Medeo VII

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Medeo VII, stranomà ël Cont Ross, a l'é stàit ël nùmer disdeut ant la lista dij prinsi ëd Savòja.
Fieul ëd Medeo VI e ëd Bon-a ëd Borbon, a l'era nà a Chambéry dël 1360.

A l'é sucedù a sò pare 'me cont ëd Savòja a la mòrt ëd chiel-sì, dël 1383, sota la tùa ëd soa mare. An efet, scotand la volontà 'd sò pare, scrivùa an sò testament, Medeo VII a l'ha esercità sò goern an acòrd complet con soa mare.
A l'ha marià Bon-a ëd Berry, ch'a l'ha portaje la Bresse an dòta.

Medeo VII a l'é antërvenù an Provensa ant la lòta tra le famije Angiò e Duras, con l'apògg ëd la potenta famija dij Grimaldi ëd Beuil, che da part soa a contavo an sël cangiament dë sgnorìa për fé chërse soa autorità e soa anfluensa. Parèj ël Cont Ross a sot-signa ant ël 1388 n'acòrd a Nissa Marìtima, mersì al qual la sità as sotmet ai Savòja.

Cand che dël 1386, possà da Teodòr II Paleòlogh, a jë s-ciòpa l'arvira dij tuchin an Canavèis, ël Cont Ross a intra con decision an Monfrà.

Medeo VII l'é mòrt ant la neuit antra 'l 1^m e ij 2 ëd novèmber 1391, për n'anfession, peul desse ëd tétan, che ij dotor a l'avìo pijà për n'antossiament.
A l'é stàit sotrà a Autacomba. A l'ha suceduje sò fieul Medeo.

Medeo VII e la Val d'Osta

Dël 1384 Medeo a smon a Pero ëd Challant-Cly la sgnorìa ëd Châtel-Saint-Denis (ant ël Vaud) për arcompenselo dla pèrdita ëd soa giurisdission valdostan-a.

Durant j'udiense generaj dël 1391 a smon dle franchise a le comunità ëd Gignod, dël mandament ëd Cly e dla Valdigne; a decreta che cand ij balivi a intro an fonsion a devo giuré ëd rëspeté le franchise, le libertà, ij privilegi e le costume dla patria valdostan-a.

Sò stranòm

A la nàssita ëd sò fieul, për mostré soa gòj, Medeo VII a l'é vestisse ëd ross. Da sòn a l'é vnuje sò stranòm, ël Cont Ross.