Čerkessk

Čerkessk (ven.: Черке́сск, abaz.: Черкес къала, kab. da čerk.: Шэрджэс къалэ, kar. da balk.: Черкесск, nog.: Шеркеш шахар) om lidn da lidnümbrik Venäman suvipäivlaskmas. Se om Karačajan da Čerkesijan Tazovaldkundan pälidn.

Čerkessk
Черкесск (kar. da balk., ven.)
Черкес къала (abaz.)
Шэрджэс къалэ (kab. da čerk.)
Шеркеш шахар (nog.)

Lidnanznam	Flag
Valdkund	Venäma
Eläjiden lugu (2024)	112,782 ristitud
Pind	69,8 km²
Pämez'	Valerii Deduk (reduku 2022—)
Telefonkod	+7−8782-xxx-xxx
Avtokod	09
Aigvö	UTC+3 (MSK+0)

Istorii

Eländpunktan aluz om pandud vl 1825 kuti Batalpašinskai-stanic (ven.: станица Баталпашинская) ühtennimižen redutan sijas. Stanic sai lidnan statusad vl 1931 Batalpašinsk-nimenke. Lidn nimitase nügüdläižikš vspäi 1939.

Čerkessk šingotase elektrotehnižel sarakol (vilugoitimmašiništon tehmine, madalvol'tine apparatur), räzintehnižiden tegesiden edheotandal, sauvondmaterialiden pästandal (cement, savič), sömtegimištol (lihanümbriradmižen produktad i konservad, mineraližen veden pakuitez), villanümbriradmižen fabrikal.

Geografijan andmused

Lidnan sijaduz tazovaldkundan kartal (2010)

Lidn sijadase tazovaldkundan pohjoižes. Se seižub Kuban'-jogen oiktal randal, 530 m ü.m.t. keskmäižel korktusel, Kavkazan ezimägištol. Korktused sadas 700 metrhasai. Kubanin vezivaradim om päivnouzmha lidnaspäi. Lähembaižed järedad lidnad sijadasoiš Stavropolin randas: Nevinnomissk 50 km lodeheze orhal i Jessentukad 50 km päivnouzmha orhal.

Klimat om ven kuivahk. Voden keskmäine lämuz om +10 C°, kezakun-elokun +18..+22 C°, tal'vkun-uhokun −1..−3 C°. Ekstremumad oma −25,7 C° (uhoku) i +36,2 C° (eloku). Kezaaigan minimum om +2,4 C° (heinku, eloku), tal'vaigan maksimum om +18,4 C° (uhoku). Ei voi panda halad kezakus-elokus. Paneb sadegid 372 mm vodes, enamba sulakus-heinkus (41..57 mm kus), vähemba vilukus-uhokus (13..14 mm kus).

Tobmuz

Čerkessk om lidnümbrikon üks'jäižeks eländpunktaks.

Municipaližen ühtnikan pämez' om lidnan Duman ezimez', edeline Čerkesskan pämez' om Jevgenii Belanov (uhoku 2007 — reduku 2022). Lidnan mer (municipaližen ühtnikan Merijan pämez') om Aleksei Baskaev vn 2020 kezakuspäi. Edeline mer om Ruslan Tambijev (2011 — semendku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 129 069 ristitud, se om kaikiš suremb lugu kaikes aigas, vn 2021 — 113 226 ristitud. Vl 2017 lidnan ristitišt oli 122 478 eläjad.

Rahvahad (enamba 1 % vl 2010): venälaižed — 54,1 %, karačailaižed — 16,2 %, čerkesalaižed — 13,0 %, abazilaižed — 8,1 %, nogailaižed — 1,5 %, armenijalaižed — 1,3 %, toižed rahvahad — 4,6 %, rahvahuden ozutandata — 1,2 %.

Transport

Avtobusad, trolleibusad da taksid oma kundaližeks transportaks lidnas.

Čerkessk-raudtestancii radab vspäi 1929. Vspäi 2009 se om lopstancijaks sarakol Nevinnomisskai-stancijaspäi, matkad sihesai om 53 km rel'savtobusal. Ende Ust'-Džegutan stancii radoi sen sarakon lopuks 18 kilometras.

Galerei

• 
  Čerkesskan keskuztorg (2001)
• 
  «Zelönii ostrov»-puišt (2016, Vihand sar')
• 
  Čerkesskan Keskuzline mečet', vn 2015 nägu
• 
  Ph. Mikulai-čudonsädajan päjumalanpert', vn 2016 nägu
• 
  Tegimištzon vl 2012
• 
  «Adijuh-Peles»-adivpert' vl 2007
• 
  Pohjoižkavkazan valdkundaline gumanitariž-tehnologine akademii (2007)
• 
  «Himik»-kul'turkeskuz (2001)
• 
  «Megapolis»-torguimižbobuštuzkeskuz (2011)
• 
  Čerkessk-päraudtestancijan sauvuz vl 2014

Irdkosketused

• Lidnan tobmuden aluzkundoiden oficialine portal (cherkessk09.ru). (ven.)