Super Saiya

Super Saiya (jatorrizko japonieraz 超サイヤ人 edo Sūpāsaiyajin ^?) edo Goi Gerlaria euskarazko bertsioan, Dragoi Bola manga eta animean Saiya arrazaren eraldaketa bat da. Indar handiagoa ematen duen eraldaketa fisikoa da eta normalean aldaketa hau min handi baten edo haserre aldi handi baten ondorioz ematen da. Fisikoki aldaketak gertatuko zaizkio ilearen luzeran eta kolorean; kolore eta luzera ezberdinak izan ditzake mailaren arabera. Masa muskularra eta begien kolorea ere aldatzen dira.

Super Saiyaren kondaira

Freezerren sagan, Vegetak saiyen kondaira bat aipatzen du. Honek dioenaren arabera, 1000 urtean behin beste Espazioko Gerlari guztiek baino borroka indar askoz handiagoa duen bat agertzen da. Odola eta borroka maite omen ditu. Mangan ezagutu aurretiko azken Super Saiya Dragoi Bolako kronologiaren arabera 0 urtearen aurreko 288. urtean agertu omen zen eta kaosa eta txikizioa zabaldu omen zituen unibertsoan. Kondaira hau ezagututa eta saiyen indarra zein abiaduratan gehitzen zen ikusita Freezerrek Vegeta Planeta deuseztu eta Espazioko Gerlariekin amaitzea erabaki zuen.

Elezahar honek Super Saiya bakarra aipatzen du, baina seriean zehar hainbat pertsonaiak lortuko dute borroka maila hau. Suaren borroka (Toei Animation) izeneko filma, Dragoi Bola Zren 8. filma, kondaira honetaz baliatzen da Broly izeneko Super Saiya oso indartsu bat sortzeko. Filmetan bakarrik agertzen den Super Saiya hau kondairako Super Saiya dela esaten da.

Super Saiya mailak

Hainbat Super Saiya maila daude.

Super Saiya 1

Super Saiya 1 (jatorrizko japonieraz 超サイヤ人1 edo Sūpāsaiyajin 1 ^?) egoeran gerlariak lehen aldaketa bortitza jasaten du. Bere indarra 50 aldiz handiagoa da, ileak hori kolorea hartzen du eta altxatu egiten da, begiak berde kolorekoak bihurtzen dira. Saiyen harrokeria nabarmen hazten da egoera honetan. Eraldaketak gerlariari bihotzean sentimendu garbi bat sortzen dio eta honekin batera baita sentimendu askoren arteko nahasketa bat ere, amorru kontrolaezin bat sortuz. Gokuren kasuan, hau Freezerrek Krilin hiltzean ikusi zen. Vegetaren kasuan ezin zuelako jasan Goku Super Saiya bilakatzea eta bera ez. Vegeta motibatu egin zen bere bihotzean gaiztotasun sentimendu puru bat aurkitzean.

Maila hau lortu dutenak:

• Goku
• Vegeta
• Etorkizuneko Trunks/Trunks
• Son Gohan/Etorkizuneko Son Gohan
• Broly
• Son Goten
• Gotrunks
• Vegeku
• Gogeta
• Goku Jr.
• Vegeta Jr.

Super Saiya Dai Ni Dankai

Super Saiya Dai Ni Dankai (~第2段階 ^?, ~ Bigarren etapa esan nahi du): Super Saiyatik pauso bat harago. Masa muskularra eta indarra handiagoak dira. Maila hontara iristeko Super Saiya egoeran egindako entrenamendu gogorra behar da. Vegeta eta Trunksek lortzen dute Denbora eta Espazioaren gelan entrenatu ostean. Trunksek eraldaketa hau erabiliko du etorkizunera itzuli eta ziborrak eta Cell akabatzeko.

Maila hau lortu dutenak:

• Vegeta
• Etorkizuneko Trunks
• Goku

Super Saiya Dai San Dankai

Super Saiya Dai San Dankai (~第3段階 ^?, ~ Hirugarren etapa esan nahi du): maila honen indarra ikaragarria da, baina masa muskularraren handitzearen ondorioz erabiltzaileak abiadura galtzen du, erreflexuak galtzen ditu, nekatu egiten da eta oso azkar ahultzen da, beraz eraldaketa hau akastuna dela esan genezake. Trunks forma honetan Cell garaitzen saiatu zen baina bere akatsak Celli bidea ireki zion. Vegetak ere bazuen forma hau hartzeko ahalmena, baina akatsa izan zitekeela konturatzen da. Goku ere berdinaz konturatzen da.

Maila hau lortu dutenak:

• Etorkizuneko Trunks
• Goku

Super Saiya Full Power

Super Saiya Full Power (jatorrizko japonieraz 超サイヤ人フルパワー ^?, japonierazko ahoskera mugatuan Sūpāsaiyajin Furu Pawā): Super Saiya Dai San Dankai baten goreneko indarra baina abiadura eta erreflexuak galdu gabe eta energia gehiagorekin. Seriean lehen aldiz Gokuk Cell Perfektuaren aurka burutu zuen borrokan ikusten da. Eraldaketa hau Gokuk garatzen du eta Son Gohani, biek denbora luzez maila hau eustea lortuko balute, indarra izugarri haziko litzatekeela azaltzen dio. Beraien entrenamendua eraldaketa egun guztian jasatea zen. Entrenamendu honi esker Super Saiyaren kontrol erabatekoa lortzen da, harrokeria eta amorrualdi gabe eta energia galera gutxiagorekin.

Maila hau lortu dutenak:

• Goku
• Son Gohan

Super Saiya 2

Super Saiya 2 (jatorrizko japonieraz 超サイヤ人2 edo Sūpāsaiyajin 2 ^?) egoeran Full Power egoerako indarra baino 10 aldiz handiagoa da (Vegetarengan indarra askoz gehiago biderkatu zen Goku eta Majin Vegetaren arteko borrokan ikusi zen bezala) eta entrenamendu gogor baten ostean (Goku eta Vegetak legez) edo sumindura leherketa baten ondoren (Son Gohan bezala) lortzen da. Gerlariaren ilea oso tente jartzen da, hori kolorekoa izaten jarraitzen du eta gainera kopeta eta bekainek gogor itxura handiagoa hartzen dute. Auran distira elektrikoak ageri dira eta askoz distiratsuagoa da. Begiak berde argiagoak dira. Gerlariaren harrotasuna asko hazten da.

Forma hau lortu zen lehen aldia Cellen Jokoan izan zen, Son Gohanek lortu zuen. Cellek bere lagunak nola erasotzen zituen eta Zibor 16 nola akabatzen zuen ikustean, segundu batzuteako lapsus baten ondoren, izugarrizko sumina atera eta Son Gokuren indarra harrigarriro gainditu zuen. Cellen osteko bake urteetan Gokuk eta Vegetak ere maila hau lortu zuten.

Maila hau lortu dutenak:

• Son Gohan
• Goku
• Vegeta

Super Saiya 3

Super Saiya 3 (jatorrizko japonieraz 超サイヤ人3 edo Sūpāsaiyajin 3 ^?) Gokuk Beste Munduan egindako entrenamenduari esker lortutako maila da. Forma honetan indarra ikaragarri hazten da baina energia kontsumoa oso handia da, beraz, oso nekagarria eta ezegonkorra da eta ezin zaio denbora askoz eutsi. Ilea asko luzatzen da; Gokuri gerritik beherago. Aura zirkularragoa da eta distira elektrikoak dauzka. Asko kostatzen da maila hau lortzea eta gehiago denbora luzez irautea. Misteriotsuki gerlariaren bekainak desagertu egiten dira (muskuluen handitzearen ondorio izan daiteke). Gokuk ez du maila hau Vegetaren aurkako borrokan erabiltzen, oraindik ez baitzuen guztiz kontrolatzen eta bere Lurreko egonaldia laburragoa izan zitekeelako, energia kontsumo altuaren ondorioz behar baino lehenago amiatuko zitzaiolako denbora. Horregatik maila hau %100ean, Gokuk azalduko duen moduan, Beste Munduan bakarrik erabil daiteke, han ez baititu izaki bizidun batek dituen mugak, edo bestela oso gogor entrenatu beharko litzateke Lurrean.

Lehen aldiz Boo Ahaltsuaren aurka erabiliko du maila hau.Indar honekin deabrua akabatuko zukeen ez balitz honen birsortzeko ahalmenagatik. Gotrunksek ere maila hau lortu zuen Denbora eta Espazioaren gelan Super Booren aurka. Ezaugarriak Gokurenaren berdinak dira, baina Gotrunksek ez du halako kalparrik, baina ilea luzeagoa duela ematen du, belaunetarainokoa (izan ere Gotrunks ez dauka Gokuren altuera). Gotrunksek ere ezin du denbora luzez iraun maila hau, 5 minutu eskas, baina bere kasuan indarraren gehikuntzak fusioaren denbora mozten duelako da. Gotrunks Super Saiya 3ren indarra Gokuren egoera horretakoa baino txikiagoa da, Hildegarnen aurkako borrokan ikusi zen bezala (pelikula batean bakarrik).

Maila hau lortu dutenak:

• Goku
• Gotrunks

Filmetan bakarrik

Toei Animation estudioak sortutako filmetan beste bi maila ageri dira, mangan eta anime seriean sekula agertu ez direnak:

• Giji Super Saiya (jatorrizko japonieraz 擬似超サイヤ人 edo Giji Sūpāsaiyajin ^?), Erdi-Super Saiya ere deitua, Son Goku Super Saiya pelikulan Gokuk Slugen aurka egindako borrokan hartzen duen maila da. Bere aura hori kolorekoa da baina ez da eraldatzen, ilea tentetzen zaio baina ez zaio kolorea aldatzen eta irisa desagertu egiten zaio.

• Kondairako Super Saiya (jatorrizko japonieraz 伝説の超サイヤ人 edo Densetsu no Sūpāsaiyajin ^?) Suaren borroka eta Bikote arriskutsua!! Super gerlariek ez dute atsedenik filmetan Brolyk darabilen maila da. Masa muskularra Super Saiya Dai San Dankai batena baino gehiago hazten da, aurak kolore hori berdexka bat hartzen du eta irisak desagertzen zaizkio.

Dragoi Bola GTn bakarrik

Super Saiya 4

Super Saiya 4 (jatorrizko japonieraz 超サイヤ人4 edo Sūpāsaiyajin ^?) Dragoi Bola GTn bakarrik ageri den maila da. Espazioko Gerlari baten maila definitiboa da, eta gerlaria maila honetara iristeko Super Ozaru mailatik pasa behar da (horretarako beharrezkoa da saiyak buztana izatea). Super Ozaru maila hartuta gerlaria bere burua kontrolatu eta indar gehiago biltzeko gai bada, Super Saiya 4 egoerara pasa ahal izango da, forma normalera itzuliz. Gerlariaren itxura ezberdina da kasu bakoitzean: ile asko ateratzen zaio gorputzean eta gerlariaren arabera arrosa kolore ilunekoa (Goku) edo gorri bizia (Vegeta) eta buruko ilearen kolorea beltza (Goku) edo marroi gorriska (Vegeta) bihurtzen da. Maila honetan duten indarra Super Saiya baten goreneko indarra da. Kanpo laguntzarik gabe maila hau lortu zuen bakarra Goku izan zen. Vegetak Bulmak asmatutako makina bat behar zuen blutz izpiak gehitzeko, ez baitzeukan buztanik.

Bada, hala ere, polemika bat maila honen eta Super Saiya 3ren artean: Gokuk, maila biak lortu zituen saiya bakarra, Super Saiya 4 maila denbora luzez jasan zezakeen, baina inoiz ez zen izan gai (ezta gorputz nagusia zuenean ere) Super Saiya 3 maila denbora luzez mantentzeko. Hau Boo Ahaltsuaren aurkako azken borrokan ikus daiteke; Gokuk indarra gehitu beharrean ahuldu egiten da eraldaketa galdu eta betiko itxurara itzuliz. Azalpen bat izan liteke Super Saiya 3 maila lortzen duenetik Super Saiya 4 lortzen duenera arte 15 urte igarotzen direla, nahikoa denbora entrenatuz Super Saiya 3 maila kontrolatzeko eta baita 4a lortzeko ere. Haur gorputzarekin Gokuk indar asko galtzen du Vegeta Umeren aurkako borrokan ikus daitekeen bezala (Super Saiya 3 maila minutu gutxi batzuez bakarrik iraun dezake) baina Super Saiya 4 egoeran nagusiaren gorputza hartzen duenez, gai da egoera hori mantentzeko.

Gokuren aldaketa fisikoa haur gorputzetik nagusi gorputzera Super Saiya 4 bihurtzean ez dago batere argi. Ez da inoiz azalpenik ematen zergatik Gokuk Super Saiya 4 egoera galtzean haur bilakatzen den. Arropak ere tamainaren arabera aldatzen dira. Gauza harrigarriena lehen aldiz maila hau hartzean gertatzen da. Super Ozaru bilakatzean arropa guztia puskatu behar litzaioke (beti bezala) baina Super Saiya 4 bilakatzean arropa dauka berriz ere eta gainera bere gorputzaren tamainara egokitua. Honen justifikazio txiki bat ikus daiteke Super Ozaru bilakatzean bularraldeko arropa bakarrik hausten baitzaio. Eskuturretakoak, zapatak eta prakak bere horretan mantentzen dira bortizki Ozaru bilakatzen den arte. Dena dela, arropa aldaketa honek misterio bat izaten jarraitzen du. Esan beharra dago Gokuk Super Saiya 4 maila gainditu zuela Gohan eta besteek energia eman ziotenean Izar Bateko Dragoia menperatzeko. Honela biak maila berean jarri ziren Dragoiak bolak xurgatu zituen arte.

Maila hau lortu dutenak:

• Goku
• Vegeta
• Gogeta