Claude Wathey
Albert Claudius (Claude) Wathey (☆ 24 di yüli 1926 na Philipsburg – † 9 di yanüari 1998 na Sint Maarten), tambe konosí komo e "Ole Man", tabata un empresario i polítiko prominente di Sint Maarten. El a domina polítika na e isla durante 45 aña.[1]
| Pais di nashonalidat | Reino Hulandes  |
|---|---|
| Nòmber di dilanti | Claude |
| Fam | Wathey |
| Fecha di nasementu | 24 yüli 1926 |
| Lugá di nasementu | Philipsburg |
| Fecha di fayesimentu | 9 yanüari 1998, 8 yanüari 1998 |
| Lugá di fayesimentu | Philipsburg |
| Okupashon | politiko |
| Partido polítiko | Partido Demokrátiko Sint Maarten |
| Distinshon | Knight of the Order of the Netherlands Lion, Ofisial den Orden di Oranje-Nassau |
Biografia
editáClaude Wathey a nase dia 24 di yüli 1926 na Philipsburg komo yu di Mavis i Cyrus Wilberforce Wathey, negosiante i direktor di Windward island Bank Ltd.[2] E famia Wathey ta bin di un famia caribense antiguo di orígen belga, prosedente di e siudat di Tongeren. El a bishita St.Joseph School na Frontstreet i despues a sigui varios kurso den maneho di empresa i hoteleria.[3]
Na 1950 Wathey a drenta polítika komo miembro di partido NVP. E 'grupo di Wathey' ta gana elekshon na 1951, opteniendo kuater di e sinku asiento ku tabata pertenesé na Sint Maarten den Konseho Insular di Islariba. Pa 31 aña konsekutivo, di 9 di yüli 1951 te yüli 1982, Wathey tabata miembro di Konseho Insular i a fungi tambe komo lider di frakshon. El a okupa e funshon di diputado di Kolegio Ehekutivo di 1951 te 1962 i di 1979 te 1982. E tabata miembro di Parlamento di Antia Hulandes pa Islariba di 1962 te 1977 i di 1982 (elegí ku voto preferensial) te su retiro na 1990.[4][5]
Huntu ku Clem Labega, e tabata fundadó di Partido Demokrátiko di Sint Maarten (Democratic Party Sint Maarten of DP Sint Maarten) na yüli 1954. Foi su inisio te 1992 el a liderá e partido ganando elekshon tra'i otro desde 1955. Te 1990 e partido tabata e úniko partido di Sint Maarten ku representashon den parlamento antiano.
Komo e tabata su deseo pa Islariba ta representa den Konseho di minister di Antia Hulandes Wathey a nominá Jackie Voges komo minister di Tráfiko i Transportashon den gabinete Evertsz na 1973. Na 1984 e tabata informadó i formadó di e promé gabinete Liberia-Peters i na fin di 1985 e tabata formador, huntu ku Don Martina, di e di kuater gabinete Martina.[6] El a forma parti di diferente komishon i a partisipa den e konferensianan di Mesa Rondo. Wathey tabata dediká na hasi Sint Maarten polítikamente independiente, pero despues a keda sentensiá pa perhurio.[7] Hopi habitante di Sint Maarten a haya su sentensia un akto inhusto di su rivalnan na Kòrsou i Hulanda pa kibra su monopolio den polítika di Sint Maarten. Apesar di esaki el a keda un figura popular i kontroversial, hasta te despues di su morto.
Wathey a pasa su último añanan na Sint Maarten i a fayesé na 1998 na edat di 71 aña a kousa di problemanan di kurason.[8]
Distinshon
editáNa 1964 e pier nobo na Pointe Blanche a haya su nòmber, A.C. Wathey-pier. E nòmber aki a kambia pa Dr. A.C. Wathey Cruise & Cargo Facilities, despues ku na 2007 e waf di Sint Maarten a keda transforma pa akomoda barkonan krusero grandi.[9]
Na 1984 Wathey a risibí e título "doktor honoris causa" den lei di Universidat di Santa Maria na Venezuela.[3]
Na 1959 Wathey a keda nombrá Kabayero (Ridder) den Orden di Oranje-Nassau, na 1971 promové pa Ofisial (Officier) den e mesun orden i na 1976, na okashon di su 25 aniversario komo miembro di Konseho Insular di Islariba, el a wòrdu promové pa Kabayero (Ridder) den Orden di Leon Hulandes.[10][11] E kondekorashonnan real hulandes aki Wathey a debolbé na 1993 komo protesta kontra su aresto.[12]
Referensia
|