Europa van Naties en Vrijheid
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
De Europe des nations et des libertés (ENL of ENF; vrie vertaald: Europa van Naties en Vrieheid, Ingelsj: Europe of Nations and Freedom, Duutsj: Europa der Nationen und der Freiheit) waor 'n polletieke groep in 't Europees Parlemint van 2015 bies 2019. De groatste nationale partie is 't Franse Front National. Hun ideologieë zin rechs populisme, conservatisme, nationalisme, souverainisme, protectionisme, anti-immigratie en anti-islam. Contra Europese integratie höbbe ze 'n hawwing van extreem euroscepticisme, wat meint dat ze veur zoa min meugelek mach van de Europese Unie zin en dèks zelfs veursjtengers zin van 't verlaote van de Unie. Ze höbbe nemes vertegeweurdeg in de Europese Kemissie. Ze hawwe 40 van de 751 zetels in 't Parlemint, wat meint dat ze de kleinse polletieke groep waor. De groep haw twiè prizzedente: Marcel de Graaff en Marine Le Pen.
De meiste nationaal partieë binne de ENL zint euvergegange nao Democratie & Identiteit.
De twiè Europese partieë waore de Bewaeging van 'n Europa van Naties en Vrieheid (MENL; 33 zetels) en de Alliansie van Europese Nationale Bewaeginge (EAF; 3 zetels). Wier zin d'r nog onaafhenkeleke parlemintsleije lid van de groep. 't Geuf gein Limbörgers in de groep. Waal kump eine oet Frechen, e Rienlands stedsje neet wiet van de Euregio: de PVV'er André Elissen.
Hie onger 'n lies mit de nationale partieje die deil oetmake van de groep, 't land woa-oet ze komme, de groatere Europese partie woabie ze huère, en 't aantal zetels wat ze höbbe.
- Alternative für Deutschland (Duutsjland, onaafhenkelek, 1)
- FPÖ (Oasteriek, EAF én MENL, 4)
- Front National (Frankriek, MENL, 20)
- Kongres Nowej Prawicy (Pole, EAF én onaafhenkelek, 2)
- Lega Nord (Italië, MENL, 5)
- PVV (Nederland, onaafhenkelek, 3)
- Vlaoms Belang (Belsj, MENL, 1)
- 3 onaafhenkeleke leje (Italië, Roamenië, Vereineg Keuninkriek)
De twiè partieë wilde in ièrsjte instantie ein partie vörme, mer dat is bliekbaar neet geluk. Noe zin ze 'neet-gebonge leije' van 'n polletieke groep. In praktiek beteikent dit tot ze mekaar zoaväöl meugelek sjteune, veur groate besjlissinge perbere zoaväöl meugelek op mekaar aan te sjlete, mer tegeliekertied neet zoa sjtreng zin in geliekgesjtömp veur en tege te sjtömme.