Zaltbommel

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Zaltbommel in Gelderland

Zaltbommel (Zuid-Gelders: Bómmel) is e stedsje en 'n gemeinte in de Nederlandse provincie Gelderland, in de Bommelerweerd, mèt 'n oppervlak vaan 89,06 km² (daovaan 9,12 km² water) en (per 1 januari 2007) 16.204 inwoeners. Neve de hoofplaots ligke binne de gemeintegrenze de dörper Aalst, Bern, Brakel, Bruchem, Delwijnen, Gameren, Kerkwijk, Nederhemert-Noord, Nederhemert-Zuid, Nieuwaal, Poederoijen en Zuilichem.

Stadsgeziech

Martinuskèrk

Zaltbommel heet e good bewaord stadscentrum, mèt aon drei kante umwalling (vaandaog d'n daag beplant es prómmenaad, mèt stadspoorte wie de Waterpoort) en e sjoen Waalfrónt. 't Groetste gebouw is de gotische Martinuskèrk mèt stómpen torie (veertiende en vieftiende iew, toriespits in 1696 aofgebrand) en e klokkepspeul vaan de breurs Hemony. 't Stadhoes stamp oet 1761. Daotegeneuver steit de Waog oet 1796. 't Maarten van Rossumhuis is e locaol museum. 'n Modern bezeensweerdegheid is de Martinus Nijhoffbrögk (1996). Binne de gemeintegrenze, bij Poederoijen, ligk 't Sloot Loevestein.

Historie

Zaltbommel weurt veur 't iers geneump in 'n oerkónde oet 850, es Bomela. Roond 't jaor doezend deeg de keizer de plaots euver aon de bisjop vaan Utrei, meh daonao kaom 't aon Gelder. In 1315 kraog 't vaan de graof stadsrechte nao Zutfens model. 't Maakde ouch deil oet vaan de Hanze. In 1572 veroverde de Watergeuze de stad, die sinsdeen in Staotse han bleef, oondaanks 'n belegering door de Spaanjerds in 1599. In de zeventiende iew naom de beteikenis vaan Zaltbommel aof te geunste vaan De Bos. De kóms vaan de spoorweeg haolde 't oet zien isolemint.

Gebore in Zaltbommel

• Peter van Anrooy, componis
• Anton en Gerard Philips, oetvinders en oondernummers
• Maarten van Rossum, veldhier
• Fiep Westendorp, illustratries

Externe link

• Website vaan de gemeinte