Massentall
De Massentall (ok Nukleonentall nöömt) gifft an, woveel Karnbostenen oder ok Nukleonen in en Atomkarn tohopensitt. Dormit is ok lieks ungefäähr de Atommasse angeven, as de Elektronen in de Hüll nich veel Masse bidregen dot. De Massentall warrt mit dat Teken A afkött.
De Nukleonen sett sik tohop ut de Neutronen und de Protonen, wobi de Protonentall (Atomtall) ok gliektietig de Laden in den Atomkarn angifft und dormit ok dat cheemsch Element defineert as ok den Platz in dat Periodensystem. De Atomtall warrt nipp un nau links ünnen blang dat Elementensymbol schreven, de Massentall kummt links doröver. Man de Atomtall warrt tomeist gor nich hinschreven, as dör dat Element al fastleggt is, woveel Protonen in den Karn sünd. Meist warrt dorüm blots de Massentall blangschreven, t. B.: 12C (Kohlenstoff).
Atome mit de sülven Ordnungstall höört to dat lieke Element, man de Massentall kann liekers ünnerscheedlich wesen, as de Neutronen in ünnerscheedlich Tall in Karn vörkommt. Man snackt denn vun verscheeden Isotopen. Üm dat nich dör den Tüdel to kriegen, steiht de Massentall blang dat Symbol. För de cheemsch Reakschonen maakt de Massentall keen Ünnerscheed, man in de Karnphysik un bi de Radioaktivität verhollt sik de Isotopen all anners.