A metade da vida
| A metade da vida | |
|---|---|
| Ficha técnica | |
| Título orixinal | A metade da vida |
| Director | Raúl Veiga |
| Guión | Raúl Veiga, parcialmente baseado nun conto de Xosé Luís Méndez Ferrín |
| Intérpretes | Alfonso Agra, María Bouzas, Evaristo Calvo, Flor Carballas, Cuqui Carreira, Mela Casal, Ernesto Chao, Víctor Mosqueira, Marcos Orsi, Santi Prego, Rodrigo Roel, Nuria Sanz, Mercedes Seixo, Marisa Soto, Isabel Vallejo |
| Música | Antonio R. Ferreiro, Bernardo Martínez |
| Fotografía | Juan Carlos Gómez |
| Montaxe | Luis del Pino |
| Estrea | 24 de outubro de 1994 |
| Duración | 84 minutos |
| Orixe |  Galicia |
| Xénero | drama |
| Na rede | |
   | |
A metade da vida é unha película galega dirixida por Raúl Veiga no ano 1994 e revisada en 2005, ano da versión definitiva. A duración de 84 minutos indicada na ficha técnica xa é a da versión definitiva.
Hai unha parte que reelabora o conto Boas noites, Eire de Xosé Luís Méndez Ferrín,[1] despois Raúl Veiga construíu o resto do guión ao seu xeito, estre drama de 87 minutos de duración (84 tras a revisión de 2005) rodouse na Coruña, Oleiros e Culleredo e a súa estrea tivo lugar o 24 de outubro de 1994.
É a única longametraxe filmada en versión orixinal galega durante ese decenio.
En 2020 no OUFF estréase a versión remasterizada da película. É unha peza restaurada e reeditada, con mudanzas na montaxe respecto da versión orixinal pensando «no beneficio do espectador, agora é unha experiencia máis agradable froito dos anos de experiencia que fun acumulando. A esencia do filme é a mesma, non se desnaturalizou en absoluto, mellorou», segundo Raúl Veiga. A imaxe foi restaurada totalmente e o son «é moito máis amable co público». Trátase dunha versión ‘redux’, o carácter do filme presérvase pero a comunicación mellora».[2]
Argumento
[editar | editar a fonte]Nunha cidade galega, no final dos oitenta, H. Eire (Evaristo Calvo) mal soporta a insatisfacción dos amores clandestinos que ten con Amalia (María Bouzas), compañeira estábel do seu amigo e colega Pedro (Alfonso Agra). Eire vai cumprir trinta anos e está canso de pelexar para malvivir como músico de “jazz” sen facer concesións alimenticias. Aparecen entón na súa vida Violeta (Isabel Vallejo) e Carlos Bao (Ernesto Chao), tío e sobriña que coñece nunha das reunións que María Días (Mela Casal) acostuma organizar na súa quinta.
A partir de aí, os ires e vires do amor entre Eire e Amalia –contemplados por Pedro á distancia, con intelixente ironía– crúzanse coas peculiares andanzas de Carlos Bao e a descuberta dunha Violeta cada vez máis fascinante. Pois se Carlos Bao vive a fin de dúas obsesións para el fundamentais (a literatura, Galicia), Violeta sabe manter vivo todo o que nesta fase da vida do seu tío comeza a tinxirse de velada amargura, de frustración persoal e xeneracional.
Un día do medio do verán en que todos os personaxes volven coincidir en cas de María Días, Eire ve como se rompe definitivamente a súa relación con Amalia e segue o Carlos Bao nunha noite de despedidas. Porén, vida e música nunca cesan e así, algún tempo despois, cando Eire se encontra con Violeta e quere internarse no seu mundo, é arrastrado a un xogo moito máis complexo do que, á partida, imaxinara. Alí, para el e para nós, todo recomeza.
Proxección
[editar | editar a fonte]O filme mereceu, entre outras, as seguintes distincións:
- Foi presentado na sección oficial do 23º Festival Internacional de Cinema da Figueira da Foz (1994, competición).
- Tamén foi seleccionado para o Gwyl Ffilm Ryngwladol Cymru/Welsh International Film Festival (Gales, 1994). Festival non competitivo.
- Seleccionado para o Festival de Cine de Alcalá de Henares (1994, competición oficial).
- Seleccionado para o XX Festival de Cine Iberoamericano de Huelva (1994).
- Seleccionado para o International Film Festival in Sochi (recoñecido pola International Federation of Film Producers Associations, F.I.A.P.), Sochi, Rusia, 1995.
- Seleccionado polo Euro Aim para os Euro Aim Screenings Donostia 1995, onde foi unha das producións máis vistas (11ª ex aequo sobre un total de 285 producións presentadas).
- Seleccionado para o XXIV Encuentro Internacional de Cine, Burgos, 1995, competición oficial.
- Seleccionado para o 1995 New Orleans Film&Video Festival, USA, 1995, competición oficial.
- Seleccionado para o Eremu Urriko Hizkuntzen Zinemaldia / Festival do Cinema das Linguas de Reducida Difusión, 1996, competición oficial.
Notas
[editar | editar a fonte]- ↑ G. Refoxo, Anxa. "A metade da vida de Raúl Veiga". www.as-pg.gal. Consultado o 2020-06-26.
- ↑ "O OUFF estreará a nova versión da película «A metade da vida»". La Voz de Galicia (en castelán). 2020-06-18. Consultado o 2020-06-20.
