Koalmet

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Bergs (Ubachsberg), es te dit dialek sjpriks.

---

Koalmet (Nederlands: Colmont) ies 'n buurtsjap van De Berg (Ubachsberg) in de gemeinte Voelender in 't Limburgse Heuvelland. Ouwer name zint Kollemonde en Coelmont. De naam geit truuk nao 't Latiense calvum montem wat kale berg beteikent. De buurt umvat zoan 30 häöf en hoezer, woa ca 80 luuj in wone.

Colmont

Op 'n T-sjplietsing sjteit 'n baekapel, opgetrokke in kundersjtein. Ze ies in 1946 geboewd oet dankbaarheid dat 't gehuch zónder väöl geweld bevried ies geworde in de Twiède waereldoorlog. De kapel ies gewiejd aan de heilige Cornelius. Dae kundersjtein, woamèt 'n gedeilte van de, ouwer, häöf en hoezer ies opgetrokke, weurt in de buurt gedolve. In de berg bevinge ziech ouch reste van kalkoves.

Koalmet ies hoag gelege op 't plateau in Zuud-Limburg. Typisch zin de haol waeg. De umgeving ies euvergangsgebeed tösje de Duutsje Eifel en de Belzje Ardenne. In de buurt liegke natuurreservate: de Koalmeterbösj en de Vrouwehei mèt windmeule. De Vrakelberg, dae begint in Etenake en eindig in diet dörp, haet 'n hellingspercentage van 11%.