Traficacion di hende
| Supkategoria di | crime, trade, offense against personal freedom, social exploitation, human activity  |
|---|---|
| Main regulatory text | Strafgesetzbuch, Criminal Code of Belarus |
| Praktiká pa | human trafficker |
| Relates to sustainable development goal, target or indicator | Target 8.7 of the Sustainable Development Goals |
Traficacion di hende (Hulandes: mensenhandel; Ingles: human traficking) ta encera e recrutamento, transporte of traficacion di hende contra di nan boluntad cu e proposito di explotacion sexual, laboral, criminal of un otro forma di explotacion comercial. Traficacion di hende por tuma luga denter di un pais of entre paisnan. E ta distinto for di contrabanda di hende, cu ta caracterisa pa e consentimento di e persona cu ta wordo pasa di un luga pa otro sin cu ningun hende ta ripara, como sifuera e persona ta contrabanda. Contrariamente, traficacion di hende ta encera explotacion y falta di consentimento, hopi biaha usando forsa, fraude y otro metodonan ilicito.
Rond di e periodo 1877-1900, e termino ‘traficacion di hende’ a surgi den varios idioma na West Europa. Te cu aña 2000, e tabata wordo defini como traficacion y explotacion di hende muhe, dirigi riba trece e hende muhe den prostitucion y genera beneficio pa e traficante di prostitucion forsa.[1] Relaciona cu e Convencion di Palermo (2000), e definicion a wordo amplia y incorpora den legislacion nacional casi tur parti di mundo. Entre e formanan di traficacion di hende por menciona: prostitucion forsa, actonan sexual forsa dilanti camera, matrimonio forsa, sclavitud domestico, labor infantil, adopcion ilegal di mucha, kitamentu di organo forsa y pidimento di limosna forsa.
Traficacion di hende ta e di tres industria di criminalidad mas grandi na mundo, tras di traficacion di droga y traficacion di arma, y ta e actividad cu crecemento mas rapido den organisacionnan criminal transnacional.[2][3][4]
Traficacion di hende ta ser condena como violacion di derechonan humano pa convencionnan internacional, pero e proteccion legal ta varia globalmente. E practica tin miyones di victima rond mundo.[5][6]
Dia 18 di december 2013 e Asamblea General di Nashonnan Uni a proclama dia 30 di juli como 'Dia Mundial contra Traficacion di Hende'.
Nivelnan di legislacion:
Caribe Hulandes
[editá | editá fuente]Aruba
[editá | editá fuente]Na Aruba, traficacion di hende den tur su formanan ta un delito conforme e Codigo Penal di Aruba. Na 2020 a lanta un Centro di Coordinacion pa Traficacion di Hende y Contrabanda di Migrante Aruba (CMMA), un entidad di gobierno cu e meta pa informa, educa y asisti den e combatimento di traficacion di hende y contrabanda di hende. Como punto di contacto CMMA ta dispone di un liña di telefon dedica na situacionnan di traficacion y contrabanda di hende, caminda hende por yama pa mas informacion y notifica autoridadnan di actividadnan sospechoso. CMMA ta bou guia di e Coordinador Nacional di Traficacion di Hende y Contrabanda di Migrante (LCMM), Jeannette Richardson-Baars, kende alabes ta director di CMMA.[8] CMMA a start su campaña di conscientisacion na 2021 y a produci dos pelicula educativo: “Otro Banda di Lama” y “Otro Banda di e Cam”. U.S. State Department a raporta cu na 2024 Aruba a mantene su cumplimento cu proteccion legal contra traficacion di hende na nivel 2.[9]
Aruba tin su propio fecha nacional pa conscientisa comunidad Arubano riba traficacion di hende, cu ta 18 di october.[10]
Link externo
[editá | editá fuente]- Website oficial CMMA
- Habri bo Wowo
- Trafficking in Persons Report: Aruba, U.S. State Dept.
- Trafficking in Persons Report: Curaçao, U.S. State Dept.