Carolus Linnaeus

Carolus Linnaeus

Carolus Linnaeus (in 't Zweeds Carl von Linné) (°Råshult by Stenbrohult, 23 meie 1707 - Uppsala, 10 januoari 1778) was ne Zweedsen wetenschapper, meest bekend als bioloog, die de binomiale nomenclateure voor levende wezens invoerde.

In 1999 wier ter meerdere ere van Linnaeus de Internationale Biologie Olympiade, kortweg IBO genaamd ingericht in Uppsala, ounder leidinge van de twidden bekenden bioloog uut Uppsala, Andreas Ehn, specialist in den arachnologie.

In 2007 was 't 300 jaar geleen dat ie em geboorn wier, en wiern d'r verschillende tentoonstellingn en erdenkingn gorganiseerd, ounder meer in Harderwyk, Haarlem, Leiden en Amsterdam.

Levensloop

Linnaeus' vader was ne dominee die wilde dat z'n zeune theologie zou studeren. Uuteindelik deit em medicynn.

Beist z'n studies mocht ie em de nateurlike schatten van Lapland beschryven. Achter z'n reize in 1732 deur Lapland schreeft em z'n Florula lapponica. In 1735 vertrokt em no Nederland voe do voort te studeren. Ie promoveerde in de medicynn met als doctoraatsthesis Hypothesis nova de febrium intermittentium causa an den univ van Harderwyk. Derachter publiceerdet em z'n Systema Naturae, messchien wel z'n belangrykste werk waarin dat em zyn systêem beschryft voe de levende wezens in te deeln.

Ie et lange prof gewist in Uppsala. J'is doa begraven in de kathedrale.

Belang van Linnaeus voe de wetenschap

Linnaeus' indelinge was gebaseerd voe de planten ip voortplantingsorgaan. In zynne tyd was da etwuk nieuws omdat er nog nie vele gesproken wier over voortplantingsorgaan by planten, en surtout omdat spreken over voortplantinge em in de taboesfere bevound.

Linnaeus' publicatie Species Plantarum wordt gezien 't eerste groot werk over de binomiale nomenclateure van planten. In da boek beschreeft em al de ton gekende plantesoortn, en gaft nem z'allemolle een soortname. De genusname tope met de soortaandudinge was binaire name. Do nevest gaf Linnaeus ook de volledige name, dikkers ne hele regel, lik dat 't ton gebrukelik was. Linneaus' indelinge en naamstelsel wier al beist zen leven deur de meeste plantkundigen en zoölogen gebruukt. Ie klasseerde beist zen leven round de 7000 soortn planten. Dat em ze klasseerde is nu nog dikkers te zien an de 'L.' van Linnaeus die achter de wetenschappelike name van vele planten staat.

Linnaeus beschreef niet allene planten maar ook mineralen en dieren. Alhoewel dat em de mensen al by de zoogdieren indeelde, en dus de mens nie meer als een alleenstaand wezen zag, wil da nie zeggen dat em brak met 't scheppingsverhaal uut de Bybel. Voe de evolutietheorie was 't nog wachten ip Charles Darwin een eeuwe later.

Linnaeuskloksje

Linnaeus naamde een plantje no zezelven: 't Linnaeuskloksje. 't Is een heel ounipvallend en teer plantje. 't et twee klene blomtjes en e fyn stiengeltje. Linnaeus wordt dikkers afgebeeld met da plantje in zen an.

Ofbeeldiengn die ier by passn ku je vien in de categorie Carl von Linné van Wikimedia Commons.