John Keegan
Hanesydd milwrol o Loegr oedd Syr John Desmond Patrick Keegan OBE FRSL (15 Mai 1934 – 2 Awst 2012). Bu'n awdur nifer o lyfrau poblogaidd ar hanes milwrol, yn olygydd amddiffyn The Daily Telegraph, ac yn ddarlithydd yn Academi Filwrol Frenhinol Sandhurst am 25 mlynedd.[1]
| John Keegan | |
|---|---|
| Ganwyd | 15 Mai 1934  Clapham |
| Bu farw | 2 Awst 2012 Kilmington |
| Dinasyddiaeth | y Deyrnas Unedig |
| Alma mater |
|
| Galwedigaeth | newyddiadurwr, hanesydd milwrol, hanesydd, athro |
| Cyflogwr |
|
| Adnabyddus am | The First World War |
| Gwobr/au | OBE, Cymrawd o'r Gymdeithas Frenhinol a Llenyddol, honorary doctor of the University of Bath, Marchog Faglor, doctor honoris causa |
Ganwyd yn Llundain, ac yn ystod y Blitz cafodd ei ddanfon i Taunton fel ifaciwî. Pan oedd yn 13 oed, cafodd twbercwlosis orthopedig ac o ganlyniad ni ymunodd â'r lluoedd arfog.[2] Astudiodd hanes yng Ngholeg Balliol, Prifysgol Rhydychen, ac yna gweithiodd yn llysgenhadaeth yr Unol Daleithiau yn Llundain. Penodwyd yn ddarlithydd hanes milwrol yn Sandhurst ym 1960 a darlithodd yno hyd 1985.[3]
Cyhoeddwyd ei lyfr mawr cyntaf, The Face of Battle, ym 1976. Roedd llawer o'i waith yn ymdrin â'r hen gwestiwn o achosion rhyfel, a pham bod dynion yn ymladd. Yn A History of Warfare, a gyhoeddwyd ym 1993, dadleuodd bod gwrthdaro milwrol yn draddodiad diwylliannol a bod rhyfel diarbed yn yr 20g yn eithriad i hyn.[2] Canolbwyntiodd Keegan ar brofiadau'r milwyr cyffredin yn ogystal â'r cadfridogion a'r arweinwyr.[4] Cafodd ei recriwtio i'r Daily Telegraph ym 1986 gan y golygydd Max Hastings, i fod yn olygydd amddiffyn y papur newydd hwnnw. Ym 1994, cynghorodd Keegan Bill Clinton, Arlywydd yr Unol Daleithiau, wrth i'r byd ddathlu 50 mlynedd ers D-Day.[1]
Ymysg ei safbwyntiau dadleuol oedd ei farn bod y Rhyfel Byd Cyntaf yn "ddiangen",[2] a'i feirniadaeth lym o'r damcaniaethwr milwrol Prwsiaidd Carl von Clausewitz.[5] Cyhuddwyd Keegan hefyd o fod yn rhy Eingl-ganolog, er enghraifft yn ei honiad taw glaniadau Normandi, nid Brwydr Stalingrad, oedd methiant mwyaf Hitler ar faes y gad.[2]
Derbynodd OBE ym 1991 a chafodd ei urddo'n farchog yn 2000. Cafodd dau fab a dwy ferch â'i wraig Susanne.[1][3]
Llyfryddiaeth ddethol
golygu- The Face of Battle (1976) ISBN 0-670-30432-8
- Six Armies in Normandy (1982) ISBN 0-14-005293-3
- The Mask of Command (1987) ISBN 0-7126-6526-9
- The Second World War (1990) ISBN 0-670-82359-7
- A History of Warfare (1993) ISBN 0-679-73082-6
- Fields of Battle: The Wars for North America (1997) ISBN 0-679-74664-1
- The First World War (1998) ISBN 0-09-180178-8
- Intelligence in War: Knowledge of the Enemy from Napoleon to Al-Qaeda (2003) ISBN 0-375-40053-2
- The Iraq War (2004) ISBN 0-09-180018-8
- The American Civil War (2009) ISBN 978-0-09-179483-5
Cyfeiriadau
golygu- ↑ 1.0 1.1 1.2 (Saesneg) Military historian Sir John Keegan dies, aged 78. BBC (3 Awst 2012). Adalwyd ar 3 Awst 2012.
- ↑ 2.0 2.1 2.2 2.3 (Saesneg) Binder, David (3 Awst 2012). John Keegan, Historian Who Put a Face on War, Dies at 78. The New York Times. Adalwyd ar 3 Awst 2012.
- ↑ 3.0 3.1 (Saesneg) John Keegan, British military historian and scholar of the spirit of warfare, dies at 78. The Washington Post. Associated Press (3 Awst 2012). Adalwyd ar 3 Awst 2012.
- ↑ (Saesneg) Richards, Y Cadfridog Syr David (3 Awst 2012). Sir John Keegan was very much one of us. The Daily Telegraph. Adalwyd ar 3 Awst 2012.
- ↑ (Saesneg) Bassford, Christopher (Tachwedd 1994). John Keegan and the Grand Tradition of Trashing Clausewitz. War and History. Adalwyd ar 3 Awst 2012.