Joran van der Sloot

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Joran Andreas Petrus van der Sloot (☆ 6 di augustus 1987 na Arnhem) ta un asesino Hulandes cu a wordo sentencia pa e morto di Stephany Flores na 2010. Te dia di awe e ta tambe e sospechoso principal den e caso di e desaparicion di Natalee Holloway na Aruba, un señorita cu ta di Merca. Van der Sloot tin famia na Aruba, su tata tawata tin carera di abogado y e tawata e defensor di su yiu durante e investigacion di e caso di Natalee Holloway.

Joran van der Sloot
Informacion basico
Nomber completo	Joran Andreas Petrus van der Sloot
Nacemento	6 ougùstùs 1987
Educacion
Alma mater	International School of Aruba
Informacion profesional
Ofishi	criminal, eskritor, serial killer
Informacion criminal
Condena	murder, robbery, extortion
Castigo	incarceration
Imagennan riba Wikimedia Commons
(en) IMDb-profiel
[Edita Wikidata] · [Manual]

Na juni 2023 Peru a extradita Van der Sloot temporalmente pa Merca pa wordo huzga pa extorsion di e mama di Natalee Holloway. Despues e lo sinta prome e resto di su castigo na Peru. Si acaso Van der Sloot a ser condena na Merca e lo wordo extradita di nobo pa Merca y someti na e castigo duna na Merca, despues di caba di sinta su castigo na Peru.

Morto di Stephany Flores

Riba 2 di juni 2010, Van der Sloot ta den detencion riba e caso di un Peruano cu e ta wordo sospecha di a mata na Peru.

Segun informacion oficial Van der Sloot lo a asesin'e riba 30 di mei 2010. A bin asina cu e trahado di hotel a haya e klepchinan mancha cu sanger. Nan a par'e na e frontera di Chile, aworaki e ta den embahada Hulandes pa sa kico lo ta su destinacion.

Hotel TAC unda Joran van der Sloot a keda na mei 2010.

Ta trata di asesinato di yiu muher di 21 aña di e comerciante y piloto di auto di careda Ricardo Flores. E mucha muher Stephany Tatiana Flores-Ramirez, nan a hay'e morto den hotel TAC, na Miraflores, cerca di Lima, Peru. El a wordo bati y maltrata. Aparentemente e no a hinc'e. Varios corant Peruano a indica cu van der Sloot ta e sospechoso principal, pasobra e camber di hotel unda nan a haya e curpa riba diaranson mainta ta registra na su nomber . Trahadonan di e hotel a declara tambe na polis cu durante weekend nan a wak Joran cu e juffrouw aki. Polis Nacional di Peru a descarta e posibilidad cu el a secuestr'e, despues cu su mayornan a reporta su disparcion for di diabierna pasa. Polis a yega na e conclusion aki, despues cu nan a combersa cu algun bisiña di 'pasaje Jorga Chavez', den distrito Surco, unda nan a haya e pickup di Stephany bandona. E hendenan di e bario a bisa cu tur siman Stephany tawata haci bishita eynan, unda cu e tawata busca un hoben cu lo por tawata su pareha. E informacion aki a duna polis e indicacion cu casi sigur e mucha muher tabata cu e persona aki, considerando e hecho cu mesun dia di su desaparicion, Stephany tawatin un discusion pisa cu su tata.

Polis tin prueba

Esnan di inmigracion na prome instante a bisa cu no tin un ordo internacional pa captura di Van der Sloot, pero tin si un alerta manda pa Chile , pa nan no permiti Joran scapa over di nan frontera. E pensamento ta cu Joran por purba yega Argentina, unda den pasado hopi “criminal” grandi di Di Dos Guera Mundial a bay busca refugio eynan. Sinembargo hefe di Asunto Consular di embahada Hulandes, Bengt Loosdrecht ,a bisa cu Interpol si a pone un ordo internacional di detencion riba cabes di Van der Sloot. Tata di e mucha muhe den un entrevista cu CNN a bisa cu den e pickup di su yiu muher, pildonan di Ecstasy a wordo haya, cu cual Joran intencionalmente a droga Stephany, pero e version aki no a wordo confirma pa polis Peruano. Polis ta bisa, cu basa riba evidencia, nan ta convenci cu e crimen a wordo cometi riba diadomingo, 30 di mei 2010. Esaki ta exactamente cinco aña despues cu Natalee Holloway a disparce for di mapa na Aruba. Te cu ayeranochi, ainda no a haya indicacion si acaso e autopsia practica riba e victima a keda cla. Pues e causa di morto exactamente no ta conoci.

Aruba

Corantnan grandi di e pais a saca paginanan grandi atardi riba e caso aki. Hasta Hulanda a pone hopi atencion riba e noticia aki. Varios persona a comenta, cu si acaso e polisnan di Aruba a haci nan trabou corectamente e tempo aya, kisas Joran lo tawata den prison y nunca lo no a topa Stephany, y e dama hoben lo a keda bibo ainda. Peru ta bisa cu nan tin evidencia incriminatorio di su envolvimento den e caso di Hotel TAC. Esaki ta inclui declaracion di un empleado di hotel kende a mira Joran drenta cu Stephany pa 5:00 a.m. den e hotel.

Casino Atlantic City Casino na Lima, unda Van der Sloot y Flores were a wordo graba riba video.

Tambe nan tin declaracion di un otro stranhero cu tabata den e Hotel cu a mustra mesun cos. Y tambe tin videotape di Casino Atlantic City, y videotape di e Hotel TAC mes, unda bo ta mira nan dos hunto. E investigacion ta birando pisa, pasobra nan no por haya e curpa di e señorita aki cual ta haci cu no tin caso y validez.

Ministerio Publico di Aruba a mustra, cu nan ta disponibel pa suministra autoridad Peruano cu cualke informacion cu nan ta desea riba e asunto. Pero mirando e protocolnan internacional, esaki lo ta bayendo via Den Haag, como cu ya caba Lima a pidi Hulanda pa haya informacion di Joran.

Cargonan federal

Fiscal pa Distrito Nort di Alabama ta acusa van der Sloot di extorsion y “wire fraud”, bisando cu Joran a priminti informacion riba paradero di Natalee Holloway a cambio di $250,000.

Fiscal Joyce White Vance a bisa cu riba of rond di 10 di mei van der Sloot a laga un persona transferi $15,000 for di un banco na Birmingham pa un banco na Hulanda. Esaki mester tabata un pago parcial. E fiscal a splica cu van der Sloot a priminti di bisa e sitio unda cu e restonan di Holloway ta na Aruba y informacion encuanto e circunstancianan di su morto despues cu e ricibi e $250,000 completo. Na 2023 Peru a duna di conoce di ta dispuesto di extradita van der Sloot temporalmente pa Merca pa e wordo persigui pa e caso di extorsion.

Joran a confesa

Dialuna den e oranan laat di anochi mundo a bin haya sa e noticia cu Joran van der Sloot a confensa di a mata Stephany Flores door cu e la bay coba den Joran su laptop y a bin haya sa informacion relaciona cu e caso di Natalee Holloway. Joran a confesa n'e recherche di Lima cu e lo a batie, paso el a rabia y a perde cabes ya cu el a bay coba den su bida personal. Ta papia cu posibelmente e lo tabata tin informacion confidencial di e caso di Natalee Holloway den su laptop. Den su rabia Joran a kibra e nek di Stephany, despues cu Joran a bay bebe un koffie. Polis tambe a menciona cu Joran no tabata kier a separa di su laptop riba caminda pa Lima for di Chile. Joran van der Sloot ta cera na e di 7 piso di e prizon na Lima. E ta ricibi tres cuminda cayente pa dia. Consulado di Hulanda na Lima a bisa cu nan lo brinda e hoben Hulandes cu asistencia consular cu ta encera bishita ocasional durante su encarcelacion. Tambe nan lo percura cu e ta wordo trata husto y decente, mescos cu tur otro detenido. Segun e Consulado di Hulanda na Peru, ya caba gobierno Peruano a sigura nan via canalnan diplomatico cu nan a tuma e caso aki masha na serio y lo trata e detenido Hulandes cu tur respet necesario. “Mundo ta siguiendo e caso aki masha di cerca”, asina un vocero di Gobierno a admiti na Consul di Hulanda.

Mester bisa cu Joran van der Sloot no ta e unico Hulandes cera na Peru. E ta e di 11 Hulandes cera den prizon peruano, di cual mayoria di nan ta sintando un castigo relaciona cu e ley di droga.

Diasabra ultimo Joran van der Sloot a papia cu su mama na telefon. No ta hopi sigur ainda si su mama, Anita van der Sloot, lo biaha pa Peru. Joran tin dos ruman homber mas.

Joran van der Sloot a cay cera siman pasa y un hues ya a prolonga su detencion cu por lo menos 7 dia mas. Si acaso un Corte husga e acusado di homicidio, e lo por haya un castigo di 35 aña di prizon. Presidente di Peru, Alan Garcia, a bisa prensa diabierna ultimo cu e lo no extradite Joran van der Sloot pa ningun caminda, ni tampoco pa Merca, prome cu e wordo husga pa e delito serio cu e ta wordo acusa di dje na Peru mes.

Tata di Stephany ta duna declaracion

E tata di e victima asesina Peruano, Stephany Flores ayera a reuni cu un hues pa duna un declaracion oficial, asina famianan a bisa CNN. Joran ta nenga su mesun oportunidad pa duna hues un declaracion. Ricardo Flores lo mester a reuni cu Hues Carlos Morales Cordova, kende awor ta encarga cu e caso. Como e hues cu lo presidi e caso, e tin e deber, e persona mas importante pa busca factor y ta recibiendo declaracion for di otro testigo potencial tambe. For di su parti, Van Der Sloot ta purbando pa retrasa e proceso legal door di apela incarceracion y purba pa nulifica e confesion cu el a duna. Un hues, ya caba a nenga su reclamo, pero e abogado di Van Der Sloot a bisa cu su cliente imediatamente lo apela e sentencia y bringa , si ta necesario te na e Corte Supremo Peruano y cortenan internacional,si ta necesario..

Corte di Alabama ta dicta

A sali publica cu na corte di Alabama a bisa cu Joran van der Sloot a pidi $250 mil dollar na e famia di Natalee Holloway a cambio di informacion tocante e paradero di e hoben. Wel esaki no ta nada nobo na Aruba, pero awor un hurado di Alabama, a acusa ayera Joran Van der Sloot, sospechoso di a mata Stephany Flores, di fraude electronico y extorsion, segun e departamento di husticia Mericano. Segun e acusacion, Van der Sloot a logra un transferencia di $15 mil dollar for di Beth Twitty, mama di Natalee riba su cuenta na Hulanda y otro suma di $10 mil dollar pa un abogado na New York cu lo a trece e placa Aruba. “Un bes identifica e curpa, Beth Twitty lo mester a pag'e $225 mil dollar na Van der Sloot”, e Departamento di Husticia a indica. Segun e corant Peru 21, FBI, cu lo a graba un encuentro na Aruba durante cual Joran a acepta e suma di $10 mil dollar a wordo critica masha hopi mes pa e hecho cu nan no a detene na momento cu e agentenan conhuntamente cu e autoridadnan di Aruba tabata tin e oportunidad di hacie.

E chick di Joran

E programa popular di ABC News, esta “20/20” a haci entrevista cu Melody Granadillo, como cu den pasado e tabata e ‘chick’ di Joran van der Sloot, y cu e tin ainda un dagboek for di e epoca ey. Nan tabata gay cu chick, cual a dura shete luna. E periodista Chris Cuomo a haya sa, con e Joran di antes tabata ful un otro persona compara cu loke awor mundo conoce. Melody a indica cu Joran a manda pidi placa, via SMS, esta $200 pa asina e sali for di Peru. Joran a tawata hunga poker masha hopi mes. Segun Melody, e ta kere cu si acaso nan a keda hunto, kisas Joran lo no a bay den direccion robes. El a mira con Joran a cambia, aunke e mes conoce como un “otro persona”. E mama di Joran van der Sloot, esta Anita, tambe a manda un e-mail pa Melody, den cual e ta mustra cu keto bay e ta kere cu su yiu homber ta inocente. Aki e ta insisti cu Joran “no ta un asesino”. Publicamente Anita no a papia desde cu su yiu a wordo aresta na Peru. Pero ABC News a haya e e-mail aki. Den esaki, e ta splica cu e no ta duna ningun medio di prensa Mericano un entrevista, pasobra e no ta confia nan. E ta pidi Melody pa keda safe y haci oracion pa Joran. E ta bisa cu e no ta e monster cu nan kier pa mundo mira. E ta kere cu Joran ta traumatisa, deprimi, y tin un adiccion. Mientras cu Joran a duna un detaye extenso na Polis Peruano di loke el a haci cu Stephany, con el a chok'e pa 1 minuut largo, y tambe con el a tapa su cara cu su mesun poloshirt, pa e stop di hala rosea.

Ex-abogado di Micheal Jackson

Joe Tacopina ta rumbo pa Lima, asina e corant di mas grandi na Lima "El Comercio" a publica diasabra mainta. E abogado Peruano di Joran; Pablo Altez Navarro a indica cu e ex-abogado di Micheal Jackson lo yega Lima diahuebs 15 di juli 2010, pa tuma over e defensa di Joran v/d Sloot cual ta acusa di a mata e hoben di 21 aña Stephany Flores. Segun e Tacopina ta di opinion cu un di tres persona lo a mata Stephany Flores y ta ademas cuestiona e proceso penal contra Joran van der Sloot. Tacopina lo ta un di e dos abogadonan stranhero. E abogado Peruano di Joran a declara cu su cliente ta hopi mas trankil cu e prome dianan cera den prizon y no tin falta di cuminda.

Beth Twitty

Peter de Vries y Beth Twitty a purba drenta prizon Castro-Castro cu camara scondi, pero a keda deteni y expulsa for di e centro coreccional. Nan a sigui awor pa Aruba na unda kier traha un programa di television relaciona cu desaparicion di Natalee Holloway.

Periodista Hulandes P.R. de Vries.

Keho contra Peter R. de Vries

E abogado di Joran van der Sloot ta bay entrega un keho oficial na Peru contra e periodista Hulandes, Peter R. de Vries. Asina e abogado Maximo Altez a laga sa dialuna. De Vries a haci su mes culpabel di soborno di e director di e prizon Peruano caminda Van der Sloot ta cera, segun e abogado Altez. Peter R. de Vries, hunto cu Beth Twitty, mama di Natalee Holloway, recientemente a logra drenta prizon Castro Castro y cu camara scondi den oficina di e director, a logra papia cu e detenido sin cu e tabata sa cu nan tabata grab'e. Eynan Twitty a papia cu Van der Sloot den e oficina di e director, mientras cu de Vries tabata den un otro oficina ta scucha e combersacion via un telefon. Van der Sloot tambe a entrega keho contra Twitty y e director di e prizon. E periodista a para riba cu “no tin niun corupcion. Ningun cen, ningun peso, nada, nul coma nul, a paga pa a drenta e prizon.” E periodista ta considera tuma pasonan hudicial contra e abogado Altez, si su ponencianan no wordo tuma.

Mira tambe

• Natalee Holloway

Fuente, nota i/òf referensia