Sei donne per l'assassino
|
C'l artìcul chè 'l è scrit in
Miranduléś |
 Sei donne per l'assassino
| ||
 La Claude Dantes in na figùra dal film | ||
| Siē dóni p'r al sasèṅ 1964 | ||
|---|---|---|
| Regìa: Mario Bava | ||
| Scritōr: Marcello Fondato Giuseppe Barilla • Mario Bava | ||
| Atōr: Thomas Reiner • Eva Bartok • Mary Arden Cameron Mitchell • Arianna Gorini • Lea Lander Claude Dantes • Luciano Pigozzi • Franco Ressel Franco Roussell • Massimo Righi • Harriet Medin Dante DiPaolo • Giuliano Raffaelli • Heidi Stroh | ||
| Müsica: Carlo Rustichelli | ||
| Léngua: Itagliàṅ | ||
| Dürä dal film: 84 minüt | ||
| Nasiōṅ: Itàglia • Frància • Germàgna | ||
Sei donne per l'assassino (Siē dóni p'r al sasèṅ) 'l è 'n thriller dal 1964 ad Mario Bava ch'l à fisâ al règhli dal “śal a 'l itagliàna”[1] cuma 'l nùmar dimóndi élt di masamènt, al fat ch'al sasèṅ al dróa di guànt négar e ch'al cópa sèmpar in dal manéri difarénti e cun dla cativèria ad c'l àtar mónd. Al film, ch'è stâ al prim tìtul dal gènar slasher dla stòria, in alóra 'l à fat sù sènt-vint-a-tri migliòṅ ad franc ma 'l è stâ dimóndi criticâ p'r al sò sadìśum.
'L è stâ girâ a Róma e pò distribuî anc a 'l èstar c'n i tìtui “Blood and Black Lace” in di Stat Unî, “Seis mujeres para el asesino” in Spaggna, “6 Femmes pour l'assassin” in Frància, “Blutige Seide” in Germàgna, “Seis Mulheres Para Um Assassino” in Purtugàl, e “Blod och svarta spetsar” in Śvèsia.
Al pès dal film in dua la Claude Dantes la vîṅ andgàda in dla vasca da bagn 'l è stâ druâ a 'l inìsi dal film Matador ad Pedro Almodóvar in dal méntar ch'al prutagunìsta al s fà na pugnéta guardànd-'l a la televiśiòṅ.
Sunt
Massimo Morlacchi (Cameron Mitchell) e la cuntésa Cristiana Cuomo (Eva Bartok) i èṅ i pruprietàri dna cà 'd mòda. Quànd la Cristiana la cata in 'n armàri 'l cadàvar 'd una dal sò mudèli, l’Isabella (Francesca Ungaro), strusàda da 'n sasèṅ cun la ghigna quaciàda da 'n capùs biànc, 'l ispetōr Silvestri (Thomas Reiner) al fà dal dmandi a tut par saltàr-'g-an fóra e al vèn a savēr che la dóna l'éra l'amànta ad 'n antiquàri, Franco Scalo (Dante Di Paolo). Pôc tèmp dòp, durànt na sfilàda, n'atra mudèla amìga dla vitma, la Nicole (Arianna Gorini) la cata 'n diàri cun scrit dèntar di quèi dimóndi brut e di segrét su tut. Dòp avér-al tòlt sèg, la ragàsa la ciàma a 'l telèfun Franco, amànt anc ad lì lē, par dir-ag ch'la gh vōl cunsgnàr al diàri ma a 'l apuntamènt a s preśénta al sasèṅ ch'al la fà fóra c'n un tirapùgn sénsa savēr però ch'in cal méntar la Peggy (Mary Arden), mudèla anca lē, la gh 'l iva tòlt da la burséta.
La Peggy la s fà scarusàr a cà par Marco (Massimo Righi), un stilìsta drugâ pódag inamurâ 'd lē, pò quànd 'l ispetōr Silvestri al la ciàma par dir-ag che la Nicole l'è sparìda, lē la decìd ad bruśàr al diàri sénsa imaginàr-as ch'al masadōr 'l è drē a 'ndàr-la a catàr. Quànd chi lò al riva lè al la liga strica a na scrana, pò al gh bruśa na maṅ atàc a na stua e al la cópa.
'L ispetōr al fà ciamàr subìt tut i mémbar masć d'l atelier, Scalo, al marchéś Riccardo Morelli (Franco Roussell), Marco, Massimo Morlacchi e Cesare Lazzarini (Luciano Pigozzi), àtar stilìsta. Ma quànd la Greta (Lea Lander) la pèrd la vita armagnénd sénsa fiâ parchè al sasèṅ al gh'iva mis un cusèṅ in fàcia dòp che lē l'iva catâ 'l cadàvar dal Peggy in dal baùl dla sò màchina, Silvestri 'l è custrét a lasàr lìbar tut chi óm.
Culegamènt estéran
Nòti
- ↑ Alberto Pezzotta. Mario Bava. Milano, Il Castoro Cinema, 1995.