla okuseleyo okusindile, enikushiyelwe yisichotho, sidle yonke
imithi enimilelayo endle. 6 Izindlu zakho, nezindlu zezinceku zakho zonke, nezindlu zabo bonke
abaseGibithe ziyakugcwaliswa yiso, abangazange basibone esinjalo oyihlo nawoyise bawoyihlo,
selokhu bafika emhlabeni kuze kube namuhla.’"Waphenduka, waphuma kuFaro. 7 Kepha
izinceku zikaFaro zathi kuye: "Lo muntu uzakuba lugibe kuze kube nini na? Bavumele abantu
ukuba bahambe bakhonze uJehova uNkulunkulu wabo. Awukwazi ukuthi iGibithe seliyashabalala
na?" 8 OMose no-Aroni babuyiselwa kuFaro; wathi kubo: "Hambani nimkhonze uJehova
uNkulunkulu wenu; kepha ngobani abazakuhamba na?" 9 UMose wathi: "Siyakuhamba nabasha
bethu, nabadala bethu, namadodana ethu, namadodakazi ethu, nezimvu zethu, nezinkomo zethu,
ngokuba sinomkhosi kaJehova." 10 Wayesethi kubo: "Makabe nani-ke uJehova, njengokuba
ngizakunivumela ukuba nihambe nezingane zenu; bhekani, ngokuba okubi kuphambi kwenu. 11
Kungabi njalo; hambani nina madoda nimkhonze uJehova, ngokuba yikho enikufunayo." Base
bexoshwa ebusweni bukaFaro.
12
UJehova wayesethi kuMose: "Yelula isandla sakho phezu kwezwe laseGibithe, kufike
isikhonyane ukuba senyukele ezweni laseGibithe, sidle imifino yonke, konke okwashiywa
yisichotho." 13 UMose wayeselula induku yakhe phezu kwezwe laseGibithe; uJehova waletha
umoya wasempumalanga ezweni ngalo lonke lolo suku nobusuku bonke; sekusile umoya
wasempumalanga waletha isikhonyane. 14 Isikhonyane senyukela ezweni lonke laseGibithe,
sahlala ezweni lonke laseGibithe, sasinzima kakhulu; ngaphambi kwaso kwakungazange kube
khona isikhonyane esingangaso, nangasemva kwaso asisayikuba khona esingangaso. 15 Ngokuba
sasibekela ubuso bonke bomhlaba, laze laba mnyama izwe. Sadla imifino yonke nezithelo zonke
zemithi ezishiywe yisichotho; akwasala lutho oluluhlaza emithini nasemifinweni yasendle ezweni
lonke laseGibithe. 16 Khona uFaro washesha wababiza oMose no-Aroni, wathi: "Ngonile
kuJehova uNkulunkulu wenu nakinina. 17 Ngalokho ake nithethelele isono sami ngalesi sikhathi
esisodwa nje, nincenge uJehova uNkulunkulu wenu ukuba asuse kimi lokhu kufa kuphela." 18
Waphuma kuFaro, wamncenga uJehova. 19 UJehova wayesewuphendula umoya waba
ngowasentshonalanga onamandla amakhulu; wona wasusa isikhonyane, wasilahla eLwandle
Olubomvu; akwasala sikhonyane nesisodwa ezweni lonke laseGibithe. 20 Kepha uJehova
wayenza lukhuni inhliziyo kaFaro, kabavumelanga abantwana bakwa-Israyeli ukuba bahambe.
21
UJehova wayesethi kuMose: "Yelula isandla sakho ngasezulwini ukuba kube khona
ubumnyama ezweni laseGibithe obuphatheka ngesandla." 22 UMose wayeseselula isandla sakhe
ngasezulwini; kwaba khona isigayegaye esinzima ezweni lonke laseGibithe izinsuku ezintathu. 23
Ababonananga; akusukanga muntu endaweni yakhe izinsuku zaze zaba ntathu; kepha kubo bonke
abantwana bakwa-Israyeli kwakukhona ukukhanya emakhaya abo. 24 UFaro wambiza uMose,
wathi: "Hambani nimkhonze uJehova, kusale kuphela izimvu zenu nezinkomo zenu; izingane
zenu zingahamba nani." 25 Wathi uMose: "Wonikela esandleni sethu imihlatshelo neminikelo
yokushiswa, ukuze sihlabele uJehova uNkulunkulu wethu. 26 Imfuyo yethu nayo iyakuhamba
nathi; akuyikusala nanselo, ngokuba siyakuthatha kuyo lokhu esiyakumkhonza ngakho uJehova
uNkulunkulu wethu; asikwazi esiyakumkhonza ngakho uJehova, singakafiki khona." 27 Kepha
uJehova wayenza lukhuni inhliziyo kaFaro, kabavumelanga ukuba bahambe. 28 UFaro wathi
kuye: "Suka kimi, uqaphele ukuba ungabuboni ubuso bami futhi; ngokuba mhla ubona ubuso
bami, uyakufa." 29 Wathi uMose: "Ukhulume kahle; angisayikubuye ngibone ubuso bakho."

11
1
UJehova wayesethi kuMose: "Ngisezakuletha inhlupheko eyodwa kuFaro nakulo iGibithe;
ngasemuva uyakunivumela ukuba nisuke lapha; yebo, nxa eniyeka ukuba nihambe, uzakunixosha
nokunixosha lapha. 2 Khuluma manje ezindlebeni zabantu ukuba yilowo nalowo mlisa acele
kumakhelwane wakhe, yilowo nalowo wesifazane acele kumakhelwane wakhe izinto zesiliva
nezinto zegolide." 3 UJehova wabapha abantu umusa emehlweni abaseGibithe. Futhi lowo muntu
uMose wayemkhulu kakhulu ezweni laseGibithe emehlweni ezinceku zikaFaro nasemehlweni
abantu.
4
UMose wathi: "Usho kanje uJehova, uthi: ‘Ngaphakathi kwamabili ngizakuphuma, ngiye
phakathi kweGibithe; 5 amazibulo onke asezweni laseGibithe ayakufa, kusukela kulo izibulo
likaFaro ohlala esihlalweni sakhe sobukhosi kuze kube kulo izibulo lencekukazi engasetsheni
lokugaya, kanye namazibulo onke ezinkomo. 6 Kuyakuba khona ukukhala okukhulu ezweni
lonke laseGibithe, okungazange kube khona okungangako, okungasayikuba khona futhi
okungangako. 7 Kepha kubo bonke abantwana bakwa-Israyeli akuyikubakho nanja
eyakugwavumela umuntu nenkomo,’ ukuze nazi ukuthi uJehova uyahlukanisa iGibithe no-
Israyeli. 8 Zonke lezi zinceku zakho ziyakwehla, zifike kimi, zingikhothamele, zithi: ‘Phuma
wena nabantu bonke abakulandelayo; emva kwalokho ngizakuphuma.’"Waphuma kuFaro evutha
ulaka. 9 Wayesethi uJehova kuMose: "UFaro akayikukulalela ukuba izimangaliso zami zande
ezweni laseGibithe." 10 OMose no-Aroni bazenza zonke lezi zimangaliso ebusweni bukaFaro;
uJehova wayenza lukhuni inhliziyo kaFaro, kabavumelanga abantwana bakwa-Israyeli ukuphuma
ezweni lakhe.

12
1
UJehova wayesekhuluma kuMose naku-Aroni ezweni laseGibithe, ethi: 2 "Le nyanga iyakuba
kini inhloko yezinyanga, ibe yinyanga yokuqala emnyakeni kini. 3 Khulumani kuyo inhlangano
yonke yakwa-Israyeli, nithi: ‘Ngolweshumi lwale nyanga yilowo nalowo makazithathele iwundlu
ngokwezindlu zawoyise, kube yiwundlu ngendlu; 4 uma abomuzi bengalaneli iwundlu,
wolithatha nomakhelwane wakhe oseduze nomuzi wakhe njengenani labantu; kulelo nalelo
wundlu anobala inani elithile njengokudla kwalowo nalowo muntu. 5 Iwundlu malingabi nasici,
libe ngeleduna, libe nomnyaka munye, nilithathe ezimvini noma ezimbuzini; 6 niyakuligcina
kuze kube sosukwini lweshumi nane lwaleyo nyanga; ibandla lonke lenhlangano yakwa-Israyeli
liyakulihlaba ngakusihlwa. 7 Bazakuthabatha igazi, balibhece ezinsikeni zombili zomnyango
nasekhothameni lomnyango ezindlini abayakulidlela kuzo. 8 Bazakuyidla inyama ngalobo
busuku, yosiwe ngomlilo; bayakuyidla kanye nesinkwa esingenamvubelo nemifino ebabayo. 9
Ningalidli liseluhlaza, noma liphekwe nokuphekwa ngamanzi, kepha losiwe ngomlilo, ikhanda
lalo kanye nemilenze yalo nezibilini zalo. 10 Ningashiyi lutho kuze kube sekuseni; kepha okusele
kulo kuze kube sekuseni nizakukushisa ngomlilo. 11 Niyakulidla kanje: izinkalo zenu ziboshiwe,
izicathulo zenu zisezinyaweni zenu, nezindondolo zenu zisezandleni zenu; niyakulidla
ngokushesha; kuyiphasika likaJehova. 12 "‘Ngokuba ngiyakudabula izwe laseGibithe ngalobo
busuku, ngibulale onke amazibulo ezweni laseGibithe, abantu nezinkomo, ngenze izahlulelo kuzo
zonke izithixo zaseGibithe; nginguJehova. 13 Igazi liyakuba luphawu lwenu ezindlini lapho
nikhona; nanxa ngibona igazi, ngiyakudlula kini, ningehlelwa yisifo sokunibhubhisa, lapho
ngibulala izwe laseGibithe. 14 "‘Lolo suku luyakuba yisikhumbuzo kini, nilugcine lube
ngumkhosi kaJehova; anolugcina izizukulwane ngezizukulwane ngokomthetho waphakade. 15
Izinsuku eziyisikhombisa niyakudla isinkwa esingenamvubelo; yebo, ngosuku lokuqala
noyikhipha imvubelo ezindlini zenu, ngokuba bonke abadla okuvutshelweyo, kusukela osukwini
lokuqala kuze ku fike usuku lwesikhombisa, labo bantu bayakunqunywa kwa-Israyeli. 16
Ngosuku lokuqala niyakuba nomhlangano ongcwele, nangosuku lwesikhombisa nibe
nomhlangano ongcwele; kungasetshenzwa ngazo, kuphela okudliwa ngabantu bonke; lokhu
kodwa makwenziwe yinina. 17 "‘Niyakugcina umkhosi wesinkwa esingenamvubelo, ngokuba
ngalona lolo suku ngikhiphile amabandla enu ezweni laseGibithe; ngalokho anogcina lolu suku
ezizukulwaneni zenu zonke ngokomthetho waphakade. 18 Ngenyanga yokuqala ngosuku
lweshumi nane ngakusihlwa niyakudla isinkwa esingenamvubelo, kuze kufike usuku
lwamashumi amabili nanye lwenyanga ngakusihlwa. 19 Izinsuku eziyisikhombisa
akuyikutholakala mvubelo ezindlini zenu, ngokuba yilowo nalowo odlayo okuvutshelweyo yena
uyakunqunywa ebandleni lakwa-Israyeli, noma engumfokazi noma engowokuzalwa ezweni. 20
Ningadli lutho oluvutshelweyo; ezindlini zenu zonke anodla isinkwa esingenamvubelo.’"
21
UMose wayesebiza amalunga akwa-Israyeli, wathi kuwo: "Hambani nizithathele amawundlu
ngokwemindeni yenu, nihlabe iphasika. 22 Nothatha isithungu sehisopi, nisicwilise egazini
elisemcengezini, nibhece ikhothamo nezinsika zombili zomnyango ngegazi elisemcengezini;
akuyikuphuma muntu emnyango waleyo ndlu kuze kube sekuseni. 23 Ngokuba uJehova
uyakudabula ukuyoshaya abaseGibithe; nanxa ebona igazi elisekhothameni nasezinsikeni
zombili, uJehova uyakudlula kulowo mnyango, angamvumeli umbhubhisi ukuba angene ezindlini
zenu ukuyobulala. 24 "Niyakugcina le nto ibe ngumthetho kuwena nakuwo amadodana akho kuze
kube phakade. 25 Kuyakuthi lapho senifike ezweni uJehova azakuninika lona njengesithembiso
sakhe, niyakugcina inkonzo yakhe. 26 Kuyakuthi nxa abantwana benu besho kini, bethi: ‘Iyini le
nkonzo kini na?’ 27 nithi: ‘Kungumhlatshelo wephasika likaJehova owadlula kuzo izindlu
zabantwana bakwa-Israyeli mhla ebulala abaseGibithe, ezophula izindlu zethu.’"Abantu
bakhothama, bakhuleka. 28 Abantwana bakwa-Israyeli basuka, benze njalo; njengalokho uJehova
ebayalile oMose no-Aroni, benze njalo-ke.
29
Kwathi phakathi kwamabili uJehova wabulala onke amazibulo ezweni laseGibithe, kusukela
kulo izibulo likaFaro owayehlala esihlalweni sakhe sobukhosi kuze kube kulo izibulo lesiboshwa
esasisetilongweni, kanye namazibulo onke ezinkomo. 30 UFaro wavuka ebusuku, yena nezinceku
zakhe zonke, nabo bonke abaseGibithe; kwaba khona ukukhala okukhulu eGibithe, ngokuba
kwakungekhondlu, lapho kungafanga muntu khona. 31 Wababiza oMose no-Aroni ebusuku,
wathi: "Vukani niphume kubantu bami, nina nabantwana bakwa-Israyeli, nihambe niyokhonza
uJehova, njengalokho nishilo. 32 Thathani izimvu zenu nezinkomo zenu, njengalokho nishilo,
nihambe, ningibusise nami." 33 AbaseGibithe babebacindezela abantu ukuba babakhiphe ezweni
ngokushesha, ngokuba bathi: "Thina sonke sifile." 34 Abantu base bethatha inhlama yabo
ingakavutshelwa, nezingqwembe zabo zokuxova isinkwa, ziboshwe ezingutsheni zabo
emahlombe abo. 35 Abantwana bakwa-Israyeli benza-ke njengezwi likaMose; bacela
kwabaseGibithe izinto zesiliva, nezinto zegolide, nezingubo. 36 UJehova wabenzela abantu
umusa emehlweni abaseGibithe, babapha lokho abakucelayo. Babaphundla abaseGibithe.
37
Abantwana bakwa-Israyeli basuka eRamsesi, bafika eSukoti, kungathi abantu
abayizinkulungwane ezingamakhulu ayisithupha behamba phansi, bengamadoda ngaphandle
kwabantwana. 38 Kwenyuka nabo ingxubevange yabantu, nezimvu, nezinkomo, imfuyo eningi
kakhulu. 39 Ngenhlama abaphuma nayo eGibithe benza amaqebelengwane angenamvubelo,
ngokuba yayingavutshelwe, lokhu baxoshwa eGibithe bengenakulibala, futhi bengazilungiselanga
mphako. 40 Ukuhlala kwabantwana bakwa-Israyeli abakuhlalayo eGibithe kwakuyiminyaka
engamakhulu amane namashumi amathathu. 41 Kwathi ekupheleni kweminyaka engamakhulu
amane namashumi amathathu, kwathi ngalona lolo suku, amabandla onke kaJehova aphuma
ezweni laseGibithe. 42 Kungubusuku obuzakugcinelwa uJehova ngokubakhipha kwakhe ezweni
laseGibithe, ngubusuku bukaJehova obuzakugcinwa yibo bonke abantwana bakwa-Israyeli
ezizukulwaneni zabo.
43
UJehova wayesethi kuMose naku-Aroni: "Lokhu kungumthetho wephasika: owezizwe
makangalidli; 44 kepha zonke izigqila ezithengwa ngumuntu ngemali mazilidle, uma zisokiwe. 45
Izihambi noqashiweyo mabangalidli. 46 "Liyakudliwa endlini inye; ungaphumisi lutho lwenyama
ngaphandle kwendlu; ningaphuli thambo lalo. 47 Ibandla lonke lakwa-Israyeli liyakukugcina
lokhu. 48 "Nxa umfokazi ogogobeleyo kuwe ezakumgcinela uJehova iphasika, mabasoke bonke
abesilisa bakhe, asondele aligcine, abe njengowokuzalwa ezweni; kepha malingadliwa muntu
ongasokiwe. 49 Mawube munye umthetho kowokuzalwa ekhaya nakumfokazi ogogobeleyo
phakathi kwenu." 50 Benza kanjalo bonke abantwana bakwa-Israyeli; njengalokho ebayalile
oMose no-Aroni, benze njalo-ke. 51 Kwathi ngalona lolo suku uJehova wakhipha abantwana
bakwa-Israyeli ezweni laseGibithe ngamabandla abo.

13
1
UJehova wakhuluma kuMose, wathi: 2 "Ngahlukanisele onke amazibulo, konke okuvula isizalo
phakathi kwabantwana bakwa-Israyeli, kubantu nasezinkomeni; kungokwami." 3 UMose
wayesethi kubantu: "Khumbulani lolu suku eniphume ngalo eGibithe, indlu yobugqila, ngokuba
ngesandla esinamandla uJehova unikhiphile kule ndawo: akuyikudliwa sinkwa esivutshelweyo. 4
Namuhla niyaphuma, ngenyanga ka-Abibi. 5 Kuyakuthi nxa uJehova ekungenisile ezweni
lamaKhanani, nelamaHeti, nelama-Amori, nelamaHivi, nelamaJebusi alifungela koyihlo
ukukunika lona, izwe elivama ubisi nezinyosi, uyakugcina le nkonzo kule nyanga. 6 Izinsuku
eziyisikhombisa uyakudla isinkwa esingenamvubelo, ngolwesikhombisa kube khona umkhosi
kaJehova. 7 Isinkwa esingenamvubelo siyakudliwa izinsuku eziyisikhombisa; akuyikubonakala
sinkwa esivutshelweyo kuwe, kungabonwa namvubelo ezweni lakho lonke. 8 Uzakutshela
indodana yakho ngalolo suku, uthi: ‘Kungenxa yalokho uJehova angenzela khona ekuphumeni
kwami eGibithe.’ 9 Kuyakuba luphawu kuwe esandleni sakho, kube yisikhumbuzo phakathi
kwamehlo akho, ukuze umthetho kaJehova ube semlonyeni wakho, ngokuba ngesandla
esinamandla uJehova wakukhipha eGibithe. 10 Ngakho uyakuwugcina lo mthetho ngesikhathi
sawo iminyaka ngeminyaka.
11
"Kuyakuthi lapho uJehova esezakukungenisa ezweni lamaKhanani, njengalokho wafunga kuwe
nakoyihlo, akuphe lona, 12 wodlulisela kuJehova konke okuvula isizalo nawo onke amazibulo
ezinkomo onawo; amaduna onke azakuba ngakaJehova. 13 Onke amazibulo ezimbongolo
wowahlenga ngewundlu; uma ungawahlengi, wowaphula intamo; amazibulo onke abantu
kumadodana akho wowahlenga. 14 "Kuyakuthi lapho indodana yakho ikubuza ngesikhathi
esizayo, ithi: ‘Kuyini lokhu?’ wothi kuyo: ‘Ngesandla esinamandla uJehova wasikhipha eGibithe,
indlu yobugqila. 15 Kwathi uFaro evuma kalukhuni ukuba sihambe, uJehova wabulala amazibulo
onke asezweni laseGibithe, amazibulo abantu namazibulo ezinkomo; ngalokho ngiyahlabela
uJehova konke okuvula isizalo okungamaduna; kepha onke amazibulo amadodana ami
ngiyawahlenga.’ 16 Kuyakuba luphawu esandleni sakho nesikhumbuzo phakathi kwamehlo akho,
ngokuba ngesandla esinamandla uJehova wasikhipha eGibithe."
17
Kwathi uFaro esebavumele abantu ukuba bahambe, uNkulunkulu akabaholanga ngendlela
yasezweni lamaFilisti, noma kwakuyiyona eseduze; ngokuba uNkulunkulu wathi: "Funa
mhlawumbe abantu bazisole, nxa bebona impi, babuyele eGibithe." 18 Kepha uNkulunkulu
wabagwegwisa abantu ngendlela yasehlane ngaseLwandle Olubomvu; abantwana bakwa-Israyeli
bakhuphuka ezweni laseGibithe behlomile. 19 UMose wathatha amathambo kaJosefa, wahamba
nawo, ngokuba wayebafungisile nokubafungisa abakwa-Israyeli, ethi: "Impela uNkulunkulu
uyakunihambela nokunihambela, nikhuphule lapha amathambo ami kanye nani." 20 Basuka
eSukoti; baya bamisa e-Etamu eceleni kwehlane. 21 UJehova wahamba phambi kwabo emini
ngensika yefu eyobahola endleleni, nasebusuku ngensika yomlilo eyobakhanyisela ukuba
bahambe imini nobusuku. 22 Insika yefu emini nensika yomlilo ebusuku ayisukanga ebusweni
babantu.

14
1
UJehova wakhuluma kuMose, wathi: 2 "Yisho kwabakwa-Israyeli ukuba babuyele emuva,
bamise ngaphambi kwePhi Hahiroti, ngaphakathi kweMigidoli nolwandle, phambi kweBali
Sefoni; anomisa ngaselwandle, nibhekane nalo. 3 UFaro uyakuthi ngabantwana bakwa-Israyeli:
‘Badidekile ezweni, ihlane libavalele.’ 4 Ngiyakuyenza lukhuni inhliziyo kaFaro, abalandele;
ngiyakudunyiswa ngoFaro nangebandla lakhe lonke; abaseGibithe bayakwazi ukuthi
nginguJehova." Benze njalo-ke. 5 Inkosi yaseGibithe yabikelwa ukuthi abantu sebebalekile;
inhliziyo kaFaro neyezinceku zakhe yabaguqukela abantu, bathi: "Yini lokhu esikwenzileyo,
sabavumela abakwa-Israyeli ukuba bahambe, bangasikhonzi, na?" 6 Wabophela inqola yakhe,
wahamba nabantu bakhe. 7 Wathatha izinqola ezingamakhulu ayisithupha ezikhethiweyo,
nezinqola zonke zaseGibithe, nezinduna zazo zonke. 8 UJehova wayenza lukhuni inhliziyo
kaFaro inkosi yaseGibithe; waxosha abakwa-Israyeli; ngokuba abantwana bakwa-Israyeli
baphuma ngesandla esiphakamileyo. 9 AbaseGibithe babaxosha, amahhashi onke, nezinqola
zikaFaro, nabamahhashi bakhe, nempi yakhe, babafica bemise ngaselwandle ngasePhi Hahiroti
ngaphambi kweBali Sefoni.
10
UFaro esesondela, abantwana bakwa-Israyeli baphakamisa amehlo abo; bheka, abaseGibithe
babebalandela; base besaba kakhulu; abantwana bakwa-Israyeli bakhala kuJehova. 11 Bathi
kuMose: "Kungokuba kwakungekho mathuna eGibithe usikhiphile ukuba sifele ehlane na?
Usenzeleni lokhu, wasikhipha eGibithe, na? 12 Leli alisilo izwi esalikhuluma kuwe eGibithe,
sithi: ‘Siyeke, sikhonze abaseGibithe,’ na? Ngokuba bekuyakuba ngcono kithi ukubakhonza
abaseGibithe kunokuba sifele ehlane." 13 UMose wathi kubantu: "Ningesabi; qinani, nibone
ukusindisa kukaJehova azakunenzela khona namuhla, ngokuba abaseGibithe enibabonile
namuhla anisayikubuye nibabone naphakade." 14 UJehova uzakunilwela, nothula nina.
15
UJehova wayesethi kuMose: "Ukhalelani kimi na? Yisho kubantwana bakwa-Israyeli ukuba
bahambe. 16 Phakamisa wena induku yakho, welule isandla sakho phezu kolwandle,
ulwahlukanise; abantwana bakwa-Israyeli bazakuhamba phakathi kolwandle emhlabathini
owomileyo. 17 Bheka, mina ngiyakuzenza lukhuni izinhliziyo zabaseGibithe, babalandele;
ngizakudunyiswa ngoFaro nangempi yakhe yonke, ngezinqola zakhe nangabamahhashi bakhe. 18
AbaseGibithe bazakwazi ukuthi nginguJehova, nxa ngidunyisiwe ngoFaro, ngezinqola zakhe
nangabamahhashi bakhe." 19 Ingelosi kaNkulunkulu eyayihambile phambi kwempi ka-Israyeli
yasuka yahamba emva kwabo, nensika yefu yasuka phambi kwabo, yema emva kwabo. 20 Yafika
phakathi kwempi yaseGibithe nempi yakwa-Israyeli; kwakukhona ifu nobumnyama, noma
ikhanya ebusuku, ukuze izimpi zingakwazi ukusondelana ubusuku bonke.
21
UMose wayeselula isandla sakhe phezu kolwandle; uJehova wamukisa amanzi ngomoya
onamandla wasempumalanga ubusuku bonke, waphendula ulwandle lwaba ngumhlabathi
owomileyo, amanzi ahlukana. 22 Abantwana bakwa-Israyeli bangena phakathi kolwandle
emhlabathini owomileyo; amanzi aba lugange kubo ngakwesokunene nangakwesokhohlo. 23
AbaseGibithe babaxosha, bangena emva kwabo ngaphakathi kolwandle, namahhashi onke
kaFaro, nezinqola zakhe, nabamahhashi bakhe. 24 Kwathi ngomlindo wokusa uJehova walunguza
impi yabaseGibithe, esensikeni yomlilo neyefu, wayidunga impi yabaseGibithe. 25 Wawisa
amasondo ezinqola ukuba bahambise kalukhuni, baze bathi abaseGibithe: "Masibaleke ebusweni
buka-Israyeli, ngokuba uJehova uyabalwela emelene nabaseGibithe." 26 Wayesethi uJehova
kuMose: "Yelula isandla sakho phezu kolwandle ukuba amanzi abuyele phezu kwabaseGibithe,
phezu kwezinqola zabo nabamahhashi babo." 27 UMose wayeselula isandla sakhe phezu
kolwandle, ulwandle lwabuyela endaweni yalo ngokufika kokusa; abaseGibithe balubalekela;
uJehova wabathuntuthela abaseGibithe phakathi kolwandle. 28 Amanzi abuyela, asibekela
izinqola, nabamahhashi, nayo yonke impi kaFaro eyangena elwandle emva kwazo; akwasala
noyedwa kubo. 29 Kepha abantwana bakwa-Israyeli bahamba emhlabathini owomileyo phakathi
kolwandle; amanzi aba lugange kubo ngakwesokunene nangakwesokhohlo. 30 Kanjalo uJehova
wasindisa u-Israyeli esandleni sabaseGibithe; u-Israyeli wababona abaseGibithe befile ogwini
lolwandle. 31 U-Israyeli wabona umsebenzi omkhulu uJehova awenzile phezu kwabaseGibithe;
abantu base bemesaba uJehova, bakholwa nguJehova nenceku yakhe uMose.

15
1
Base behlabelela uMose nabantwana bakwa-Israyeli leli gama, bekhuluma bethi:
"Ngizakuhlabelela kuJehova, ngokuba uphakeme kakhulu; ihhashi nenkweli yalo ukuphonse
elwandle. 2 UJehova ungamandla ami nehubo lami; waba yinsindiso kimi; unguNkulunkulu
wami: ngizakumdumisa, noNkulunkulu kababa: ngizakumphakamisa. 3 UJehova uyindoda
yempi; nguJehova igama lakhe. 4 Izinqola zikaFaro nempi yakhe ukuphonse elwandle; izinduna
zakhe ezikhethiweyo zaminza eLwandle Olubomvu. 5 Izintwa ziyabasibekela; bashona
ezinzulwini njengetshe. 6 "Isandla sakho sokunene, Nkosi, sidumisekile ngamandla aso;
esokunene sakho, Nkosi, siyaphahlaza isitha. 7 Ngobukhulu bobukhosi bakho uyachitha
abakuvukelayo; uyathuma intukuthelo yakho, ibaqede njengamabibi. 8 Ngokufutha kwamakhala
akho amanzi anqwabeleka; izifufula zema njengenqwaba, amadlambi ashuqa phakathi kolwandle.
9
"Isitha sathi: ‘Ngiyakubaxosha, ngibafice, ngahlukanise impango, inhliziyo yami idele ngabo;
ngiyakuhosha inkemba yami, isandla sami sibachithe.’ 10 Waphephetha ngomoya wakho,
ulwandle lwabasibekela; baminzisa okomthofu emanzini anamandla. 11 "Ngubani onjengawe
Jehova phakathi kwawonkulunkulu; ngubani onjengawe okhazimula ngobungcwele, owesabeka
ngezibongo, owenza izimangaliso, na? 12 Welula isandla sakho sokunene, umhlaba wabagwinya.
13
"Ngomusa wakho wabahola abantu obahlengileyo; ngamandla akho wabayisa endlini yakho
engcwele. 14 Izizwe zizwile; ziyakuthuthumela; abakhe eFilistiya behlelwe luvalo. 15 Khona
aphaphatheka amakhosi akwa-Edomi; izikhulu zakwaMowabi zabanjwa yitwetwe; bonke abakhe
eKhanani baphelile amandla. 16 Bayehlelwa luvalo nokwesaba; ngokobukhulu bengalo yakho
bathulisa okwetshe, baze bawele abantu bakho, Jehova, baze bawele abantu bakho obathengileyo.
17
Uzakubangenisa, ubatshale entabeni yefa lakho, indawo ozenzele yona, Jehova, ukuba uhlale
kuyo, indlu engcwele, Nkosi, eziyimisile izandla zakho. 18 UJehova uyakubusa kuze kube
phakade." 19 Ngokuba amahhashi kaFaro angena elwandle kanye nezinqola zakhe nabamahhashi
bakhe, uJehova wabuyisela amanzi olwandle phezu kwabo; kepha abantwana bakwa-Israyeli
bahamba emhlabathini owomileyo ngaphakathi kolwandle. 20 UMiriyamu umprofethikazi,
udadewabo ka-Aroni, waphatha isigubhu ngesandla sakhe; bonke abesifazane baphuma emva
kwakhe bephethe izigubhu, besina. 21 UMiriyamu wabaphendula ngokuthi: "Hlabelelani
kuJehova, ngokuba uphakeme kakhulu; ihhashi nenkweli yalo ukuphonse elwandle."
22
UMose wayesebahola abakwa-Israyeli besuka eLwandle Olubomvu, baya ehlane laseShuri;
bahamba ehlane izinsuku ezintathu bengafumani manzi. 23 Sebefika eMara babengenakuphuza
amanzi aseMara, lokhu ayebaba; ngalokho igama lalo lathiwa iMara. 24 Abantu bakhonona
ngoMose, bathi: "Siyakuphuzani na?" 25 Wayesekhala kuJehova; uJehova wambonisa umuthi;
wawuphonsa emanzini, amanzi aba mtoti. Wabamisela khona isimiso nomthetho; wabavivinya
lapho, 26 wathi: "Uma ulalela nokulalela izwi likaJehova uNkulunkulu wakho, ukwenze
okulungile emehlweni akhe, ulalele imiyalo yakhe, ugcine izimiso zakhe zonke, angiyikubeka
phezu kwakho nasinye salezo zifo engizibeke phezu kwabaseGibithe, ngokuba nginguJehova
okuphilisayo." 27 Bafika e-Elimi, lapho kwakukhona imithombo eyishumi nambili yamanzi
namasundu angamashumi ayisikhombisa; bamisa khona ngasemanzini.

16
1
Basuka e-Elimi; ibandla lonke labantwana bakwa-Israyeli lafika ehlane laseSini eliphakathi
kwe-Elimi neSinayi ngosuku lweshumi nanhlanu lwenyanga yesibili emva kokuphuma ezweni
laseGibithe. 2 Lonke ibandla labantwana bakwa-Israyeli lakhonona ngoMose nango-Aroni
ehlane. 3 Abantwana bakwa-Israyeli bathi kubo: "Sengathi nga safa ngesandla sikaJehova ezweni
laseGibithe, lapho sasihlezi ngasemakhanzini enyama, sidla isinkwa sisutha, ngokuba
nisiphumisele kuleli hlane ukuyobulala lonke leli bandla ngendlala." 4 UJehova wayesethi
kuMose: "Bheka, ngizakuninisela isinkwa esivela ezulwini; abantu bayakuphuma, babuthe
isabelo sosuku imihla ngemihla, ukuze ngibavivinye ukuthi bazakuhamba yini emthethweni wami
noma qha. 5 Kuzakuthi ngosuku lwesithupha bakulungise abakungenisileyo; kuzakuba
ngokuphindwe kabili kwalokhu abakubutha imihla ngemihla." 6 OMose no-Aroni bathi kubo
bonke abantwana bakwa-Israyeli: "Ngakusihlwa niyakwazi ukuthi uJehova unikhiphile ezweni
laseGibithe. 7 Kusasa niyakubona inkazimulo kaJehova, lokhu ezwile izinkonono zenu
ngoJehova; thina siyini ukuba nikhonone ngathi na?" 8 UMose wathi: "Lokhu kuzakwenzeka,
lapho uJehova eyakuninika inyama kusihlwa ukuba nidle, nasekuseni isinkwa ukuze nisuthe;
ngokuba uJehova uyezwa izinkonono zenu enikhonona ngaye ngazo; thina siyini? Izinkonono
zenu azingathi, zingoJehova." 9 UMose wathi ku-Aroni: "Yisho kuyo yonke inhlangano
yabantwana bakwa-Israyeli ukuthi: ‘Sondelani phambi kukaJehova, ngokuba uzwile izinkonono
zenu.’" 10 Kwathi u-Aroni esakhuluma kuyo yonke inhlangano yabantwana bakwa-Israyeli,
babheka ngasehlane; bheka, inkazimulo kaJehova yabonakala efwini. 11 UJehova wakhuluma
kuMose, wathi: 12 "Ngizwile izinkonono zabantwana bakwa-Israyeli; khuluma kubo, uthi:
‘Ngakusihlwa niyakudla inyama, kusasa nisuthe isinkwa, nize nazi ukuthi nginguJehova
uNkulunkulu wenu.’"
13
Kwathi kusihlwa kwenyuka izigwaca, zasibekela ikamu; ngakusasa kwakulele amazolo ekamu
nxazonke. 14 Esenyukile amazolo akade elele khona, bheka, nakho okuthile okuncane
okunjengenkwethu, kuncane njengongqoqwane emhlabathini. 15 Bakubona abantwana bakwa-
Israyeli, bathi omunye komunye: "Yini le?" ngokuba babengazi ukuthi kuyini. UMose wathi
kubo: "Kuyisinkwa uJehova aninike sona ukuba nisidle. 16 Lokhu kuyikho uJehova ayalile
ngakho ukuthi: ‘Kubutheni, kube yilowo nalowo njengokudla kwakhe; anothatha iyomere
ngomuntu ngokwenani labantu benu, yilowo nalowo abathathele abasetendeni lakhe.’" 17
Abantwana bakwa-Israyeli benze njalo: abanye babutha okuningi abanye okuyingcosana. 18
Lapho sebelinganisa ngeyomere, yena owayebuthe okuningi akabanga nokuseleyo, nowayebuthe
okuyingcosana akaswelanga. Yilowo nalowo wabutha njengokudla kwakhe. 19 UMose wayesethi
kubo: "Makungashiywa lutho kukho ngumuntu kuze kuse." 20 Kodwa abamlalelanga uMose;
abanye kubo bashiya okunye kwaze kwasa, kwazala izimpethu, kwanuka, uMose waze
wabathukuthelela. 21 Bakubutha ekuseni njalo imihla ngemihla, kwaba yilowo nalowo muntu
njengokudla kwakhe; kepha nxa ilanga selibalele, kwancibilika.
22
Kwathi ngosuku lwesithupha babutha isinkwa esiphindwe kabili, amayomere amabili kumuntu
munye; zonke izinduna zomhlangano zafika, zamtshela uMose. 23 Wathi kuzo: "Lokhu kuyikho
uJehova akukhulumileyo: kusasa kulusuku lokuphumula, isabatha elingcwele likaJehova; yosani
lokho eniyakukosa, nipheke lokho eniyakukupheka, nizibekele konke okuseleyo, kulondolozwe
kuze kuse." 24 Bakubeka kwaze kwasa, njengalokho eyalile uMose; akunukanga, akwaba
nampethu. 25 Wayesethi uMose: "Yidlani lokhu namuhla, ngokuba namuhla kuyisabatha
likaJehova; namuhla aniyikukuthola endle. 26 Anokubutha izinsuku eziyisithupha, kepha ngosuku
lwesikhombisa kuyisabatha; akuyikubakho ngalo." 27 Kwathi ngosuku lwesikhombisa kwaphuma
abanye abantu ukuba bakubuthe, kepha kabakutholanga. 28 UJehova wathi kuMose: "Niyakwala
kuze kube nini ukugcina imiyalo yami nemithetho yami na? 29 Bhekani, njengalokho uJehova
eniphile isabatha, ngalokho uyaninika ngosuku lwesithupha isinkwa sezinsuku ezimbili; hlalani,
kube yilowo nalowo endaweni yakhe, kungaphumi muntu endaweni yakhe ngosuku
lwesikhombisa." 30 Base bephumula-ke abantu ngosuku lwesikhombisa. 31 Indlu yakwa-Israyeli
yaqamba igama lakho ngokuthi imana; kwakunjengembewu yekoriyanderi, kumhlophe;
kwezwakala emlonyeni kungathi ngamaqebelengwane anezinyosi.
32
UMose wathi: "Lokhu kuyikho uJehova ayalile ngakho ukuthi: ‘Makulondolozwe
ezizukulwaneni iyomere eligcweleyo lalokhu ukuba babone isinkwa enganipha sona ehlane
ngisanikhipha ezweni laseGibithe.’" 33 UMose wathi ku-Aroni: "Thatha isitsha, ufake iyomere
eligcweleyo lemana, ukubeke phambi kukaJehova, kulondolozelwe izizukulwane zenu." 34
Njengalokho uJehova emyala uMose, kanjalo u-Aroni wakubeka phambi kobuFakazi,
kulondolozwe. 35 Abantwana bakwa-Israyeli badla imana iminyaka engamashumi amane, baze
bafika ezweni elakhiweyo; badla imana, baze bafika emikhawulweni yezwe laseKhanani. 36
Iyomere lingokweshumi kwe-efa.

17
1
Ibandla lonke labantwana bakwa-Israyeli lasuka ehlane laseSini, bahamba ngamabanga
njengesiyalo sikaJehova, bamisa eRefidimi; kwakungekho manzi okuba abantu baphuze. 2
Ngalokho abantu baphikisana noMose, bathi: "Siphe amanzi, siphuze." UMose wathi kubo: "Yini
ukuba niphikisane nami na? Nimlingelani uJehova na?" 3 Abantu bomela khona amanzi; abantu
bakhonona ngoMose, bathi: "Usikhuphuleleni eGibithe ukuba usibulale, thina nabantwana bethu
nezinkomo zethu ngokoma, na?" 4 UMose wayesekhala kuJehova, ethi: "Ngizakwenzani kulaba
bantu na? Sekukancane ukuba bangikhande ngamatshe." 5 UJehova wathi kuMose: "Dlulela
phambi kwabantu, uthathe amalunga akwa-Israyeli; nenduku yakho owashaya ngayo umfula,
yiphathe ngesandla sakho, uhambe. 6 Bheka, ngiyakuma phambi kwakho edwaleni laseHorebe;
uzakushaya itshe, kuphume amanzi kulo, abantu baphuze." Wenze njalo uMose emehlweni
amalunga akwa-Israyeli. 7 Waqamba igama laleyo ndawo ngokuthi iMasa neMeriba ngenxa
yokuphikisana kwabantwana bakwa-Israyeli, nangokuba bemlinga uJehova, bethi: "Ukhona yini
uJehova phakathi kwethu noma qha?"
8
Kwase kufika u-Amaleki, walwa no-Israyeli eRefidimi. 9 UMose wathi kuJoshuwa: "Sikhethele
amadoda, uphume ulwe no-Amaleki; kusasa ngizakuma esiqongweni sentaba, induku
kaNkulunkulu isesandleni sami." 10 UJoshuwa wenze njalo, njengalokho uMose eshilo kuye,
walwa no-Amaleki; oMose, no-Aroni, noHure bakhuphukela esiqongweni sentaba. 11 Kwathi
uMose esephakamisile isandla sakhe, u-Israyeli wahlula, kepha nxa esehlisa, u-Amaleki wahlula.
12
Kodwa izandla zikaMose zaba nzima; bathatha itshe, walibeka phambi kwakhe, wahlala kulo;
o-Aroni noHure basekela izandla zakhe, omunye engalapha, omunye engalapha; zase zihlala
ziqinile izandla zakhe laze lashona ilanga. 13 UJoshuwa wamchitha u-Amaleki nabantu bakhe
ngosiko lwenkemba. 14 UJehova wathi kuMose: "Kulobe lokhu kube yisikhumbuzo encwadini,
ukubeke ezindlebeni zikaJoshuwa ukuthi ngizakuqothula ukukhunjulwa kuka-Amaleki phansi
kwezulu." 15 UMose walakha i-altare, waliqamba igama lokuthi iJehova-Nisi. 16 Wathi: "Isandla
singasesihlalweni sobukhosi sikaJehova sokuthi uJehova uyakulwa no-Amaleki izizukulwane
ngezizukulwane."

18
1
UJetiro umpristi wakwaMidiyani, umukhwe kaMose, wezwa konke uNkulunkulu abenzele
khona oMose no-Israyeli abantu bakhe, ukuthi uJehova wayemkhiphile u-Israyeli eGibithe. 2
UJetiro umukhwe kaMose wathatha uSipora umkaMose, yena esekade embuyisile, 3 namadodana
akhe omabili, igama lenye linguGereshomu, ngokuba wayethe: "Ngangingumfokazi kwelinye
izwe;" 4 igama lenye lalingu-Eliyezeri, ngokuba wathi: "UNkulunkulu kababa ubelusizo lwami,
wangophula enkembeni kaFaro." 5 UJetiro umukhwe kaMose wafika namadodana akhe
nomkakhe kuMose ehlane, lapho wayemise khona ngasentabeni kaNkulunkulu. 6 Wathi kuMose:
"Mina mukhwe wakho uJetiro ngize kuwe, kanye nomkakho, namadodana akhe omabili enaye."
7
UMose waphuma ukumhlangabeza umukhwe wakhe, wamkhothamela, wamanga; babuzana
impilo, bangena etendeni. 8 UMose wayesemlandisa umukhwe wakhe konke uJehova
abekwenzile kuFaro nakubo abaseGibithe ngenxa ka-Israyeli, konke ukushikashikeka
okwabehlela endleleni, nokuthi uJehova wabophula. 9 UJetiro wathokoza ngakho konke okuhle
uJehova akwenzile ku-Israyeli, ebophulile esandleni sabaseGibithe. 10 Wathi uJetiro:
"Makabongwe uJehova onophulile esandleni sabaseGibithe nasesandleni sikaFaro, ebophulile
abantu phansi kwesandla sabaseGibithe. 11 Kalokhu ngiyazi ukuthi uJehova mkhulu kunabo
bonke onkulunkulu, yebo, kulokhu ababebagabisela ngakho." 12 UJetiro umukhwe kaMose
wamthathela uNkulunkulu umnikelo wokushiswa nemihlatshelo; weza u-Aroni kanye nawo onke
amalunga akwa-Israyeli ukuyokudla nomukhwe kaMose phambi kukaNkulunkulu.
13
Kwathi ngangomuso uMose wayehlala ukwahlulela abantu; abantu babemi ngakuMose
kusukela ekuseni kwaze kwahlwa. 14 Umukhwe kaMose esebona konke abenzela khona abantu,
wathi: "Kuyini lokhu obenzela khona bantu na? Uhlalelani wedwa, abantu bonke bemi ngakuwe
kusukela ekuseni kuze kuhlwe na?" 15 UMose wathi kumukhwe wakhe: "Kungokuba abantu beza
kimi ukuyombuza uNkulunkulu. 16 Uma benendaba, beza kimi; ngiyahlulela phakathi komuntu
nomakhelwane wakhe, ngibazise izimiso zikaNkulunkulu nemithetho yakhe." 17 Umukhwe
kaMose wathi kuye: "Lokhu okwenzayo akukuhle. 18 Uyakudinwa nokudinwa, wena nalaba
bantu abanawe, ngokuba lokhu kuyakusinda; awunakukwenza uwedwa. 19 Kalokhu lalela izwi
lami, ngikululeke, uNkulunkulu abe nawe; ngithi: ‘Yiba ngumkhulumeli wabantu phambi
kukaNkulunkulu, ulethe izindaba kuNkulunkulu, 20 ubafundise izimiso nemithetho, ubatshengise
indlela abayakuhamba ngayo, nomsebenzi abayakuwenza. 21 Futhi-ke wozifunela phakathi
kwabantu bonke amadoda anamandla amesabayo uNkulunkulu, amadoda athembekileyo, azonda
inzuzo engalungile, uwabeke phezu kwabo, abe yizinduna zezinkulungwane, nezinduna
zamakhulu, nezinduna zamashumi ayisihlanu, nezinduna zamashumi. 22 Akube yizona ezahlulela
abantu ngezikhathi zonke, kulethwe kuwe zonke izindaba ezinkulu; kepha zonke izindaba
ezincane zahlulelwe yizo uqobo, kuze kube lula kuwe, zithwalisane nawe. 23 Uma wenza lokhu,
noNkulunkulu ekuyala kanje, uzakuba namandla okuma, nabo bonke laba bantu bayakubuyela
ezindaweni zabo benokuthula.’" 24 UMose walalela izwi lomukhwe wakhe, wakwenza konke
akushilo. 25 UMose wakhetha amadoda anamandla phakathi kuka-Israyeli wonke, wawabeka aba
yizinhloko phezu kwabantu, izinduna zezinkulungwane, nezinduma zamakhulu, nezinduna
zamashumi ayisihlanu, nezinduna zamashumi. 26 Zahlulela abantu ngezikhathi zonke; izindaba
ezilukhuni zazidlulisela kuMose, kepha zonke izindaba ezincane zahlulelwa yizo uqobo. 27
UMose wamvalelisa umukhwe wakhe; wasuka wabuyela ezweni lakubo.

19
1
Ngenyanga yesithathu emva kokuphuma kwabantwana bakwa-Israyeli ezweni laseGibithe,
ngalona lolo suku, bafika ehlane laseSinayi. 2 Sebesukile eRefidimi, befike ehlane laseSinayi,
bamisa ehlane; u-Israyeli wahlala khona phambi kwentaba. 3 UMose wakhuphukela
kuNkulunkulu; uJehova esentabeni wamemeza kuye, wathi: "Yisho kuyo indlu kaJakobe,
ubatshele abantwana bakwa-Israyeli, uthi: 4 ‘Nibonile lokhu engikwenzile kwabaseGibithe
nokuthi nganithwala ngamaphiko okhozi, nganisondeza kimi. 5 Kalokhu uma nilalela nokulalela
izwi lami, nigcine isivumelwano sami, niyakuba yigugu kimi kunazo zonke izizwe, ngokuba
umhlaba wonke ungowami, 6 nibe ngumbuso wabapristi kimi, nesizwe esingcwele. Yilawo
mazwi ozakuwakhuluma kubantwana bakwa-Israyeli.’" 7 UMose wafika, wabiza amalunga
abantu, wabeka phambi kwabo onke lawo mazwi uJehova amyale ngawo. 8 Bonke abantu
baphendula kanyekanye, bathi: "Konke akukhulumileyo uJehova siyakukwenza." UMose
wabuyisela kuJehova amazwi abantu.
9
UJehova wathi kuMose: "Bheka, ngiza kuwe ngefu elinzima ukuba abantu bezwe, nxa
ngikhuluma nawe, bakholwe nguwe kuze kube phakade." UMose walandisa uJehova amazwi
abantu. 10 UJehova wayesethi kuMose: "Hamba uye kubantu, ubangcwelise namuhla nakusasa,
bahlanze izingubo zabo, 11 babe sebelungile ngosuku lwesithathu; ngokuba ngosuku lwesithathu
uJehova uyakwehlela entabeni yaseSinayi emehlweni abantu bonke. 12 Wena-ke wobamisela
abantu umkhawulo nxazonke, uthi: ‘Xwayani ukuba ningakhuphukeli entabeni, ningathinti
umkhawulo wayo. Lowo othinta intaba uyakubulawa impela; 13 makangaphathwa ngesandla,
kepha impela uyakukhandwa ngamatshe nokuba ahlatshwe ngemicibisholo; noma kuyinkomo
noma kungumuntu, akuyikuphila.’ Nxa icilongo likhala linganqamuki, bayakukhuphukela
entabeni." 14 UMose wehla entabeni, wabuyela kubantu, wabangcwelisa abantu; bahlanza-ke
izingubo zabo. 15 Wayesethi kubantu: "Anoba senilungile ngosuku lwesithathu; ningasondeli
kowesifazane."
16
Kwathi ngosuku lwesithathu sekusile, kwaba khona ukuduma nokunyazima kombani, nefu
elinzima phezu kwentaba, nezwi lecilongo elizwakala kakhulu; bonke abantu abasekamu
bathuthumela. 17 UMose wayesebakhipha abantu ekamu ukuba bahlangane noNkulunkulu; bema
phansi kwentaba. 18 Yonke intaba yaseSinayi yathunqa umusi, ngokuba uJehova wehlela phezu
kwayo ngomlilo; umusi wayo wenyuka njengomusi wesithando; intaba yonke yazamazama
kakhulu. 19 Kwathi izwi lecilongo lalilokhu lizwakala kakhulu kunakuqala; uMose wakhuluma,
uNkulunkulu wamphendula ngezwi elikhulu. 20 UJehova wehlela phezu kwentaba yaseSinayi
esiqongweni sentaba; uJehova wambiza uMose ukuba eze esiqongweni sentaba; uMose
wakhuphuka-ke. 21 UJehova wayesethi kuMose: "Yehla, ubaxwayise abantu, funa bafohle ukuba
babone uJehova, kufe abaningi kubo. 22 Nabapristi abasondela kuJehova mabazingcwelise, funa
uJehova abadumele." 23 UMose wathi kuJehova: "Abantu abanakukhuphukela entabeni
yaseSinayi, ngokuba usiyalisisile, wathi: ‘Yimisele intaba umkhawulo, uyingcwelise.’" 24
Wayesethi uJehova kuye: "Hamba wehle, uze ubuye ukhuphuke, wena no-Aroni enawe; kepha
abapristi nabantu mabangafohli, bakhuphukele kuJehova, funa abadumele." 25 UMose wayesehla,
waya kubantu, wabatshela.

20
1
UNkulunkulu wakhuluma onke lawa mazwi, wathi: 2 "NginguJehova uNkulunkulu wakho
owakukhipha ezweni laseGibithe, indlu yobugqila. 3 "Ungabi nabanye onkulunkulu ngaphandle
kwami. 4 "Ungazenzeli izithombe ezibaziweyo, namfanekiso wokusezulwini ngaphezulu,
nowokusemhlabeni phansi, nowokusemanzini phansi komhlaba; 5 ungazikhothameli,
ungazikhonzi, ngokuba mina Jehova uNkulunkulu wakho nginguNkulunkulu onomhawu,
ngihambela ububi bawoyise kubantwana kuso isizukulwane sesithathu nesesine sabangizondayo,
6
kepha ngibenzela umusa abayizinkulungwane abangithandayo, bagcine imiyalelo yami. 7
"Ungaliphathi ngeze igama likaJehova uNkulunkulu wakho, ngokuba uJehova akayikumyeka
oliphatha ngeze igama lakhe. 8 "Khumbula usuku lwesabatha, ulungcwelise. 9 Izinsuku
eziyisithupha uyakusebenza, uwenze wonke umsebenzi wakho; 10 kepha usuku lwesikhombisa
luyisabatha likaJehova uNkulunkulu wakho; awuyikusebenza msebenzi ngalo, wena nendodana
yakho, nendodakazi yakho, nenceku yakho, nencekukazi yakho, nezinkomo zakho, nomfokazi
osemzini wakho; 11 ngokuba ngezinsuku eziyisithupha uJehova wenza izulu nomhlaba,
nolwandle, nakho konke okukukho, waphumula ngosuku lwesikhombisa; ngalokho uJehova
walubusisa usuku lwesabatha, walungcwelisa.
12
"Yazisa uyihlo nonyoko, ukuze izinsuku zakho zibe zinde ezweni uJehova uNkulunkulu wakho
akunika lona. 13 "Ungabulali. 14 "Ungaphingi. 15 "Ungebi. 16 "Ungafakazi amanga
ngomakhelwane wakho. 17 "Ungafisi indlu yomakhelwane wakho; ungafisi umfazi
womakhelwane wakho, nenceku yakhe, nencekukazi yakhe, nenkabi yakhe, nembongolo yakhe,
nokunye okomakhelwane wakho."
18
Bonke abantu babona ukuduma nokunyazima kombani, nezwi lecilongo, nentaba ithunqa;
kwathi abantu sebebonile, bathuthumela, bema kude. 19 Bathi kuMose: "Khuluma wena kithi,
sizwe; kepha uNkulunkulu makangakhulumi kithi, funa sife." 20 UMose wayesethi kubantu:
"Ningesabi, ngokuba uNkulunkulu uze ukuba anivivinye, ukumesaba kube semehlweni enu,
ukuze ningoni." 21 Abantu bema kude; uMose wasondela ebumnyameni obunzima, lapho ekhona
uNkulunkulu.
22
UJehova wayesethi kuMose: "Yisho kanje kubantwana bakwa-Israyeli, uthi: ‘Nibonile nani
uqobo ukuthi ngikhulumile kini ngisezulwini. 23 Aniyikwenza lutho olungaphandle kwami;
onkulunkulu besiliva nawonkulunkulu begolide aniyikuzenzela bona. 24 "‘Wongenzela i-altare
lomhlabathi, unikele phezu kwalo iminikelo yakho yokushiswa neminikelo yakho yokuthula,
izimvu zakho nezinkomo zakho; ezindaweni zonke lapho ngilenza ukuba likhunjulwe khona
igama lami, ngiyakuza kuwe, ngikubusise. 25 Uma ungenzela i-altare ngamatshe, awuyikulakha
ngamatshe abaziweyo, ngokuba uma uphakamisela kulo ingwedo yakho, ulingcolisile. 26
Awuyikukhwela e-altare lami ngezikhwelo, funa kwambulwe ubunqunu bakho.’
21
1
"Yilezi izahlulelo ozakuzimisa phambi kwabo. 2 "Uma uthenga isigqila esingumHeberu,
siyakusebenza iminyaka eyisithupha; ngowesikhombisa siyakuphuma sikhululekile ngesihle. 3
Uma singena sisodwa, siyakuphuma sisodwa; uma siganiwe, umkaso uyakuphuma naso. 4 Uma
inkosi yaso isinika umfazi, yena esizalela amadodana noma amadodakazi, umfazi nabantwana
bakhe bayakuba ngabenkosi yakhe, sona siphume sodwa. 5 "Uma isigqila siyakusho nokusho
ukuthi: ‘Ngiyathanda inkosi yami, nomkami, nabantwana bami, angiyikuphuma ngikhululekile,’ 6
khona inkosi yaso iyakusiyisa kuNkulunkulu, isimise emnyango noma ensikeni yomnyango,
inkosi yaso ibhoboze indlebe yaso ngosungulo, size simkhonze kuze kube phakade. 7 "Uma
umuntu ethengisa ngendodakazi yakhe, ibe yisigqilakazi, ayiyikuphuma njengalokhu ziphuma
izigqila. 8 Uma sisibi emehlweni enkosi yaso ezimisele sona, yovuma ukuba sihlengwe;
ayiyukuba namandla okuthengisa ngaso kubo abafokazi, njengokuba isiphathe ngenkohliso. 9
Uma isimisela indodana yayo, yosiphatha njengamadodakazi. 10 Uma iyithathela esinye,
ayiyikunciphisa ukudla kwaso, nezingubo zaso, namalungelo omshado. 11 Uma ingasenzeli lokho
okuthathu, siyakuphuma ngesihle ngaphandle kwemali.
12
"Oshaya umuntu aze afe, wobulawa nokubulawa. 13 Kepha uma ebengamqamekeli,
uNkulunkulu emnikela nje esandleni sakhe, ngiyakukumisela indawo ayakubalekela kuyo. 14
Uma umuntu esukela umakhelwane wakhe, ambulale ngobuqili, womsusa nase-altare lami ukuba
afe. 15 "Oshaya uyise nonina wobulawa nokubulawa. 16 "Oweba umuntu, athengise ngaye, noma
efunyanwa esesesandleni sakhe, wobulawa nokubulawa. 17 "Othuka uyise nonina wobulawa
nokubulawa. 18 "Nxa abantu belwa, omunye ashaye omunye ngetshe noma ngenqindi yakhe,
angafi kepha alale embhedeni, 19 khona-ke, uma elulama, ahambahambe phandle ngenduku
yakhe, owamshayayo uyakuyekelwa, amkhokhele nokho isikhathi sakhe esaphukileyo, elashwe
nokwelashwa. 20 "Uma umuntu eshaya isigqila sakhe noma isigqilakazi sakhe ngenduku, size sife
phansi kwesandla sakhe, wojeziswa nokujeziswa. 21 Kepha uma sihlala usuku lube lunye noma
zibe zimbili, akayikujeziswa, ngokuba siyimali yakhe.
22
"Uma abantu belwa, balimaze owesifazane okhulelweyo, size siphuphume isisu sakhe,
kungaveli enye ingozi kodwa, wohlawuliswa impela njengalokho indoda yomfazi iyakubeka
kuye, akhokhe njengesinqumo sabahluleli. 23 Uma kuvela ingozi, wokwenana ukuphila
ngokuphila: 24 iso ngeso, izinyo ngezinyo, isandla ngesandla, unyawo ngonyawo, 25 ukushiswa
ngokushiswa, inxeba ngenxeba, umvimbo ngomvimbo. 26 "Uma umuntu eshaya iso lesigqila
sakhe noma iso lesigqilakazi sakhe, alibulale, wosikhulula ngenxa yeso laso. 27 Uma eshaya
izinyo lesigqila sakhe noma izinyo lesigqilakazi sakhe, wosikhulula ngenxa yezinyo laso. 28
"Uma inkabi iqhubukusha owesilisa noma owesifazane baze bafe, inkabi yokhandwa ngamatshe
impela, inyama yayo ingadliwa; kepha umnininkabi uyakuyekelwa. 29 Kepha uma inkabi ibizinge
ihlaba nangaphambili, futhi lokhu kufakaziwe kumniniyo, engayigcinanga kodwa, inkabi
isibulele owesilisa noma owesifazane, leyo nkabi yokhandwa, abulawe nomniniyo. 30 Uma
kubekwa phezu kwakhe ihlawulo, uyakukhokha konke okubekwa phezu kwakhe, kube yisihlengo
sokuphila kwakhe. 31 Noma iqhubukusha indodana noma iqhubukusha indodakazi, makwenziwe
kuye njengaleso sahlulelo. 32 Uma inkabi iqhubukusha isigqila noma isigqilakazi, uyakunika
inkosi yaso amashekeli angamashumi amathathu esiliva, inkabi ikhandwe ngamatshe. 33 "Uma
umuntu evula umgodi, noma emba umgodi engawusibekeli, kukhalakathele kuwo inkabi noma
imbongolo, 34 umninimgodi uyakukhokha, amnike umniniyo imali, efileyo ibe ngeyakhe. 35
"Uma inkabi yomuntu ihlaba eyomunye ize ife, bayakuthengisa ngenkabi ephilayo,
bahlukaniselane imali yayo, bahlukaniselane nefileyo futhi. 36 Kodwa uma kwaziwa ukuthi
inkabi ibizinge ihlaba nangaphambili, umniniyo engayigcinanga kodwa, uyakuyikhokha
nokuyikhokha inkabi ngenkabi, efileyo ibe ngeyakhe.

22
1
"Uma umuntu eba inkabi noma imvu, ayihlabe, noma athengise ngayo, uyakukhokha inkabi
ngezinkabi eziyisihlanu, nemvu ngezimvu ezine. 2 "Uma isela lificwa lisafohla, lishaywe lize life,
akuyikuba yicala legazi maqondana nalo. 3 Uma ilanga lase liphumile phezu kwalo, kuyakuba
yicala legazi phezu kwalo. Isela liyakukhokha nokukhokha; uma lingenalutho, kuyakuthengiswa
ngalo ngenxa yokweba kwalo. 4 "Uma okwebiweyo kufunyaniswa esandleni salo kuphilile, noma
kuyinkabi, noma kuyimbongolo, noma kuyimvu, liyakukhokha kuphindwe kabili. 5 "Uma
umuntu eklabisa ensimini noma esivinini, aziyeke nje izinkomo zakhe zize zidle ensimini
yomunye, uyakukhokha nokukhokha ngokuhle kwensimu yakhe nangokuhle kwesivini sakhe. 6
"Uma kuvela umlilo, uvuthe emeveni kuze kushe izinhlanga zamabele, noma amabele
angakavunwa, noma insimu, othungele umlilo uyakukhokha impela.
7
"Uma umuntu enikeza kumakhelwane wakhe imali noma impahla ukuba ayilondoloze, bese
yebiwa endlini yalowo muntu, isela, uma lifunyanwa, liyakukhokha kuphindwe kabili. 8 Uma
isela lingafunyanwa, umninindlu uyakusondela kuNkulunkulu, kubonwe ukuba akafakanga yini
isandla sakhe empahleni yomakhelwane wakhe. 9 Ngezindaba zonke zamacala, eyenkabi,
neyembongolo, neyemvu, neyengubo, neyento elahlekileyo, umuntu asho ngayo ukuthi
ngeyakhe, indaba yabo bobabili iyakuza phambi kukaNkulunkulu; olahlwa nguNkulunkulu
uyakumkhokhela umakhelwane wakhe kuphindwe kabili. 10 "Uma umuntu enikeza
kumakhelwane wakhe imbongolo, noma inkabi, noma imvu, noma kungaba yisilwane sini, ukuba
akulondoloze, bese kufa, noma kulimala, noma kuphangwa, kungabonwa muntu, 11
kuyakunquma isifungo sikaJehova phakathi kwabo bobabili sokuthi akasifakanga yini isandla
sakhe empahleni yomakhelwane wakhe; umniniyo uyakusamukela isifungo, angayikhokhi. 12
Kepha uma yebiwe kuye impela, uyakumkhokhela umniniyo. 13 Uma idweshuliwe, makayilethe
ibe ngufakazi, angakhokhi okudweshuliweyo. 14 "Uma umuntu etsheleka impahla yomunye, bese
yilimala noma ifa, umniniyo engekho, nayo uyakuyikhokha nokuyikhokha. 15 Uma umniniyo
enayo, akayikuyikhokha; uma yayiqashiwe, imali yokuqasha makayikhokhe.
16
"Uma umuntu eyenga intombi engesiyo ingoduso, alale nayo, uyakuyilobola ibe ngumkakhe. 17
Uma uyise ala impela ukumnika yona, uyakukhokha imali elingene nokulotsholwa kwezintombi.
18
"Ungavumi ukuba umlumbikazi aphile. 19 "Olala nesilwane wobulawa nokubulawa. 20
"Ohlabela abanye onkulunkulu ngaphandle kukaJehova yedwa uyakubhujiswa nokubhujiswa. 21
"Awuyikukhathaza umfokazi, ungamcindezeli, ngokuba naningabafokazi ezweni laseGibithe. 22
"Aniyikuhlupha mfelokazi nentandane. 23 Uma ubahlupha nakanjani, bakhale kimi nakancane,
ngiyakuzwa nokuzwa ukukhala kwabo; 24 ulaka lwami luyakuvutha, ngikubulale ngenkemba;
omkenu babe ngabafelokazi, abantwana benu babe yizintandane.
25
"Uma utsheleka ompofu wabantu bami okuwe imali, awuyikumphatha njengabatshelekisi;
ningabizi nzalo kuye. 26 Uma uthatha ingubo yomakhelwane wakho, ibe yisibambiso,
uyakuyibuyisela kuye lingakashoni ilanga; 27 ngokuba iyisimbozo sakhe esisodwa, iyisambatho
somzimba wakhe; uyakulala ngani na? Kuzakuthi nxa ekhala kimi, ngizakumuzwa, ngokuba
nginomusa. 28 "Awuyikuthuka uNkulunkulu, ungaqalekisi induna yabantu bakini. 29
"Awuyikulibala neminikelo yamabele neyewayini. Wonginika izibulo emadodaneni akho. 30
Uyakwenze njalo nangezinkomo zakho nangezimvu zakho: liyakuhlala kunina izinsuku
eziyisikhombisa; ngosuku lwesishiyagalombili wonginika lona. 31 "Niyakuba ngabantu
abangcwele kimi; ngalokho aniyikudla nyama yesilwane esidweshulwe endle, kepha anoyiphonsa
ezinjeni.

23
1
"Awuyikuthutha indaba yamanga, ungafaki isandla sakho kubo ababi, ube ngufakazi wamanga.
2
"Awuyikulandela umbimbi ukuyokwenza okubi, ungafakazi ecaleni ngokulandela umbimbi,
uphendukezele isahlulelo; 3 nompofu awuyikumvuna ecaleni lakhe. 4 "Uma ufumana inkabi
yesitha sakho noma imbongolo yaso iduka, woyibuyisela nokuyibuyisela kuso. 5 Uma ubona
imbongolo yalowo okuzondayo ilele phansi komthwalo wayo, wena-ke bese wukhetha
ukuyiyeka, woyikhumula nokuyikhumula ninaye. 6 "Awuyikuphendukezela isahlulelo sompofu
wakho ecaleni lakhe. 7 Deda ube kude nendaba yamanga; ungambulali ongenacala nolungileyo,
ngokuba angiyikumyeka owonileyo. 8 "Awuyikwamukela isipho, ngokuba isipho
siphuphuthekisa ababonayo, siphendukezele amazwi olungileyo. 9 Awuyikumcindezela umfokazi,
ngokuba niyazi inhliziyo yomfokazi, lokhu naningabafokazi ezweni laseGibithe.
10
"Iminyaka eyisithupha uyakutshala izwe lakho, uvune izithelo zalo, 11 kepha ngomnyaka
wesikhombisa uyakuliyeka libe yifusi ukuba abampofu babantu bakho badle; abakushiyayo
makudliwe yizilwane zasendle; wenze njalo nangesivini sakho nangeminqumo yakho. 12
"Izinsuku eziyisithupha wosebenza umsebenzi wakho, uphumule ngosuku lwesikhombisa ukuba
inkabi yakho nembongolo yakho ziphumule, bahlunyelelwe indodana yencekukazi yakho
nomfokazi. 13 "Qaphelani konke lokho engikushilo kini, ningaphathi igama labanye onkulunkulu;
lingezwakali liphuma emlonyeni wakho. 14 "Kathathu ngomnyaka wongigcinela umkhosi. 15
"Uzakugcina umkhosi wesinkwa esingenamvubelo, udle isinkwa esingenamvubelo izinsuku
eziyisikhombisa, njengalokho ngakuyala, ngesikhathi esinqunyiweyo senyanga ka-Abibi,
ngokuba waphuma ngayo eGibithe, kungabonakali muntu phambi kwami ongaphethe lutho, 16
nomkhosi wokuvuna wolibo lwemisebenzi yakho oyihlwanyelayo ensimini, nomkhosi
wokubutha ngasekupheleni komnyaka, lapho ubutha imisebenzi yakho ensimini. 17 "Kathathu
ngomnyaka bonke abesilisa bakho bayakubonakala phambi kweNkosi uJehova. 18
"Awuyikunikela ngegazi lomhlatshelo wami kanye nesinkwa esivutshelweyo. Amanoni omkhosi
wami awayikusala bonke ubusuku kuze kuse. 19 "Ukuqala kolibo lwezwe lakho wokuletha
endlini kaJehova uNkulunkulu wakho. Awuyikupheka izinyane lembuzi obisini lukanina.
20
"Bheka, ngiyathuma ingelosi phambi kwakho ukuba ikulondoloze endleleni, ikuyise endaweni
engiyilungisileyo. 21 Yiqaphele, ulalele izwi layo, ungayicunuli, lokhu ayiyikuthethelela
iziphambeko zenu, ngokuba igama lami likuyo. 22 Kepha uma ulalela nokulalela izwi layo,
ukwenze konke engikukhulumayo, ngiyakuba yisitha sezitha zakho, ngiphambane nabaphambana
nawe. 23 Ngokuba ingelosi yami izakuhamba phambi kwakho, ikuyise kuwo ama-Amori,
namaHeti, namaPherizi, namaKhanani, namaHivi, namaJebusi. Ngiyakubachitha. 24
Awuyikubakhothamela onkulunkulu babo, ungabakhonzi, ungenzi njengokwemisebenzi yabo,
kepha wobachitha impela, ubhidlize izithombe zabo. 25 Niyakumkhonza uJehova uNkulunkulu
wenu, abusise ukudla kwenu namanzi enu; ngiyakususa izifo phakathi kwenu. 26 Akuyikuba
khona ophunzayo noyinyumba ezweni lakini; ngiyakuliphelelisa inani lezinsuku zakho. 27
"Ngiyakuthuma ukwesabeka kwami phambi kwakho, ngibasanganise bonke abantu ozakufika
kubo, ngenze ukuba zonke izitha zakho zikufulathele. 28 Ngiyakuthuma iminyovu phambi
kwakho eyakuxosha amaHivi, namaKhanani, namaHeti phambi kwakho. 29 Angiyikubaxosha
phambi kwakho ngomnyaka owodwa, funa izwe libe yihlane, izilwane zasendle zikwandele. 30
Ngiyakubaxosha phambi kwakho kancane kancane, ukuze wande, udle ifa lezwe. 31
"Ngiyakumisa imikhawulo yakho, kusukela eLwandle Olubomvu kuze kufike elwandle
lamaFilisti, kusukela ehlane kuze kube semfuleni, ngokuba ngiyakunikela esandleni sakho
abakhe kulelo zwe, wena ubaxoshe phambi kwakho. 32 Awuyikwenza sivumelwano nabo
nawonkulunkulu babo. 33 Abayikuhlala ezweni lakini, funa bakwenze ukuba wone kimi, ngokuba
uma ubakhonza onkulunkulu babo, kuyakuba lugibe kuwe."

24
1
Wathi kuMose: "Khuphukela kuJehova, wena no-Aroni, noNadabi, no-Abihu, namalunga
angamashumi ayisikhombisa akwa-Israyeli, nikhuleke nikude. 2 UMose yedwa uyakusondela
kuJehova, kepha bona abayikusondela; nabantu abayikukhuphuka naye." 3 UMose weza
wabatshela abantu onke amazwi kaJehova nezahlulelo zonke; abantu bonke baphendula ngazwi
linye, bathi: "Onke amazwi uJehova awakhulumileyo siyakuwenza." 4 UMose wabhala onke
amazwi kaJehova, wavuka ekuseni ngakusasa, walakha i-altare phansi kwentaba, nezinsika
eziyishumi nambili njengokwezizwe eziyishumi nambili zakwa-Israyeli. 5 Wathuma izinsizwa
zabantwana bakwa-Israyeli, zanikela ngeminikelo yokushiswa, zahlabela uJehova imihlatshelo
yokuthula yezinkunzi. 6 UMose wathatha inxenye yegazi, wayithela ezitsheni; inxenye yegazi
wafafaza ngayo i-altare. 7 Wathatha incwadi yesivumelwano, wayifunda ezindlebeni zabantu;
bathi: "Konke akukhulumileyo uJehova siyakukwenza, silalele." 8 UMose wayesethatha igazi,
wafafaza ngalo abantu, ethi: "Bheka, nanti igazi lesivumelwano uJehova asenze nani ngawo onke
lawa mazwi."
9
Khona bakhuphuka oMose, no-Aroni, noNadabi, no-Abihu, namalunga angamashumi
ayisikhombisa akwa-Israyeli. 10 Bambona uNkulunkulu ka-Israyeli; phansi kwezinyawo zakhe
kwakungathi kugandayiwe ngamatshe amasafire, kungathi yizulu uqobo ngokucweba. 11
Akasibekanga isandla sakhe kuzo izikhulu zabantwana bakwa-Israyeli; sebembonile
uNkulunkulu badla, baphuza.
12
UJehova wayesethi kuMose: "Khuphukela kimi entabeni, uhlale khona, ngikunike izibhebhe
zamatshe, nomthetho, nemiyalelo engiyibhalile ukuba ubafundise yona." 13 Wasuka uMose
nenceku yakhe uJoshuwa; uMose wakhuphukela entabeni kaNkulunkulu. 14 Wathi kumalunga:
"Manisihlalele lapha, size sibuyele kini; bhekani, o-Aroni noHure bakini; yilowo nalowo
onendaba makaye kubo." 15 UMose wayesekhuphukela entabeni, ifu lasibekela intaba. 16
Inkazimulo kaJehova yahlala entabeni yaseSinayi, ifu layisibekela izinsuku eziyisithupha;
ngosuku lwesikhombisa esefwini wambiza uMose. 17 Ukubonakala kwenkazimulo kaJehova
kwakunjengomlilo oqedayo esiqongweni sentaba emehlweni abantwana bakwa-Israyeli. 18
UMose wangena efwini, wakhuphukela entabeni; uMose wayesentabeni izinsuku ezingamashumi
amane nobusuku obungamashumi amane.

25
1
UJehova wayesekhuluma kuMose ethi: 2 "Yisho kubantwana bakwa-Israyeli ukuba
bangithabathele umnikelo; kubo bonke abantu abanhliziyo zabo zivuma anothabatha umnikelo
wami. 3 Yilo umnikelo eniyakuwuthabatha kubo: igolide, nesiliva, nethusi, 4 nokuluhlaza,
nokububende, nokubomvu, nelineni elicolekileyo, noboya bezimbuzi, 5 nezikhumba ezibomvu
zezinqama, nezikhumba zamatahasi, nemithi yomtholo, 6 namafutha okukhanyisa, namakha
amafutha okugcoba nawempepho ethaphukayo, 7 namatshe amashohamu, namatshe okufakwa,
awengubo yamahlombe nawesihlangu sesifuba. 8 "Mabangenzele indlu engcwele ukuba ngihlale
phakathi kwabo. 9 Njengakho konke engikutshengisa khona njengesifanekiso setabernakele
nangesifanekiso sempahla yonke yalo, anoyenza njalo-ke.
10
"Bayakuwenza umphongolo ngomuthi womtholo, ubude bawo bube yizingalo ezimbili
nenxenye, ububanzi bawo bube yingalo nenxenye, nokuphakama kwawo kube yingalo nenxenye.
11
Uyakuwunameka ngegolide elicwengekileyo, uwunameke ngaphakathi nangaphandle,
uwenzele udini lwegolide nxazonke. 12 Uwukhandele amasongo amane egolide, uwafake
ezinyaweni zozine zawo, amasongo amabili abe kolunye uhlangothi lwawo, amasongo amabili
abe kolunye uhlangothi lwawo. 13 Uyakuzenza izinti ngomuthi womtholo, uzinameke ngegolide.
14
Wozifaka izinti emasongweni asezinhlangothini zomphongolo ukuba uthwalwe ngazo. 15 Izinti
ziyakuhlala emasongweni omphongolo; aziyikususwa kuwo. 16 Uyakufaka emphongolweni
ubufakazi engikunika bona. 17 "Uyakwenza isihlalo somusa ngegolide elicwengekileyo, ubude
baso bube yizingalo ezimbili nenxenye, ububanzi baso bube yingalo nenxenye. 18 Uyakwenza
amakherubi amabili ngegolide, uwenze ngomsebenzi okhandiweyo ekugcineni kwesihlalo
somusa nxazombili, 19 ulenze elinye ikherubi ekugcineni ngalapha nelinye ikherubi ekugcineni
ngalapha, nenze amakherubi ekugcineni nxazombili, abe kunye nesihlalo somusa. 20 Amakherubi
ayakwelula amaphiko awo ngaphezulu, amboze isihlalo somusa ngamaphiko awo, abhekane
ngobuso; ubuso bamakherubi buyakubheka isihlalo somusa. 21 Uyakusibeka isihlalo somusa
phezu komphongolo, ufake emphongolweni ubufakazi engiyakukunika bona. 22 Ngiyakuhlangana
nawe khona, ngikhulume nawe, ngiphezu kwesihlalo somusa emkhathini wamakherubi amabili
aphezu komphongolo wobufakazi, ngakho konke engiyakukuyala ngakho ukuba ubatshele
abantwana bakwa-Israyeli.
23
"Uyakulenza itafula ngomuthi womtholo, ubude balo bube yizingalo ezimbili, ububanzi balo
bube yingalo, nokuphakama kwalo kube yingalo nenxenye. 24 Wolinameka ngegolide
elicwengekileyo, ulenzele udini ngegolide nxazonke, 25 ulenzele usiko olulingene nesandla
ngobubanzi nxazonke, ulwenzele usiko udini lwegolide nxazonke. 26 Ulenzele amasongo amane
ngegolide, uwafake amasongo emagumbini omane asezinyaweni zalo zozine. 27 Amasongo
ayakuba ngasodinini, abe yizindawo zezinti zokuthwala itafula. 28 Wozenza izinti ngomuthi
womtholo, uzinameke ngegolide, ukuba itafula lithwalwe ngazo, 29 wenze nezingqwembe zalo,
nezinkezo zalo, nezindebe zalo, nezinkamba zalo zokuthela, uzenze ngegolide elicwengekileyo. 30
Wobeka njalo phambi kwami etafuleni isinkwa sokubukwa.
31
"Wolwenza uthi lwezibani ngegolide elicwengekileyo, uthi lwezibani olwenziwe ngomsebenzi
okhandiweyo, nesiqu salo, namagatsha alo, izimbizana zalo, namasumpa alo, nezimbali zalo,
konke kube kunye nalo. 32 Makube khona amagatsha ayisithupha aphuma ezinhlangothini zalo,
amagatsha amathathu othi lwezibani aphume kolunye uhlangothi lwalo, amagatsha amathathu
othi lwezibani aphume kolunye uhlangothi lwalo. 33 Izimbizana ezintathu ezifaniswa nezimbali
zemi-alimondi zibe kwelinye igatsha, isumpa nembali; izimbizana ezintathu ezifaniswa nezimbali
zemi-alimondi zibe kwelinye igatsha, isumpa nembali; makube njalo kuwo onke amagatsha
ayisithupha aphuma othini lwezibani. 34 Othini lwezibani kuyakuba khona izimbizana ezine
ezifaniswa nezimbali zemi-alimondi, amasumpa azo nezimbali zazo, 35 kube yisumpa phansi
kwamagatsha amabili, libe kunye nalo, nesumpa phansi kwamanye amagatsha amabili, libe
kunye nalo, nesumpa phansi kwamanye amagatsha amabili futhi, libe kunye nalo, kube phansi
kwamagatsha ayisithupha aphuma othini lwezibani. 36 Amasumpa alo namagatsha alo ayakuba
kunye nalo, kube kunye konke okwalo, kube ngokomsebenzi okhandiweyo wegolide
elicwengekileyo. 37 "Wolwenzela izibani eziyisikhombisa, izibani zalo zibekwe ukuba zikhanyise
phambi kwalo. 38 Izizenze zalo nezitsha zalo zensizi mazenziwe ngegolide elicwengekileyo. 39
Malwenziwe ngetalenta legolide elicwengekileyo kanye nazo zonke lezi zinto. 40 Bhekisisa
ukuba uzenze ngesifanekiso sazo owaboniswa sona entabeni.

26
1
"Wolenza itabernakele ngezilenge eziyishumi; zona wozenza ngelineni elicolekileyo lemicu
ephothiweyo nangokuluhlaza nangokububende nangokubomvu, zibe namakherubi, kube
ngumsebenzi wengcweti. 2 Ubude besilenge sinye bube yizingalo ezingamashumi amabili
nesishiyagalombili, ububanzi baso bube yizingalo ezine, zonke izilenge zilingane. 3 Izilenge
eziyisihlanu ziyakuhlanganiswa esinye nesinye, nezinye izilenge eziyisihlanu zihlanganiswe
esinye nesinye. 4 Wozenza izihibe ngokuluhlaza eceleni lesinye isilenge emphethweni
wasekuhlanganeni, wenze njalo eceleni lesilenge sokugcina ekuhlanganeni kwesibili. 5
Uyakwenza izihibe ezingamashumi ayisihlanu kwesinye isilenge, wenze futhi izihibe
ezingamashumi ayisihlanu eceleni lesilenge esisekuhlanganeni kwesibili, ukuze izihibe
zibhekane. 6 Wenze izinkibaniso ezingamashumi ayisihlanu zegolide, uhlanganise izilenge esinye
nesinye ngezinkibaniso, itabernakele libe linye.
7
"Wenze izilenge ngoboya bezimbuzi, zibe yitende phezu kwetabernakele, uzenze zibe yizilenge
eziyishumi nanye. 8 Ubude bezilenge bube yizingalo ezingamashumi amathathu, ububanzi
bezilenge bube yizingalo ezine, lezi zilenge eziyishumi nanye zilingane. 9 Wohlanganisa izilenge
eziyisihlanu ngokwazo, nezilenge eziyisithupha ngokwazo, isilenge sesithupha siphindwe phambi
kwetende. 10 Wenze izihibe ezingamashumi ayisihlanu eceleni lesilenge esinye esokugcina
sasekuhlanganeni, nezihibe ezingamashumi ayisihlanu eceleni lesilenge sokugcina ekuhlanganeni
kwesibili. 11 Wenze izinkibaniso ezingamashumi ayisihlanu zethusi, uzifake izinkibaniso
ezihibeni, uhlanganise itende, libe linye. 12 Okudluleleyo kwezilenge zetende, okuseleyo, inxenye
yesilenge esiseleyo, kuyakulenga emva kwetabernakele. 13 Ingalo ngalapha nengalo ngalapha
kulokho okudluleleyo ebudeni bezilenge zetende azilenge emaceleni etabernakele ngalapha
nangalapha ukulisibekela. 14 Futhi uyakwenza isifulelo setende ngezikhumba ezibomvu
zezinqama, nesifulelo sezikhumba zamatahasi ngaphezulu.
15
"Uyakwenza amapulangwe etabernakele ngomuthi womtholo, amiswe. 16 Ubude
bamapulangwe bube yizingalo eziyishumi, ububanzi bawo bube yingalo nenxenye. 17 Akuthi
yilelo nalelo pulangwe libe nemisuka emibili, omunye malungana nomunye; wenze njalo kuwo
onke amapulangwe etabernakele. 18 Wenze amapulangwe etabernakele, amapulangwe
angamashumi amabili ohlangothini lwaseningizimu, olubheka ngaseningizimu. 19 Wenze
izinyawo ezingamashumi amane esiliva phansi kwamapulangwe angamashumi amabili, izinyawo
ezimbili phansi kwepulangwe linye, zibe ngezemisuka yalo yomibili, nezinyawo ezimbili phansi
kwelinye ipulangwe, zibe ngezemisuka yalo yomibili, 20 nasohlangothini lwesibili
lwetabernakele, uhlangothi lwasenyakatho, amapulangwe angamashumi amabili, 21 kanye
nezinyawo zawo ezingamashumi amane esiliva, izinyawo ezimbili phansi kwelinye ipulangwe,
nezinyawo ezimbili phansi kwelinye ipulangwe. 22 Ohlangothini lwetabernakele olungasemuva
ngasentshonalanga uyakwenza amapulangwe ayisithupha. 23 Amapulangwe amabili
uyakuwenzela amagumbi etabernakele angasemuva, 24 aphindwe kabili phansi, nakanjalo
aphelele aze afike phezulu esongweni lokuqala, kube njalo kuwo omabili, abengawamagumbi
omabili. 25 Kuyakuba ngamapulangwe ayisishiyagalombili nezinyawo zawo zesiliva, izinyawo
eziyishumi nesithupha, izinyawo ezimbili phansi kwelinye ipulangwe nezinyawo ezimbili phansi
kwelinye. 26 "Woyenza imishayo yomuthi womtholo, ibe yisihlanu, ibe ngeyamapulangwe
akolunye uhlangothi lwetabernakele, 27 nemishayo eyisihlanu yamapulangwe akolunye
uhlangothi lwetabernakele, nemishayo eyisihlanu yamapulangwe asohlangothini lwetabernakele
olungasemuva ngasentshonalanga, 28 umshayo waphakathi ophakathi kwamapulangwe udabule,
uze ufinyelele nxazombili. 29 Wonameka amapulangwe ngegolide, uwenze amasongo awo
ngegolide, abe yizindawo zemishayo, unameke nemishayo ngegolide. 30 "Wolimisa itabernakele
njengesifanekiso salo owaboniswa sona entabeni.
31
"Uyakwenza isihenqo ngokuluhlaza nangokububende nangokubomvu, nangelineni
elicolekileyo lemicu ephothiweyo, libe namakherubi, kube ngumsebenzi wengcweti, 32 ulilengise
ezinsikeni ezine zomtholo ezinamekwe ngegolide, izingwegwe zazo zibe yigolide, zime
ezinyaweni ezine zesiliva. 33 Uyakuphanyeka isihenqo phansi kwezinkibaniso, uwungenise
umphongolo wobufakazi khona phakathi kwesihenqo, isihenqo sinahlukanisele indawo engcwele
nendawo engcwelengcwele. 34 Wosibeka isihlalo somusa phezu komphongolo wobufakazi
endaweni engcwelengcwele, 35 ubeke itafula ngaphandle kwesihenqo, uthi lwezibani lubhekane
netafula ohlangothini lwetabernakele olungaseningizimu, ubeke itafula ohlangothini
lwasenyakatho. 36 "Uyakwenza iveli lomnyango wasetendeni ngokuluhlaza nangokububende
nangokubomvu, nangelineni elicolekileyo lemicu ephothiweyo, umsebenzi womfekethisi. 37
Ulenzele iveli izinsika eziyisihlanu zomtholo, uzinameke ngegolide; izingwegwe zazo mazibe
yigolide, uzikhandele izinyawo eziyisihlanu zethusi.

27
1
"Wolenza i-altare ngomuthi womtholo, ubude balo bube yizingalo eziyisihlanu, ububanzi balo
bube yizingalo eziyisihlanu, i-altare lilingane izinhlangothi zozine; ukuphakama kwalo kube
yizingalo ezintathu. 2 Uyakwenza izimpondo zalo emagumbini alo omane, izimpondo zalo zibe
kunye nalo, ulinameke ngethusi. 3 Wenze izitsha zalo zokususa umlotha walo, namafosholo alo,
nezitsha zalo, nezimfoloko zalo, nemicengezi yalo yomlilo, uzenze zonke izinto zalo ngethusi. 4
Ulenzele ihele lethusi elenziwe njengenetha, wenze amasongo amane ethusi enetheni
ngasemagumbini alo omane. 5 Wolibeka ngaphansi, phansi kosiko oluzungeza i-altare, ukuba
inetha lifinyelele ngaphakathi kwe-altare ukuya phezulu. 6 Uyakwenza izinti ze-altare, izinti
zomuthi womtholo, uzinameke ngethusi. 7 Izinti zalo ziyakufakwa emasongweni, izinti zibe
sezinhlangothini zombili ze-altare, nxa lithwalwa. 8 Ulenze ngamapulangwe, libe yigobongo,
ulenze njengalokho waboniswa entabeni.
9
"Wolenza igceke letabernakele; ngaseningizimu ohlangothini olungaseningizimu makube khona
izilenge zegceke zelineni elicolekileyo lemicu ephothiweyo, ubude bazo bube yizingalo
eziyikhulu ohlangothini lunye; 10 izinsika zalo zibe ngamashumi amabili, nezinyawo zazo zibe
ngamashumi amabili zethusi; izingwegwe zezinsika nezibopho zazo zibe yisiliva. 11
Nasohlangothini olungasenyakatho ebudeni makube khona izilenge, ubude bazo bube yizingalo
eziyikhulu, nezinsika zazo zibe ngamashumi amabili, nezinyawo zazo zibe ngamashumi amabili
zethusi; izingwegwe zezinsika nezibopho zazo zibe yisiliva. 12 "Ohlangothini
olungasentshonalanga ebubanzini begceke makube khona izilenge, ububanzi bazo bube yizingalo
ezingamashumi ayisihlanu, izinsika zazo zibe yishumi, nezinyawo zazo zibe yishumi. 13
Ububanzi begceke ngasempumalanga ohlangothini olungasempumalanga bube yizingalo
ezingamashumi ayisihlanu. 14 Izilenge kolunye uhlangothi mazibe yizingalo eziyishumi
nanhlanu, izinsika zazo zibe zintathu, nezinyawo zazo zibe zintathu. 15 Nakolunye uhlangothi
makube yizilenge eziyizingalo eziyishumi nanhlanu, izinsika zazo zibe zintathu, nezinyawo zazo
zibe zintathu. 16 "Koba khona iveli lesango legceke, libe yizingalo ezingamashumi amabili,
ngokuluhlaza nangokububende nangokubomvu, nangelineni elicolekileyo lemicu ephothiweyo,
umsebenzi womfekethisi, izinsika zabo zibe zine, nezinyawo zazo zibe zine. 17 Izinsika zonke
zegceke zonamekwa ngesiliva, izingwegwe zazo zibe yisiliva, izinyawo zazo zibe yithusi. 18
Ubude begceke boba yizingalo eziyikhulu, ububanzi bube ngezamashumi ayisihlanu njalo,
ukuphakama kube yizingalo eziyisihlanu, bube yilineni elicolekileyo lemicu ephothiweyo,
izinyawo zibe yithusi. 19 Izimpahla zonke zetabernakele enkonzweni yalo yonke nezikhonkwane
zalo zonke nezikhonkwane zegceke azibe ngezethusi.
20
"Wobayala abantwana bakwa-Israyeli ukuba balethe kuwe amafutha eminqumo agxotshelwe
ukukhanyisa ukuba izibani zivuthe njalonjalo. 21 Etendeni lokuhlangana ngaphandle kwesihenqo
esiphambi kobufakazi u-Aroni namadodana akhe bayakuziphatha kwasekuhlweni kuze kuse
phambi kukaJehova; kuyakuba yisimiso sabantwana bakwa-Israyeli kuze kube phakade
ezizukulwaneni zabo.

28
1
"Sondeza kuwe u-Aroni umfowenu namadodana akhe phakathi kwabantwana bakwa-Israyeli
ukuba bangikhonze esikhundleni sobupristi, o-Aroni, noNadabi, no-Abihu, no-Eleyazare, no-
Itamari, amadodana ka-Aroni. 2 Umenzele u-Aroni umfowenu izambatho ezingcwele, ezobukhosi
nezokuhlobisa. 3 Wokhuluma kubo bonke abahlakaniphile ngenhliziyo engibagcwalisile
ngomoya wokuhlakanipa ukuba bazenze izambatho zika-Aroni zokumngcwelisa, ukuze
angikhonze esikhundleni sobupristi. 4 Yilezi izambatho abayakuzenza: isihlangu sesifuba,
nengubo yamahlombe, nejazi, nebhantshi elifekethisiweyo, nesigqoko, nebhande, bamenzele u-
Aroni umfowenu namadodana akhe izambatho ezingcwele ukuba bangikhonze esikhundleni
sobupristi. 5 Makathathe igolide, nokuluhlaza nokububende nokubomvu, nelineni elicolekileyo.
6
"Bayakwenza ingubo yamahlombe ngegolide, nangokuluhlaza nangokububende
nangokubomvu, nangelineni elicolekileyo lemicu ephothiweyo, kube ngumsebenzi wengcweti. 7
Iyakuba neziziba ezimbili zasemahlombe, zihlangene emaceleni ayo omabili, ukuba
ihlanganiswe. 8 Ibhande elalukiweyo elikuyo lokuyikhwica liyakuba njengomsebenzi wayo, libe
kunye nayo, ngegolide, nangokuluhlaza nangokububende nangokubomvu, nangelineni
elicolekileyo lemicu ephothiweyo. 9 "Wothatha amatshe amabili amashohamu, uqophe kuwo
amagama abantwana bakwa-Israyeli, 10 amagama ayisithupha abo kwelinye itshe namagama
abayisithupha abaseleyo kwelinye itshe njengokuzalwa kwabo. 11 Ngomsebenzi womqophi
ematsheni, njengokuqoshwa kwendandatho, woqopha amatshe omabili njengokwamagama
abantwana bakwa-Israyeli, uwafake azungezwe yizisekelo zegolide. 12 Wobeka amatshe omabili
ezizibeni zombili zengubo yamahlombe, abe ngamatshe esikhumbuzo sabantwana bakwa-
Israyeli; u-Aroni uyakuphatha amagama abo emahlombe akhe omabili phambi kukaJehova kube
yisikhumbuzo. 13 Wozenza izisekelo zegolide, 14 namaketanga amabili egolide elicwengekileyo,
uwenze abe njengamagoda, umsebenzi othandelweyo ezisekelweni.
15
"Uyakwenza isihlangu sesifuba sokwahlulela, kube ngumsebenzi wengcweti, usenze
njengokusetshenzwa kwengubo yamahlombe ngegolide, nangokuluhlaza nangokububende
nangokubomvu, nangelineni elicolekileyo lemicu ephothiweyo. 16 Masibe nezinhlangothi ezine
ezilingeneyo, siphindwe kabili; ubude baso bube njengokudazuluka kweminwe, nobubanzi baso
bube njengokudazuluka kweminwe. 17 Ufake kuso izisekelo zamatshe, kube yizinhla ezine
zamatshe: uhla lwesardiyu, netopazi, nerubi, lube luhla lokuqala; 18 uhla lwesibili lube
yisimaragidu, nesafire, nedayimani; 19 uhla lwesithathu lube yihiyakinte, ne-agathe, ne-amethiste;
20
uhla lwesine lube yikrisolithe, neshohamu, nejaspi; azungezwe ngegolide ezisekelweni zawo.
21
Amatshe ayakuba njengamagama abantwana bakwa-Israyeli, abe yishumi nambili
njengamagama abo; njengokuqoshwa kwendandatho yilelo nalelo liyakuba negama lesinye
sezizwe eziyishumi nambili. 22 "Wenze kuso isihlangu sesifuba amaketanga njengamagoda,
umsebenzi othandelweyo wegolide elicwengekileyo. 23 Wenze kuso isihlangu sesifuba amasongo
amabili egolide, uwafake amasongo omabili emaceleni omabili esihlangu sesifuba. 24 Wowafaka
amaketanga omabili athandelweyo ngegolide emasongweni omabili emaceleni esihlangu
sesifuba. 25 Ezinye izihloko ezimbili zamaketanga athandelweyo wozifaka ezisekelweni zombili,
uzibeke ngaphambili ezizibeni zengubo yamahlombe. 26 Uyakuwenza amasongo amabili egolide,
uwafake emaceleni omabili esihlangu sesifuba, eceleni laso elibhekene nengubo yamahlombe
ngaphakathi. 27 Wenze amasongo amabili, uwafake ezizibeni zombili zengubo yamahlombe
phansi ngaphambili, eduze nokuhlangana kwayo, phezu kwebhande elifeketshisiweyo lengubo
yamahlombe. 28 Bayakusibopha isihlangu sesifuba ngamasongo aso emasongweni engubo
yamahlombe ngentambo eluhlaza ukuba sibe phezu kwebhande elifekethisiweyo lengubo
yamahlombe, ukuze isihlangu sesifuba singakhumuki engutsheni yamahlombe. 29 "U-Aroni
uyakuphatha amagama abantwana bakwa-Israyeli esihlangwini sesifuba sokwahlulela phezu
kwenhliziyo yakhe, nxa engena endaweni engcwele, kube yisikhumbuzo phambi kukaJehova
njalo. 30 Ufake esihlangwini sesifuba sokwahlulela i-Urimi neThumimi, ahlale phezu
kwenhliziyo ka-Aroni, nxa engena phambi kukaJehova; u-Aroni athwale ukwahlulelwa
kwabantwana bakwa-Israyeli phezu kwenhliziyo yakhe phambi kukaJehova njalo.
31
"Uyakwenza ijazi lengubo yamahlombe ngokuluhlaza lonke, 32 kube yimbobo yekhanda
ngaphakathi kwalo, imbobo yalo ibe nomphetho oyizungezayo womsebenzi owalukiweyo
njengembobo yebhantshi lensimbi ukuba lingadatshulwa. 33 Emiphethweni yalo wowenza
amapomegranati ngokuluhlaza nangokububende nangokubomvu, azungeze imiphetho yalo, kanye
nezikhencezo zegolide phakathi kwawo nxazonke, 34 kube yisikhencezo segolide nepomegranati,
isikhencezo segolide nepomegranati njalo emiphethweni yejazi nxazonke. 35 U-Aroni
makalembathe eyokhonza; ukukhenceza kwalo kuyakuzwakala, nxa engena endaweni engcwele
phambi kukaJehova, nanxa ephuma, ukuze angafi. 36 "Uyakwenza ungcwecwe wegolide
elicwengekileyo, uqophe kuye njengokuqoshwa kwendandatho ukuthi: ‘Wahlukaniselwe
uJehova’. 37 Umfake ngentambo eluhlaza, abe sesigqokweni, abe ngaphambili esigqokweni. 38
Uyakuba sebunzini lika-Aroni, u-Aroni athwale ububi bezinto ezingcwele, abantwana bakwa-
Israyeli abayakuzingcwelisa, zibe yizipho zabo ezingcwele; uyakuba sebunzini lakhe njalo ukuba
bamukeleke ebusweni bukaJehova. 39 "Uyakwaluka ibhantshi eliyizingovu ngelineni
elicolekileyo, wenze nesigqoko selineni elicolekileyo, wenze nebhande, ulifekethise.
40
Uyakuwenzela namadodana ka-Aroni amabhantshi, uwenzele namabhande, uwenzele
nezigqoko, kube ngezobukhosi nezokuhlobisa. 41 Wembathise zona u-Aroni umfowenu
namadodana akhe, ubagcobe, ubahlukanisele, ubangcwelise ukuba bangikhonze esikhundleni
sobupristi. 42 "Ubenzele namabhulukwe elineni ukuba kusitshekelwe inyama yobunqunu babo,
aqale okhalweni, afike emathangeni; 43 u-Aroni namadodana akhe bawafake, nxa bengena
etendeni lokuhlangana, nanxa besondela e-altare ukuyokhonza endaweni engcwele, ukuba
bangathwali ububi, bafe; kuyakuba yisimiso kuye nakuyo inzalo yakhe emva kwakhe kuze kube
phakade.

29
1
"Yilokhu oyakukwenza kubo ukubahlukanisa ukuba bangikhonze esikhundleni sobupristi:
thabatha iduna nezinqama ezimbili ezingenasici, 2 nesinkwa esingenamvubelo,
namaqebelengwane angenamvubelo, agcotshwe ngamafutha; ukwenze ngempuphu ecolekileyo
kakolweni. 3 Uyakukufaka eqomeni linye, ukulethe ngeqoma kanye nenkunzi nezinqama
zombili; 4 usondeze u-Aroni namadodana akhe ngasemnyango wetende lokuhlangana, ubageze
ngamanzi. 5 Wothabatha izambatho, ufake ku-Aroni ibhantshi, nejazi lengubo yamahlombe,
nengubo yamahlombe, nesihlangu sesifuba, umbhincise ngebhande elalukiweyo lengubo
yamahlombe; 6 ufake isigqoko ekhanda lakhe, ubeke umqhele ongcwele esigqokweni. 7
Uthabathe amafutha okugcoba, uwathele ekhanda lakhe, umgcobe. 8 Usondeze namadodana
akhe, uwembathise amabhantshi. 9 Ubabhincise amabhande u-Aroni namadodana akhe, uzibophe
izigqoko kubo, babe nobupristi, kube yisimiso esiphakade, wahlukanise u-Aroni namadodana
akhe. 10 "Uyisondeze inkunzi ngaphambi kwetende lokuhlangana; u-Aroni namadodana akhe
babeke izandla zabo enhloko yenkunzi. 11 Woyihlaba inkunzi phambi kukaJehova ngasemnyango
wetende lokuhlangana. 12 Uthabathe igazi lenkunzi, ulibhece ezimpondweni ze-altare ngomunwe
wakho, uthulule lonke igazi phansi ngase-altare. 13 Uyakuthabatha wonke umhlehlo osibekela
izibilini, namanoni aphezu kwesibindi, nezinso zombili namanoni akuzo, ukushise e-altare. 14
Kepha inyama yenkunzi, nesikhumba sayo, nomswani wayo, uyakukushisa ngomlilo ngaphandle
kwekamu; kungumnikelo wesono. 15 "Wothabatha inqama ibe nye; u-Aroni namadodana akhe
babeke izandla zabo enhloko yenqama. 16 Woyihlaba inqama, uthabathe igazi layo, ufafaze ngalo
i-altare nxazonke. 17 Uyihlahlele inqama, uzihlanze izibilini zayo namanqina ayo, ukubeke
ndawonye nezitho zayo nenhloko yayo. 18 Woyishisa yonke inqama e-altare; kungumnikelo
wokushiswa kuJehova, yiphunga elimnandi, ngumnikelo womlilo kuJehova. 19 "Uthabathe enye
inqama; u-Aroni namadodana akhe babeke izandla zabo enhloko yayo. 20 Woyihlaba inqama,
uthabathe igazi layo, ulibhece esicutshini sendlebe yokunene ka-Aroni, nasesicutshini sendlebe
yokunene yamadodana akhe, nasesithupheni sesandla sabo sokunene, nakuqukula wonyawo
lwabo lokunene, ufafaze i-altare nxazonke ngegazi. 21 Wothabatha igazi elise-altare namafutha
okugcoba, ufafaze ngakho u-Aroni nezambatho zakhe, namadodana akhe nezambatho
zamadodana akhe, abe ngcwele yena nezambatho zakhe, namadodana akhe nezambatho
zamadodana akhe. 22 "Wothabatha amanoni enqama, nomsila ononileyo, nomhlehlo osibekela
izibilini, namanoni esibindi, nezinso zombili namanoni akuzo, nomlenze wokunene, ngokuba
kuyinqama yokwahlukaniselwa; 23 uthabathe isinkwa sibe sinye, neqebelengwane libe linye
lesinkwa esinamafutha, nomqathane ube munye eqomeni lesinkwa esingenamvubelo eliphambi
kukaJehova, 24 ubeke konke ezandleni zika-Aroni nasezandleni zamadodana akhe, ukuzulise
kube ngumnikelo wokuzuliswa phambi kukaJehova. 25 Ubuye ukuthabathe ezandleni zabo,
ukushise e-altare phezu komnikelo wokushiswa, kube yiphunga elimnandi phambi kukaJehova:
kungumnikelo womlilo kuJehova. 26 Uyakuthabatha isifuba senqama yokwahlukaniselwa kuka-
Aroni, usizulise, sibe ngumnikelo wokuzuliswa phambi kukaJehova, sibe yisabelo sakho. 27
"Uyakusingcwelisa isifuba somnikelo wokuzuliswa nomlenze womnikelo wokuphakanyiswa,
ozuliswayo nophakanyiswayo, okwenqama yokwahlukaniselwa, okuka-Aroni nokwamadodana
akhe; 28 kuyakuba ngokuka-Aroni nokwamadodana akhe, kube yimfanelo ephakade kwabakwa-
Israyeli, ngokuba kungumnikelo wokuphakanyiswa; koba ngumnikelo wokuphakanyiswa
wabantwana bakwa-Israyeli womhlatshelo weminikelo yabo yokuthula, umnikelo wabo
wokuphakanyiswa kuJehova. 29 "Izambatho ezingcwele zika-Aroni ziyakuba ngezamadodana
akhe emva kwakhe ukuba bagcotshwe, bahlukaniselwe, bembathe zona. 30 Indodana yakhe
engumpristi esikhundleni sakhe ayizembathe izinsuku eziyisikhombisa, nxa ingena etendeni
lokuhlangana ukuyokhonza endaweni engcwele. 31 "Woyithabatha inqama yokwahlukaniselwa,
upheke inyama yayo endaweni engcwele. 32 U-Aroni namadodana akhe bayakuyidla inyama
yenqama nesinkwa esiseqomeni ngasemnyango wetende lokuhlangana, 33 badle lezo zinto ezenza
ukubuyisana ukubahlukanisela nokubangcwelisa; zingadliwa ngumfokazi, ngokuba zingcwele. 34
Uma kusala inyama yokwahlukaniselwa kuze kuse noma isinkwa, ukushise okuseleyo ngomlilo,
kungadliwa, ngokuba kungcwele. 35 "Uyakwenze njalo ku-Aroni nakumadodana akhe, njengakho
konke engikuyale ngakho; ukwahlukanisela kuyakuba yizinsuku eziyisikhombisa. 36 Imihla
yonke wonikela ngenkunzi, ibe ngumnikelo wesono, ube ngowokubuyisana, uhlambulule i-altare,
lapho ulenzela ukubuyisana, uligcobe ukuba ulingcwelise. 37 Izinsuku eziyisikhombisa wolenzela
i-altare ukubuyisana, ulingcwelise, i-altare libe ngcwele kakhulu, nabo bonke abalithintayo
bayakuba ngabangcwele.
38
"Yilokhu oyakunikela ngakho e-altare: amawundlu amabili anomnyaka munye imihla ngemihla
njalo. 39 Elinye iwundlu wonikela ngalo ekuseni, elinye iwundlu wonikela ngalo kusihlwa. 40
Kanye nelinye iwundlu wonikela ngokweshumi kwempuphu ecolekileyo, ixovwe nokwesine
kwehini lamafutha agxotshiweyo, nokwesine kwehini lewayini, kube ngumnikelo wokuphuzwa.
41
Wonikela ngelinye iwundlu ngakusihlwa, wenze kulo njengomnikelo wempuphu wasekuseni
nanjengomnikelo wawo wokuphuzwa, kube yiphunga elimnandi, umnikelo womlilo kuJehova. 42
"Lo uyakuba ngumnikelo oshiswa imihla yonke ezizukulwaneni zenu ngasemnyango wetende
lokuhlangana phambi kukaJehova, lapho ngiyakuhlangana khona nani, ngikhulume khona kuwe.
43
Lapho ngiyakuhlangana nabantwana bakwa-Israyeli; liyakungcweliswa yinkazimulo yami. 44
"Ngiyakungcwelisa itende lokuhlangana kanye ne-altare, ngingcwelise no-Aroni namadodana
akhe ukuba bangikhonze esikhundleni sobupristi. 45 Ngiyakuhlala phakathi kwabantwana bakwa-
Israyeli, ngibe nguNkulunkulu wabo. 46 Bayakwazi ukuthi nginguJehova uNkulunkulu wabo,
owabakhipha ezweni laseGibithe, ukuba ngihlale phakathi kwabo; nginguJehova uNkulunkulu
wabo.

30
1
"Uyakwenza i-altare lokushisa impepho, ulenze ngomuthi womtholo. 2 Ubude balo bube
yingalo, nobubanzi balo bube yingalo, libe nezinhlangothi ezine ezilingeneyo; ukuphakama
kwalo kube yizingalo ezimbili, izimpondo zalo zibe kunye nalo. 3 Wolinameka ngegolide
elicwengekileyo ngaphezulu, nezinhlangothi zalo nxazonke, nezimpondo zalo, ulenzele udini
lwegolide nxazonke. 4 Ulenzele amasongo amabili egolide phansi kodini lwalo nxazombili,
uwenze ezinhlangothini zombili zalo, abe yizindawo zezinti zokulithwala. 5 Wenze izinti
ngomuthi womtholo, uzinameke ngegolide. 6 Ulibeke phambi kwesihenqo
esingasemphongolweni wobufakazi, ngaphambi kwesihlalo somusa esiphezu kobufakazi, lapho
ngiyakuhlangana khona nawe. 7 "U-Aroni woshisa kulo impepho yamakha athaphukayo; njalo
ekuseni, nxa elungisa izibani, uyakuyithunqisa. 8 Nalapho u-Aroni ezibeka izibani ngakusihlwa,
woyishisa ibe yimpepho ephakade phambi kukaJehova ezizukulwaneni zenu. 9 Ninganikeli kulo
ngempepho engeyiyo, nangomnikelo wokushiswa, nangomnikelo wempuphu, ningatheli mnikelo
wokuphuzwa kulo. 10 U-Aroni uyakwenzela izimpondo zalo ukubuyisana kanye ngomnyaka;
ngegazi lomnikelo wesono wokubuyisana kanye ngomnyaka uyakulenzela ukubuyisana
ezizukulwaneni zenu; lingcwelengcwele kuJehova."
11
UJehova wakhuluma kuMose, wathi: 12 "Nxa ubala inani labantwana bakwa-Israyeli
ngokwalabo ababalwayo, yilowo nalowo kubo makathele kuJehova ihlawulo lomphefumulo
wakhe, lapho ubabalayo, ukuba kungabikho sifo phakathi kwabo, nxa ubabala. 13 Lokhu
bayakukuthela, kube yilowo nalowo odlulela kwababaliweyo: inxenye yeshekeli ngokweshekeli
lendlu engcwele ishekeli lingamagera angamashumi amabili inxenye yeshekeli ibe ngumnikelo
kuJehova. 14 Yilowo nalowo odlulela kwababaliweyo, abaneminyaka engamashumi amabili
nangaphezulu, uyakunikela ngomnikelo kuJehova. 15 Ocebileyo akayikunika kakhulu, ompofu
angatheli kancane kunenxenye yeshekeli, lapho benikela ngomnikelo kuJehova ukuba kwenzelwe
ukubuyisana kwemiphefumulo yenu. 16 Wothabatha imali yokubuyisana kubantwana bakwa-
Israyeli, uyimisele inkonzo yetende lokuhlangana, ibe yisikhumbuzo sabantwana bakwa-Israyeli
phambi kukaJehova, ukuba kwenzelwe ukubuyisana kwemiphefumulo yenu."
17
UJehova wakhuluma kuMose, wathi: 18 "Uyakwenza umcengezi wethusi, nesinqe sawo
sethusi, ukuba kugezelwe kuwo, uwubeke phakathi kwetende lokuhlangana ne-altare, uthele
amanzi kuwo. 19 U-Aroni namadodana akhe bayakuhlamba kuwo izandla zabo nezinyawo zabo.
20
Nxa bengena etendeni lokuhlangana, bayakugeza ngamanzi ukuba bangafi, noma besondela e-
altare ukuyokhonza, bawushise umnikelo womlilo kuJehova; 21 mabahlambe izandla zabo
nezinyawo zabo ukuba bangafi, kube yisimiso esiphakade kubo, kuyena nakuyo inzalo yakhe
ezizukulwaneni zabo."
22
UJehova wakhuluma futhi kuMose, wathi: 23 "Zithabathele amakha amahle, imure eliphumayo
lamashekeli angamakhulu ayisihlanu, nokinamona othaphukayo wenxenye yalokho, okungukuthi
amakhulu amabili namashumi ayisihlanu, nekalamu elithaphukayo lamakhulu amabili
namashumi ayisihlanu, 24 nekasiya lamakhulu ayisihlanu ngokweshekeli lendlu engcwele, nehini
lamafutha eminqumo. 25 Uwenze amafutha angcwele okugcoba amakha athakiweyo
njengokwenza komthaki, abe ngamafutha angcwele okugcoba. 26 Wogcoba itende lokuhlangana
nomphongolo wobufakazi, 27 netafula nezitsha zalo zonke, nothi lwezibani nezitsha zalo, ne-
altare lempepho, 28 ne-altare lomnikelo wokushiswa nezitsha zalo zonke, nomcengezi nesinqe
sawo. 29 Wokungcwelisa ukuze kube ngcwele kakhulu; bonke abakuthintayo bayakuba ngcwele.
30
"Wobagcoba u-Aroni namadodana akhe, ubangcwelise ukuba bangikhonze esikhundleni
sobupristi. 31 Ukhulume kubantwana bakwa-Israyeli, uthi: ‘Lokhu kuyakuba kimi amafutha
angcwele okugcoba ezizukulwaneni zenu. 32 Mawangathelwa emzimbeni womuntu, ningawenzi
afana nawo njengokuthakwa kwawo; angcwele, mawabe ngcwele kini. 33 Yilowo nalowo
owathaka anjengawo nalowo owathela kumfokazi uyakunqunywa kubantu bakubo.’" 34 UJehova
wathi kuMose: "Zithabathele amakha athaphukayo, inathafi neshehelethe nehelibena, amakha
kanye nenhlaka ecwengekileyo, kulingane konke, 35 wenze ngakho impepho, amakha
njengokwenza komthaki, ethelwe ngosawoti, enhle, engcwele; 36 ucolisise enye, uyibeke phambi
kobufakazi etendeni lokuhlangana, lapho ngiyakuhlangana khona nawe, ibe ngcwelengcwele kini.
37
Impepho oyakuyenza ningazenzeli yona njengokuthakwa kwayo; yoba ngcwele kuwe,
yenzelwe uJehova. 38 Yilowo nalowo oyakuyenza enjengayo ukuba ihogelwe uyakunqunywa
kubantu bakubo."

31
1
UJehova wakhuluma kuMose, wathi: 2 "Bheka, ngibize ngegama uBesaleli indodana ka-Uri
kaHuri, owesizwe sakwaJuda. 3 Ngimgcwalisile ngoMoya kaNkulunkulu, ngokuhlakanipha
nangokuqonda nangokwazi nangamandla emisebenzini yonke, 4 ukuba aqambe imisebenzi
yobungcweti, asebenze ngegolide, nangesiliva, nangethusi, 5 nangokuqopha amatshe okufakwa,
nangokuqopha imithi, yebo, ukuba asebenze imisebenzi yonke. 6 Bheka, mina ngimisile kanye
naye u-Oholiyabe indodana ka-Ahisamaki, owesizwe sakwaDani; ezinhliziyweni zazo zonke
eziyizingcweti ngenhliziyo ngifake ukuhlakanipha ukuba zikwenze konke engikuyale ngakho: 7
itende lokuhlangana, nomphongolo wobufakazi, nesihlalo somusa esiphezu kwawo, nezimpahla
zonke zetende, 8 netafula nezitsha zalo, nothi oluhle lwezibani nezitsha zonke zalo, ne-altare
lempepho, 9 ne-altare lomnikelo wokushiswa nezitsha zonke zalo, nomcengezi nesinqe sawo, 10
nezingubo ezifekethisiweyo, nezambatho ezingcwele zika-Aroni umpristi nezambatho
zamadodana akhe zokuba bakhonze esikhundleni sobupristi, 11 namafutha okugcoba, nempepho
yamakha athaphukayo yendawo engcwele, yebo, zenze njengakho konke engikuyale ngakho."
12
UJehova wakhuluma kuMose, wathi: 13 "Yisho kubantwana bakwa-Israyeli, uthi: ‘Anogcina
amasabatha, ngokuba aluphawu phakathi kwami nani ezizukulwaneni zenu ukuba nazi ukuthi
nginguJehova oningcwelisayo. 14 "‘Gcinani isabatha, ngokuba lingcwele kini; yilowo nalowo
olonayo uyakubulawa nokubulawa, ngokuba osebenza umsebenzi ngalo uyakunqunywa kubantu
bakubo. 15 Izinsuku eziyisithupha kosetshenzwa, kepha ngosuku lwesikhombisa kuyisabatha
lokuphumula, lingcwele kuJehova: bonke abasebenza umsebenzi ngosuku lwesabatha
bayakubulawa nokubulawa. 16 Ngalokho abakwa-Israyeli bayakuligcina isabatha, balilonde
ezizukulwaneni zabo libe yisivumelwano esiphakade. 17 Liluphawu phakathi kwami nabantwana
bakwa-Israyeli kuze kube phakade, ngokuba ngezinsuku eziyisithupha uJehova walenza izulu
nomhlaba, kepha ngosuku lwesikhombisa waphumula, waqabuleka.’" 18 Eseqedile ukukhuluma
noMose entabeni yaseSinayi wamnika izibhebhe zombili zobufakazi, izibhebhe zamatshe,
zilotshiwe ngomunwe kaNkulunkulu.

32
1
Abantu sebebone ukuthi uMose ulibele ukwehla entabeni, abantu babuthana ku-Aroni, bathi
kuye: "Vuka usenzele onkulunkulu abazakuhamba phambi kwethu, ngokuba uMose lowo,
umuntu owasikhuphula ezweni laseGibithe, asazi ukuthi wehlelwe yini." 2 U-Aroni wayesethi
kubo: "Khumulani amacici egolide asezindlebeni zawomkenu, nakwezamadodana enu,
nakwezamadodakazi enu, niwalethe kimi." 3 Bonke abantu bakhumula-ke amacici egolide
asezindlebeni zabo, bawayisa ku-Aroni. 4 Wawamukela ezandleni zabo, wawabumba ngengwedo,
wawenza aba yithole elibunjiweyo, bathi: "Nampa onkulunkulu bakho, Israyeli, abakukhuphula
ezweni laseGibithe." 5 U-Aroni wakubona, wakha i-altare phambi kwalo; u-Aroni wamemezela
wathi: "Kusasa kuzakuba khona umkhosi kaJehova." 6 Bavuka ekuseni ngakusasa, banikela
ngeminikelo yokushiswa, baletha iminikelo yokuthula; abantu bahlala phansi ukuba badle,
baphuze; bavuka ukuyodlala.
7
UJehova wakhuluma kuMose, wathi: "Hamba wehle, ngokuba abantu bakho owabakhuphula
ezweni laseGibithe benzile isono; 8 baphambukile masinyane endleleni engabayala ngayo.
Bazenzele ithole elibunjiweyo, balikhonza, balihlabela, bathi: ‘Nampa onkulunkulu bakho,
Israyeli, abakukhuphula ezweni laseGibithe.’" 9 UJehova wathi kuMose: "Ngibabonile laba
bantu; bheka, bangabantu abantamo ilukhuni. 10 Ngalokho ngiyeke ukuba ulaka lwami
lubavuthele, ngibaqede, ngikwenze ube yisizwe esikhulu." 11 UMose wamshweleza uJehova
uNkulunkulu wakhe, wathi: "Jehova, ulaka lwakho lubavuthelelani abantu bakho owabakhuphula
ezweni laseGibithe ngamandla amakhulu nangesandla esiqinileyo na? 12 AbaseGibithe
bayakusholoni ukuthi: ‘Wabakhiphela okubi ukuba ababulale ezintabeni, abaqothule ebusweni
bomhlaba.’ Phenduka olakeni lwakho oluvuthayo, uguquke kulobu bubi ngakubantu bakho. 13
Khumbula o-Abrahama, no-Isaka, no-Israyeli, izinceku zakho, owazifungela kubo, wathi kubo:
‘Ngiyakwandisa inzalo yenu ibe ngangezinkanyezi zezulu, nginike inzalo yenu lonke leli zwe
engikhulumile ngalo, idle ifa lalo kuze kube phakade.’" 14 UJehova wayesephenduka ebubini
abethi uzakubenza kubantu bakhe.
15
UMose waphenduka, wehla entabeni enezibhebhe zombili zobufakazi esandleni sakhe,
izibhebhe ezazilotshwe nxazombili, zalotshwa ngalapha nangalapha. 16 Izibhebhe
zazingumsebenzi kaNkulunkulu, nokuloba kwakungukuloba kukaNkulunkulu, kuqoshiwe
ezibhebheni. 17 UJoshuwa wezwa umsindo wabantu bekhamuluka, wathi kuMose: "Kukhona
umsindo wempi ekamu." 18 Wathi: "Akusilo izwi labahalalisa ngokunqoba, akusilo izwi
lokukhala ngokunqotshwa, kepha ngizwa umsindo wabahlabelelayo." 19 Kwathi esasondela
ekamu, wabona ithole nokusina; ulaka lukaMose lwase luvutha, wazilahla izibhebhe ezandleni
zakhe, wazaphula phansi kwentaba. 20 Wayeselithatha ithole ababelenzile, walishisa ngomlilo,
walicolisisa laze laba luthuli, walivumvuzela emanzini, wabaphuzisa wona abantwana bakwa-
Israyeli.
21
UMose wathi ku-Aroni: "Benzeni kuwe laba bantu ukuba ubehlisele isono esingaka na?" 22
Wathi u-Aroni: "Ulaka lwenkosi yami malungavuthi; uyabazi abantu ukuthi bathanda ububi. 23
Ngokuba bathi kimi: ‘Senzele onkulunkulu abazakuhamba phambi kwethu, ngokuba uMose
lowo, umuntu owasikhuphula ezweni laseGibithe, asazi ukuthi wehlelwe yini.’ 24 Ngase ngithi
kubo: ‘Onalo igolide makalikhumule;’ base benginika lona, ngaliphonsa emlilweni, kwaphuma
leli thole." 25 UMose wababona abantu ukuthi babedlubulundile; ngokuba u-Aroni
wayebakhululile baze bahlekwa yizitha zabo; 26 uMose wayesema esangweni lekamu, wathi:
"AbakaJehova mabeze kimi." Onke amadodana kaLevi ayesebuthana kuye. 27 Wayesethi kuwo:
"Usho njalo uJehova uNkulunkulu ka-Israyeli, uthi: ‘Akube yilowo nalowo kini abhince inkemba
yakhe ethangeni lakhe, adabule ekamu, aye emuva, aye phambili, kusukela kwelinye isango kuze
kube kwelinye isango lekamu, yilowo nalowo abulale umfowabo, nalowo umngane wakhe,
nalowo umakhelwane wakhe.’" 28 Amadodana kaLevi enza njengezwi likaMose, kwawa ngalolo
suku abantu kungathi abayizinkulungwane ezintathu. 29 Wayesethi uMose: "Njengalokhu yilowo
nalowo emelene nendodana yakhe nanomfowabo, manizahlukanisele namuhla kuJehova ukuba
aninike isibusiso namuhla."
30
Kwathi ngangomuso uMose wathi kubantu: "Nenzile isono esikhulu; sengiyakukhuphukela
kuJehova, uma mhlawumbe ngingenza ukubuyisana ngesono senu." 31 UMose wabuyela
kuJehova, wathi: "Hawu, laba bantu benzile isono esikhulu, bazenzele onkulunkulu ngegolide. 32
Nokho uma ubathethelela isono sabo—;kepha uma ungabathetheleli, ake ungesule encwadini
yakho oyilobileyo." 33 UJehova wayesethi kuMose: "Owonile kimi ngiyakumesula encwadini
yami. 34 Kalokhu hamba-ke, uhole abantu, uye kuleyo ndawo engakhuluma ngayo kuwe; bheka,
ingelosi yami iyakuhamba phambi kwakho; kepha mhla ngibahambela ngiyakuhambela isono
sabo kubo." 35 UJehova wayesebashaya-ke abantu, ngokuba benza ithole lelo alenzayo u-Aroni.

33
1
UJehova wakhuluma kuMose, wathi: "Hamba wenyuke lapha, wena nabantu obakhuphulile
ezweni laseGibithe, uye ezweni engalifungela ku-Abrahama, naku-Isaka, nakuJakobe, ngathi:
‘Ngiyakulinika inzalo yakho.’ 2 Ngiyakuthuma ingelosi phambi kwakho, ngiwaxoshe
amaKhanani, nama-Amori, namaHeti, namaPherizi, namaHivi, namaJebusi, 3 uye ezweni
elichichima ubisi nezinyosi. Angiyikukhuphuka ngiphakathi kwenu, lokhu ningabantu abantamo
ilukhuni, funa nginiqede endleleni." 4 Abantu beyizwa le ndaba embi badabuka, akwabakho
muntu owafaka izivunulo zakhe. 5 UJehova wayesethi kuMose: "Yisho kubantwana bakwa-
Israyeli, uthi: ‘Ningabantu abantamo ilukhuni; uma ngikhuphuka ngiphakathi kwenu
nangokuphazima kweso nje, ngizakuniqeda. Ngalokho khumulani manje izivunulo zenu, ukuze
ngazi ukuthi ngiyakwenzani kini.’" 6 Abantwana bakwa-Israyeli bazihlubula izivunulo zabo,
kusukela entabeni yaseHorebe.
7
UMose wayevama ukulithatha itende, walimisa ngaphandle kwekamu, libe kude nekamu,
walibiza ngokuthi itende lokuhlangana. Kwathi bonke abamfunayo uJehova baphuma, baya
etendeni lokuhlangana elalingaphandle kwekamu. 8 Kwathi uMose ephuma eya etendeni, bonke
abantu basukuma bema, kwaba yilowo nalowo ngasemnyango wetende lakhe, bambuka uMose
waze wangena etendeni. 9 Kwathi uMose engena etendeni, insika yefu yehla, yema
ngasemnyango wetende; uJehova wakhuluma noMose. 10 Bonke abantu bayibona insika yefu imi
ngasemnyango wetende; bonke abantu basukuma, bakhuleka, kwaba yilowo nalowo
ngasemnyango wetende lakhe. 11 UJehova wakhuluma kuMose ubuso nobuso, njengalokhu
umuntu ekhuluma nomhlobo wakhe. Wabuyela ekamu, kepha inceku yakhe uJoshuwa indodana
kaNuni, insizwa, ayiphumanga etendeni.
12
UMose wathi kuJehova: "Bheka, uthi kimi: ‘Khuphula laba bantu,’ kepha awungazisanga yena
oyakumthuma nami. Nokho ushilo ukuthi: ‘Ngiyakwazi ngegama, ufumene umusa emehlweni
ami.’ 13 Ngalokho uma ngifumene umusa emehlweni akho, ake ungibonise izindlela zakho ukuba
ngikwazi, ukuze ngifumane umusa emehlweni akho, ubhekisise ukuthi lesi sizwe singabantu
bakho." 14 Wayesethi: "Ngiyakuhamba mina uqobo, ngikuphumuze, na?" 15 Wathi kuye: "Uma
ungahambi wena uqobo, ungasikhuphuli lapha. 16 Ngokuba kuyakwaziwa ngani ukuthi
ngifumene umusa emehlweni akho, mina nabantu bakho, na? Akungalokhu yini ukuthi uhamba
nathi, ukuze sahlukaniswe, mina nabantu bakho, nabanye abantu abasebusweni bomhlaba na?" 17
UJehova wathi kuMose: "Ngiyakwenza nalokho okushiloyo, ngokuba ufumene umusa emehlweni
ami; ngiyakwazi ngegama." 18 Wayesethi: "Ake ngibone inkazimulo yakho." 19 Wathi:
"Ngiyakudlulisa phambi kwakho ubuhle bami, ngilimemezele igama likaJehova phambi kwakho,
ngibe nomusa kuyena engithanda ukuba nomusa kuye, ngibe nesihe kuyena engithanda ukuba
nesihe kuye." 20 Wathi: "Awunakubona ubuso bami, ngokuba akukho muntu ongangibona,
aphile." 21 UJehova wathi: "Bheka, nansi indawo kimi; uyakuma edwaleni. 22 Kuyakuthi isadlula
inkazimulo yami, ngiyakukufaka ofantwini lwedwala, ngikumboze ngesandla sami, ngize
ngidlule. 23 Besengisusa isandla sami, ubone umhlane wami, kepha ubuso bami abuyikubonwa."

34
1
UJehova wathi kuMose: "Zibazele izibhebhe ezimbili zamatshe njengezokuqala, ngilobe
ezibhebheni amazwi ayesezibhebheni zokuqala owazaphulayo. 2 Mawube usulungele kusasa,
ukhuphukele entabeni yaseSinayi ekuseni, ume khona phambi kwami esiqongweni sentaba. 3
Akuyikukhuphuka muntu nawe, kungabonakali muntu entabeni yonke, futhi kungaklabi zimvu
nazinkomo ngaphambi kwaleyo ntaba." 4 Wayesebaza izibhebhe ezimbili zamatshe
njengezokuqala; uMose wavuka ekuseni kakhulu, wakhuphukela entabeni yaseSinayi,
njengalokho uJehova emyalile; waphatha ngesandla sakhe izibhebhe ezimbili zamatshe.
5
UJehova wehla ngefu, wema naye lapho, wamemezela igama likaJehova. 6 UJehova wadlula
phambi kwakhe, wamemeza wathi: "NguJehova! NguJehova! NguNkulunkulu ogcwele isihe,
onomusa, ophuza ukuthukuthela, novame ubumnene neqiniso, 7 ogcinela abayizinkulungwane
umusa, othethelela ububi neziphambeko nezono, ongayikuyekela onecala, ehambela ububi
bawoyise kubantwana nakubantwana babantwana, kwabesizukulwane sesithathu nesesine." 8
UMose washesha wakhothamela emhlabathini, wakhuleka. 9 Wathi: "Nkosi, uma ngifumene
umusa emehlweni akho, iNkosi mayihambe iphakathi kwethu, ngokuba bangabantu abantamo
ilukhuni; usithethelele ububi bethu nokona kwethu, usithabathe sibe yifa lakho."
10
Wayesethi: "Bheka, ngiyenza isivumelwano; phambi kwabantu bonke bakho ngiyakuzenza
izimangaliso ezingazange zenziwe emhlabeni wonke nakusiphi isizwe; bonke abantu okhona
phakathi kwabo bayakuwubona umsebenzi kaJehova, ngokuba kuyesabeka lokhu engikwenza
kuwe. 11 Qaphela lokhu engikuyala ngakho namuhla: bheka, ngixosha phambi kwakho ama-
Amori, namaKhanani, namaHeti, namaPherizi, namaHivi, namaJebusi. 12 Xwaya ukuba
ungasenzi isivumelwano nabakhileyo ezweni oya kulo, funa babe lugibe kuwe. 13 Kepha
niyakuwadiliza ama-altare abo, niziphahlaze izinsika zabo, nibagawule o-Ashera babo, 14
ngokuba awuyikukhonza omunye unkulunkulu, lokhu uJehova, igama lakhe linguMhawu,
unguNkulunkulu onomhawu, 15 funa wenze isivumelwano nabakhileyo ezweni, baye baphinge
nawonkulunkulu babo, bahlabele onkulunkulu babo, omunye akumeme, udle umhlatshelo wakhe,
16
uthathele amadodana akho amadodakazi abo, amadodakazi abo aye aphinge nawonkulunkulu
babo, enze ukuba amadodana akho aye aphinge nawonkulunkulu babo. 17 "Awuyikuzenzela
onkulunkulu ababunjiweyo.
18
"Umkhosi wesinkwa esingenamvubelo wowugcina. Uyakudla isinkwa esingenamvubelo
izinsuku eziyisikhombisa, njengalokho ngakuyala, ngesikhathi esinqunyiweyo senyanga ka-
Abibi, ngokuba ngenyanga ka-Abibi waphuma eGibithe. 19 "Konke okuvula isizalo kungokwami,
nawo onke amaduna ezinkomo zakho, amazibulo ezinkomo nawezimvu. 20 Kepha izibulo
lembongolo wolihlenga ngewundlu; uma ungalihlengi, ulaphule intamo. Amazibulo onke
amadodana akho wowahlenga, kungabonakali muntu phambi kwami engaphethe lutho. 21
"Wosebenza izinsuku eziyisithupha, uphumule ngosuku lwesikhombisa; uyakuphumula
ngesikhathi sokulima nangokuvuna. 22 "Uyakugcina umkhosi wamasonto, owolibo lukakolweni
ovuniweyo, nomkhosi wokuvuna ngasekupheleni komnyaka. 23 Kathathu ngomnyaka abesilisa
bakho bonke bayakubonakala phambi kweNkosi uJehova, uNkulunkulu ka-Israyeli. 24 Ngokuba
ngiyakuxosha izizwe phambi kwakho, ngandise imikhawulo yakho; akuyikubakho muntu olifisa
izwe lakho, nxa ukhuphuka uya ukubonakala phambi kukaJehova uNkulunkulu wakho kathathu
ngomnyaka. 25 "Awuyikunikela ngegazi lomhlatshelo womkhosi wephasika kuze kuse. 26
"Izandulela zolibo lwezwe lakho woziyisa endlini kaJehova uNkulunkulu wakho. Awuyikupheka
izinyane lembuzi obisini lukanina." 27 UJehova wathi kuMose: "Zilobele lawa mazwi, ngokuba
ngokwalawa mazwi ngenzile isivumelwano nawe nabakwa-Israyeli."
28
Wayelapho noJehova izinsuku ezingamashumi amane nobusuku obungamashumi amane,
kadlanga lutho, kaphuzanga manzi. Waloba ezibhebheni amazwi esivumelwano, imiyalelo
eyishumi. 29 Kwathi uMose esehla entabeni yaseSinayi, izibhebhe zombili zobufakazi
zisesandleni sikaMose esehla entabeni, uMose wayengazi ukuthi isikhumba sobuso bakhe
sasikhazimula ngenxa yokukhuluma kwakhe naye. 30 Bathi u-Aroni nabo bonke abantwana
bakwa-Israyeli bembona uMose, bheka, isikhumba sobuso bakhe sasikhazimula, besaba
ukusondela kuye. 31 UMose wayesebabiza; u-Aroni nazo zonke izinduna zenhlangano babuyela-
ke kuye; uMose wayesekhuluma kubo. 32 Ngasemuva bonke abantwana bakwa-Israyeli
basondela, wabayala ngakho konke uJehova akukhulume kuye entabeni yaseSinayi. 33 UMose
eseqedile ukukhuluma nabo, wafaka iveli ebusweni bakhe. 34 Kepha uMose esezakungena
phambi kukaJehova ukukhuluma naye, walikhumula iveli waze waphuma; waphuma, wakhuluma
kubantwana bakwa-Israyeli lokho akuyalelweyo. 35 Abantwana bakwa-Israyeli babubona ubuso
bukaMose ukuthi isikhumba sobuso bukaMose sasikhazimula; uMose wayesebuye walifaka iveli
ebusweni bakhe waze wangena ukuyokhuluma naye.

35
1
UMose wabutha yonke inhlangano yabantwana bakwa-Israyeli, wathi kuyo: "Yilawa mazwi
awayalile uJehova ukuba niwenze. 2 Izinsuku eziyisithupha kosetshenzwa umsebenzi, kepha
ngosuku lwesikhombisa kuyakuba kini usuku olungcwele, lube yisabatha lokuphumula
likaJehova; bonke abenza umsebenzi ngalo bayakubulawa. 3 Aniyikubasa mlilo ezindlini zenu
ngosuku lwesabatha." 4 UMose wakhuluma kuyo yonke inhlangano yabantwana bakwa-Israyeli,
wathi: "Yile nto ayale ngayo uJehova, ethi: 5 Thabathani phakathi kwenu umnikelo ube
ngokaJehova; bonke abanenhliziyo ethandayo mabawulethe, ube ngumnikelo kaJehova: igolide,
nesiliva, nethusi, 6 nokuluhlaza nokububende nokubomvu, nelineni elicolekileyo, noboya
bezimbuzi, 7 nezikhumba ezibomvu zezinqama, nezikhumba zamatahasi, nomuthi womtholo, 8
namafutha okukhanyisa, namakha amafutha okugcoba nawempepho ethaphukayo, 9 namatshe
amashohamu, namatshe okufakwa, abe ngawengubo yamahlombe nawesihlangu sesifuba. 10
"Bonke abahlakaniphile ngenhliziyo mabeze, bakwenze konke uJehova akuyalileyo: 11
itabernakele, netende lalo, nesifulelo salo, nezinkibaniso zalo, namapulangwe alo, nemishayo
yalo, nezinsika zalo, nezinyawo zalo; 12 umphongolo nezinti zawo, nesihlalo somusa, nesihenqo
seveli; 13 itafula nezinti zalo nezitsha zonke zalo, nezinkwa zokubukwa; 14 nothi lwezibani
lokukhanyisa, nezitsha zalo nezibani zalo, namafutha okukhanyisa; 15 ne-altare lempepho nezinti
zalo, namafutha okugcoba, nempepho ethaphukayo, neveli lomnyango ngasemnyango
wetabernakele; 16 i-altare lomnikelo wokushiswa nehele lalo lethusi, nezinti zalo, nezitsha zonke
zalo, nomcengezi nesinqe sawo, 17 nezilenge zegceke, nezinsika zalo, nezinyawo zazo, neveli
lesango legceke, 18 nezikhonkwane zetabernakele, nezikhonkwane zegceke, nezintambo zazo, 19
nezambatho ezifekethisiweyo zokukhonza endaweni engcwele, nezambatho ezingcwele zika-
Aroni umpristi, nezambatho zamadodana akhe zokukhonza esikhundleni sobupristi."
20
Yayisisuka yonke inhlangano yabantwana bakwa-Israyeli ebusweni bukaMose. 21 Bafika,
kwaba yilowo nalowo owavuswa yinhliziyo yakhe nowaqhutshwa ngumoya wakhe, baletha
umnikelo kaJehova ube ngowomsebenzi wetende lokuhlangana, nowenkonzo yonke yalo,
nowezambatho ezingcwele. 22 Beza abesilisa nabesifazane, bonke abaqhutshwa yizinhliziyo
zabo, baletha iziqhobosho namacici nezindandatho namasongo, izinto zonke zegolide, bonke
ababenokunikela ngomnikelo wegolide kuJehova. 23 Bonke okwafunyanwa kubo okuluhlaza
nokububende nokubomvu, nelineni elicolekileyo, noboya bezimbuzi, nezikhumba ezibomvu
zezinqama, nezikhumba zamatahasi, bakuletha. 24 Bonke abanikela ngomnikelo wesiliva
nowethusi baletha umnikelo kuJehova, nabo bonke okwafunyanwa kubo umuthi womtholo
womsebenzi wenkonzo bawuletha. 25 Bonke abesifazane abahlakaniphile ngenhliziyo baphotha
ngezandla zabo, baletha okuphothiweyo, okuluhlaza nokububende nokubomvu, nelineni
elicolekileyo. 26 Bonke abesifazane abavuselwa yizinhliziyo zabo ukuhlakanipha baphotha uboya
bezimbuzi. 27 Izinduna zaletha amatshe amashohamu namatshe okufakwa, awengubo
yamahlombe nawesihlangu sesifuba, 28 namakha, namafutha okukhanyisa nawokugcoba
nawempepho ethaphukayo. 29 Abantwana bakwa-Israyeli bawuletha umnikelo wesihle kuJehova,
bonke abesilisa nabesifazane, abanhliziyo yabo ibavusele ukulethela yonke imisebenzi ayale
ngayo uJehova ukuba yenziwe ngesandla sikaMose.
30
UMose wathi kubantwana bakwa-Israyeli: "Bhekani, uJehova ubize ngegama uBesaleli
indodana ka-Uri kaHure, owesizwe sakwaJuda; 31 umgcwalisile ngoMoya kaNkulunkulu,
ngokuhlakanipha nangokuqonda nangokwazi nangamandla emisebenzini yonke 32 ukuba aqambe
imisebenzi yobungcweti, asebenze ngegolide, nangesiliva, nangethusi, 33 nangokuqopha amatshe
okufakwa, nangokuqopha imithi, ukuba asebenze yonke imisebenzi yobungcweti. 34 Ubeke
enhliziyweni yakhe ukuba afundise, yena no-Oholiyabe indodana ka-Ahisamaki, owesizwe
sakwaDani. 35 Laba ubagcwalisile ngokuhlakanipha kwenhliziyo ukuba basebenze yonke
imisebenzi, eyomqophi neyengcweti neyomfekethisi, ngokuluhlaza nangokububende
nangokubomvu, nangelineni elicolekileyo, neyomaluki, neyabasebenza namuphi umsebenzi,
nabaqamba imisebenzi yobungcweti.

36
1
"OBesaleli no-Oholiyabe bayakusebenza nabo bonke abahlakaniphile ngenhliziyo, uJehova
abeke kubo ukuhlakanipha nokuqonda ukuba bazi ukwenza yonke imisebenzi yenkonzo yendlu
engcwele njengakho konke uJehova akuyalileyo." 2 UMose wababiza oBesaleli no-Oholiyabe
nabo bonke abahlakaniphile ngenhliziyo, uJehova abeke ukuhlakanipha ezinhliziyweni zabo,
bonke abavuswa yizinhliziyo zabo ukuza emsebenzini ukuba bawenze. 3 Bawamukela kuMose
wonke umnikelo, abantwana bakwa-Israyeli ababewulethele umsebenzi wenkonzo yendlu
engcwele ukuba wenziwe ngawo. Kepha babesaletha kuye njalo imihla ngemihla ekuseni
iminikelo yesihle. 4 Bonke abahlakaniphileyo ababeyisebenza yonke imisebenzi yendlu engcwele
beza, kwaba yilowo nalowo wavela emsebenzini wakhe owawusebenzayo, 5 bathi kuMose:
"Abantu baletha okuningi kakhulu kunokwanele inkonzo yomsebenzi ayalile ngawo uJehova
ukuba wenziwe." 6 UMose wayeseyala, kwamenyezelwa ekamu, kwathiwa: "Makungabe
kusasetshenzwa ngowesilisa nangowesifazane omunye umsebenzi womnikelo wendlu engcwele."
Base bevinjelwa abantu ukuletha. 7 Okwase kwenziwe kwakwanele wonke umsebenzi
obuyakwenziwa, futhi kwasala.
8
Bonke abahlakaniphile ngenhliziyo phakathi kwabo abasebenza umsebenzi benza itabernakele
ngezilenge eziyishumi, bazenza ngelineni elicolekileyo lemicu ephothiweyo, nangokuluhlaza
nangokububende nangokubomvu, zinamakherubi, umsebenzi wengcweti. 9 Ubude besilenge
babuyizingalo ezingamashumi amabili nesishiyagalombili, nobubanzi besilenge babuyizingalo
ezine; zonke izilenge zazinesilinganiso sinye. 10 Wahlanganisa izilenge eziyisihlanu esinye
nesinye; wazihlanganisa nezinye izilenge eziyisihlanu esinye nesinye. 11 Wazenza izihibe
eziluhlaza eceleni lesinye isilenge emphethweni ngasekuhlanganeni; wenze njalo naseceleni
lesilenge sokugcina ngasekuhlanganeni kwesibili. 12 Wazenza izihibe ezingamashumi ayisihlanu
kwesinye isilenge; wazenza izihibe ezingamashumi ayisihlanu eceleni lesilenge
esisekuhlanganeni kwesibili; izihibe zazibhekana. 13 Wazenza izinkibaniso ezingamashumi
ayisihlanu zegolide, wazihlanganisa izilenge esinye nesinye ngezinkibaniso, kwaba yitabernakele
linye.
14
Wazenza izilenge ngoboya bezimbuzi, zibe yitende phezu kwetabernakele; wazenza izilenge
eziyishumi nanye. 15 Ubude besilenge babuyizingalo ezingamashumi amathathu, nobubanzi
bezilenge babuyizingalo ezine; izilenge eziyishumi nanye zazinesilinganiso sinye. 16
Wahlanganisa izilenge eziyisihlanu zodwa, nezilenge eziyisithupha zodwa. 17 Wazenza izihibe
ezingamashumi ayisihlanu eceleni lesilenge sokugcina ekuhlanganeni, wazenza izihibe
ezingamashumi ayisihlanu eceleni lesilenge ekuhlanganeni kwesibili. 18 Wazenza izinkibaniso
ezingamashumi ayisihlanu zethusi zokuhlanganisa itende libe linye. 19 Wasenza isifulelo setende
ngezikhumba ezibomvu zezinqama, nesifulelo ngezikhumba zamatahasi phezulu. 20 Wawenza
amapulangwe amiyo etabernakele ngomuthi womtholo. 21 Ubude bepulangwe babuyizingalo
eziyishumi, nobubanzi bepulangwe babuyingalo nenxenye. 22 Yilelo nalelo pulangwe
lalinemisuka emibili, omunye malungana nomunye; wenze njalo kuwo onke amapulangwe
etabernakele. 23 Wawenza amapulangwe etabernakele, amapulangwe angamashumi amabili
ohlangothi lwaseningizimu olubheka ngaseningizimu. 24 Wazenza izinyawo ezingamashumi
amane zesiliva phansi kwamapulangwe angamashumi amabili, izinyawo ezimbili phansi
kwepulangwe linye, ezemisuka yalo emibili, nezinyawo ezimbili phansi kwelinye ipulangwe,
ezemisuka yalo emibili. 25 Uhlangothi lwesibili lwetabernakele ngasohlangothini lwasenyakatho
walwenzela amapulangwe angamashumi amabili, 26 nezinyawo zawo ezingamashumi amane
zesiliva, izinyawo ezimbili phansi kwepulangwe linye nezinyawo ezimbili phansi kwelinye
ipulangwe. 27 Uhlangothi lwetabernakele olungasemuva ngasentshonalanga walwenzela
amapulangwe ayisithupha. 28 Amapulangwe amabili wawenzela amagumbi etabernakele
angasemuva. 29 Ayemabili phansi, kanjalo aphelela aze afika phezulu esongweni lokuqala; wenze
njalo kuwo omabili emagumbini omabili. 30 Kwakungamapulangwe ayisishiyagalombili
nezinyawo zawo zesiliva, izinyawo eziyishumi nesithupha, izinyawo ezimbili phansi kwalelo
nalelo pulangwe. 31 Wayenza imishayo ngomuthi womtholo, yaba ngeyisihlanu yamapulangwe
olunye uhlangothi lwetabernakele, 32 nemishayo eyisihlanu yamapulangwe olunye uhlangothi
lwetabernakele, nemishayo eyisihlanu yamapulangwe etabernakele ohlangothini olungasemuva
ngasentshonalanga. 33 Wawenza umshayo waphakathi ukuba udabule phakathi kwamapulangwe,
kusukela ekugcineni ngalapha kuze kufike ekugcineni ngalapha. 34 Wanameka amapulangwe
ngegolide, wawenza amasongo awo ngegolide, abe yizindawo zezinti; wanameka nezinti
ngegolide.
35
Wasenza isihenqo ngokuluhlaza nangokububende nangokubomvu, nangelineni elicolekileyo
lemicu ephothiweyo, wasenza saba namakherubi, umsebenzi wengcweti. 36 Wasenzela izinsika
ezine zomtholo, wazinameka ngegolide; izingwegwe zazo zaziyigolide; wazikhandela izinyawo
ezine zesiliva. 37 Walenza iveli lomnyango wetende ngokuluhlaza nangokububende
nangokubomvu, nangelineni elicolekileyo lemicu ephothiweyo, umsebenzi womfekethisi, 38
nezinsika zalo eziyisihlanu nezingwegwe zazo; wanameka izihloko zazo nezibopho zazo
ngegolide; izinyawo zazo eziyisihlanu zaziyithusi.

37
1
UBesaleli wawenza umphongolo ngomuthi womtholo; ubude bawo babuyizingalo ezimbili
nenxenye, ububanzi bawo babuyingalo nenxenye, nokuphakama kwawo kwakuyingalo nenxenye.
2
Wawunameka ngegolide elicwengekileyo ngaphakathi nangaphandle, wawenzela udini
lwegolide nxazonke. 3 Wawukhandela amasongo amane egolide ezinyaweni zawo zozine,
amasongo amabili kolunye uhlangothi lwawo, namasongo amabili kolunye uhlangothi lwawo. 4
Wazenza izinti zomuthi womtholo, wazinameka ngegolide. 5 Wazifaka izinti emasongweni
asezinhlangothini zomphongolo ukuba umphongolo uthwalwe ngazo. 6 Wasenza isihlalo somusa
ngegolide elicwengekileyo; ubude baso babuyizingalo ezimbili nenxenye, nobubanzi baso
babuyingalo nenxenye. 7 Wawenza amakherubi amabili ngegolide, wawenza ngomsebenzi
okhandiweyo ekugcineni kwesihlalo somusa nxazombili, 8 elinye ikherubi ekugcineni ngalapha
nelinye ikherubi ekugcineni ngalapha; wawenza amakherubi aba kunye nesihlalo somusa,
ekugcineni kwaso ngalapha nangalapha. 9 Amakherubi awelula amaphiko awo ngaphezulu,
amboza isihlalo somusa ngamaphiko awo, abhekana ngobuso; ubuso bamakherubi babheka
isihlalo somusa.
10
Walenza itafula ngomuthi womtholo; ubude balo babuyizingalo ezimbili, nobubanzi balo
babuyingalo, nokuphakama kwalo kwakuyingalo nenxenye. 11 Walinameka ngegolide
elicwengekileyo, walenzela udini lwegolide nxazonke. 12 Walenzela usiko olulingene nesandla
ngobubanzi nxazonke, walwenzela usiko lwalo udini lwegolide nxazonke. 13 Walukhandela
amasongo amane egolide, wawafaka amasongo emagumbini omane asezinyaweni zalo zozine. 14
Amasongo ayengasodinini, izindawo zezinti zokuthwala itafula. 15 Wazenza izinti ngomuthi
womtholo, wazinameka ngegolide, ukuba itafula lithwalwe ngazo. 16 Wayesenza ngegolide
elicwengekileyo izitsha ezazisetafuleni, izingqwembe zalo, nezinkezo zalo, nezinkamba zalo,
nezindebe zalo zokuthela. 17 Walwenza uthi lwezibani ngegolide elicwengekileyo, walwenza uthi
lwezibani ngomsebenzi okhandiweyo, isinqe salo nesiqu salo; izimbizana zalo, namasumpa alo,
nezimbali zalo kwakukunye nalo. 18 Kwakukhona amagatsha ayisithupha aphuma
ezinhlangothini zalo, amagatsha amathathu othi lwezibani kolunye uhlangothi lwalo namagatsha
amathathu othi lwezibani kolunye uhlangothi lwalo. 19 Izimbizana ezintathu zafaniswa nezimbali
zemi-alimondi kwelinye igatsha, zinesumpa nembali; izimbizana ezintathu zafaniswa nezimbali
zemi-alimondi kwelinye igatsha, zinesumpa nembali; kwakunjalo kuwo onke amagatsha
ayisithupha aphuma othini lwezibani. 20 Kwakukhona othini lwezibani izimbizana ezine ezifana
nezimbali zemi-alimondi, zinamasumpa azo nezimbali zazo, 21 isumpa phansi kwamagatsha
amabili likunye nalo, nelinye isumpa phansi kwamagatsha amabili likunye nalo, nelinye isumpa
phansi kwamagatsha amabili likunye nalo, kuwo onke amagatsha ayisithupha aphuma kulo. 22
Amasumpa alo namagatsha alo ayekunye nalo; konke okwalo kwakungumsebenzi munye
okhandiweyo wegolide elicwengekileyo. 23 Wazenza izibani zalo eziyisikhombisa nezizenze zalo
nezitsha zalo zensizi ngegolide elicwengekileyo. 24 Walwenza ngetalenta legolide
elicwengekileyo, nazo zonke izinto zalo.
25
Walenza i-altare lempepho ngomuthi womtholo; ubude balo babuyingalo, nobubanzi balo
babuyingalo; laba nezinhlangothi ezine ezilingeneyo; nokuphakama kwalo kwakuyizingalo
ezimbili; izimpondo zalo zazikunye nalo. 26 Walinameka ngegolide elicwengekileyo ngaphezulu,
nezinhlangothi zalo nxazonke, nezimpondo zalo; walenzela udini lwegolide nxazonke. 27
Walenzela amasongo amabili egolide phansi kodini lwalo nxazombili, ezinhlangothini zalo
zombili, abe yizindawo zezinti zokulithwala. 28 Wazenza izinti ngomuthi womtholo, wazinameka
ngegolide. 29 Wawenza amafutha angcwele okugcoba, nempepho enhle yamakha athaphukayo,
ngokobungcweti bomthaki.

38
1
Walenza i-altare lomnikelo wokushiswa ngomuthi womtholo; ubude balo babuyizingalo
eziyisihlanu, nobubanzi balo babuyizingalo eziyisihlanu; laba nezinhlangothi ezine ezilingeneyo;
nokuphakama kwalo kwakuyizingalo ezintathu. 2 Wazenza izimpondo zalo emagumbini alo
omane, izimpondo zalo zazikunye nalo; walinameka ngethusi. 3 Wazenza zonke izinto ze-altare,
amakhanzi, namafosholo, nezitsha, nezimfoloko, nemicengezi yomlilo; wazenza zonke izinto
zalo ngethusi. 4 Walenzela i-altare ihele lethusi elenziwe njengenetha phansi kosiko oluzungeza i-
altare ukuba lifinyelele ngaphakathi kwe-altare ukuya phezulu. 5 Wakhanda amasongo amane
amagumbi omane ehele lethusi, abe yizindawo zezinti. 6 Wazenza izinti ngomuthi womtholo,
wazinameka ngethusi. 7 Wazifaka izinti emasongweni ezinhlangothini ze-altare ukuba lithwalwe
ngazo; walenza ngamapulangwe laba yigobongo. 8 Wawenza umcengezi wethusi nesinqe sawo
ngethusi lezibuko zabesifazane abahlangana ukuyokhonza ngasemnyango wetende lokuhlangana.
9
Walenza negceke; ngaseningizimu ohlangothini lwaseningizimu izilenge zegceke zaziyilineni
elicolekileyo lemicu ephothiweyo, izingalo eziyikhulu. 10 Izinsika zazo zazingamashumi amabili,
nezinyawo zazo zazingamashumi amabili zethusi; izingwegwe zezinsika nezibopho zazo
zaziyisiliva. 11 Ngasohlangothini lwasenyakatho yizingalo eziyikhulu, izinsika zazo
zingamashumi amabili, nezinyawo zazo zingamashumi amabili zethusi; izingwegwe zezinsika
nemishayo yazo kwakuyisiliva. 12 Ngasohlangothini olungasentshonalanga izilenge zaziyizingalo
ezingamashumi ayisihlanu, izinsika zazo zaziyishumi, nezinyawo zazo zaziyishumi; izingwegwe
zezinsika nemishayo yazo kwakuyisiliva. 13 Nangasempumalanga ngasohlangothini
olungasempumalanga yizingalo ezingamashumi ayisihlanu. 14 Izilenge kwelinye icele lesango
zaziyizingalo eziyishumi nanhlanu; izinsika zazo zazintathu, nezinyawo zazo zazintathu. 15
Kwaba njalo nakwelinye icele: ngalapha nangalapha kwesango legceke zazikhona izilenge
eziyizingalo eziyishumi nanhlanu; izinsika zazo zazintathu, nezinyawo zazo zazintathu. 16 Zonke
izilenge zegceke nxazonke zazingezelineni elicolekileyo lemicu ephothiweyo. 17 Izinyawo
zezinsika zaziyithusi, izingwegwe zezinsika nemishayo yazo kwakuyisiliva; izihloko zazo
zazinamekwe ngesiliva; zonke izinsika zegceke zazinesibopho sesiliva. 18 Iveli lesango legceke
lalingumsebenzi womfekethisi ngokuluhlaza nangokububende nangokubomvu, nangelineni
elicolekileyo lemicu ephothiweyo; ubude balo babuyizingalo ezingamashumi amabili,
nokuphakama ngokobubanzi bezilenge kwakuyizingalo eziyisihlanu ngokulingene nezilenge
zegceke. 19 Izinsika zalo zazizine, nezinyawo zalo zazizine zethusi; izingwegwe zaziyisiliva,
ukunamekwa kwezihloko nokwezibopho kwakuyisiliva. 20 Zonke izikhonkwane zetabernakele
nezegceke nxasonke zaziyithusi.
21
Lokhu kuyimali yetabernakele, itabernakele lobufakazi, njengokubalwa kwayo ngesiyalezo
sikaMose, ngokubala kwamaLevi ngesandla sika-Itamari indodana ka-Aroni umpristi. 22
UBesaleli indodana ka-Uri kaHure, owesizwe sakwaJuda, wakwenza konke uJehova amyale
ngakho uMose. 23 Wayeno-Oholiyabe indodana ka-Ahisamaki, owesizwe sakwaDani, umqophi
nengcweti nomfekethisi ngokuluhlaza nangokububende nangokubomvu, nangelineni
elicolekileyo lemicu ephothiweyo. 24 Lonke igolide okwasetshenzwa ngalo, wonke umsebenzi
wendlu engcwele, igolide lomnikelo lalingamatalenta angamashumi amabili nesishiyagalolunye
namashekeli angamakhulu ayisikhombisa namashumi amathathu ngokweshekeli lendlu engcwele.
25
Isiliva lababebalwa esizweni lalingamatalenta ayikhulu namashekeli ayinkulungwane
namakhulu ayisikhombisa namashumi ayisikhombisa nanhlanu ngokweshekeli lendlu engcwele,
26
kwaba yilowo nalowo wanikela ngebeka eliyinxenye yeshekeli ngokweshekeli lendlu
engcwele kubo bonke abadlulela kwababaliweyo abaneminyaka engamashumi amabili
nangaphezulu, abantu abayizinkulungwane ezingamakhulu ayisithupha nantathu namakhulu
ayisihlanu namashumi ayisihlanu. 27 Amatalenta ayikhulu esiliva ayengawokukhanda izinyawo
zendlu engcwele, nezinyawo zesihenqo, izinyawo eziyikhulu ngamatalenta ayikhulu, italenta
ngonyawo. 28 Ngamashekeli ayinkulungwane namakhulu ayisikhombisa namashumi
ayisikhombisa nanhlanu wenza izingwegwe zezinsika, wanameka izihloko zazo, wazenzela
izibopho. 29 Ithusi lomnikelo laba ngamatalenta angamashumi ayisikhombisa namashekeli
ayizinkulungwane ezimbili namakhulu amane. 30 Wenza ngalo izinyawo zomnyango wetende
lokuhlangana, ne-altare lethusi, nehele lalo lethusi, nezinto zonke ze-altare, 31 nezinyawo zegceke
nxazonke, nezinyawo zesango legceke, nazo zonke izikhonkwane zetabernakele, nazo zonke
izikhonkwane zegceke nxazonke.

39
1
Ngokuluhlaza nangokububende nangokubomvu benza izambatho ezenziwe kahle zokukhonza
endaweni engcwele; bamenzela u-Aroni izambatho ezingcwele, njengalokho uJehova emyalile
uMose. 2 Wayenza ingubo yamahlombe ngegolide, nangokuluhlaza nangokububende
nangokubomvu, nangelineni elicolekileyo lemicu ephothiweyo. 3 Balikhanda igolide laba
ngongcwecwe, balisika izincingwana ukuba zalukwe nokuluhlaza nokububende nokubomvu,
nelineni elicolekileyo, umsebenzi wengcweti. 4 Bayenzela iziziba zamahlombe
ezihlanganisiweyo; yahlanganiswa emaceleni omabili. 5 Ibhande elalukiwe kahle elalikuyo
ukuyibhinca lalikunye nayo, lifana nokusetshenzwa kwayo, lalingelegolide, lingokuluhlaza
nangokububende nangokubomvu, nangelineni elicolekileyo lemicu ephothiweyo, njengalokho
uJehova emyalile uMose. 6 Balungisa amatshe amashohamu ezungezwe yizisekelo zegolide,
eqoshwe njengendandatho ngamagama amadodana ka-Israyeli. 7 Wawabeka ezizibeni zengubo
yamahlombe, abe ngamatshe esikhumbuzo sabantwana bakwa-Israyeli, njengalokho uJehova
emyalile uMose. 8 Wayesesenza isihlangu sesifuba, umsebenzi wengcweti, njengokusetshenzwa
kwengubo yamahlombe, ngegolide, nangokuluhlaza nangokububende nangokubomvu,
nangelineni elicolekileyo lemicu ephothiweyo. 9 Sasinezinhlangothi ezine ezilingeneyo; basenza
isihlangu sesifuba siphindwe kabili; ubude baso babunjengokudazuluka kweminwe, nobubanzi
baso babunjengokudazuluka kweminwe, siphindwe kabili. 10 Bafaka kuso izinhla ezine zamatshe;
uhla lwesardiyu, netopazi, nerubi lwaba luhla lokuqala; 11 uhla lwesibili lwaba yisimaragidu,
nesafire, nedayimani; 12 uhla lwesithathu lwaba yihiyakinte, ne-agathe, ne-amethiste; 13 uhla
lwesine lwaba yikrisolithi, neshohamu, nejaspi; ayezungeziwe yizisekelo zegolide lapho zifakwe
khona. 14 Amatshe ayeyishumi nambili njengamagama amadodana ka-Israyeli, njengamagama
abo; njengokuqoshwa kwendandatho yilelo nalelo lalinegama lakhe kuzo izizwe eziyishumi
nambili. 15 Benza esihlangwini sesifuba amaketanga njengamagoda, umsebenzi othandelweyo
wegolide elicwengekileyo. 16 Benza izisekelo ezimbili zegolide namasongo amabili egolide;
bawafaka amasongo omabili emaceleni omabili esihlangu. 17 Base befaka amaketanga omabili
egolide athandelweyo emasongweni omabili emaceleni esihlangu sesifuba. 18 Ezinye izihloko
ezimbili zamaketanga athandelweyo bazifaka ezisekelweni ezimbili, wazibeka ngaphambili
ezizibeni zengubo yamahlombe. 19 Base bewenza amasongo amabili egolide, bawafaka
emaceleni omabili esihlangu sesifuba, eceleni laso elibhekene nengubo yamahlombe ngaphakathi.
20
Bawenza amasongo amabili egolide, bawafaka ezizibeni zombili zengubo yamahlombe phansi
ngaphambili, eduze nokuhlangana kwayo, phezu kwebhande elifekethisiweyo lengubo
yamahlombe. 21 Base bebopha isihlangu sesifuba ngamasongo aso emasongweni engubo
yamahlombe ngentambo eluhlaza ukuba sibe phezu kwebhande elifekethisiweyo lengubo
yamahlombe, ukuze isihlangu sesifuba singakhumuki engutsheni yamahlombe, njengalokho
uJehova emyalile uMose. 22 Walenza ijazi lengubo yamahlombe ngokwalukiweyo, ngokuluhlaza
lonke. 23 Imbobo yejazi ngaphakathi kwalo yayinjengembobo yebhantshi lensimbi, inomphetho
oyizungeza imbobo yalo ukuba lingadatshulwa. 24 Benza emiphethweni yejazi amapomegranati
ngokuluhlaza nangokububende nangokubomvu okuphothiweyo. 25 Bazenza izikhencezo zegolide
elicwengekileyo, bazifaka izikhencezo phakathi kwamapomegranati emiphethweni yejazi
nxazonke phakathi kwamapomegranati, 26 isikhencezo nepomegranati, isikhencezo
nepomegranati emiphethweni yejazi nxazonke, ukuba kukhonzwe ngalo, njengalokho uJehova
emyalile uMose. 27 Base bebalukela u-Aroni namadodana akhe amabhantshi elineni elicolekileyo
lomsebenzi owalukiweyo, 28 nesigqoko selineni elicolekileyo, nezinye izigqoko ezinhle zelineni
elicolekileyo, namabhulukwe elineni ngelineni elicolekileyo lemicu ephothiweyo, 29 nebhande
lelineni elicolekileyo lemicu ephothiweyo nelokuluhlaza nelokububende nelokubomvu,
umsebenzi womfeketshisi, njengalokho uJehova emyalile uMose. 30 Benza ungcwecwe
womqhele ongcwele ngegolide elicwengekileyo, babhala kuye umbhalo njengokuqoshwa
kwendandatho wokuthi: "Wahlukaniselwe uJehova". 31 Babophela kuye intambo eluhlaza ukuba
abekwe phezulu esigqokweni, njengalokho uJehova emyalile uMose.
32
Njalo-ke kwaqedwa wonke umsebenzi wetabernakele letende lokuhlangana; abantwana benza
njengakho konke uJehova amyale ngakho uMose; benze njalo-ke. 33 Baliletha itabernakele
kuMose, itende nempahla yalo yonke, nezinkibaniso zalo, namapulangwe alo, nemishayo yalo,
nezinsika zalo, nezinyawo zalo, 34 nesifulelo sezikhumba ezibomvu zezinqama, nesifulelo
sezikhumba zamatahasi, nesihenqo seveli, 35 nomphongolo wobufakazi, nezinti zawo, nesihlalo
somusa; 36 itafula nezinto zonke zalo, nezinkwa zokubukwa; 37 uthi olucwengekileyo lwezibani
nezibani zalo, izibani zihleliwe, nezinto zonke zalo, namafutha okukhanyisa, 38 ne-altare legolide,
namafutha okugcoba, nempepho ethaphukayo, neveli lomnyango wetende; 39 i-altare lethusi,
nehele lalo lethusi, nezinti zalo, nezinto zonke zalo, nomcengezi nesinqe sawo; 40 izilenge
zegceke, nezinsika zalo, nezinyawo zalo, neveli lesango legceke, nezintambo zalo,
nezikhonkwane zalo, nempahla yonke yenkonzo yetabernakele, netende lokuhlangana; 41
izambatho ezenziwe kahle zokukhonza endaweni engcwele, nezambatho ezingcwele zika-Aroni
umpristi, nezambatho zamadodana akhe zokukhonza esikhundleni sobupristi. 42 Njengakho
konke uJehova amyale ngakho uMose, benze njalo abantwana bakwa-Israyeli wonke umsebenzi.
43
UMose wabona wonke umsebenzi; bheka, babewenzile; njengalokho uJehova eyalile, bawenza
kanjalo; uMose wababusisa.

40
1
UJehova wakhuluma kuMose, wathi: 2 "Ngosuku lokuqala lwenyanga yokuqala wolimisa
itabernakele letende lokuhlangana. 3 Wofaka khona umphongolo wobufakazi, uwuhenqele
umphongolo ngesihenqo. 4 Ulingenise itafula, uhlele izinto eziphezu kwalo, ulungenise uthi
lwezibani, ubeke izibani zalo. 5 Ubeke i-altare legolide lempepho phambi komphongolo
wobufakazi, ulengise iveli lomnyango wetabernakele. 6 "Ubeke i-altare lomnikelo wokushiswa
phambi komnyango wetabernakele letende lokuhlangana. 7 Ubeke umcengezi phakathi kwetende
lokuhlangana ne-altare, uthele amanzi kuwo. 8 Ulungise igceke nxazonke, ulengise iveli lesango
legceke. 9 "Uthabathe amafutha okugcoba, uligcobe itabernakele nakho konke okukulo,
ulingcwelise kanye nempahla yalo yonke, libe ngcwele. 10 Ugcobe i-altare lomnikelo
wokushiswa nezinto zalo zonke, ulingcwelise i-altare, i-altare libe ngcwelengcwele. 11 Ugcobe
umcengezi nesinqe sawo, uwungcwelise. 12 "Ulethe u-Aroni namadodana akhe emnyango
wetende lokuhlangana, ubageze ngamanzi. 13 Umembathise u-Aroni izambatho ezingcwele,
umgcobe, umngcwelise ukuba angikhonze esikhundleni sobupristi. 14 Ulethe amadodana akhe,
uwembathise amabhantshi, 15 uwagcobe, njengalokho wamgcoba uyise, ukuba bangikhonze
esikhundleni sobupristi, ukugcotshwa kwabo kube ngubupristi obuphakade kubo ezizukulwaneni
zabo."
16
Wenze njalo uMose; njengakho konke uJehova amyale ngakho, wenze njalo-ke. 17 Kwathi
enyangeni yokuqala ngomnyaka wesibili, ngolokuqala lwenyanga itabernakele lamiswa. 18
UMose walimisa itabernakele, wabeka izinyawo zalo, wamisa amapulangwe alo, wafaka
imishayo yalo, wamisa izinsika zalo. 19 Weneka itende phezu kwetabernakele, wabeka isifulelo
setende phezu kwalo, njengalokho uJehova emyalile uMose. 20 Wathabatha, wabufaka ubufakazi
emphongolweni, wafaka izinti emphongolweni, wabeka isihlalo somusa phezu komphongolo. 21
Wangenisa umphongolo etabernakele, wamisa isihenqo seveli, wahenqela umphongolo
wobufakazi, njengalokho uJehova emyalile uMose. 22 Wafaka itafula etendeni lokuhlangana
ohlangothini lwetabernakele olungasenyakatho ngaphandle kwesihenqo. 23 Wahlela izinkwa
phezu kwalo phambi kukaJehova, njengalokho uJehova emyalile uMose. 24 Walubeka uthi
lwezibani etendeni lokuhlangana malungana netafula ohlangothini lwetabernakele
olungaseningizimu. 25 Wazibeka izibani phambi kukaJehova, njengalokho uJehova emyalile
uMose. 26 Walibeka i-altare legolide etendeni lokuhlangana ngaphambi kwesihenqo. 27 Washisa
lapho impepho yamakha athaphukayo, njengalokho uJehova emyalile uMose. 28 Walengisa iveli
lomnyango wetabernakele. 29 Wabeka i-altare lomnikelo wokushiswa ngasemnyango
wetabernakele letende lokuhlangana, wanikela kulo ngomnikelo wokushiswa nangomnikelo
wempuphu, njengalokho uJehova emyalile uMose. 30 Wabeka umcengezi phakathi kwetende
lokuhlangana ne-altare, wathela kuwo amanzi okugeza. 31 OMose no-Aroni namadodana akhe
bahlambela kuwo izandla zabo nezinyawo zabo. 32 Nxa bengena etendeni lokuhlangana nanxa
besondela e-altare, bageza njengalokho uJehova emyalile uMose. 33 Walungisa igceke lizungeza
itabernakele ne-altare, walengisa iveli lesango legceke; kanjalo-ke uMose wawuqeda umsebenzi.
34
Ifu lase lisibekela itende lokuhlangana, nenkazimulo kaJehova yagcwalisa itabernakele. 35
UMose wayengenakungena etendeni lokuhlangana, ngokuba ifu lahlala phezu kwalo,
nenkazimulo kaJehova yagcwalisa itebernakele. 36 Njalo lapho ifu lenyuswa etabernakele,
abantwana bakwa-Israyeli baqhubekela phambili ezinkambeni zabo zonke. 37 Kepha uma ifu
lingenyuswanga, babengaqhubeki kwaze kwafika usuku lokwenyuswa kwalo. 38 Ngokuba ifu
likaJehova laliphezu kwetabernakele emini, nomlilo wawukulo ebusuku emehlweni ayo yonke
indlu yakwa-Israyeli ezinkambeni zabo zonke.
 LEVITICUS
1
1
UJehova esetendeni lokuhlangana wambiza uMose, wakhuluma kuye, wathi: 2 "Yisho
kubantwana bakwa-Israyeli, uthi kubo: ‘Nxa umuntu wakini eletha umnikelo kuJehova, anonikela
ngomnikelo wenu wezinkomo zemihlambi nowezimvu.
3
"‘Uma umnikelo wakhe ungumnikelo wokushiswa wemihlambi, uyakunikela ngeduna
elingenasici, anikele ngalo ngasemnyango wetende lokuhlangana, aze amukeleke kuJehova. 4
Uyakubeka isandla sakhe enhloko yomnikelo wokushiswa; uyakwamukelwa ngenxa yakhe,
umenzele ukubuyisana. 5 Wolihlaba iduna phambi kukaJehova, amadodana ka-Aroni, abapristi,
alethe igazi, afafaze ngegazi nxazonke ze-altare elingasemnyango wetende lokuhlangana. 6
Uyakuhlinza umnikelo wokushiswa, awuhlahlele izitho. 7 Amadodana ka-Aroni umpristi abeke
umlilo e-altare, ahlele izinkuni phezu komlilo; 8 amadodana ka-Aroni, abapristi, ahlele izitho,
nenhloko, namanoni, phezu kwezinkuni ezisemlilweni ophezu kwe-altare, 9 ahlanze izibilini zalo
namanqina alo ngamanzi, umpristi akushise konke e-altare, kube ngumnikelo wokushiswa,
umnikelo womlilo, ube yiphunga elimnandi kuJehova.
10
"‘Uma umnikelo wakhe ungowemihlambi, owasezimvini noma owasezimbuzini, ube
ngumnikelo wokushiswa, wonikela ngeduna elingenasici. 11 Alihlabe ngasohlangothini lwe-altare
olungasenyakatho phambi kukaJehova; amadodana ka-Aroni, abapristi, afafaze i-altare ngegazi
lalo nxazonke. 12 Alihlahlele izitho nenhloko yalo namanoni alo, umpristi akuhlele phezu
kwezinkuni ezisemlilweni ophezu kwe-altare, 13 ahlanze izibilini zalo namanqina alo ngamanzi,
umpristi anikele ngakho konke, akushise e-altare kube ngumnikelo wokushiswa, umnikelo
womlilo, ube yiphunga elimnandi kuJehova. 14 "‘Uma umnikelo wakhe kuJehova ungumnikelo
wokushiswa kwezinyoni, wonikela ngomnikelo wamahobhe noma ngowamaphuphu amajuba. 15
Umpristi awulethe e-altare, awushumpule inhloko, awushise e-altare, igazi lawo likhanyelwe
ngasohlangothini lwe-altare, 16 asuse ingila nezimpaphe, akulahle ngaseceleni kwe-altare
ngasempumalanga endaweni yomlotha, 17 awuqaqe ngamaphiko awo, angawudabuli kodwa;
umpristi awushise e-altare phezu kwezinkuni ezisemlilweni, ube ngumnikelo wokushiswa,
umnikelo womlilo, ube yiphunga elimnandi kuJehova.

2
1
"‘Nxa umuntu enikela ngomnikelo wempuphu kuJehova, umnikelo woba yimpuphu
ecolekileyo, athele amafutha kuwo, abeke inhlaka kuwo, 2 awulethe kumadodana ka-Aroni,
abapristi, acaphune kuwo ngokhweshe wempuphu ecolekileyo yawo nowamafutha awo, kanye
nayo yonke inhlaka yawo, umpristi awushise ube yisikhumbuzo sawo e-altare, umnikelo
womlilo, ube yiphunga elimnandi kuJehova; 3 okuseleyo komnikelo wempuphu kuyakuba
ngokuka-Aroni nokwamadodana akhe; kungcwelengcwele eminikelweni yomlilo kaJehova. 4
"‘Nxa uletha umnikelo wempuphu ephekwe eziko, woba ngamaqebelengwane angenamvubelo
empuphu ecolekileyo exovwe namafutha, noma imiqathane engenamvubelo, egcotshwe
ngamafutha. 5 Uma umnikelo wakho ungumnikelo wempuphu ephekwe ngomqengele, woba
ngowempuphu ecolekileyo engenamvubelo, exovwe ngamafutha. 6 Uwuhlephule izingcezu,
uthele amafutha kuzo; kungumnikelo wempuphu. 7 Uma umnikelo wakho ungumnikelo
wempuphu ephekwe ngokhamba, uyakwenziwa ngempuphu ecolekileyo kanye namafutha. 8
Woletha kuJehova umnikelo wempuphu owenziwe ngalezo zinto, unikelwe kumpristi, yena
awuyise e-altare. 9 Umpristi makathabathe okuyisikhumbuzo kuwo umnikelo wempuphu,
akushise e-altare kube ngumnikelo womlilo, kube yiphunga elimnandi kuJehova. 10 Okuseleyo
komnikelo wempuphu kuyakuba ngokuka-Aroni nokwamadodana akhe; kungcwelengcwele
eminikelweni yomlilo kaJehova.
11
"‘Awuyikwenziwa ngemvubelo umnikelo wempuphu eninikela ngawo kuJehova, ngokuba
aniyikushisa imvubelo nazinyosi kube ngumnikelo womlilo kuJehova. 12 Anonikela ngakho kube
ngumnikelo wolibo; kungenyukeli e-altare nokho, kube yiphunga elimnandi. 13 Yonke iminikelo
yakho yempuphu iyoliswe ngosawoti; ungavumeli ukuba usawoti wesivumelwano
sikaNkulunkulu wakho asilale emnikelweni wakho wempuphu; wonikela ngayo yonke iminikelo
yakho inosawoti. 14 "‘Uma unikela ngomnikelo wempuphu wolibo kuJehova, wonikela
ngezikhwebu zamabele ezosiwe ngomlilo, amabele agquliweyo ezikhwebu ezintsha, ube
ngumnikelo wempuphu wolibo lwakho, 15 uthele amafutha kuwo, ubeke inhlaka phezu kwawo;
kungumnikelo wempuphu. 16 Umpristi ashise okuyisikhumbuzo sawo, inxenye yamabele
agquliweyo awo nenxenye yamafutha awo kanye nayo yonke inhlaka yawo; kungumnikelo
womlilo kuJehova.

3
1
"‘Uma umnikelo wakhe ungumhlatshelo weminikelo yokuthula, enikela ngowemihlambi, noma
iduna noma insikazi, wonikela ngawo phambi kukaJehova ungenasici. 2 Uyakubeka isandla
sakhe enhloko yomnikelo wakhe, awuhlabe ngasemnyango wetende lokuhlangana, amadodana
ka-Aroni, abapristi, afafaze i-altare nxazonke ngegazi. 3 Wothabatha kuwo umhlatshelo
weminikelo yokuthula, anikele ngomnikelo womlilo kuJehova, umhlehlo osibekela izibilini nawo
onke amanoni aphezu kwezibilini, 4 nezinso zombili namanoni akuzo angasezinkalweni,
namanoni aphezu kwesibindi, ewasusa ngasezinsweni. 5 Amadodana ka-Aroni ayakukushisa e-
altare phezu komnikelo wokushiswa ophezu kwezinkuni ezisemlilweni, kube ngumnikelo
womlilo, kube yiphunga elimnandi kuJehova.
6
"‘Uma umnikelo wakhe nomhlatshelo weminikelo yokuthula kuJehova ungowezimvu, noma
iduna noma insikazi, wonikela ngawo ungenasici. 7 Uma enikela ngemvu, ibe ngumnikelo
wakhe, wonikela ngayo phambi kukaJehova, 8 abeke isandla sakhe enhloko yomnikelo wakhe,
awuhlabe ngaphambi kwetende lokuhlangana, amadodana ka-Aroni afafaze i-altare nxazonke
ngegazi lawo. 9 Wothabatha kuwo umhlatshelo weminikelo yokuthula, anikele ngomnikelo
womlilo kuJehova amanoni awo, nomsila wonke ononileyo, awunqume eduze nomhlandla,
namanoni asibekela izibilini, nawo onke amanoni aphezu kwezibilini, 10 nezinso zombili
namanoni akuzo angasezinkalweni, namanoni aphezu kwesibindi, ewasusa ngasezinsweni. 11
Umpristi uyakukushisa e-altare; kungukudla komnikelo womlilo kuJehova. 12 "‘Uma umnikelo
wakhe uyimbuzi, wonikela ngayo phambi kukaJehova, 13 abeke isandla sakhe enhloko yayo,
ayihlabe ngaphambi kwetende lokuhlangana, amadodana ka-Aroni afafaze i-altare nxazonke
ngegazi layo. 14 Abesethabatha kuyo, anikele ngomnikelo wakhe ube ngumnikelo womlilo
kuJehova, amanoni asibekela izibilini nawo onke amanoni aphezu kwezibilini, 15 nezinso zombili
namanoni akuzo angasezinkalweni, namanoni aphezu kwesibindi, ewasusa ngasezinsweni. 16
Umpristi uyakukushisa e-altare; kungukudla komnikelo womlilo, kube yiphunga elimnandi; onke
amanoni angakaJehova. 17 "‘Kuyakuba yisimiso esiphakade ezizukulwaneni zenu ezindlini zenu
zonke zokuba ningadli amanoni nagazi.’"

4
1
UJehova wakhuluma kuMose, wathi: 2 "Yisho kubantwana bakwa-Israyeli, uthi: ‘Uma umuntu
ona kungengamabomu kuyo imiyalo uJehova ayale ngayo ukuthi akunakwenziwa akwenze noma
yikuphi, 3 uma kungumpristi ogcotshiweyo owone kanjalo, aze ehlisele abantu icala, wonikela
kuJehova ngesono sakhe one ngaso iduna elingenasici, kube ngumnikelo wesono, 4 ayiyise
inkunzi ebusweni bukaJehova ngasemnyango wetende lokuhlangana, abeke isandla sakhe
enhloko yenkunzi, ayihlabe inkunzi phambi kukaJehova. 5 Umpristi ogcotshiweyo wothabatha
igazi lenkunzi, alilethe ngasemnyango wetende lokuhlangana, 6 umpristi agcobhoze umunwe
wakhe egazini, afafaze ngegazi kasikhombisa phambi kukaJehova, ngaphambi kwesihenqo
sendlu engcwele. 7 Umpristi abhece igazi ezimpondweni ze-altare lempepho ethaphukayo phambi
kukaJehova elisetendeni lokuhlangana; lonke elinye igazi lenkunzi wolithulula ngasesinqeni se-
altare lomnikelo wokushiswa elingasemnyango wetende lokuhlangana. 8 Uyakuthabatha onke
amanoni enkunzi yomnikelo wesono, amanoni asibekela izibilini nawo onke amanoni aphezu
kwezibilini, 9 nezinso zombili namanoni akuzo angasezinkalweni, namanoni aphezu kwesibindi,
ewasusa ngasezinsweni, 10 njengalokho kwasuswa kuyo inkunzi yomhlatshelo weminikelo
yokuthula, umpristi akushise e-altare lomnikelo wokushiswa. 11 Isikhumba senkunzi, nayo yonke
inyama yayo, nenhloko yayo, namanqina ayo, nezibilini zayo, nomswani wayo, 12 yebo, yonke
inkunzi uyakuyikhiphela ngaphandle kwekamu, ayiyise endaweni ehlambulukileyo lapho
uthululwa khona umlotha.
13
"‘Uma-ke yonke inhlangano yakwa-Israyeli iduka, leyo nto isitheke emehlweni ebandla, benza
noma yikuphi kuyo yonke imiyalo uJehova ayale ngakho ukuthi akunakwenziwa, baze babe
necala, 14 lapho isono abone ngaso sesaziwe, ibandla liyakunikela ngeduna libe ngumnikelo
wesono, lililethe phambi kwetende lokuhlangana. 15 Amalunga enhlangano ayakubeka izandla
zawo enhloko yenkunzi phambi kukaJehova, inkunzi ihlatshwe phambi kukaJehova. 16 Umpristi
ogcotshiweyo alethe igazi lenkunzi etendeni lokuhlangana. 17 Umpristi uyakugcobhoza umunwe
wakhe egazini, afafaze ngalo kasikhombisa phambi kukaJehova phambi kwesihenqo. 18
Uyakulibheca igazi ezimpondweni ze-altare eliphambi kukaJehova, elisetendeni lokuhlangana,
athulule lonke elinye igazi ngasesinqeni se-altare lomnikelo wokushiswa elingasemnyango
wetende lokuhlangana. 19 Abesethabatha kuyo onke amanoni, awashise e-altare. 20 Makenze
njalo ngenkunzi; njengalokho wenza ngenkunzi yomnikelo wesono, makenze njalo nangalena.
Umpristi abenzele ukubuyisana, baze bathethelelwe. 21 Uyakuyikhiphela inkunzi ngaphandle
kwekamu, ayishise, njengalokho wayishisa inkunzi yokuqala: lokhu kungumnikelo wesono
webandla.
22
"‘Nxa kona induna, yenza kungengamabomu noma yikuphi kuyo yonke imiyalo uJehova
uNkulunkulu wayo ayale ngakho ukuthi akunakwenziwa, ize ibe necala, 23 uma-ke yaziswa isono
sayo eyone ngaso, iyakuletha umnikelo wayo ube yimbuzi, eyeduna elingenasici. 24 Iyakubeka
isandla sayo enhloko yembuzi, iyihlabele endaweni lapho behlabela khona iminikelo yokushiswa
phambi kukaJehova; kungumnikelo wesono. 25 Umpristi wothabatha igazi lomnikelo wesono
ngomunwe wakhe, alibhece ezimpondweni ze-altare lomnikelo wokushiswa, igazi lawo alithulule
ngasesinqeni se-altare lomnikelo wokushiswa. 26 Onke amanoni awo uyakuwashisa e-altare
njengamanoni omhlatshelo weminikelo yokuthula, umpristi ayenzele ukubuyisana ngesono sayo,
ize ithethelelwe.
27
"‘Uma kona umuntukazana, enza kungengamabomu noma yikuphi kuyo imiyalo uJehova ayale
ngakho ukuthi akunakwenziwa, aze abe necala, 28 uma aziswa isono sakhe one ngaso, woletha
umnikelo wakhe wembuzi, insikazi engenasici, ngesono sakhe one ngaso. 29 Uyakubeka isandla
sakhe enhloko yomnikelo wesono, awuhlabe umnikelo wesono endaweni yomnikelo
wokushiswa. 30 Umpristi wothabatha igazi lawo ngomunwe wakhe, alibhece ezimpondweni ze-
altare lomnikelo wokushiswa, lonke elinye igazi lawo alithulule ngasesinqeni se-altare. 31 Onke
amanoni awo uyakuwasusa, njengalokhu amanoni esuswa emhlatshelweni weminikelo yokuthula,
umpristi awashise e-altare abe yiphunga elimnandi kuJehova, umpristi amenzele ukubuyisana,
aze athethelelwe. 32 "‘Uma eletha iwundlu libe ngumnikelo wakhe wesono, woletha insikazi
engenasici. 33 Uyakubeka isandla sakhe enhloko yomnikelo wesono, awuhlabe, ube ngumnikelo
wesono endaweni lapho behlabela khona umnikelo wokushiswa. 34 Umpristi wothabatha igazi
lomnikelo wesono ngomunwe wakhe, alibhece ezimpondweni ze-altare lomnikelo wokushiswa,
lonke elinye igazi lawo alithulule ngasesinqeni se-altare. 35 Onke amanoni awo uyakuwasusa,
njengalokhu amanoni emvu esuswa emhlatshelweni weminikelo yokuthula, umpristi awashise e-
altare phezu kweminikelo yomlilo kaJehova, umpristi amenzele ukubuyisana ngesono sakhe one
ngaso, aze athethelelwe.

5
1
"‘Uma umuntu ona lapho ezwa izwi lesifungo, engufakazi wokuthile, noma ekubonile noma
ekwazi, engakusho nokho, khona wothwala ububi bakhe; 2 noma umuntu ethinta into
engcolileyo, noma isidumbu sesilo esingcolileyo, noma isidumbu senkomo engcolileyo, noma
isidumbu sesilwanyana esikhasayo esingcolileyo, kumsithele, engcolile nokho, woba necala. 3
"‘Noma ethinta ukungcola komuntu, nakuba yikuphi ukungcola kwakhe angcole ngakho,
kumsithele, lapho esekwazi woba necala. 4 "‘Noma umuntu efunga ngamawala ngomlomo wakhe
ukwenza okubi nokuba ukwenza okuhle, noma yikuphi umuntu angaphahluka ngakho
ngesifungo, kumsithele, lapho esekwazi woba necala kokunye kwalokho. 5 "‘Kuyakuthi lapho
enecala kokunye kwalokho, avume lokho one ngakho, 6 uyakuletha umnikelo wecala lakhe
kuJehova ngesono sakhe one ngaso, insikazi yasezimvini, imvu noma imbuzi, kube ngumnikelo
wesono, umpristi amenzele ukubuyisana ngesono sakhe.
7
"‘Uma amandla akhe enganeli imvu, makalethe kuJehova ngesono one ngaso amahobhe amabili
noma amaphuphu amabili amajuba, elinye libe ngumnikelo wesono, elinye libe ngumnikelo
wokushiswa, 8 awalethe kumpristi oyakunikela ngelomnikelo wesono kuqala, alishumpule
inhloko entanyeni, angalidabuli kodwa, 9 afafaze uhlangothi lwe-altare ngegazi lomnikelo
wesono, igazi eliseleyo likhanyelwe ngasesinqeni se-altare; kungumnikelo wesono. 10
Uyakulungisa elesibili libe ngumnikelo wokushiswa njengokwesimiso, umpristi amenzele
ukubuyisana ngesono sakhe one ngaso, aze athethelelwe. 11 "‘Kepha uma amandla akhe enganeli
amahobhe amabili noma amaphuphu amabili amajuba, makalethe umnikelo wakhe ngalokho one
ngakho, okweshumi kwe-efa lempuphu ecolekileyo, ube ngumnikelo wesono, angatheli mafutha
phezu kwawo, angabeki nhlaka phezu kwawo, ngokuba kungumnikelo wesono, 12 awulethe
kumpristi, umpristi acaphune kuwo ngokhweshe, kube yisikhumbuzo sawo, akushise e-altare
phezu kweminikelo yomlilo kaJehova; kungumnikelo wesono. 13 Umpristi uyakumenzela
ukubuyisana ngesono sakhe one ngaso, nakuyiphi yalezi zinto, aze athethelelwe; okuseleyo kube
ngokompristi njengomnikelo wempuphu.’"
14
UJehova wakhuluma kuMose, wathi: 15 "Uma umuntu esenza isiphambeko, one
kungengamabomu ezintweni ezingcwele zikaJehova, woletha kuJehova umnikelo wakhe wecala,
inqama yasemhlambini engenasici njengokulinganisa kwakho namashekeli esiliva ngokweshekeli
lendlu engcwele, ibe ngumnikelo wecala, 16 akhokhele lokho one ngakho entweni engcwele,
athasisele kukho okwesihlanu, akunike umpristi, umpristi amenzele ukubuyisana ngenqama
yomnikelo wecala, aze athethelelwe. 17 "Uma umuntu ona, enza noma yikuphi kuyo imiyalo
uJehova ayale ngakho ukuthi akunakwenziwa, noma ebengakwazi, unecala nokho, futhi
wothwala ububi bakhe. 18 Woletha kumpristi inqama engenasici yasemhlambini
njengokulinganisa kwakho, ibe ngumnikelo wecala, umpristi amenzele ukubuyisana ngesiphosiso
aphosise ngaso engazi, aze athethelelwe. 19 Kungumnikelo wecala; nempela unecala phambi
kukaJehova." esono

6
1
UJehova wakhuluma kuMose, wathi: 2 "Uma umuntu ona, enze isiphambeko kuJehova,
akhohlise umakhelwane wakhe ngento ebekiweyo, noma isibambiso noma into ephangiweyo,
noma ecindezela umakhelwane wakhe, 3 noma, lapho ethola into elahlekileyo, eyiphika, afunge
amanga, noma yikuphi kukho konke lokhu umuntu akwenzayo one ngakho, 4 khona kuyakuthi,
uma onile aze abe necala, uyakukubuyisa lokho okuphangiweyo, noma lokho akudlileyo, noma
lokho okwakubekwe kuye, noma lokho okwakulahlekile akutholayo, 5 noma yikuphi afungile
amanga ngakho; makakubuyise, athasisele okwesihlanu kukho, amnike lowo okungokwakhe
ngosuku lomnikelo wakhe wecala. 6 Woletha umnikelo wakhe wecala kuJehova, inqama
engenasici yasemhlambini ngokulinganisa kwakho, ibe ngumnikelo wecala, iyiswe kumpristi, 7
umpristi amenzele ukubuyisana phambi kukaJehova, aze athethelelwe konke angahle abe
ekwenzile anecala ngakho."
8
UJehova wakhuluma kuMose, wathi: 9 "Yala u-Aroni namadodana akhe, uthi: ‘Nanku umthetho
weminikelo yokushiswa: umnikelo wokushiswa uyakuhlala eziko le-altare ubusuku bonke kuze
kuse, umlilo we-altare uhlale kulo uvutha njalo. 10 Umpristi uyakwembatha isambatho selineni,
afake nebhulukwe lakhe lelineni emzimbeni wakhe, asuse umlotha womlilo oshise umnikelo
wokushiswa e-altare, awuthele ngaseceleni kwe-altare. 11 Abesekhumula izambatho zakhe,
embathe ezinye izambatho, akhiphele umlotha ngaphandle kwekamu endaweni ehlambulukileyo.
12
Umlilo ophezu kwe-altare uyakuhlala kulo uvutha njalo, ungacimi; umpristi uyakubasa
izinkuni kulo ekuseni njalo, ahlele kulo umnikelo wokushiswa, ashise kulo amanoni eminikelo
yokuthula. 13 Umlilo wohlala e-altare uvutha njalo, ungacimi.
14
"‘Nanku umthetho weminikelo yempuphu: amadodana ka-Aroni ayakunikela ngawo phambi
kukaJehova ngaphambi kwe-altare. 15 Makucashunwe kuwo ngokhweshe impuphu ecolekileyo
yomnikelo wempuphu namafutha awo, nayo yonke inhlaka ephezu komnikelo wempuphu,
akushise e-altare kube yisikhumbuzo sawo, kube yiphunga elimnandi kuJehova. 16 Okuseleyo
kuwo kuyakudliwa ngu-Aroni namadodana akhe, kudliwe ngaphandle kwemvubelo endaweni
engcwele, bakudlele egcekeni letende lokuhlangana. 17 Akuyikuphekwa ngemvubelo. Ngikunike
kube yisabelo sabo seminikelo yami yomlilo; kungcwelengcwele njengomnikelo wesono
nanjengomnikelo wecala. 18 Bonke abesilisa phakathi kwabantwana baka-Aroni bayakukudla
kube yisimiso esiphakade ezizukulwaneni zenu seminikelo yomlilo kaJehova; konke
okukuthintayo kuyakuba ngcwele.’" 19 UJehova wakhuluma kuMose, wathi: 20 "Nanku umnikelo
ka-Aroni nowamadodana akhe abayakunikela ngawo kuJehova mhla begcotshwa: okweshumi
kwe-efa lempuphu ecolekileyo kube ngumnikelo wempuphu njalonjalo, inxenye yakho ekuseni
nenxenye yakho kusihlwa. 21 Uyakwenziwa emqengeleni ngamafutha; usuxutshanisiwe
wowungenisa, unikele ngomnikelo wempuphu, ube yizingcezu ezihleshuliweyo, zibe yiphunga
elimnandi kuJehova. 22 Umpristi ogcotshiweyo esikhundleni sakhe phakathi kwamadodana akhe
wonikela ngawo, kube yisimiso esiphakade; woshiswa wonke. 23 Yonke iminikelo yempuphu
yompristi yoshiswa yonke, ingadliwa."
24
UJehova wakhuluma kuMose, wathi: 25 "Yisho ku-Aroni nakumadodana akhe, uthi: ‘Nanku
umthetho weminikelo yesono; endaweni ohlatshelwe kuyo umnikelo wokushiswa,
mawuhlatshelwe khona umnikelo wesono phambi kukaJehova; ungcwelengcwele. 26 Umpristi
onikela ngawo ngesono wowudla, udliwe endaweni engcwele egcekeni letende lokuhlangana. 27
Konke okuyakuthinta inyama yawo kuyakuba ngcwele; nxa ingubo ifafazwa ngegazi lawo, lapho
kufafazwe khona uyakukugeza endaweni engcwele. 28 Kepha isitsha sebumba okuphekelwe kuso
masaphulwe, kodwa uma kuphekelwa esitsheni sethusi, siyakuphucuzwa, sihashazwe ngamanzi.
29
Bonke abesilisa phakathi kwabapristi bayakuwudla; ungcwelengcwele. 30 Kepha
makungadliwa mnikelo wesono okwangeniswa igazi lawo etendeni lokuhlangana ukuba
kwenziwe ukubuyisana endaweni engcwele; woshiswa ngomlilo.

7
1
"‘Nanku umthetho weminikelo yecala; ingcwelengcwele. 2 Endaweni abahlabela kuyo
umnikelo wokushiswa, bayakuwuhlabela khona umnikelo wecala, kufafazwe i-altare nxazonke
ngegazi lawo. 3 Uyakunikela ngawo onke amanoni awo, umsila ononileyo namanoni asibekela
izibilini, 4 nezinso zombili namanoni akuzo angasezinkalweni, namanoni aphezu kwesibindi,
ewasusa ngasezinsweni, 5 umprisiti akushise e-altare kube ngumnikelo womlilo kuJehova;
kungumnikelo wecala. 6 Bonke abesilisa phakathi kwabapristi bayakuwudla, udliwe endaweni
engcwele; ungcwelengcwele. 7 "‘Umnikelo wecala unjengomnikelo wesono; umthetho wawo
munye; umpristi owenza ukubuyisana ngawo woba ngowakhe. 8 Umpristi onikela ngomnikelo
wokushiswa womuntu, isikhumba somnikelo wokushiswa anikele ngawo siyakuba ngesompristi.
9
Yonke iminikelo yempuphu ephekwe eziko, nayo yonke elungiselwa okhambeni
nasemqengeleni, iyakuba ngeyalo mpristi anikele ngayo. 10 Yonke iminikelo yempuphu exovwe
namafutha neyomileyo iyakuba ngeyamadodana onke ka-Aroni, enye ithole njengenye.
11
"‘Nanku umthetho womhlatshelo weminikelo yokuthula okuyakunikelwa ngayo kuJehova. 12
"‘Uma enikela ngawo ube ngumnikelo wokubonga, uyakunikela kanye nomhlatshelo wokubonga
ngamaqebelengwane angenamvubelo exovwe namafutha, nemiqathane engenamvubelo,
egcotshwe ngamafutha, namaqebelengwane empuphu ecolekileyo axovwe namafutha. 13 Kanye
namaqebelengwane esinkwa esivutshelweyo uyakunikela ngalo mnikelo kanye nomhlatshelo
weminikelo yakhe yokuthula, ube ngowokubonga. 14 Athabathe kuwo libe linye njalo
eminikelweni yakhe, libe ngumnikelo ophakanyiswayo kuJehova, libe ngelompristi ofafaza
ngegazi leminikelo yokuthula. 15 Inyama yomhlatshelo weminikelo yakhe yokuthula
ongowokubonga iyakudliwa ngosuku lokunikela kwakhe, angashiyi lutho lwayo kuze kuse. 16
"‘Kepha uma umhlatshelo womnikelo wakhe ungowesithembiso noma ungowesihle, uyakudliwa
ngalolo suku anikela ngalo ngomhlatshelo wakhe; nangakusasa okuseleyo kuwo kuyakudliwa; 17
kepha okusele enyameni yomhlatshelo ngosuku lwesithathu kuyakushiswa ngomlilo. 18 Uma
inyama yomhlatshelo weminikelo yakhe yokuthula idliwa ngosuku lwesithathu,
ayiyikwamukeleka, ingabalelwa kuye owanikela ngayo; iyakunengeka, nomuntu oyidlayo
uyakuthwala ububi bakhe. 19 "‘Inyama ethinta into engcolileyo ayinakudliwa, kepha iyakushiswa
ngomlilo; nokho le nyama-ke bonke abahlambulukileyo bangayidla. 20 Kodwa umuntu oyidla
inyama yomhlatshelo weminikelo yokuthula engekaJehova esenakho ukungcola kwakhe, lowo
muntu uyakunqunywa kubantu bakubo. 21 Nanxa umuntu ethinta into engcolileyo, ukungcola
komuntu noma isilwane esingcolileyo noma into engcolileyo enengekayo, adle inyama
yomhlatshelo weminikelo yokuthula engekaJehova, lowo muntu uyakunqunywa kubantu
bakubo.’" 22 Jehova wakhuluma kuMose, wathi: 23 "Yisho kubantwana bakwa-Israyeli, uthi:
‘Aniyikudla manoni enkomo, nawemvu, nawembuzi. 24 Amanoni engcuba namanoni
okudweshuliweyo angasebenza yonke eminye imisebenzi; kepha ningawadli nempela. 25
Ngokuba yilowo nalowo odla amanoni enkomo okunikelwa ngayo ibe ngumnikelo womlilo
kuJehova, lowo muntu owadlayo uyakunqunywa kubantu bakubo. 26 Ningadli naliphi igazi, noma
ngelenyoni noma ngelenkomo, nakuyiphi yezindlu zenu. 27 Yilowo nalowo odla igazi lowo
muntu uyakunqunywa kubantu bakubo.’" 28 UJehova wakhuluma kuMose, wathi: 29 "Yisho
kubantwana bakwa-Israyeli, uthi: ‘Onikela ngomhlatshelo weminikelo yakhe yokuthula kuJehova
uyakuletha umnikelo wakhe kuJehova emhlatshelweni weminikelo yakhe yokuthula; 30 izandla
zakhe uqobo zilethe iminikelo yomlilo kaJehova, alethe amanoni kanye nesifuba ukuba isifuba
sizuliswe, sibe ngumnikelo wokuzuliswa phambi kukaJehova. 31 Umpristi makashise amanoni e-
altare, kepha isifuba sibe ngesika-Aroni nesamadodana akhe. 32 Anonika umpristi umlenze
wokunene, ube ngumnikelo wokuphakanyiswa emihlatshelweni yeminikelo yenu yokuthula. 33
Lowo phakathi kwamadodana ka-Aroni onikela ngegazi leminikelo yokuthula nangamanoni koba
ngowakhe umlenze wokunene, ube yisabelo sakhe. 34 Ngokuba isifuba sokuzuliswa nomlenze
wokuphakanyiswa ngikuthabathe kwabakwa-Israyeli emihlatshelweni yeminikelo yabo
yokuthula, ngakunika u-Aroni umpristi namadodana akhe, kube yisimiso esiphakade kwabakwa-
Israyeli.’"
35
Leso siyisabelo sika-Aroni nesabelo samadodana akhe seminikelo yomlilo kaJehova mhla
ebaletha ukuba bamkhonze uJehova esikhundleni sobupristi, 36 ayala ngakho uJehova ukuba
bakuphiwe ngabantwana bakwa-Israyeli mhla ebagcoba, kube yisimiso esiphakade
ezizukulwaneni zabo. 37 Lowo ungumthetho weminikelo yokushiswa, noweminikelo yempuphu,
noweminikelo yesono, noweminikelo yecala, nowokwahlukaniselwa, nowomhlatshelo
weminikelo yokuthula, 38 uJehova amyala ngawo uMose entabeni yaseSinayi mhla eyala
abakwa-Israyeli ukuba banikele ngeminikelo yabo kuJehova ehlane laseSinayi.

8
1
UJehova wakhuluma kuMose, wathi: 2 "Thabatha u-Aroni namadodana akhe kanye naye,
nezambatho, namafutha okugcoba, nenkunzi yomnikelo wesono, nezinqama zombili, neqoma
lezinkwa ezingenamvubelo, 3 ubuthele inhlangano yonke ngasemnyango wetende lokuhlangana."
4
UMose wenza njengalokho uJehova emyalile; inhlangano yabuthelwa ngasemnyango wetende
lokuhlangana. 5 UMose wayesethi kuyo inhlangano: "Nansi into uJehova ayale ngayo ukuba
yenziwe." 6 UMose waletha u-Aroni namadodana akhe, wabageza ngamanzi. 7 Wamfaka
ibhantshi, wambhincisa ibhande, wamembathisa ijazi; wamfaka ingubo yamahlombe,
wambhincisa ibhande elifekethisiweyo lengubo yamahlombe, wayibophela kuye ngalo. 8
Wamfaka isihlangu sesifuba, nasesihlangwini sesifuba wabeka i-Urimi neThumimi. 9 Wafaka
isigqoko ekhanda lakhe, nasesigqokweni ngaphambili wafaka ungcwecwe wegolide, umqhele
ongcwele, njengalokho uJehova emyalile uMose. 10 UMose wathatha amafutha okugcoba,
waligcoba itabernakele nakho konke okuphakathi kwalo, wakungcwelisa. 11 Wafafaza ngawo i-
altare kasikhombisa, waligcoba i-altare kanye nezitsha zonke zalo, nomcengezi nesinqe sawo,
ukuba kungcweliswe. 12 Wathela amafutha okugcoba ekhanda lika-Aroni, wamgcoba ukuba
angcweliswe. 13 UMose wayeseletha amadodana ka-Aroni, wawembathisa amabhantshi,
wawabhincisa amabhande, wawafaka izigqoko, njengalokho uJehova emyalile uMose.
14
Waletha nenkunzi yomnikelo wesono; u-Aroni namadodana akhe babeka izandla zabo enhloko
yenkunzi yomnikelo wesono. 15 Wayeseyihlaba; uMose wathatha igazi, walibheca ezimpondweni
ze-altare nxazonke ngomunwe wakhe, waliphothula i-altare, walithulula igazi ngasesinqeni se-
altare, walingcwelisa ukuba alenzele ukubuyisana. 16 Wathatha onke amanoni aphezu kwezibilini,
namanoni aphezu kwesibindi, nezinso zombili namanoni azo, uMose wakushisa e-altare. 17
Kepha inkunzi nesikhumba sayo, nenyama yayo, nomswani wayo, wakushisa ngomlilo
ngaphandle kwekamu, njengalokho uJehova emyalile uMose. 18 Wayeseletha inqama yomnikelo
wokushiswa; u-Aroni namadodana akhe babeka izandla zabo enhloko yenqama. 19 Wayihlaba,
uMose wafafaza i-altare ngegazi nxazonke. 20 Wayeseyihlahlela inyama izitho; uMose washisa
inhloko nezitho namanoni. 21 Wahlanza izibilini namanqina ngamanzi; uMose washisa yonke
inqama e-altare; yayingumnikelo wokushiswa, waba yiphunga elimnandi, umnikelo womlilo
kuJehova, njengalokho uJehova emyalile uMose. 22 Waletha nenye inqama, inqama
yokwahlukaniselwa; u-Aroni namadodana akhe babeka izandla zabo enhloko yenqama. 23
Wayihlaba; uMose wathatha igazi layo, walibheca esicutshini sendlebe yokunene ka-Aroni,
nasesithupheni sesandla sakhe sokunene, nakuqukula wonyawo lwakhe lokunene. 24 Wayeseletha
amadodana ka-Aroni, uMose walibheca igazi esicutshini sendlebe yabo yokunene, nasesithupheni
sesandla sabo sokunene, nakuqukula wonyawo lwabo lokunene; uMose wafafaza i-altare ngegazi
nxazonke. 25 Wawathatha amanoni, nomsila ononileyo, nawo onke amanoni aphezu kwezibilini,
namanoni aphezu kwesibindi, nezinso zombili namanoni azo, nomlenze wokunene, 26
naseqomeni lezinkwa ezingenamvubelo elalisebusweni bukaJehova wathatha iqebelengwane laba
linye elingenamvubelo, neqebelengwane laba linye lesinkwa samafutha, nomqathane munye,
wakubeka phezu kwamanoni naphezu komlenze wokunene, 27 wakubeka konke ezandleni zika-
Aroni, nasezandleni zamadodana akhe, wakuzulisa kwaba ngumnikelo wokuzuliswa phambi
kukaJehova. 28 UMose wayesekuthatha ezandleni zabo, wakushisa e-altare emnikelweni
wokushiswa; kwakungokokwahlukaniselwa, kwaba yiphunga elimnandi, umnikelo womlilo
kuJehova. 29 UMose wathatha isifuba, wasizulisa saba ngumnikelo wokuzuliswa phambi
kukaJehova; sasiyisabelo sikaMose sasenqameni yokwahlukaniselwa, njengalokho uJehova
emyalile uMose. 30 UMose wayesethatha amafutha okugcoba, negazi elalise-altare, wafafaza
ngalo u-Aroni nezambatho zakhe, namadodana akhe kanye naye, nezambatho zamadodana akhe,
wangcwelisa u-Aroni nezambatho zakhe, namadodana akhe kanye naye, nezambatho
zamadodana akhe.
31
Wathi uMose ku-Aroni nakumadodana akhe: "Phekani inyama ngasemnyango wetende
lokuhlangana, niyidle kanye nesinkwa esiseqomeni lokwahlukaniselwa, njengalokho ngayala
ngathi: ‘U-Aroni namadodana akhe bayakukudla.’ 32 Okuseleyo kwenyama nokwesinkwa
anokushisa ngomlilo. 33 Ningaphumi emnyango wetende lokuhlangana izinsuku eziyisikhombisa,
kungakapheli izinsuku zokwahlukaniselwa kwenu, ngokuba uyakunahlukanisela izinsuku
eziyisikhombisa. 34 UJehova uyalile ukuba kwenziwe njengalokho kwenziwe namuhla, ukuze
nenzelwe ukubuyisana. 35 Ngasemnyango wetende lokuhlangana niyakuhlala imini nobusuku
izinsuku eziyisikhombisa, nisigcine isiyalezo sikaJehova, ukuze ningafi, ngokuba ngiyaliwe
kanjalo." 36 U-Aroni namadodana akhe benza konke uJehova ayale ngakho ngesandla sikaMose.

9
1
Kwathi ngosuku lwesishiyagalombili uMose wabiza u-Aroni namadodana akhe namalunga
akwa-Israyeli, 2 wathi ku-Aroni: "Mawuzithathele ithole lenkunzi, libe ngumnikelo wesono,
nenqama ibe ngumnikelo wokushiswa, okungenasici, unikele ngakho phambi kukaJehova. 3
Khuluma kubantwana bakwa-Israyeli, uthi: ‘Thathani impongo, ibe ngumnikelo wesono, nethole
newundlu, omabili abe nomnyaka munye, angenasici, abe ngumnikelo wokushiswa, 4 nenkunzi
nenqama zibe yiminikelo yokuthula, zihlatshwe phambi kukaJehova, nomnikelo wempuphu
oxovwe namafutha, ngokuba namuhla uJehova uyabonakala kini.’" 5 Baletha-ke lokho uMose
akuyalayo phambi kwetende lokuhlangana, nenhlangano yonke yasondela, yema phambi
kukaJehova. 6 Wayesethi uMose: "Nansi into uJehova ayala ngayo ukuba niyenze, kuze
kubonakale kini inkazimulo kaJehova." 7 UMose wathi ku-Aroni: "Sondela e-altare, unikele
ngomnikelo wakho wesono nangomnikelo wakho wokushiswa, uzenzele wena nabantu
ukubuyisana, andukuba unikele ngomnikelo wabantu, ubenzele ukubuyisana, njengalokho
uJehova eyalile."
8
U-Aroni wayesesondela e-altare, walihlaba ithole lomnikelo wesono ongowakhe. 9 Amadodana
ka-Aroni aletha igazi kuye; wagcobhoza umunwe egazini, walibheca ezimpondweni ze-altare,
wathulula elinye igazi ngasesinqeni se-altare; 10 kepha amanoni nezinso namanoni aphezu
kwesibindi emnikelweni wesono wakushisa e-altare, njengalokho uJehova emyalile uMose. 11
Inyama nesikhumba wakushisa ngomlilo ngaphandle kwekamu. 12 Wawuhlaba umnikelo
wokushiswa; amadodana ka-Aroni aletha kuye igazi, wafafaza ngalo i-altare nxazonke. 13
Anikeza kuye umnikelo wokushiswa izitho ngezitho kanye nenhloko, wakushisa e-altare. 14
Wahlanza izibilini namanqina, wakushisa phezu komnikelo wokushiswa e-altare. 15 Wayeseletha
umnikelo wabantu, wathatha impongo yomnikelo wesono ongowabantu, wayihlaba, wanikela
ngayo ngenxa yesono njengowokuqala. 16 Waletha umnikelo wokushiswa, wanikela ngawo
njengokwesimiso. 17 Wayeseletha umnikelo wempuphu, wagcwalisa isandla sakhe ngawo,
wawushisa e-altare ngaphandle komnikelo wokushiswa wasekuseni. 18 Wahlaba inkunzi
nenqama, zibe ngumhlatshelo weminikelo yokuthula ongowabantu; amadodana ka-Aroni aletha
kuye igazi owafafaza ngalo i-altare nxazonke, 19 namanoni enkunzi nawenqama, nomsila
ononileyo, nalawo asibekela izibilini, nezinso, namanoni esibindi, 20 abeka amanoni phezu
kwezifuba; wawashisa amanoni e-altare; 21 izifuba nomlenze wokunene wakuzulisa, kube
ngumnikelo wokuzuliswa phambi kukaJehova, njengalokho uMose eyalile. 22 U-Aroni
waphakamisela izandla zakhe kubantu, wababusisa; wayesehla ekunikeleni ngomnikelo wesono
nangomnikelo wokushiswa nangeminikelo yokuthula.
23
OMose no-Aroni bangena etendeni lokuhlangana, babuye baphuma, bababusisa abantu;
yayisibonakala inkazimulo kaJehova kubantu bonke. 24 Kwaphuma umlilo ngaphambi
kukaJehova, waqeda umnikelo wokushiswa namanoni e-altare; sebekubona abantu bonke
bananela, bakhothamela phansi ngobuso.

10
1
ONadabi no-Abihu amadodana ka-Aroni bathatha bobabili imicengezi yabo yomlilo, bafaka
umlilo kuyo, babeka impepho phezulu, banikela phambi kukaJehova ngomlilo ongafanele,
angabayalanga ngawo. 2 Kwaphuma umlilo ngaphambi kukaJehova, wabaqeda, bafa phambi
kukaJehova.
3
UMose wayesethi ku-Aroni: "Yikho uJehova akukhuluma, ethi: ‘Kubo abaseduze nami
ngiyakungcweliswa, phambi kwabantu bonke ngiyakukhazimuliswa.’"U-Aroni wathula. 4 UMose
wabiza oMishayeli no-Elisafani amadodana ka-Uziyeli, uyisekazi ka-Aroni, wathi kubo:
"Sondelani, nibasuse abafowenu ngaphambi kwendlu engcwele, nibakhiphele ngaphandle
kwekamu." 5 Base besondela, babasusa bembethe amabhantshi abo, babakhiphela ngaphandle
kwekamu, njengalokho eshilo uMose. 6 UMose wayesethi ku-Aroni naku-Eleyazare naku-Itamari
amadodana akhe: "Ningathukululi izinwele zamakhanda enu, ningaklebhuli izambatho zenu
ukuba ningafi, ingathukuthelelwa yonke inhlangano, kepha abafowenu, yonke indlu yakwa-
Israyeli, mabalilele ukushisa akuphembileyo uJehova. 7 Ningaphumi emnyango wetende
lokuhlangana, funa nife, ngokuba amafutha okugcoba kaJehova aphezu kwenu." Benza-ke
njengezwi likaMose.
8
UJehova wakhuluma ku-Aroni, wathi: 9 "Ungaphuzi wayini naluphuzo olunamandla, wena
namadodana akho kanye nawe, nxa ningena etendeni lokuhlangana, ukuba ningafi; kuyakuba
yisimiso esiphakade ezizukulwaneni zenu. 10 Niyakwahlukanisa okungcwele nokungengcwele,
okungcolileyo nokuhlambulukileyo, 11 nize nifundise abantwana bakwa-Israyeli zonke izimiso
uJehova azikhulume kubo ngesandla sikaMose."
12
UMose wakhuluma ku-Aroni naku-Eleyazare naku-Itamari amadodana akhe aseleyo, wathi:
"Thathani umnikelo wempuphu osele eminikelweni yomlilo kaJehova, niwudle ungenamvubelo
ngaseceleni kwe-altare, ngokuba ungcwelengcwele, 13 niwudle endaweni engcwele, ngokuba
kuyimfanelo yakho nemfanelo yamadodana akho eminikelweni yomlilo kaJehova; ngokuba
ngiyaliwe kanjalo. 14 Isifuba sokuzuliswa nomlenze wokuphakanyiswa niyakukudla endaweni
ehlambulukileyo, wena namadodana akho namadodakazi akho kanye nawe, ngokuba kuphiwe
kube yimfanelo yakho nemfanelo yamadodana akho emihlatshelweni yeminikelo yokuthula
yabantwana bakwa-Israyeli. 15 Mabalethe umlenze wokuphakanyiswa nesifuba sokuzuliswa
kanye neminikelo yomlilo yamanoni ukuba bakuzulise, kube ngumnikelo wokuzuliswa phambi
kukaJehova, kube ngokwakho nokwamadodana akho kanye nawe, kube yimfanelo ephakade,
njengalokho uJehova eyalile." 16 UMose wafunisisa impongo yomnikelo wesono; bheka,
yayishisiwe; wabathukuthelela o-Eleyazare no-Itamari amadodana ka-Aroni aseleyo, wathi: 17
"Anidlanga ngani umnikelo wesono endaweni yendlu engcwele, njengokuba ungcwelengcwele,
futhi niphiwe wona ukuba nisuse ububi benhlangano, niyenzele ukubuyisana phambi kukaJehova,
na? 18 Bhekani, igazi lawo alingeniswanga phakathi endaweni engcwele; bekufanele ngempela
ukuba niwudlele endaweni engcwele, njengalokho ngayala." 19 U-Aroni wathi kuMose: "Bheka-
ke, namuhla banikele ngomnikelo wabo wesono nangomnikelo wabo wokushiswa phambi
kukaJehova; nokho ngehlelwe yilokhu mina; uma bengidlile umnikelo wesono namuhla,
bekuzakwamukeleka emehlweni kaJehova na?" 20 Esezwile lokho uMose, kwaba kuhle
emehlweni akhe.

11
1
UJehova wakhuluma kuMose naku-Aroni, wathi kubo: 2 "Yishoni kubantwana bakwa-Israyeli,
nithi: ‘Yilokhu okuphilayo eningakudla kuzo zonke izilwane zasemhlabeni: 3 zonke ezahlukanisa
inselo, nezidabula inselo kabili, nezetshisayo kuzo izilwane, lezo ningazidla. 4 "‘Kepha lezi
aniyikuzidla kwezetshisayo nakwezahlukanisa inselo: ikamela, ngokuba liyetshisa, lingahlukanisi
kodwa inselo; lingcolile kini; 5 nembila, ngokuba iyetshisa, ingahlukanisi kodwa inselo; ingcolile
kini; 6 nonogwaja, ngokuba uyetshisa, engahlukanisi kodwa inselo; ungcolile kini; 7 nengulube,
ngokuba iyahlukanisa inselo, idabula inselo kabili, ingetshisi kodwa; ingcolile kini. 8 Ningadli
inyama yazo, ningathinti izidumbu zazo; zingcolile kini.
9
"‘Lezi ningazidla kuzo zonke ezisemanzini: zonke ezinamaphiko nezingcwecwe ezisemanzini
neziselwandle nezisemifuleni, lezo ningazidla. 10 Kepha zonke ezingenamaphiko nazingcwecwe
eziselwandle nezisemifuleni, nazo zonke eziswebezelayo emanzini, nazo zonke izinto eziphilayo
emanzini ziyisinengiso kini. 11 Zoba yisinengiso kini; ningadli inyama yazo; izidumbu zazo
ziyakunengeka kini. 12 Zonke ezingenamaphiko nazingcwecwe emanzini ziyisinengiso kini. 13
"‘Yilezi eniyakunengwa yizo ezinyonini; aziyikudliwa, ziyisinengiso: ukhozi, nenqe,
nengqungqulu, 14 nonhloyile, noheshe ngezinhlobo zakhe, 15 nawo onke amagwababa
ngezinhlobo zawo, 16 nentshe, nenkovana, nenkanu, noklebe ngezinhlobo zakhe, 17 nesikhova,
nomphishamanzi, nomxwagele, 18 nefukezi, nevuba, nophalane, 19 nonogolantethe,
nonozalizingwenya ngezinhlobo zakhe, noziningweni, nelulwane.
20
"‘Nezilwanyana zonke ezinamaphiko, ezihamba ngezinyawo zozine, ziyisinengiso kini. 21
Kepha lezi ningazidla kuzo zonke izilwanyana ezinamaphiko, ezihamba ngezinyawo zozine,
ezinamanqina ngaphezu kwezinyawo zazo ukuxhuma ngazo emhlabeni; 22 kuzo ningadla lezi:
isikhonyane ngezinhlobo zaso, namaboni ngezinhlobo zawo, namadiye ngezinhlobo zawo,
nezintethe ngezinhlobo zazo. 23 Kepha zonke ezinye izilwanyana ezinamaphiko nezinyawo ezine
ziyisinengiso kini. 24 "‘Niyakungcoliswa yilezi: bonke abathinta izidumbu zazo bayakuba
ngabangcolile kuze kuhlwe. 25 Bonke abathwala utho lwezidumbu zazo bayakuhlanza izingubo
zabo, babe ngabangcolile kuze kuhlwe. 26 "‘Zonke izilwane ezahlukanisa inselo, zingayidabuli
kabili kodwa, zingetshisi, zingcolile kini; bonke abazithintayo bayakuba ngabangcolile. 27 Nazo
zonke ezihamba ngezidladla kuzo zonke izilwane ezihamba ngezinyawo ezine zingcolile kini;
bonke abathinta izidumbu zazo bayakuba ngabangcolile kuze kuhlwe. 28 Othwala izidumbu zazo
makahlanze izingubo zakhe, abe ngongcolile kuze kuhlwe; zingcolile kini. 29 "‘Lezi zingcolile
kini kuzo izilwanyana ezinwabuzelayo emhlabeni: uchakide, nempuku, noxamu ngezinhlobo
zakhe, 30 nesigcilikisha, nesiquzi, nentulo, nesibankwa, nonwabu. 31 Yilezo ezingcolile kini
phakathi kwezilwanyana ezinwabuzelayo; bonke abazithintayo sezifile bayakuba ngabangcolile
kuze kuhlwe. 32 Konke esiwela phezu kwakho esinye sazo sezifile kuyakuba ngokungcolile,
noma kuyinto yomuthi noma yingubo noma yisikhumba noma yisaka noma yintoni
okusetshenzwa ngayo; makufakwe emanzini, kube ngokungcolile kuze kuhlwe; khona
kuyakuhlanzeka. 33 Nezitsha zonke esiwela kuzo esinye sazo, noma yintoni ephakathi kwazo
iyakuba ngengcolile, nize nizaphule. 34 Konke ukudla okudliwayo okukuzo, afika kukho futhi
amanzi anjalo, kuyakuba ngokungcolile, nakho konke okuphuzwayo kuzo izitsha ezinjalo
kuyakuba ngokungcolile. 35 Konke esiwela kukho isidumbu sazo kuyakuba ngokungcolile, noma
iziko noma ikhanzi; makuphohlozwe; kungcolile, kuyakuba ngokungcolile kini. 36 Kepha
umthombo nomgodi lapho amanzi eqoqene khona uyakube uhlambulukile, kodwa okuthinta
izidumbu zazo kuyakuba ngokungcolile. 37 Uma izidumbu zazo ziwela phezu kwembewu
etshalwayo ezakuhlwanyelwa, iyakuba ngehlambulukile. 38 Kepha uma amanzi ethelwa
embewini, izidumbu zazo ziwele phezu kwayo, ingcolile kini. 39 "‘Uma kufa isilwane esidliwayo,
othinta isidumbu saso uyakuba ngongcolile kuze kuhlwe. 40 Odla isidumbu saso makahlanze
izingubo zakhe, abe ngongcolile kuze kuhlwe; nothwala isidumbu saso makahlanze izingubo
zakhe, abe ngongcolile kuze kuhlwe. 41 "‘Zonke izilwanyana ezinwabuzelayo emhlabeni
ziyisinengiso; mazingadliwa. 42 Zonke ezihamba ngesisu, nazo zonke ezihamba ngezinyawo
ezine noma ngeziningi, nazo zonke ezinwabuzelayo emhlabeni, ningazidli, ngokuba
ziyisinengiso.
43
Ningazenzi ninengeke ngezilwanyana ezinwabuzelayo, ningazingcolisi ngazo, funa ningcole
ngazo. 44 Ngokuba nginguJehova uNkulunkulu wenu; ngalokho zingcweliseni, nibe ngcwele,
ngokuba mina ngingcwele; ningazingcolisi ngezilwanyana ezinwabuzelayo emhlabeni. 45
Ngokuba nginguJehova owakukhuphula ezweni laseGibithe, ngibe nguNkulunkulu wenu;
ngalokho yibani ngcwele, ngokuba ngingcwele. 46 "‘Yilowo umthetho wezilwane nowezinyoni
nowezilwane zonke eziswebezelayo emanzini, nowezilwanyana zonke ezinwabuzelayo
emhlabeni, 47 ukuba kwahlukaniswe okungcolileyo nokuhlambulukileyo, okuphilayo okudliwayo
nokuphilayo okungadliwayo.’"

12
1
UJehova wakhuluma kuMose, wathi: 2 "Yisho kubantwana bakwa-Israyeli, uthi: ‘Uma
owesifazane ekhulelwa, azale umfana, uyakuba ngongcolile izinsuku eziyisikhombisa;
njengasemihleni yokungcola ngefindo lakhe wohlala engcolile. 3 Ngosuku lwesishiyagalombili
inyama yejwabu lakhe iyakusokwa. 4 Abesehlala esegazini lokuhlambuluka izinsuku
ezingamashumi amathathu nantathu, angathinti lutho olungcwele, angangeni endlini engcwele,
zize ziphelele izinsuku zokuhlambuluka kwakhe. 5 Kepha uma ezala intombazana, makabe
ngongcolile amasonto amabili njengasekungcoleni ngefindo lakhe, ahlale esegazini
lokuhlambuluka izinsuku ezingamashumi ayisithupha nesithupha.
6
"‘Nanxa seziphelile izinsuku zokuhlambuluka kwakhe ngomfana noma ngentombazana,
makalethe imvu enomnyaka munye, ibe ngumnikelo wokushiswa, nephuphu lejuba noma ihobhe,
libe ngumnikelo wesono, akulethe ngasemnyango wetende lokuhlangana kumpristi, 7 yena
anikele ngakho phambi kukaJehova, amenzele ukubuyisana, aze ahlambuluke emthonjeni wegazi
lakhe. Yilowo umthetho wozalayo umfana noma intombazana. 8 "‘Uma amandla akhe enganeli
imvu, khona uyakuthatha amahobhe amabili noma amaphuphu amabili amajuba, elinye libe
ngumnikelo wokushiswa, elinye libe ngumnikelo wesono, umpristi amenzele ukubuyisana, aze
ahlambuluke.’"

13
1
UJehova wakhuluma kuMose naku-Aroni, wathi: 2 "Nxa kumila esikhumbeni senyama
yomuntu idunguza noma utwayi noma ibala elikhanyayo, kuvele esikhumbeni senyama yakhe
isifo sochoko, makalethwe ku-Aroni umpristi, noma kwenye yamadodana akhe, abapristi, 3
umpristi abheke isifo esisesikhumbeni senyama; uma uboya obusebaleni buphendukile baba
mhlophe, nanxa ibala libonakala lishonile kunesikhumba senyama yakhe, kuyisifo sochoko;
umpristi uyakumbheka, asho athi ungcolile. 4 Uma ibala elikhanyayo limhlophe esikhumbeni
senyama yakhe, lingabonakali lishonile kunesikhumba, noboya balo bungaphendukile baba
mhlophe, khona umpristi uyakumvalela onesifo izinsuku eziyisikhombisa, 5 umpristi ambheke
ngosuku lwesikhombisa; uma isifo ngokubona kwakhe sisemi, ibala lingandanga esikhumbeni,
bheka, khona umpristi uyakumvalela ezinye izinsuku eziyisikhombisa, 6 umpristi abuye ambheke
ngosuku lwesikhombisa; uma ibala lifiphele, isifo singandanga esikhumbeni, bheka, khona
umpristi uyakusho athi uhlambulukile; kulutwayi; uyakuhlanza izingubo zakhe, ahlambuluke. 7
Kepha uma utwayi lwanda esikhumbeni esezibonakalisile kumpristi ngokuhlambuluka kwakhe,
abuye eziveze kumpristi, 8 umpristi abheke; uma utwayi lwandile esikhumbeni, bheka, khona
umpristi uyakusho athi ungcolile; kuluchoko. 9 "Nxa isifo sochoko sikumuntu, uyakulethwa
kumpristi, 10 umpristi abheke; bheka, uma kukhona idunguza elimhlophe esikhumbeni,
liphendulile uboya baba mhlophe, nanxa kukhona inyama ebomvu edunguzeni, 11 bheka,
kuluchoko oludala esikhumbeni senyama yakhe; khona umpristi uyakusho athi ungcolile,
angamvaleli, ngokuba ungcolile. 12 "Uma uchoko luqhamuka esikhumbeni, ukuze uchoko
lusibekele isikhumba sonke sonesifo, kusukela ekhanda kuze kufike ezinyaweni njengokubona
kompristi, 13 umpristi wobheka; uma uchoko lusibekele yonke inyama yakhe, bheka, uyakusho
athi onesifo uhlambulukile; konke kuphendukile kwaba mhlophe: uhlambulukile. 14 Kepha njalo
uma kuvela kuye inyama ebomvu, uyakuba ngongcolile. 15 Umpristi uyakubheka inyama
ebomvu, asho athi ungcolile; inyama ebomvu ingcolile, iluchoko. 16 Uma-ke inyama ebomvu
ibuye iphenduka ibe mhlophe, makaye kumpristi, 17 umpristi ambheke; uma ibala liphendukile
laba mhlophe, bheka, khona umpristi uyakusho athi onesifo uhlambulukile; uhlambulukile.
18
"Nxa inyama ibinethumba esikhumbeni sayo, selaphola, 19 kube yidunguza elimhlophe
endaweni yethumba noma ibala elikhanyayo, limhlophe libomvana, khona kuyakuboniswa
umpristi, 20 umpristi abheke; uma libonakala lishonile kunesikhumba, uboya balo buphendukile
baba mhlophe, bheka, makasho athi ungcolile: kuyisifo sochoko, siqhamukile ethumbeni. 21
Kepha uma umpristi elibheka, kungekho boya obumhlophe kulo, lingashonile kunesikhumba,
kodwa lifiphele, bheka, khona umpristi uyakumvalela izinsuku eziyisikhombisa; 22 uma landa
nokwanda esikhumbeni, umpristi makasho athi ungcolile; kuyisifo. 23 Kodwa uma ibala
elikhanyayo limi endaweni yalo lingandi, kuyisibanda sethumba; umpristi makasho athi
uhlambulukile. 24 "Nxa inyama inesibazi esikhumbeni sayo, inyama ebomvu yesibazi iphenduke
ibala elikhanyayo, limhlophe libomvana noma limhlophe nje, 25 umpristi makalibheke; uma
uboya obusebaleni elikhanyayo buphendukile baba mhlophe, libonakala lishonile kunesikhumba,
bheka, kuluchoko; luqhamukile esibazini; khona umpristi uyakusho athi ungcolile; kuyisifo
sochoko. 26 Kepha uma umpristi elibheka, kungekho boya obumhlophe ebaleni elikhanyayo,
lingashonile kunesikhumba, kodwa lifiphele, bheka, khona umpristi uyakumvalela izinsuku
eziyisikhombisa, 27 umpristi ambheke ngosuku lwesikhombisa; uma landile nokwanda
esikhumbeni, umpristi uyakusho athi ungcolile; kuyisifo sochoko. 28 Uma ibala elikhanyayo limi
endaweni yalo, lingandi esikhumbeni, kodwa lifiphele, kuyidunguza lesibazi; umpristi makasho
athi uhlambulukile, ngokuba kuyisibanda sesibazi. 29 "Nxa owesilisa noma owesifazane enesifo
ekhanda noma esilevini, 30 umpristi uyakubheka ibala; uma libonakala lishonile kunesikhumba,
kube kulo izinwele ezincane ezimpofu, bheka, umpristi makasho athi ungcolile: kungumuna,
kuluchoko lwekhanda noma olwesilevu. 31 Uma umpristi ebheka ibala lomuna, libonakala
lingashonile kunesikhumba, kungekho zinwele ezimnyama kulo, bheka, khona umpristi
uyakumvalela onesifo somuna izinsuku eziyisikhombisa, 32 ngosuku lwesikhombisa umpristi
abheke isifo; uma umuna ungandile, futhi kungekho zinwele ezimpofu kuwo, umuna ubonakala
ungashonile kunesikhumba, 33 bheka, uyakuziphucula, angaphuculi umuna kodwa, umpristi
amvalele onomuna ezinye izinsuku eziyisikhombisa; 34 ngosuku lwesikhombisa umpristi abheke
umuna; uma umuna ungandile esikhumbeni, futhi ubonakala ungashonile kunesikhumba, bheka,
umpristi makasho athi uhlambulukile; makahlanze izingubo zakhe, ahlambuluke. 35 Kepha uma
umuna wanda esikhumbeni esehlambulukile, 36 umpristi wombheka; uma umuna wandile
nokwanda esikhumbeni, bheka, umpristi makangafuni izinwele ezimpofu; ungcolile. 37 Kodwa
uma ngokubona kwakhe umuna umi, kumilile kuwo izinwele ezimnyama, umuna usupholile,
uhlambulukile; umpristi makasho athi uhlambulukile.
38
"Nanxa owesilisa noma owesifazane enamabala akhanyayo esikhumbeni senyama yabo,
amabala amhlophe akhanyayo, 39 khona umpristi wobheka; uma amabala akhanyayo
asesikhumbeni senyama yabo emhloshana e fiphele, bheka, kuyisithembuzane esiqhamukile. 40
"Uma izinwele zomuntu zisukile ekhanda lakhe, uyimpandla; uhlambulukile. 41 Uma izinwele
zisukile ekhanda lakhe ngasebusweni, uyimpandla ebunzini; uhlambulukile. 42 Kepha uma
kukhona empandleni esekhanda noma empandleni esebunzini isifo esimhlophe sibomvana,
kuluchoko oluqhamuka empandleni esekhanda lakhe noma empandleni esebunzini lakhe. 43
Khona umpristi uyakumbheka; uma idunguza lesifo limhlophe libomvana empandleni esekhanda
lakhe noma empandleni esebunzini lakhe, njengokubonakala kochoko esikhumbeni senyama, 44
bheka, ungumuntu onochoko; ungcolile; umpristi makasho athi ungcolile; isifo sakhe sisekhanda
lakhe. 45 "Onochoko esikuye isifo, maziklejulwe izingubo zakhe, zithukululwe izinwele zakhe,
amboze amadevu akhe, akhale athi: ‘Ngingcolile! Ngingcolile!’ 46 Zonke izinsuku isifo sisekuye
uyakuba ngongcolile; ungcolile; uyakuhlala yedwa; indawo yokuhlala kwakhe iyakuba
ngaphandle kwekamu.
47
"Ingubo esikuyo isifo sochoko, noma yingubo yoboya noma yingubo yelineni, 48 noma
sisezintanjeni eziqondileyo noma sikwezinqamulayo, ezelineni noma ezoboya bezimvu, noma
sisesikhumbeni, noma sisentweni eyenziwe ngesikhumba, 49 uma ibala liluhlazana noma
libomvana engutsheni noma esikhumbeni noma ezintanjeni eziqondileyo noma kwezinqamulayo
noma entweni yesikhumba, kuyisifo sochoko, siyakuboniswa umpristi. 50 Umpristi makabheke
isifo, akuvalele lokho okunochoko izinsuku eziyisikhombisa, 51 abheke isifo ngosuku
lwesikhombisa; uma isifo sandile engutsheni noma ezintanjeni eziqondileyo noma
kwezinqamulayo noma esikhumbeni, nakuba isikhumba sisetshenziswa kumuphi umsebenzi,
bheka, isifo siluchoko olubi. 52 Woshisa ingubo, noma izintanjana eziqondileyo noma
ezinqamulayo, noma eyoboya bezimbuzi noma eyelineni, noma into yesikhumba esikuyo isifo,
ngokuba kuluchoko olubi; kuyakushiswa ngomlilo. 53 "Uma umpristi ebheka, isifo singandile
engutsheni noma ezintanjeni eziqondileyo noma kwezinqamulayo noma entweni yesikhumba, 54
bheka, umpristi woyala ukuba bahlanze into isifo esikuyo, ayivalele ezinye izinsuku
eziyisikhombisa; 55 umpristi ayibheke emva kokuhlanzwa kwesifo; bheka, uma ibala
lingaphendulile umbala walo, lingandile, ingcolile; woyishisa ngomlilo; kungumcothu odlayo
noma iqothukile ngaphakathi noma ngaphandle. 56 Uma umpristi ebheka, ibala selifiphele
lihlanziwe, bheka, makalintwengule engutsheni noma esikhumbeni noma ezintanjeni
eziqondileyo noma kwezinqamulayo; 57 uma lisabonakala engutsheni noma ezintanjeni
eziqondileyo noma kwezinqamulayo noma entweni yesikhumba, wokushisa ngomlilo lokho isifo
esikukho. 58 Ingubo noma izintanjana eziqondileyo noma ezinqamulayo noma intoni yesikhumba
oyakuyihlanza, uma ibala lisuka kukho, kohlanzwa ngokwesibili, kuhlambuluke." 59 Lowo
ungumthetho wesifo sochoko engutsheni yoboya bezimvu noma kweyelineni noma ezintanjeni
eziqondileyo noma kwezinqamulayo noma entweni yesikhumba wokusho ukuthi kuhlambulukile
noma kungcolile.

14
1
UJehova wakhuluma kuMose, wathi: 2 "Lo uyakuba ngumthetho wonochoko ngosuku
lokuhlanjululwa kwakhe: wolethwa kumpristi, 3 umpristi aphume ekamu, umpristi abheke; uma
isifo sochoko sipholile konochoko, 4 bheka, umpristi makayale ukuba oyakuhlanjululwa
athathelwe izinyoni ezimbili ezihlambulukileyo nomsedari nendwangu ebomvu nehisopi, 5
umpristi ayale ukuba ihlatshwe enye yezinyoni esitsheni sebumba phezu kwamanzi agobhozayo. 6
Inyoni ezwayo uyakuyithatha kanye nomsedari nendwangu ebomvu nehisopi, akugcobhoze
kanye nenyoni ezwayo egazini lenyoni eyahlatshwa phezu kwamanzi agobhozayo, 7 amfafaze
kasikhombisa oyakuhlanjululwa ochokweni lwakhe, asho athi uhlambulukile, ayiyeke inyoni
ezwayo, iphumele endle. 8 "Oyakuhlanjululwa makahlanze izingubo zakhe, aphucule zonke
izinwele zakhe, ageze ngamanzi, ahlambuluke; emva kwalokho uyakungena ekamu, kepha ahlale
ngaphandle kwetende lakhe izinsuku eziyisikhombisa. 9 Kuyakuthi ngosuku lwesikhombisa
aphucule zonke izinwele zekhanda lakhe nesilevu sakhe namashiya akhe, yebo, aphucule zonke
izinwele zakhe, ahlanze izingubo zakhe, ageze umzimba wakhe ngamanzi, ahlambuluke.
10
"Ngosuku lwesishiyagalombili wothatha izimvu zamaduna ezimbili ezingenasici, nexhukazi
elinomnyaka munye elingenasici, nokweshumi okuthathu kwempuphu ecolekileyo, kube
ngumnikelo wempuphu, kuxovwe namafutha nelogi lamafutha. 11 Umpristi ohlambululayo
uyakumbeka umuntu oyakuhlanjululwa kanye nalezo zinto phambi kukaJehova ngasemnyango
wetende lokuhlangana; 12 umpristi athabathe enye imvu yeduna, anikele ngayo ibe ngumnikelo
wecala, nelogi lamafutha, akuzulise kube ngumnikelo wokuzuliswa phambi kukaJehova; 13
uyakuhlaba imvu yeduna endaweni lapho kuhlatshwa khona umnikelo wesono nomnikelo
wokushiswa, indawo engcwele, ngokuba umnikelo wecala ungowompristi njengomnikelo
wesono; ungcwelengcwele. 14 Umpristi wothabatha igazi kuwo umnikelo wecala, umpristi
alibhece esicutshini sendlebe yokunene yoyakuhlanjululwa, nasesithupheni sesandla sakhe
sokunene, nakuqukula wonyawo lwakhe lokunene, 15 umpristi athabathe kulo ilogi lamafutha,
awathele entendeni yesakhe isandla sokhohlo; 16 umpristi agcobhoze umunwe wakhe wokunene
emafutheni asesandleni sakhe sokhohlo, afafaze ngamafutha phambi kukaJehova kasikhombisa
ngomunwe wakhe. 17 Amafutha aseleyo asesandleni sakhe umpristi uyakuwabheca esicutshini
sendlebe yokunene yoyakuhlanjululwa, nasesithupheni sesandla sakhe sokunene, nakuqukula
wonyawo lwakhe lokunene, phezu kwegazi lomnikelo wecala. 18 Amafutha aseleyo asesandleni
sompristi uyakuwafaka ekhanda loyakuhlanjululwa, umpristi amenzele ukubuyisana phambi
kukaJehova. 19 "Umpristi wonikela ngomnikelo wesono, amenzele oyakuhlanjululwa
ukubuyisana ngenxa yokungcola kwakhe, andukuba ahlabe umnikelo wokushiswa, 20 umpristi
anikele ngomnikelo wokushiswa nangomnikelo wempuphu e-altare, umpristi amenzele
ukubuyisana, ahlambuluke.
21
"Uma empofu, engenakuphumelela kulokho, wothabatha imvu yeduna ibe ngumnikelo wecala,
uzuliswe ukumenzela ukubuyisana, nokweshumi kwempuphu ecolekileyo exovwe namafutha,
kube ngumnikelo wempuphu, nelogi lamafutha, 22 namahobhe amabili noma amaphuphu amabili
amajuba, njengalokho angaphumelela kukho, elinye libe ngumnikelo wesono, elinye libe
ngumnikelo wokushiswa. 23 "Ngosuku lwesishiyagalombili awalethe kumpristi ngasemnyango
wetende lokuhlangana phambi kukaJehova ngenxa yokuhlanjululwa kwakhe. 24 Umpristi
abesethabatha imvu yomnikelo wecala nelogi lamafutha, umpristi akuzulise kube ngumnikelo
wokuzuliswa phambi kukaJehova; 25 ahlabe imvu yomnikelo wecala, umpristi athabathe kulo
igazi lomnikelo wecala, alibhece esicutshini sendlebe yokunene yoyakuhlanjululwa,
nasesithupheni sesandla sakhe sokunene, nakuqukula wonyawo lwakhe lokunene; 26 umpristi
athele amafutha entendeni yesakhe isandla sokhohlo kasikhombisa; 27 umpristi afafaze
ngamafutha asesandleni sakhe sokhohlo kasikhombisa phambi kukaJehova ngomunwe wakhe
wokunene; 28 umpristi athabathe kuwo amafutha asesandleni sakhe, awabhece esicutshini
sendlebe yokunene yoyakuhlanjululwa, nasesithupheni sesandla sakhe sokunene, nakuqukula
wonyawo lwakhe lokunene, endaweni yegazi lomnikelo wecala; 29 amafutha aseleyo asesandleni
sompristi wowabeka ekhanda loyakuhlanjululwa ukumenzela ukubuyisana phambi kukaJehova. 30
Uyakunikela ngelinye lamahobhe noma ngelamaphuphu amajuba, njengalokho angaphumelela
kukho, 31 yebo, njengalokho angaphumelela kukho, elinye libe ngumnikelo wesono, elinye libe
ngumnikelo wokushiswa kanye nomnikelo wempuphu, umpristi amenzele ukubuyisana
oyakuhlanjululwa phambi kukaJehova." 32 Lowo ungumthetho wakhe isifo sochoko esikuye,
ongenakuphumelela kulokho okuqondene nokuhlambuluka kwakhe.
33
UJehova wakhuluma kuMose naku-Aroni, wathi: 34 "Kuyakuthi lapho senifikile ezweni
laseKhanani engininika lona libe yifa lenu, ngifake isifo sochoko endlini yezwe eniliphiweyo, 35
umninindlu makeze amtshele umpristi, athi: ‘Kungathi kubonakele isifo endlini.’ 36 Umpristi
woyala ukuba bakhiphe okuphakathi endlini, engakangeni umpristi ukuyobona isifo, ukuze
kungangcoli konke okusendlini, andukuba umpristi angene ukubona indlu. 37 Abesebheka ibala;
uma ibala lisezindongeni zendlu, linemishwe eluhlazana noma ebomvana, libonakala lishonile
kunodonga, 38 bheka, khona umpristi wophuma endlini, aye ngasemnyango wendlu, ayivale indlu
izinsuku eziyisikhombisa, 39 umpristi abuye ngosuku lwesikhombisa, abheke; uma ibala landile
odongeni lwendlu, 40 bheka, khona umpristi woyala ukuba bakhiphe amatshe isifo esikuwo,
bawalahle endaweni engcolileyo ngaphandle komuzi; 41 indlu iphalwe phakathi nxazonke,
bathele udaka oluphaliweyo endaweni engcolileyo ngaphandle komuzi. 42 Bothabatha amanye
amatshe, bawafake endaweni yalawo matshe, bathabathe olunye udaka, bayinameke indlu. 43
"Uma isifo sibuye siqhamuka endlini emva kokukhishwa kwamatshe nasemva kokuphalwa
kwendlu nasemva kokunamekwa kwayo, 44 umpristi uyakungena abheke; uma isifo sandile
endlini, bheka, kuluchoko olubi endlini; ingcolile. 45 Woyibhidliza, amatshe ayo namapulangwe
ayo nalo lonke udaka lwendlu akukhiphe emzini, akulahle endaweni engcolileyo. 46 "Ongena
endlini ngezinsuku isavaliwe uyakuba ngongcolile kuze kuhlwe. 47 Olala endlini makahlanze
izingubo zakhe; nodlayo endlini makahlanze izingubo zakhe. 48 "Uma umpristi engena azobheka,
isifo singandile endlini emva kokunamekwa kwendlu, bheka, khona umpristi uyakusho athi indlu
ihlambulukile, ngokuba isifo sipholile. 49 Wothabatha, ukuba ahlambulukise indlu, izinyoni
ezimbili nomsedari nendwangu ebomvu nehisopi, 50 ahlabe enye yezinyoni esitsheni sebumba
phezu kwamanzi agobhozayo, 51 athabathe umsedari nehisopi nendwangu ebomvu nenyoni
ezwayo, akugcobhoze egazini lenyoni ehlatshiweyo nasemanzini agobhozayo, afafaze indlu
kasikhombisa, 52 ahlambulule indlu ngegazi lenyoni ezwayo nangomsedari nangehisopi
nangendwangu ebomvu, 53 ayiyeke inyoni ezwayo, iphume emzini iye endle, ayenzele kanjalo
indlu ukubuyisana; iyakuhlambuluka."
54
Lowo ungumthetho wesifo sochoko esiyizinhlobonhlobo nowomuna, 55 nowochoko lwengubo
nolwendlu, 56 nowedunguza nowotwayi nowebala elikhanyayo, 57 ukufundisa nxa kungcolile
nanxa kuhlambulukile; yilowo ongumthetho wochoko.

15
1
UJehova wakhuluma kuMose naku-Aroni, wathi: 2 "Yishoni kubantwana bakwa-Israyeli, nithi
kubo: ‘Nxa owesilisa ecucuza emzimbeni wakhe, ungcolile ngokucucuza kwakhe. 3 Lokhu
kuyakuba ngukungcola kwakhe ngokucucuza kwakhe: noma umzimba wakhe ucucuza, noma
umzimba wakhe uvimbekile ekucucuzeni kwakhe, kungukungcola kwakhe. 4 "‘Yonke imibhede
alala kuyo ocucuzayo iyakuba ngengcolile; nezinto zonke ahlala kuzo ziyakuba ngezingcolile. 5
Yilowo nalowo othinta umbhede wakhe uyakuhlanza izingubo zakhe, ageze ngamanzi, abe
ngongcolile kuze kuhlwe. 6 Ohlala entweni ahlale kuyo ocucuzayo uyakuhlanza izingubo zakhe,
ageze ngamanzi, abe ngongcolile kuze kuhlwe. 7 "‘Othinta inyama yocucuzayo uyakuhlanza
izingubo zakhe, ageze ngamanzi, abe ngongcolile kuze kuhlwe. 8 "‘Uma ocucuzayo emfela
ngamathe ohlambulukileyo, yena uyakuhlanza izingubo zakhe, ageze ngamanzi, abe ngongcolile
kuze kuhlwe. 9 "‘Zonke izihlalo akhwela kuzo ocucuzayo ziyakuba ngezingcolile. 10 Bonke
abathinta into eyayiphansi kwakhe bayakuba ngabangcolile kuze kuhlwe, nalowo othwala lezo
zinto uyakuhlanza izingubo zakhe, ageze ngamanzi, abe ngongcolile kuze kuhlwe. 11 "‘Nalowo
ocucuzayo amthinta, engahashazanga izandla zakhe ngamanzi, uyakuhlanza izingubo zakhe,
ageze ngamanzi, abe ngongcolile kuze kuhlwe. 12 "‘Isitsha sebumba asithinta ocucuzayo
siyakwaphulwa, nazo zonke izitsha zomuthi ziyakuhashazwa ngamanzi. 13 "‘Nxa ocucuzayo
ehlambulukile ekucucuzeni kwakhe, uyakuzibalela izinsuku eziyisikhombisa zokuhlanjululwa
kwakhe, ahlanze izingubo zakhe, ageze umzimba wakhe ngamanzi agobhozayo, ahlambuluke. 14
Ngosuku lwesishiyagalombili wozithabathela amahobhe amabili noma amaphuphu amabili
amajuba, eze phambi kukaJehova ngasemnyango wetende lokuhlangana, awanike umpristi: 15
umpristi anikele ngawo, elinye libe ngumnikelo wesono, elinye libe ngumnikelo wokushiswa,
umpristi amenzele ukubuyisana phambi kukaJehova ngenxa yokucucuza kwakhe. 16 "‘Nxa
umuntu eshaywa yizibuko, uyakugeza wonke umzimba wakhe ngamanzi, abe ngongcolile kuze
kuhlwe. 17 Zonke izingubo nazo zonke izikhumba elikuzo izibuko lakhe ziyakuhlanzwa
ngamanzi, zibe ngezingcolile kuze kuhlwe. 18 Nowesifazane elale naye indoda, imlalile yamthela
ngamalotha, bayakugeza bobabili ngamanzi, babe ngabangcolile kuze kuhlwe.
19
"‘Uma owesifazane ecucuza, ukucucuza kwakhe kube yigazi, uyakuhlala engcolile izinsuku
eziyisikhombisa; bonke abamthintayo bayakuba ngabangcolile kuze kuhlwe. 20 "‘Zonke izinto
alala kuzo ekungcoleni kwakhe ziyakuba ngezingcolile; nakho konke ahlala kukho kuyakuba
ngokungcolile. 21 Yilowo nalowo othinta umbhede wakhe uyakuhlanza izingubo zakhe, ageze
ngamanzi, abe ngongcolile kuze kuhlwe. 22 Yilowo nalowo othinta noma intoni ahlala kuyo
uyakuhlanza izingubo zakhe, ageze ngamanzi, abe ngongcolile kuze kuhlwe. 23 Uma
kusembhedeni noma kukuyiphi into ahlala kuyo, nxa kuthintwa ngumuntu, yena uyakuhlala
engcolile kuze kuhlwe. 24 "‘Uma indoda ilala naye, ukungcola kwakhe kube kuyo, iyakuba
ngengcolile izinsuku eziyisikhombisa; nayo yonke imibhede alala kuyo iyakuba ngengcolile. 25
"‘Uma owesifazane ecucuza igazi lakhe izinsuku eziningi, zingabi ngezokungcola kwakhe, noma
ecucuza kudlula isikhathi sokungcola kwakhe, zonke izinsuku zokucucuza kokungcola kwakhe
uyakuba njengasezinsukwini zokungcola kwakhe; ungcolile. 26 Imibhede yonke alala kuyo zonke
izinsuku zokucucuza kwakhe iyakuba kuye njengombhede wokungcola kwakhe; zonke izinto
ahlala kuzo ziyakuba ngezingcolile njengokungcola kwefindo lakhe. 27 Yilowo nalowo othinta
lezo zinto uyakuba ngongcolile, ahlanze izingubo zakhe, ageze ngamanzi, abe ngongcolile kuze
kuhlwe. 28 "‘Kepha uma ehlambuluka ekucucuzeni kwakhe, makazibalele izinsuku
eziyisikhombisa, andukuba ahlambuluke. 29 Ngosuku lwesishiyagalombili wozithabathela
amahobhe amabili noma amaphuphu amabili amajuba, awalethe kumpristi ngasemnyango
wetende lokuhlangana. 30 Umpristi uyakunikela ngelinye libe ngumnikelo wesono, elinye libe
ngumnikelo wokushiswa, umpristi amenzele ukubuyisana phambi kukaJehova ngenxa
yokucucuza kokungcola kwakhe. 31 "‘Kanjalo niyakwahlukanisa abantwana bakwa-Israyeli
nokungcola kwabo ukuba bangafi ekungcoleni kwabo, lapho bengcolisa itabernakele lami
eliphakathi kwabo.’" 32 Lowo ungumthetho wocucuzayo nowoshaywa yizibuko, aze angcole
ngakho, 33 nowogula ngokungcola kwakhe, nowocucuzayo, umlisa noma owesifazane, nowakhe
olala nongcolileyo.

16
1
UJehova wakhuluma kuMose emva kokufa kwamadodana ka-Aroni ekusondeleni kwawo
phambi kukaJehova, afa. 2 UJehova wathi kuMose: "Khuluma ku-Aroni umfowenu ukuba
angangeni njalo endaweni engcwele ngaphakathi kwesihenqo ngaphambi kwesihlalo somusa
esiphezu komphongolo, ukuze angafi, ngokuba ngiyakubonakala efwini phezu kwesihlalo
somusa." 3 U-Aroni kangene endaweni engcwele nalokhu: iduna, libe ngumnikelo wesono,
nenqama, ibe ngumnikelo wokushiswa, 4 embathe ibhantshi elingcwele lelineni, abe nebhulukwe
lelineni emzimbeni wakhe, abhince ibhande lelineni, afake isigqoko selineni; lezi ziyizambatho
ezingcwele; uyakugeza umzimba wakhe ngamanzi, azembathe.
5
Wothabatha enhlanganweni yabantwana bakwa-Israyeli izimpongo ezimbili zibe ngumnikelo
wesono, nenqama ibe ngumnikelo wokushiswa. 6 U-Aroni kanikele ngenkunzi yomnikelo
wesono engenxa yakhe, azenzele yena nendlu yakhe ukubuyisana. 7 Wothabatha izimpongo
zombili, azibeke phambi kukaJehova ngasemnyango wetende lokuhlangana. 8 U-Aroni
uyakwenza inkatho ngezimpongo zombili, enye inkatho ibe ngekaJehova, enye inkatho ibe
ngeka-Azazeli. 9 U-Aroni wonikela ngempongo edliwe yinkatho kaJehova, anikele ngayo ibe
ngumnikelo wesono. 10 Kepha impongo edliwe yinkatho ka-Azazeli iyakubekwa phambi
kukaJehova isezwa ukuba kwenziwe ukubuyisana ngayo, ithunywe ku-Azazeli ehlane. 11 U-
Aroni wonikela ngenkunzi yomnikelo wesono engenxa yakhe, azenzele yena nendlu yakhe
ukubuyisana, ahlabe inkunzi yomnikelo wesono engenxa yakhe. 12 Wothabatha umcengezi
womlilo ogcwele amalahle omlilo ase-altare phambi kukaJehova, izandla zakhe zigcwele
impepho ethaphukayo icolisisiwe, akulethe ngaphakathi kwesihenqo, 13 abeke impepho
emlilweni phambi kukaJehova ukuba ifu lempepho lisibekele isihlalo somusa esiphezu
kobufakazi, ukuze angafi; 14 athabathe kulo igazi lenkunzi, afafaze ngalo isihlalo somusa
ngasempumalanga ngomunwe wakhe, nangaphambi kwesihlalo somusa afafaze ngegazi
kasikhombisa ngomunwe wakhe.
15
Abesehlaba impongo yomnikelo wesono engenxa yabantu, alethe igazi layo ngaphakathi
kwesihenqo, enze ngegazi layo njengalokho wenza ngegazi lenkunzi, afafaze ngalo isihlalo
somusa nangaphambi kwesihlalo somusa, 16 enzele indawo engcwele ukubuyisana ngenxa
yokungcola kwabantwana bakwa-Israyeli nangenxa yeziphambeko zabo ezonweni zabo zonke;
akenzele njalo netende lokuhlangana elihlezi nabo phakathi kokungcola kwabo. 17 Akuyikubakho
muntu etendeni lokuhlangana, nxa engena ukwenza ukubuyisana endaweni engcwele aze
aphume, azenzele ukubuyisana, yena nendlu yakhe nebandla lonke lakwa-Israyeli. 18
Uyakuphuma, aye e-altare eliphambi kukaJehova, alenzele ukubuyisana, athabathe kulo igazi
lenkunzi nakulo igazi lempongo, alibhece ezimpondweni ze-altare nxazonke. 19 Uyakulifafaza
ngegazi kasikhombisa ngomunwe wakhe, alihlambulule, alingcwelise ekungcoleni kwabantwana
bakwa-Israyeli.
20
Eseqedile ukwenzela indawo engcwele ukubuyisana, netende lokuhlangana ne-altare,
uyakunikela ngempongo ezwayo; 21 u-Aroni abeke izandla zakhe zombili enhloko yempongo
ezwayo, avume phezu kwayo bonke ububi babantwana bakwa-Israyeli neziphambeko ezonweni
zabo zonke, akubeke enhloko yempongo, ayithume ngesandla somuntu olungiselwe lokhu, iye
ehlane, 22 impongo ithwale ububi babo bonke, iye nabo kwahlongasibi, bayiyeke impongo
ehlane. 23 U-Aroni uyakungena etendeni lokuhlangana, akhumule izambatho zelineni
azembetheyo ekungeneni kwakhe endaweni engcwele, azishiye khona. 24 Uyakugeza umzimba
wakhe ngamanzi endaweni engcwele, agqoke izambatho zakhe, aphume, anikele ngomnikelo
wakhe wokushiswa nangomnikelo wokushiswa wabantu, azenzele yena nabantu ukubuyisana. 25
Amanoni omnikelo wesono uyakuwashisa e-altare. 26 Ovuma ukuba impongo iye ku-Azazeli
uyakuhlanza izingubo zakhe, ageze umzimba wakhe ngamanzi, andukuba angene ekamu. 27
Inkunzi yomnikelo wesono nempongo yomnikelo wesono, elangeniswa igazi lazo ukwenza
ukubuyisana endaweni engcwele, ziyakukhishelwa ngaphandle kwekamu, kushiswe ngomlilo
izikhumba zazo nenyama yazo nomswani wazo. 28 Ozishisayo wohlanza izingubo zakhe, ageze
umzimba wakhe ngamanzi, andukuba angene ekamu.
29
Lokhu kuyakuba yisimiso esiphakade kini: ngenyanga yesikhombisa ngolweshumi lwenyanga
niyakuthobisa imiphefumulo yenu, ningasebenzi msebenzi, owokuzalwa ekhaya nomfokazi
ogogobeleyo phakathi kwenu. 30 Ngokuba ngalolo suku niyakwenzelwa ukubuyisana ukuba
nihlanjululwe; niyakuhlambuluka ezonweni zenu zonke phambi kukaJehova. 31 Kuyisabatha
lokuphumula okuzothileyo kini; anothobisa imiphefumulo yenu; kuyisimiso esiphakade. 32
Umpristi oyakugcotshwa ahlukaniselwe abe ngumpristi esikhundleni sikayise uyakwenza
ukubuyisana, afake izambatho zelineni, izambatho ezingcwele, 33 enzele indlu engcwele
ukubuyisana, enzele abapristi nabantu bonke bebandla ukubuyisana. 34 Lokho kuyakuba yisimiso
esiphakade kini ukwenzela abantwana bakwa-Israyeli ukubuyisana ngenxa yezono zabo zonke
kanye ngomnyaka. Wenza-ke njengalokho uJehova emyalile uMose.

17
1
UJehova wakhuluma kuMose, wathi: 2 "Yisho ku-Aroni, nakumadodana akhe, nakubo bonke
abantwana bakwa-Israyeli, uthi kubo: ‘Lokhu kuyikho ayale ngakho uJehova, ethi: 3 Yilowo
nalowo muntu wendlu yakwa-Israyeli ohlaba inkunzi noma imvana noma imbuzi ekamu, noma
eyibulala ngaphandle kwekamu, 4 engayilethanga emnyango wetende lokuhlangana ukunikela
ngayo ibe ngumnikelo kaJehova ngaphambi kwetabernakele likaJehova, lowo muntu wobalelwa
icala legazi; uchithile igazi; lowo muntu uyakunqunywa kubantu bakubo. 5 Ngalokho abantwana
bakwa-Israyeli bayakuletha imihlatshelo yabo abayihlaba endle, bayilethe kuJehova
ngasemnyango wetende lokuhlangana, kumpristi, banikele ngayo ibe yiminikelo yokuthula
kuJehova. 6 Umpristi wofafaza ngegazi i-altare likaJehova ngasemnyango wetende lokuhlangana,
ashise amanoni, abe yiphunga elimnandi kuJehova. 7 Abasayikuhlabela amademoni imihlatshelo
yabo abaye kuwo ukuphinga. Lokho kuyakuba yisimiso esiphakade kubo ezizukulwaneni zabo.’ 8
"Wothi kubo: ‘Yilowo nalowo muntu wendlu yakwa-Israyeli noma owabafokazi abagogobeleyo
phakathi kwabo onikela ngomnikelo wokushiswa noma ngomhlatshelo, 9 engayilethi emnyango
wetende lokuhlangana ukunikela ngawo kuJehova, lowo muntu uyakunqunywa kubantu bakubo.
10
"‘Yilowo nalowo muntu wendlu yakwa-Israyeli noma owabafokazi abagogobeleyo phakathi
kwabo odla igazi noma yiliphi, ngiyakumisa ubuso bami bumelane nalowo muntu odla igazi,
ngimnqume kubantu bakubo. 11 Ngokuba umphefumulo womzimba usegazini; ngimnike lona e-
altare ukwenzela imiphefumulo yenu ukubuyisana, lokhu kuyigazi elenza ukubuyisana
ngomphefumulo. 12 Ngalokho ngathi kubantwana bakwa-Israyeli: "Makungabikho muntu kini
odla igazi; nomfokazi ogogobeleyo phakathi kwenu makangadli igazi." 13 "‘Yilowo nalowo
muntu wabantwana bakwa-Israyeli noma owabafokazi abagogobeleyo phakathi kwabo ozingela,
abambe isilwane noma inyoni edliwayo, makachithe igazi layo, alisibekele ngothuli. 14 Ngokuba
umphefumulo wenyama yonke, igazi layo lihlangene nomphefumulo wayo; ngalokho ngathi
kubantwana bakwa-Israyeli: "Maningadli igazi lenyama noma iyiphi, ngokuba umphefumulo
wenyama yonke uyigazi layo; yilowo nalowo oyidlayo uyakunqunywa." 15 "‘Yilowo nalowo odla
ingcuba noma lokho okudweshulwe yizilo, noma engowokuzalwa ekhaya noma engumfokazi,
makahlanze izingubo zakhe, ageze ngamanzi, abe ngongcolile kuze kuhlwe; khona
uyakuhlambuluka. 16 Kepha uma engazihlanzi, angagezi umzimba wakhe, uyakuthwala ububi
bakhe.’"

18
1
UJehova wakhuluma kuMose, wathi: 2 "Yisho kubantwana bakwa-Israyeli, uthi kubo:
‘NginguJehova uNkulunkulu wenu. 3 Ningenzi njengokwemisebenzi yezwe laseGibithe enahlala
kulo, ningenzi futhi njengokwemisebenzi yezwe laseKhanani enginiyisa kulo, ningahambi
ngemithetho yabo. 4 Nenze izahlulelo zami, nigcine imithetho yami ukuba nihambe ngayo;
nginguJehova uNkulunkulu wenu. 5 Ngalokho anogcina izimiso zami nezahlulelo zami; uma
umuntu ezenza, uyakuphila ngazo; nginguJehova.
6
"‘Makungasondeli muntu kowakubo ukwambula ubunqunu bakhe; nginguJehova. 7
"‘Ubunqunu bukayihlo, ubunqunu bukanyoko, ungabambuli, ungunyoko; ungambuli ubunqunu
bakhe. 8 "‘Ubunqunu bomkayihlo ungabambuli; kungubunqunu bukayihlo. 9 "‘Ungambuli
ubunqunu bukadadewenu, indodakazi kayihlo noma indodakazi kanyoko, noma ezelwe kini,
noma ezelwe kwelinye; ungambuli ubunqunu babo. 10 "‘Ungambuli ubunqunu bendodakazi
yendodana yakho noma obendodakazi yendodakazi yakho; awuyikwambula ubunqunu babo,
ngokuba obabo bungubunqunu bakho. 11 "‘Ungambuli ubunqunu bendodakazi yomkayihlo,
ezelwe nguyihlo; ungudadewenu; awuyikwambula ubunqunu bakhe. 12 "‘Ungambuli ubunqunu
bukadadewabo kayihlo; uyisihlobo sikayihlo. 13 "‘Ungambuli ubunqunu bukadadewabo kanyoko,
ngokuba uyisihlobo sikanyoko. 14 "‘Ungambuli ubunqunu bomfowabo kayihlo, ungasondeli
kumkakhe; unguyihlokazi. 15 "‘Ungambuli ubunqunu bukamalokazana wakho; ungumkandodana
yakho; awuyikwambula ubunqunu bakhe. 16 "‘Ungambuli ubunqunu bomkamfowenu;
kungubunqunu bomfowenu. 17 "‘Ungambuli ubunqunu bowesifazane kanye nobendodakazi
yakhe; ungathathi indodakazi yendodana yakhe, noma indodakazi yendodakazi yakhe ukwambula
ubunqunu bayo, ngokuba bayizihlobo; kungukonakala. 18 "‘Ungathathi owesifazane kanye
nodadewabo ukuba wambule ubunqunu bakhe kanye nomunye esekhona, aze ambange.
19
"‘Ungasondeli kowesifazane, wambule ubunqunu bakhe esangcolile ngokungcola kwakhe. 20
"‘Ungalali nomkamakhelwane ukuzingcolisa ngaye. 21 "‘Unganikeli ngenzalo yakho
ukuyahlukanisela kuMoloki, ungahlambalazi igama likaNkulunkulu wakho; nginguJehova. 22
"‘Ungalali nowesilisa njenganowesifazane; kuyisinengiso. 23 "‘Ungalali nesilwane ukuzingcolisa
ngaso; nowesifazane makangemi phambi kwesilwane ukuba alale naso; kuyichilo. 24
"‘Ningazingcolisi nangeyodwa yalezo zinto, ngokuba ngazo zonke lezo zingcolile lezi zizwe
engizixosha phambi kwakho. 25 Izwe lingcolile; ngalokho ngahambela ububi balo kulo, izwe
lahlanza abantu balo. 26 Gcinani izimiso zami nezahlulelo zami, ningenzi nesisodwa salezo
zinengiso, noma owokuzalwa ekhaya noma umfokazi ogogobeleyo phakathi kwenu 27 ngokuba
zonke lezo zinengiso bazenza abantu balelo zwe ababekhona ngaphambi kwenu, izwe selangcola
28
ukuze izwe linganihlanzi nani, nxa nilingcolisa, njengalokho lahlanza isizwe esasikhona
phambi kwenu. 29 "‘Ngokuba bonke abenza lezo zinengiso, yebo, abazenzayo bayakunqunywa
kubantu bakubo. 30 Ngalokho gcinani isiyalezo sami ukuba ningenzi nalinye lalawo masiko
anengekayo, ayenziwa ngaphambi kwenu, ningazingcolisi ngawo; nginguJehova uNkulunkulu
wenu.’"

19
1
UJehova wakhuluma kuMose, wathi: 2 "Yisho kuyo yonke inhlangano yabantwana bakwa-
Israyeli, uthi kuyo: ‘Niyakuba ngcwele, ngokuba mina Jehova uNkulunkulu wenu ngingcwele. 3
"‘Yilowo nalowo makahloniphe unina noyise, nigcine amasabatha ami; nginguJehova
uNkulunkulu wenu. 4 "‘Ningaphendukeli kuzo izithombe, ningazenzeli onkulunkulu
ababunjiweyo; nginguJehova uNkulunkulu wenu. 5 "‘Nxa ninikela kuJehova ngomhlatshelo
weminikelo yokuthula, anonikela ngawo ukuba namukeleke. 6 Uyakudliwa ngosuku lokunikela
kwenu nangakusasa; uma kusele okuthile kuze kube lusuku lwesithathu, kuyakushiswa ngomlilo.
7
Uma kudliwa nokuncane ngosuku lwesithathu, kuyisinengiso; awuyikwamukeleka; 8 yilowo
nalowo owudlayo uyakuthwala ububi bakhe, ngokuba udumazile okungcwele kukaNkulunkulu;
lowo muntu uyakunqunywa kubantu bakubo. 9 "‘Nxa nivuna isivuno sezwe lakini, awuyikuvuna
ngokupheleleyo emagumbini ensimu yakho, ungakhothozi umkhothozo wesivuno sakho. 10
Awuyikukhothoza isivini sakho, ungabuthi izithelo zesivini ezivuthulukileyo; wozishiyela
abampofu nabafokazi; nginguJehova uNkulunkulu wenu.
11
"‘Ningebi, ningakhohlisani, ningaqambelani amanga. 12 "‘Ningafungeli igama lami amanga,
uze uhlambalaze igama likaNkulunkulu; nginguJehova. 13 "‘Ungamcindezeli umakhelwane
wakho, ungamphangi; inkokhelo yomqashwa ayiyikuhlala kuwe ubusuku bonke kuze kuse. 14
"‘Ungaqalekisi isithulu, ungabeki isikhubekiso phambi kwempumputhe, kepha wesabe
uNkulunkulu wakho; nginguJehova. 15 "‘Ningenzi ukungalungi ekwahluleleni; ungakhethi ubuso
bompofu, ungavuni ubuso bomkhulu, kepha wahlulele umakhelwane wakho ngokulunga. 16
"‘Ungahambahambi ucetheza phakathi kwabantu bakho, ungamelani nokuphila komakhelwane
wakho; nginguJehova. 17 "‘Ungazondi umfowenu enhliziyweni yakho; ungamkhuza nokumkhuza
umakhelwane wakho, kepha ungabi nasono ngaye. 18 "‘Ungaphindisi, ungabi namagqubu
nabantwana babantu bakho, kepha wothanda umakhelwane wakho njengalokhu uzithanda wena;
nginguJehova.
19
"‘Niyakugcina izimiso zami; ungavumeli izilwane zakho zizekwe ngolunye uhlobo;
ungahlwanyeli ensimini yakho izinhlobo ezimbili zembewu; kungezi phezu kwakho ingubo
eyizinhlobonhlobo zezintanjana. 20 "‘Olala nowesifazane oyisigqilakazi eyingoduso,
engahlengiwe, engakhululiwe ngesihle, makabe nesijeziso, angabulawa nokho, ngokuba
wayengakhululekile. 21 Uyakuletha umnikelo wakhe wecala kuJehova ngasemnyango wetende
lokuhlangana, inqama ibe ngumnikelo wecala. 22 Umpristi uyakumenzela ukubuyisana ngenqama
yomnikelo wecala phambi kukaJehova ngesono sakhe one ngaso, athethelelwe isono sakhe one
ngaso. 23 "‘Nanxa senifikile ezweni, nitshale imithi eyizinhlobonhlobo edliwayo, anothi izithelo
zayo zingukungasoki kwayo; iminyaka emithathu iyakuba njengengasokiwe kini: mazingadliwa.
24
Kepha ngomnyaka wesine zonke izithelo zayo ziyakuba ngcwele, ezokumdumisa uJehova. 25
Ngomnyaka wesihlanu niyakudla kuzo izithelo zayo, ukuze inithelele kakhulu; nginguJehova
uNkulunkulu wenu. 26 "‘Aniyikudla lutho olunegazi, ningenzi imilingo, ningahloli imihlola. 27
"‘Aniyikudilinga amakhanda enu emaceleni; ungoni isilevu sakho emaceleni. 28
"‘Aniyikuzigcaba emizimbeni yenu ngenxa yabafileyo, ningazilobi amabala; nginguJehova. 29
"‘Awuyikuhlambalaza indodakazi yakho ukuyenza isifebe, funa izwe lehlelwe ngubufebe, izwe
ligcwale ukonakala.
30
"‘Anogcina amasabatha ami, nihloniphe indlu yami engcwele; nginguJehova. 31
"‘Ningaphendukeli kwabanamadlozi nakubathakathi, ningabafuni ukuba ningcoliswe yibo;
nginguJehova uNkulunkulu wenu. 32 "‘Wosukuma phambi kwempunga, uhloniphe ubuso
bomuntu omdala, umesabe uNkulunkulu wakho; nginguJehova. 33 "‘Uma umfokazi egogobele
kuwe ezweni lakini, aniyikumhlupha. 34 Umfokazi ogogobeleyo kini uyakuba kini
njengowokuzalwa ekhaya phakathi kwenu, umthande njengalokhu uzithanda wena, ngokuba
naningabafokazi ezweni laseGibithe; nginguJehova uNkulunkulu wenu. 35 "‘Aniyikwenza
ukungalungi ekwahluleleni, ekulinganiseni ubude noma isisindo noma ubuningi. 36 Niyakuba
nezilinganiso ezilungileyo, nezisindo ezilungileyo, ne-efa elilungileyo, nehini elilungileyo;
nginguJehova uNkulunkulu wenu owanikhipha ezweni laseGibithe. 37 "‘Anogcina zonke izimiso
zami nazo zonke izahlulelo zami, nizenze; nginguJehova.’"

20
1
UJehova wakhuluma kuMose, wathi: 2 "Futhi uyakusho kubantwana bakwa-Israyeli, uthi:
‘Yilowo nalowo wabantwana bakwa-Israyeli, noma owabafokazi abagogobeleyo kwa-Israyeli,
onikela ngenzalo yakhe kuMoloki, wobulawa nokubulawa, abantu balelo zwe bamkhande
ngamatshe. 3 Ngiyakubeka ubuso bami bumelane nalowo muntu, ngimnqume kubantu bakubo,
ngokuba unikela ngenzalo yakhe kuMoloki ukungcolisa indlu yami engcwele nokuhlambalaza
igama lami elingcwele. 4 Uma abantu balelo zwe besitheza kancane amehlo abo kulowo muntu,
lapho enikela ngenzalo yakhe kuMoloki, bangambulali, 5 ngiyakubeka ubuso bami bumelane
nalowo muntu nomndeni wakhe, ngimnqume kubantu bakubo kanye nabo bonke abaya kuye
ukuphinga, beyophinga noMoloki. 6 "‘Nalowo muntu ophendukela kwabanamadlozi
nakubathakathi ukuya kubo ukuba aphinge, ngiyakubeka ubuso bami bumelane nalowo muntu,
ngimnqume kubantu bakubo. 7 "‘Ngalokho zingcweliseni nibe ngcwele, ngokuba nginguJehova
uNkulunkulu wenu. 8 Anogcina izimiso zami, nizenze; nginguJehova oningcwelisayo. 9
"‘Ngokuba yilowo nalowo othuka uyise noma unina wobulawa nokubulawa; uthukile uyise noma
unina; igazi lakhe liyakuba phezu kwakhe.
10
"‘Umuntu ophinga nomfazi womunye umuntu nophinga nomkamakhelwane wakhe, isiphingi
nesiphingikazi ziyakubulawa nokubulawa. 11 "‘Umuntu olala nomkayise wambulile ubunqunu
bukayise; bobabili bobulawa nokubulawa, igazi labo libe phezu kwabo. 12 "‘Uma umuntu elala
nomalokazana wakhe, bobabili bobulawa nokubulawa; benzile ichilo; igazi labo malibe phezu
kwabo. 13 "‘Uma indoda ilala nowesilisa njenganowesifazane, bobabili benzile isinengiso;
bobulawa nokubulawa, igazi labo libe phezu kwabo. 14 "‘Uma umuntu ethatha umfazi kanye
nonina, kungukonakala; bayakushiswa ngomlilo yena nabo, ukuze kungabikho konakala phakathi
kwenu. 15 "‘Uma umuntu elala nesilwane, wobulawa nokubulawa, nisihlabe isilwane. 16 "‘Uma
owesifazane esondela esilwaneni, alale naso, wobulala owesifazane nesilwane; bobulawa
nokubulawa, igazi labo libe phezu kwabo. 17 "‘Uma umuntu ethatha udadewabo, indodakazi
kayise noma indodakazi kanina, abone ubunqunu bakhe, naye abone ubunqunu bakhe, kuyihlazo;
bayakunqunywa phambi kwabantwana babantu bakubo; wambulile ubunqunu bukadadewabo;
uyakuthwala ububi bakhe. 18 "‘Uma umuntu elala nowesifazane onefindo lakhe, ambule
ubunqunu bakhe, unqunisile umthombo wakhe, naye wambulile umthombo wegazi lakhe;
bobabili bayakunqunywa kubantu bakubo. 19 "‘Ungambuli ubunqunu bukadadewabo kanyoko,
noma obukadadewabo kayihlo, ngokuba unqunisile isihlobo sakhe; bayakuthwala ububi babo. 20
"‘Uma umuntu elala nomkayisekazi, wambulile ubunqunu bukayisekazi; bayakuthwala isono
sabo; bayakufa beyizimpulule. 21 "‘Uma umuntu ethatha umkamfowabo, kungukungcola;
wambulile ubunqunu bomfowabo; bayakuba yizimpulule.
22
"‘Ngalokho anogcina zonke izimiso zami, nazo zonke izahlulelo zami, nizenze ukuba izwe
lapho nginiyisa khona ukuba nihlale kulo linganihlanzi. 23 Aniyikuhamba ngamasiko esizwe
engisixosha phambi kwenu, ngokuba benza zonke lezo zinto; ngalokho nganengwa yibo. 24
Kepha ngishilo kini ukuthi: "Niyakulidla ifa lezwe labo, ngininike lona libe ngelenu, izwe
elichichima ubisi nezinyosi;" nginguJehova onahlukanisile nabezizwe. 25 "‘Ngalokho
anohlukanisa izilwane ezihlambulukileyo nezingcolileyo, izinyoni ezingcolileyo
nezihlambulukileyo, ningenzi imiphefumulo yenu inengeke ngesilwane noma ngenyoni noma
ngantoni enwabuzelayo emhlabeni, engizahlukanisile nani, ngathi zingcolile. 26 Niyakuba
ngcwele kimi, ngokuba mina Jehova ngingcwele; nginahlukanisile nabezizwe ukuba nibe
ngabami. 27 "‘Owesilisa noma owesifazane, elikubo idlozi, noma umthakathi bobulawa
nokubulawa, bakhandwe ngamatshe, igazi labo libe phezu kwabo.’"

21
1
UJehova wathi kuMose: "Khuluma kubapristi, amadodana ka-Aroni, uthi kubo: ‘Makungabikho
ozingcolisayo ngofileyo phakathi kwabantu bakubo, 2 ngaphandle kwezihlobo ezinyamanye
naye, okungukuthi unina, noyise, nendodana yakhe, nendodakazi yakhe, nomfowabo, 3
nodadewabo, intombi eseduze naye, engenandoda; angazingcolisa ngaye. 4 Akayikuzingcolisa,
eyisikhulu phakathi kwabantu bakubo, ukuze azihlambalaze. 5 "‘Abayikuzigega amakhanda abo,
bangasiphuculi isilevu emaceleni, bangazigcabi emzimbeni. 6 Bayakuba ngcwele kuNkulunkulu
wabo, bangahlambalazi igama likaNkulunkulu wabo, ngokuba banikela ngeminikelo yomlilo
kaJehova, isinkwa sikaNkulunkulu wabo; ngalokho bayakuba ngcwele. 7 "‘Angathathi
owesifazane oyisifebe nowonakeleyo, angathathi owesifazane olahliwe yindoda yakhe, ngokuba
ungcwele kuNkulunkulu wakhe. 8 Ngalokho uyakumngcwelisa, ngokuba unikela ngesinkwa
sikaNkulunkulu wakho; uyakuba ngcwele kuwe, ngokuba mina Jehova oningcwelisayo
ngingcwele. 9 "‘Indodakazi yompristi, uma izingcolisa ngokufeba, iyamhlambalaza noyise;
yoshiswa ngomlilo.
10
"‘Ongumpristi omkhulu phakathi kwabafowabo, kuthelwe ekhanda lakhe amafutha okugcoba,
nowahlukaniselwa ukuba embathe izambatho, akayikuthukulula izinwele zekhanda lakhe,
angaklebhuli izambatho zakhe, 11 angangeni nakumuphi umuntu ofileyo, angazingcolisi ngoyise
noma ngonina, 12 futhi angaphumi endlini engcwele, angahlambalazi indlu engcwele
kaNkulunkulu wakhe; ngokuba umqhele wamafutha okugcoba kaNkulunkulu wakhe uphezu
kwakhe; nginguJehova. 13 "‘Wothatha umfazi oseyintombi. 14 Umfelokazi noma umfazi
olahliweyo noma owesifazane owonakelyo, isifebe, laba akayikubathatha, kepha uyakuthatha
intombi yabantu bakubo ibe ngumkakhe. 15 Akayikuhlambalaza inzalo yakhe phakathi kwabantu
bakhe; ngokuba nginguJehova oningcwelisayo.’"
16
UJehova wakhuluma kuMose, wathi: 17 "Yisho ku-Aroni, uthi: ‘Umuntu wenzalo yakho
ezizukulwaneni zayo oyisilima makangasondeli ukunikela ngesinkwa sikaNkulunkulu wakhe. 18
Ngokuba umuntu oyisilima akayikusondela: impumputhe noma unyonga, noma onekhala
eliyisicaba, noma ozitho zakhe zingalingene, 19 noma umuntu ononyawo olwaphukileyo, noma
onesandla esaphukileyo, 20 noma onesifumbu, noma oyisichwe, noma onomlanga esweni lakhe,
noma onesithembuzane, noma onomuna, noma oyisilima ngamasende; 21 akungabikho muntu
wenzalo ka-Aroni umpristi oyisilima oyakusondela ukunikela ngeminikelo yomlilo kaJehova;
uyisilima; makangasondeli ukunikela ngesinkwa sikaNkulunkulu wakhe. 22 Uyakudla isinkwa
sikaNkulunkulu wakhe, esingcwelengcwele nesingcwele. 23 Kuphela akayikungena kuso
isihenqo, futhi angasondeli e-altare, ngokuba uyisilima, ukuze angahlambalazi izindlu zami
ezingcwele, ngokuba nginguJehova obangcwelisayo. 24 UMose wakhuluma lokho ku-Aroni,
nakumadodana akhe, nakubo bonke abantwana bakwa-Israyeli.’"

22
1
UJehova wakhuluma kuMose, wathi: 2 "Yisho ku-Aroni nakumadodana akhe ukuba bahlukane
nezinto ezingcwele zabantwana bakwa-Israyeli abangingcwelisela zona, bangalihlambalazi igama
lami elingcwele; nginguJehova. 3 "Yisho kubo ukuthi: ‘Yilowo nalowo wenzalo yenu yonke
ezizukulwaneni zenu osondela ezintweni ezingcwele abantwana bakwa-Israyeli abazingcwelisela
uJehova, esengcolile, lowo muntu uyakunqunywa, angabikho phambi kwami; nginguJehova. 4
"‘Yilowo nalowo wenzalo ka-Aroni onochoko noma ocucuzayo akayikudla izinto ezingcwele aze
ahlambuluke. Nalowo othinta okungcolile ngabafileyo, noma umuntu oshaywa yizibuko, 5
nalowo othinta okunwabuzelayo angangcoliswa ngakho, noma umuntu angangcoliswa ngaye,
nakuba enokungcola kuni, 6 umuntu othinta okunjalo uyakuba ngongcolile kuze kuhlwe,
angazidli izinto ezingcwele, uma engagezi umzimba wakhe ngamanzi. 7 Selishonile ilanga
uyakuba ngohlambulukile, andukuba adle izinto ezingcwele, ngokuba ziyisinkwa sakhe. 8
Ingcuba nokudweshulwe yizilo akayikukudla ukuzingcolisa ngakho; nginguJehova. 9 "‘Ngalokho
abogcina isiyalezo sami, funa babe nesono ngaso, bafele kuso, uma besihlambalaza,
nginguJehova obangcwelisayo.
10
"‘Umfokazi akayikudla okungcwele; umuntu ogogobeleyo wompristi noma umqashwa angadli
okungcwele. 11 Kepha uma umpristi ethenga umuntu eyintengo yemali yakhe, yena angakudla;
nabazelwe emzini wakhe bangadla isinkwa sakhe. 12 Uma indodakazi yompristi igana umfokazi,
yona mayingadli emnikelweni wokuphakanyiswa wezinto ezingcwele. 13 Kepha uma indodakazi
yompristi ingumfelokazi noma ingolahliweyo ingenamntwana, bese yibuyela endlini kayise
njengasebusheni bayo, iyakudla isinkwa sikayise; kepha umfokazi makangasidli. 14 "‘Uma
umuntu edla okungcwele engazi, wothasisela okwesihlanu kwakho, amnike umpristi okungcwele.
15
Abayikuhlambalaza izinto ezingcwele zabantwana bakwa-Israyeli abanikela ngazo kuJehova,
16
bangabethwesi ububi obutholisa icala, lapho bedla izinto zabo ezingcwele; ngokuba
nginguJehova obangcwelisayo.’"
17
UJehova wakhuluma kuMose, wathi: 18 "Yisho ku-Aroni, nakumadodana akhe, nakubo bonke
abantwana bakwa-Israyeli, uthi kubo: ‘Yilowo nalowo wendlu ka-Israyeli noma umfokazi kwa-
Israyeli onikela ngomnikelo wakhe, noma owesithembiso sakhe noma oweminikelo yakhe
yesihle, okunikelwa ngayo kuJehova ibe ngumnikelo wokushiswa, 19 ukuze namukeleke,
wonikela ngeduna elingenasici lezinkomo, elezimvu noma elezimbuzi. 20 Noma yintoni enesici
aniyikunikela ngayo; ngokuba aniyikwamukeleka ngayo. 21 Umuntu onikela ngomhlatshelo
weminikelo yokuthula kuJehova ukugcwalisa isithembiso noma owomnikelo wesihle ezinkomeni
noma ezimvini, umelwe ukuphelela ukuba wamukeleke, kungabi sici kuwo. 22 Ephuphuthekayo
noma eyaphukileyo noma elimeleyo noma enesilonda noma enokhwekhwe noma enomuna,
ninganikeli ngazo kuJehova, futhi ninganikeli ngazo zibe ngumnikelo womlilo e-altare kuJehova.
23
Inkunzi noma imvana enesitho esidluleleyo noma enesitho esincane, unganikela ngazo zibe
ngumnikelo wesihle, kepha uma ungowesithembiso awunakwamukeleka. 24 Aniyikunikela
kuJehova ngento etheniwe ngokukhandwa noma ngokuchotshozwa noma ngokudwengulwa noma
ngokunqunywa; ningenzi kanjalo ezweni lakini. 25 Aniyikwamukela esandleni sowezizwe,
ninikele ngezinjalo zibe yisinkwa sikaNkulunkulu wenu, ngokuba ukonakala kwazo kukuzo,
zinobulima; aniyikwamukeleka ngazo.’" 26 UJehova wakhuluma kuMose, wathi: 27 "Nxa
kuzalwa inkunzi noma imvu noma imbuzi, iyakuhlala kunina izinsuku eziyisikhombisa; kusukela
osukwini lwesishiyagalombili nangasemuva iyakwamukelwa ibe ngumnikelo womlilo kuJehova.
28
Noma kuyinkomazi noma imvukazi, aniyikuyihlaba kanye nomntwana wayo ngalusuku lunye.
29
"Nxa nihlabela uJehova umhlatshelo wokubonga, niyakumhlabela ukuba namukeleke. 30
Uyakudliwa ngalolo suku, ningashiyi lutho lwawo kuze kuse; nginguJehova. 31 "Ngalokho
anogcina imiyalo yami, niyenze; nginguJehova. 32 Ningahlambalazi igama lami elingcwele;
kepha ngiyakungcweliswa phakathi kwabantwana bakwa-Israyeli; nginguJehova oningcwelisayo,
33
owanikhipha ezweni laseGibithe, ngibe nguNkulunkulu wenu; nginguJehova."

23
1
UJehova wakhuluma kuMose, wathi: 2 "Yisho kubantwana bakwa-Israyeli, uthi kubo: ‘Imikhosi
emisiweyo kaJehova eniyakuyimemezela ibe yimihlangano engcwele, yona iyimikhosi yami
emisiweyo. 3 "‘Umsebenzi uyakwenziwa izinsuku eziyisithupha; kepha ngosuku lwesikhombisa
kuyisabatha lokuphumula okuzothileyo, umhlangano ongcwele; ningasebenzi msebenzi;
kuyisabatha kuJehova ezindlini zenu zonke.
4
"‘Nansi imikhosi emisiweyo kaJehova, imihlangano engcwele eniyakuyimemezela ngezikhathi
zayo ezimisiweyo. 5 Ngenyanga yokuqala ngolweshumi nane lwenyanga kusihlwa kuyiphasika
likaJehova. 6 Ngosuku lweshumi nanhlanu lwaleyo nyanga kungumkhosi wesinkwa
esingenamvubelo kuJehova; niyakudla isinkwa esingenamvubelo izinsuku eziyisikhombisa. 7
Ngosuku lokuqala niyakuba nomhlangano ongcwele, ningasebenzi msebenzi. 8 Kepha
niyakunikela ngomnikelo womlilo kuJehova izinsuku eziyisikhombisa. Ngosuku lwesikhombisa
kungumhlangano ongcwele; ningasebenzi msebenzi.’" 9 UJehova wakhuluma kuMose, wathi: 10
"Yisho kubantwana bakwa-Israyeli, uthi kubo: ‘Nxa nifikile ezweni engininika lona, nivune
isivuno salo, anoletha kumpristi isithungu solibo lwesivuno senu; 11 yena asizulise isithungu
phambi kukaJehova ukuba samukelwe ngenxa yenu; ngakusasa emva kwesabatha umpristi
uyakusizulisa. 12 Ngalolo suku enizulisa ngalo isithungu, niyakunikela ngemvu yeduna
engenasici, enomnyaka munye, ibe ngumnikelo wokushiswa kuJehova. 13 Umnikelo wawo
wempuphu woba ngokweshumi okubili kwempuphu ecolekileyo, exovwe namafutha, umnikelo
womlilo kuJehova, ube yiphunga elimnandi, nomnikelo wawo wokuphuzwa woba ngokwesine
kwehini lewayini. 14 Aniyikudla isinkwa notshwele nezikhwebu ezintsha, kuze kufike lolo suku,
ningakalethi umnikelo kaNkulunkulu wenu; kuyisimiso esiphakade ezizukulwaneni zenu
ezindlini zenu zonke.
15
"‘Anozibalela kusukela kolwangakusasa emva kwesabatha, ngosuku enaletha ngalo isithungu
somnikelo wokuzuliswa, kuze kube ngamasabatha ayisikhombisa apheleleyo; 16 kuze kufike
olwangakusasa emva kwesabatha lesikhombisa anobala izinsuku ezingamashumi ayisihlanu,
ninikele ngomnikelo omusha wempuphu kuJehova. 17 Maniphume ezindlini zenu nezinkwa
ezimbili zokuzuliswa zokweshumi okubili kwempuphu ecolekileyo, ziphekwe nemvubelo, zibe
lulibo kuJehova. 18 Kanye nesinkwa niyakunikela ngezimvu eziyisikhombisa ezingenasici
zinomnyaka munye, neduna nezinqama ezimbili, zibe ngumnikelo wokushiswa kuJehova kanye
nomnikelo wazo wempuphu neminikelo yazo yokuphuzwa, umnikelo womlilo, ube yiphunga
elimnandi kuJehova. 19 Niyakunikela ngempongo ibe ngumnikelo wesono, nezimvu ezimbili
zamaduna ezinomnyaka munye, zibe ngumhlatshelo weminikelo yokuthula. 20 Umpristi
uyakuzizulisa kanye nesinkwa solibo zibe ngumnikelo wokuzuliswa phambi kukaJehova kanye
nezimvu ezimbili; ziyakuba ngcwele kuJehova, zibe ngezompristi. 21 Niyakumemezela ngalolo
suku, nibe nomhlangano ongcwele; ningasebenzi msebenzi; kuyisimiso esiphakade ezindlini zenu
zonke ezizukulwaneni zenu. 22 "‘Nxa nivuna isivuno sezwe lakini, awuyikuvuna ngokupheleleyo
emagumbini ensimu yakho, ungakhothozi umkhothozo wesivuno sakho; uwushiyele abampofu
nabafokazi; nginguJehova uNkulunkulu wakho.’"
23
UJehova wakhuluma kuMose, wathi: 24 "Yisho kubantwana bakwa-Israyeli, uthi: ‘Ngenyanga
yesikhombisa ngolokuqala lwenyanga anoba nokuphumula okuzothileyo, isikhumbuzo
ngokushaya amacilongo, umhlangano ongcwele. 25 Ningasebenzi msebenzi, ninikele ngomnikelo
womlilo kuJehova.’" 26 UJehova wakhuluma kuMose, wathi: 27 "Kepha ngolweshumi lwaleyo
nyanga yesikhombisa kulusuku lokubuyisana; anoba nomhlangano ongcwele, nithobise
imiphefumulo yenu, ninikele ngomnikelo womlilo kuJehova. 28 Ningasebenzi msebenzi ngalolo
suku, ngokuba kulusuku lokubuyisana ukunenzela ukubuyisana phambi kukaJehova uNkulunkulu
wenu. 29 Ngokuba yilowo nalowo muntu ongathotshiswa ngalolo suku uyakunqunywa kubantu
bakubo. 30 Yilowo nalowo muntu owenza umsebenzi othile ngalolo suku, lowo muntu
ngiyakumbhubhisa, angabikho kubantu bakubo. 31 Ningasebenzi msebenzi; kuyisimiso
esiphakade ezizukulwaneni zenu ezindlini zenu zonke. 32 Kuyakuba yisabatha lokuphumula
okuzothileyo kini, nithobise imiphefumulo yenu; ngolwesishiyagalolunye lwenyanga kusihlwa,
kusukela kusihlwa kuze kube kusihlwa, anogcina isabatha lenu."
33
UJehova wakhuluma kuMose, wathi: 34 "Yisho kubantwana bakwa-Israyeli, uthi: ‘Ngosuku
lweshumi nanhlanu lwaleyo nyanga yesikhombisa kungumkhosi wamadokodo izinsuku
eziyisikhombisa kuJehova. 35 Ngosuku lokuqala kuyakuba ngumhlangano ongcwele,
ningasebenzi msebenzi. 36 Izinsuku eziyisikhombisa niyakunikela ngomnikelo womlilo
kuJehova; ngosuku lwesishiyagalombili nibe nomhlangano ozothileyo, ninikele ngomnikelo
womlilo kuJehova; kungumhlangano wokugcina; ningasebenzi msebenzi. 37 "‘Le iyimikhosi
emisiweyo kaJehova eniyakuyimemezela ibe yimihlangano engcwele ukunikela ngomnikelo
womlilo kuJehova, umnikelo wokushiswa nomnikelo wempuphu, umhlatshelo neminikelo
yokuphuzwa, kube yilowo nalowo ngosuku lwawo, 38 ngaphandle kwamasabatha kaJehova,
nangaphandle kwezipho zenu, nangaphandle kwezithembiso zenu zonke, nangaphandle
kweminikelo yenu yonke yesihle eninikela ngayo kuJehova. 39 "‘Kepha ngosuku lweshumi
nanhlanu lwenyanga yesikhombisa, lapho senibuthile izithelo zezwe, anogcina umkhosi kaJehova
izinsuku eziyisikhombisa; ngosuku lokuqala makube ngukuphumula okuzothileyo, nangosuku
lwesishiyagalombili kube ngukuphumula okuzothileyo. 40 Ngosuku lokuqala anothabatha izithelo
zemithi emihle, namagatsha amasundu, nezingatsha zemithi edumbileyo, neminyezane yemifula,
nethabe phambi kukaJehova uNkulunkulu wenu izinsuku eziyisikhombisa. 41 Niyakuwugcina ube
ngumkhosi kuJehova izinsuku eziyisikhombisa ngomnyaka; kuyisimiso esiphakade
ezizukulwaneni zenu; niwugcine ngenyanga yesikhombisa. 42 Niyakuhlala emadokodweni
izinsuku eziyisikhombisa, bonke abangabokuzalwa kwa-Israyeli bahlale emadokodweni, 43 ukuze
izizukulwane zenu zazi ukuthi ngabahlalisa abantwana bakwa-Israyeli emadokodweni
ekubakhipheni kwami ezweni laseGibithe, nginguJehova uNkulunkulu wenu.’" 44 UMose
wabatshela-ke abantwana bakwa-Israyeli imikhosi emisiweyo kaJehova.
24
1
UJehova wakhuluma kuMose, wathi: 2 "Yala abantwana bakwa-Israyeli ukuba balethe kuwe
amafutha eminqumo acwengekileyo agxotshelwe ukukhanyisa, ukuba izibani zivuthe njalonjalo. 3
Ngaphandle kwesihenqo sobufakazi etendeni lokuhlangana u-Aroni uyakuzilungisa njalo phambi
kukaJehova, aqale kusihlwa kuze kuse; kuyakuba yisimiso esiphakade ezizukulwaneni zenu, 4
alungise njalo izibani othini olucwengekileyo phambi kukaJehova. 5 "Wothabatha impuphu
ecolekileyo, upheke ngayo amaqebelengwane ayishumi nambili, iqebelengwane linye libe
nokweshumi okubili. 6 Wowabeka izinqwaba ezimbili, ayisithupha abe senqwabeni inye etafuleni
elicwengekileyo phambi kukaJehova. 7 Uyakubeka inhlaka ecwengekileyo ezinqwabeni zombili,
ibe yisikhumbuzo esinkweni nomnikelo womlilo kuJehova. 8 Amasabatha ngamasabatha
uyakuzihlela phambi kukaJehova njalo; kungenxa yabantwana bakwa-Israyeli, kuyisivumelwano
esiphakade. 9 Ziyakuba ngezika-Aroni nezamadodana akhe, bazidlele endaweni engcwele,
ngokuba zingcwelengcwele, zingezakhe phakathi kweminikelo yomlilo kaJehova ngesimiso
esiphakade."
10
Indodana yowesifazane wakwa-Israyeli, uyise wayo engowaseGibithe, yaphuma yaya phakathi
kwabantwana bakwa-Israyeli; indodana yowesifazane wakwa-Israyeli nomuntu wakwa-Israyeli
baxabana ekamu; 11 indodana yowesifazane wakwa-Israyeli yahlambalaza iGama, yathuka;
yalethwa kuMose. Igama likanina lalinguShelomiti indodakazi kaDibiri, owesizwe sakwaDani. 12
Bayifaka etilongweni ukuba batshelwe ngomlomo kaJehova. 13 UJehova wakhuluma kuMose,
wathi: 14 "Mkhiphele ngaphandle kwekamu lowo othukile; bonke abamuzwa mababeke izandla
zabo ekhanda lakhe, inhlangano yonke imkhande ngamatshe. 15 Uyakukhuluma kubantwana
bakwa-Israyeli, uthi: ‘Yilowo nalowo oqalekisa uNkulunkulu wakhe uyakuthwala isono sakhe. 16
Ohlambalaza igama likaJehova wobulawa nokubulawa, yonke inhlangano imkhande
nokumkhanda ngamatshe; umfokazi noma owokuzalwa ekhaya, nxa ehlambalaza igama
likaJehova, wobulawa. 17 "‘Oshaya umuntu aze afe wobulawa nokubulawa. 18 Oshaya inkomo
ize ife uyakuyikhokha, kube ngukuphila ngokuphila. 19 Uma umuntu elimaza umakhelwane
wakhe, njengalokho enzile yena kuyakwenziwa kanjalo kuye, 20 kube ngukwaphuka
ngokwaphuka, neso ngeso, nezinyo ngezinyo; njengalokho elimazile umuntu, kanjalo
kuyakwenziwa kuye. 21 Obulala inkomo woyikhokha; obulala umuntu wobulawa. 22 Niyakuba
nomthetho munye kumfokazi nakowokuzalwa ekhaya; ngokuba nginguJehova uNkulunkulu
wenu.’" 23 UMose wakhuluma-ke kubantwana bakwa-Israyeli; bamkhiphela othukileyo
ngaphandle kwekamu, bamkhanda ngamatshe. Abantwana bakwa-Israyeli benza njengalokho
uJehova emyalile uMose.

25
1
UJehova wakhuluma kuMose entabeni yaseSinayi, wathi: 2 "Yisho kubantwana bakwa-Israyeli,
uthi kubo: ‘Nxa nifika ezweni engininika lona, izwe liyakumgcinela uJehova isabatha. 3
Iminyaka eyisithupha uyakulima insimu yakho, iminyaka eyisithupha uyakuthena isivini sakho,
ubuthe izithelo zaso, 4 kepha ngomnyaka wesikhombisa kuyakuba khona isabatha lokuphumula
okuzothileyo kwezwe, isabatha kuye uJehova; awuyikulima insimu yakho, ungatheni isivini
sakho. 5 Amakhikhizela esivuno sakho awuyikuwavuna, nezithelo zomvini wakho ongatheniwe
awuyikuzikha; kuyakuba ngumnyaka wokuphumula okuzothileyo kwezwe. 6 Isabatha lezwe
liyakuba ngukudla kwenu, okwakho nokwenceku yakho nokwencekukazi yakho nokomqashwa
wakho nokomfokazi wakho ogogobeleyo kuwe; 7 nakuzo izinkomo zakho nezilwane ezisezweni
konke ukuthela kwalo kuyakuba ngukudla.
8
"‘Uyakuzibalela amasabatha ayisikhombisa eminyaka, iminyaka eyisikhombisa iphindwe
kasikhombisa, kube kuwe izinsuku zamasabatha ayisikhombisa eminyaka, kube yiminyaka
engamashumi amane nesishiyagalolunye. 9 Uyakuthuma izwi lecilongo elizwakala kakhulu
ngolweshumi lwenyanga yesikhombisa; ngosuku lokubuyisana niyakuthuma izwi lecilongo
ezweni lonke lakini. 10 Niyakuwungcwelisa umnyaka wamashumi ayisihlanu, nimemezele
inkululeko ezweni lonke kubo bonke abakhileyo kulo; kuyakuba yijubili kini, nibuyele, kube
yilowo nalowo efeni lakhe, nibuyele, kube yilowo nalowo kwabomndeni wakhe. 11 Lo mnyaka
wamashumi ayisihlanu uyakuba yijubili kini; aniyikulima, ningavuni amakhikhizela awo,
ningakhi ngawo ezomvini ongatheniwe. 12 Ngokuba uyijubili; uyakuba ngcwele kini, nidle
izithelo zawo zasensimini. 13 "‘Ngalowo mnyaka wejubili niyakubuyela, kube yilowo nalowo
efeni lakhe. 14 "‘Uma uthengisa ngotho kumakhelwane wakho noma uthenga esandleni
somakhelwane wakho, ningadlani; 15 njengenani leminyaka esemva kwejubili uyakuthenga
kumakhelwane wakho nanjengenani leminyaka yezithelo uyakuthengisa kuwe. 16 Ngobuningi
beminyaka uyakwandisa intengo yalo nangobuncane beminyaka uyakunciphisa intengo yalo;
ngokuba uthengisa kuwe ngenani lezithelo. 17 Aniyikudlana, kepha uyakwesaba uNkulunkulu
wakho, ngokuba nginguJehova uNkulunkulu wakho. 18 "‘Ngalokho anozenza izimiso zami,
nigcine izahlulelo zami, nizenze, nihlale ezweni nilondekile. 19 Izwe liyakuthela izithelo zalo,
nidle nisuthe, nihlale kulo nilondekile. 20 Uma nisho ukuthi: "Siyakudlani ngomnyaka
wesikhombisa? Bheka, asiyikulima, asiyikubutha ukudla kwethu;" 21 khona ngiyakuyala isibusiso
sami sehlele phezu kwenu ngomnyaka wesithupha, uze uthele ukudla kweminyaka emithathu. 22
Niyakulima ngomnyaka wesishiyagalombili, nidle izithelo zikanyasa; uze ufike umnyaka
wesishiyagalolunye, kungene izithelo zawo, niyakudla unyasa.
23
"‘Akuyikuthengiswa ngezwe kuze kube phakade, ngokuba izwe lingelami, nina-ke
ningabafokazi nabagogobeleyo kimi. 24 Ezweni lonke lefa lenu niyakuvuma ukuhlengwa
kwezwe. 25 "‘Uma umfowenu eba mpofu, athengise ngefa lakhe, kuyakufika isihlobo sakhe,
sihlenge lona umfowabo athengisile ngalo. 26 Uma umuntu engenaye ongalihlenga, kodwa
ebeseba ngocebileyo, athole okwanele ukulihlenga, 27 makabale iminyaka selokhu kwathengiswa
ngalo, abuyisele okudluleleyo kulowo muntu athengisa kuye ngalo, aze abuyele efeni lakhe. 28
Uma engatholi amandla okuzibuyiselela lona, lelo athengise ngalo liyakusala esandleni
solithengileyo, uze ufike umnyaka wejubili; ngejubili liyakuphuma, yena abuyele efeni lakhe. 29
"‘Uma umuntu ethengisa ngendlu yokuhlala emzini onogange, angayihlenga ungakapheli
umnyaka selokhu wathengisa ngayo, ngokuba umnyaka wonke uyakuba nelungelo lokuyihlenga.
30
Uma ingahlengwanga umnyaka usuphelile, leyo ndlu esemzini onogange iyakuqiniswa ibe
ngeyakhe owayithenga kuze kube phakade ezizukulwaneni zakhe; ayiyikuphuma ngejubili. 31
Kepha izindlu zemizana engenalugange nxazonke ziyakubalwa kanye namasimu asemaphandleni;
zingahlengwa, ziphume ngejubili. 32 "‘Kodwa imizi yamaLevi, izindlu zemizi yefa lawo amaLevi
angazihlenga noma nini. 33 Uma umLevi engahlengi, indlu okwathengiswa ngayo nomuzi wefa
lakhe kuyakuphuma ngejubili, ngokuba izindlu zemizi yamaLevi ziyifa lawo phakathi
kwabantwana bakwa-Israyeli. 34 Izwe lamadlelo emizi yawo akunakuthengiswa ngalo, ngokuba
liyifa lawo kuze kube phakade. 35 "‘Uma umfowenu eba mpofu, engenamandla okukukhokhela,
uyakumsekela, ahlale nawe njengomfokazi nogogobeleyo. 36 Ungathathi kuye inzalo engafanele
nenzuzo, kepha wesabe uNkulunkulu wakho, ukuze umfowenu ahlale nawe. 37 Awuyikumnika
imali yakho ngenzalo, ungamuphi ukudla kwakho ngenzuzo. 38 NginguJehova uNkulukulu wenu
owanikhipha ezweni laseGibithe ukuninika izwe laseKhanani, ngibe nguNkulunkulu wenu.
39
"‘Uma umfowenu eba mpofu ekuwe, azithengise kuwe, awuyikumsebenzisa njengesigqila, 40
kepha abe njengomqashwa nogogobeleyo kuwe; uyakusebenza kuwe kuze kufike umnyaka
wejubili, 41 andukuba aphume kuwe, yena nabantwana bakhe kanye naye, abuyele kwabomndeni
wakhe, abuyele nasefeni lawoyise. 42 Ngokuba bayizinceku zami engazikhipha ezweni
laseGibithe; akuyikuthengiswa ngazo zibe yizigqila. 43 Awuyikubusa kalukhuni phezu kwakhe,
kepha wesabe uNkulunkulu wakho. 44 "‘Izigqila zakho nezigqilakazi zakho oyakuba nazo:
niyakuzithenga izigqila nezigqilakazi kwabezizwe abanizungezayo. 45 Futhi kubantwana
babafokazi abagogobeleyo kini, kubona niyakuthenga nakwabomndeni wabo abakini ababazalile
ezweni lakini, babe yifa lenu. 46 Niyakubenza ifa labantwana benu emva kwenu ukuba babe yifa
labo; niyakuthatha kubo izigqila zenu kuze kube phakade; kepha aniyikubusa kalukhuni phezu
kwabafowenu, abantwana bakwa-Israyeli, omunye phezu komunye. 47 "‘Uma umfokazi noma
ogogobeleyo kuwe eba ngocebileyo, umfowenu abe mpofu kuye, azithengise kumfokazi noma
kogogobeleyo kuwe noma kowohlanga lwabomndeni wabafokazi, 48 angahlengwa nxa
sekuthengisiwe ngaye; omunye wabafowabo angamhlenga; 49 noma uyisekazi noma indodana
kayisekazi angamhlenga; noma omunye owakubo owabomndeni wakhe angamhlenga; noma eba
ngocebileyo, angazihlenga yena. 50 Uyakubalisana nalowo owamthengayo, aqale ngomnyaka
owazithengisa kuye ngawo, kuze kube ngumnyaka wejubili; imali yentengiso iyakuba njengenani
leminyaka; uyakuba naye njengesikhathi somqashwa. 51 Uma isasele iminyaka eminingi,
njengayo uyakubuyisa intengo yokuhlengwa kwakhe emalini athengwa ngayo. 52 Uma isasele
iminyaka eyingcosana kuze kufike umnyaka wejubili, uyakubalisana naye; njengeminyaka yakhe
uyakubuyisa imali yokuhlengwa kwakhe. 53 Njengenceku eqashwa iminyaka ngeminyaka
uyakuba naye; akayikubusa kalukhuni phezu kwakhe emehlweni akho. 54 "‘Uma
engahlengwanga ngalezo zindlela, uyakuphuma ngomnyaka wejubili, yena nabantwana bakhe
kanye naye. 55 Ngokuba abantwana bakwa-Israyeli bayizinceku kimi; bayizinceku zami
engazikhipha ezweni laseGibithe; nginguJehova uNkulunkulu wenu.

26
1
"‘Ningenzi izithombe, ningamisi izithombe ezibaziweyo noma insika; ningabeki itshe
elinemifanekiso ezweni lakini ukukhothamela kulo; ngokuba nginguJehova uNkulunkulu wenu. 2
"‘Anogcina amasabatha ami, nihloniphe indlu yami engcwele; nginguJehova. 3 "‘Uma nihamba
ngezimiso zami, nigcine imiyalo yami, niyenze, 4 ngiyakuninika imvula ngesikhathi sayo, izwe
lithele ukudla kwalo, imithi yasendle ithele izithelo zayo. 5 Ukubhula kwenu kuyakufinyelela
ekuvunweni kwemivini, ukuvunwa kwemivini kuyakufinyelela esikhathini sokulima; niyakudla
isinkwa senu, nisuthe, nihlale ezweni lakini nilondekile. 6 "‘Ngiyakunika ukuthula ezweni, nilale
phansi ningesatshiswa muntu; ngiyakuqothula izilwane ezimbi ezweni, nenkemba ayiyikudabula
ezweni lakini. 7 Niyakuxosha izitha zenu, ziwe phambi kwenu ngenkemba. 8 Abayisihlanu kini
bayakuxosha abayikhulu, nabayikhulu kini bayakuxosha izinkulungwane eziyishumi, izitha zenu
ziwe phambi kwenu ngenkemba. 9 "‘Ngiyakuninaka, nginenze ukuba nizale, nande, ngimise
isivumelwano sami nani. 10 Niyakudla unyasa omdala, nikhiphe unyasa ngenxa yokusha. 11
Ngiyakubeka itabernakele lami phakathi kwenu, umphefumulo wami awuyikunengwa yinina. 12
Ngiyakuhamba phakathi kwenu, ngibe nguNkulunkulu wenu, nibe ngabantu bami. 13
NginguJehova uNkulunkulu wenu owanikhipha ezweni laseGibithe ukuba ningabi yizigqila zabo;
ngaphulile izikeyi zejoka lenu, ngenza ukuba nihambe niluleme.
14
"‘Kepha uma ningalaleli, ningayenzi yonke le miyalo, 15 uma nilahla izimiso zami, uma
umphefumulo wenu unengwa yizahlulelo zami, ukuze ningayenzi yonke imiyalo yami, kepha
naphule isivumelwano sami, 16 nami ngiyakwenza lokhu kini; ngiyakunehlisela ingebhe nesifuba
nomkhuhlane oyakuqeda amehlo, udangalise umphefumulo; niyakuhlwanyela ngeze imbewu
yenu, ngokuba izitha zenu ziyakuyidla. 17 Ngiyakubeka ubuso bami bumelane nani, nibulawe
phambi kwezitha zenu; abanizondayo bayakubusa phezu kwenu, nibaleke ningaxoshwa muntu. 18
"‘Kepha uma ningangilaleli nangalezo zinto, ngiyakubuye nginishaye kasikhombisa ngezono
zenu. 19 Ngiyakwaphula ukuzidla kwamandla enu, ngenze izulu lenu libe njengensimbi,
nomhlabathi wenu ube njengethusi. 20 Amandla enu ayakuchithwa ngeze, ngokuba izwe lakini
aliyikuthela ukudla kwalo, nemithi yezwe ayiyikuthela izithelo zayo. 21 "‘Uma nihamba
niphambene nami, ningangilaleli, ngiyakubuye nginehlisele izinhlupheko ziphindwe
kasikhombisa njengezono zenu. 22 Ngiyakuthuma phakathi kwenu izilo zasendle eziyakunaphuca
abantwana benu, zibulale izinkomo zenu, zininciphise, izindlela zenu zibe yihlane. 23 "‘Kepha
uma ningaxwayiswa yimi ngalezo zinto, kodwa nihamba niphambene nami, 24 nami
ngiyakuhamba ngiphambene nani, nginishaye, yebo, mina, kasikhombisa ngezono zenu. 25
Ngiyakunehlisela inkemba yempindiselo eyakuphindisela isivumelwano sami; senibuthelwe
emizini yenu, ngiyakuthuma isifo phakathi kwenu, ninikelwe esandleni sesitha. 26 Nxa ngaphula
uzime lwesinkwa, abesifazane abayishumi bayakupheka isinkwa sakho eziko linye, babuyise
isinkwa senu ngesisindo; niyakudla ningasuthi. 27 "‘Kepha uma ningangilaleli nangazo zonke
lezo zinto, kodwa nihamba niphambene nami, 28 nami ngiyakuhamba ngiphambene nani
ngokufutheka, ngikushaye kasikhombisa ngezono zakho. 29 Niyakudla inyama yamadodana enu,
nenyama yamadodakazi enu niyakuyidla. 30 Ngiyakuchitha izindawo zenu eziphakemeyo,
nginqume ama-altare enu empepho, ngilahle izidumbu zenu phezu kwezidumbu zezithombe
zenu; umphefumulo wami uyakunengwa yinina. 31 Ngiyakuyenza imizi yenu ibe yizwekufa,
ngizenze izindlu zenu ezingcwele zibe yincithakalo; angisayikuhogela unqambothi lwamaphunga
lwenu olumnandi. 32 Ngiyakulenza izwe libe yincithakalo; izitha zenu ezihlala kulo
ziyakumangala ngakho. 33 Nina-ke ngiyakunihlakazela ezizweni, ngihoshe inkemba emva kwenu,
izwe lakini libe yincithakalo, nemizi yenu ibe yizwekufa. 34 Khona izwe liyakuthokoza
ngamasabatha alo ngesikhathi lihlezi lichithekile, nina nisekhona ezweni lezitha zenu; khona izwe
liyakuphumula, lithokoze ngamasabatha alo. 35 Ngesikhathi lihlezi lichithekile liyakuphumula,
lokho kuphumula elalingenakho ngamasabatha enu, lapho nanisahlezi kulo. 36 "‘Abaseleyo bakini
ngiyakubehlisela itwetwe ezinhliziyweni zabo emazweni ezitha zabo; ubuhashahasha beqabunga
elinyakaziswayo buyakubaxosha, babaleke njengalokhu umuntu ebalekela inkemba, bawe
bengaxoshwa muntu. 37 Bayakukhubeka, omunye phezu komunye, kungathi kuphambi
kwenkemba, bengaxoshwa muntu; aniyikuba namandla okuma phambi kwezitha zenu. 38
Niyakubhubha phakathi kwezizwe, izwe lezitha zenu linidle. 39 Abaseleyo bakini bayakonda
ngobubi babo emazweni ezitha zenu, nangobubi bawoyise bayakonda kanye nabo.
40
"‘Bayakuvuma ububi babo nobubi bawoyise ngeziphambeko zabo abaphambeka ngazo kimi,
nokuthi njengokuba bahamba bephambene nami, 41 nami ngahamba ngiphambene nabo,
ngabayisa ezweni lezitha zabo; uma-ke izinhliziyo zabo ezingasokile zithobeka, besamukela
isijeziso sobubi babo, 42 ngiyakukhumbula isivumelwano sami noJakobe; nesivumelwano sami
no-Isaka, nesivumelwano sami no-Abrahama ngiyakusikhumbula, ngilikhumbule nezwe. 43 Izwe
liyakushiywa yibo, lithokoze ngamasabatha alo, lisahlezi lichithekile, lingenabo; bayakwamukela
isijeziso sobubi babo, ngokuba, yebo, ngokuba balahla izahlulelo zami nangokuba umphefumulo
wabo wanengwa yizimiso zami. 44 Kepha uma kunjalo, sebekhona ezweni lezitha zabo,
angiyikubalahla, nginganengwa yibo, ukuze ngibaqothule, ngisaphule isivumelwano sami nabo,
ngokuba nginguJehova uNkulunkulu wabo; 45 kepha ngenxa yabo ngiyakukhumbula
isivumelwano sawokhokho babo engabakhipha ezweni laseGibithe emehlweni ezizwe ukuba
ngibe nguNkulunkulu wabo; nginguJehova.’" 46 Lezo ziyizimiso nezahlulelo nemithetho
akwenzayo uJehova phakathi kwakhe nabantwana bakwa-Israyeli entabeni yaseSinayi ngesandla
sikaMose.
27
1
UJehova wakhuluma kuMose, wathi: 2 "Yisho kubantwana bakwa-Israyeli, uthi kubo: ‘Nxa
umuntu enza isithembiso esithile, lapho uyakulinganisa abantu kuJehova, 3 ukulinganisa kwakho
owesilisa, kusukela koneminyaka engamashumi amabili kuze kube koneminyaka engamashumi
ayisithupha, kuyakuba ngamashekeli angamashumi ayisihlanu esiliva ngokweshekeli lendlu
engcwele. 4 Uma kungowesifazane, ukulinganisa kwakho kuyakuba ngamashekeli angamashumi
amathathu. 5 Uma kusukela koneminyaka eyisihlanu kuze kube koneminyaka engamashumi
amabili, ukulinganisa kwakho owesilisa kuyakuba ngamashekeli angamashumi amabili,
nowesifazane amashekeli ayishumi. 6 Uma kusukela konenyanga kuze kube koneminyaka
eyisihlanu, ukulinganisa kwakho owesilisa kuyakuba ngamashekeli ayisihlanu esiliva,
nokulinganisa kwakho owesifazane kuyakuba ngamashekeli amathathu esiliva. 7 Uma kusukela
koneminyaka engamashuni ayisithupha kuya phezulu, nalapho kungowesilisa, ukulinganisa
kwakho kuyakuba ngamashekeli ayishumi nanhlanu, nowesifazane kube ngamashekeli ayishumi.
8
Kepha uma empofu kunokulinganisa kwakho, uyakubekwa phambi kompristi, umpristi
amlinganise; umpristi uyakumlinganisa ngokwamandla akhe owathembisayo. 9 "‘Uma
kuyizilwane okunganikelwa ngazo kuJehova, zonke ezinjalo umuntu anikela ngazo kuJehova
ziyakuba ngcwele. 10 Akayikuziphambanisa, angazenani ngezinye, esihle ngesibi nesibi ngesihle;
uma enana nokwenana isilwane ngesilwane, sona leso kanye naso okwenanwa ngaso ziyakuba
ngcwele. 11 Uma kuyisilwane esingcolileyo okunganikelwa ngaso kuJehova, uyakusibeka
isilwane phambi kompristi, 12 umpristi asilinganise, noma sihle noma sibi; njengalokho wena
mpristi ulinganisa, kuyakuba njalo. 13 Kepha uma ethanda ngempela ukusihlenga, uyakuthasisela
okwesihlanu kwaso kukho ukulinganisa kwakho.
14
"‘Nxa umuntu eyakungcwelisa indlu yakhe ibe ngcwele kuJehova, umpristi uyakuyilinganisa
uma inhle noma imbi; njengalokhu umpristi eyilinganisa, kuyakuba njalo. 15 Uma
oyingcwelisayo ethanda ukuyihlenga indlu yakhe, uyakuthasisela okwesihlanu kwemali
yokulinganisa kwakho, ibe ngeyakhe. 16 "‘Uma umuntu eyakumngcwelisela uJehova inxenye
yensimu yefa lakhe, ukulinganisa kwakho kuyakuba njengokuhlwanyelwa kwayo,
ukuhlwanyelwa kwehomere lebhali kube ngamashekeli angamashumi ayisihlanu esiliva. 17 Uma
engcwelisa insimu yakhe kusukela emnyakeni wejubili, iyakuma ngokulinganisa kwakho. 18
Kepha uma ungcwelisa insimu emva kwejubili, umpristi uyakumbalela imali ngeminyaka eseleyo
kuze kufike umnyaka wejubili, kuncishiswe ukulinganisa kwakho. 19 Uma ongcwelisa insimu
ethanda ngempela ukuyihlenga, uyakuthasisela kuyo okwesihlanu kwemali yokulinganisa
kwakho, iqiniswe kuye. 20 Uma engahlengi insimu, noma ethengisile ngensimu komunye
umuntu, ayisayikuhlengwa. 21 Kepha insimu ekuphumeni kwayo ngejubili iyakuba ngcwele
kuJehova njengensimu eyahlukaniswayo; iyakuba yifa lompristi. 22 "‘Uma engcwelisela uJehova
insimu ayithengileyo, engesiyo insimu yefa lakhe, 23 umpristi uyakumbalela imali yokulinganisa
kwakho kuze kufike umnyaka wejubili, anike ukulinganisa kwakho ngalolo suku kube yinto
engcwele kuJehova. 24 Ngomnyaka wejubili insimu iyakubuyela kuye eyathengwa kuye, yebo,
kuye olifa lensimu lingelakhe. 25 Konke ukulinganisa kwakho kuyakuba ngokweshekeli lendlu
engcwele; amagera angamashumi amabili ayakuba yishekeli.
26
"‘Kepha izibulo lezilwane elenziwe libe yizibulo kuJehova aliyikungcweliswa muntu; noma
liyinkabi noma liyimvu, lingelikaJehova. 27 Uma kungelesilwane esingcolileyo, uyakulihlenga
ngokulinganisa kwakho, athasisele kukho okwesihlanu kwakho; uma lingahlengwa,
kuyakuthengiswa ngalo ngokulinganisa kwakho. 28 "‘Nokho into yonke eyahlukaniswa, umuntu
ayahlukanisela uJehova kukho konke anakho, noma abantu, noma izilwane, noma insimu yefa
lakhe, akuyikuthengiswa ngayo, ingahlengwa; konke okwahlukanisiwe kungcwelengcwele
kuJehova. 29 "‘Akukho muntu owaqalekiswayo, owaqalekiswa kubantu, ongahlengwa; wobulawa
nokubulawa. 30 "‘Nokweshumi konke kwezwe, okwembewu yezwe noma okwezithelo zemithi,
kungokukaJehova; kungcwele kuJehova. 31 Uma umuntu ethanda ukuhlenga okuthile
okokweshumi kwakhe, uyakuthasisela kukho okwesihlanu kwakho. 32 Konke okweshumi
kwezinkomo noma okwezimvu, zonke ezidlula phansi kwentonga, okweshumi kuyakuba ngcwele
kuJehova. 33 Akayikuhlola, uma kuhle noma kubi, angakwenani ngokunye; kepha uma ngempela
ekwenana ngokunye, lokhu nalokho akwenana ngakho kuyakuba ngcwele; akuyikuhlengwa.’" 34
Leyo iyimiyalo uJehova ayala ngayo uMose ngabantwana bakwa-Israyeli entabeni yaseSinayi.
 NUMBERS
1
1
UJehova wakhuluma kuMose ehlane laseSinayi etendeni lokuhlangana ngolokuqala lwenyanga
yesibili ngomnyaka wesibili emva kokuphuma kwabo eGibithe, wathi: 2 "Balani umumo
wenhlangano yonke yabantwana bakwa-Israyeli ngemindeni yabo nangezindlu zawoyise
njengokomumo wamagama abo, bonke abesilisa ngezinhloko zabo; 3 kusukela kwabaneminyaka
engamashumi amabili kuya phezulu, bonke abakwa-Israyeli abangaphuma impi, wena no-Aroni
anobabala ngamabandla abo. 4 Kanye nani kuzakuba khona indoda ibe nye kuleso naleso sizwe,
yileyo naleyo ibe yinhloko yendlu kayise. 5 Lawa angamagama amadoda ayakuma nani:
kwaRubeni: u-Elisuri indodana kaShedewuri. 6 KwaSimeyoni: uShelumiyeli indodana
kaSurishadayi. 7 KwaJuda: uNaheshoni indodana ka-Aminadaba. 8 Kwa-Isakare: uNethaneli
indodana kaSuwari. 9 KwaZebuloni: u-Eliyabe indodana kaHeloni. 10 Kubantwana bakwaJosefa:
kwa-Efrayimi: u-Elishama indodana ka-Amihudi; kwaManase: uGamaliyeli indodana kaPedasuri.
11
KwaBenjamini: u-Abidani indodana kaGideyoni. 12 KwaDani: u-Ahiyezeri indodana ka-
Amishadayi. 13 Kwa-Asheri: uPagiyeli indodana ka-Okirani. 14 KwaGadi: u-Eliyasafa indodana
kaDehuweli. 15 KwaNafetali: u-Ahira indodana ka-Enani." 16 Yilabo ababebizwa enhlanganweni,
izikhulu zezizwe zawoyise; babe yizinhloko zemizi yakwa-Israyeli.
17
OMose no-Aroni base bethatha lawo madoda aseshiwo ngamagama. 18 Babutha inhlangano
yonke ngolokuqala lwenyanga yesibili, basho okhokho babo ngemindeni yabo nangezindlu
zawoyise njengokomumo wamagama, kusukela kwabaneminyaka engamashumi amabili kuya
phezulu, ngezinhloko zabo. 19 Njengalokho uJehova eyalile uMose, wababala kanjalo ehlane
laseSinayi. 20 Abantwana bakwaRubeni, izibulo lika-Israyeli, izizukulwane zabo ngemindeni
yabo nangezindlu zawoyise njengokomumo wamagama, ngezinhloko zabo, bonke abesilisa
kusukela kwabaneminyaka engamashumi amabili kuya phezulu, bonke abangaphuma impi: 21
labo ababalwayo kubo, abesizwe sakwaRubeni, babe yizinkulungwane ezingamashumi amane
nesithupha namakhulu ayisihlanu. 22 Kubantwana bakwaSimeyoni, izizukulwane zabo
ngemindeni yabo nangezindlu zawoyise, labo ababalwayo kubo njengokomumo wamagama,
ngezinhloko zabo, bonke abesilisa kusukela kwabaneminyaka engamashumi amabili kuya
phezulu, bonke abangaphuma impi: 23 labo ababalwayo kubo, abesizwe sakwaSimeyoni, babe
yizinkulungwane ezingamashumi ayisihlanu nesishiyagalolunye namakhulu amathathu. 24
Kubantwana bakwaGadi, izizukulwane zabo ngemindeni yabo nangezindlu zawoyise
njengokomumo wamagama, kusukela kwabaneminyaka engamashumi amabili kuya phezulu,
bonke abangaphuma impi: 25 labo ababalwayo kubo, abesizwe sakwaGadi, babe
yizinkulungwane ezingamashumi amane nanhlanu namakhulu ayisithupha namashumi ayisihlanu.
26
Kubantwana bakwaJuda, izizukulwane zabo ngemindeni yabo nangezindlu zawoyise
njengokomumo wamagama, kusukela kwabaneminyaka engamashumi amabili kuya phezulu,
bonke abangaphuma impi: 27 labo ababalwayo kubo, abesizwe sakwaJuda, babe yizinkulungwane
ezingamashumi ayisikhombisa nane namakhulu ayisithupha. 28 Kubantwana bakwa-Isakare,
izizukulwane zabo ngemindeni yabo nangezindlu zawoyise njengokomumo wamagama, kusukela
kwabaneminyaka engamashumi amabili kuya phezulu, bonke abangaphuma impi: 29 labo
ababalwayo kubo, abesizwe sakwa-Isakare, babe yizinkulungwane ezingamashumi ayisihlanu
nane namakhulu amane. 30 Kubantwana bakwaZebuloni, izizukulwane zabo ngemindeni yabo
nangezindlu zawoyise njengokomumo wamagama, kusukela kwabaneminyaka engamashumi
amabili kuya phezulu, bonke abangaphuma impi: 31 labo ababalwayo kubo, abesizwe
sakwaZebuloni, babe yizinkulungwane ezingamashumi ayisihlanu nesikhombisa namakhulu
amane. 32 Kubantwana bakwaJosefa, okungukuthi kubantwana bakwa-Efrayimi, izizukulwane
zabo ngemindeni yabo nangezindlu zawoyise njengokomumo wamagama, kusukela
kwabaneminyaka engamashumi amabili, bonke abangaphuma impi: 33 labo ababalwayo kubo,
abesizwe sakwa-Efrayimi, babe yizinkulungwane ezingamashumi amane namakhulu ayisihlanu.
34
Kubantwana bakwaManase, izizukulwane zabo ngemindeni yabo nangezindlu zawoyise
njengokomumo wamagama, kusukela kwabaneminyaka engamashumi amabili kuya phezulu,
bonke abangaphuma impi: 35 labo ababalwayo kubo, abesizwe sakwaManase, babe
yizinkulungwane ezingamashumi amathathu nambili namakhulu amabili. 36 Kubantwana
bakwaBenjamini, izizukulwane zabo ngemindeni yabo nangezindlu zawoyise njengokomumo
wamagama, kusukela kwabaneminyaka engamashumi amabili kuya phezulu, bonke abangaphuma
impi: 37 labo ababalwayo kubo, abesizwe sakwaBenjamini, babe yizinkulungwane
ezingamashumi amathathu nanhlanu namakhulu amane. 38 Kubantwana bakwaDani,
izizukulwane zabo ngemindeni yabo nangezindlu zawoyise njengokomumo wamagama, kusukela
kwabaneminyaka engamashumi amabili kuya phezulu, bonke abangaphuma impi: 39 labo
ababalwayo kubo, abesizwe sakwaDani, babe yizinkulungwane ezingamashumi ayisithupha
nambili namakhulu ayisikhombisa. 40 Kubantwana bakwa-Asheri, izizukulwane zabo ngemindeni
yabo nangezindlu zawoyise njengokomumo wamagama, kusukela kwabaneminyaka
engamashumi amabili kuya phezulu, bonke abangaphuma impi: 41 labo ababalwayo kubo,
abesizwe sakwa-Asheri, babe yizinkulungwane ezingamashumi amane nanye namakhulu
ayisihlanu. 42 Kubantwana bakwaNafetali, izizukulwane zabo ngemindeni yabo nangezindlu
zawoyise njengokomumo wamagama, kusukela kwabeneminyaka engamashumi amabili kuya
phezulu, bonke abangaphuma impi: 43 labo ababalwayo kubo, abesizwe sakwaNafetali, babe
yizinkulungwane ezingamashumi ayisihlanu nantathu namakhulu amane.
44
Yilabo ababalwayo, ababalwa nguMose nangu-Aroni kanye nezikhulu zakwa-Israyeli,
zingamadoda ayishumi nambili, kwaba yileyo naleyo yamela indlu kayise. 45 Bonke ababalwayo
babantwana bakwa-Israyeli ngezindlu zawoyise kusukela kwabaneminyaka engamashumi amabili
kuya phezulu, bonke abakwa-Israyeli abangaphuma impi, 46 bonke ababalwayo babe
yizinkulungwane ezingamakhulu ayisithupha nantathu namakhulu ayisihlanu namashumi
ayisihlanu.
47
Kepha amaLevi ngokwesizwe sawoyise awabalwanga phakathi kwabo. 48 Ngokuba uJehova
wakhuluma kuMose, wathi: 49 "Isizwe sakwaLevi kuphela awuyikusibala, ungabali umumo waso
phakathi kwabantwana bakwa-Israyeli, 50 kepha beka amaLevi phezu kwetabernakele lobufakazi,
naphezu kwazo zonke izimpahla zalo, nakho konke okwalo; ayakuthwala itabernakele nayo
yonke impahla yalo; ayakukhonza kulo, amise alihaqe. 51 Ekusukeni kwetabernakele amaLevi
ayakulisusa, ekumisweni kwalo amaLevi alimise; umfokazi osondelayo uyakubulawa. 52
Abantwana bakwa-Israyeli bayakumisa amatende abo, kube yilowo nalowo ekamu labo, yilowo
nalowo ngasebhaneleni labo, ngamabandla abo. 53 Kepha amaLevi ayakumisa nxazonke
zetabernakele lobufakazi, ukuze kungabikho lulaka phezu kwenhlangano yabantwana bakwa-
Israyeli, amaLevi agcine izimfanelo zetabernakele lobufakazi." 54 Abantwana bakwa-Israyeli
benze njalo; benza kukho konke njengalokho uJehova emyalile uMose.

2
1
UJehova wakhuluma kuMose naku-Aroni, wathi: 2 "Abantwana bakwa-Israyeli bayakumisa,
kube yilowo nalowo ngasebhaneleni lakhe ngasezibonisweni zezindlu zawoyise; bayakumisa
nxazonke maqondana netende lokuhlangana."
3
Abamisa ngasempumalanga ngasekuphumeni kwelanga bayakuba ngabebhanela lekamu
lakwaJuda ngamabandla abo; isikhulu sabantwana bakwaJuda sibe nguNaheshoni indodana ka-
Aminadaba. 4 Ibandla lakhe nalabo ababalwayo kubo babe yizinkulungwane ezingamashumi
ayisikhombisa nane namakhulu ayisithupha. 5 Abamisa eceleni kwakhe bayakuba yisizwe sakwa-
Isakare; isikhulu sabantwana bakwa-Isakare siyakuba nguNethaneli indodana kaSuwari. 6 Ibandla
lakhe nalabo ababalwayo kulo babe yizinkulungwane ezingamashumi ayisihlanu nane namakhulu
amane. 7 Isizwe sakwaZebuloni: isikhulu sabantwana bakwaZebuloni siyakuba ngu-Eliyabe
indodana kaHeloni. 8 Ibandla lakhe nalabo ababalwayo kulo babe yizinkulungwane
ezingamashumi ayisihlanu nesikhombisa namakhulu amane. 9 Bonke ababalwayo bekamu
lakwaJuda babe yizinkulungwane eziyikhulu namashumi ayisishiyagalombili nesithupha
namakhulu amane ngamabandla abo. Labo bayakusuka kuqala. 10 Ibhanela lekamu lakwaRubeni
liyakuba ngaseningizimu ngamabandla abo; isikhulu sabantwana bakwaRubeni siyakuba ngu-
Elisuri indodana kaShedewuri. 11 Ibandla lakhe nalabo ababalwayo kulo babe yizinkulungwane
ezingamashumi amane nesithupha namakhulu ayisihlanu. 12 Abamisa eceleni kwakhe bayakuba
yisizwe sakwaSimeyoni; isikhulu sabantwana bakwaSimeyoni siyakuba nguShelumiyeli
indodana kaSurishadayi. 13 Ibandla lakhe nalabo ababalwayo kubo babe yizinkulungwane
ezingamashumi ayisihlanu nesishiyagalolunye namakhulu amathathu. 14 Nesizwe sakwaGadi:
isikhulu sabantwana bakwaGadi siyakuba ngu-Eliyasafa indodana kaRehuweli. 15 Ibandla lakhe
nalabo ababalwayo kubo babe yizinkulungwane ezingamashumi amane nanhlanu namakhulu
ayisithupha namashumi ayisihlanu. 16 Bonke ababalwayo bekamu lakwaRubeni babe
yizinkulungwane eziyikhulu namashumi ayisihlanu nanye namakhulu amane namashumi
ayisihlanu ngamabandla abo. Labo bayakusuka babe ngabesibili. 17 Itende lokuhlangana
liyakusuka kanye nekamu lamaLevi, liphakathi kwamakamu; njengalokhu bemisa, kanjalo
bayakusuka, kube yilowo nalowo muntu endaweni yakhe, ngamabhanela abo. 18 Ibhanela lekamu
lakwa-Efrayimi liyakuba ngasentshonalanga ngamabandla abo; isikhulu sabantwana bakwa-
Efrayimi siyakuba ngu-Elishama indodana ka-Amihudi. 19 Ibandla lakhe nalabo ababalwayo
kubo babe yizinkulungwane ezingamashumi amane namakhulu ayisihlanu. 20 Eceleni kwakhe
kuyakuba khona isizwe sakwaManase; isikhulu sabantwana bakwaManase siyakuba
nguGamaliyeli indodana kaPedasuri. 21 Ibandla lakhe nalabo ababalwayo kubo babe
yizinkulungwane ezingamashumi amathathu nambili namakhulu amabili. 22 Nesizwe
sakwaBenjamini; isikhulu sabantwana bakwaBenjamini siyakuba ngu-Abidani indodana
kaGideyoni. 23 Ibandla lakhe nalabo ababalwayo kubo babe yizinkulungwane ezingamashumi
amathathu nanhlanu namakhulu amane. 24 Bonke ababalwayo bekamu lakwa-Efrayimi babe
yizinkulungwane eziyikhulu nesishiyagalombili nekhulu ngamabandla abo. Labo bayakusuka
babe ngabesithathu. 25 Ibhanela lekamu lakwaDani liyakuba ngasenyakatho ngamabandla abo;
isikhulu sabantwana bakwaDani siyakuba ngu-Ahiyezeri indodana ka-Amishadayi. 26 Ibandla
lakhe nalabo ababalwayo kubo babe yizinkulungwane ezingamashumi ayisithupha nambili
namakhulu ayisikhombisa. 27 Abamisa eceleni kwakhe bayakuba yisizwe sakwa-Asheri; isikhulu
sabantwana bakwa-Asheri siyakuba nguPagiyeli indodana ka-Okirani. 28 Ibandla lakhe nalabo
ababalwayo kubo babe yizinkulungwane ezingamashumi amane nanye namakhulu ayisihlanu. 29
Nesizwe sakwaNafetali: isikhulu sabantwana bakwaNafetali siyakuba ngu-Ahira indodana ka-
Enani. 30 Ibandla lakhe nalabo ababalwayo kubo babe yizinkulungwane ezingamashumi
ayisihlanu nantathu namakhulu amane. 31 Bonke ababalwayo bekamu lakwaDani babe
yizinkulungwane eziyikhulu namashumi ayisihlanu nesikhombisa namakhulu ayisithupha. Labo
bayakusuka babe ngabokugcina namabhanela abo. 32 Yilabo ababalwayo kubantwana bakwa-
Israyeli ngezindlu zawoyise; bonke ababalwayo bamakamu ngamabandla abo babe
yizinkulungwane ezingamakhulu ayisithupha nantathu namakhulu ayisihlanu namashumi
ayisihlanu. 33 Kepha amaLevi ayengabalwa phakathi kwabantwana bakwa-Israyeli, njengalokho
uJehova emyalile uMose. 34 Benze njalo-ke abantwana bakwa-Israyeli: njengakho konke uJehova
amyale ngakho uMose, kanjalo bamisa ngasemabhaneleni abo, kanjalo basuka, kwaba yilowo
nalowo ngemindeni yabo nangezindlu zawoyise.

3
1
Lezi ziyizizukulwane zika-Aroni nezikaMose ngalolo suku uJehova akhuluma ngalo kuMose
entabeni yaseSinayi. 2 Lawa angamagama amadodana ka-Aroni: uNadabi izibulo, no-Abihu, no-
Eleyazare, no-Itamari. 3 Yilawo angamagama amadodana ka-Aroni, abapristi abagcotshiweyo,
abahlukaniselwa ukukhonza esikhundleni sobupristi. 4 ONadabi no-Abihu bafa phambi
kukaJehova, benikela ngomlilo ongafanele ebusweni bukaJehova ehlane laseSinayi;
babengenabantwana. Kwase kukhonza o-Eleyazare no-Itamari esikhundleni sobupristi ebusweni
buka-Aroni uyise. 5 UJehova wakhuluma kuMose, wathi: 6 "Sondeza isizwe sakwaLevi, usimise
phambi kuka-Aroni, umpristi, ukuba simkhonze. 7 Bayakugcina izimfanelo zakho nezimfanelo
zenhlangano yonke phambi kwetende lokuhlangana ukwenza inkonzo yetabernakele. 8
Bayakugcina yonke impahla yetende lokuhlangana nezimfanelo zabantwana bakwa-Israyeli
ukwenza inkonzo yetabernakele. 9 Uyakunikela amaLevi ku-Aroni nakumadodana akhe;
ayanikelwa ngempela kuye, evela kubantwana bakwa-Israyeli. 10 Uyakumisa u-Aroni
namadodana akhe, bagcine ubupristi babo; umfokazi osondelayo uyakubulawa." 11 UJehova
wakhuluma kuMose, wathi: 12 "Mina ngikhiphile amaLevi phakathi kwabantwana bakwa-Israyeli
esikhundleni samazibulo onke avula isizalo phakathi kwabantwana bakwa-Israyeli; amaLevi
ayakuba ngawami. 13 Ngokuba onke amazibulo angawami; ngalolo suku engabulala ngalo onke
amazibulo ezweni laseGibithe ngazingcwelisela amazibulo onke kwa-Israyeli, awabantu
nawezilwane; ayakuba ngawami; nginguJehova."
14
UJehova wakhuluma kuMose ehlane laseSinayi, wathi: 15 "Bala abantwana bakwaLevi
ngezindlu zawoyise nangemindeni yabo; uyakubala bonke abesilisa kusukela kwabanenyanga
kuya phezulu." 16 UMose wababala njengezwi likaJehova, njengalokho wayalwa. 17 Lawa
angamadodana kaLevi ngamagama awo: oGereshoni, noKohati, noMerari. 18 Lawa angamagama
amadodana kaGereshoni ngemindeni yawo: oLibini noShimeyi. 19 Namadodana kaKohati
ngemindeni yawo: o-Amramu, noJisihari, noHebroni, no-Uziyeli. 20 Namadodana kaMerari
ngemindeni yawo: oMaheli noMushi. Leyo iyimindeni yamaLevi ngezindlu zawoyise. 21
KwaGereshoni kwavela umndeni wamaLibini nomndeni wamaShimeyi; yileyo eyimindeni
yamaGereshoni. 22 Labo ababalwayo kubo njengokomumo wabesilisa bonke kusukela
kwabanenyanga kuya phezulu, ababalwayo kubo babe yizinkulungwane eziyisikhombisa
namakhulu ayisihlanu. 23 Imindeni yamaGereshoni iyakumisa emva kwetabernakele
ngasentshonalanga. 24 Isikhulu sendlu kayise wamaGereshoni siyakuba ngu-Eliyasafa indodana
kaLayeli. 25 Imfanelo yamadodana kaGereshoni etendeni lokuhlangana iyakuba yitabernakele,
netende, nesimbozo salo, neveli lomnyango wetende lokuhlangana, 26 nezilenge zegceke, neveli
lomnyango wegceke elingasetabernakele nangase-altare nxazonke, nezintambo zalo, nayo yonke
inkonzo yalokho. 27 KwaKohati kwavela umndeni wama-Amramu, nomndeni wamaJisihari,
nomndeni wamaHebroni, nomndeni wama-Uziyeli; yileyo eyimindeni yamaKohati. 28
Njengokomumo wabo bonke abesilisa kusukela kwabanenyanga kuya phezulu babe
yizinkulungwane eziyisishiyagalombili namakhulu ayisithupha, begcina inkonzo yendlu
engcwele. 29 Imindeni yamadodana kaKohati iyakumisa eceleni kwetabernakele ngaseningizimu.
30
Isikhulu sendlu kayise wemindeni yamaKohati siyakuba ngu-Elisafani indodana ka-Uziyeli. 31
Okugcinwa yibo kuyakuba ngumphongolo, netafula, nothi lwezibani, nama-altare, nezimpahla
zendlu engcwele abakhonza ngazo, neveli, nayo yonke inkonzo yalokho. 32 U-Eleyazare
indodana ka-Aroni umpristi uyakuba yisikhulu sezikhulu zamaLevi, abonise abagcina inkonzo
yendlu engcwele. 33 KwaMerari kwavela umndeni wamaMaheli nomndeni wamaMushi; yileyo
eyimindeni yamaMerari. 34 Labo ababalwayo kubo njengokomumo wabesilisa bonke kusukela
kwabanenyanga kuya phezulu babe yizinkulungwane eziyisithupha namakhulu amabili. 35
Isikhulu sendlu kayise wemindeni yamaMerari sasinguSuriyeli indodana ka-Abihayili;
bayakumisa eceleni kwetabernakele ngasenyakatho. 36 Imfanelo emiselwe amadodana kaMerari
iyakuba ngamapulangwe etabernakele, nemishayo yalo, nezinsika zalo, nezinyawo zalo, nezinto
zonke zalo, nenkonzo yonke yalokho, 37 nezinsika zegceke nxazonke, nezinyawo zazo,
nezikhonkwane zazo, nezintambo zazo. 38 Labo abamisa phambi kwetabernakele
ngasempumalanga, ngaphambi kwetende lokuhlangana ngasekuphumeni kwelanga, bayakuba
ngoMose no-Aroni namadodana akhe, begcina inkonzo yendlu engcwele, begcina imfanelo
yabantwana bakwa-Israyeli; umfokazi osondelayo uyakubulawa. 39 Bonke ababalwayo bamaLevi
ababalwa nguMose nangu-Aroni ngesiyalezo sikaJehova ngemindeni yabo, bonke abesilisa
kusukela kwabanenyanga kuya phezulu, babe yizinkulungwane ezingamashumi amabili nambili.
40
UJehova wathi kuMose: "Bala onke amazibulo esilisa abantwana bakwa-Israyeli kusukela
kwabanenyanga kuya phezulu, ubale umumo wamagama abo. 41 Uyakungithabathela amaLevi,
nginguJehova, esikhundleni samazibulo onke abantwana bakwa-Israyeli, nezinkomo zamaLevi
esikhundleni samazibulo onke ezinkomo zabantwana bakwa-Israyeli." 42 UMose wabala,
njengalokho uJehova emyalile, onke amazibulo phakathi kwabantwana bakwa-Israyeli. 43 Onke
amazibulo esilisa njengokomumo wamagama kusukela kwabanenyanga kuya phezulu alabo
ababalwayo kubo ayeyizinkulungwane ezingamashumi amabili nambili namakhulu amabili
namashumi ayisikhombisa nantathu. 44 UJehova wakhuluma kuMose, wathi: 45 "Thabatha
amaLevi esikhundleni samazibulo onke phakathi kwabantwana bakwa-Israyeli nezinkomo
zamaLevi esikhundleni sezinkomo zabo, amaLevi abe ngawami; nginguJehova. 46 Ukuba
kuhlengwe labo abangamakhulu amabili namashumi ayisikhombisa nantathu bamazibulo
abantwana bakwa-Israyeli abadlula amaLevi, 47 uyakuthabatha amashekeli ayisihlanu ngamunye
ngenhloko; ngokweshekeli lendlu engcwele uyakuwathabatha ishekeli lingamagera angamashumi
amabili; 48 umnike u-Aroni namadodana akhe imali umumo wabo odlulelayo ohlengwa ngayo."
49
UMose wayesethatha imali yokuhlenga kulabo abadlula abahlengiwe ngamaLevi; 50 kuwo
amazibulo abantwana bakwa-Israyeli wayithatha imali, amashekeli ayinkulungwane namakhulu
amathathu namashumi ayisithupha nanhlanu ngokweshekeli lendlu engcwele. 51 UMose wamnika
u-Aroni namadodana akhe imali yokuhlenga njengezwi likaJehova, njengalokho uJehova
emyalile uMose.

4
1
UJehova wakhuluma kuMose naku-Aroni, wathi: 2 "Bala umumo wamadodana kaKohati
phakathi kwamadodana kaLevi ngemindeni yawo nangezindlu zawoyise, 3 kusukela
kwabaneminyaka engamashumi amathathu kuya phezulu kuze kufike kwabaneminyaka
engamashumi ayisihlanu, bonke abangena enkonzweni ukwenza umsebenzi etendeni
lokuhlangana. 4 "Nanku umsebenzi wamadodana kaKohati etendeni lokuhlangana: izinto
ezingcwelengcwele. 5 Nxa ikamu lisuka, u-Aroni uyakungena kanye namadodana akhe, behlise
iveli lesihenqo, basibekele umphongolo wobufakazi ngalo, 6 bawembese isikhumba samatahasi,
bendlale phezu kwawo indwangu eluhlaza yonke, bafake izinti zawo. 7 "Etafuleni lezinkwa
zokubukwa bayakwendlala indwangu eluhlaza, babeke kuyo izingqwembe, nezinkezo,
nezinkamba, nezindebe zokuthela; nesinkwa esinganqamukiyo siyakuba phezu kwalo. 8
Bayakwendlala phezu kwazo indwangu ebomvu, bayisibekele ngesikhumba samatahasi, bafake
izinti zalo. 9 "Bayakuthabatha indwangu eluhlaza, balusibekele uthi lwezibani, nezibani zalo,
nezizenze zalo, nezitsha zalo zomlotha, nezitsha zonke zalo zamafutha abakhonza ngazo kulo; 10
bayakulufaka kanye nezinto zalo zonke esikhumbeni samatahasi, babeke konke ohlakeni. 11 "E-
altare legolide bayakwendlala indwangu eluhlaza, bayisibekele ngesikhumba samatahasi, bafake
izinti zalo. 12 "Bayakuthabatha zonke izitsha zokukhonza abakhonza ngazo endlini engcwele,
bazifake endwangwini eluhlaza, bazisibekele ngesikhumba samatahasi, bazibeke ohlakeni. 13
"Bayakususa umlotha e-altare, bendlale kulo indwangu ebubende, 14 babeke kuyo zonke izinto
zalo abakhonza ngazo kulo, imicengezi yempepho, nezimfoloko, namafosholo, nezitsha, nezinto
zonke ze-altare, bendlale phezu kwazo isimbozo sesikhumba samatahasi, bafake izinti zalo. 15
"Nxa u-Aroni namadodana akhe sebeqedile ukusibekela indlu engcwele nempahla yonke yendlu
engcwele, lapho ikamu liyakusuka, emva kwalokho amadodana kaKohati ayakufika ukukuthwala,
kepha awayikuthinta okungcwele, funa afe. Lezo zinto zingumthwalo wamadodana kaKohati
etendeni lokuhlangana. 16 "Imfanelo ka-Eleyazare indodana ka-Aroni umpristi iyakuba
ngamafutha okukhanyisa nempepho ethaphukayo, nomnikelo wempuphu wemihla yonke,
namafutha okugcoba; imfanelo yakhe iyitabernakele lonke nakho konke okukulo, indlu engcwele
nezinto zayo." 17 UJehova wakhuluma kuMose naku-Aroni, wathi: 18 "Ninganqumi isizwe
semindeni yamaKohati kumaLevi, 19 kepha ukuba baphile, bangafi, lapho besondela ezintweni
ezingcwelengcwele, nenze kanje kubo: u-Aroni namadodana akhe bayakungena, babamise, kube
yilowo nalowo emsebenzini wakhe nasemthwalweni wakhe; 20 kepha abayikungena ukubona
okungcwele nangesikhashana nje, funa bafe."
21
UJehova wakhuluma kuMose, wathi: 22 "Bala umumo wamadodana kaGereshoni nawo
ngezindlu zawoyise nangemindeni yawo 23 kusukela kwabaneminyaka engamashumi amathathu
kuya phezulu kuze kube kwabaneminyaka engamashumi ayisihlanu, bonke abangena enkonzweni
ukwenza umsebenzi etendeni lokuhlangana. 24 "Nanku umsebenzi wemindeni yamaGereshoni
ngokukhonza nangokuthwala: 25 bayakuthwala izilenge zetabernakele, netende lokuhlangana,
nesimbozo salo, nesimbozo sesikhumba samatahasi esiphezu kwalo, neveli lomnyango wetende
lokuhlangana, 26 nezilenge zegceke, neveli lomnyango wesango legceke elingasetabernakele
nangase-altare nxazonke, nezintambo zakho, nezinto zonke zokukhonza kwabo; nakho konke
okwenzelwa zona bayakukwenza. 27 Ngesiyalezo sika-Aroni nangesamadodana akhe
uyakwenziwa wonke umsebenzi wamadodana amaGereshoni emithwalweni yawo yonke
nasemisebenzini yawo yonke; niwamisele yonke imithwalo yawo ezakugcinwa yiwo. 28 Lowo
ungumsebenzi wemindeni yamadodana amaGereshoni etendeni lokuhlangana; okugcinwa yiwo
kube phansi kwesandla sika-Itamari indodana ka-Aroni umpristi. 29 "Amadodana kaMerari
uwabale ngemindeni yawo nangezindlu zawoyise; 30 kusukela kwabaneminyaka engamashumi
amathathu kuya phezulu kuze kube kwabaneminyaka engamashumi ayisihlanu wobabala bonke
abangena emsebenzini ukwenza umsebenzi wetende lokuhlangana. 31 Nakhu okuzakugcinwa
yibo ukuba bakuthwale ngokomsebenzi wabo wonke etendeni lokuhlangana: amapulangwe
etabernakele, nemishayo yalo, nezinsika zalo, nezinyawo zalo, 32 nezinsika zegceke nxazonke,
nezinyawo zazo, nezikhonkwane zazo, nezintambo zazo, nempahla yonke yazo, nenkonzo yonke
yazo, nibamisele ngamagama impahla abafanele ukuyithwala. 33 Lowo ungumsebenzi wemindeni
yamadodana kaMerari ngokomsebenzi wabo wonke etendeni lokuhlangana phansi kwesandla
sika-Itamari indodana ka-Aroni umpristi."
34
OMose no-Aroni nezikhulu zenhlangano babala amadodana amaKohati ngemindeni yawo
nangezindlu zawoyise, 35 kusukela kwabaneminyaka engamashumi amathathu kuya phezulu kuze
kube kwabeneminyaka engamashumi ayisihlanu, bonke abangena emsebenzini ukukhonza
etendeni lokuhlangana; 36 labo ababalwayo kubo ngemindeni yabo babe yizinkulungwane
ezimbili namakhulu ayisikhombisa namashumi ayisihlanu. 37 Yilabo ababalwayo bemindeni
yamaKohati, bonke abakhonza etendeni lokuhlangana, ababalwa nguMose nangu-Aroni
njengesiyalezo sikaJehova ngesandla sikaMose. 38 Labo ababalwayo bamadodana kaGereshoni
ngemindeni yawo nangezindlu zawoyise, 39 kusukela kwabaneminyaka engamashumi amathathu
kuya phezulu kuze kube kwabaneminyaka engamashumi ayisihlanu, bonke abangena
emsebenzini ukukhonza etendeni lokuhlangana, 40 labo ababalwayo kubo ngemindeni yabo
nangezindlu zawoyise babe yizinkulungwane ezimbili namakhulu ayisithupha namashumi
amathathu. 41 Yilabo ababalwayo bemindeni yamadodana kaGereshoni, bonke abakhonza
etendeni lokuhlangana, ababalwa nguMose nangu-Aroni njengesiyalezo sikaJehova. 42 Labo
ababalwayo bemindeni yamadodana kaMerari ngemindeni yawo nangezindlu zawoyise, 43
kusukela kwabaneminyaka engamashumi amathathu kuya phezulu kuze kube kwabaneminyaka
engamashumi ayisihlanu, bonke abangena emsebenzini ukukhonza etendeni lokuhlangana, 44
labo ababalwayo kubo ngemindeni yabo babe yizinkulungwane ezintathu namakhulu amabili. 45
Yilabo ababalwayo bemindeni yamadodana kaMerari ababalwa nguMose nangu-Aroni
njengesiyalezo sikaJehova ngesandla sikaMose. 46 Bonke ababalwayo bamaLevi ababalwa
nguMose nangu-Aroni nayizikhulu zakwa-Israyeli ngemindeni yabo nangezindlu zawoyise, 47
kusukela kwabaneminyaka engamashumi amathathu kuya phezulu kuze kube kwabaneminyaka
engamashumi ayisihlanu, bonke abangena ukwenza umsebenzi wenkonzo nomsebenzi
wokuthwala etendeni lokuhlangana, 48 labo ababalwayo kubo babe yizinkulungwane
eziyisishiyagalombili namakhulu ayisihlanu namashumi ayisishiyagalombili. 49 Njengesiyalezo
sikaJehova babalwa ngesandla sikaMose, yilowo nalowo ngokomsebenzi wakhe
nangokomthwalo wakhe. Base bebalwa-ke, njengalokho uJehova emyalile uMose.

5
1
UJehova wakhuluma kuMose, wathi: 2 "Yala abantwana bakwa-Israyeli ukuba bakhiphe ekamu
bonke abanochoko, nabo bonke abacucuzayo, nabo bonke abangcoliswe ngabafileyo, 3 nikhiphe
abesilisa nabesifazane, nibakhiphele ngaphandle kwekamu ukuba bangangcolisi ikamu engihlala
phakathi kwalo." 4 Abantwana bakwa-Israyeli benze njalo, babakhiphela ngaphandle kwekamu;
njengalokho uJehova ekhulume kuMose, benze njalo-ke abantwana bakwa-Israyeli. 5 UJehova
wakhuluma kuMose, wathi: 6 "Yisho kubantwana bakwa-Israyeli, uthi: ‘Nxa owesilisa noma
owesifazane enza isono esenziwa ngabantu ukuphambeka kuJehova, lowo muntu abeseba necala,
7
uyakuvuma isono sakhe asenzileyo, alikhokhe icala lakhe ngokupheleleyo, athasisele kukho
okwesihlanu, akunike lowo abenecala kuye. 8 Kepha uma umuntu engenasihlobo
elingakhokhelwa kuso icala, inkokhelo yecala eyenzelwa uJehova iyakuba ngeyompristi,
ngaphandle kwenqama yokubuyisana ayakwenzelwa ukubuyisana ngayo. 9 Yonke iminikelo
yokuphakanyiswa yezinto ezingcwele zabantwana bakwa-Israyeli abanikela ngayo kumpristi
iyakuba ngeyakhe. 10 Izinto ezingcwele zalowo nalowo ziyakuba ngezakhe; noma kungaba yini
umuntu akunika umpristi, kuyakuba ngokwakhe.’"
11
UJehova wakhuluma kuMose, wathi: 12 "Yisho kubantwana bakwa-Israyeli, uthi kubo: ‘Uma
umfazi womuntu eduka, aphambuke kuye, 13 alale nenye indoda kusithekile emehlweni endoda
yakhe, kufihlwe, angcoliswe, kungekho fakazi nokho ngaye, futhi engabanjwanga, 14 afikelwe
ngumoya wesikhwele, abe nesikhwele ngomkakhe, yena engcolisiwe, noma efikelwe ngumoya
wesikhwele, abe nesikhwele ngomkakhe kodwa yena engangcoliswanga, 15 indoda iyakuletha
umkayo kumpristi, imlethele umnikelo wakhe, ube ngokweshumi kwe-efa lempuphu yebhali,
angatheli-mafutha kuyo, angabeki nanhlaka kuyo, ngokuba kungumnikelo wempuphu
wesikhwele, umnikelo wempuphu wesikhumbuzo sokukhumbuza ngobubi. 16 "‘Umpristi
uyakumsondeza, ambeke phambi kukaJehova, 17 umpristi athathe amanzi angcwele esitsheni
sebumba, athathe kulo uthuli oluphansi etabernakele, alufake emanzini, 18 umpristi ambeke
owesifazane phambi kukaJehova, athukulule izinwele zekhanda lowesifazane, afake umnikelo
wempuphu wesikhumbuzo ezandleni zakhe, ongumnikelo wempuphu wesikhwele; umpristi abe
namanzi ababayo esandleni sakhe aveza isiqalekiso. 19 Umpristi amfungise, athi kowesifazane:
"Uma kungalalanga ndoda nawe, ungadukelanga ekungcoleni usephansi kwendoda yakho,
mawukhululeke kulawa manzi ababayo aveza isiqalekiso; 20 kepha uma udukile usephansi
kwendoda yakho, futhi ungcolisiwe, kulale nawe enye indoda ngaphandle kwendoda yakho," 21
umpristi uyakufungisa owesifazane ngesifungo sesiqalekiso, umpristi athi kowesifazane:
"UJehova makakwenze isiqalekiso nesifungo phakathi kwabantu bakini, lapho uJehova
eshwabanisa ithanga lakho, avuvukalise isisu sakho; 22 lawa manzi aveza isiqalekiso ayakungena
ezibilini zakho, avuvukalise isisu sakho, ashwabanise ithanga lakho." Owesifazane uyakuthi:
"Amen! Amen!" 23 "‘Umpristi uyakubala lezi ziqalekiso encwadini, azesule ngamanzi ababayo, 24
aphuzise owesifazane amanzi ababayo aveza isiqalekiso; amanzi aveza isiqalekiso ayakungena
kuye, ababe. 25 Umpristi uyakuthatha umnikelo wempuphu wesikhwele esandleni sowesifazane,
azulise umnikelo wempuphu phambi kukaJehova, awulethe e-altare; 26 umpristi uyakucaphuna
ukhweshe womnikelo wempuphu, ube yisikhumbuzo sawo, awushise e-altare, andukuba
amphuzise owesifazane amanzi. 27 Nxa esemphuzisile amanzi, kuyakuthi uma engcolisiwe
waphambuka endodeni yakhe, amanzi aveza isiqalekiso angene kuye, ababe, isisu sakhe
sivuvukale, ithanga lakhe lishwabane, owesifazane aqalekiswe phakathi kwabantu bakubo. 28
Kepha uma owesifazane engangcolisiwe kodwa ehlambulukile, uyakukhululeka, athole inzalo. 29
"‘Lowo ungumthetho wesikhwele, lapho umfazi esephansi kwendoda yakhe eduka, angcoliswe, 30
noma lapho indoda ifikelwa ngumoya wesikhwele, ibe nesikhwele ngomkayo; khona iyakumbeka
owesifazane phambi kukaJehova, umpristi agcine wonke lo mthetho kuye. 31 Indoda
iyakukhululeka ebubini, kepha owesifazane uyakubuthwala ububi bakhe.’"

6
1
UJehova wakhuluma kuMose, wathi: 2 "Yisho kubantwana bakwa-Israyeli, uthi kubo: ‘Nxa
owesilisa noma owesifazane enza isithembiso esithile, isithembiso somNaziri, ukuzahlukanisela
kuJehova, 3 uyakuzahlukanisa newayini nophuzo olunamandla, angaphuzi uviniga wewayini,
noviniga wophuzo olunamandla, angaphuzi okwezithelo zomvini, futhi angadli izithelo zomvini
ezimanzi nezomileyo. 4 Zonke izinsuku zobuNaziri bakhe akayikudla lutho olwenziwe ngewayini
lezithelo zomvini, kusukela ezimbumbulwini kuze kufike emakhasini. 5 "‘Zonke izinsuku
zesithembiso sakhe sobuNaziri kungasondeli mpuco ekhanda lakhe; uyakuba ngcwele zize
ziphelele izinsuku azahlukanisela ngazo kuJehova, avume isihluthu sezinwele zekhanda lakhe
sibe side. 6 Zonke izinsuku engumNaziri kaJehova akayikusondela esidumbini. 7
Akayikuzingcolisa ngoyise noma ngonina, noma ngomfowabo noma ngodadewabo, nxa befile,
ngokuba isithembiso sakhe sobuNaziri sisekhanda lakhe. 8 Zonke izinsuku zobuNaziri bakhe
ungcwele kuJehova. 9 "‘Uma umuntu efa ngokuzumayo eceleni kwakhe, angcolise ikhanda
lobuNaziri bakhe, uyakuphucula ikhanda lakhe ngosuku lokuhlanjululwa kwakhe, aliphucule
ngosuku lwesikhombisa. 10 Ngosuku lwesishiyagalombili uyakuletha amahobhe amabili noma
amaphuphu amabili amajuba kumpristi ngasemnyango wetende lokuhlangana; 11 umpristi
uyakunikela ngelinye libe ngumnikelo wesono nangelinye libe ngumnikelo wokushiswa,
amenzele ukubuyisana, ngokuba wona ngenxa yofileyo; abesengcwelisa ikhanda lakhe ngalolo
suku. 12 Uyakwahlukanisela kuJehova izinsuku zobuNaziri bakhe, alethe imvu yeduna
enomnyaka munye, ibe ngumnikelo wecala; kepha izinsuku zakuqala ziyakuba yize, ngokuba
ubuNaziri bakhe bungcolisiwe. 13 "‘Nanku umthetho womNaziri lapho izinsuku zobuNaziri
bakhe seziphelele wokuthi uyakulethwa emnyango wetende lokuhlangana, 14 anikele ngomnikelo
wakhe kuJehova, imvu yeduna enomnyaka munye engenasici ibe ngumnikelo wokushiswa,
neyensikazi enomnyaka munye engenasici ibe ngumnikelo wesono, nenqama engenasici ibe
ngumnikelo wokuthula, 15 neqoma lesinkwa esingenamvubelo, amaqebelengwane empuphu
ecolekileyo exovwe namafutha, nemiqathane engenamvubelo, egcotshwe ngamafutha, nomnikelo
wempuphu nowokuphuzwa walokho. 16 "‘Umpristi uyakukuletha phambi kukaJehova, anikele
ngomnikelo wakhe wesono nangowokushiswa wakhe. 17 Uyakunikela ngenqama ibe
ngumhlatshelo womnikelo wokuthula kaJehova kanye neqoma lesinkwa esingenamvubelo; futhi
umpristi anikele ngomnikelo wayo wempuphu nangomnikelo wayo wokuphuzwa. 18 "‘UmNaziri
uyakuphucula ikhanda lobuNaziri bakhe ngasemnyango wetende lokuhlangana, athathe izinwele
zekhanda lobuNaziri bakhe, azibeke emlilweni ophansi komhlatshelo weminikelo yokuthula. 19
"‘Umpristi uyakuthabatha umkhono ophekiweyo wenqama, neqebelengwane eqomeni,
nomqathane ongenamvubelo, akufake ezandleni zomNaziri, nxa esephuculile ubuNaziri bakhe, 20
umpristi akuzulise, kube ngumnikelo wokuzuliswa phambi kukaJehova; lokhu kungcwele
kumpristi kanye nesifuba sokuzuliswa nethanga lokuphakanyiswa; emva kwalokho umNaziri
angaphuza iwayini. 21 "‘Lowo ungumthetho womNaziri owenzile isithembiso nowomnikelo
wakhe kuJehova ngenxa yobuNaziri bakhe, ngaphandle kokunye angaphumelela kukho;
njengesithembiso sakhe asenzayo uyakwenza kanjalo njengomthetho wobuNaziri.’"
22
UJehova wakhuluma kuMose, wathi: 23 "Yisho ku-Aroni nakumadodana akhe, uthi:
‘Niyakubusisa kanje abantwana bakwa-Israyeli, niyakusho kubo, nithi: 24 "‘"UJehova
makakubusise, akulondoloze; 25 uJehova makakhanyise ubuso bakhe phezu kwakho, abe nomusa
kuwe; 26 uJehova makaphakamise ubuso bakhe phezu kwakho, akuphe ukuthula."‘ 27
"Bayakubeka kanjalo igama lami kubantwana bakwa-Israyeli, mina ngibabusise."

7
1
Kwathi ngosuku uMose aqeda ngalo ukumisa itabernakele, waligcoba, walingcwelisa kanye
nayo yonke impahla yalo, ne-altare, nazo zonke izitsha zalo, wazigcoba, wazingcwelisa, 2
izikhulu zakwa-Israyeli, izinhloko zezindlu zawoyise zanikela; lezo zaziyizikhulu zezizwe,
zazibekwe phezu kwababalwayo. 3 Zaletha iminikelo yazo phambi kukaJehova, izinqola
eziyisithupha ezimboziwe, nezinkabi eziyishumi nambili, yilezo zikhulu ezimbili zinenqola inye,
yileso sinenkunzi; zazethula phambi kwetabernakele. 4 UJehova wakhuluma kuMose, wathi: 5
"Zamukele kuzo, ukuze zenze inkonzo yetende lokuhlangana, uzinike amaLevi, kube yilowo
nalowo muntu ngokomsebenzi wakhe." 6 UMose wathatha izinqola nezinkabi, wazinika
amaLevi. 7 Izinqola ezimbili nezinkabi ezine wazinika amadodana kaGereshoni ngomsebenzi
wawo, 8 nezinqola ezine nezinkabi eziyisishiyagalombili wazinika amadodana kaMerari
ngomsebenzi wawo phansi kwesandla sika-Itamari indodana ka-Aroni umpristi. 9 Kepha
amadodana kaKohati akawanikanga lutho, ngokuba inkonzo yendlu engcwele yayiyiwo eyawo;
ayithwala emahlombe awo.
10
Izikhulu zanikelela ukwahlukaniselwa kwe-altare ngosuku lokugcotshwa kwalo, izikhulu
zanikela ngomnikelo wazo phambi kwe-altare. 11 UJehova wathi kuMose: "Izikhulu ziyakunikela
ngomnikelo wazo, yileso naleso ngosuku lwaso, ube ngowahlukaniselwa kwe-altare." 12
Owanikela ngomnikelo wakhe ngosuku lokuqala nguNaheshoni indodana ka-Aminadaba,
owesizwe sakwaJuda. 13 Umnikelo wakhe wawuluqwembe lwesiliva, isisindo salo
singamashekeli ayikhulu namashumi amathathu, nokhamba lwesiliva olungamashekeli
angamashumi ayisikhombisa ngokweshekeli lendlu engcwele, zombili zigcwele impuphu
ecolekileyo exovwe namafutha, kube ngumnikelo wempuphu, 14 nenkezo yegolide
engamashekeli ayishumi egcwele impepho, 15 neduna libe linye, nenqama ibe nye, nemvu yeduna
enomnyaka munye, kube ngumnikelo wokushiswa, 16 nempongo ibe nye, ibe ngumnikelo
wesono. 17 Okomhlatshelo kweminikelo yokuthula nakhu: izinkabi ezimbili, nezinqama
eziyisihlanu, nezimpongo eziyisihlanu, nezimvu eziyisihlanu zamaduna ezinomnyaka munye;
lokho kwakungumnikelo kaNaheshoni indodana ka-Aminadaba. 18 Ngosuku lwesibili kwanikela
uNethaneli indodana kaSuwari, isikhulu sakwa-Isakare. 19 Wanikela kwaba ngumnikelo wakhe
uqwembe lwesiliva, isisindo salo singamashekeli ayikhulu namashumi amathathu, nokhamba
olungamashekeli angamashumi ayisikhombisa ngokweshekeli lendlu engcwele, zombili zigcwele
impuphu ecolekileyo exovwe namafutha, kube ngumnikelo wempuphu, 20 nenkezo yegolide
engamashekeli ayishumi egcwele impepho, 21 neduna libe linye, nenqama ibe nye, nemvu yeduna
enomnyaka munye, kube ngumnikelo wokushiswa, 22 nempongo ibe nye, ibe ngumnikelo
wesono. 23 Okomhlatshelo weminikelo yokuthula nakhu: izinkabi ezimbili, nezinqama
eziyisihlanu, nezimpongo eziyisihlanu, nezimvu eziyisihlanu zamaduna ezinomnyaka munye;
lokho kwakungumnikelo kaNethaneli indodana kaSuwari. 24 Ngosuku lwesithathu ngu-Eliyabe
indodana kaHeloni, isikhulu sabantwana bakwaZebuloni. 25 Umnikelo wakhe wawuluqwembe
lwesiliva, isisindo salo singamashekeli ayikhulu namashumi amathathu, nokhamba lwesiliva
olungamashekeli angamashumi ayisikhombisa ngokweshekeli lendlu engcwele, zombili zigcwele
impuphu ecolekileyo exovwe namafutha, kube ngumnikelo wempuphu, 26 nenkezo yegolide
engamashekeli ayishumi egcwele impepho, 27 neduna libe linye, nenqama ibe nye, nemvu yeduna
enomnyaka munye, kube ngumnikelo wokushiswa, 28 nempongo ibe nye, ibe ngumnikelo
wesono. 29 Okomhlatshelo weminikelo yokuthula nakhu: izinkabi ezimbili, nezinqama
eziyisihlanu, nezimpongo eziyisihlanu, nezimvu eziyisihlanu zamaduna ezinomnyaka munye;
lokho kwakungumnikelo ka-Eliyabe indodana kaHeloni. 30 Ngosuku lwesine ngu-Elisuri
indodana kaShedewuri, isikhulu sabantwana bakwaRubeni. 31 Umnikelo wakhe wawuluqwembe
lwesiliva, isisindo salo singamashekeli ayikhulu namashumi amathathu nokhamba lwesiliva
olungamashekeli angamashumi ayisikhombisa ngokweshekeli lendlu engcwele, zombili zigcwele
impuphu ecolekileyo exovwe namafutha, kube ngumnikelo wempuphu, 32 nenkezo yegolide
engamashekeli ayishumi egcwele impepho, 33 neduna libe linye, nenqama ibe nye, nemvu yeduna
enomnyaka munye, kube ngumnikelo wokushiswa, 34 nempongo ibe nye, ibe ngumnikelo
wesono. 35 Okomhlatshelo weminikelo yokuthula nakhu: izinkabi ezimbili, nezinqama
eziyisihlanu, nezimpongo eziyisihlanu, nezimvu eziyisihlanu zamaduna ezinomnyaka munye;
lokho kwakungumnikelo ka-Elisuri indodana kaShedewuri. 36 Ngosuku lwesihlanu
nguShelumiyeli indodana kaSurishadayi, isikhulu sabantwana bakwaSimeyoni. 37 Umnikelo
wakhe wawuluqwembe lwesiliva, isisindo salo singamashekeli ayikhulu namashumi amathathu,
nokhamba lwesiliva olungamashekeli angamashumi ayisikhombisa ngokweshekeli lendlu
engcwele, zombili zigcwele impuphu ecolekileyo exovwe namafutha, kube ngumnikelo
wempuphu, 38 nenkezo yegolide engamashekeli ayishumi egcwele impepho, 39 neduna libe linye,
nenqama ibe nye, nemvu yeduna enomnyaka munye, kube ngumnikelo wokushiswa, 40
nempongo ibe nye, ibe ngumnikelo wesono. 41 Okomhlatshelo weminikelo yokuthula nakhu:
izinkabi ezimbili, nezinqama eziyisihlanu, nezimpongo eziyisihlanu, nezimvu eziyisihlanu
zamaduna ezinomnyaka munye; lokho kwakungumnikelo kaShelumiyeli indodana kaSurishadayi.
42
Ngosuku lwesithupha ngu-Eliyasafa indodana kaDehuweli, isikhulu sabantwana bakwaGadi. 43
Umnikelo wakhe wawuluqwembe lwesiliva, isisindo salo singamashekeli ayikhulu namashumi
amathathu, nokhamba lwesiliva olungamashekeli angamashumi ayisikhombisa ngokweshekeli
lendlu engcwele, zombili zigcwele impuphu ecolekileyo exovwe namafutha, kube ngumnikelo
wempuphu, 44 nenkezo yegolide engamashekeli ayishumi egcwele impepho, 45 neduna libe linye,
nenqama ibe nye, nemvu yeduna enomnyaka munye, kube ngumnikelo wokushiswa, 46
nempongo ibe nye, ibe ngumnikelo wesono. 47 Okomhlatshelo weminikelo yokuthula nakhu:
izinkabi ezimbili, nezinqama eziyisihlanu, nezimpongo eziyisihlanu, nezimvu eziyisihlanu
zamaduna ezinomnyaka munye; lokho kwakungumnikelo ka-Eliyasafa indodana kaDehuweli. 48
Ngosuku lwesikhombisa ngu-Elishama indodana ka-Amihudi, isikhulu sabantwana bakwa-
Efrayimi. 49 Umnikelo wakhe wawuluqwembe lwesiliva, isisindo salo singamashekeli ayikhulu
namashumi amathathu, nokhamba lwesiliva olungamashekeli angamashumi ayisikhombisa
ngokweshekeli lendlu engcwele, zombili zigcwele impuphu ecolekileyo exovwe namafutha, kube
ngumnikelo wempuphu, 50 nenkezo yegolide engamashekeli ayishumi egcwele impepho, 51
neduna libe linye, nenqama ibe nye, nemvu yeduna enomnyaka munye, kube ngumnikelo
wokushiswa, 52 nempongo ibe nye, ibe ngumnikelo wesono. 53 Okomhlatshelo weminikelo
yokuthula nakhu: izinkabi ezimbili, nezinqama eziyisihlanu, nezimpongo eziyisihlanu, nezimvu
eziyisihlanu zamaduna ezinomnyaka munye; lokho kwakungumnikelo ka-Elishama indodana ka-
Amihudi. 54 Ngosuku lwesishiyagalombili nguGamaliyeli indodana kaPedasuri, isikhulu
sabantwana bakwaManase. 55 Umnikelo wakhe wawuluqwembe lwesiliva, isisindo salo
singamashekeli ayikhulu namashumi amathathu, nokhamba lwesiliva olungamashekeli
angamashumi ayisikhombisa ngokweshekeli lendlu engcwele, zombili zigcwele impuphu
ecolekileyo exovwe namafutha, kube ngumnikelo wempuphu, 56 nenkezo yegolide
engamashekeli ayishumi egcwele impepho, 57 neduna libe linye, nenqama ibe nye, nemvu yeduna
enomnyaka munye, kube ngumnikelo wokushiswa, 58 nempongo ibe nye, ibe ngumnikelo
wesono. 59 Okomhlatshelo weminikelo yokuthula nakhu: izinkabi ezimbili, nezinqama
eziyisihlanu, nezimpongo eziyishlanu, nezimvu eziyisihlanu zamaduna ezinomnyaka munye;
lokho kwakungumnikelo kaGamaliyeli indodana kaPedasuri. 60 Ngosuku lwesishiyagalolunye
ngu-Abidani indodana kaGideyoni, isikhulu sabantwana bakwaBenjamini. 61 Umnikelo wakhe
wawuluqwembe lwesiliva, isisindo salo singamashekeli ayikhulu namashumi amathathu,
nokhamba lwesiliva olungamashekeli angamashumi ayisikhombisa ngokweshekeli lendlu
engcwele, zombili zigcwele impuphu ecolekileyo exovwe namafutha, kube ngumnikelo
wempuphu, 62 nenkezo yegolide engamashekeli ayishumi egcwele impepho, 63 neduna libe linye,
nenqama ibe nye, nemvu yeduna enomnyaka munye, kube ngumnikelo wokushiswa, 64
nempongo ibe nye, ibe ngumnikelo wesono. 65 Okomhlatshelo weminikelo yokuthula nakhu:
izinkabi ezimbili, nezinqama eziyisihlanu, nezimpongo eziyisihlanu, nezimvu eziyisihlanu
zamaduna ezinomnyaka munye; lokho kwakungumnikelo ka-Abidani indodana kaGideyoni. 66
Ngosuku lweshumi ngu-Ahiyezeri indodana ka-Amishadayi, isikhulu sabantwana bakwaDani. 67
Umnikelo wakhe wawuluqwembe lwesiliva, isisindo salo singamashekeli ayikhulu namashumi
amathathu, nokhamba lwesiliva olungamashekeli angamashumi ayisikhombisa ngokweshekeli
lendlu engcwele, zombili zigcwele impuphu ecolekileyo exovwe namafutha, kube ngumnikelo
wempuphu, 68 nenkezo yegolide engamashekeli ayishumi egcwele impepho, 69 neduna libe linye,
nenqama ibe nye, nemvu yeduna enomnyaka munye, kube ngumnikelo wokushiswa, 70
nempongo ibe nye, ibe ngumnikelo wesono. 71 Okomhlatshelo weminikelo yokuthula nakhu:
izinkabi ezimbili, nezinqama eziyisihlanu, nezimpongo eziyisihlanu, nezimvu eziyisihlanu
zamaduna ezinomnyaka munye; lokho kwakungumnikelo ka-Ahiyezeri indodana ka-Amishadayi.
72
Ngosuku lweshumi nanye nguPagiyeli indodana ka-Okirani, isikhulu sabantwana bakwa-
Asheri. 73 Umnikelo wakhe wawuluqwembe lwesiliva, isisindo salo singamashekeli ayikhulu
namashumi amathathu, nokhamba lwesiliva olungamashekeli angamashumi ayisikhombisa
ngokweshekeli lendlu engcwele, zombili zigcwele impuphu ecolekileyo exovwe namafutha, kube
ngumnikelo wempuphu, 74 nenkezo yegolide engamashekeli ayishumi egcwele impepho, 75
neduna libe linye, nenqama ibe nye, nemvu yeduna enomnyaka munye, kube ngumnikelo
wokushiswa, 76 nempongo ibe nye, ibe ngumnikelo wesono. 77 Okomhlatshelo weminikelo
yokuthula nakhu: izinkabi ezimbili, nezinqama eziyisihlanu, nezimpongo eziyisihlanu, nezimvu
eziyisihlanu zamaduna ezinomnyaka munye; lokho kwakungumnikelo kaPagiyeli indodana ka-
Okirani. 78 Ngosuku lweshumi nambili ngu-Ahira indodana ka-Enani, isikhulu sabantwana
bakwaNafetali. 79 Umnikelo wakhe wawuluqwembe lwesiliva, isisindo salo singamashekeli
ayikhulu namashumi amathathu, nokhamba lwesiliva olungamashekeli angamashumi
ayisikhombisa ngokweshekeli lendlu engcwele, zombili zigcwele impuphu ecolekileyo exovwe
namafutha, kube ngumnikelo wempuphu, 80 nenkezo yegolide engamashekeli ayishumi egcwele
impepho, 81 neduna libe linye, nenqama ibe nye, nemvu yeduna enomnyaka munye, kube
ngumnikelo wokushiswa, 82 nempongo ibe nye, ibe ngumnikelo wesono. 83 Okomhlatshelo
weminikelo yokuthula nakhu: izinkabi ezimbili, nezinqama eziyisihlanu, nezimpongo
eziyisihlanu, nezimvu eziyisihlanu zamaduna ezinomnyaka munye; lokho kwakungumnikelo ka-
Ahira indodana ka-Enani. 84 Lokho kwakungukwahlukaniselwa kwe-altare ngosuku
lokugcotshwa kwalo ngezandla zezikhulu zakwa-Israyeli: izingqwembe eziyishumi nambili
zesiliva, nezinkamba eziyishumi nambili zesiliva, nezinkezo eziyishumi nambili zegolide, 85
yilolo nalolo qwembe lwesiliva lungamashekeli ayikhulu namashumi amathathu, yilolo nalolo
khamba lungamashumi ayisikhombisa, lonke isiliva lezitsha libe yizinkulungwane ezimbili
namakhulu amane ngokweshekeli lendlu engcwele, 86 nezinkezo zegolide eziyishumi nambili
ezigcwele impepho, yileyo naleyo ingamashekeli ayishumi ngokweshekeli lendlu engcwele;
lonke igolide lezinkezo lalingamashekeli ayikhulu namashumi amabili; 87 zonke izinkomo
zomnikelo wokushiswa zaziyizinkunzi eziyishumi nambili, nezinqama eziyishumi nambili,
nezimvu zamaduna ezinomnyaka munye eziyishumi nambili kanye nomnikelo wazo wempuphu,
nezimpongo zomnikelo wesono eziyishumi nambili; 88 izinkomo zonke zomhlatshelo weminikelo
yokuthula zaziyizinkunzi ezingamashumi amabili nane, nezinqama ezingamashumi ayisithupha,
nezimpongo ezingamashumi ayisithupha, nezimvu zamaduna ezingamashumi ayisithupha. Lokho
kwakungukwahlukaniselwa kwe-altare; lapho lase ligcotshiwe. 89 Nanxa uMose engena etendeni
lokuhlangana ukuba akhulume naye, wezwa izwi likhuluma kuye, livela ngaphezu kwesihlalo
somusa esisemphongolweni wobufakazi ngaphakathi kwamakherubi omabili; wayesekhuluma
kuye.

8
1
UJehova wakhuluma kuMose, wathi: 2 "Yisho ku-Aroni, uthi kuye: ‘Nxa ubeka izibani, izibani
eziyisikhombisa mazikhanyise ngaphambi kothi lwezibani.’" 3 U-Aroni wenze njalo; wabeka
izibani zalo ukuba zikhanyise ngaphambi kothi lwezibani, njengalokho uJehova emyalile uMose.
4
Nanku umsebenzi wothi lwezibani, umsebenzi wegolide elikhandiweyo: kuze kube sesinqeni
salo nasezimbalini zalo kwakungumsebenzi okhandiweyo; njengesifanekiso uJehova asibonise
uMose, wenze njalo uthi lwezibani.
5
UJehova wakhuluma kuMose, wathi: 6 "Thabatha amaLevi phakathi kwabantwana bakwa-
Israyeli, ubahlambulule. 7 Uyakwenza kanje kubo ukuba ubahlambulule: fafaza amanzi
okuphothula, baziphucule umzimba wonke, bahlanze izingubo zabo, bazihlambulule. 8
Bathabathe iduna nomnikelo walo wempuphu, impuphu ecolekileyo exovwe namafutha; nelinye
iduna uyakulithabatha libe ngumnikelo wesono. 9 Uyakuletha amaLevi phambi kwetende
lokuhlangana, ubuthe yonke inhlangano yabantwana bakwa-Israyeli, 10 ulethe amaLevi phambi
kukaJehova; abantwana bakwa-Israyeli babeke izandla zabo phezu kwamaLevi, 11 u-Aroni
azulise amaLevi phambi kukaJehova abe ngumnikelo wokuzuliswa ovela kubantwana bakwa-
Israyeli, aze asebenze umsebenzi kaJehova. 12 "AmaLevi ayakubeka izandla zawo ezinhloko
zezinkunzi, wena unikele ngenye ibe ngumnikelo wesono, enye ibe ngumnikelo wokushiswa
kuJehova ukwenzela amaLevi ukubuyisana. 13 Uyakubeka amaLevi phambi kuka-Aroni
naphambi kwamadodana akhe, unikele ngawo abe ngumnikelo wokuzuliswa kuJehova. 14
Uyakwahlukanisa amaLevi phakathi kwabantwana bakwa-Israyeli, amaLevi abe ngawami. 15
"Emva kwalokho amaLevi ayakungena ukwenza inkonzo yetende lokuhlangana;
uyakuwahlambulula, unikele ngawo abe ngumnikelo wokuzuliswa. 16 Ngokuba mina nginikiwe
wona phakathi kwabantwana bakwa-Israyeli; esikhundleni sakho konke okuvula isizalo,
amazibulo abo bonke abantwana bakwa-Israyeli, ngizithabathele wona. 17 Ngokuba onke
amazibulo phakathi kwabantwana bakwa-Israyeli angawami, awabantu nawezilwane; mhla
ngishaya amazibulo onke ezweni laseGibithe ngazingcwelisela wona. 18 Ngithabathile amaLevi
esikhundleni samazibulo onke abantwana bakwa-Israyeli. 19 Ngiwanikile amaLevi abe yisipho
sika-Aroni nesamadodana akhe esivela kubantwana bakwa-Israyeli ukusebenza umsebenzi
wabantwana bakwa-Israyeli etendeni lokuhlangana nokwenzela abantwana bakwa-Israyeli
ukubuyisana, ukuze kungabikho sifo phakathi kwabantwana bakwa-Israyeli, lapho abantwana
bakwa-Israyeli besondela endlini engcwele." 20 Benze njalo-ke oMose no-Aroni nayo yonke
inhlangano yabantwana bakwa-Israyeli kumaLevi; njengakho konke uJehova amyala ngakho
uMose ngamaLevi, benze njalo kuwo abantwana bakwa-Israyeli. 21 AmaLevi aziphothula,
ahlanza izingubo zawo; u-Aroni wanikela ngawo abe ngumnikelo wokuzuliswa phambi
kukaJehova; u-Aroni wawenzela ukubuyisana ukuwahlambulula. 22 Emva kwalokho amaLevi
angena ukwenza umsebenzi wawo etendeni lokuhlangana phambi kuka-Aroni naphambi
kwamadodana akhe; njengalokho uJehova emyalile uMose ngamaLevi, benze njalo-ke kuwo. 23
UJehova wakhuluma kuMose, wathi: 24 "Yilokhu okungokwamaLevi: kusukela kwabaneminyaka
engamashumi amabili nanhlanu kuya phezulu ayakungena ukugcina umsebenzi wenkonzo
yetende lokuhlangana: 25 kusukela kwabaneminyaka engamashumi ayisihlanu bayakuphuma
emsebenzini wenkonzo, bangabe besakhonza; 26 kodwa bayakukhonza kanye nabafowabo
etendeni lokuhlangana, bagcine imfanelo kepha bangabe besakhonza. Uyakwenze njalo
kumaLevi ngezimfanelo zawo."

9
1
UJehova wakhuluma kuMose ehlane laseSinayi ngenyanga yokuqala yomnyaka wesibili,
sebephumile ezweni laseGibithe, wathi: 2 "Futhi abantwana bakwa-Israyeli bayakugcina iphasika
ngesikhathi salo esinqunyiweyo. 3 Ngosuku lweshumi nane lwaleyo nyanga ngakusihlwa
niyakuligcina ngesikhathi salo esinqunyiweyo; ngokwezimiso zalo zonke nangokwemithetho
yalo anoligcina." 4 UMose wakhuluma kubantwana bakwa-Israyeli ukuthi bolenza iphasika. 5
Balenza-ke iphasika ngenyanga yokuqala ngosuku lweshumi nane ngakusihlwa ehlane
laseSinayi; njengakho konke uJehova amyala ngakho uMose, benze njalo-ke abantwana bakwa-
Israyeli. 6 Kwakukhona amadoda athile ayengcolisiwe yisidumbu somuntu, engenakulenza
iphasika ngalolo suku; eza phambi kukaMose naphambi kuka-Aroni ngalowo muhla. 7 Lawo
madoda athi kuye: "Singcolisiwe yisidumbu somuntu; sivinjelelwani ukunikela ngomnikelo
kaJehova ngesikhathi sawo esinqunyiweyo phakathi kwabantwana bakwa-Israyeli na?" 8 UMose
wathi kuwo: "Yimani ukuba ngizwe ukuthi uJehova uyakuyalani ngani." 9 UJehova wakhuluma
kuMose, wathi: 10 "Yisho kubantwana bakwa-Israyeli, uthi: ‘Uma umuntu wakini noma
owezizukulwane zenu engcoliswa yisidumbu noma esekuhambeni, ekude, uyakulenza nokho
iphasika kuJehova; 11 ngenyanga yesibili ngosuku lweshumi nane ngakusihlwa bayakulenza;
bayakulidla nesinkwa esingenamvubelo nemifino ebabayo; 12 abayikushiya lutho kuze kube
sekuseni, bangaphuli thambo lalo; ngokwezimiso zonke zephasika bayakulenza. 13 Kepha
umuntu ohlambulukileyo, engekho ekuhambeni, oyeka ukulenza iphasika, lowo muntu
uyakunqunywa kubantu bakubo, ngokuba akanikelanga ngomnikelo kaJehova ngesikhathi
esinqunyiweyo; lowo muntu uyakuthwala ububi bakhe. 14 "‘Uma umfokazi egogobele phakathi
kwenu, ethanda ukulenza iphasika kuJehova ngokwesimiso sephasika nangokomthetho walo,
uyakwenze njalo; niyakuba nesimiso sinye kumfokazi nakowokuzalwa ezweni.’"
15
Ngosuku itabernakele elamiswa ngalo ifu lalisibekela itabernakele, itende lobufakazi;
ngakusihlwa laliphezu kwetabernakele njengokubonakala komlilo kwaze kwaba sekuseni. 16
Kwakunjalo ngesikhathi sonke: ifu lalisibekela, kwabonakala umlilo ebusuku. 17 Nalapho ifu
lenyuswa etendeni, base behamba abantwana bakwa-Israyeli, nasendaweni lapho ifu lalima
khona, lapho abantwana bakwa-Israyeli bamisa khona. 18 Ngesiyalezo sikaJehova abantwana
bakwa-Israyeli bahamba, nangesiyalezo sikaJehova bamisa; ngesikhathi ifu lihlala phezu
kwetabernakele bahlala ekamu. 19 Nalapho ifu lihlala phezu kwetabernakele izinsuku eziningi,
abantwana bakwa-Israyeli bagcina isiyalezo sikaJehova, abahambanga. 20 Ngesinye isikhathi ifu
laliphezu kwetabernakele izinsuku eziyingcosana nje; khona ngesiyalezo sikaJehova bahlala
ekamu, nangesiyalezo sikaJehova bahamba. 21 Nangesinye isikhathi ifu lahlala kusihlwa kwaze
kwaba sekuseni; nalapho ifu lenyuswa ekuseni, bahamba; noma lahlala ubusuku nemini, bahamba
lapho ifu lenyuswa. 22 Noma kwakuyizinsuku ezimbili, noma inyanga, noma isikhathi
esingakanani ifu lisahlezi phezu kwetabernakele, abantwana bakwa-Israyeli bahlala ekamu,
abahambanga; kepha lapho lenyuswa, bahamba. 23 Ngesiyalezo sikaJehova bamisa,
nangesiyalezo sikaJehova bahamba; bagcina inkonzo kaJehova ngesiyalezo sikaJehova ngesandla
sikaMose.

10
1
UJehova wakhuluma kuMose, wathi: 2 "Uzenzele amacilongo amabili esiliva, uwenze
ngomsebenzi okhandiweyo, uwasebenzise ekubizeni inhlangano nasekusukeni kwamakamu. 3
Nxa bewabetha, yonke inhlangano iyakubuthana kuwe ngasemnyango wetende lokuhlangana. 4
Uma bebetha elilodwa, izikhulu, izinhloko zezinkulungwane zakwa-Israyeli, ziyakubuthana
kuwe. 5 Nxa nihlaba umkhosi, amakamu asohlangothini lwasempumalanga ayakusuka. 6 Nanxa
nihlaba umkhosi ngokwesibili, amakamu asohlangothini lwaseningizimu ayakusuka; bayakuhlaba
umkhosi ekusukeni kwabo. 7 Kepha lapho liyakubuthwa ibandla, niyakubetha, ningahlabi
umkhosi kodwa. 8 "Amadodana ka-Aroni, abapristi, ayakubetha amacilongo; kuyakuba kini
isimiso esiphakade ezizukulwaneni zenu. 9 Nxa niphuma impi ezweni lakini ukuyokulwa nesitha
esinicindezelayo, khona niyakuhlaba umkhosi ngamacilongo, nikhumbuleke phambi kukaJehova
uNkulunkulu wenu, nisindiswe ezitheni zenu. 10 Nangezinsuku zokuthokoza kwenu,
nangemikhosi emisiweyo, nasekwethwaseni kwenyanga niyakubetha amacilongo enu phezu
kweminikelo yenu yokushiswa naphezu kwemihlatshelo yeminikelo yenu yokuthula, ibe
yisikhumbuzo senu phambi kukaNkulunkulu wenu; nginguJehova uNkulunkulu wenu."
11
Kwathi ngomnyaka wesibili ngenyanga yesibili ngolwamashumi amabili lwenyanga ifu
lenyuswa etabernakele lobufakazi. 12 Abantwana bakwa-Israyeli basuka ehlane laseSinayi
amabanga ngamabanga; ifu lema ehlane lasePharanu. 13 Ngokokuqala basuka ngokwesiyalezo
sikaJehova ngesandla sikaMose. 14 Kuqala lasuka ibhanela lekamu labantwana bakwaJuda
ngamabandla abo; uNaheshoni indodana ka-Aminadaba wayephezu kwalelo bandla. 15 Phezu
kwebandla lesizwe sabantwana bakwa-Isakare kwakunguNethaneli indodana kaSuwari. 16 Phezu
kwebandla lesizwe sabantwana bakwaZebuloni kwakungu-Eliyabe indodana kaHeloni. 17
Itabernakele lasuswa; amadodana kaGereshoni namadodana kaMerari asuka elithwala
itabernakele. 18 Lase lisuka ibhanela lekamu likaRubeni ngamabandla abo; phezu kwalelo bandla
kwakungu-Elisuri indodana kaShedewuri. 19 Phezu kwebandla lesizwe sabantwana
bakwaSimeyoni kwakunguShelumiyeli indodana kaSurishadayi. 20 Phezu kwebandla lesizwe
sabantwana bakwaGadi kwakungu-Eliyasafa indodana kaDehuweli. 21 Kwase kusuka amaKohati
ethwala izinto ezingcwele; itabernakele lamiswa, wona engakafiki. 22 Lase lisuka ibhanela
lekamu labantwana bakwa-Efrayimi ngamabandla abo; phezu kwebandla lakhe kwakungu-
Elishama indodana ka-Amihudi. 23 Phezu kwebandla lesizwe sabantwana bakwaManase
kwakunguGamaliyeli indodana kaPedasuri. 24 Phezu kwebandla lesizwe sabantwana
bakwaBenjamini kwakungu-Abidani indodana kaGideyoni. 25 Lase lisuka ibhanela lekamu
labantwana bakwaDani elalisemva kwawo onke amakamu ngamabandla abo; phezu kwebandla
lakhe kwakungu-Ahiyezeri indodana ka-Amishadayi. 26 Phezu kwebandla lesizwe sabantwana
bakwa-Asheri kwakunguPagiyeli indodana ka-Okirani. 27 Phezu kwebandla lesizwe sabantwana
bakwaNafetali kwakungu-Ahira indodana ka-Enani. 28 Abantwana bakwa-Israyeli bahamba
ngokulandelana kanjalo ngamabandla abo; base besuka-ke.
29
UMose wathi kuHobabi indodana kaRehuweli wakwaMidiyani, umukhwe kaMose: "Siya
endaweni ashilo ngayo uJehova, wathi: ‘Ngiyakuninika yona.’ Woza wena, uhambe nathi,
siyakukwenzela okuhle, ngokuba uJehova ukhulumile okuhle ngo-Israyeli." 30 Wathi kuye:
"Angiyikuhamba; kepha ngiyakusuka, ngiye ezweni lakithi nasezihlotsheni zami." 31 Kepha
wathi: "Ake ungasishiyi; njengokuba uyazi ukuthi siyakumisa kanjani ehlane, uyakuba ngamehlo
ethu. 32 Kuyakuthi uma uhamba nathi, yebo, kwenzeke ukuthi, noma yikuphi okuhle uJehova
asenzela khona, khona lokho uyakukwenzela nawe." 33 Basuka entabeni kaJehova, bahamba
ibanga lezinsuku ezintathu; umphongolo wesivumelwano sikaJehova wahamba phambi kwabo
ibanga lezinsuku ezintathu ukubafunela indawo yokuphumula. 34 Ifu likaJehova laliphezu kwabo
emini, lapho besuka ekamu. 35 Kwathi ekusukeni komphongolo uMose washo wathi: "Vuka,
Jehova; mazihlakazeke izitha zakho; abakuzondayo mababaleke ebusweni bakho." 36 Ekumeni
kwawo wathi: "Buyela, Jehova, emindenini eyizinkulungwane zakwa-Israyeli."

11
1
Kwathi abantu bakhonona, kwabakubi ezindlebeni zikaJehova; esekuzwile uJehova, yavutha
intukuthelo yakhe; umlilo kaJehova washa phakathi kwabo, wabaqeda abasemkhawulweni
wekamu. 2 Abantu base bekhala kuMose; uMose wakhuleka kuJehova, umlilo wabohla. 3 Igama
laleyo ndawo laqanjwa ngokuthi iThabehera, ngokuba umlilo kaJehova washa phakathi kwabo.
4
Ingxubevange eyayiphakathi kwabo yaqala ukufisa nokufisa; nabantwana bakwa-Israyeli
babuye bakhala, bathi: "Ngubani oyakusipha inyama ukuba sidle na? 5 Siyakhumbula izinhlanzi
esazidla eGibithe ngesihle, namakukamba, namakhabe, namaliki, nohanyanisi, nesweli; 6 kepha
manje umphefumulo wethu usuwomile; akukho lutho impela; ngaphandle kwaleli mana akukho
lutho emehlweni ethu." 7 Imana lafana nembewu yekoriyanderi, nokubonakala kwalo
kwakunjengokubonakala kwenhlaka yebedola. 8 Abantwana baphuma ukuliqoqa, baligaya
ematsheni, noma beligqula ezigqulweni, balipheka emakhanzini, benza ngalo amaqebelengwane;
ukuzwakala kwalo kwakunjengokuzwakala kweqebelengwane lamafutha. 9 Nxa amazolo elala
phezu kwekamu ebusuku, imana lawela phezu kwawo. 10 UMose wezwa abantu bekhala
emindenini yabo, kwaba yilowo nalowo muntu ngasemnyango wetende lakhe; intukuthelo
kaJehova yavutha kakhulu; kwakukubi emehlweni kaMose. 11 UMose wathi kuJehova:
"Uyiphatheleni kabi inceku yakho na? Angifumananga ngani umusa emehlweni akho ukuba
ubeke umthwalo wabo bonke laba bantu phezu kwami na? 12 Ngakhulelwa bonke laba bantu yini,
ngabazala, ukuze uthi kimi: ‘Bagone ngasesifubeni sakho njengomondli egona umntwana
oncelayo, ubayise ezweni owalifungela oyise,’ na? 13 Ngingathathaphi inyama ukubanika bonke
laba bantu na? Ngokuba bakhala kimi, bathi: ‘Siphe inyama ukuba sidle.’ 14 Anginakuthwala
bonke laba bantu ngedwa, ngokuba kuyangisinda. 15 Uma ungiphatha kanje, ake ungibulale
nokungibulala, uma ngifumene umusa emehlweni akho; mangingaluboni usizi lwami."
16
UJehova wakhuluma kuMose, wathi: "Ngibuthele amadoda angamashumi ayisikhombisa
amalunga akwa-Israyeli, owaziyo ukuthi angamalunga abantu nezinduna zabo, uwalethe etendeni
lokuhlangana ukuba eme khona nawe. 17 Ngiyakwehla, ngikhulume nawe khona, ngithathe
okomoya ophezu kwakho, ngikubeke kuwo; ayakuthwala umthwalo wabantu kanye nawe, ukuze
ungawuthwali wedwa. 18 "Yisho kubantu ukuthi: ‘Zingcweliseleni olwangakusasa, niyakudla
inyama, lokhu nikhalile ezindlebeni zikaJehova ngokuthi: "Ngubani oyakusipha inyama ukuba
sidle, ngokuba kwakukuhle kithi eGibithe;" ngalokho uJehova uyakuninika inyama, nize nidle. 19
Aniyikuyidla usuku lube lunye, noma izinsuku zibe zimbili, noma izinsuku zibe yisihlanu, noma
izinsuku zibe yishumi, noma izinsuku zibe ngamashumi amabili, 20 kepha inyanga epheleleyo, ize
iphume ngamakhala enu, inengeke kini, ngokuba nimlahlile uJehova ophakathi kwenu, nakhala
phambi kwakhe ngokuthi: "Saphumelani eGibithe na?"‘" 21 Wayesethi uMose: "Abantu
engiphakathi kwabo bayizinkulungwane ezingamakhulu ayisithupha abayimigundatshani; wena-
ke uthi: ‘Ngiyakubanika inyama ukuba badle inyanga epheleleyo.’ 22 Bayakuhlatshelwa izimvu
nezinkomo ukuba zibanele na? Noma bayakubuthelwa yini izinhlanzi zonke zolwandle ukuba
zibanele na?" 23 UJehova wathi kuMose: "Isandla sikaJehova sifinyele na? Usuyakubona uma
izwi lami liyakwenzeka kuwe noma qha."
24
UMose waphuma, wabatshela abantu amazwi kaJehova; wabutha amadoda angamashumi
ayisikhombisa amalunga abantu, wawamisa ngasetendeni nxazonke. 25 UJehova wehla ngefu,
wakhuluma kuye, wathabatha okomoya ophezu kwakhe, wakubeka kumalunga angamashumi
ayisikhombisa; kwathi umoya esahlezi kuwo, aprofetha, kepha awaze akuphinda. 26 Kodwa
kwasala amadoda amabili ekamu, igama lenye lalingu-Elidadi, igama leyesibili linguMedadi;
umoya wayehlala phezu kwawo; ayephakathi kwalawo alotshiweyo, kepha awayanga etendeni;
aprofetha ekamu. 27 Kwagijima insizwa, yabika kuMose, yathi: "O-Elidadi noMedadi
bayaprofetha ekamu." 28 UJoshuwa indodana kaNuni, inceku kaMose, owabakhethiweyo bakhe,
waphendula wathi: "Nkosi yami, Mose, benqabele." 29 UMose wathi kubo: "Unomhawu ngenxa
yami na? Sengathi bonke abantu bakaJehova bangaba ngabaprofethi, uJehova abeke uMoya
wakhe phezu kwabo." 30 UMose wangena ekamu, yena namalunga akwa-Israyeli.
31
Kwavuka umoya ovela kuJehova, waletha izigwaca zivela ngaselwandle, waziwisa ngasekamu
kungathi ibanga losuku ngalapha nebanga losuku ngalapha kwekamu nxazonke, nokuphakama
phezu komhlaba kungathi izingalo ezimbili. 32 Abantu bavuka lonke lolo suku, nobusuku bonke,
nalo lonke usuku olulandelayo, babutha izigwaca; owabutha okuncane wabutha amahomere
ayishumi; bazenekela ngasekamu nxazonke. 33 Inyama isekhona phakathi kwamazinyo abo,
ingakahlafunwa, ulaka lukaJehova lwavuthela abantu, uJehova wabashaya abantu ngokufa
okukhulu kakhulu. 34 Igama laleyo ndawo laqanjwa ngokuthi iKibiroti Hathawa, ngokuba
bambela abantu abafisayo. 35 Abantu basuka eKibiroti Hathawa, baya eHaseroti; bahlala
eHaseroti.

12
1
OMiriyamu no-Aroni bakhuluma bemelene noMose ngenxa yowesifazane wakwaKushe
amthathile; ngokube wayethathile owesifazane wakwaKushe. 2 Bathi: "Imbala uJehova
ukhulumile kuMose kuphela na? Akakhulumanga nakithi na?" UJehova wakuzwa. 3 Kodwa lowo
muntu uMose wayemnene kunabo bonke abantu ababesebusweni bomhlaba.
4
UJehova wayesekhuluma ngokuzumayo kuMose naku-Aroni nakuMiriyamu, wathi: "Wozani
nina nobathathu etendeni lokuhlangana." Baphuma bobathathu. 5 UJehova wehla esensikeni yefu,
wema ngasemnyango wetende, wabiza o-Aroni noMiriyamu; baphuma bobabili. 6 Wayesethi:
"Yizwani manje amazwi ami: uma kukhona umprofethi phakathi kwenu, mina Jehova
ngiyakuzibonakalisa kuye ngombono, ngikhulume kuye ngephupho. 7 Inceku yami uMose
akanjalo; uthembekile endlini yami yonke; 8 ngiyakukhuluma naye umlomo nomlomo
ngokusobala, kungabi ngamazwi ayimfumbe; isimo sikaJehova uyakusibona; anesabanga ngani
ukukhuluma ngenceku yami uMose na?" 9 Intukuthelo kaJehova yabavuthela; wayesemuka.
10
Ifu lasuka phezu kwetende; bheka, uMiriyamu wayesenochoko, enjengeqhwa; u-Aroni
wambheka uMiriyamu; bheka, wayenochoko. 11 U-Aroni wathi kuMose: "O nkosi, ake ungabeki
isono phezu kwethu ngalokho esikwenzile ngobuwula, nangalokho esone ngakho. 12 Ake angabi
njengofileyo, onyama yakhe idliwe inxenye, nxa ephuma esizalweni sikanina." 13 UMose
wakhala kuJehova, wathi: "O Nkulunkulu, mawumphulukise, ngiyakuncenga." 14 UJehova wathi
kuMose: "Uma uyise ebemkhafulele ebusweni, ubengebe namahloni izinsuku eziyisikhombisa
na? Makavalelwe ngaphandle kwekamu izinsuku eziyisikhombisa; ngasemva kwalokho
uyakubuye angeniswe." 15 UMiriyamu wavalelwa ngaphandle kwekamu izinsuku
eziyisikhombisa; abantu abahambanga, waze wabuyiswa uMiriyamu. 16 Ngasemuva abantu
basuka eHaseroti, bamisa ehlane lasePharanu.

13
1
UJehova wakhuluma kuMose, wathi: 2 "Thuma wena abantu ukuba bahlole izwe laseKhanani
engibanika lona abantwana bakwa-Israyeli; uthume umuntu waleso naleso sizwe sawoyise, kube
yilowo nalowo abe yinduna phakathi kwabo." 3 UMose wabathuma-ke besuka ehlane
lasePharanu ngesiyalezo sikaJehova; bonke babo babe ngabantu abayizinhloko zabantwana
bakwa-Israyeli. 4 Lawa angamagama abo: Owesizwe sakwaRubeni: uShamuwa indodana
kaZakuri. 5 Owesizwe sakwaSimeyoni: uShafati indodana kaHori. 6 Owesizwe sakwaJuda:
uKalebi indodana kaJefune. 7 Owesizwe sakwa-Isakare: u-Igali indodana kaJosefa. 8 Owesizwe
sakwa-Efrayimi: uHosheya indodana kaNuni. 9 Owesizwe sakwaBenjamini: uPaliti indodana
kaRafu. 10 Owesizwe sakwaZebuloni: uGadiyeli indodana kaSodi. 11 Owesizwe sakwaJosefa,
owesizwe sakwaManase: uGadi indodana kaSusi. 12 Owesizwe sakwaDani: u-Amiyeli indodana
kaGemali. 13 Owesizwe sakwa-Asheri: uSethuru indodana kaMikayeli. 14 Owesizwe
sakwaNafetali: uNabi indodana kaVofisi. 15 Owesizwe sakwaGadi: uGewuweli indodana kaMaki.
16
Yilawo amagama amadoda athunywa nguMose ukuhlola izwe. UMose wambiza uHosheya
indodana kaNuni ngokuthi uJoshuwa. 17 UMose wabathuma ukuhlola izwe laseKhanani, wathi
kubo: "Yenyukani ngalapha, niye ngaseningizimu, nikhuphukele ezintabeni, 18 nibone izwe
ukuthi linjani, nabantu abakhe kulo ukuthi banamandla noma babuthakathaka, bayingcosana
noma baningi yini, 19 nokuthi izwe abakhe kulo linjani, noma lihle noma libi, nokuthi imizi
abahlala kuyo injani, noma ngamakamu noma yizinqaba, 20 nokuthi izwe linjani, noma livundile
noma limpofu, noma linezinkuni noma qha. Yibani nesibindi, nibuye nezithelo zezwe." Kwase
kuyisikhathi sezithelo zokuqala zomvini.
21
Base behamba-ke, bahlola izwe kusukela ehlane laseSini kuze kube seRehobe ekuyeni
ngaseHamati. 22 Benyukela ngaseningizimu, bafika eHebroni; o-Ahimani, noSheshayi,
noTalimayi, abantwana bakwa-Anaki, babelapho. IHebroni lakhiwa iminyaka eyisikhombisa
lingakakhiwa iSowani laseGibithe. 23 Bafika esiGodini sase-Eshikoli, banquma khona igatsha
elinehlukuzo lezithelo zomvini, balithwala ngothi phakathi kwababili, kanye namapomegranati
namakhiwane. 24 Leyo ndawo yathiwa isiGodi sase-Eshikoli ngenxa yehlukuzo abantwana
bakwa-Israyeli abalinquma khona. 25 Base bebuya ekuhloleni izwe ngasekupheleni kwezinsuku
ezingamashumi amane.
26
Baya bafika kuMose naku-Aroni nakuyo yonke inhlangano yabantwana bakwa-Israyeli ehlane
lasePharanu eKadeshi, babuyisela izwi kubo nakuyo yonke inhlangano, bababonisa izithelo
zezwe. 27 Bamtshela bathi: "Safika-ke ezweni owasithuma kulo; ngempela livame ubisi
nezinyosi; lokhu kuyizithelo zalo. 28 Nokho abantu abakhe ezweni banamandla, imizi ibiyelwe,
mikhulu kakhulu; futhi sabona abantwana bakwa-Anaki khona. 29 U-Amaleki wakhile ezweni
laseningizimu; amaHeti, namaJebusi, nama-Amori ahlala ezintabeni; amaKhanani akhile
ngaselwandle naseceleni kweJordani." 30 UKalebi wathulisa abantu phambi kukaMose, wathi:
"Masenyuke khona manje, silidle, ngokuba sinamandla okulinqoba." 31 Kepha amadoda
ayenyuke naye athi: "Asinakwenyuka, sihlasele labo bantu, ngokuba banamandla kunathi." 32
Base belandisa abantwana bakwa-Israyeli umbiko omubi ngezwe ababelihlolile, bathi: "Izwe
esilidabulile ukulihlola liyizwe elidla abakhileyo kulo; bonke abantu esababona kulo bangabantu
abajaheleyo. 33 Sabona khona iziqhwaga, amadodana ka-Anaki avela eziqhwageni; emehlweni
ethu saba njengezintethe, saba njalo nasemehlweni abo."

14
1
Inhlangano yonke yayisiphakamisa izwi layo, yakhala. Abantu bakhala izinyembezi ngalobo
busuku. 2 Bonke abantwana bakwa-Israyeli bakhonona ngoMose nango-Aroni; yonke inhlangano
yathi kubo: "Sengathi nga safa ezweni laseGibithe, noma sengathi nga safa kuleli hlane. 3
UJehova usilethelani kuleli zwe, siwe ngenkemba na? Omkethu nabancane bethu bayakuba
yimpango; bekungengcono yini kithi ukubuyela eGibithe na?" 4 Bathi omunye komunye:
"Masibeke induna, sibuyele eGibithe."
5
Khona oMose no-Aroni bawa ngobuso babo phambi kwebandla lonke lenhlangano yabantwana
bakwa-Israyeli. 6 UJoshuwa indodana kaNuni noKalebi indodana kaJefune ababephakathi
kwabahlola izwe baklebhula izingubo zabo, 7 bakhuluma kuyo yonke inhlangano yabantwana
bakwa-Israyeli, bathi: "Izwe esalidabula ukulihlola liyizwe elihle kakhulu. 8 Uma uJehova
esithanda, uyakusingenisa kulelo zwe, asinike lona, izwe elivame ubisi nezinyosi. 9 Kodwa
ningahlubuki kuJehova, futhi ningesabi abantu balelo zwe; ngokuba bayisinkwa kithi; umthunzi
wabo usukile phezu kwabo, kodwa uJehova unathi; ningabesabi." 10 Kepha inhlangano yonke
yathi mabakhandwe ngamatshe. Inkazimulo kaJehova yabonakala etendeni lokuhlangana kubo
bonke abantwana bakwa-Israyeli.
11
UJehova wayesekhuluma kuMose, wathi: "Koze kube nini laba bantu bengidelela na? Koze
kube nini bengakholwa yimi ngezibonakaliso zonke engizenzile phakathi kwabo na? 12
Ngiyakubashaya ngesifo, ngibaphuce ifa, ngikwenze isizwe esikhulu nesinamandla kunabo." 13
UMose wathi kuJehova: "Khona abaseGibithe bayakukuzwa, ngokuba wakhuphula laba bantu
ngamandla akho phakathi kwabo, 14 babatshele abakhe kuleli zwe; bezwile ukuthi wena Jehova
uphakathi kwalaba bantu, babonane nawe Jehova ubuso nobuso; ifu lakho limi phezu kwabo,
wena uhamba phambi kwabo usensikeni yefu emini nasensikeni yomlilo ebusuku. 15 Manje-ke
uma ubulala laba bantu njengomuntu munye, izizwe ezizwe udumo lwakho ziyakukhuluma zithi:
16
‘Ngokuba uJehova ebengenamandla okungenisa abantu bakhe ezweni alifungela kubo,
ngalokho ubabulele ehlane.’ 17 "Kalokhu ake abe makhulu amandla eNkosi njengokusho kwakho
ukuthi: 18 ‘UJehova uyephuza ukuthukuthela, uvame umusa, uthethelela ububi neziphambeko,
angayekeli nokho onecala, kepha ahambele ububi bawoyise kubantwana, kuze kube
sezizukulwaneni sesithathu nesesine.’ 19 Ake uthethelele ububi balaba bantu ngokobukhulu
bomusa wakho, njengalokho uyekele laba bantu kusukela eGibithe kuze kube manje."
20
UJehova wathi: "Yebo, ngiyathethelela njengezwi lakho; 21 kepha impela, kuphila kwami
nenkazimulo kaJehova eyakugcwalisa wonke umhlaba, 22 lokhu bonke labo bantu ababone
inkazimulo yami nezibonakaliso zami engazenza eGibithe nasehlane bengilingile kayishumi,
abalalela izwi lami, 23 abayikubona ngempela izwe engalifungela oyise, futhi aliyikubonwa
muntu walabo abangidelela; 24 kepha inceku yami uKalebi, lokhu wayenomunye umoya,
wangilandela ngokupheleleyo, yena ngiyakumngenisa ezweni aya kulo; inzalo yakhe iyakulidla.
25
Ama-Amaleki namaKhanani akhile esigodini; jikani kusasa, ningene ehlane ngasendleleni eya
eLwandle Olubomvu." 26 UJehova wakhuluma kuMose naku-Aroni, wathi: 27 "Koze kube nini le
nhlangano embi ikhonona ngami na? Ngizwile ukukhonona kwabantwana bakwa-Israyeli
abakhonona ngakho ngami. 28 Yisho kubo ukuthi: ‘Kuphila kwami, ngiyakwenza kini impela
njengalokho nikhulumile ezindlebeni zami: 29 izidumbu zenu ziyakuwa kuleli hlane, nabo bonke
ababalwayo kini njengokomumo wenu wonke, kusukela kwabaneminyaka engamashumi amabili
kuya phezulu, abakhononile ngami, 30 abayikungena ngempela ezweni engaphakamisa ngalo
isandla sami ukuthi bengiyakunakhisa kulo, ngaphandle kukaKalebi indodana kaJefune
noJoshuwa indodana kaNuni. 31 Kepha abancane benu enasho ngabo ukuthi bayakuba yimpango,
bona ngiyakubangenisa, balazi izwe enalilahla. 32 Nina-ke, izidumbu zenu ziyakuwa kuleli hlane.
33
Abantwana benu bayakuba ngabelusi ehlane iminyaka engamashumi amane, bathwale
ukuphinga kwenu, izidumbu zenu zize ziqedwe ehlane. 34 Njengokomumo wezinsuku enahlola
ngazo izwe, izinsuku ezingamashumi amane, umnyaka ngosuku, niyakuthwala ububi benu, yebo,
iminyaka engamashumi amane, nize nazi ukuthi kunjani uma ngimelana nani.’ 35 Mina Jehova
ngikhulumile; ngiyakwenza lokho ngempela kuyo yonke le nhlangano embi engihlanganyeleyo;
kuleli hlane bayakuqedwa, bafele khona."
36
Nalawo madoda athunywa nguMose ukuhlola izwe, abuya akhononisa yonke inhlangano ngaye
ngokuletha umbiko omubi ngezwe, 37 wona lawo madoda aletha umbiko omubi ngezwe afa
ngesifo phambi kukaJehova. 38 Kepha uJoshuwa indodana kaNuni noKalebi indodana kaJefune
ababenalawo madoda ukuhlola izwe basinda. 39 UMose wakhuluma lawo mazwi kubo bonke
abantwana bakwa-Israyeli; abantu balila kakhulu. 40 Bavuka ekuseni kakhulu, benyukela
esiqongweni sentaba, bathi: "Bhekani, sesilapha, kepha siyakuya endaweni ayithembisile
uJehova, ngokuba sonile." 41 UMose wathi: "Neqelani izwi likaJehova na? Akuyikuphumelela. 42
Ningenyuki, ngokuba uJehova akakho phakathi kwenu, ukuba ningashaywa ebusweni bezitha
zenu. 43 Ngokuba ama-Amaleki namaKhanani alapho ngaphambi kwenu; niyakuwa ngenkemba,
lokhu nibuyele emuva ekumlandeleni uJehova; ngalokho uJehova akayikuba khona phakathi
kwenu." 44 Ngokuzidla bakhuphukela nokho esiqongweni sentaba, kepha umphongolo
wesivumelwano sikaJehova noMose awuphumanga ekamu. 45 Ayesehla ama-Amaleki kanye
namaKhanani ayehlala kuleyo ntaba, abashaya, abaqothula kwaze kwaba seHorma.

15
1
UJehova wakhuluma kuMose, wathi: 2 "Yisho kubantwana bakwa-Israyeli, uthi kubo: ‘Nxa
nifika ezweni eniyakwakha kulo, engininika lona, 3 nenze umnikelo womlilo kuJehova, umnikelo
wokushiswa, noma umhlatshelo wokugcwalisa isithembiso, noma umnikelo wesihle, noma
owemikhosi yenu emisiweyo, ukwenza iphunga elimnandi kuJehova, owezinkomo noma
owezimvu, 4 khona-ke onikela ngomnikelo wakhe woletha kuJehova umnikelo wempuphu
wokweshumi kwempuphu ecolekileyo exovwe nokwesine kwehini lamafutha; 5 newayini libe
ngumnikelo wokuphuzwa, okwesine kwehini ngemvana inye, wolilungisela umnikelo
wokushiswa noma umhlatshelo. 6 "‘Kepha inqama uyakuyilungisela okweshumi okubili
kwempuphu ecolekileyo exovwe nokwesithathu kwehini lamafutha, kube ngumnikelo
wempuphu; 7 uyakunikela okwesithathu kwehini lewayini libe ngumnikelo wokuphuzwa
nephunga elimnandi kuJehova. 8 "‘Nxa ulungisa iduna libe ngumnikelo wokushiswa, noma
umhlatshelo wokugcwalisa isithembiso, noma kube yiminikelo yokuthula kuJehova, 9
uyakunikela ngomnikelo wempuphu wokweshumi okuthathu kwempuphu ecolekileyo exovwe
nenxenye yehini lamafutha kanye neduna. 10 Uyakunikela ngenxenye yehini lewayini libe
ngumnikelo wokuphuzwa, kube ngumnikelo womlilo wephunga elimnandi kuJehova. 11
Kuyakwenziwa kanjalo ngaleyo naleyo nkunzi, noma ngaleyo naleyo nqama, noma ngaleyo
naleyo mvana yeduna, noma ngamazinyane ezimbuzi. 12 Njengokomumo eniwulungisayo
niyakwenze njalo kuleyo naleyo njengokomumo wazo. 13 "‘Bonke abokuzalwa ekhaya
bayakwenza lezo zinto ngaleyo ndlela, benikela ngomnikelo womlilo wephunga elimnandi
kuJehova. 14 Uma umfokazi egogobele kuwe, noma ubani ophakathi kwenu ezizukulwaneni zenu
eyakunikela ngomnikelo womlilo wephunga elimnandi kuJehova, uyakwenza njengalokhu nenza
nina. 15 Ebandleni kuyakuba yisimiso sinye kini nakumfokazi ogogobeleyo kini, isimiso
esiphakade ezizukulwaneni zenu; njengani uyakuba njalo umfokazi phambi kukaJehova. 16
Kuyakuba ngumthetho munye nesimiso sinye kinina nakumfokazi ogogobeleyo kini.’" 17
UJehova wakhuluma kuMose, wathi: 18 "Yisho kubantwana bakwa-Israyeli, uthi kubo: ‘Nxa
nifika ezweni enginiyisa kulo, 19 kuyakuthi, lapho nidla isinkwa sezwe, ninikele ngomnikelo
wokuphakanyiswa kuJehova. 20 Ngolibo lomgqakazo wenu niyakunikela ngeqebelengwane libe
ngumnikelo wokuphakanyiswa; njengalokhu nenza umnikelo wokuphakanyiswa wesibuya,
niyakuwenza kanjalo. 21 Ngolibo lomgqakazo wenu niyakunika uJehova umnikelo
wokuphakanyiswa ezizukulwaneni zenu.
22
"‘Nxa niduka ningagcini yonke le miyalo uJehova ayikhulumile kuMose, 23 konke uJehova
aniyalile ngesandla sikaMose, kusukela osukwini uJehova ayala ngalo nangasemuva
ezizukulwaneni zenu, 24 kuyakuthi uma kwenziwe kungengamabomu, futhi kungesemehlweni
enhlangano, inhlangano yonke inikele ngeduna libe ngumnikelo wokushiswa wephunga
elimnandi kuJehova kanye nomnikelo wayo wempuphu, nomnikelo wayo wokuphuzwa
ngokomthetho, nempongo ibe nye, ibe ngumnikelo wesono. 25 Umpristi uyakuyenzela yonke
inhlangano yabantwana bakwa-Israyeli ukubuyisana, baze bathethelelwe, ngokuba
kwakungengamabomu, futhi balethile umnikelo wabo, umnikelo womlilo kuJehova, nomnikelo
wabo wesono phambi kukaJehova ngesiphosiso sabo; 26 yonke inhlangano yabantwana bakwa-
Israyeli iyakuthethelelwa kanye nomfokazi ogogobeleyo kubo, ngokuba kubo bonke abantu
kwakungesiphosiso. 27 "‘Uma umuntu ona kungengamabomu, uyakunikela ngembuzikazi
enomnyaka munye, ibe ngumnikelo wesono. 28 Umpristi uyakwenzela umuntu ophosisayo
ukubuyisana, nxa ona kungengamabomu phambi kukaJehova ukumenzela ukubuyisana,
athethelelwe. 29 Niyakuba nomthetho munye kowenza kungengamabomu, nakowokuzalwa
ekhaya phakathi kwabantwana bakwa-Israyeli nakumfokazi ogogobeleyo phakathi kwabo.
30
"‘Kepha okwenza ngesandla esiphakemeyo, noma engowokuzalwa ekhaya noma engumfokazi,
uyamhlambalaza uJehova; lowo muntu uyakunqunywa kubantu bakubo. 31 Ngokuba udelele izwi
likaJehova, nomyalo wakhe uwaphulile; lowo muntu uyakunqunywa impela, ububi bakhe bube
phezu kwakhe.’" 32 Abantwana bakwa-Israyeli besesehlane bafumana umuntu otheza izinkuni
ngosuku lwesabatha. 33 Abamfumana etheza izinkuni bamyisa kuMose naku-Aroni nakuyo yonke
inhlangano. 34 Bambeka ukuba alindwe, ngokuba kwakungakanqunywa ukuthi kuyakwenziwani
kuye. 35 UJehova wathi kuMose: "Lowo muntu wobulawa nokubulawa; yonke inhlangano
iyakumkhanda ngamatshe ngaphandle kwekamu." 36 Yonke inhlangano yamkhiphela ngaphandle
kwekamu, yamkhanda ngamatshe, wafa, njengalokho uJehova emyalile uMose.
37
UJehova wakhuluma kuMose, wathi: 38 "Yisho kubantwana bakwa-Israyeli, usho kubo ukuba
bazenzele insephe emiphethweni yezingubo zabo ezizukulwaneni zabo, futhi ukuba babeke igoda
eliluhlaza ensepheni yemiphetho yonke; 39 lokhu kuyakuba kini insephe ukuba niyibheke,
nikhumbule yonke imiyalo kaJehova, niyenze, ningahambi ngeyenu inhliziyo nangawenu amehlo
enanivama ukukulandela ngokuphinga, 40 ukuba nikhumbule, niyenze yonke imiyalo yami, nibe
ngcwele kuNkulunkulu wenu. 41 NginguJehova uNkulunkulu wenu owanikhipha ezweni
laseGibithe, ngibe nguNkulunkulu wenu; nginguJehova uNkulunkulu wenu."

16
1
UKora kaJisihari kaKohati kaLevi, kanye noDathani no-Abiramu, amadodana ka-Eliyabe, no-
Oni indodana kaPheleti, amadodana kaRubeni, bathatha amadoda, 2 bamvukela uMose
benabathile babantwana bakwa-Israyeli, abangamakhulu amabili namashumi ayisihlanu, izikhulu
zenhlangano, amanxusa ebandla, amadoda adumileyo; 3 babahlanganyela oMose no-Aroni, bathi
kubo: "Sekwanele okwenu, lokhu inhlangano yonke ingcwele, bonke bayo, noJehova ekubo;
niziphakamiselani, pho, phezu kwebandla likaJehova na?" 4 UMose esekuzwile wawa ngobuso
bakhe; 5 wakhuluma kuKora nakulo iviyo lakhe, wathi: "Kusasa uJehova uyakwazisa ukuthi
ngubani ongowakhe nokuthi ngubani ongcwele, amsondeze kuye; lowo ayakumkhetha
uyakumsondeza kuye. 6 Yenzani lokhu: zithabatheleni imicengezi yomlilo, wena Kora neviyo
lakho lonke, 7 nifake kuyo umlilo, nibeke impepho kuyo phambi kukaJehova kusasa; kuyakuthi
umuntu amkhethayo uJehova, abengcwele; sekwanele okwenu, madodana kaLevi." 8 UMose
wathi kuKora: "Ake nizwe, madodana kaLevi: 9 kuyinto encane yini kini ukuthi uNkulunkulu ka-
Israyeli unahlukanisile nenhlangano ka-Israyeli, wanisondeza kuye ukwenza inkonzo
yetabernakele likaJehova nokuma phambi kwenhlangano ukuyikhonza, 10 nokuthi ukusondezile
wena, nabafowenu bonke, amadodana kaLevi, kanye nawe na? Senifisa nobupristi futhi na? 11
Ngalokho wena nalo lonke iviyo lakho nimhlanganyele uJehova; no-Aroni uyini yena ukuba
nikhonone ngaye na?"
12
UMose wathuma wabiza oDathani no-Abiramu, amadodana ka-Eliyabe; bathi:
"Asiyikukhuphuka; 13 kuyinto encane yini ukuthi wasikhuphula ezweni elivame ubisi nezinyosi
ukuba usibulale ehlane; usuyazenza nesikhulu phezu kwethu na? 14 Futhi awusingenisanga
ezweni elivame ubisi nezinyosi, awusinikanga ifa lamasimu nelezivini; uyakubhoboza amehlo
alaba bantu na? Asiyikukhuphuka." 15 UMose wathukuthela kakhulu, wathi kuJehova: "Unganaki
umnikelo wabo; angithathanga nayinye imbongolo kubo, futhi angilimazanga namunye kubo." 16
UMose wayesethi kuKora: "Wena yiba nayo yonke inhlangano yakho phambi kukaJehova
kusasa, wena, nabo, no-Aroni; 17 thabathani, kube yilowo nalowo umcengezi wakhe womlilo,
nibeke impepho kuyo, nilethe phambi kukaJehova kube yilowo nalowo umcengezi wakhe,
imicengezi yomlilo engamakhulu amabili namashumi ayisihlanu, nawe futhi no-Aroni, kube
yilowo nalowo umcengezi wakhe." 18 Base bethatha, kwaba yilowo nalowo umcengezi wakhe
womlilo, bafaka kuyo umlilo, babeka impepho ngaphezulu, bema ngasemnyango wetende
lokuhlangana kanye noMose no-Aroni. 19 UKora wahlanganisela kubo yonke inhlangano
ngasemnyango wetende lokuhlangana; inkazimulo kaJehova yabonakala kuyo yonke inhlangano.
20
UJehova wayesekhuluma kuMose naku-Aroni, wathi: 21 "Zahlukaniseni nale nhlangano ukuba
ngibaqede ngokuphazima kweso." 22 Bawa ngobuso babo, bathi: "Nkulunkulu, Nkulunkulu
wemimoya yenyama yonke, kona umuntu munye, uthukuthelele inhlangano yonke, na?"
23
UJehova wakhuluma kuMose, wathi: 24 "Yisho kuyo inhlangano, uthi: ‘Khuphukani
ngasekamu likaKora nelikaDathani nelika-Abiramu.’" 25 UMose wavuka waya kuDathani naku-
Abiramu; amalunga akwa-Israyeli amlandela. 26 Wayesekhuluma kuyo inhlangano, wathi: "Ake
nisuke ematendeni alaba bantu ababi, ningathinti lutho olwabo, funa niqedwe ngezono zabo
zonke." 27 Base bekhuphuka ekamu likaKora nelikaDathani nelika-Abiramu nxazonke; oDathani
no-Abiramu baphuma, bema ngasemnyango wamatende abo kanye nawomkabo, namadodana
abo, nezingane zabo. 28 UMose wathi: "Niyakwazi ngalokhu ukuthi uJehova ungithumile
ukwenza yonke le misebenzi, ngokuba angiyenzanga ngowami umqondo. 29 Uma laba bantu befa
ngokufa kwabantu bonke, noma behlelwa ngokwehlela abantu bonke, uJehova uyakube
kangithumanga. 30 Kepha uma uJehova edala into entsha, umhlaba uvule umlomo wawo,
ubagwinye kanye nakho konke okwabo, bashone besezwa endaweni yabafileyo, niyakuqonda
ukuthi laba bantu bamdelele uJehova." 31 Kwathi eseqedile onke lawo mazwi, umhlaba ophansi
kwabo waqhekezeka; 32 umhlaba wavula umlomo wawo, wabagwinya nezindlu zabo, nabantu
bonke bakaKora, nempahla yabo yonke. 33 Bona bashona besezwa nakho konke okwabo
endaweni yabafileyo; umhlaba wabagqiba, baqothulwa ebandleni. 34 Bonke abakwa-Israyeli
ababebazungeza babaleka ngokukhala kwabo, ngokuba bathi: "Funa umhlaba usigwinye nathi."
35
Umlilo waphuma kuJehova, waqeda abantu abangamakhulu amabili namashumi ayisihlanu,
ababenikele ngempepho. 36 UJehova wakhuluma kuMose, wathi: 37 "Yisho ku-Eleyazare
indodana ka-Aroni umpristi ukuba akhiphe imicengezi yomlilo ekusheni, wena uwuhlakaze
umlilo laphaya, ngokuba ingcwele, 38 imicengezi yalaba boni abone imiphefumulo yabo ibe
ngongcwecwe abakhandiweyo abayakulimboza i-altare, ngokuba banikela ngayo phambi
kukaJehova; ngalokho ingcwele; iyakuba luphawu kubantwana bakwa-Israyeli." 39 U-Eleyazare
umpristi wayithatha imicengezi yethusi abanikele ngayo abashileyo; bayikhanda yaba yisimbozo
se-altare, 40 ibe yisikhumbuzo kubantwana bakwa-Israyeli, ukuze umfokazi ongesiye owenzalo
ka-Aroni angasondeli ukushisa impepho phambi kukaJehova, angabi njengoKora neviyo lakhe,
njengalokho uJehova wakhuluma kuye ngesandla sikaMose.
41
Kepha ngolwangakusasa yonke inhlangano yabantwana bakwa-Israyeli yakhonona ngoMose
nango-Aroni, yathi: "Nibabulele abantu bakaJehova." 42 Kwathi inhlangano isibahlanganyele
oMose no-Aroni, babheka ngasetendeni lokuhlangana; bheka, ifu lalisibekela, inkazimulo
kaJehova yabonakala. 43 OMose no-Aroni bafika ngaphambi kwetende lokuhlangana. 44 UJehova
wakhuluma kuMose, wathi: 45 "Khuphuka kule nhlangano ukuba ngibaqede ngokuphazima
kweso." Bawa ngobuso babo. 46 UMose wathi ku-Aroni: "Thatha umcengezi wakho womlilo,
ubeke kuwo umlilo wase-altare, ufake impepho ngaphezulu, ukuyise masinyane kuyo inhlangano,
uyenzele ukubuyisana, ngokuba kuphume intukuthelo kuJehova; isifo sesiqalile." 47 U-Aroni
wayesekuthatha njengalokho ekhulumile uMose, wagijima phakathi kwebandla; bheka, isifo sase
siqalile phakathi kwabantu; wabeka impepho, wabenzela abantu ukubuyisana. 48 Wema phakathi
kwabafileyo nabaphilayo; isifo sanqamuka. 49 Abafile ngesifo babe yizinkulungwane eziyishumi
nane namakhulu ayisikhombisa ngaphandle kwalabo abafa ngendaba kaKora. 50 U-Aroni
wabuyela kuMose ngasemnyango wetende lokuhlangana; isifo sanqamuka.

17
1
UJehova wakhuluma kuMose, wathi: 2 "Khuluma kubantwana bakwa-Israyeli, uthabathe kubo
izintonga, ibe nye kuleyo naleyo ndlu kayise, kuzo zonke izikhulu njengezindlu zawoyise,
izintonga eziyishumi nambili; loba wena igama lalowo nalowo muntu entongeni yakhe. 3
Uyakuloba igama lika-Aroni entongeni kaLevi, ngokuba kuyakuba yintonga inye kuleyo naleyo
nhloko yezindlu zawoyise. 4 Uyakuzibekela etendeni lokuhlangana ngaphambi kobufakazi, lapho
ngihlangana khona nawe. 5 Kuyakuthi umuntu engiyakumkhetha, intonga yakhe ihlume, ngenze
ukuba kuphele ngakimi ukukhonona kwabantwana bakwa-Israyeli abakhonona ngakho ngani." 6
UMose wakhuluma kubantwana bakwa-Israyeli, zonke izikhulu zamnika izintonga ngayinye
kuleso naleso sikhulu njengezindlu zawoyise, izintonga eziyishumi nambili. 7 UMose wazibeka
izintonga phambi kukaJehova etendeni lobufakazi.
8
Kwathi ngolwangakusasa uMose wangena etendeni lobufakazi; bheka, intonga ka-Aroni yendlu
kaLevi ibisihlumile, ivezile imiqumbe, iqhakazile izimbali, ithele ama-alimondi avuthiweyo. 9
UMose wakhiphela bonke abantwana bakwa-Israyeli zonke izintonga ngaphambi kukaJehova,
babheka, yilowo nalowo wathatha intonga yakhe. 10 UJehova wathi kuMose: "Buyisa intonga ka-
Aroni ngaphambi kobufakazi, igcinwe ibe luphawu kubahlubuki, ukuze uqede ukukhonona
kwabo ngami ukuba bangafi." 11 UMose wenze njalo; njengalokho uJehova emyalile, wenze
njalo-ke. 12 Abantwana bakwa-Israyeli bakhuluma kuMose, bathi: "Bheka, siyaphela,
siyashabalala, sishabalala sonke. 13 Bonke abasondelayo abasondela etabernakele likaJehova
bayakufa; siyakuphela sonke na?"

18
1
UJehova wathi ku-Aroni: "Wena namadodana akho nendlu kayihlo kanye nawe niyakuthwala
ububi bendlu engcwele; wena namadodana akho kanye nawe niyakuthwala ububi bobupristi
benu. 2 Nabafowenu, isizwe sakwaLevi, isizwe sikayihlo, sondela nabo ukuba bahlanganiswe
nawe, bakukhonze; kepha wena namadodana akho kanye nawe niyakuba ngaphambi kwetende
lobufakazi. 3 Bayakugcina imfanelo yakho nenkonzo yetende lonke; kodwa abayikusondela
empahleni yendlu engcwele nase-altare, ukuze bangafi, nabo nani. 4 Bayakuhlanganiswa nawe,
bagcine inkonzo yetende lokuhlangana kuwo wonke umsebenzi wetende; umfokazi
akayikusondela kuwe. 5 "Niyakugcina inkonzo yendlu engcwele nenkonzo yase-altare, ukuze
ulaka lungabe lusaba khona phezu kwabantwana bakwa-Israyeli. 6 Bhekani, mina ngithabathe
abafowenu amaLevi phakathi kwabantwana bakwa-Israyeli; bayisipho kini, benikelwe kuJehova
ukwenza umsebenzi wetende lokuhlangana. 7 Wena namadodana akho kanye nawe niyakugcina
ubupristi kukho konke okwe-altare, nakukho konke okuphakathi kwesihenqo; niyakukhonza;
ngiyaninika ubupristi njengenkonzo yesipho; umfokazi osondelayo wobulawa."
8
UJehova wakhuluma ku-Aroni, wathi: "Bheka, mina ngikunike ukugcina iminikelo yami
yokuphakanyiswa; zonke izinto ezingcwelisiwe zabantwana bakwa-Israyeli ngikunikile zona
wena namadodana akho ngenxa yokugcotshwa, kube yisimiso esiphakade. 9 Lokhu kuyakuba
ngokwakho ezintweni ezingcwelengcwele ezisale emlilweni: yonke iminikelo yabo, yonke
iminikelo yabo yempuphu, nayo yonke iminikelo yabo yesono, nayo yonke iminikelo yabo yecala
abanikela ngayo kimi iyakuba ngcwelengcwele kuwe nakumadodana akho. 10 Niyakudlela lokhu
endaweni engcwelengcwele; bonke abesilisa bayakukudla; kuyakuba ngcwele kuwe. 11 "Lokhu
kungokwakho: umnikelo wokuphakanyiswa wesipho sabo, nayo yonke iminikelo yokuzuliswa
yabantwana bakwa-Israyeli; ngiyinikile wena namadodana akho namadodakazi akho kanye nawe
ibe yimfanelo ephakade; yilowo nalowo ohlambulukileyo endlini yakho uyakukudla. 12 "Konke
okuhle kwamanoni nakho konke okuhle kwewayini nokwamabele, ulibo lwalokho abanikela
ngakho kuJehova ngikunikile khona. 13 Ulibo oluvuthwa kuqala lwakho konke okusezweni
lakubo abaluletha kuJehova luyakuba ngolwakho; yilowo nalowo ohlambulukileyo endlini yakho
uyakukudla. 14 "Konke okwahlukanisiwe kwa-Israyeli kuyakuba ngokwakho. 15 Konke okuvula
isizalo senyama yonke abanikela ngakho kuJehova, okomuntu nokwesilwane, kuyakuba
ngokwakho; nokho izibulo lomuntu wolihlenga ngempela, nezibulo lezilwane ezingcolileyo
wolihlenga. 16 Okuhlengwayo kuyakuhlengwa kusukela kokunenyanga ngokulinganisa kwakho
ngemali yamashekeli ayisihlanu ngokweshekeli lendlu engcwele elingamagera angamashumi
amabili. 17 "Kepha izibulo lenkomo, noma izibulo lemvu, noma izibulo lembuzi,
awuyikulihlenga, lingcwele; uyakufafaza i-altare ngegazi lazo, ushise amanoni azo abe
ngumnikelo womlilo wephunga elimnandi kuJehova. 18 Inyama yazo iyakuba ngeyakho;
njengesifuba sokuzuliswa nomlenze wokunene iyakuba ngeyakho. 19 Yonke iminikelo yezinto
ezingcwele abantwana bakwa-Israyeli abanikela ngayo ngiyinikile wena namadodana akho
namadodakazi akho kanye nawe ibe yimfanelo ephakade; kuyisivumelwano sikasawoti kuze kube
phakade ngaphambi kukaJehova kuwena nakuyo inzalo yakho kanye nawe."
20
UJehova wathi ku-Aroni: "Awuyikuba nafa ezweni lakubo, futhi ungabi nasabelo phakathi
kwabo; mina ngiyisabelo sakho nefa lakho phakathi kwabantwana bakwa-Israyeli. 21 "Bhekani,
ngibanikile abantwana bakwaLevi konke okweshumi kwa-Israyeli, kube yifa labo, ngomsebenzi
abawusebenzayo, inkonzo yetende lokuhlangana. 22 Abantwana bakwa-Israyeli mabangabe
besasondela etendeni lokuhlangana, funa bathwale isono, bafe. 23 Kepha amaLevi ayakugcina
inkonzo yetende lokuhlangana, athwale ububi bawo; kuyakuba yisimiso esiphakade
ezizukulwaneni zenu; naphakathi kwabantwana bakwa-Israyeli abayikuba nafa. 24 Ngokuba
okweshumi kwabantwana bakwa-Israyeli abanikela ngakho, kube ngumnikelo wokuphakanyiswa
kuJehova, ngikunikile amaLevi kube yifa lawo; ngalokho ngishilo kuwo, ngathi: ‘Phakathi
kwabantwana bakwa-Israyeli aniyikuba nafa.’" 25 UJehova wakhuluma kuMose, wathi: 26 "Futhi
uyakukhuluma kumaLevi, uthi kuwo: ‘Nxa nithabatha kwabakwa-Israyeli okweshumi engininike
khona kuvela kubo, kube yifa lenu, niyakunikela ngomnikelo wokuphakanyiswa kuJehova,
okweshumi kokweshumi. 27 Umnikelo wenu wokuphakanyiswa uyakubalelwa nina, njengalokho
bekungamabele esibuya nanjengokugcwala kwesikhamo sewayini. 28 Kanjalo nani niyakunikela
ngomnikelo wokuphakanyiswa kuJehova ngakho konke okweshumi kwenu enikwamukelayo
kubantwana bakwa-Israyeli; niyakunikela ku-Aroni umpristi ngomnikelo wokuphakanyiswa
kaJehova. 29 Kuzo zonke izipho zenu niyakunikela ngayo yonke iminikelo yokuphakanyiswa
kuJehova, konke okuhle kwayo, inxenye yayo engcwelisiweyo.’ 30 "Ngalokho uyakusho kubo
ukuthi: ‘Nxa niphakamisa okuhle kwayo, kuyakubalelwa amaLevi njengokwanda kwesibuya
nokwanda kwesikhamo sewayini. 31 Niyakukudlela ezindaweni zonke, nina nabezindlu zenu,
ngokuba kungumvuzo wenu ngomsebenzi wenu etendeni lokuhlangana. 32 Aniyikuthwala sono
ngenxa yakho, lapho seniphakamisile okuhle kwakho, ningahlambalazi izinto ezingcwele
zabantwana bakwa-Israyeli ukuba ningafi.’"

19
1
UJehova wakhuluma kuMose naku-Aroni, wathi: 2 "Lokhu kuyisimiso somthetho uJehova
ayalile ngaso ukuthi: ‘Yisho kubantwana bakwa-Israyeli ukuba balethe kuwe isithole esibomvu
esingenasici, singenansolo, okungazange kubekwe ijoka phezu kwaso, 3 nisinike u-Eleyazare
umpristi, yena asikhiphele ngaphandle kwekamu, sihlatshwe phambi kwakhe; 4 u-Eleyazare
umpristi uyakuthabatha igazi laso ngomunwe wakhe, afafaze kasikhombisa ngaphambi kwetende
lokuhlangana ngegazi laso, 5 isithole sishiswe phambi kwakhe, isikhumba saso, nenyama yaso,
negazi laso, kanye nomswani waso kushiswe; 6 umpristi uyakuthabatha umsedari, nehisopi,
nendwangu ebomvu, akuphonse phakathi kokushayo kwesithole. 7 Umpristi useyakuhlanza
izingubo zakhe, ageze umzimba wakhe ngamanzi, andukuba angene ekamu, umpristi abe
ngongcolile kuze kuhlwe. 8 Osishisayo uyakuhlanza izingubo zakhe ngamanzi, ageze umzimba
wakhe ngamanzi, abe ngongcolile kuze kuhlwe. 9 "‘Umuntu ohlambulukileyo uyakubutha
umlotha wesithole, awubekele ngaphandle kwekamu endaweni ehlambulukileyo, ugcinelwe
inhlangano yabantwana bakwa-Israyeli kube ngamanzi okuphothula; kungumnikelo wesono. 10
Obutha umlotha wesithole uyakuhlanza izingubo zakhe, abe ngongcolile kuze kuhlwe; kuyakuba
yisimiso esiphakade kubantwana bakwa-Israyeli nakumfokazi ogogobeleyo phakathi kwabo.
11
"‘Othinta isidumbu somuntu uyakuba ngongcolile izinsuku eziyisikhombisa. 12
Uyakuziphothula ngawo ngosuku lwesithathu, nangosuku lwesikhombisa uyakuhlambuluka;
kepha uma engaziphothuli ngosuku lwesithathu, akayikuhlambuluka ngosuku lwesikhombisa. 13
Yilowo nalowo othinta isidumbu somuntu ofileyo, angaziphothuli, uyangcolisa itabernakele
likaJehova; lowo muntu uyakunqunywa ku-Israyeli, ngokuba amanzi okuphothula akafafazwanga
ngawo; uyakuba ngongcolile; ukungcola kwakhe kuse kuye. 14 "‘Nanku umthetho, uma umuntu
efela etendeni: yilowo nalowo ongena etendeni nalowo osetendeni uyakuba ngongcolile izinsuku
eziyisikhombisa. 15 Nazo zonke izitsha ezivulekileyo ezingenaso isisibekelo esiboshwe kuzo
zingcolile. 16 "‘Yilowo nalowo othinta endle obulewe ngenkemba, noma isidumbu, noma ithambo
lomuntu, noma ithuna, uyakuba ngongcolile izinsuku eziyisikhombisa. 17 "‘Abangcolileyo
bayakuthatha umlotha wokushayo komnikelo wesono, namanzi agobhozayo ayakuthelwa kanye
nawo esitsheni, 18 umuntu ohlambulukileyo athabathe ihisopi, aligcobhoze emanzini, afafaze
ngawo itende, nezitsha zonke, nabantu ababelapho, nowathinta ithambo, noma ababuleweyo,
noma abafileyo, noma ithuna, 19 umuntu ohlambulukileyo amfafaze ongcolileyo ngosuku
lwesithathu nangosuku lwesikhombisa, amphothule ngosuku lwesikhombisa, ahlanze izingubo
zakhe, ageze ngamanzi, ahlambuluke ngakusihlwa. 20 Kepha umuntu ongcolayo engaziphothuli,
lowo muntu uyakunqunywa phakathi kwebandla, ngokuba ungcolisile indlu engcwele kaJehova;
amanzi okuphothula akafafazwanga ngawo; ungcolile. 21 Kuyakuba yisimiso esiphakade kubo;
ofafaza amanzi okuphothula uyakuhlanza izingubo zakhe, nothinta amanzi okuphothula uyakuba
ngongcolile kuze kuhlwe. 22 Lokhu umuntu ongcolileyo akuthintayo kuyakuba ngokungcolile;
umuntu okuthintayo uyakuba ngongcolile kuze kuhlwe.’"

20
1
Abantwana bakwa-Israyeli, yonke inhlangano, bafika ehlane laseSini ngenyanga yokuqala;
abantu bahlala eKadeshi; uMiriyamu wafela khona, wembelwa khona futhi. 2 Kwakungekho
manzi lapho kuyo inhlangano; babahlanganyela oMose no-Aroni. 3 Abantu balwa noMose,
bakhuluma bathi: "Sengathi ngabe safa ekufeni kwabafowethu phambi kukaJehova. 4 Niletheleni
ibandla likaJehova kuleli hlane, ukuze sifele lapha, thina nezinkomo zethu, na? 5
Nasikhuphulelani eGibithe, ukuze silethwe kule ndawo embi, na? Akusiyo indawo yembewu,
noma eyamakhiwane, noma eyemivini, noma eyamapomegranati, kungekho futhi amanzi
okuphuza." 6 OMose no-Aroni basuka ebusweni bebandla ukuya ngasemnyango wetende
lokuhlangana, bawa ngobuso babo; inkazimulo kaJehova yabonakala kubo. 7 UJehova
wakhuluma kuMose, wathi: 8 "Thabatha intonga, ubuthe inhlangano, wena no-Aroni umfowenu,
nikhulume kulo idwala eliphambi kwamehlo abo ukuba liveze amanzi alo; uyakubavezela amanzi
edwaleni, ukuze unike inhlangano nezinkomo zayo ukuphuza." 9 UMose wathabatha intonga
phambi kukaJehova, njengalokho eyalile. 10 OMose no-Aroni babutha ibandla phambi kwedwala;
wathi-ke kubo: "Yizwani manje nina bahlubuki; siyakunivezela yini amanzi kuleli dwala na?" 11
UMose waphakamisa isandla sakhe, walishaya idwala kabili ngentonga yakhe, kwaphuma amanzi
amaningi, inhlangano yaphuza kanye nezinkomo zayo. 12 UJehova wathi kuMose naku-Aroni:
"Njengokuba anikholwanga yimi ukungingcwelisa emehlweni abantwana bakwa-Israyeli,
ngalokho aniyikungenisa leli bandla ezweni engibanike lona." 13 Lokhu kwakungamanzi
aseMeriba, ngokuba abantwana bakwa-Israyeli balwa noJehova, wangcweliswa kubo.
14
UMose wathuma izithunywa enkosini yakwa-Edomi, zisuka eKadeshi, wathi: "Usho kanje
umfowenu u-Israyeli: ‘Uyazazi zonke izinkathazo ezisehlele 15 ukuthi obaba behlela eGibithe,
sahlala eGibithe isikhathi eside; abaseGibithe basiphatha kabi thina nawobaba; 16 lapho sakhala
kuJehova, walizwa izwi lethu, wathuma ingelosi, wasikhipha eGibithe; bheka sesiseKadeshi,
umuzi oseceleni komkhawulo wakho; 17 ake sidabule izwe lakho; asiyikudabula amasimu
nezivini, singaphuzi amanzi emithombo; siyakuhamba ngomgwaqo wenkosi, singajiki
ngakwesokunene nangakwesokhohlo size sidlule umkhawulo wakho.’" 18 U-Edomi wathi kuye:
"Awuyikudabula kimi, funa ngikusukele ngenkemba." 19 Abantwana bakwa-Israyeli bathi kuye:
"Siyakukhuphuka ngomgwaqo; uma siphuza amanzi akho, mina nezinkomo zami,
ngiyakukhokhela imali yawo. Mangidabule nje ngezinyawo zami, kungabi ngokunye." 20 Kepha
wathi: "Awuyikudabula." U-Edomi wayesephuma wamsukela nabantu abaningi nesandla
esinamandla. 21 Kanjalo u-Edomi wala ukuba u-Israyeli adabule izwe lakhe; ngalokho u-Israyeli
wachezuka kuye.
22
Basuka eKadeshi; abantwana bakwa-Israyeli, inhlangano yonke, bafika entabeni yaseHori. 23
UJehova wakhuluma kuMose naku-Aroni entabeni yaseHori ngasemkhawulweni wezwe lakwa-
Edomi, wathi: 24 "U-Aroni uyakubuthelwa kubantu bakhe, ngokuba akayikungena ezweni
engibanike lona abantwana bakwa-Israyeli, lokhu nahlubuka ezwini lami ngasemanzini
aseMeriba. 25 Thabatha o-Aroni no-Eleyazare, indodana yakhe, ubakhuphulele entabeni
yaseHori, 26 umkhumule u-Aroni izambatho zakhe, uzifake ku-Eleyazare indodana yakhe; u-
Aroni uyakubuthelwa kubantu bakhe, afele khona." 27 UMose wenza njengalokho uJehova
eyalile; bakhuphukela entabeni yaseHori emehlweni enhlangano yonke. 28 UMose wamkhumula
u-Aroni izambatho zakhe, wazifaka ku-Eleyazare indodana yakhe; u-Aroni wafela khona
esiqongweni sentaba; oMose no-Eleyazare behla entabeni. 29 Lapho inhlangano yonke ibona
ukuthi u-Aroni ufile, bamlilela u-Aroni izinsuku ezingamashumi amathathu, yonke indlu yakwa-
Israyeli.

21
1
UmKhanani, inkosi yase-Aradi, owayakhe eningizimu, wezwa ukuthi u-Israyeli uyeza
ngendlela yase-Atarimi; walwa no-Israyeli, wathumba abanye kubo. 2 U-Israyeli wenza
isithembiso kuJehova, wathi: "Uma unikela nokunikela laba bantu esandleni sami, ngiyakuchitha
impela imizi yabo." 3 UJehova walilalela izwi lika-Israyeli, wanikela amaKhanani; bawaqothula
kanye nemizi yawo; igama laleyo ndawo lathiwa iHorma.
4
Basuka entabeni yaseHori ngendlela yoLwandle Olubomvu ukuba bazungeze izwe lakwa-
Edomi; inhliziyo yabantu yaphela amandla ngenxa yendlela. 5 Abantu bakhuluma kabi
ngoNkulunkulu nangoMose, bathi: "Nisikhuphuleleni eGibithe ukuba sifele ehlane na? Ngokuba
akukho sinkwa, akukho manzi; umphefumulo wethu uyanengwa yilesi sinkwa esilulana." 6
UJehova wathuma izinyoka ezinesihlungu phakathi kwabantu, zabaluma abantu; abantu abaningi
bakwa-Israyeli bafa. 7 Abantu bafika kuMose, bathi: "Sonile, ngokuba sikhulume kabi ngoJehova
nangawe; khuleka kuJehova ukuba asuse izinyoka kithi." UMose wabakhulekela abantu. 8
UJehova wathi kuMose: "Zenzele inyoka enesihlungu, uyibeke ensikeni; kuyakuthi yilowo
nalowo olunywayo, lapho eyibheka, uyakusinda." 9 UMose wenza inyoka yethusi, wayibeka
ensikeni; kwathi lapho inyoka imlumile umuntu, uma ebeyibheka inyoka yethusi, wasinda.
10
Abantwana bakwa-Israyeli bahamba, bamisa e-Oboti. 11 Basuka e-Oboti, bamisa e-Iye Abarimi
ehlane elingaphandle kwelakwaMowabi ngasempumalanga. 12 Basuka lapho, bamisa esiGodini
saseZeredi. 13 Basuka lapho, bamisa ngaphesheya kwe-Arinoni elisehlane, elivela emkhawulweni
wama-Amori, ngokuba i-Arinoni lingumkhawulo welakwaMowabi, phakathi kwelakwaMowabi
nama-Amori. 14 Ngalokho kuthiwa eNcwadini yeziMpi zikaJehova: "IVahebi laseSufa, nezigodi
zase-Arinoni, 15 nomthambeka wezigodi othambeka ngasezweni le-Ari, oncike emkhawulweni
wakwaMowabi." 16 Basuka lapho, baya eBeri; lokhu kungumthombo asho ngawo uJehova
kuMose, wathi: "Butha abantu, ngibaphe amanzi." 17 U-Israyeli wayesehlabelela lesi sihlabelelo
sokuthi: "Mpompoza, mthombo, nihlabelele kuwo, 18 umthombo ezawumba izikhulu,
abawugubha abakhulu babantu ngentonga yobukhosi nangezindondolo zabo." Basuka ehlane,
baya eMathana. 19 Basuka eMathana, baya eNahaliyeli; basuka eNahaliyeli, baya eBamoti; 20
basuka eBamoti, baya esigodini esisezweni lakwaMowabi nasesiqongweni sasePisiga, elibheke
ngenzansi ngasehlane.
21
U-Israyeli wathuma izithunywa kuSihoni inkosi yama-Amori, wathi: 22 "Ake sidabule izwe
lakho; asiyikuchezukela emasimini noma ezivinini, singaphuzi amanzi emithombo; siyakuhamba
ngomgwaqo wenkosi, size sidlule umkhawulo wakho." 23 USihoni wayengamvumeli u-Israyeli
ukudabula izwe lakhe, kepha uSihoni wabutha bonke abantu bakhe, waphuma eyomhlasela u-
Israyeli ehlane, wafika eJahasi, walwa no-Israyeli. 24 U-Israyeli wamnqoba ngosiko lwenkemba,
wadla izwe lakhe, kusukela e-Arinoni kuze kufike eJaboki nakubo abantwana bakwa-Amoni,
ngokuba umkhawulo wabantwana bakwa-Amoni wawunamandla. 25 U-Israyeli wathatha yonke
le mizi; u-Israyeli wahlala emizini yonke yama-Amori eHeshiboni nasemizini yonke yalo. 26
Ngokuba iHeshiboni lalingumuzi kaSihoni inkosi yama-Amori owayelwile nenkosi endala
yakwaMowabi, wathatha lonke izwe lakhe esandleni sakhe kwaze kwafika e-Arinoni. 27
Ngalokho abakhulu ngezaga basho bathi: "Wozani eHeshiboni; makwakhiwe, umuzi kaSihoni
umiswe; 28 ngokuba umlilo uphumile eHeshiboni; ilangabi livelile emzini kaSihoni; liqedile i-Ari
lakwaMowabi nabakhe emadulini ase-Arinoni. 29 Maye kuwena Mowabi! Niphelile, nina bantu
bakaKemoshi; unikele amadodana akhe abe ngababaleki, namadodakazi akhe athunjwe kuSihoni
inkosi yama-Amori. 30 "Sibacibishele; iHeshiboni liphelile kuze kube seDiboni; sichithile kuze
kube seNofa elingaseMedeba." 31 Kanjalo u-Israyeli wahlala ezweni lama-Amori. 32 UMose
wathuma ukuhlola iJazeri, bathatha imizi yalo, baxosha ama-Amori ayelapho. 33 Baphenduka,
bakhuphuka ngendlela yaseBashani; u-Ogi inkosi yaseBashani waphuma, wabasukela, yena nabo
bonke abantu bakhe, ukuyokulwa ngase-Edireyi. 34 UJehova wathi kuMose: "Ningamesabi,
ngokuba ngimnikele esandleni sakho kanye nabantu bakhe bonke nezwe lakhe; uyakwenza kuye
njengalokho wenza kuSihoni inkosi yama-Amori owahlala eHeshiboni." 35 Base bemnqoba-ke,
namadodana akhe, nabo bonke abantu bakhe, waze wangasalelwa muntu; badla izwe lakubo.

22
1
Abantwana bakwa-Israyeli bahamba, bamisa emathafeni akwaMowabi ngaphesheya kweJordani
ngaseJeriko. 2 UBalaki indodana kaSipori wabona konke akwenzile u-Israyeli kuwo ama-Amori.
3
UMowabi wayesesaba kakhulu abantu, ngokuba babebaningi; uMowabi waba nosizi ngenxa
yabantwana bakwa-Israyeli. 4 UMowabi wathi kumalunga akwaMidiyani: "Manje leli bandla
liyakukhotha konke okungakithi nxazonke, njengalokhu inkabi ikhotha utshani bedlelo." UBalaki
indodana kaSipori wayeyinkosi yakwaMowabi ngaleso sikhathi. 5 Wathuma izithunywa
kuBileyamu indodana kaBeyori ePethori elingasemfuleni ezweni labantwana babantu bakhe
ukumbiza ngokuthi: "Bheka, nampa abantu abaphumile eGibithe; bheka, basibekela ubuso
bomhlaba; sebehlala malungana nami; 6 ngalokho ake uze manje, ungiqalekisele laba bantu,
ngokuba bayangahlula; mhlawumbe ngingaze ngibe namandla ukuba sibanqobe, ngibaxoshe
ezweni, ngokuba ngiyazi ukuthi ombusisayo ubusisiwe, nomqalekisayo uqalekisiwe." 7
Amalunga akwaMowabi namalunga akwaMidiyani asuka enenkokhelo yokubhula esandleni
sawo; ayesefika kuBileyamu, akhuluma kuye amazwi kaBalaki. 8 Wathi-ke kuwo: "Hlalani lapha
lobu busuku, nginibuyisele izwi, njengalokhu uJehova eyakukhuluma kimi." Izikhulu
zakwaMowabi zahlala-ke kuBileyamu. 9 UNkulunkulu wafika kuBileyamu, wathi: "Ngobani
lawa madoda akuwe na?" 10 UBileyamu wathi kuNkulunkulu: "UBalaki indodana kaSipori,
inkosi yakwaMowabi, uthumile kimi wathi: 11 ‘Bheka, abantu abaphumile eGibithe basibekela
ubuso bomhlaba; woza kalokhu, ungiqalekisele bona; mhlawumbe ngingaze ngibe namandla
ukulwa nabo, ngibaxoshe.’" 12 UNkulunkulu wathi kuBileyamu: "Awuyikuhamba nawo;
awuyikuqalekisa abantu, ngokuba babusisiwe." 13 UBileyamu wavuka ekuseni, wathi kuzo
izikhulu zikaBalaki: "Buyelani ezweni lakini, ngokuba uJehova uyangalela ukuba ngihambe
nani." 14 Izikhulu zakwaMowabi zasuka, zaya kuBalaki, zathi: "UBileyamu uyala ukufika nathi."
15
UBalaki wabuye wathuma izikhulu, ziningi, zidumile kunezokuqala. 16 Zafika kuBileyamu,
zathi kuye: "Usho kanje uBalaki indodana kaSipori, uthi: ‘Ake ungavinjwa lutho ukuza kimi, 17
ngokuba ngiyakukunika udumo olukhulu, nakho konke ongitshela khona ngiyakukwenza; ake uze
ngalokho manje, ungiqalekisele laba bantu.’" 18 UBileyamu waphendula wathi kuzo izinceku
zikaBalaki: "Noma uBalaki ebeyakunginika indlu yakhe igcwele isiliva negolide, anginakulidlula
izwi likaJehova uNkulunkulu wami ukwenza okuncane nokukhulu. 19 Ngalokho ake nihlale nani
lapha lobu busuku, ukuze ngazi ukuthi uJehova useyakukhulumani kimi futhi." 20 UNkulunkulu
weza kuBileyamu ebusuku, wathi kuye: "Uma amadoda efika ukukubiza, vuka uhambe nawo;
kepha lelo zwi kuphela engilikhuluma kuwe uyakulenza." 21 UBileyamu wavuka ekuseni,
wabophela imbongolo yakhe, wahamba nezikhulu zakwaMowabi.
22
Intukuthelo kaNkulunkulu yavutha ngokuba wahamba; ingelosi kaNkulunkulu yema endleleni
ukuba imelane naye. Wayekhwele imbongolo yakhe, izinceku zakhe ezimbili zinaye. 23
Imbongolo yabona ingelosi kaJehova imi endleleni, inenkemba yayo ehoshiweyo esandleni sayo;
imbongolo yachezuka endleleni, yaya ensimini, kepha uBileyamu wayishaya imbongolo
ukuyibuyisela endleleni. 24 Ingelosi kaJehova yayisima endleleni engumngcingo phakathi
kwezivini, kwaba ludonga ngalapha nodonga ngalapha. 25 Imbongolo yayibona ingelosi
kaJehova, yazigqula odongeni, yalimaza unyawo lukaBileyamu ngasodongeni; wabuye
wayishaya. 26 Ingelosi kaJehova yaqhubeka yema endaweni eminyeneyo, lapho kwakungekho
khona indlela yokujika ngakwesokunene noma ngakwesokhohlo. 27 Imbongolo yayibona ingelosi
kaJehova, yalala phansi kukaBileyamu; intukuthelo kaBileyamu yavutha, wayishaya imbongolo
ngenduku yakhe. 28 UJehova wavula umlomo wembongolo, yathi kuBileyamu: "Ngenzeni kuwe
ukuba ungishaye kathathu na?" 29 UBileyamu wathi embongolweni: "Ngokuba ungiswabulele;
sengathi ngabe kukhona inkemba esandleni sami, ngokuba ngabe sengikubulele." 30 Kepha
imbongolo yathi kuBileyamu: "Angisiyo imbongolo yakho oyikhwele konke ukuhamba kwakho
kuze kube manje na? Ngangivama ukwenza kanjalo kuwe na?" Wathi: "Qha." 31 UJehova
wayesevula-ke amehlo kaBileyamu, wayibona ingelosi kaJehova imi endleleni, inenkemba yayo
ehoshiweyo esandleni sayo; wagoba ikhanda, wawa ngobuso bakhe. 32 Ingelosi kaJehova yathi
kuye: "Uyishayeleni imbongolo yakho kathathu na? Bheka, ngiphumele ukumelana nawe,
ngokuba indlela yakho iyingozi phambi kwami; 33 imbongolo yangibona, yachezuka phambi
kwami kathathu; uma ibingachezukanga kimi, ngabe sengikubulele, ngayisindisa yona." 34 Wathi
uBileyamu kuyo ingelosi kaJehova: "Ngonile; ngokuba bengingazi ukuthi umi endleleni umelene
nami; ngalokho uma kukubi emehlweni akho, ngiyakubuyela emuva." 35 Yayisithi ingelosi
kaJehova kuBileyamu: "Hamba nalawa madoda, kepha lelo zwi kuphela engiyakulikhuluma
kuwe uyakulikhuluma." UBileyamu wayesehamba nezikhulu zikaBalaki.
36
UBalaki esezwa ukuthi uBileyamu uyeza, waphuma ukumhlangabeza e-Iri Mowabi
elisemkhawulweni wase-Arinoni, liseceleni komkhawulo. 37 UBalaki wathi kuBileyamu:
"Angithumanga nokuthuma kuwe ukukubiza na? Awufikanga ngani kimi? Anginamandla yini
okukunika udumo na?" 38 UBileyamu wathi kuBalaki: "Bheka, sengifikile kuwe, anginamandla
nokho manje okukhuluma utho. Izwi uNkulunkulu alifaka emlonyeni wami, ngiyakukhuluma
lona." 39 UBileyamu wahamba noBalaki, bafika eKiriyati Husoti. 40 UBalaki wanikela
ngezinkabi nangezimvu, wazithuma kuBileyamu nakuzo izikhulu ezinaye. 41 Kwathi ekuseni
uBalaki wamthatha uBileyamu, wamyisa ezindaweni eziphakemeyo zikaBali, wabona elapho
inxenye yabantu.

23
1
UBileyamu wathi kuBalaki: "Ngakhele lapha ama-altare ayisikhombisa, ungilungisele lapha
izinkunzi eziyisikhombisa nezinqama eziyisikhombisa." 2 UBalaki wenza-ke njengalokho
uBileyamu ekhulumile; oBalaki noBileyamu banikela kulelo nalelo altare inkunzi nenqama. 3
UBileyamu wathi kuBalaki: "Yima ngasemnikelweni wakho wokushiswa, mina ngihambe;
mhlawumbe uJehova angafika ukungihlangabeza; konke angitshengisa khona ngiyakukutshela."
Waya edulini elingenalutho. 4 UNkulunkulu wahlangana noBileyamu; yena wathi kuye:
"Sengilungisile ama-altare ayisikhombisa, nganikela ngenkunzi nangenqama kulelo nalelo
altare." 5 UJehova wafaka izwi emlonyeni kaBileyamu, wathi: "Buyela kuBalaki, ukhulume
kanje." 6 Wayesebuyela kuye; bheka, wayemi ngasemnikelweni wokushiswa, yena nazo zonke
izikhulu zakwaMowabi. 7 Wayesethatha isisho sakhe, wathi: "E-Aramu uBalaki ungilandile,
inkosi yakwaMowabi ezintabeni zasempumalanga: woza ungiqalekisele uJakobe; woza
umdlelesele u-Israyeli. 8 Ngingamqalekisa kanjani ongaqalekiswanga nguNkulunkulu na?
Ngingamdlelesela ongadleleselwanga nguNkulunkulu na? 9 Ngokuba ngisesiqongweni
samadwala ngiyambona, ngisemadulini ngiyambuka; bheka, kungabantu abahlala bodwa,
abangayikubalwa phakathi kwezizwe. 10 Ngubani ongabala uthuli lukaJakobe, abale okwesine
kuka-Israyeli, na? Mangife ukufa kolungileyo, nokuphela kwami makube njengokwakhe." 11
UBalaki wathumela kuBileyamu, wathi: "Wenzeni kimi na? Ngakuthatha ukuba uqalekise izitha
zami; bheka, uzibusisile nokuzibusisa." 12 Waphendula wathi: "Angiyikuqaphela ukukhuluma
lokhu uNkulunkulu akufakile emlonyeni wami na?"
13
UBalaki wayesethi kuye: "Ake uze nami, siye kwenye indawo, lapho ungababona khona;
uyakubona inxenye yabo kuphela, ungaboni bonke; ungiqalekisele bona uselapho." 14 Wamyisa
ensimini yaseSofimu esiqongweni sasePisiga, wakha ama-altare ayisikhombisa, wanikela
ngenkunzi nangenqama kulelo nalelo altare. 15 Wathi kuBalaki: "Yima lapha ngasemnikelweni
wakho wokushiswa, mina ngilinde laphaya." 16 UJehova wayesehlangana noBileyamu, wafaka
izwi emlonyeni wakhe, wathi: "Buyela kuBalaki, ukhulume kanje." 17 Wayesefika kuye; bheka,
wayemi ngasemnikelweni wakhe wokushiswa, izikhulu zakwaMowabi zinaye. UBalaki wathi
kuye: "UJehova ukhulume ngokuthini na?" 18 Wayesethatha isisho sakhe, wathi: "Vuka, Balaki,
uzwe; ngilalele, wena ndodana kaSipori: 19 uNkulunkulu akasiye umuntu ukuba aqambe amanga,
nandodana yomuntu ukuba azisole; ushilo, angayikukwenza, na? Ukhulumile,
angayikukuphelelisa, na? 20 Bheka, ngiyaliwe ukubusisa; yena ubusisile, anginakukubuyisa. 21
Akabonanga ingozi kuJakobe, akabukanga nankathazo kwa-Israyeli. UJehova uNkulunkulu
wakhe unaye, nesenanelo senkosi siphakathi kwabo. 22 UNkulunkulu wabakhipha eGibithe;
unjengezimpondo zenyathi kubo. 23 Ayikho imilingo engamelana noJakobe; akukho ukubhula
okungamelana no-Israyeli; manje sekuyashiwo ngoJakobe nango-Israyeli ukuthi uNkulunkulu
wenzeni. 24 Bheka, abantu bavuka njengengonyamakazi, nanjengengonyama bayaziphakamisa;
abayikulala phansi, bengakayidli impango, baphuze igazi lababuleweyo." 25 UBalaki wayesethi
kuBileyamu: "Ungabaqalekisi nokubaqalekisa, futhi ungababusisi nokubabusisa." 26 Kepha
uBileyamu waphendula, wathi kuBalaki: "Angikutshelanga yini ukuthi konke uNkulunkulu
akukhulumayo ngiyakukwenza na?" 27 Wathi uBalaki kuBileyamu: "Ake uze, ngikuyise kwenye
indawo; mhlawumbe kungaba kuhle emehlweni kaNkulunkulu ukuba ungiqalekisele bona
uselapho." 28 UBalaki wamyisa uBileyamu esiqongweni sasePeyori elibheke ngenzansi
ngasehlane. 29 UBileyamu wayesethi kuBalaki: "Ngakhele lapha ama-altare ayisikhombisa,
ungilungisele izinkunzi eziyisikhombisa nezinqama eziyisikhombisa." 30 UBalaki wenza-ke
njengalokho eshilo uBileyamu; wanikela ngenkunzi nangenqama kulelo nalelo altare.

24
1
UBileyamu esebonile ukuthi kwakukuhle kuJehova ukubusisa u-Israyeli, akayanga
njengakuqala ukulindela imilingo, kepha wabhekisa ubuso bakhe ngasehlane. 2 UBileyamu
waphakamisa amehlo akhe, wabona u-Israyeli ehlezi ngokwezizwe zakhe; uMoya kaJehova
wehlela phezu kwakhe. 3 Wayesethatha isisho sakhe, wathi: "UBileyamu indodana kaBeyori uthi,
umuntu omehlo akhe avuliwe uthi, 4 ozwileyo amazwi kaNkulunkulu, obonile umbono
kaSomandla uthi, ewela phansi, kuvulwe amehlo akhe: 5 "Mahle kangaka amatende akho,
Jakobe, namatabernakele akho, Israyeli. 6 Elulekile njengezigodi, njengamasimu ngasemfuleni,
njengemihlaba ayitshalile uJehova, njengemisedari ngaseceleni kwamanzi. 7 Amanzi
ayakugobhoza, aphume ezimbizeni zakhe, imbewu yakhe ibe semanzini amaningi, inkosi yakhe
ibe nkulu kuno-Agagi, umbuso wakhe uphakame. 8 "UNkulunkulu wamkhipha eGibithe;
unjengezimpondo zenyathi kubo; uyakuqeda izizwe, izitha zakhe, aphule amathambo azo,
azigwaze ngemicibisholo yakhe. 9 Wabuthalala, walala phansi njengengonyama,
nanjengengonyamakazi, ngubani oyakumvusa na? "Mababusiswe bonke abakubusisayo,
baqalekiswe bonke abakuqalekisayo."
10
Ulaka lukaBalaki lwamvuthela uBileyamu, washaya izandla zakhe; uBalaki wathi kuBileyamu:
"Ngakubiza ukuba uqalekise izitha zami; bheka, ubabusisile nokubabusisa kathathu. 11 Ngalokho
baleka uye endaweni yakho; bengithi ngiyakukunika udumo olukhulu; kepha bheka, uJehova
ugodlile udumo kuwe." 12 UBileyamu wathi kuBalaki: "Angikhulumanga yini kuzo izithunywa
zakho owazithuma kimi ukuthi: 13 ‘Noma uBalaki ebeyakunginika indlu yakhe igcwele isiliva
negolide, anginakulidlula izwi likaJehova ngenhliziyo yami ukwenza okuhle noma okubi;
akukhulumayo uJehova lokhu ngiyakukukhuluma,’ na? 14 Bheka manje, ngibuyela kubantu
bakithi; woza ngikumemezelele ukuthi laba bantu bayakwenzani kubantu bakini ngezinsuku
ezizayo."
15
Wayesethatha isisho sakhe, wathi: "UBileyamu indodana kaBeyori uthi, umuntu oso lakhe
livuliwe uthi, 16 ozwileyo amazwi kaNkulunkulu, owazi ukwazi koPhezukonke, obonile umbono
kaSomandla, ewela phansi, kuvulwe amehlo akhe, uthi: 17 "Ngiyambona, kepha kungemanje;
ngiyambheka, kodwa kungeseduze; kuyakuvela inkanyezi kuJakobe, nentonga yobukhosi
iyakuvuka kwa-Israyeli, ishaye uMowabi emaceleni, ichithe onke amadodana kaSheti. 18 U-
Edomi uyakuba yifa; uSeyiri uyakuba yifa naye, owayengowezitha zakhe, u-Israyeli esenza
okubuqhawe. 19 Uyakuvela kuJakobe, achithe insali emzini." 20 Wayesembuka u-Amaleki,
wathatha isisho sakhe, wathi: "U-Amaleki wayengesokuqala sezizwe, kepha ukugcina kwakhe
kungukubhubha." 21 Wayesewabuka amaKheni, wathatha isisho sakhe, wathi: "Inamandla indawo
yakho yokuhlala; isidleke sakho simisiwe edwaleni. 22 Nokho uKayini uyakuchithwa uze
uthunjwe ngu-Ashuri." 23 Wathatha isisho sakhe, wathi: "Maye, ngubani oyakuphila, lapho
uNkulunkulu ekwenza lokhu, na? 24 Imikhumbi iyakuvela ogwini lwaseKitimi, imhluphe u-
Ashuri, imhluphe u-Ebere, naye aye ekubhujisweni." 25 UBileyamu wayesesuka, wahamba,
wabuyela endaweni yakhe; uBalaki wahamba ngeyakhe indlela.
25
1
U-Israyeli wahlala eShithimi; abantu baqala ukuphinga namadodakazi akwaMowabi, 2 ngokuba
babiza abantu ukuba beze emihlatshelweni yawonkulunkulu babo; abantu badla, bakhothamela
onkulunkulu babo. 3 U-Israyeli wazihlanganisa noBali Peyori. Intukuthelo kaJehova
yayisimvuthela u-Israyeli. 4 UJehova wathi kuMose: "Thabatha zonke izinhloko zabantu,
uziphanyekele uJehova elangeni, ukuze intukuthelo evuthayo kaJehova ibuye ku-Israyeli." 5
UMose wathi kubo abahluleli bakwa-Israyeli: "Bulalani, kube yilowo nalowo abantu bakhe
abazihlanganisile noBali Peyori."
6
Bheka, umuntu wabantwana bakwa-Israyeli wafika eletha kubafowabo owesifazane
wakwaMidiyani emehlweni kaMose nasemehlweni enhlangano yonke yabantwana bakwa-
Israyeli, besakhala ngasemnyango wetende lokuhlangana. 7 Esekubona uFinehasi ka-Eleyazare
ka-Aroni umpristi wavuka ephakathi kwenhlangano, wathatha umkhonto ngesandla sakhe, 8
wamlandela umuntu wakwa-Israyeli, wangena etendeni, wabagwaza bobabili, indoda yakwa-
Israyeli nowesifazane esiswini sakhe. Sanqamuka-ke kanjalo isifo kubantwana bakwa-Israyeli. 9
Abafayo ngaleso sifo babe yizinkulungwane ezingamashumi amabili nane. 10 UJehova
wayesekhuluma kuMose, wathi: 11 "UFinehasi ka-Eleyazare ka-Aroni umpristi ukhalimile
intukuthelo yami kubantwana bakwa-Israyeli, ngokuba wayehawuka ngomhawu wami phakathi
kwabo, ukuze ngingaqothuli abantwana bakwa-Israyeli ngomhawu wami. 12 Ngalokho yisho
ukuthi: ‘Bheka, ngiyamnika isivumelwano sami sokuthula; 13 siyakuba kuye nakuyo inzalo yakhe
emva kwakhe isivumelwano sobupristi obuphakade, ngokuba wayenomhawu ngoNkulunkulu
wakhe, wabenzela abantwana bakwa-Israyeli ukubuyisana.’" 14 Igama lendoda yakwa-Israyeli
eyabulawa, eyabulawa kanye nowesifazane wakwaMidiyani, lalinguZimri indodana kaSalu,
isikhulu sendlu kayise phakathi kwabakwaSimeyoni. 15 Igama lowesifazane wakwaMidiyani
owabulawa lalinguKozibi indodakazi kaSuri owayeyinhloko yabantu bendlu kayise kwaMidiyani.
16
UJehova wakhuluma kuMose, wathi: 17 "Khathaza abakwaMidiyani, ubashaye, 18 ngokuba
bayanikhathaza nina ngamacebo abanikhohlise ngawo endabeni kaPeyori nangendaba kaKozibi
indodakazi yesikhulu sakwaMidiyani, udadewabo, owabulawa ngosuku lwesifo ngendaba
kaPeyori."