Citáridos

A dos citáridos (Citharidae) é unha pequena familia de peixes teleósteos acantopterixios da orde dos pleuronectiformes e suborde dos pleuronectoideos.

Tres dos seus xéneros habitan na rexión Indo-Pacífica, mentres que Citharus vive no Mediterráneo e no Atlántico oriental, no noroeste de África.

A familia comprende un total de sete especies, que alcanzan lonxitudes que varían entre os 14 e os 36 cm.

Características

A diferenza doutras familias desta orde, non está tan avanzada a asimetría corporal: os citáridos teñen os ollos a ambos os lados da cabeza, nas aletas pelvianas teñen unha espiña e cinco raios brandos, ambas de igual tamaño e cunha base estreita, e as aletas pectorais están ben desenvolvidas.

Taxonomía

A familia dos Citharidae foi descrita en 1935 polo ictiólogo e oceanógrafo español Fernando de Buen y Lozano.

Sinónimos

Ademais de por este nome, coñécese polo sinónimo Brachypleurinae Chabanaud, 1937.

Etimoloxía

O nome da familia, Citharidae, está formado sobre a base do nome do seu xénero tipo, Citharus, e a desinencia do latín científico -idae, propia das familias de animais.

Pola súa parte, Citharus é a forma masculiniza do latín clásico da voz citara -ae, "cítara", debido ao seu parecido á forma deste instrumento musical.

Clasificación

Aínda que hai controversia, xa que debe clarificarse o status do xénero Citharus, podemos considerar que a familia subdivídese en dúas subfamilias, cun total de 7 especies agrupadas en 4 xéneros:

Familia Citharidae

• Subfamilia Brachypleurinae
  • Xénero Brachypleura (Günther, 1862)
    • Brachypleura novaezeelandiae (Günther, 1862)
  • Xénero Lepidoblepharon (Weber, 1913)
    • Lepidoblepharon ophthalmolepis (Weber, 1913)
• Subfamilia Citharinae
  • Xénero Citharoides (Hubbs, 1915)
    • Citharoides axillaris (Fowler, 1934)
    • Citharoides macrolepidotus (Hubbs, 1915)
    • Citharoides macrolepis (Gilchrist, 1904)
    • Citharoides orbitalis (Hoshino, 2000)
  • Xénero Citharus (Artedi, 1793)
    • Citharus linguatula (Linnaeus, 1758)

Véxase tamén

Bibliografía

• Burton, Maurice & Robert Burton (1984): Encyclopedia of Fish. Saint Louis, EE.UU: BPC Publishing. ISBN 0-7064-0393-2.
• Eschmeyer, William N., ed. (1998): Catalog of Fishes. Special Publication of the Center for Biodiversity Research and Information, núm. 1, vol. 1-3. San Francisco (California, Estados Unidos): California Academy of Sciences. ISBN 0-940228-47-5.
• Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.

Outros artigos

• Acantopterixios
• Pleuronectiformes

Ligazóns externas

• Citharidae en ADW.
• Citharidae no SIIT.
• Citharidae no NCBI.