Bränsk

Bränsk
Брянск
Lidnanznam;	Flag;
Valdkund	Venäma
Eläjiden lugu (2024)	373,310 ristitud
Pämez'	Marina Dbar; (sügüz'ku 2019—,; Марина Дбар)
Telefonkod	+7−4832-xxx-xxx
Avtokod	32
Aigvö	UTC+3 (MSK+0)

Bränsk (ven.: Брянск) om lidn da lidnümbrik Venäman päivlaskmas. Se om Bränskan agjan administrativine keskuz da kaikiš suremb lidn.

Istorii

Eländpunkt mainitase ezmäižen kerdan Ph. Ipatijan jumalankodin aigkirjas vl 1146 kuti Debränsk-lidn. Kaivandusiden andmusiden mödhe, eländpunktan aluz om pandud 10. voz'sadan lopus, lugetas vl 985.

Bränsk šingotase transportižel mašiništonsauvomižel (soda- i jüguavtoiden šassid, traktorad, avtovedimed, lämuzvedimed, vagonad, asfal'tanpanijad, libutimed), Bežickan terasenvalamižtegimel, sauvondmaterialiden pästandal (beton, lämuzizoläcii), sömtegimištol (vin, konditerižed tegesed, jauh, olud, maid- da lihaproduktad), himižel tegimel, bumagfabrikal i omblendedheotandoil.

Geografijan andmused

Lidn sijadase agjan pohjoižpäivnouzmas, Desn-jogen molembil randoil (ven.: Десна, Dnepran hurapol'ne bassein), 190 m ü.m.t. keskmäižel korktusel. Bränskan rajon ümbärdab lidnad.

Matkad Moskvan keskushesai om 349 km pohjoižpäivnouzmha orhal, 382 km avtotedme vai raudtel. Lähembaine sur' lidn om Orel 117 km päivlaskmha orhal, 129 km avtotel vai raudtedme.

Klimat om ven kontinentaline. Voden keskmäine lämuz om +5,8 C°, kezakun-elokun +17,1..+18,9 C°, tal'vkun-uhokun −4,9..−6,1 C°. Ekstremumad oma −41,8 C° (viluku) i +38,4 C° (eloku). Kezaaigan minimum om −1,3 C° (kezaku), tal'vaigan maksimum om +9,9 C° (tal'vku, uhoku). Ei voi panda halad heinkus-elokus (elokun minimum om +0,1 C°). Tal'ven sä om vajehtui, paksud sulasäd oleldas, no voib olda lujid pakaižid-ki. Paneb sadegid 623 mm vodes, enamba kezakus-elokus (73..85 mm kus), vähemba uhokus-keväz'kus (31..33 mm kus). Kun keskmäine relätivine nepsuz vajehtase 64..74 % röunoiš keväz'kus-elokus, 84..91 % kül'mkus-uhokus.

Tobmuz

Bränskan administrativižed rajonad:
Bežican rajon Fokinan rajon Nevondkundaline rajon Volodarskijan rajon

Kaik koume žilod mülüdas lidnümbrikho Bränskan ližaks: Vauktad Randad, Sur' Polpino, Radica-Krilovk. Lidnümbrikon pind — 186,73 km². Bränsk-lidn jagase nelläks (vspäi 1956) administrativižeks rajonaks, ned ei olgoi municipaližikš ühtnikoikš. Žilod alištudas lidnan rajoniden tobmudele.

Edeline lidnan pämez' om Aleksandr Hlimankov (reduku 2014 — sügüz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 415 721 ristitud, lidnümbrikon — 435 245 ristitud. Vn 2021 rahvahanlugemižen mödhe lidnan ristitišt oli 379 152 eläjad. Vl 2018 kaik 405 723 ristitud elihe lidnas i 423 981 ristitud kaikes lidnümbrikos. Kaikiš suremb lidnan ristitišt oli läz 460 tuhad eläjid vozil 1991−1999 (462 tuh. rist. vl 1997).

Kaik viž üläopendusen aluzkundad, toižiden lidnoiden (Moskv, Piter) koume filialad, viž tehnikumad i seičeme kolledžad oma lidnan professionaližen opendusen aluzkundoikš. Kaikiš znamasižemb om Bränskan valdkundaline universitet^[1] (alusenpanend 1930, nügüdläine nimi vspäi 2001) kümnenke fakul'tetanke.

Transport

Avtobusad, trolleibusad, ezilidnelektrojonused, maršruttaksid da taksid oma kundaližeks transportaks lidnas i ezilidnas. Bränsk om järed raudtesol'm. Avtote ümbärdab lidnad päivlaskmaspäi.

Rahvahidenkeskeine civiline Bränsk-lendimport^[2] (BZK / БРЯ / UUBP, 20,4 tuh. passažiroid vl 2017) sijadase 14 km suvipäivlaskmha lidnan keskusespäi, seičemes kilometras röunaspäi Oktäbr'skoje-žilonno. Tehtas reisid Piterihesai.

Galerei

Lidnan Nevondkundaližen rajonan Administracijan sauvuz (2012)
Sündun Eläbzdusen jumalanpert', vn 2013 nägu
Lämuzvedim Bränskan mašinansauvomižel tegimel vl 2019
Bränskan mašinansauvomižen tegimen kul'turkeskuz (2015)
Bränsk I-päraudtestancii vl 2010
Bränsk-lendimportan terminal vl 2019

Tetabad ristitud

Sündnuded

Sergei Černäkov (sünd. 1959) — Nevondkundaližen Ühtištusen i Venäman rok-muzikant, barabananvändai.
Boris Kamorzin (sünd. 1966) — Venäman kinon da teatran akt'or.
Maksim Trošin (1978−1995) — oli venälaine priha, Venäman bard-pajatai.

Elänuded

Leonid Dobičin (1894−1936) — oli venälaine mez', Nevondkundaližen Ühtištusen kirjutai.

Homaičendad

Irdkosketused

Bränsk Vikiaitas

	Bränskan agjan lidnad
	Bränsk \| Dät'kovo \| Fokino \| Karačev \| Klincad \| Mglin \| Novozibkov \| Počep \| Sel'co \| Sevsk \| Starodub \| Suraž \| Zlink \| Žukovk \| Trubčevsk \| Uneč

	Venälaižen Federacijan subjektoiden pälidnad
	Abakan \| Alauz'lidn \| Anadir' \| Arhangel'sk \| Astrahan' \| Barnaul \| Belgorod \| Birobidžan \| Blagoveščensk \| Bränsk \| Čeboksarad \| Čeläbinsk \| Čerkessk \| Čit \| Elist \| Gatčin \| Gorno-Altaisk \| Groznii \| Habarovsk \| Hanti-Mansiisk \| Irkutsk \| Iževsk \| Ivanovo \| Jakutsk \| Jaroslavl' \| Jekaterinburg \| Joškar-Ol \| Kaliningrad \| Kalug \| Kazan' \| Kemerovo \| Kirov \| Kizil \| Kostrom \| Krasnodar \| Krasnogorsk \| Krasnojarsk \| Kurgan \| Kursk \| Lipeck \| Magadan \| Magas \| Mahačkal \| Maikop \| Moskv \| Murmansk \| Nal'čik \| Nar'jan Mar \| Novosibirsk \| Omsk \| Orel \| Orenburg \| Penz \| Perm' \| Petropavlovsk Kamčatkal \| Petroskoi \| Piter \| Pskov \| Rostov Donal \| Räzan' \| Salehard \| Samar \| Saransk \| Saratov \| Siktivkar \| Simferopol' (de fakto) \| Sevastopol' (de fakto) \| Smolensk \| Stavropol' \| Sur' Uz'lidn \| Suvisahalinsk \| Tambov \| Tomsk \| Tul \| Tver' \| Tümen' \| Uf \| Ulan Ude \| Ul'janovsk \| Vladikavkaz \| Vladimir \| Vladivostok \| Volgograd \| Vologd \| Voronež

[1] Bränskan valdkundaližen universitetan sait (brgu.ru). (ven.)

[2] Bränsk-lendimportan sait (bzk-aero.ru). (ven.)

[1]

[2]

Lidnanznam	Flag
Valdkund	Venäma
Eläjiden lugu (2024)	373,310 ristitud

Pämez'	Marina Dbar (sügüz'ku 2019—, Марина Дбар)
Telefonkod	+7−4832-xxx-xxx
Avtokod	32
Aigvö	UTC+3 (MSK+0)