Nazi-Duutsjlandj
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Nazi-Duutsjlandj is inne gesjiechte van Duutsjlandj de periood die ouch waal 't Derde Riek, of inne propaganda vanne nazi's sómtieds ouch 't Doezjendjjäörig Riek, wuuertj geneump. "Nazi" is 'n verkórte Duutsje term veur nasjenaalsocialisten en es zodanig 'ne sjeldjnaam. Inne nazi-periood waas Duutsjlandj 'n totalitair dictatuur ónger 't nasjenaalsocialistisch regime vannen dictator Adolf Hitler en zien Nasjenaalsocialistische Duutsje Arbeiderspartie. Dees periood doerdje vannen ènj van 't Weimarrippebliek op 30 jannewarie 1933 toete val vanne Flensburgregering op 23 mei 1945. Officieel hoot Nazi-Duutsjlandj ieës 't Deutsches Reich, meh vanaaf 1943 hoot 't 't Großdeutsches Reich. Kènmirkendj veur dees periood inne Duutsje gesjiechte ware totalitair politische óngerdrökking en racistische vervolg en oetènjelik genocide, esouch 't veure van aanvalskriegen enne bezètting van naoberlenjer en annexaties van aangrenzendje gebiede.
't Begrip "Derdje Riek" (Drittes Reich) waas in daen tied populair in ónger anger de Duutsje media. Es ieëste riek gólj 't aad Heilig Roeams Riek vanne Duutsje Natie (843-1806) en es twieëdje riek 't Duutsj Keizerriek (1871-1918). De verwachting vanne aanhengers van 't Derdje-Riekkóncep waas det 't Derdje Riek (mindestes) doezjendj jaor zów bestaon. De nazi's höbbe formeel aevel noeatj gebroekgemaak van dit kóncep. Zoea vaerdigdje Adolf Hitler twieëmaol 'n edik oet worin d'r de media opreep oet te sjeie mit 't gebroek van 't begrip "Derdje Riek". Toch wuuertj zelfs allewiel de term nag ummer gebroek veur dees periood aan te gaeve.