Afrihili

Afrihili (Afrihili)
Parlada en:
Area:
Tota parlores:
Ordina:
Familia:	Linguas construida
State ofisial
Lingua ofisial de:
Regulada par:
Sifras
ISO 639-1
ISO 639-2	afh
SIL
Vide ance: Lingua – Lista de linguas

Afrihili (ISO afh) es un lingua construida entre 1967 e 1970 par la istoriste ganaian K. A. Kumi Attobrah, per usa como un lingua franca tra tota de Africa. La nom es un combina de Africa e suahili.

La vocabulo es prendeda de linguas diversa de Africa, la fonolojia e gramatica es de suahili, akan, e alga otra linguas, e la semantica es multe influeda par engles.

Spele e pronunsia

La lingua usa la alfabeta latina de 26 leteras, con ance ɛ e ɔ, cual ave la sonas cual los ave en la lingua ganaian e en la alfabeta fonetica internasional. J e y, e la du leteras duple ch e sh, sona como en engles e suahili (dʒ, j, tʃ, ʃ).

Nomes propre es fonetical speleda, no con sua spele orijinal. Per esemplo "Hastings" es speleda Hestins.

Afrihili no ave tonos. La asentua es a la vocal ante la vocal final. Un sinia de esclama veni a la comensa de un proposa, cual fini normal con un virgula o un punto. Sinias de demanda veni a la fini de un frase.

Gramatica

La gramatica es simil a lo de Suahili, con la ajunta de un triangulo de vocales, cual es plu como Akan e es sentral a la infletas de Afrihili. Per multe usas, on cambia un vocal con un otra:

• a < > o
• e < > ɔ
• i < > u

No usada per esta es la vocal ɛ.

Tota nomes, e sola nomes e ajetivos cual altera nomes, comensa con un vocal. Per la singular, esta vocal difere de la vocal final; per la plural, esta vocal deveni la mesma como la vocal final. Per esemplo:

• omulenzi (xico) deveni imulenzi (xicos)
• oluga (lingua) deveni aluga (linguas)

Nomes cual deriva de verbos o ajetivos reseta un vocal prima cual es la oposada de la vocal final. Per esemplo:

• pinu (determina) deveni ipinu (la determina)

Si tota vocales de la verbo o ajetivo es la mesma, on usa ɛ-. Per esemplo:

• mono (desonora) deveni ɛmono (un desonora)
• kana (un) deveni ɛkana (unia)

On crea la infinitivo par ajunta -de. Esta es usada per suproposas, per esemplo:

• Kre tumilɔ dinga-de, nuliwate (car continua no es posible, nos reveni)

Nomes verbal es derivada de la infinitivo par ajunta ɔ-:

• soma (leje), somade (leje, infinitivo), ɔsomade yɛ papa (leje es bon)
• karati (recolie), ɔkaratide (recolie, nom verbal), ukarati (un recolie)

En reversa, nomes cade sua vocales prima per deveni verbos e, con la cambia de la vocal final, ajetivos:

• etogo (un casa) > togo (usa un casa)
• umeme (eletrica) > memɔ (eletrical)

Partisipios es formida con mɛ-, con la vocales propre per nomes o ajetivos:

• wako (gida un veculo) > ɛmɛwako (gidor) > mɛwaka (gidante)

Un formula verbal es formida con prefisas per la sujeto segueda par prefisas per la tempo. Si un nom es usada per la sujeto, la prefisa per sujeto no es usada. La ojeto segue la verbo como un parola separada:

• jira (espeta) > mingijira lε (me espeta el)

La pronomes:

• mi (me)
• wu (tu)
• le (el)
• yo (lo)
• nu (nos escluinte)
• nɛu (nos incluinte)
• ku (vos)
• fu (los)

Per indica la posese, la pronomes cade sua vocal e es prefisada a la nom:

• l'arafi (la se letera)
• w'agoji (la tu mone)

La tempos, modos e aspetas:

• li- (pasada, ia)
• ta- (futur, va)
• lii- (pasada abitual)
• taa- (futur abitual)
• yɛɛ- (presente abitual)
• re- (presente continual)
• ri- (pasada continual)
• ngi (dependente, ta)
• nge (sujuntiva, ta debe)
• lo (perfeta)

La presente no es marcada.

Per esemplo:

• du (come)
• lɛdu (el come)
• nɛtadu (tu e me come)
• fulidu (los come)
• miyɛɛdu ɛn zinga (me come abitual a matina)
• miliidu ɛn zinga (me ia come abitual a matina, en la pasada)
• miredu (me es comente)
• nuridu (nos ia es comente cuando...)
• kama kungiwa, kungidu (si vos ta veni, tu ta come)
• ni omuntu lodu (la om ia come ja)

U- formi proposas relativa (como "ci" o "cual")

"Esta" e "acel" es ki e ka. Los pote aveni ante la nom, o pos la nom con un copia de la silaba final de la nom:

• Ki omulenzi, omulenzi kinzi (esta xico)
• Ka omukama, omukama kama (acel re)

Alga sufisas es silabas plen, como -wi (deveni):

• sana (bevi), sanawi (ebri)
• furaha (felis), furahawi (deveni felis)

Ma la plu ave un vocal resonante, la mesma como la vocal final de la radis, como con -bw- (pasiva) o -t- (-able):

• bona (vide), bonabwa (es videda)
• bonata (vidable), dutu (comable)

Per indica un parte de un grupo, on usa o la sufisa -n o la particula pe, con la ordina reversada de parolas:

• Nun kisi o kisi pe nu (alga de nos)
• imulenzin kisi o kisi pe imulenzi (alga de la xicos)

Cuando un ajetivo o numero segue un nom, lo reseta un vocal prima la mesma como la nom ("acorda gramatical"), e ance la sufisa -n:

• oluga ozurin na opapan (un lingua plasente e bon)
• kana oluga, oluga okanan (un lingua)

Espresas

Zuri lu – Bon dia

Zuri zinga – Bon matina

Zuri masa – Bon posmediadia

Zuri dani – Bon sera

Zuri bali – Bon note

Jo koni – Vade pronto

!|Afuraho – Saluta!

Sama papa obeka al dude – Trova un bon loca per come

Kama mingipewa l'arafi gaba milijo paasa, mingijira lε. – Si me ta reseta sua letera ante cuando me vade a via, me ta espeta el

Referes

• K. A. Kumi Attobrah: Ni Afrihili Oluga. The African Continental Language (First Edition, 1970; Second Edition, 1973)