Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Interieur vaan Stadion Galgenwaard, oetziend op de Bunnikside.D'n awwe Galgenwaard, mèt velodroom roond 't veld.
FC Utrecht is 'n voetbalclub oet de Nederlandse stad mèt dezelfde naom. De club woort in 1970 opgeriech oet drei bestoonde Utrechse clubs en is daomèt ein vaan de joonkste Nederlandse betaoldvoetbalclubs. Sind zien opriechting heet FC Utrecht oonaofgebroke in de Ieredevisie gespäöld. Sinds 2007 heet de club ouch e vrouweteam, wat evegood in de Ieredevisie oetkump.
FC Utrecht oontstoont op 1 juli1970 wie de proftek vaan USV Elinkwijk, DOS en Velox woorte samegeveug. Dit had te make mèt 't aonstoond opluffe vaan de Twiede Devisie, boedoor 't aontal profclubs umlieg zouw mote. Elinkwijk späölde 't jaor deveur in de Ierste Devisie, DOS in de Ieredevisie en Velox in de Twiede Devisie. De amateuraofdeilinge vaan alledrei bleve bestoon; Elinkwijk besteit nog ummer. Op DOS zien licentie kós de club in de Ieredevisie debutere. Ouch 't Stadion Galgenwaard woort vaan DOS euvergenome (dees club deilden 't al sinds 1967 mèt Velox).
In de beginjaore wis FC Utrecht ziech good te hawwe es modaole club dee dèks zoe op of roond de 9e plaots indegde. Bekinde speulers waore oonder mie Willem van Hanegem en Hans van Breukelen, die later bij groete clubs zouwe speule. Beröch woort de club evels door häören helle kern, de Bunnikside (geneump nao de kant vaan 't stadion dee de riechting vaan 't dörp Bunnik op wijs). Hooliganisme waor in dezen tied e nui fenomeen. In 1981 góng de club bekaans t'n oonder nao 'n oonderzeuk vaan de FIOD. Naotot groetsjaolege fraude aon 't leech waor gekoume, waor de club neet wied mie vaan e faillissemint. Door 'n massaol actie vaan de bevolking en 'n lening vaan de gemeinte bleef FC Utrecht bestoon. In 'tzelfde jaor waor me ouch begós mèt 'ne zier umvaankrieke verbouwing die neerkaom op nuibouw. Dit stadion, wat pas begin 1982 officieel opegóng, heet in de volksmoond nog langen tied Nieuw-Galgenwaard geheite.
De res vaan de jaore tachteg brachte väöl sportief succes. Ouch in de jaore negeteg kós de club gooj jaore, beveurbeeld 't sezoen 1990/91 boe de club es veerde indegde. De miesten tied stoont ze evels lieger; dit brach weer nui financieel probleme mèt ziech mèt. Toch dach me in dezen tied nao euver e nui stadion, of weer 'n rinnovatie. Oetindelek woort gekoze veur 't lèste. De daarde Galgenwaard woort tösse 2000 en 2004 gerealiseerd. Oondertösse mós in 2003 alweer e faillissemint weure aofgewend.
Nao 2000 góng 't sportief wel beter: de club steeg tot in de subtop en deeg 't ouch in de KNVB-beker good. Tot nog touw heet de club dee drei kier gewonne (1985, 2003 en 2004) en diverse kiere in de finale gestande. Financieel bleef de situatie oonzeker, tot in 2008 d'n Utrechse zakemaan Frans van Seumeren de club opkoch. 't Voetbal waor sindsdeen wisselend. 't Sezoen 2010/11 waor Europees gezeen succesvol: FC Utrecht maakde indrök door oonder mie Celtic FC mèt 0-4 te versloon en diverse groete clubs op e geliekspeul te hawwe.
't Stadion Galgenwaard ligk in de stadswiek Utrech-Oos, aon de Herculeslaan kortbij de Kromme Rijn. Bij de bouw in 1936 laog 't 'n ind boete de stadsbebouwing; ouch noe nog ligk 't aon de rand vaan de stad. Op 't aonligkend sportpark Soudenbalch vint me ouch de trainingsvelder vaan FC Utrecht.
't Huieg stadion besteit oet veer losse tribunes mèt daotösse allein get liegbouw. De 'katakombe' oonder 't stadion weure aon commercieel partije verhuurd. De capaciteit vaan de Galgenwaard is 23.750 plaotse.
