Aloe vera
Aloe vera (sinonimo na Aloë Barbadensis, Aloe na Aruba, Sentebibu na Corsou y Boneiro) ta un mata tipo suculento di e genero Aloe.[1] E ta un mata perenial semper berde, cu ta origina di e Peninsula Arabico, pero cu ta crece den mondi den climanan tropical, semi tropical y arido rond di mundo. E ta ser cultiva pa uzonan agricultural y medicinal. E especie tambe ta wordo uza como mata decorativo y por crece paden di cas como un mata den pochi.
| Aloe vera | ||
|---|---|---|
| ||
Un aloe creci cu flor.
| ||
| Clasificacion taxonomico | ||
Division:
Clase:
Orden:
| ||
| Especie | ||
| Aloe vera (L.) Burm.f., 1768 | ||
Imagennan riba  Wikimedia Commons
| ||
Aloe vera riba  Wikispecies
| ||
| [Edita Wikidata] · [Manual] |
Aloe Vera por wordo haña den varios producto pa consumidor manera bebida, crema pa cuero, cosmetica, pomada of den forma di gel pa trata kemadura chikito y kima door di solo. Tin tiki evidencia clinico tocante e efectividad y siguridad di e uzo di su extracto como cosmetica y medicina.
Descripcion
editáAloe vera ta un mata sin troncon of cu troncon chikito cu ta alcanza un largura di 60–150 cm.[2] Un aloe ta propaga sexual via su flor o asexual. E metodo asexual ta den un tal manera cu un yiu ta propaga, na e base di un aloe madura, for di un wortel cu ta crece horizontal (rizoma)[nl]. Asina, e chens pa propaga ta mas halto.[3][4]
E mata ta produci flor durante zomer riba un taki cu por crece te cu 90 cm largo, caminda e flornan ta colga di un taki y cada flor tin un petalo tubolar di 2–3 cm color geel.
E blachinan tin rand corta cu puntanan blanco chikito den forma di djente. E blachinan di e mata ta diki cu hopi carni y ta color berde te cu berde shinishi, y algun variacion tin pikpik blanco riba e superficie di e parti ariba of abou di e blachi. E blachi di Aloe vera ta contene fitokimico cu ta wordo studia encaunto su posibilad pa bioactividad manera manano, poli manano, antra kinona glucocisio-C, antrona, y otro antra kinona manera emodin y varios otro lectin.
Manera otro especie di Aloe, Aloe vera ta forma e Arbuscular mycorrhizas, un relacion simbiotico cu un fungi cu ta duna e mata mihor acceso na e mineralnan nutriente den tera.
Taxonomia y etimologia
editáAloe vera tin un cantidad di sinonimo: A. barbadensis (Mills), Aloe indica (Royle), Aloe perfoliata L. var. vera y A. vulgaris (Lam). Nomber nan comun ta inclui Chinese Aloe, Indian Aloe, True Aloe, Barbados Aloe, Burn Aloe, First Aid Plant. E epitet vera ta nifica “berdadero”. Algun literatura ta identifica e especie di Aloe vera cu e pikpik blanco como Aloe vera var. chinensis y tambe a wordo sugeri cu e especie ta conspecifico cu A. masswana.
E especie a wordo describi pa prome biaha door di Carl Linnaeus na 1753 como Aloe perfoliata var. vera y atrobe riba 6 april 1768 pa Nicolaas Laurens Burman como Aloe vera den e publicacion Flora Indica y Phillip Miller como Aloe barbadensis dies dia despues di Burman den Gardener’s Dictionary.
Tecnica basa riba comparacion di ADN ta sugeri cu Aloe vera ta relativamente relata cu Aloe perryi, un especie endemico na Yemen. E tecnica similar di comparacion di secuencia ADN chloroplast y prefil di ISSR tambe ta sugeri cu e ta relata cu Aloe forbessi, Aloe inermis, Aloe scobirifolia, Aloe sinkatana y Aloe striata. Cu excepcion di e especie Sur Africano A.striata e especienan aki di Aloe ta indigeno di Socotra na Yemen, Sudan y Somalia. E ausencia di un poblacion natural di e especie, a pone cu algun autor a sugeri cu Aloe vera tin un origin hibrido.
Habitat y distribuimento
editá
Ta considera Aloe vera un mata nativo solamente den parti zuid oost di Peninsula Arabico den sero Al-Hajar na parti noord oost di Oman. Sinembargo, e mata ta wordo cultiva rond di mundo caminda awe e ta naturalisa den region di Noord Africa, Sudan y su bisiñanan, y tambe Islanan Canarias, Islanan Madeira y Cabo Verde. Tambe e ta naturalisa den region di Algarve na Portugal y ta crece den mondi den parti zuid di Spaña, specialmente den region di Murcia.
E especie a wordo introduci na China y varios parti di zuid Europa den siglo 17. E la naturalisa na hopi otro lugar y por wordo haña den region cu clima arido, tempera y tropical den continentenan cu clima tempera. E distribuimento actual di e mata por ta un resultado di cultivacion.
Cultivacion
editáAloe vera ta wordo creci en gran parti como un mata ornamental. E mata ta popular bou di e hardinero moderno debi na su reputacion como “mata medicinal” y pa su flornan interesante, su forma y su suculencia. E suculencia ta hasi e posibel cu e especie por sobrevivi den areanan cu ta ricibi tiki yobida, hasiendo e ideal pa un hardin di baranca of hardin cu mester poco awa. E especie ta resistente den zona 8-11 y no por tolera ni vries, ni sneeuw. E ta un especie relativamente resistente pa varios insecto, pero algun insecto manera cierto especie di afido, insectonan scama y tetranychidae, por causa e salud di e mata pa deteriora. E mata a gana Royal Horticulture Society su “Award of Garden Merit”.
Den pochi, e especie ta rekeri un bon drenahe, tera cu hopi santo den e pochi y solo. Ora haña solo di mas e mata por kima of por krimp si e pochi no por dren e awa. Uzando un gordura comercial di bon calidad “mescla pa cadushi y suculento” ta recomenda siendo cu esaki ta permiti un bon drenahe. Un pochi di teracota ta preferibel den e caso aki, paso e material ta poroso. E matanan den pochi mester seca completo, prome cu duna esakinan awa di nobo. Ora e mata ta den pochi, e propogacion di e matanan menor ("yiu") por yena e espacio den e pochi rond di e mata mayor. Ora esaki pasa mester dividi e matanan y hincanan den pochi nobo pa asina tin espacio pa crecemento sigui tuma lugar y tambe preveni infestacion di parasiet. Durante winter Aloe vera por drumi, caminda e mester menos hidracion ainda. Den areanan cu ta vries of sneeuw ta bon pa tene e especie paden of den un cas di glas cayente. Tin cultivacion agricultural di Aloe vera ta tuma lugar riba scala grandi na Australia, Cuba, Republica Dominicano, China, Mexico, India, Spaña, Kenia, Tanzania, Sur Africa y tambe Merca, caminda locual wordo produci ta ser uza pa suminstra e industria cosmetico.
Rond 1840 e especie a wordo introduci na e Aruba, Boneiro y Corsou. Aruba ta bira, entre e tres isla, e productor y exportador di mas grandi na mundo di e “aloehars” (usa pa traha laxante) den e añanan despues di 1906, y pa 1920, mas di 2/3 parti di e isla tabata cubri cu mata di aloe, ganando Aruba e nomber di “Isla di Aloe.”
Awendia e cultivacion di e especie ta tuma lugar riba scala chikito na Hato, un bario net pafo di Oranjestad. Akinan e compania Aruba Aloe Balm NV, funda na 1890 pa Cornelis Eman, tin 63 hectar di plantashi di aloe. E ta un di e prome companianan na mundo cu ta traha productonan cosmetico basa ariba e gel curativo di e Aloe vera. Su prome liña di producto, entre otro shampoo, crema solar y otro cremanan, a keda lansa na 1966.[5].[6]
Uzo
editáDos substancia di e Aloe vera, esta e gel transparente y e latex geel, ta wordo uza pa productonan comercial. Gel di aloe tipicamente ta wordo uza den cremanan topical pa condicionan di cuero manera kemadura, herida, grawatashi, psoriasis of cuero seco. Latex di aloe ta wordo uza riba su mes of en combinacion cu otro ingrediente via ingestacion pa alivia constipacion. Por obtene e latex den un forma seco tambe yama resin.
Investigacion
editá
E evidencia ta den conflicto pa cu si Aloe vera ta efectivo pa trata herida of kemadura. Tin algun evidencia cu uzo topical di productonan traha di aloe por alivia sintoma di cierto problema di cuero manera psoriasis, acne of grawatashi.
Gel di Aloe vera ta wordo uza comercialmente como ingrediente den yoghurt, bebida y algun dessert, pero na cierto dosis halto su propiedadnan toxico por ta severo ora esaki wordo consumi oralmente. Uzo di Aloe vera topical den cantidad chikito tin hopi chens pa no ta peligroso.
Uzo como medicina topical y posibel efectonan secundario
editáAloe vera por wordo prepara den forma di gel, crema, habon of cosmetica pa uza riba cuero como medicina topical. Pa hende cu alergia di aloe vera por haya un reaccion riba cuero cu por ta dermatitis di contacto, cu e cuero birando cora y ta grawata, dificultad pa hala rosea of hinchamento di cara, lip, lenga of garganta.
Suplimento pa dieta
editáAloin, un compuesto haña den e latex semi likido di algun especie di Aloe tawata un producto comon den productonan laxativo no prescribi na Merca te cu aña 2002 , ora cu e Food and Drug Administration a prohibi e ingrediente paso e productornan a faya den provee e data di siguridad necesario. Aloe vera ta potencialmente toxico, cu efectonan secundario tumando luga na sierto dosis sea consumi oralmente of topicalmente. Asina mes cu e toxicidad por ta menos ora kita aloin durante procesamento, ingestacion di Aloe vera den dosis nan halto por induci efectonan secundario manera, dolor abdominal, diarea y hepatitis. Ingestacion cronico di Aloe vera (dosis 1 gram pa dia) por causa efectonan peligroso manera, hematoria, perdemento di peso, desorden cardiaco of di riñon.
Juice di Aloe vera ta ser adverti como un producto cu por soporta e salud di e sistema digestativo, pero no tin ni evidencia sientifico, ni aprobacion regulatorio cu ta afirma esaki. E extractonan y cantidadnan tipicamente uza pa e objectivonan aki ta parse di ta depende di e dosis pa efectonan toxico.
Medicina tradicional
editáAloe vera ta wordo uza den medicina tradicional pa tratamento di cuero. E prome indicacion di uzo di Aloe vera ta den Ebers Papyrus di siglo 16 BC y den Dioscorides su De Materia Medica y Pliny e Bieu su Naturalis Historia, tur dos skirbi medio prome siglo BC. Tambe tin algo skirbi den Juliana Anicia Codex na aña 592 AD.
Mercancia
editáAloe vera ta wordo uza pa kleenex caminda e ta ser promovi como hidratante y anti iritante pa reduci scafmento di nanishi ora uza kleenex. Ta comun pa companianan di cosmetica pone sap of otro derivacion di Aloe vera den productonan manera makiyahe, kleenex, habon, crema pa hidrata, crema pa proteccion contra solo, sensia, crema pa feita of shampoo. Un recensia di literatura academico ta nota cu e inclusion di aloe den varios producto higienico ta debi na su “efecto pa hidrata”.
Toxicidad
editáIngestacion oral di extracto di un blachi di Aloe vera no descoloriza ta riba un lista di California Office of Environmental Health Hazard Assessment hunto cu “kimiconan cu ta conoci pa e estado [di California] pa causa cancer of toxicidad reproductivo”.
Uzo di Aloe vera topicalmente no ta wordo asocia cu efectonan secundario significativo. Ingestacion oral di Aloe vera ta potencialmente toxico y por causa dolor abdominal of diarea cu en turno ta baha e absorbacion di otro medicacion.
Interaccion cu medicacion prescribi
editáIngestacion di Aloe vera por tin interaccion peligroso cu medicacion prescribi manera esnan pa trata bloodclot, diabetis, malesa di curason, medicamento pa baha nivel di potasio y diureticonan pa menciona algun.
Galeria
editá-
Blachi di Aloe vera, por observa e rand serrata cu djentenan blanco -
Gel corta di blachi di Aloe vera -
Un mata di Aloe vera cu su ”yiu” den un pochi -
Flor di e mata di Aloe vera
Referensia
|