Gregory Bruce Jarvis

NASA-Potrait vun Greg Jarvis

Gregory Bruce „Greg“ Jarvis (* 24. August 1944 in Detroit, Michigan USA; † 28. Januar 1986 bi Cape Canaveral, Florida) weer en US-amerikaansch Techniker, de as Bruuklastspezialist an den Space-Shuttle-Floog STS-51-L (Ruumfähre Challenger) deelnommen hett un dorbi to Dood keem.

Leven

Nah de High School hett Jarvis de State University of New York in Buffalo besöcht un kreeg 1967 sien Bachelor in Elektrotechnik. He hett denn sien Studium an de Northeastern University in Boston, Massachusetts fortsett un dor 1969 sien Master-Afsluss maakt. Wiels disse Tiet hett he to glieker Tiet för den US-Rüstungs- und Elektronikkonzern Raytheon arbeit, wo he an de Entwicklung vun de Boden-Luft-Rakete SAM-D bedeeligt weer.

Jarvis is in' Sömmer 1969 de US-Luftwapen (USAF) bitreden. He wurr nah Kalifornien schickt un weer in dat Programmbüro för Satellitenkommunikatschoon vun de USAF-Weltruumafdeelen tätig. Dor weer he as Elektronikexperte mit de Entwicklung vun militärisch Nahrichtensatelliten befaat, bi he de Air Force weer verlaaten hett. In Los Angeles hett he de West Coast University besöcht un studeer dor wetenschapliche Bedrievsführung. He hett dor all Kurse besöcht, de för en Master-Afsluss bruukt wurrrn, hett aber de Prüfung nich afleggt.

Karriere

Nah sien Afscheed in Ehren vun de USAF funn Jarvis 1973 en Anstellung bi Hughes Aircraft. He weer Techniker in de Ruumfohrtafdeelen un hett an dat MARISAT-Programm (MARItime SATellite). Twee Johr later wurr he to'n Integratschoonsmanager för den darten Vertreder vun disse Satellitenreeg befördert, de in' Oktober 1976 start wurr. 1978 wurr he to'n Advanced Program Laboratory versett, wo he den Militärsatelliten Syncom IV (LEASAT) entwickeln dee, de för en Start mit dat Space Shuttle konzipeert wurr. Later weer he Entwicklungsingenieur för de Satellitenstruktur un sluutend Baas vun de Integratschonsafdeelen för de eersten LEASAT-Trabanten.

Ut 600 firmeneegen Bewerbern weer Jarvis för en Floog mit de US-Ruumfähre utwählt wurrn. Oorsprünglich sull he up STS-51-D in't Fröhjohr 1985 starten, bi de en LEASAT-Satellit utsett wurr. Dör Verännern in de Shuttle-Floogplanung is de Insatz vun Jarvis tonächst up 51-I, denn up 61-C un sluutend up STS-51-L rutscht.

Dood

Dat weer för de Mission vörseh, dat nah dat Utsetten vun den tweeten Kommunikatschoonssatelliten vun de TDRS-Reeg, de sück to de Tiet in Eerdnähe befinnen Halleysche Komet beobacht wurrn sull. Dorto weer de Satellit SPARTAN an Bord, de an' darten Floogdag afsett wurrn sull, um 40 Stünn ungestört den Kometen observeeren to können. Jarvis harr de Upgaav wiels den Floog dat Verhollen vun Fleetigkeiten in de Swoorlosigkeit uttoforschen. Dorto sull he för sien Firma mit verscheeden Behältern experimenteeren, tüschen de Fleetigkeiten hen un her pumpt wurrn sullen.

Dat Space Shuttle Challenger is an' 28. Januar 1986 um 11:38 Ühr Oortstiet vun dat Kennedy Space Center in Florida to de Mission STS-51-L afhaben is. De anner Crew-Liddmaaten weern Kommandant Francis Richard Scobee, Pilot Captain Michael John Smith un de Missionsspezialisten Ronald Erwin McNair, Judith Arlene Resnik, Ellison Shoji Onizuka as ok de Bruuklastspezialistin Sharon Christa McAuliffe. Dör en Leck in den Drievstofftank is de Challenger aber nah 73 Sekunn explodeert un all söben Besattensliddmaaten keemen to Dood.

Jarvis hett sien Fru Marcia achterlaaten. To Ehren vun den Ingenieur wurrn an sien Heimatoort Mohawk – 280 Kilometer nördlich vun New York City – en School (Gregory B. Jarvis Junior/Senior High School) un en Waterkraftwark (Gregory B. Jarvis Plant) nah hüm nömmt. Buterdem drocht en Bauwark vun sien Alma Mater, de State University of New York, sien Naam (Jarvis Hall).

Weblenken

Gregory Jarvis. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie
• Denkmal för Greg Jarvis in Kalifornien (engelsch)