Phagozyt
En Phagozyt (vun’t ooltgreeksche φαγεϊν phagein „freten“ un κύτος kýtos „Fatt“, „Hüll“) is de Beteken för en so nöömte „Freetzell“, de en zellulären Bestanddeel vun’t Blood dorstellt. Se sünd in de Laag lebennig un nich-lebennige Geweev oder annere Deelen in sik optonehmen un to verdauen. Dorbi warrt in Mikrophagen un Makrophagen ünnerscheedt.
Mikrophagen künnt in disse Funkschoon vun de Frömdkörperafwehr – de ok as Phygozatoos betekent warrt – as Mikrozyten oder Granulozyten vörkamen. Se künnt nich blots in’t Blood vörkamen, man sünd ok in de Twüschenzellrüüm vun de Geweven free beweglich. Jüst so as Amöben bewegt se sik un folgt dorbi sünnere Reizen. Mikrophagen künnt blots lütte Deelen (t. B. Bakterien) över de Phagozytoos an de Siet maken.
Free bewegliche Makrophagen warrt Monozyten nöömt. Wenn se aver in’t Geweev inwannert, warrt se to Geweevsmakrophagen. Se all tohopen billt dat retikulohistiozytäre System. En bedüdene Opgaav vun jem is de Anlaag to de Antigenpräsentatschoon, dat heet se laadt Molekülen, de Antigenen, op sünnere Proteinkumplexen, so dat se vun’t Immunsystem wohrnahmen warrn künnt.
