Funtàna di dū fiùm
|
C'l artìcul chè 'l è scrit in
Miranduléś |
La funtàna di dū fiùm l'è na funtàna 'd Mòdna fata da 'l scultōr e pitōr mudnéś Giuseppe Graziosi da 'l 1936 a 'l 1938. La s cata in Larg Garibàldi darènt a 'l teàtar Storchi.
La ciàpa 'l nóm da i dū fiùm dla pruìnsa 'd Mòdna: al Sécia, in dal sò banda sinìstra a 'l cunfîṅ cun 'l Arśàṅ, e 'l Panâr, in dla sò banda dèstra a 'l cunfîṅ c'n al Bulgnéś.
L'è stada inauguràda al 25 ad Luj dal 1938 par festegiàr la custrusiòṅ d'l aquedót nóṿ, su inisiatìva dal pudèstà 'd in alóra Guido Sandonnino[1].
Stòria
La funtàna l'è misa insìma a dal vaschi a sérć impilàdi una su cl'atra, in umàǵ a 'l gust rasiunalìsta mudèran, da la più granda ch'la stà in bas a la più pìcula ch'l'è ad sōvar, in manéra che l'àqua la vaga pò in śò pasànd da vasca a vasca.
Da 'l dū bandi l'artìsta al gh'à mis dū statṿi 'd brónś ch'i rapreśéntan i fiùm sitadèṅ, al Panâr e 'l Sécia, ch'i guàrd'n in dla diresiòṅ giùsta[2].
La statṿa dal Panâr, fata a mudèl dal spurtìṿ Franco Soffritti[3], la guàrda a èst vèrs Bulógna e la vèrsa dl'àqua da 'n arśōł pugià su la sò còsa sinìstra. Cun la maṅ dèstra al tîṅ un spróc pigâ da drē lung la schina.
La statṿa dal Sécia, vultàda a òvest in diresiòṅ dal sèntar stòric, la figùra na śōvna ch'la tîṅ dal spighi ad furmènt su la sò spàla sinìstra e da 'd lè a vîṅ fóra l'àqua. C'n al pē dèstar la pista 'n ròsp, sìmbul dal fiùm ch'al riva in dla basa.
Nòti
- ↑ Funtàna di dū fiùm Graziosi Around
- ↑ Funtàna di dū fiùm Mudnéś Visit Modena, 7 'd Utóbar dal 2019
- ↑ A sòṅ la fiōla dal Panâr Graziosi Around