Corveta
A corveta é unha embarcación de guerra, máis pequena ca unha fragata e meirande ca un patrulleiro. Utilízanse para a vixilancia costeira e a defensa das augas territoriais e están capacitadas para realizar misións ultramarinas de pouca duración.
A corveta apareceu en Francia a fins do século XVII, era un navío longo e rápido, de non máis de tres mastros que posuía unha única cuberta de combate con ata vinte canóns en batería. Utilizábase en misións de descuberta, para transmitir ordes a outros navíos ou a vixilancia das costas. A corveta moderna apareceu durante a segunda guerra mundial, cando a Royal Navy para evitar as enormes perdas que os submarinos alemáns estaban causando na súa mariña mercante creou un novo tipo de navío deseñado como escolta antisubmarina que denominou corveta.
