Oostende

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Oostende mèt deilgemeintes en aongrenzende (deil)gemeintes (zuug de teks).

Strand, ziediek en woentorie *Europacenter*

Oostende (Wes-Vlaoms, Frans en Duits: Ostende; Ingels: Ostend) is 'n stad in de Belzje provincie Wes-Vlaondere, de hoofplaots vaan 't gelieknaomeg arrondissemint, gelege aon de Noordzie. De plaots had in 2016 70.600 inwoeners en heet 'n oppervlak vaan 37,72 km². Oostende is internationaol bekind es badplaots, vaanajds veural veur de elite.

Geografie

Deilgemeintes en stadswieke

Oostende heet (gezeen de annexatiehistorie) veer deilgemeites; allewijl oondersjeit de stad evels ach wieke. De grenze op 't keertsje zien neet de grenze tösse de eigeleke deilgemeintes.

I. Oostende-Centrum
- II. Oostende-Vuurtorie/Veurhave
III. Zandvoorde
IV. Stene
- V. Konterdam
VI. Mariakerke-Raversijde
- VII. Mariakerke
- VIII. Raversijde

Aongrenzende (deil)gemeintes

a. Bredene (gemeinte Bredene)
b. Oudenburg (stad Oudenburg)
c. Snaaskerke (stad Gistel)
d. Leffinge (gemeinte Middelkerke)
e. Middelkerke (gemeinte Middelkerke)

Ligking

Oostende ligk vrij centraol aon de Vlaomse kös, op 35 kilometer vaan de Nederlandse en 30 vaan de Franse grens.

Bezeensweerdeghede

Allewel tot 't toerisme ziech veural op 't strand concentreert, heet Oostende ouch e historisch centrum. Door de verweusting bij 't Belègk vaan Oostende zien alle gebouwe oet de zeventienden iew of later. 't Ajdste nog stoond woenhoes is 't Spaons huiske. Opvalle doen wijer de neogotische Pieter- en Paulskèrk, de "Peperbös" (torie vaan de wijer verbrande Pieterskèrk) en get minder de Kapucijnekèrk (de ierste die nao 't Belègk woort gebojd). Aon zie valle väöl veurnaom gebouwe op die herinnere aon 't elitair toerisme wat de stad sinds d'n negentienden iew trok, in 't bezunder de Venetiaanse en de Keuninkleke Galerije en 't Casino (1950; zuug foto).

Historie

Oostende oontstoont es noordoostelek ind vaan 't middeliews eiland Testerep; boevaan 't aander ind Westende waor en 't midde Middelkerke. In 814 weurt 't pläötske geneump in 'n sjinking aon de Bertinusabdij in Sint-Omaars (Saint-Omer). In 1267 krijg de plaots stadsrechte, boevaan evels de ierste jaore neet oetgebreid gebruuk vaan weurt gemaak. Door gestiedegen aofslaag mote de bewoeners verhuize nao 't zuie en weurt de stad in de middeliewe e paar kier obbenuits örges aanders opgebojd. In 1489 weurt de stad geplunderd en in brand gezat door e Duits leger oonder leiing vaan kaptein Daniël van Praet oet 't rivaliserend Nieuwpoort. Nao 't begin vaan d'n Tachtegjaoregen Oorlog kees de stad de kant vaan de Prins; es de Spanjole militair successe in 't zuie hole, blijf Oostende euver es einege Staotse stad in de zuieleke Nederlen. De Spanjole make hei 'n ind aon door 't Belègk vaan Oostende (1601-1694), boebij de stad gans in puin achterblijf.

Nao de Spaonse successieoorlog trèkke ziech de Franse en Spaonse legers trök in Oostende. In 1706 mote de Oosteriekers ze mèt e belègk droetkriege. In d'n achtienden iew perbeert me d'n handel op Indië op gaank te kriege; dit löp evels neet zoe good. De belaankriekste functie vaan Oostende is in die daog evels militair, es marinebasis. Mèt 't Continentaol Stèlsel vaan Napoleon kump d'n handel in Oostende zoe good wie stèl te ligke. Ouch in de Nederlandsen tied weurt neet väöl aon de have gedoon. In 1838 kump de spoorlijn nao Breusel veerdeg. Daonao weurt ouch de have weer aongepak. Vèsserij blijf iewelaank 't groetste middel vaan bestoon, tot de stad in 1865 häör militair functie verluis en kin oetbreie es badplaots. De groete oetbreiing die dit tot gevolg heet en 't veurnaom, hoeggeplaots publiek wat dit trèk geve Oostende de bijnaom Keuningin vaan de Badstei, 'nen ieretitel boemèt de stad ziech tot oongeveer 2000 zouw sere. In d'n Ierste en Twiede Wereldoorlog waor Oostende weer 'n militair vesting (in han vaan de Pruse, natuurlek), wat 't elitair toerisme deeg vermindere. Nao d'n Oorlog kaom dao 't massatoerisme veur in de plaots. Roond 't jaor 2000 heel de stad op ziech es Keuningin vaan de Badstei te profilere en begós ze ziech Stad aon zie te neume.