Chryseis

In Iliade Chryseis (Graece Χρυσηΐς) est filia Chrysae, sacerdotis Apollinis, ab Achaeis cum urbem quandam prope Troiam diriperent capta. In praeda dividenda regi Agamemnoni obvenit qui ab illa puella "formosis genis" maxime delectabatur. Quamobrem cum pater supplex et pretium offerens eum adisset ut filiam redimere liceret rogans, ille sacerdotem Chrysen contumeliose reppulit atque abegit. Qui maestus sese ad deum suum convertit quem precabatur ne inultam contumeliam suam esse sineret. Tum Apollo pestem Achaeis immisit quos sagittis suis occidebat. Achilles contionem vocavit in qua Calchas vates ab ipso Achille firmatus reddendam esse puellam pronuntiavitː aliter enim pestem non desituram. Quamvis iratus Agamemnon voluntatem divinam respuere ausus non est et puellam patri remisit. At Briseidem ab Achille abstulit, ita simultatem inter duos Achaeorum duces commovit quod argumentum carminum epicorum Ilias inscriptorum fuit.

Crater in Apulia repertusː Chryses Agamemnonem rogat ut filiam sibi redderet.

Postea poetae filium ex Agamemnone natum Chryseidi dederuntː qui saluti fratri Orestae et sorori Iphigeniae fuit cum Dianae signo rapto ad Troadis litus adpulerunt a rege Taurorum persecuti. Quae fabula fuit argumentum Sophocleae tragoediae hodie deperditae et Chryses inscriptae necnon ad illius imitationem similis tragoediae a Pacuvio Latine compositae.

Fontes

• Hyginus, Fabulae 121.
• Ilias I.8-474

Plura legere si cupis

• Albert S. Cook, "The Character of Criseyde", Publications of the Modern Language Association of America, 1907