Anamlapira va tamava bad anyust-sanka (suterot)
VildeksNega ba 02/10/1872 koe London tozuwer. Phileas Fogg tir uxik dulapesaf is cobekaf is ekemaf nekev diveavafa linulara. To tabexaf bewik ke Reform rijay. Dum kotrielon banliz lanir aze va warzot koe fela belir. Banviele akoydanon kosmar da sedme lan opik anamlapira va tamavca bad anyust-sanka co rotir. To teliz ke Morning Chronicle fela bazecker, satcon zabduson va mana patavara gu redura va warzafa kelotafa sarva koe Barata azu guyundesira. Bat teliz va gonexulen zalor is tuelimar, is ugal adraf gu artlapira va kota widava mal London kal banliz dimlapira. Teliz vas budara va kot londonaf stuvusik vektar. Zalor koe wafra zo pintar : London az Suez az Mumbai az Kolkata az Hong Kong az Yokohama az San Francisco az New York az Liverpool az gire London, malsaveson va konaka gedrafa liziba dum tota ik kelot. Kotak va anyust-sanka dye co tiskir. Dene Reform rijay bat teliz ferdasir ise va atatcera wal Phileas is aryon bewik ke rijay askir, i wal bewik iltrakus va rotaskinuca ke zalor. Vugtan va bata patavara folid. Fogg tir ombusik is stuvusik, dere tir antaf olkik folis da mancoba tir roskuna. Bam va morbeks vas 20 000 pound talolk vankabur, trabe vas lik ke intafa tufa. Larde metan krafiackar, pune dulzundar : « Englik va mana zolonaca dum morbeks somekrander ». Vielu morbeks fu zo vankabur, pune do tanoy zanisik davon djukumallapir. Va britanafu kelu abdi 21-e bartiv van Paris sielon mallapir. Kaliafa patavara bazecker da cugafa evla dim London watason va morbeks titir siel ke 21-e ke santoleaksat ba 20-e lizukafe bartiv is apu. Fogg opik vanyer elimapaf gu kotcoba askina ise trakur da ede kotcoba di zo tenekar, pune in lajuskutur. Sedme in, « meabdiwinuca somekrulder ». Geltruca moneditir da mana ruyera kiover. Wazdeteson va cenera, inafa remeluxaxa koo koto greeltxo dikiso va britanafo gindaxo di zo trigayer : Suez az Barata az Hong Kong az Tanarasokeem azk-. Koe London morbeks ke Fogg is mallapira va jontiku bu koe feleem tukotrad kiren bata stuva nutir oviskapafa kapbure sare : inafa koyara dace veliton zo voralar. Kogrupara va in gan britanaf ardial dace zo bokar kiren in nuer kase Fogg co tir yatesik kabdion nabeyes va Englafe Omeltxe. Batdume Fogg gan Fix kogrupasik remi koyara mali Suez zo suzdatar. Koe Suez bantan va Passepartout zanisik kakever voxe me bazer dume. Va foxiegacka me dadir nume va sin me rovosoper ise anton rosuzdar.  Liwot va anamlapira ke Phileas Fogg is dositik Taneaf greelt ke koyara ke Fogg is Passepartout kan impadimak skayniskon zo raplekud. Koe Brindisi koe Italia va gantatota van Suez koe Misra rundanyad, i van Suez is inaf narilt oxam taneasteyen weti barda is noves va anamlapirapa va Afrika. Banlizu kali Mumbai koe Barata, koyara va san-baroy viel tiskir liz kapbure torefa patavara wavemon artlapid. Kan impadimak wal Mumbai is Kolkata, va britanafa Barata remlapid. Banlizo kan fuzol tulon koyad ise gradilon linulad, giwason div teyak va Aouda W-ya jotaf nyobrik fure anteyan koe wida bal alkaf ezgalday ta migafa firvira pu lorik. Moi bata stuva, koe Kolkata Fix ardialik va koyasik volmiv koflintar voxen Fogg is Passepartout amuled nume va koyara rodakid, dositanon gan Aouda W-ya. Koe Hong Kong va sint volins griuziad kiren Fogg voldum Passepartout va tota vane Nipona me lajurundayar. Bantel va unesik koe Yokohama koe Nipona ker lize arti abic viel zo kevlapir inde zalor ke fela abdiwiyir. Batedje Passepartout va riva ke widava seguyur numen batcoba va Fogg di evodapayar. Va gantatota vane San Francisco koe Tanarasokeem tere rundanyad aze va Pacifika welfa remlapid. Banliz artlapid viele liburugal : volvura koe widava gazar. Fogg gan lan Stamp Proctor vonkik zo motcar. Sin va widava kan impadimak bulud voxe va bantan koe omaze katrasid. Fogg va in rwamar edje impadimak gan amerindiikafa dilfura zo vukisir. Passepartout zo stoler. Pomanon gan yon remiik ke impadimak, Fogg tunuyatason goparler. Fix va sin dun laiter. Voxen impadimak sugin mallapir numen sin va ar impadimak gotrasid. Lodame govoked, pune va ara liziba fu malsaved, i va italkiraf impadimot koo azekapa lize suka gidupur. Numen ko Omaha widava kalion artlapid. Djupowatason va morbeks, va zalorack is Chicago abdiwiyina widava bam katrasid. Va New York tere artlapid lize va gantatota van Guazafa Tadava di rundanyad. Tawavopafa is opafa dulapera tir satcafa, kan yon katcalaks ke pwadesik, tulon : « Arti lerdka radimi mallapira va Yokohama, Phileas Fogg va acku ke tawavaf poz dye al exuleyer. Tire General-Grant tota ba 23-e ke santaneaksat va anyust-saneafa mialerpa kaiklapiyir, i va mialerpa koe geuk arkumon ice London. Ke rodadina anyust-sanka, tire va alub-sanka al faveyer numen anton tol-san-anyustka wan tiyir. Voxen gokatcalat da kore bat koyasik ba acku ke mialerpeem oxam tigiyir, pune va toloya bareaca ke kotaf zalor tire loote al kotaskiyir ». Toloy koredik va tota vane Liverpool biwe kelud. Fogg me pikser ise wan laner da va cenera di rowar, nume va gantatota mal New York lizukedur. Larde redakik va vanstara kal Liverpool kalvewar, pune Fogg va varaf drig dere lizukedur enide zdarion di artlapir. Sin mallapid voxe isti koyara va yeld kadimion gracid. Kotcoba don jontika intaxa ke tota va gestura va inafe cade kumskur. Mil balemoy stuvusik va Engla lajupartlapid voxen to viele va nuga mo britanaf siday aykad, pune Fix va ageltucafa pilkoma basitalkar. Me tir koyackasik vols ardialik laites va Fogg uculen gu raklera va omelt num otcera il patecta. Acum Fogg koe Liverpool zo koflintar. Voxen Fix turkon vofar da rokler kiren tel gunackik gan ardial ixam al zo soper. Fogg zo nuspar voxe wan godanedir da artlapison va London va morbeks rowar : « Weti barka Phileas Fogg tiyir gomilasik laitepen gan ardial voxe re tir sintaaf fanik solokseropon skus va diveavafa koyara anam tamava ». Fogg is soli va impadimak male Liverpool vane London gracad ; bam erur da va lizimeltasiko van kelu di beitur, kore trakur da va morbeks ixam al drasur. Va London artlapir, trakuson da gemelt tir gaversaf nume den int rontion lapir, me auzuson va rijay. Denlanir voxe me tir antaf : gan Aouda W-ya zo dositar. Bam sin welidad da mali kakevera koe Barata va sint renad. Bak afizcek Passepartout auzur aze pebur da oviskafa morbera su zo war. Fogg trakur da gaverson su artlapid voxen tire bad per-san-lerdoy viel al skud nume wayad ! Phileas Fogg den Reform rijay wilupon lakir, wazdeteson da su jupekar ! « Numen Phileas Fogg va morbeks su wayar. Bad anyust-sanka va bata anamlapira va tamava al kotaskiyir ! Batenide va kota liziba al malsaveyer : va gantatota is ara totinda is impadimak is direm is impadimot is fuzol. Mile diveavafe weltikye va intyona ribiegafa duga ke wontuca is tageltuca koe bata arienta al vokeyer. Voxen kaikeon ? Va tokcoba nope bata koyara al wayar ?» Pwadesik tuelimar da va rena al trasir ; Aouda W-ya al askir da in di vanpir « tele lokalafe ayikye ». Yunkexa va berpot
Dere rupel
|
 Moek ke francavafa xantofa piskura, 1872 | ||||||||||||||||
