Judie du Plessis

Judie du Plessis op 20 Augustus 1967 toe haar vader, prof. Antoon Goossens, 'n erepenning van die Suid-Afrikaanse Akademie vir Wetenskap en Kuns ontvang. Hy was professor in plantkunde aan die PU vir CHO.

Judith (Judie) du Plessis (Jacobsdal, Oranje-Vrystaat, 16 November 1924 – Pretoria, 30 Desember 2003) was predikantsvrou in die Gereformeerde Kerk en ’n onderwyseres.

Opleiding

Judie Goossens se vader was prof. Antoon Goossens, 'n professor in plantkunde aan die PU vir CHO. Sy matrikuleer in 1940 aan die Hoërskool Gimnasium, Potchefstroom, met 'n onderskeiding in Duits en behaal die hoogste punte in Transvaal vir Afrikaanse letterkunde. Sy was 'n lid van die leerlingraad en het erekleure vir akademie verwerf.

Sy verwerf in 1943 die B.A.-graad aan die PUK, met onderskeiding in albei haar hoofvakke, Duits en Hollands (deesdae bekend as Afrikaans-Nederlands), en die U.O.D. (H.O.D.) in 1944 met lof. As student was sy lid van die bestuur van die Afrikaanse Nasionale Studentebond (ANS, later die Afrikaanse Studentebond), lid van die PUK se volkspele-demonstrasiegroep en kaptein van die damesjukskeispan. In 1944 wen sy die redenaarsbeker vir dames.

Loopbaan

In 1945 gee sy onderwys aan die Afrikaanse Hoër Meisieskool in Pretoria en die Hoër Huishoudskool in Potchefstroom, en in 1946 aan die Hoërskool Jan van Riebeeck in Kaapstad. Ná haar troue met dr. Sarel du Plessis gee sy onderwys aan die Laerskool Oliver Lodge op Vanderbijlpark en in Potchefstroom aan die Hoërskool Gimnasium, die Hoër Handelskool en die High School for Girls. In 1964 was sy 'n tydelike junior lektrise in Duits aan die PU vir CHO. Sy was in 1966 voorsitter van die PU-dameskring en was stigterslid en eerste voorsitter van 'n leesunie vir dames in Potchefstroom. Sy was in 1994 lid van die kektuurkommissie van die kerkraad van die Gereformeerde kerk Meyerspark, Pretoria.

Sy het van 1962 af gereeld boekresensies behartig en verskeie artikels vir Slingervel (die jeugblad van die Gereformeerde Kerk) geskryf. Sy het ook dikwels vertalings uit Afrikaans in Duits en omgekeerd gedoen en uit Engels in Afrikaans. Ná haar man se dood in 1972 het sy in Desember 1973 na Pretoria verhuis. In 1974 was sy werksaam in die visumafdeling van die departement van binnelandse sake. In 1975 gee sy onderwys aan die Lyttelton Manor High School in Verwoerdburg. Van 1976 tot met haar aftrede in Desember 1988 was sy verbonde aan die Transvaalse onderwysmediadiens as vakkeurder (Duits, Afrikaans en Nederlands).

Tussendeur was Du Plessis van 1946 tot Januarie 1958 predikantsvrou in die Gereformeerde Kerk in die gemeentes Port Elizabeth, Heidelberg-Volksrust en Vanderbijlpark. In 1958 het die gesien Potchefstroom toe verhuis toe haar man lektor aan die PU vir CHO word.

Huwelikslewe en afsterwe

Sy is op 19 Oktober 1946 getroud met Sarel Jacobus du Plessis (1920– 1972). Een van hul vier kinders was die sakeleier en politikus Kobus du Plessis. Judie is op 30 Desember 2003 in die ouderdom van 79 jaar in Pretoria oorlede en is in Pretoria (Oos-begraafplaas) begrawe.

Bron

• (af) Odendaal, Hubertus la Grange. 1995. Die familie Goossens.