Edgard Vrolijk
| Edgard Vrolijk | ||
|---|---|---|
| ||
| Informacion basico | ||
| Nomber completo | Edgar G.A. Vrolijk | |
| Nacemento | 15 di juni 1977 Aruba | |
| Pais |  Aruba
| |
| Funcion actual | miembro di Parlamento di Aruba | |
| Desde | 27 di october 2017 | |
| Partido | MEP | |
| Funcion | ||
| 2021-2024 | presidente di Parlamento di Aruba | |
| [Edita Wikidata] · [Manual] | ||
Edgard G.A. (Gachi) Vrolijk (☆ 15 di juni 1977 na Aruba) ta un politico Arubano y miembro di Parlamento di Aruba desde 27 di october 2017. El a fungi como Presidente di Parlamento di Aruba di 8 di juli 2021 te 9 di september 2024.
Bida y carera
[editá | editá fuente]Edgard Vrolijk a lanta den districto di Santa Cruz, den bario di Shete. Na edad hopi jong el a cuminsa hunga futbol. Na edad di 15 aña e ta switch di SV Arsenal pa SV Estrella, club cu a titula campeon na varios ocasion.[1] Vrolijk tabata miembro di seleccion Arubano y a participa na diferente clasificacion internacional di CONCACAF. Tambe como hoben el a cuminsa ta activo como coach, prome den futbol y despues den beisbol. El a sigui activo como coach y miembro di directiva di SV Estrella te dia di awe.
Na aña 2000 Vrolijk a termina su estudio na Instituto Pedagogico Arubano (IPA) como docente di scol primario.[2] Entre 2000 y 2017 el a traha na Cacique Macuarima School, unda e tabata activo tambe como coach di deporte escolar.[1] Na 2021 e ta termina su estudio den ley na Universidad di Aruba.[1] Su tesis pa grado master tabata titula: “De concept–rijkswet Caribische Hervormingsentiteit: De autonome positie van de landen binnen het Koninkrijk, de procedures bij een consensusrijkswet en de Caribische Hervormingsentiteit als zelfstandig bestuursorgaan”.[2]
Vrolijk ta casa cu Charissa Jarzagaray y hunto nan tin tres yiu muhe.
Politica
[editá | editá fuente]Na 2013 Vrolijk ta drenta den arena politico, debutando como nr. 15 riba lista di MEP. Den eleccion di 2013 e ta saca 586 voto. Despues di a saca 749 voto personal riba posicion nr.10 den eleccion di 2017 el a drenta Parlamento di Aruba como miembro di fraccion di MEP. Na 2019 e tabata iniciado di un "proyecto piloto di e-learning" na varios scol basico.[3] Hunto cu Rocco Tjon, Vrolijk ta entrega e mesun aña un ley di iniciativa pa screening di ministernan, e asina yama "Landsverordening integriteit ministers".[4] Despues cu parlamento a trata esaki pa di dos bes, e ley a keda aproba na october 2021 cu diesnuebe voto pro y uno contra.[5] E ta logra mantene su asiento den parlamento pa un di dos termino despues di obtene 619 voto den e eleccion di 25 di juni 2021. Dia 8 di juli 2021, durante e prome reunion di e parlamento den su constelacion nobo, e ta wordo elegi como presidente di parlamento. El a wordo re-elegi na apertura di aña parlamentario na september 2021[6], 2022 y 2023. Ora na 2024 e no a wordo re-eligi esaki a conduci na e caida repentino di Gabinete Wever-Croes II.[7]
Referensia
|
· 
· 