Kappadokii

Kappadokijan sijaduz Rimalaižes imperijas

Kappadokii (turk.: Kapadokya, grek.: Καππαδοκία Kappadokia, latin.: Cappadocia, armen.: Գամիրք Gamirk' vai Կապադովկիա Kapadovkia, pers.: کاپادوکیه‎ Kapado(u)kja) om istorine agj nügüdläižen Turkanman territorijas, Anatolijan pol'saren keskuzpalas da päivnouzmas.

Etimologii

Agjan nimituz fiksiruiše 6. voz'sadan EME lopuspäi, mainitase kuti Haspaduya Ahemenidoiden Darii I- i Kserks I-cariden koumekel'žiš nimikirjutesiš Persijan valdkundan ühteks maišpäi. Haspaduya libui persijan Huw-aspa-dahyu-sanoišpäi «čomiden heboiden ma» ezimeletaden.

Gerodotal om kirjutadud, miše persijalaižed kävutiba kappadokijaližiden ičeze nimed znamoičemha heid.

Ümbrikirjutand

Territorii harakterizuiše koverikahal landšaftal vulkaniženke augotižlibundanke, levinandeb läz 1000 m ü.m.t. korktusel. Tehtud 1. voz'tuhal EME manalaižed lidnad oma kaičenus meiden aighasai, mugažo sured jumalankodid makaroiš vedadas ičeze istorijad aigaližen hristanuskondan aigaspäi.

Rahvahaline Göreme-puišt i Kappadokijan makaraižed eländsijad mülüdas UNESCO:n Mail'man jäl'gushe. Adivpertid i avtobusmaršrutad ratas turistoiden täht, erazvuiččiden turistkompanijoiden ofisad sijadasoiš lähižiš suriš lidnoiš.

Religii

Gotoiden, armenijalaižiden i gruzijalaižiden vauktastajad da pühämehed libuiba Kappadokijaspäi: Vul'fila, Grigorii Vauktastai, Nino Kappadokijalaine. Sured kappadokijalaižed (Vasilii Sur', Grigorii Nissalaine, Grigorii-jumalantedomez') andoiba znamasišt tondad hristanuskondan šingoteshe 4. voz'sadal, hö sädiba opendust Stroicas i paniba Raštvad-pühänikan augud. Tetabad pühämehed Kappadokijaspäi oma Jurgii-vägestusenkandai i Longin-centurion.

Islaman leviganduz agjas zavodihe 11.-15. voz'sadoil.