Willow
| Filmdaten | |
|---|---|
| Plattdüütsch Titel: | — |
| Originaltitel: | Willow |
| Düütsch Titel: | Willow |
| Produkschoonsland: | USA |
| Johr vun’t Rutkamen: | 1988 |
| Läng: | 120 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Ron Howard |
| Dreihbook: | Bob Dolman George Lucas (Story) |
| Produkschoon: | Nigel Wooll |
| Musik: | James Horner |
| Kamera: | Adrian Biddle |
| Snitt: | Daniel P. Hanley Mike Hill Richard Hiscott |
| Szenenbild: | Allan Cameron |
| Kledaasch: | Barbara Lane |
| Dorstellers | |
| |
Willow is en Fantasy-Film ut dat Johr 1988. De Geschicht för den Film hett George Lucas schreven, Bob Dolman schreev dat Dreihbook.
Inholt
[ännern | Bornkood ännern]Na en Prophezeien warrt de böse Königin Bavmorda een Dag vun en Fro vun’n Throon stött. Üm dat to hinnern, gifft se Befehl, all nee’ boren Deerns, de en sünner’t Mol hett ümtobringen. De Plan geiht nich op, as de lütte Elora-Danan in Sekerheit bröcht warrt, bevör Bavmorda ehr Ritual maken kann. Dat Kind warrt vun den Nelwyn (en Dwargvolk) Willow funnen, de en groten Töverer warrn will. Nadem Willows Dörp vun Monsters angrepen warrt, de dat Kind söken doot, kriggt Willow den Opdrag, ehr na de Daikinis (de Minschen) to bringen.
Dat geiht man nich ganz so eenfach vör sik, as se sik dat toeerst dacht hebbt. Woll findt he den Krieger Madmartigan, den he dat Kind anvertroen deit, de aver lett sik dat gau wedder afluchsen, wat Willow spitz kriggt. Vun de Fee Cherlindrea kriggt he den Opdrag, toeerst de Töversche Fin Raziel to finnen un Elora-Danan denn in de Borg Tir Asleen in Sekerheit to bringen. Tohopen mit Madmartigan un de twee Brownies Rool un Franjean maakt Willow sik op den gefährlichen Weg.
Dorbi hollt de Truppen vun Bavmorda, mit ehr Dochter Sorsha jem jümmer wedder in un maakt jem dat Leven swor. Man, Sorsha verleevt sik in Madmartigan, lööpt över un stellt sik an de Siet vun den Krieger, Raziel un Willow gegen ehr Moder, de in de Twüschentiet in ehr Borg dat Ritual praat maken deit, üm dat Kind tonichten to maken. Dor in de Borg kummt dat opletzt to’n Kamp, wo Elora-Danan mit eenig Kräft rett un Bavmorda slahn warrn kann.
Anners wat
[ännern | Bornkood ännern]- De Geschicht, de in’n Film vertellt warrt, is later vun George Lucas un Chris Claremont in en Booktrilogie wieterschreven worrn, de ünner de Titels „Schattenmond“, „Schattendämmerung“ un „Schattensonne“ in’n Hannel weern.
- De Film is an verscheeden Öörd in Kalifornien, Wales, England un Nieg Seeland dreiht worrn.
- Bi’t Dreihn vun’n Film hebbt sik Joanne Whalley un Val Kilmer in’nanner verleeft un noch in’t lieke Johr heiraadt. Man, de Eh is 1996 wedder scheedt worrn.
Utteken
[ännern | Bornkood ännern]De Film is 1989 un 1990 för en ganze Reeg Filmpriesen nomineert worrn, dorünner dreemol för den Saturn Award un sogor ok för twee Oscars för de Trick- un Sound-Effekten. Man, ok för den Razzie Award weer de Film tweemol vörslahn, so ok för dat slechteste Dreihbook. Wunnen hett de Film opletzt een Filmpries:
- 1990: den Saturn Award in de Kategorie Best Kledaasch för Barbara Lane.
Weblenken
[ännern | Bornkood ännern]- Willow in de Internet Movie Database (engelsch)