Denominación d'Orichen Protechida Aceite Sierra de Moncayo

A Denominación d'Orichen Protechida Aceite Sierra de Moncayo ye una denominación d'orichen protechida aragonesa sobre l'aceite d'oliva virchen extra de gran calidat en o somontano d'a sierra de Moncayo, en a provincia de Zaragoza. S'estableixió a denominación d'origen en l'anyo 2000 y a seu d'o Consello Regulador ye situada en Magallón.

Oliveras en Ambel

Orichens

A olivera fue introducida en ista zona gracias a o comercio a través d'o río Ebro mientres l'Imperio romano. I hai estudios arqueolochicos sobre troballas de lucernas con decoracions d'oliveras datadas en o sieglo I en a redolada de Tarazona, lo que permite estableixer un vinclo d'ista zona con a producción d'aceite.

As primeras referencias escritas sobre o cautivo de l'olivo se troban manimenos en zaguerías d'o sieglo XIV en un texto sobre una transacción comercial:

[...] Inés Martínez Plou qui, [...] sinya un alcuerdo con Jehuda Abenluengo, meyau o mes d'abril de 1368, que afecta a dos vinyals y un olivar [...] En lo relativo a la olivera, s'abonará cada árbol con una carga de fiemo (bella cosa mas de 150 kg). A entrega d'as olivas se ferá a piet d'árbol [...]

En o sieglo XVII en as ordinacions d'o reglamento y gubierno d'a ciudat de Borcha se puede trobar entre atras a siguient cita:

Item, estatuimos, que el tendero aya de comprar el azeyte de los vezinos de la Ciudad para vender en fu tienda; y que fi alguno rebaxare el precio, por lo menos un real por arroba, fiendo el tal azeyte bueno fe aya de vender aquel primero, y no fe pueda vender en dicha tienda azeyte de balfa de molino [...]

I hai tamién estudios reyalizaus ya en zaguerías d'o sieglo XVIII como o sinyau por García Manrique, “Las comarcas de Borja y Tarazona y el Somontano del Moncayo”, que dan datos estatisticos sobre a superficie de cautivo d'olivera en istas comarcas.

Redolada

A DO se troba entre as comarcas de Tarazona y Moncayo y Campo de Borcha, a l'ueste d'a provincia de Zaragoza (Aragón). Con mas de 2.500 hectarias d'oliveras y un total de 35 municipios a producción meya anyal ye de mas de 4,0 millons de kilos d'oliva. Controla a producción d'uns 2.500 chicoz olivicultors d'a zona.

Clima

As comarcas d'o semontano de Moncayo tienen un clima mediterranio continentalizau a on as precipitacions meyas anyals son d'entre 450-467 mm y se concentran mas que mas en agüerro y primavera.

As temperaturas meyas oscilan entre os 7 y os 14°C. As maximas temperaturas se rechistran entre os meses de chulio y agosto, plegando dica os 40°C y estando frecuents as tronadas. D'hibierno os meses d'aviento y febrero son os mas fredos, podendo arribar iste zaguero a rechistrar temperaturas minimas de -16°C.

Una caracteristica sinyalera de l'orache d'ista redolada ye o cierzo, viento cerenyo que bufa dende Moncayo mas que mas d'hibierno y primavera y que aduya a eliminar a formación de boiras baixas y rosadas, una caracteristica muit positiva pa las plantacions d'oliveras.

Demarcación cheografica

Os municipios incluyius en a Denominación d'Orichen son: Alcalá de Moncayo, Agón, Ainzón, Alberit de Sant Chuan, Albeta, Ambel, Anyón de Moncayo, Bisimbre, Borcha, Bulbuent, Bureta, Lo Bust, Los Fayos, Frescano, Fuent de Xalón, Grisel, Litago, Lituenigo, Magallón, Mallén, Maleixán, Malón, Novallas, Noviellas, Pozuelo d'Aragón, Santa Cruz de Moncayo, Sant Martín de la Virchen de Moncayo, Tabuenca, Talamantes, Tarazona, Torrellas, Trasmoz, Vera de Moncayo y Vierlas.

Caracteristicas

Variedaz

As dos variedaz prencipals son a empeltre, que ha d'estar un minimo d'o 70%, y l'arbequina, con un maximo d'o 25%. Tamién tienen una presencia minoritaria con un maximo d'un 5% as variedaz negral, royal y verdial.

Producción y comercialización

Almozaras

I hai un total de 5 cooperativas y almozaras productoras d'aceite d'oliva con DOP Sierra de Moncayo:

• Aceites Ambel (Bulbuent)
• Cooperativa Nuestra Señora del Pilar (Novallas)
• Cooperativa Santo Cristo de Magallón (Magallón)
• Sociedad Cooperativa Agraria San Atilano (Tarazona)
• Sociedad Cooperativa Agricola de Borja (Borcha)

Vinclos externos

• (es) Aceite de Moncayo
• (es) Aragón Alimentos Nobles
• (es) Revista Alcuza
• (es) Aceitedeolivas.com

• Datos: Q5656324