ACARA SYUKURAN MAMASUHI BAGAS

Kel. Riswan Pasaribu/ Helda Br. Marbun

(Ama Keyla Pasaribu)
Kamis 18 Nopember 2021

I. PANGARADEON DIALAMAN
Sude Keluarga dohot undangan nunga marpungu di jolo ni bagas na naeng
masukan.
1. Marende B.E. 188 :1 (Jongjong mangadop pintu ni bagas)
·          Jahowa Siparmahan au Ndang hurang manang aha.
Ai nasa jea dipadao Do sian dorbiana.
Tongon dibaen na lomak i Lao pangoluhon tondingki.
Dibaen asi rohaNa.
·       Pengguntingan Pita
Kel. Riswan Pasaribu/ Helda Br. Marbun : 
Sian asi dohot holong ni roha ni Jahowa do hupungka jala hupasidung hami
bagas on. Mauliate ma di Debata, dipasupasu Tuhan I ma hami saluhut pangisi
ni bagas on (Digunting ma pita)
Parhalado:
Bagas pangalapan tua, pasu-pasu jala hasonangan ma bagas on di hamu
tumpahan ni Debata marhitehite Tuhan Jesus Kristus

Kel. Riswan Pasaribu/ Helda Br. Marbun : 

(Huhut Pasahathon Kunci Tu Pandita): 
Hupasahat hami ma kunci ni bagas on. Dipasupasu Tuhanta do hami saleleng
on na paulihon bagas on sahat tu na dimpos.
Pandita:
Huungkap ma bagas on, marhitehite goar ni Debata Ama, dohot goar ni
AnakNa Tuhan Jesus Kristus, dohot goar ni Tondi Porbadia. Amen. Horas ma
hamu mangingani bagas on. Inganan na ginohan ni Dame dohot holong ni roha
ni Tuhanta ma bagas on di hamu. (Masuk ma tu bagas laos hundul be ma)
II. ACARA PARTANGIANGAN DI JABU
1. Marende B.E No. 361 : 1
v   Na denggan situtu do mamuji Debata.
Jahowa na tumimbo Na sai tongtong basa.
Denggan do paboahon Manogot asiMi.
Bodari mangendehon BurjuM nang sintongMi
 U: Marhite-hite goar ni Debata Ama dohot goar ni AnakNa Tuhan Jesus
Kristus dohot goar ni Tondi Porbadia, na manompa langit dohot tano
on.     
    R :     Amen
U : Pelehon ma tu Debata hamauliateon, jala garari ma angka bagabagami
tu Natumimbul. Manang ise mamelehon hamauliateon, ido pasangap
Ahu, jala mambahen lapang, asa hupatuduhon di ibana hatuaon ni
Debata. Amen…..Martangiang ma hita : Ale Tuhan Debata Amanami
pardenggan basa nasumurung. Na ro do hami tu joloM mamboan
pujipujian dohot mauliate ni roha nami tu adopanMu. Apala di tingkion
dilehon Ho do di hami las ni roha, hahipason, gabe ni angka na niula
dohot sinur ni pinahan. Dipasupasu Ho do hami sonang so
hariboriboan, mardamedame jala mardenggan denggan di angka
parsaoran siganup ari.
R :    Tung balga do las ni roha nami sadarion, siala bolas keluarga ni
amanami, Riswan Pasaribu/ Helda Br. Marbun (Ama Keyla
Pasaribu) ro di sude keluarga nasida mamasuhi bagas nauli on.
Mauliate ma di ho  Tuhan ala ni denggan ni basaM.
Kel. Riswan Pasaribu/ Helda Br. Marbun:
Sai inganan pangalapan tua, pasupasu jala hadameon sian Ho ma Tuhan bagas
on di hami saluhutna.    Padao ma na mambahen parmaraan, songgot-songgot,
manang parsahiton di hami sude.    Patongon hombar jabu dohot dongan sahuta
ro di ale ale na marsihohot di hataM di luat on. Tambai nang pansarian dohot
pangabahan na tama di hami, ajari nang angka ianakhon nami asa magodang di
bagasan lomo ni roham.
U: paingot hami saluhut ale Tuhan Jahowa, asa unang holan arta portibion
huharingkoti hami, alai asa mangarade hami di bagas na sumurung di
banua ginjang naung pinaradem, na so tarngatngat ni ngitngit dohot
tasik. Jalo ma tangiang namion marhite hite Jesus Kristus Tuhan nami.
Amen..
2. Marende B.E. No. 12: 2-3
v   Huboto Ho do mual ni na denggan sasude.
Dilehon Ho do sian I godang di hami be.
V   Ai aha na adong hian    di hami na lea.
Sude dilehon ho nian o Tuhan debata.

1
 3. Sipaingot tu nampuna bagas
U: Di na marlas ni roha hita mamasuhi bagas ni keluarga Bp Riswan
Pasaribu/ Helda Br. Marbun, (Ama Keyla Pasaribu) tama do
pahusorhusoronta poda ni Debata tu angka naung tarpasupasu di ngolu
siganup ari, dohot na pauli angka bagasna songon na tarsurat di 5 Musa 8 :
11-20 :
R: “Antong ramoti ma dirim, asa unang lupa roham di Jahowa Debatam, gabe
dang diradoti ho angka tonaNa I, uhumna dohot aturanna, angka na
hutonahon I tu ho sadarion.
U: Asa unang ia dung mangan ho jala bosuran, jala dipauli ho angka bagas na
uli diingani ho. Tole lombum dohot birubirum lam sinur do jala ganda
perak dohot sere di ho, ganda huhut saluhut na di ho.
R: Hape lam dipaginjang ho roham jala lupa ho di Jahowa Debatam, na
mangalehon pasupasu di ho saleleng ngoluM.
U: Ibana manogunogu ho di halongonan na bolon jala na jorbut, inganan ni
ulok tulung api dohot naga dohot hala, tano hasang huhut na so marisi aek;
Ibana tahe paruarhon di ho aek sian dolok batu na pir sahali.
R: Ibana mangalehon ho mangan Manna di halongonan, na so tinanda ni
angka ompum, asa Ibana paserep roham dohot mangunjuni ho, asa
marhasonangan ho bahenonna di ujung.
Keluarga: Asa unang dohononmu di bagasan roham: Gogongku sandiri
dohot huaso ni tanganku mangomo di ahu hamoraon on.
U: Ingkon paingotingoton ni roham tahe Jahowa, Debatam, ai Ibana do na
mangalehon   gogo tu ho mangomo angka arta i, asa pahothon padanna
naung niuarihonna tu angka ompum,songon na andar sadarion.  Alai
tung sura lupa roham di Jahowa, Debatam, jala diihuthon ho angka
Debata sileban huhut mangoloi jala marsomba tusi, hatindangkononku
hian ma tu hamu sadarion, ingkon mago situtu hamu. Songon bangso
parbegu, angka naung niago ni Jahowa maradophon hamu, suang
songon i hamu mago, ala so ditangihon hamu soara ni Jahowa,
Debatamuna. Ido sahatna.Martua ma hamu ala ditangihon jala dipeop
hamu hata ni Debata. Amen
4. Marende B.E. No. 497 : 4
v   Marlas ni roha do au on, ai Jesus donganhi tongtong.
Sai ro do sinondangNa I, tongon tu rohangki.
Ipe huingot ma tongtong, dang boi holsoan rohangkon.
Ai damang na di surgo I pasingkop bohalhi.

2
 5. Martangiang pangondianon sian hula-hula
6. Marende B.E. No. 467 : 1 
Asi ni rohaM hupuji ala Ho manobus au.
Dipaias Ho rohangku gabe soranganMu au.
ingananMu rohanami tondiMi manggohi i.
pangke dohot ngolunami gabe ulaulaMi.
7. JAMITA :  Jeremia 29 : 5
8. Marende B.E. No. 753 : 1+2 (Papungu pelean)
Di pardalanna Jesus di jolongku, holong ni tanganMi manogu au.
Nang di ngolungku Ho do sombaonku,
tung sonang mardalan raphon au.
Huboto do tangkas panoguonMu, diiring-iring Ho do langkangki.
Sahat ro di ujung ni pardalanku, togu ma au jonok tu lambungMi.
v   Patogu ma Tuhan haporseaonku, asa polin tu Ho manghirim au.
Tu surgoi patulus pardalanku, tondiMi maringan ma di
au.   Huboto do……….
9. Tangiang Panutup
U: Ale Tuhan Debata, parasiroha na sumurung. Mauliate ma dipasahat
rohanami tu Ho, ala godang ni asi dohot holong ni rohaM. Diurupi Ho do
dongan nami on pauli bagas na uli on sian na mamungka sahat tu na
paujunghonsa. Ndang tagamon so godang halojaon, parungkilon, dohot
holso-holso ni roha nasida papungupungu sinamot na ringkot tu
pembangunan ni bagas on. Alai tung dipasingkop Ho do na ringkot tu
ulaon I, gabe dimpos jala sirsir saluhutna songon na hubereng hami
nuaeng. Pasu-pasuM do I Tuhan, jala hupuji hami ma goarMu alani
saluhutna i.
R: I ma tutu Tuhan, di Ho ma puji-pijian nami arion ro di saleleng ni lelengna.
U: Di naung hubongoti hami jala dihalashon hami bagas on sadarion,
hupasahat jala hupanggomgomhon hami ma tu Ho saluhut pangisi ni bagas
on, mulai sian na metmet saht ro di na magodang, sisolhot, ale-ele, ro di
angka arta nasida. Mian ma Ho di bagas on marhite-hite TondiM, sai
ramoti ma nasida mangingani bagas na uli on asa tongtong di bagasan
hahipason. Amen.
10. Tangiang Pelean+Ale Amanami…….+  Pasupasu