Igefran n wureɣ

IGEFRAN N WUREƔ

Du même auteur

- السعير، رواية، لافوميك، الجزائر، 1986.

- على جبال الظهرة، رواية، المؤسسة الوطنية للكتاب، 1988.

- البطاقة السحرية، رواية، منشورات إتحاد كتاب العرب، سوريا، 1997. منشورات الجاحظية، الجزائر، 2000.

- الورَم، رواية، منشورات الإختلاف، الجزائر، 2002.

- الغيث، رواية، منشورات البرزخ، الجزائر، 2007.

- القلاع المتآكلة، رواية، منشورات البرزخ، الجزائر، 2013.

- حكاية أسفار، قصص، منشورات Anep، الجزائر، 2016.

- Le labyrinthe, roman, Éditions Marsa, Paris, 2000.Éditions de poche, Alger, 2002.

- Méprise fatale, nouvelles, Éditions Métailié, Paris, 2005.

- Le naufrage, nouvelles, Éditions Alpha, Alger, 2010.

- Pluies d’or, roman, Éditions Chihab, Alger, 2015.

- Et la nuit s’est mêlée à la nuit et s’est faite silence, récit,Éditions Barzakh, Alger, 2017.

Mohamed SARI

IGEFRAN N WUREƔ

Ungal

Tasuqelt sɣur :

Habib-Allah MANSOURI

CHIHAB EDITIONS

« Cet ouvrage est coédité par le Haut Commissariat à l’Amazighité et les Éditions Chihab ».

© Éditions Chihab, 2018.

ISBN : 978-9947-39-309-3

Dépôt légal : 2e semestre 2018.

Acḥal n wagguren-aya, ula yiwet n tiqqit n ugeffur ur d-teɣli ɣef Ɛayn-el-kerma. S ṭul n wass, arrac ttneggizen seg tala ɣer tayeḍ, knan ddaw taẓayt n yibidunen d yijarikanen. Irgazen, ssewqaɛen iman-nsen deg kra n yiskasen uɣmiqen, ikacafen i d-ttawin ɣelben wid n zzman aqdim. Ɣas akken ur ḥbisen ara ddɛawi, igenni yeqqim akken yella.

Aɣurar, d aqesḥan, yemmeɣ ɣef tmurt akken ma tella.

Yal tanezzayt, uqbel ma d-yecreq yiṭij, ssefqaden yimɣaren igli, ssaramen ad zelmen ulamma yiwen n usigna. Maca ulac ula yiwen n umeččim i izemren ad sen-yekkes layas i ten-izedɣen. Sfiliten irkelli s yiwen n uwaɣiw ara yeɣlin fell-asen. Seg wasmi nlul, ur nwala aɣurar yecban wa, i d-qqaren yal tikkelt. Kra, bdan yakan astewtew : D Rebbi i yerfan ɣef yibekkaḍen n lɛibad-is, yernu tarrut-ines ad tili d tuqsiḥt ! Imrebbnen, ttẓallan rennun. Lecyax n lǧameɛ ssekfalen-d timucuha d tesqiḍin n zik : iwaɣiyen, iɣerfan i yessenger urrif n Sidi Rebbi, tiɣri n yimazanen d rrusul ɣer ssber d tiɣin n wawal.

Deqzella… tembiwel lqaɛa. Tezlez tmurt mi yebda kan iɣelli yiṭij, dɣa tesseɣli zzenzla-agi iɣrem deg yiwen n yiḍ yessefqaɛen mačči d kra. Izadaɣen s lekmal uɣalen d akal. Wid imenɛen i tmettant ffɣen s iberdan, ferfcen, yeffeɣ-iten leɛqel. Qqimen kkaten agejdur ɣef lmeyytin i yeqqimen ddaw yigrarajen.

Am wakken urǧin ad d-tas twaɣit weḥd-s kan, hata yeɣli-d yiwen n ugeffur d iceṛcuṛen, yeḍfer-it-id waḍu i iqelɛen isekla, yerḍem ugar Ɛayn-el-kerma deg tugdin d leḥzen.

Yenna-asen Lmehdi d tigi d ccarat n taggara n ddunit. Teɣli-d ttuba ɣef yimdanen, tbeddel tikli n tudert-nsen n yal ass. Mmɣen ɣef yixxamen n Rebbi. Ttazzalen medden seg yal tama i wakken ad sterjɛen uqbel ad d-yaweḍ wass n lqiyama i sen-ibedden ɣef tizi. Tizeɣwa n tẓallit ur ssawḍent ara ad d-refdent amḍan n wid i d-iruḥen ad ssutren tutabin. I tikkelt tamezwarut deg umezruy n Ɛayn-el-kerma, ula d tilawin uɣalent ttruḥunt d tirbuyaɛ ad ẓallent deg tmezgida.

« Akud tura yebḍa ɣef sin : akud uqbel uwaɣiw, wayeḍ, win i t-iḍefren.

Ulac acu i izemren ad d-ibedden deg wudem n laxert, ladɣa mi ara tesleḍ i kra n yiderwicen ttalsen-d yal ass d akken tigemma n Ɛaden deffir liẓar kan i llant ; anekcum ɣur-sent yeshel maḍi, saẓ-it kan s ufus-ik.

Tugniwin n tedfiyin ɣellint-d seg yal tama s yiniten d rrwayeḥ i yesdericen leɛqel.

Am tgemma-nni yettriḥin s leɛṭer ideg zedɣent tiḥuriyin tihuskanin i tzemreḍ ad teṭṭfeḍ s sshala, neɣ nwi kan, fiḥel ma tembiwleḍ, ad ilint gar yifassen-ik, yernu mebla agdal, war talast.

Ruḥ ay ameɣbun ! Err ttar-ik deg tudert i k-d-yezzin s uɛrur. Dayen tura, tufiḍ axeddim n tidet, yernu win n lebda, win i k-iwulmen :d aseɣres n tindar n tḥuriyin : mebla lemḥayen, war ɛeggu.

I yisaffen ideg yettazzal ccrab d tament. Tzemreḍ ad tagmeḍ alamma tsekreḍ. Tiririt n ttar ilaq ad tili temmed, ur ilaq ara ad yili deg-s ula d abruy n tselbiba neɣ tabruyt n warqniɛa ».

Tennulfa-d tawuri tamaynut : d tin n yinemḍalen. Uɣalen yimrebbanen tteddun d lmeyytin ɣer tmeqbert d iqeffafen.

« Ad ken-ijazi Rebbi ɣef tqufya-nwen, yal yiwet s meyya, i yettɛeggiḍ Lmehdi deg lxeṭba-ines. Yal asurif i ken-yewwin ɣer tmeqbert, ad ken-yeldi yiwet n tewwurt deg lǧennet akked tdefyin-ines. Salit leḥsab, a wid yefren Rebbi, argut sseɛd i tzemrem ad d-tawim. Amiḍan n usider yebda yakan. Amerrezg iqeddacen n Rebbi i isebbren i lḥif d lexsas, ad idiren i lebda deg tlemmast n yilumaɣ ignawanen ! »

Asudu n tmettant yuɣ akk allaɣen, dayen yenjer iberdan ara neḍfer.

Aḥric amezwaru

1

« Yuklal lmut ! Ijeggeḥ-iyi temẓi-w, tura yugi-yi ad sɛuɣ tamezgida-inu. Ad t-zluɣ, ad iger Rebbi d baba aḥeqqani, am wakken i d-teqqar Feṭṭuma, settut-nni n temɣart. »

D tidet, tikti n tmenɣiwt n Ɛmer Kerruc tettezzi-d deg wallaɣ-is aṭas n wussan aya, maca deg wul n Lmehdi tuɣ tissi n leḥnana ɣer win yezzuznen temẓi-s s teqsiḍin yessewhamen ɣef tallit-nni n ṭṭrad. Ɣas akken imeddukal-is, irfiqen n telɣemt, am wakken i sen-semman deg wass ideg tenhewwal Ɛayn-el-kerma, zgan aḥettet deg-s, netta, yessuter deg-sen ad sebren.

Maca tanezzayt-nni, umbaɛd yiwen n yiḍ yenhewwalen iwumi tkemmel lqella n yiḍes, yuki-d s usduqes deg uqerruy-is tefra, teddez tebrez : ilaq ad tt-yefru d urgaz-nni yezgan yesluɣuy tudert-is. Ad tt-yexdem weḥd-s. Tamsalt-a, d tin n nnif. Netta, Lmehdi, mmi-s n Ccix Mbarek. Udem-is, iwumi ffɣent tiwjiwin, teccef-it tidi. Taxxamt teḍyeq, rnu-as azɣal n wussan imezwura n unebdu yeskuffuren. Yeqqim kra n lweqt itezzi kan deg umkan-is, ileddi leqjur, yettmuqqul sya u sya, ibedd sakin, aqerruy-is isewweq, iserreḥ i yifassen. Yeẓẓel ɣef wudem ddaw ssrir, yessuffeɣ-d yiwet n tbalizt n ukerṭun, yebda yettqellib s temɣawla deg uɛemmur-nni n tɣawsiwin d yiselsa yemgaraden uqbel ma d-ibedd, ɣef wudem-is yiwen n uzmummeg i yesɛewjen aqadum-is. Yessa abeḥnuq ameqqran ɣef tmurt, yeldi-t. Yeqqim yettḥekkir deg yiwen n ujenwi abuseɛdi i yersen daxel yiwet n teɣlaft taqdimt n uglim, yeddem-it gar yifassen-is, yebda iwezzen deg-s, yettwali acḥal ẓẓay, yessed aɣesmar-is, ihuzz aqerruy-is. Yečča-t usgerfel. Idewwer s temɣawla armi qrib i yeɣli, yerfed liẓar-nni yerkan n tewwurt n unekcum, yesqenṭer amnaṛ, isubb s tazzla deg ddruj, armi yufa iman-is berra.

Izegger Lmehdi iberdan mebla ma iwala ḥed sdat-s. Allaɣ-is, ččant-t tikta n ttar. Mi yesseḥbes umiẓab i iferqen gar tiɣilt yeẓẓan s yisekla n Sidi-Lmexfi d wurtan d yiɛerqyab n talat tazzla-ines, yewhem deg yiman-is amek i yessaweḍ ɣer yiswi-s s temɣawla. Deg kra n yineggizen, yeɣba deg yiwen n uzrib iɣef yezzi yinijel. Yelḥa deg tebriḍt-nni mebla ma yecqa deg uɣanim i yekkaten udem-is. Mi yewweḍ ɣer yiwen n yinijel, iḥewwec-as-d. Yezger asif yeqquren, yuli nnig yiwet n tɣalaḍt n yiẓra, yuɣ tama tazelmaḍt, yufes sakin daxel yiwen n umkan yeẓẓan s yizunbayen.

Kra n lweqt umbaɛd, yeffeɣ ɣer yiwen n ugni i d-yezgan nnig tewrirt iɣef yebna lemqam n Sidi-Lmexfi akked tqubet-ines i tcebbeḥ tazzirt n usɣar. Yettefriwis seg uḥmaq, yecḍef. Kra n tugniwin yewlallsen usant-d seg tallit-nni taqdimt, sxerbent-as axemmem-ines. Ɣer ukessar, ddaw tewrirt, yezga-d yiwen n uxxam yebnan s uqermud azeggaɣ i yettmuqqul s wallen i yewlelles yiṭij n tsebḥit. Ibedd deg umkan-is d usbiḍ, tamuɣli-ines tsewweq akin, teṭṭafar udmawen d tuɣac i yebɣa ad iɛelleq, dagi, ɣef yigli-agi awinaɣ.

D mmi-s n udcir, yessen-it tiɣmert-tiɣmert. Yezmer, ma yehwa-as, ad yanef deg yimeḍqan, ad yizwir wa ad igani aɛeddi n umdan-nni uɣur yesɛa iḥulfan mgaraden : am wakken i t-yettqadar i t-yekreh ! Seg tallit-nni mi yella d aqrur, asmi yettruḥu ɣer leɛzib ad yagem ; sakin, asmi meqqer ciṭuḥ, yuɣal yettenfifid deg tlemmast n yiqusisen n yimdanen i d-iruḥen ad d-slen i teqsiḍin n tegrawla i d-yettawi umjahed. Deg yiseggasen-nni i d-iḍefren amgaru, tiɛcertin n twaculin ǧǧant iqenjuɛen-nsen ibeɛden i wakken ad d-asen ad idiren ɣer yidis n tewrirt, rrif n wasif, bennun s temɣawla akked lḥif aberkan itemma s uɣanim, s talaɣt d lḥila. Imi yiwet n tala kan yellan, tezga tama n leɛzib Ḥawc er-Rumi, i yuɣalen d ayla n umjahed, yettruḥu, am netta am warrac niḍen, yettagem-d syin. Mi ara d-walin kan Ɛmer Kerruc s ubalṭu n lɛesker, timekḥelt ɣef tayet, aqerruy-is iɣumm s ccac, irkassen n « pataugas » deg yiḍarren, arrac-nni i ttɣun, ttemceqlalen, ttuɣalen d izamaren. Yal tikkelt mi ara t-iwali bab n uxxam, yettaẓ-d ɣur-s s uzmummeg :

— Azul ay amecṭuḥ, amek i yettili mmi-s n Ccix Mbarek ? I baba-k ? Ini-as yettsellim fell-ak, ssaweḍ-as sslam-iw.

Ma yufa arrac myeḥrasen sdat n tala, ladɣa timeddiyin mi ara d-ffɣen seg uɣerbaz, itekkes-as abidun seg yifassen-is, yettaččar-it, wa ad yini s tɣuct-ines tazurant :

— Yebɛed anda yezdeɣ mmi-s n Ccix Mbarek, mačči am kunwi, yernu baba-s yeḥwaǧ-it. Aya a mmi, ruḥ tura, ɛreḍ amek ur tessenɣaleḍ ara aman-agi deg ubrid.

Ixeddem akka iwakken ad d-yaf ifukal i tigawt-ines. Deg tilawt, tanezduɣt n uqrur-nni ur tebɛid ara ɣef tnezduɣin n warrac niḍen.

S nnig ujdar ideg yella, yettnadi Lmehdi s wallen-is tala-nni. Seg trumant-nni, anagar aqejmur aquran i d-yegran. Tala-nni iwumi tezzi zik-nni tizegzewt deg yal tasemhuyt, tuɣal tura d agudu.

Deg tama-nni kan tella yiwet n tzemmurt yekkeɛbcen, tettnaɣ amek ad teẓẓu iẓuran-is deg lqaɛa takiwant. Iserreḥ-as i yiwet n nnehta n lḥesra i icuffen idmaren n yilemẓi-nni. Ukint-d ccfawat-ines, skeflent-d seg lqaɛ n tatut kra n yisuyas i yebɣa ad yemḥu seg wallaɣ-is i lebda. Acḥal n wuḍan, ma d-yekcem kan s usu, yessaram seg wul-is mi ara d-yaki azekka-nni ad d-yaf iman-is yettu kulci. Maca ya ḥesra, mi ara d-yeldi kan allen-is, ttuɣalent-id ccfawat-nni s tuqsiwin qerriḥit ugar.

Dagi, tama n tzemmurt i yedder tiɣersi-ines tamezwarut n tudert-is. Ass-a, ɣas akken zrin yiseggasen, tbeddel tudert-is, tugniwin-nni mazal ṭṭafarent deg-s. Yettwali deg tfekka-ines tuḍɛift mi tt-skerkiren sin n yiɣallen uqsiḥen. Seg yiwet n tama, d amɣar n baba-s s userwal n waɛraben akked tjilit-ines, aɛmam ɣef uqerruy-is, tamart-is d taɣezzfant ; seg tama niḍen, yemma-s, meẓẓiyet fell-as mliḥ, temyuttel deg yiwen n uḥayek d amellal i s-yeɣlin ɣef tuyat, acekkuḥ-is yeccentef irkelli, iɣumm-as aḥric seg wudem-is. Yewqeɛ gar-asen, yerra-tt kan i usuɣu. Yemmekta-d, tuɣ-it ḥafi. Yečča kra n yibeqqayen sɣur baba-s i yebɣa ad yefk i yemma-s. Tameṭṭut-nni tilemẓit, tejgugel deg yiɣil n mmi-s. Tettexbibiḍ, tettru, tettɛeggiḍ, tessawal i lɣit s yiwet n tɣuct yettergigin. Ababat yerfa mačči d kra, yesseḍ, yerkeb-it ujenniw. S yiwen n ufus, yeṭṭef aqrur seg yiɣil, s wayeḍ yekkat tameṭṭut-is i wakken ad tserreḥ i mmi-s. Sakin, yettuṭegger uqrur-nni ɣer lqaɛa. Iḥulfa i leqriḥ deg tayet-is. Yennekmac ɣef yiman-is, yeqmec allen-is. Imeṭṭawen n yemma-s reglen i waṭas n lweqt imeẓẓuɣen-is. Mi d-yuki, ur tt-yufi ara sdat-s. S lemṭul n wacḥal n wagguren, mi ara d-yesteqsi baba-s, Ccix Mbarek, yesrugmut kan kra n tririyin ideg s-yeqqar d akken ur tettɛeṭṭil ara ad d-tuɣal. Maca yiwen n wass, mi yeɛya seg yimeṭṭawen n uqrur-nni, yenna-as s yiwet n tɣuct tuqsiḥt : « Yemma-k ? Dayen… Temmut… Sfeḍ-itt seg wallaɣ-ik… I nekkini, baba-k, ur swiɣ acemma deg wallen-ik ? Sya d afella, wiya-k ad k-sleɣ tettmeslayeḍ fell-as… »

Seg wass-nni, yedder Lmehdi weḥd-s akked baba-s. Yernu iɣil i wacḥal n yiseggasen d akken yemma-s tewweḍ leɛfu n Rebbi.

Urǧin yecfi i baba-s, ulamma yiwet n tikkelt kan, yebder-d yemma-s sdat-s. Ayen i yessen fell-as irkelli, ugar n tugniwin tuqsiḥin i inejren deg wallaɣ-is, yeẓra-t seg yimi n Ɛmer Kerruc. Aneggaru-a, yufa-t acḥal d abrid daxel n texnibut. Yuɣ tannumi irewwel ɣer umkan-a, seg tmeddit-nni anda i s-yefka baba-s yiwet n ṭṭriḥa qessiḥet deg wussan yezrin.

Tikwal, mi ara yeffeɣ Ccix Mbarek ɣer lexlawi d tẓegwa n Ddehra yettnadi ɣef yimɣan ara yessexdem deg yisufar-ines, yettaǧǧa tasarut i mmi-s. Ass-nni, mi d-yuɣal seg uɣerbaz, yesseɛreq Lmehdi tasarut. Deg yiḍ-nni, mi d-yuɣal ubabat, yufa mmi-s yeqqim deg ṭṭlam sdat tewwurt, yesxenfir deg tsusmi. Yerkeb-it ujenniw. Yezwar uqbel s truẓi n tewwurt, yezzi-d sakin ɣer uqrur-nni. Yesber Lmehdi i tiyitwin timezwura. Yeqbel-itent am wakken d tarrut tamagnut ɣef ustehzi-ines. Maca iban d akken Ccix yebɣa ad yefk i mmi-s yiwet n temsirt iwumi ad yecfu i lebda. Dɣa, iserreḥ-as uqrur-nni d tazzla, yeffeɣ seg utemmu. Maca yelḥa kan kra n yisurifen almi i iḥulfa i usemmiḍ yessegres-as iḍarren-is. Deg trewla-ines, ur yufi ara lweqt ad yels irkassen-is. Anda ara d-yeddari ? Deg tazwara, yeqqunec ɣer yiwen n uɣarab n ṭṭabya, inehhet, yettmuqqul ɣer yal tama, imeẓẓuɣen-is ṭṭurcent. Yebda yekkat uneznaz, dɣa truḥ-as-d tikti ad yeffer daxel n lemqam.

Mi idegger tawwurt yezgan teldi, tesbek-it tugdi i kra n tsinin. Yemmekta-d yakk tiḥkayin-nni yessewhamen, yeffɣen seg tilawt i d-ttawin ɣef wuḍan yettwazedɣen s yiwaɣezniwen imelluẓa ur nrewwu. Yenɣa-t usemmiḍ, ur ifaq ara armi yufa iman-is yeqqunec ɣef yiwet n tgertilt n ṛṛafya, deg ṭṭlam. Akka i yeqqim yuki aḥric ameqqran n yiḍ, deg wallaɣ-is tezzin-d kra n tugniwin yessewḥacen.

Dagi i t-yufa umjahed yiwet n tmeddit umbaɛd n uɣelluy n yiṭij. Mi d-yuɣal seg ssyada, tamuẓiḍt tneṣṣef s yiwtal d tsekrin, urɛad yewwiḍ ɣer ugni armi iwala lexyal n yilemẓi teffeɣ-d seg teẓgi. Imi yuɣ tannumi s ṭṭlam, yeɛqel-it s sshala. Yessawel-as-d, iɛeṭṭel ameslay yid-s, yernu ihedder yid-s s yiwet n leḥnana urǧin tt-iwala ɣur-s. Yettwassen umjahed-nni s wurfan-ines d teqseḥ n yimeslayen-is. Imezdaɣ n udcir xeddmen iwumi zemren i wakken ur ttnaɣen ara yid-s, wa ad qqimen mtawan.

Umbaɛd umeslay ɣef wacḥal n yisental mebla lmeɛna, yebder-d yemma-s n uqrur s yiwet n tɣuct yettergigin, tamuɣli-ines tsewweq akin. Yules-as-d amek i tt-yessen. Truḥ-d ɣur-s yiwet n tmeddit s yimeṭṭawen, tesqerbeb ɣef tewwurt-is, tḥellel-it ad iɣit argaz-is, Ccix Mbarek. Wwin-t sin n yimjuhad, gullen deg-s ad t-zlun.

Deg yiḍ-nni, uqbel ad yekker, ad iruḥ, mi s-yefka Ɛmer Kerruc yiwen n uwtul, yenna-as ad isellem ɣef baba-s, yebɣa Lmehdi ad t-yesteqsi ma yessen tansa n yemma-s. Maca iḥulfan akked tugdin n win d wumi yettmeslay, sgugmen-t.

Kra n wussan umbaɛd tmettant n Ccix Mbarek, yemmuger-it-id Ɛmer Kerruc sdat tḥanut, umbaɛd tazwart taɣezzfant i d-yewwi ɣef umerḥum, yenna-as-d s yiwet n tɣuct yeččuren s leḥnana n tbabat :

— Ayɣer ur d-tettaseḍ ara ad tɛiceḍ ɣur-i a mmi ? Keččini d awḥid, axxam-inu meqqer, yernu arraw-inu amzun d atmaten-ik…

— Tanemmirt-ik a Ssi Ɛmer, ttxemmimeɣ ad ruḥeɣ ɣer yemma.

— Teẓriḍ anda tettili tura ?

— Ad tt-id-afeɣ…

— D ayen yelhan ara txedmeḍ. Yemma-k d tameṭṭut yelhan, d tasedda yenḥafen deg tudert-is. Qelleb fell-as, ad tili teḥwaǧ ad d-taf argaz am keččini ara ibedden ɣer tama-s.

Maca deg tallit-nni yufa-d Lmehdi yiwet n tɣawsa ara yettin tudert-is, d tin i t-yesḍemɛen s yimal ifazen, yernu meɛlum d taɣawsa-agi ara s-isettun tudert-is tamirant.

Yiwet n teɣri ur yezmir ad ibedd deg wudem-is tjebbed Lmehdi ɣer lemqam. Yeldi kan tawwurt, skikḍent yinzaren-is rrwayeḥ n ccmeɛ yerɣan akked treɣla. Yuẓa-d ɣer uẓekka, yekna ɣef yidis ayeffus, yeqleɛ tincirin s ẓẓur. Sakin, s yiwen n ufus yettergigin, yeddem-d yiwen n urusfus i yečča uɣebbar, yessuffeɣ-d isebtar d tiyemmusin timeẓyanin, yesrusuy-itent ɣef tmurt. Iɣil-is yekcem ugar deg uceqqiq yettnadi tiwreqtin ixussen. Iɣil-is yekcem armi d tayet. Amruj-nni, yettbin-d lqay, ulac acu i t-ireglen. Yessaɣ tacemmaɛt, yesseqreb-itt ɣer lfetḥa, yesmal aqerruy-is i wakken ad iwali mliḥ ayen yellan daxel, ahat ad yessaweḍ ad iwali lqaɛ-is.

Maca daxel-nni, anagar ilem, tasusmi d ṭṭlam i yellan. Isuɣ s leɛqel, yeɛreq ssut-nni deg yiwen n unina yettwakeblen imir-n kan. Teccirew tfekka-ines. Mi s-d-yuɣal unina n tɣuct-is, uɣalen-as-d imir-n kan yimeslayen n Ccix Mbarek ɣer yimeẓẓuɣen-is. Yemmekta-d yiḍ-nni asemmaḍ asmi s-yekcef yiwen n uderwic ɣef tilin n yiwet n tgennarit i yessuffuɣen, am wakken i d-ttalsen, ɣer Mekka. Iḍ-nni, aḍu yetsuḍu s ẓẓur ɣef ugni, yewwi yid-s kra n yimeslayen i d-yenṭeq s leɛqel, ahat ur yumin ara yis-sen. Maca simmal yettimɣur, simmal tzeddeɣ tikti deg wallaɣ n Mbarek amɣar, armi yesɛedda agguren ineggura n tudert-is d anadi deg yal axmuj yellan deg tewrirt, yessaram ahat ad d-yaf ifri-nni amakun.

Yemmekta-d Lmehdi asmi s-d-yules baba-s taqsiḍt-nni n temɣart i t-id-magren yiwen n yiḍ, temla-as-d tilin n yiwen n lbir aman-is twabeṛken, acku usan-d srid seg Bir zemzem. Yiwet n tmeṭṭut tacrift truḥ-as taqedduḥt asmi tella deg lḥiǧ deg Mekka, mi d-tuɣal tufa-tt tettɛummu ɣef waman n trest-nni. Ugar n waya, aman-a d ddwa ḥellu, zemren ad seḥlun, Sidi-Lmexfi yessexdam-iten akken ad isejji yis-sen imuḍan-is.

Yeḥka-as-d uderwic-nni acaraf, mi idewwer aqerruy-is i wakken ad imuqel amkan-nni ideg yella yiri n trest-nni, ɛlaḥsab tamɣart-nni, kra n tasinin kan, tameṭṭut-nni teɣba, ad as-tiniḍ d anu uffir i tt-yesbelɛen. Kra n wussan umbaɛd, iqesser d yiwet n temɣart yewwḍen ṭamet n tmerwin n yiseggasen deg tudert-is