Virginia Beach (Virxinia)
 | Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
 Virginia Beach | |||||
|---|---|---|---|---|---|
 | |||||
| |||||
| Alministración | |||||
| País |  Estaos Xuníos | ||||
| Estaos |  Virxinia | ||||
| Tipu d'entidá |
ciudad independiente (es)  | ||||
| Alcalde de Virginia Beach, Virginia (es) | Bobby Dyer | ||||
| Nome oficial | Virginia Beach (en) | ||||
| Nome llocal | Virginia Beach (en) | ||||
| Nomatu |
The Resort City (en) Neptune City (en) | ||||
| Códigu postal |
23451 | ||||
| Xeografía | |||||
| Coordenaes | 36°51′02″N 75°58′40″W / 36.8506°N 75.9779°O | ||||
  Virginia Beach Virginia Beach (los EE.XX.)  | |||||
| Superficie | 1288.515927 km² | ||||
| Altitú | 7 m[1] | ||||
| Llenda con | condáu de Northampton, Norfolk, Chesapeake y condáu de Currituck | ||||
| Demografía | |||||
| Población | 459 470 hab. (1r abril 2020) | ||||
| Porcentaxe | 5.32% de Virxinia | ||||
| Densidá | 356,59 hab/km² | ||||
| Viviendes | 172 452 (31 avientu 2020) | ||||
| Más información | |||||
| Fundación | 1906 | ||||
| Prefixu telefónicu |
757 | ||||
| Estaya horaria | Horariu del este de Norteamérica | ||||
| Llocalidaes hermaniaes |
| ||||
| virginiabeach.gov | |||||
 | |||||
Virginia Beach ye una ciudá del estáu estauxunidense de Virxinia. Ye, colos sos 449.628 habitantes (estimación pal 2013 del U.S. Census Bureau), la ciudá más poblada del estáu y la trentena novena mayor de tol país. Allugada na costa atlántica del país, na ensenada de Chesapeake, ta incluyida nel área metropolitana de Hampton Roads. Ésta, nomada tamién America's First Region (la primer rexón d'América), inclúi tamién les ciudaes de Chesapeake, Hampton, Newport News, Norfolk, Portsmouth y Suffolk y delles otres entidaes de población menores (villes, condaos...).
Virginia Beach ye una ciudá turística con playes perestenses y cientos de hoteles, moteles y restaurantes a la vera d'elles. La ciudá agospia, añalmente, el campeonatu de surf de la costa este (East Coast Surfing Championships) y el campeonatu estauxunidense de fútbol-playa. Tien, amás, varios parques naturales y fasteres costeres protexíes, y ye la sede de dos universidaes, de delles corporaciones empresariales y trés bases militares. Ta peraverada tamién al cabu Henry (Cape Henry), que foi aú se posaron per primer vegada, en suelu americanu, los colonos ingleses que'l 26 d'abril de 1607 fundaron l'asentamientu de Jamestown, el primeru en tierres de los actuales Estaos Xuníos. La ciudá, qu'apaez nel Llibru Guinness de los Récores como la que tien la playa turística mayor del mundu, de 28 milles (46 km) de llonxitú, asítiase nel estremu meridional del complexu de túneles y pontes de la bahía de Chesapeake (Chesapeake Bay Bridge-Tunnel), que ye'l mayor del mundu.
Xeografía
[editar | editar la fonte]Virginia Beach allúgase na rexón centruatlántica de los Estaos Xuníos, na fastera suroriental del estáu de Virxinia, y llenda al este col océanu Atlánticu y al norte cola bahía de Chesapeake. Ésta, na xuntura cola desembocadura del ríu James, forma'l mayor puertu natural del mundu. Esa condición fízola un sitiu afayaízu p'acceder, al traviés d'ella, a la colonia de Virxinia dende la so fundación. Un aristócrata inglés, Henry Wriothesley, conde de Southampton, financió delles espediciones a esa colonia, y la bahía foi nomada, n'honor d'elli, Earl of Southampton's Roadstead (rada del conde de Southampton), magar que dempués empezó a llamáse-y Hampton Roads. Anguaño hai un complexu de puentes y túneles de 37 km de llonxitú que traviesa'l puertu y xune les ciudaes de Hampton, Newport News, Williamsburg y Poquoson y los condaos de Gloucester, James City y York, asitiaes al norte de la bahía, coles ciudaes de Virginia Beach, Chesapeake, Norfolk, Portsmouth, Suffolk y Franklin y los condaos de Isle of Wight y Southampton, allugaes al sur d'ella. El territoriu alministráu pola ciudá ocupa un área de 1.290 km² d'estensión, lo que fai d'ella la mayor del estáu. El so altor mediu ye de namái 3,7 m sobro'l nivel de la mar. El so territoriu drena a la bahía de Chesapeake al traviés del ríu Lynnhaven y los sos afluentes.
La ciudá forma parte del área metropolitana de Hampton Roads (nomada oficialmente área metropolitana estadística de Virginia Beach-Norfolk-Newport News), que ye, con 1.676.370 habitantes, la trentena cuarta mayor de los Estaos Xuníos. Abarca les ciudaes de Norfolk, Virginia Beach, Chesapeake, Hampton, Newport News, Poquoson, Portsmouth, Suffolk, Williamsburg, toes de Virxinia, y los condaos virxinianos de Gloucester, Isle of Wight, James City, Mathews, Surry y York, amás del de Currituck, que pertenez a Carolina del Norte. Magar que Virginia Beach ye la ciudá más poblada del área metropolitana, funciona realmente como un suburbiu de la mesma. La ciudá de Norfolk ye'l distritu financieru y el centru d'ella, demientres que Virginia Beach y Williamsburg tienen una economía especializada nel sector turísticu.
Clima
[editar | editar la fonte]El clima de Virginia Beach ye subtropical húmidu. Los inviernos son suaves, con pocos díes de nieve. Los branos son caldios y húmidos, con tardes fresques. Les estadístiques climátiques son les del aeropuertu internacional de Norfolk, asitiáu nel estremu noroccidental del territoriu de Virginia Beach. La temperatura media añal recoyida nelli ye de 15,3ºC, con unes precipitaciones de nieve de namái 150 mm al añu. Les de lluvia, pela so banda, son de 1.200 mm, y recuéyense mayormente en primavera y branu. La temperatura más alta rexistrada nel observatoriu del aeropuertu foi de 41ºC, en xunetu de 2010, y la más baxa de -19ºC, en xineru de 1985. La situación de la ciudá, apartada del recorríu de les principales tormentes, ye perfavorable, y ello favoreció el so desarrollu como destinu turísticu. Ta más al sur de la zona barrida poles tormentes de nieve que castiguen llatitúes más septentrionales que la de so, y ta mui al norte pa ser alcanzada polos principales furacanes y tormentes tropicales. La única esceición foi'l furacán Isabel, qu'aportó a la ciudá en 2003.
Historia
[editar | editar la fonte]Los chesapianos, de los que malpenes sabemos nada, yeren los habitantes primitivos de la rexón. En 1607, dempués d'un viaxe de 144 díes, trés barcos mandaos pol capitán Christopher Newport y tripulaos por 105 homes y neños baxaron a tierra nel llugar aú l'océanu Atlánticu s'axunta cola boca meridional de la bahía de Chesapeake, na fastera nororiental del territoriu de l'actual Virginia Beach. Nomaron al sitiu cabu Henry (Cape Henry) n'honor de Henry Frederick, príncipe de Gales y fíu mayor del rei Xaime I d'Inglaterra. Tres dellos díes los colonos abandonaron la zona, porque traíen órdenes d'instalase nún llugar tierra adentro que tuviera más abellugáu ante los posibles ataques de barcos d'otros países europeos. Asina, fundaron, tres subir pel cursu del ríu James (nomáu así n'honor del rei Xaime), el primer asentamientu permanente européu n'América del Norte, que nomaron Jamestown tamién pa honrar al so rei.
Los siguientes años foron aportando a la zona bien de colonos d'Inglaterra. En 1634, lo que yá yera colonia de Virxinia foi sodividida nos sos ocho condaos originales. Ún de los primeros colonos, Adam Thoroughgood, que yera nacíu nel condáu inglés de Norfolk y convirtiérase n'alcalde de la ciudá d'Elizabeth, una de les primeres que se fundaran na colonia, foi'l responsable de que les tierres qu'arrodian l'actual ciudá de Virginia Beach recibieran el nome de New Norfolk County (nuevu condáu de Norfolk) en 1637. Al añu siguiente el condáu foi dixebráu en dos, Upper Norfolk County (pronto renombráu como Nansemond County) y Lower Norfolk County, que comprendía la zona asitiada al sur de la boca de la bahía.
En 1691 el condáu del sur de Norfolk sodividiose en dos: el condáu de Norfolk y el de la Princesa Ana (Princess Anne County). Esti últimu yera el más oriental del territoriu al sur de la boca de la bahía (nomada yá d'aquella Hampton Roads), y comprendía el territoriu que diba dende la llende con Carolina del Norte hasta la boca de la bahía, incluyendo tola fastera costera que miraba pal océanu Atlánticu. El condáu caltuvo'l so nome dende 1691 hasta 1963.
El pueblu turísticu de Virginia Beach foi medrando dientro d'esi condáu. El so espoxigue entamó a finales del sieglu XIX, y viose perfavorecíu pola llegada del ferrocarril y la lletricidá en 1888. Esto permitió l'apertura del hotel Princess Anne na primer llinia de playa, a la vera d'un pueblín nomáu Seatack. El centru turísticu algamó l'estatus de ciudá (incorporated town) en 1906, y garró nuevu puxu tres de l'apertura, en 1922, del bulevar de Virginia Beach, que s'estendía dende Norfolk hasta la ciudá y la vera l'océanu. Nos 45 años siguientes la ciudá popularizose como destinu turísticu, y abriéronse casinos y instalaciones d'ociu familiar. Virginia Beach independizose del condáu en 1952, algamando l'estatus de ciudá independiente (independent city). En 1963 les dos entidaes xuniéronse, tres del alcuerdu de la población espresáu nún referendu, pa formar una nueva ciudá independiente que caltuvo'l nome de Virginia Beach. Esta, con más territoriu pa la so espansión, convirtióse na ciudá más populosa de la zona tres de crecer un 50% ente 1980 y 1990. Esa tasa amenorgó nos años siguientes, pero la diversificación de la so economía, el desarrollu del so downtown y el puxu del so sector turísticu faen de la ciudá, en pallabres del que yera so alcalde en 2005, "una ciudá vibrante onde la xente vive, aprende, trabaya y se divierte".[2]
Economía[3]
[editar | editar la fonte]Virginia Beach, magar que debe la so sonadía al so calter de centru turísticu, tien tamién otres fontes de riqueza:
- un sector agroindustrial importante. Hai 172 granxes na ciudá, asitiaes nel sur del so territoriu, que producen soya, hortalices, trigo, productos llácteos...
- les sos bases militares. Tien cuatro nel so territoriu: la Oceana Naval Air Station, con 12.000 emplegaos; la Little Creek Naval Amphibious Base, con 13.000 emplegaos; Fort Story, con 1.200 emplegaos; y Dam Neck, con otros 4.700. A la vera d'elles hai delles delegaciones d'empreses de defensa, y una bayura de tiendes y empreses de servicios pa cubrir les necesidaes de los soldaos y marinos que trabayen neses bases.
El sector turísticu, sicasí, entá ye perimportante pa la economía de la ciudá. Más de seis millones de turistes aporten a la ciudá cada añu pa descansar nes sos playes y esfrutar de la bayura de tiendes y restaurantes de la ciudá. Pa complementar la so ufierta la ciudá inauguró en 2005 un centru de congresos.
El sector industrial complementa los anteriores. La ciudá ye la sede de les delegaciones pa los Estaos Xuníos de delles compañíes foriates (Kettler, Stihl, SERCO), y hai nella dellos centros manufactureros. Hai tamién un sector importante de servicios sanitarios, siendo'l hospital Sentara, con más de 5.000 trabayadores, el mayor d'ellos.
Enllaces esternos
[editar | editar la fonte]- (n'inglés) Páxina web oficial de la ciudá Archiváu 2013-08-23 en Wayback Machine
- (n'inglés) Información de la ciudá na web del estáu de Virxinia
- (n'inglés) Páxina web oficial turística de la ciudá (Virginia Beach Convention & Visitors Bureau)
Referencies
[editar | editar la fonte]- ↑ URL de la referencia: https://it-ch.topographic-map.com/map-xvgf5k/Virginia-Beach/?center=36.74983%2C-76.05742&zoom=19&popup=36.75015%2C-76.05725.
- ↑ DeShantz-Cook, Lisa, Mueckenheim, Jacqueline, Swartout, Kristy (ed.), Cities of the United States, 5th edition, vol. 1, p. 644. Detroit, Thomson Gale, 2006.
- ↑ Los datos d'esti apartáu tán sacaos de la publicación Virginia Beach 2014 Community Profile, disponible pa la so consulta y descarga en http://www.yesvirginiabeach.com/Business-Environment/Documents/2014%20Community%20Profile.pdf
Datos: Q49259
Multimedia: Virginia Beach, Virginia