Francos salios

Pa ver otros usos d'esti términu, Francos.

Los francos salios yeren parte del pueblu xermanu de los francos qu'habitaba, a mediaos del sieglu III d. C., nel valle inferior del ríu Rin, nos actuales Países Baxos y noroeste d'Alemaña Alemaña.

Hai dos hipótesis sobre l'orixe del so nome:

Pue venceyase col ríu Ijssel (forma antigua Isala, como otros cursos d'agua Isère, Yser, Isar), col xermánicu see, «el mar», o col tamién xermánicu i sala que significa «agües escures». Nesos casos, el nome Salios deberíase al topónimu mentáu.
Pue venir de la ciudá de Saló, güei Overijse, en Bélxica. Esta segunda teoría tien en contra'l fechu de qu'Overijse llamábase entós Isca.

Como tolos pueblos xermánicos, hasta'l so mestizaxe colos pueblos románicos d'Europa nos sieglos siguientes, nun tuvieron rexistros históricos escritos, una y bones la escritura rúnico de los xermanos usábase con fines puramente relixosos.

La so historia previa a l'adquisición de la escritura conozse al traviés de la tradición oral (mayoritariamente de calter míticu y, poro, de duldosa credibilidá). La primer historia escrita de los francos ta nel llibru Histoire des francs, obra de Gregoriu de Tours, Obispu de Tours dempués santificáu, quien nació y morrió nel reinu francu de Neustria (Riom c. 538 – Tours c. 594). Según esta crónica, que ye parte d'una historia eclesiástica reproducida nun manuscritu del sieglu VIII, el primer Duque o Rei de los francos salios foi Faramundu.

Historia

Ocupaben un territoriu llacustre na confluyencia del Vecht y el Ijssel, el Sallzee, que pasó a denomase na Edá Media'l Salland. Un territoriu na llende de la tierra, l'agua duce y l'agua salao. Sía que non nacieron colos pies nel agua, sobre una tierra anfibia; d'ehí esta lleenda de Merovéu, descendiente d'una bisarma marina. Eso resume bien el so orixe: los salios seríen acuáticos.

Hasta 287 o 288 los salios, lo mesmo que les otres naciones xermániques, alternaben incursiones sobre les llendes del imperiu romanu con alcuerdos militares (foedus) con él. Pero en tala fecha Maximianu, el colega de Dioclecianu, decidió entartallar a tolos que s'opunxeren a Roma. Viendo llegar escontra él a un exércitu romanu imbatíu dende facía dellos años, el rei saliu Xenobaudu aceutó sometese ensin combate xunto con tol so pueblu. Maximianu aceutó la so rindición ya instaló a los salios en Toxandria, al pie de la desaguada del Rin col estatutu de Foederati (pueblos somorguiaos a l'autoridá imperial). Protexíos pola paz romana, medraron y estendiéronse al oeste, a lo llargo del mar del Norte.

Clodión.

Hubo delles rebeliones escontra esta condición de federaos, pero siempres foron reprimíes pol exércitu romanu. Inclusive hubo continxentes de salios nes espediciones de Constanciu Cloru y de Constantín, en 293 y en 306, respeutivamente.

Nel sieglu V el so xefe, Clodión llevólos a ocupar la zona ente Arrás y Cambrai, con capital en Tournai, au permanecieron hasta la dómina de Clodovéu I. Con éses dende les provincies de Xermania Inferior y Gallia Belgica, au dalgunos de los sos «reis» teníen el títulu de dux o duque, los salios constituyeron de siguío un reinu que s'estendió nel sieglu VI sobre la mayor parte de la Galia.

Cultura

La so llingua pertenecía a la familia de llingües baxo fránciques. Los salios fueron parte de los fundadores de la cultura y sociedá holandesa xunto a los frisones y batavios. Según eruditos modernos, como Robinson, la so llingua evolucionó al holandés.

Les tribus salies constituyeron una confederación laxa, na que negociaron xuníos cola autoridá romana. Cada tribu taba compuesta por grandes grupos familiares, axuntaos alredor d'una familia principal. La importancia de les obligaciones de familia taba regulada pol Derechu sálicu, qu'esclariaba qu'un individuu nun tenía nengún derechu a proteición nel casu de nun ser parte d'una familia.

Los salios quedaron absorbíos polos francos, y la so identidá perdiérase en tiempos de los carolinxos.

Relixón

La mitoloxía y la relixón yeren paganes. Les sos creencies politeístes perduraron hasta la conversión de Clodovéu al cristianismu.

Lleis

Los francos salios recoyeron por escritu les sos lleis nel añu 511, lleis que na so mayor parte correspondíen al Derechu de familia, nel Pactus legis salicæ. Nel sieglu XVI el rei francés Enrique IV resucitó parte d'esta llexislación pa estremar de la llinia socesoria al so rival, Isabel Clara Euxenia, ñeta d'Enrique II de Francia y fía de Felipe II d'España. Sicasí, tou apunta a que tomó a los salios como fonte de llexitimidá y non porque ente ellos hubiera tala llei. De magar, la Llei Sálica ye sinónimu de la discriminación femenina nes llinies socesories a un tronu real en toa Europa.

Ver tamién

Referencies

Enllaces esternos

Wikimedia Commons tien conteníu multimedia tocante a Francos salios.