Zooplancton
Tradicionalament, se devesís la comunautat del plancton en fitoplancton o plancton vegetala e en zooplancton o plancton animal.
Se nomena zooplancton la partida del plancton constituida per d'èssers que s'alimentan de matèria organica ja modificada per ingestion. Es constituit per de protozoaris, es a dire, protistas divèrses, fagotròfs qu'englòban la noiridura la fagocitant. Tanben per de larvas d'animals mai grands, coma porifèrs, vèrms, equinodèrmes, molluscs o crustacèus, e d'autres artropòdes aqüatics, e tanben de formas d'adultas de crustacèu de pichona talha —coma copepòdes o cladocèrs—, rotifèrs, e de fasas juvenilas de peisses (alevins).
Son d'eterotròfs que dins la cadena trofica ocupan las primièras posicions de consomators, s'alimentant dels produchs primaris (compausants del fitoplancton), d'organismes saprofits, coma las bactèris, o d'autres compausants del zooplancton. Unes s'alimentan de residús organics trissats.
Mai sovent los membres del zooplancton gardan una granda proximitat sistemica amb aqueles del fitoplancton, a vegada quitament son del meteis genre. Fòrça algas unicellularas flagelladas sincronizan o altèrnan la fotosintèsi amb la ingestion d'aliments organics.