Gerd Leers
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Kirchröadsj, es te dit dialek sjpriks.
Gerd Leers (Kèrkraoj, 12 juli 1951) is 'ne Limburgse politicus vaan 't CDA. Heer waor vaanaof 4 september 1990 lid vaan de Twiede Kamer en waor vaan 1 fibberwarie 2002 tot 14 fibberwarie 2010 börgemeister vaan Mestreech. Op deen datum trooj Leers trök nao aonleiding vaan 't BING-rapport euver d'n aonkoup vaan 'ne Bulgaarse villa. Vaan 2010 tot 2012 waor heer minister in 't kabinèt-Rutte I.
Vreug carrièr
bewirkLeers is z'n politieke carrière begonne bij de PvdA boevaan heer vaan 1975 töt 1976 lid waor. De reie veur zien verandering vaan partij is oonbekind. Es kamerlid waor heer bekind um zien gooj kinnes vaan dossiers. Heer concentreerde ziech veural op de NS, meh brach ouch de Bouwfraude aon 't leech. Dit kin me es 't huugdepunt vaan zien carrière es kamerlid zien.
Börgemeister vaan Mestreech
bewirkEs börgemeister kraog heer de reputatie doortastend en effectief te werk te goon, zoonder te väöl börgers tege ziech in 't harnas te jaoge. Heer besloot beveurbeeld veur de gemeinteleke subsidie aon foetbalclub MVV te stoppe, wat häöm op väöl proteste kaom te stoon. Ouch sjikde heer nao jaore gedoogbeleid de pelitie op 't woenwagelekamp Vinkeslaag aof, woe talloos sjarzjes verriech woorte. Proteste heitege lègke korten tied de A2 plat. In 2005 lojde heer de alarmklok euver 't Nederlands gedoogbeleid veur softdrugs, wat in Mestreech veur extreem euverlas zörgde. Mèt al dees acties haolden 'r 't landelek nuits.
Heer heet ziech herhaoldelek kritisch oetgesproke euver de regering vaan Jan Peter Balkenende, dee evels premier veur zien eige partij is. Zoe vint 'r hun hajding tegeneuver asielzeukers te hel. Sins jannewarie 2003 is 'r, es nevefunctie, veurzitter vaan 't LOCOV, 'n organisatie veur 't verbetere vaan de deensverliening op 't spoor.
In 2006 wèrkden 'r es rapper mèt aon 'n single, geneump Da's toch dope man!, vaan de Haorster punkband De Heideroosjes. Hei-in pleit heer veur de legalisering vaan softdrugs.
In 2008 deeg Leers 'n poging um börgemeister te weure vaan Den Haag en Rotterdam.
Op 14 januari 2010 trooj heer aof es börgemeister, nao e sjendal in de gemeinteraod euver ziene verkantievilla. De maond denao, op 26 februari naom heer aofsjeid vaan de Mestreechtenere in 'n goodbezochde bijeinkóms.[1]
Minister
bewirkOp 9 oktober 2010 woort bekind tot Leers zitting zouw numme in 't kabinet-Rutte I, en wel es minister vaan Immigratie en Asiel.[2]
Nao 't ministersjap
bewirkAllewijl (oktober 2013) hèlt Leers ziech bezeg mèt 't detachere vaan ex-politici.[3]
