Andreas Brehme

Andreas "Andy" Brehme, nado en Hamburgo o 9 de novembro de 1960 e finado o 20 de febreiro de 2024 en Múnic, foi un ex-futbolista xermano, que xogaba de lateral esquerdo. Era un grande especialista a balón parado, e foi campión do mundo en 1990, anotando un gol de penalti na final contra a Arxentina.

Andreas Brehme

(2003)
Biografía
Nacemento	9 de novembro de 1960 Hamburgo (Alemaña do Oeste)
Morte	20 de febreiro de 2024 (63 anos) Múnic, Alemaña
Causa da morte	parada cardiorrespiratoria
Lugar de sepultura	Ostfriedhof (pt)
Outros nomes	Andy
Altura	176 cm
Peso	75 kg
Actividade
Ocupación	futbolista, adestrador de fútbol
Período de actividade	1980 - 2024
Nacionalidade deportiva	Alemaña
Deporte	fútbol
Liga	Fußball-Bundesliga e 2. Bundesliga
Posición de xogo	Defensa
Traxectoria   Equipo 1978–1980 HSV Barmbek-Uhlenhorst 66 (10) 1980–1981 1. FC Saarbrücken 36 (3) 1981–1986 1. FC Kaiserslautern 154 (34) 1986–1988 FC Bayern München 59 (7) 1988–1992   Inter de Milán 116 (11) 1992–1993   Real Zaragoza 24 (1) 1993–1998 1. FC Kaiserslautern 120 (9)   Selección nacional 1980–1981   Alemaña sub-21 3 (0) 1981–1984 Alemaña sub-23 10 (2) 1983–1984 Alemaña sub-23 10 (2) 1984–1994   Alemaña 86 (8)
Participou en
1994	Mundial de Fútbol Estados Unidos 1994
xuño de 1992	Eurocopa de Fútbol Suecia 1992
1990	Mundial de Fútbol Italia 1990
xuño de 1988	Eurocopa de Fútbol Alemaña Occidental 1988
1986	Mundial de Fútbol México 1986
xuño de 1984	Eurocopa de Fútbol Francia 1984
1984	Xogos Olímpicos de 1984

Traxectoria

Clubs

Andreas Brehme comeza a súa carreira no 1. FC Kaiserslautern, no ano 1981. Aquí ficaría ata 1986, cando marcha cara ao Bayern Múnic. Na súa etapa coma xogador do Bayern conseguiría o seu primeiro título coma profesional: foron campións da Bundesliga no ano 1987. A finais da tempada unha boa oferta do Inter de Milán faille colle-la equipaxe e fichar polo club italiano.

Na súa etapa no Inter gaña a Serie A (O Scudetto) en 1989 e a Copa da UEFA de 1991. Estes anos a rivalidade entre os dous clubs máis importantes da cidade, o Inter e o AC Milan tiña unha especial forza, xa que a base dos primeiros eran os seus xogadores xermanos Lothar Matthäus, Rudi Völler e o propio Brehme e no caso dos segundos os neerlandeses Marco van Basten, Ruud Gullit e Frank Rijkaard.

Tras cinco tempadas en Italia, en 1992 ficha polo Real Zaragoza de onde sairá no verán de 1993. A derradeira etapa da súa carreira xogaría no seu primeiro club, o 1. FC Kaiserslautern. Antes do seu retiro en 1998 gañan a Copa de Alemaña de Fútbol en 1996 e a Bundesliga xa en 1998.

Selección

Brehme xogou tanta na selección de Alemaña do Oeste coma despois na da Alemaña unificada.

Participou en tres mundiais, México 86, Italia 90 e EUA 94.

En México o equipo xermano quedou subcampión ao perder na final contra a Arxentina, na que destacaba Diego Maradona. O encontro rematou 3-2, despois de adiantarse os arxentinos por 2-0 e a posterior igualada dos xermanos, un xenial pase de Maradona no derradeiro intre do encontro deulle a vitoria ó cadro suramericano.

En Italia vingáronse da Arxentina, xa que de novo as dúas escuadras se enfrontaban na final. Desta volta Alemaña venceu 1-0 cun gol de penalti de Andreas Brehme.

Os seus derradeiros encontros internacionais disputounos no Mundial dos Estados Unidos en 1994. Aquí non lograron pasar dos cuartos de final, o que supuxo unha decepción para os daquela actuais campións do mundo.

Adestrador

Despois de gaña-lo campionato da Bundesliga, Brehme retírase do fútbol e adícase a prepararse para ser adestrador. O seu primeiro club xa coma técnico foi 1. FC Kaiserslautern, no ano 2000. Dous anos máis tarde dimitiría do cargo polos pobres resultados que estaba a acadar, xa que o club atopábase neses intres a piques de descender de categoría.

Marchou ó SpVgg Unterhaching, da 2ª división xermana mais tivo que abandonar o club ante a crise de resultados que atravesaba.

Estivo tamén de axudante de Giovanni Trapattoni no VfB Stuttgart mais foron cesados do cargo ós poucos meses.