Klambratún

Klambratún árið 2003.

Klambratún (áður Miklatún) er útivistarsvæði í Hlíðahverfi Reykjavíkur. Svæðið er nokkurn veginn ferhyrnt og um 10 hektarar að stærð. Það afmarkast af Rauðarárstíg í vestri, Flókagötu í norðri, Lönguhlíð í austri og Miklubraut í suðri. Í norðurhluta Klambratúns standa Kjarvalsstaðir, listasafn helgað list Jóhannesar Sveinssonar Kjarvals.

Hluti túnsins tilheyrði bænum Klömbrum sem stóð þar til um miðja 20. öld. Reykjavíkurbær eignaðist Klömbrur árið 1946. Tveimur árum síðar var þar hafinn rekstur skólagarða fyrir reykvísk ungmenni. Á sjöunda áratugnum var Klambratúni breytt í skrúðgarð og hlaut hann nafnið Miklatún að undangenginni nafnasamkeppni.

Styttur í garðinum

Á sunnanverðu Miklatúni stóð frá opnun garðsins stytta af skáldinu Einari Benediktssyni eftir Ásmund Sveinsson. Styttan var flutt að Höfða árið 2014. Þar er einnig brjóstmynd af skáldinu Þorsteini Erlingssyni eftir Ríkarð Jónsson.

Eitt og annað

• Þann 30. júlí 2006 hélt hljómsveitin Sigur Rós stóra tónleika á túninu, talið er að um 20 þúsund manns hafi verið á túninu þegar mest var. Í kjölfarið var ákveðið að færa tónleika Menningarnætur árið 2007 á túnið. Tónleikar Menningarnætur voru tvö sumur á túninu, en fluttust í Hljómskálagarðinn árið 2009.
• Á túninu hefur verið komið upp aðstöðu til að leika frisbígolf.

Tenglar

• Einar E. Sæmundsen. „Miklatún í Reykjavík“. Morgunblaðið. 11. júlí 2005
• Miklatún skal heita Klambratún
• Bæði nöfnin eiga stutta sögu; grein í Morgunblaðinu 2006